ᐃᖃᓗᐃᑦ ᐃᓐᓇᒃᑯᕕᒃᒥᑦ ᐃᒡᓗᖃᖅᑐᑦ ᐊᓯᐊᓄᑦ ᓄᒃᑎᖅᑎᑕᐅᕗᑦ ᐃᖅᑲᓇᐃᔭᖅᑎᒋᔭᐅᔪᖅ ᓄᕙᒡᔪᐊᕐᓇᖅ-19-ᒥᒃ ᐋᓐᓂᐊᖃᑐᐃᓐᓇᕆᐊᖃᕐᓂᖓᓄᑦ

“ᑕᒪᓐᓇ ᐋᓐᓂᐊᕕᒡᔪᐊᕐᓇᖅ ᐊᓂᒍᓚᐅᖅᑎᓪᓗᒍ ᐊᒻᒪᓗ ᐃᖅᑲᓇᐃᔭᖅᑎᖃᕈᓐᓇᕐᓂᖅᒧᑦ, ᑖᒃᑯᐊ ᐃᒡᓗᖃᖅᑐᑦ ᐅᑎᕈᓐᓇᖅᓯᓂᐊᖅᑐᑦ,” ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓄᑦ ᐅᖃᖅᑎᒋᔭᐅᔪᖅ ᐅᖃᖅᑐᖅ

ᐃᖃᓗᖕᓂ ᐃᓐᓇᒃᑯᕕᖕᒥᑦ ᐃᒡᓗᖃᖅᑐᑦ ᐊᓯᐊᓄᑦ ᓄᒃᑎᖅᑎᑕᐅᓚᐅᖅᑐᑦ ᓲᖃᐃᒻᒪ ᐃᓐᓇᒃᑯᕕᒃᒥᑦ ᐃᖅᑲᓇᐃᔭᖅᑎᒋᔭᐅᔪᖅ ᓄᕙᒡᔪᐊᕐᓇᖅ-19-ᒥᒃ ᐋᓐᓂᐊᖃᑐᐃᓐᓇᕆᐊᖃᕐᓂᖓᓄᑦ, ᓄᓇᕗᒥᑦ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐅᖃᖅᑐᖅ. (ᐊᔾᔨᙳᐊᖁᑎᒋᔭᐅᔪᖅ)

By ᓄᓇᑦᓯᐊᕐᒥ ᐱᕙᓪᓕᐊᔪᑦ

For an English version of this story, see Iqaluit Elders’ Home residents transferred as staff isolates due to COVID-19 exposure

ᐃᒡᓗᖃᖅᑐᑦ ᐃᖃᓗᐃᑦ ᐃᓇᑐᖃᐃᑦ ᐃᒡᓗᖓᓂᒃ ᐊᓯᐊᓄᑦ ᓄᒃᑎᖅᑕᐅᓚᐅᖅᑐᑦ ᑲᒪᒋᔭᖃᕐᕕᖕᒧᑦ ᐋᓐᓂᐊᖅᑐᓂᒃ ᐱᓇᓱᐊᕈᓯᐅᑉ ᓄᙳᐊᓂᒃ, ᓲᖃᐃᒻᒪ ᐃᓐᓇᑐᖃᒃᑯᕕᒃᒥᑦ ᐃᖅᑲᓇᐃᔭᖅᑎᒋᔭᐅᔪᖅ ᐃᓄᑑᓐᓇᖅᑐᒦᑦᑕᕆᐊᖃᓕᓚᐅᕐᑐᖅ ᓄᕙᒡᔪᐊᕐᓇᖅ-19-ᒥᒃ ᐋᓐᓂᐊᖃᑐᐃᓐᓇᕆᐊᖃᕐᓂᖓᓄᑦ, ᐅᖃᖅᑐᖅ ᓄᓇᕗᒥᑦ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ.

“ᐅᓇ ᐃᒡᓗᖃᕐᕕᐅᔪᖅ ᓄᒃᑎᖅᑎᑦᑎᔭᕆᐊᖃᓚᐅᖅᑐᖅ 6-ᓂᒃ ᐊᓯᖓᓄᑦ ᐱᓕᕆᕝᕕᖕᒧᑦ ᑲᒪᒋᔭᐅᙱᓐᓇᕈᓐᓇᖁᓪᓗᒋᑦ,” ᑯᕆᔅ ᒐᒡᓕᐊ, ᐅᖃᖅᑎᒋᔭᐅᔪᖅ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓄᑦ ᐅᖃᓚᐅᖅᑐᖅ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ ᒪᐃ 9-ᖑᑎᓪᓗᒍ ᑐᓴᒐᒃᓴᓕᐅᕐᓂᒃᑯᑦ.

ᑎᓴᒪᓐ ᑲᒪᒋᔭᐅᔾᔪᑎᖃᕆᐊᖃᖅᑐᑦ ᓄᒃᑎᖅᑕᐅᓂᐊᖅᑐᑦ ᐊᒻᐸᓯ ᕗᐊᔅᑦ ᐃᓐᓇᑐᖃᕐᓄᑦ ᐊᖏᕐᕋᖃᖅᕕᖕᒧᑦ ᐋᑐᕚᒥ, ᐅᖃᖅᑐᖅ.

ᒪᕐᕉᒡᓕ ᑲᒪᒋᔭᐅᓕᖅᑑᑦ ᐊᓯᐊᓂᒃ ᓄᓇᕗᒥᑦ, ᐅᖃᖅᑐᖅ.

“ᒫᓐᓇᓕ ᖃᐅᔨᒪᙱᑦᑐᒍᑦ ᖃᑯᒍ ᐃᓐᓇᑐᖃᕐᓄᑦ ᐊᖏᕐᕋᕆᔭᐅᔪᖅ ᐃᖃᓗᖕᓂ ᐊᐅᓚᑕᐅᒃᑲᓐᓂᕐᓂᐊᕆᐊᒃᓴᖓᓂ,” ᐸᒡᓕᐊ ᐅᖃᖅᑐᖅ. “ᑭᓯᐊᓂᓕ, ᑖᓐᓇ ᐋᓐᓂᐊᕕᔨᔪᐊᖃᕐᓇᖅ ᐊᓂᒍᖅᐸᑦ ᐊᒻᒪᓗ ᐃᖅᑲᓇᐃᔭᖅᑎᖃᕈᓐᓇᑦᑎᐊᕈᑎᒃ ᑖᒃᑯᐊ ᐊᖏᕐᕋᖃᖅᑐᑦ ᐃᑎᕈᓐᓇᖅᓯᓂᐊᖅᑐᑦ.”

ᓄᓇᕗᒥᑦ ᐊᖓᔪᖅᑳᖅ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓄᑦ ᓘᒃᑖᖅ ᒪᐃᑯᓪ ᐹᑐᓴᓐ ᐊᖏᒪᐅᖅᑐᖅ ᓄᒃᑎᖅᓯᓂᖅᒥᒃ ᓄᓇᕗᒥᑦ ᐃᓗᐊᓂ, ᐅᖃᖅᑐᖅ.

ᐃᒡᓗᖃᖅᑐᑦ ᓄᒃᑎᖅᑕᐅᓚᐅᖅᑐᑦ ᐊᓯᐊᓄᑦ ᐱᓕᕆᕝᕕᖕᒧᑦ ᐅᓪᓗᓂ 14-ᓂᒃ ᐃᓄᑑᓐᓇᖅᑐᒦᑦᑕᕆᐊᖃᖅᑐᑦ, ᐅᖃᖅᑐᖅ. ᐊᓯᖏᓪᓕ ᐃᒡᓗᖃᓚᐅᖅᑐᑦ ᓄᓇᖏᓐᓄᑦ ᐅᑎᕈᒪᔪᑦ ᐅᓪᓗᓂᒃ 14-ᓂᒃ ᐃᓅᑑᓐᓇᖅᑐᒦᑦᑕᕆᐊᖃᕐᓂᐊᖅᑐᑦ ᐊᖏᕐᕋᖏᓐᓂᒃ ᐃᓚᖏᓪᓗ.

ᒪᕐᕉᒃ ᐃᒡᓗᖃᖃᑕᐅᔫᑦ ᐋᑐᕚᒧᑦ ᓄᒃᑎᖅᑎᑕᐅᓚᐅᖅᑐᑦ ᓵᑕᒃᑰᖅᑎᑕᐅᓪᓗᑎᒃ ᒪᐃ 8-ᖑᑎᓪᓗᒍ. ᐊᓯᖏᓪᓕ ᒪᕐᕉᒃ ᓄᒃᑎᖅᑎᑕᐅᓪᓗᑎᒃ ᓵᑕᒃᑯᑦ ᒪᐃ 9-ᒥᑦ, ᐸᒡᓕᐊ ᐅᖃᖅᑐᖅ.

“ᒪᒃᕉᒃ ᐱᔨᑦᑎᕋᖅᑕᐅᔫᒃ ᐋᑐᕚᓕᐊᖅᑑᒃ ᐋᖅᑭᒃᑕᐅᓚᐅᖅᓯᒪᔫᑦ ᐊᒻᐸᓯ ᕕᐊᔅᒧᑦ ᓄᒃᑎᖅᑕᐅᓂᐊᖅᖢᑎᒃ ᓲᖃᐅᒻᒪ ᑲᒪᒋᔭᐅᓂᖅᓴᐅᔭᕆᐊᖃᓚᐅᕐᒪᑎ ᐊᓯᐊᓂ,” ᐅᖃᖅᑐᖅ.

ᓇᖕᒥᓂᖅ ᓴᐳᑎᓯᒪᓂᖅᒧᑦ ᐱᖁᑎᑦ ᐊᑐᖅᑕᐅᖃᑦᑕᖅᑐᑦ ᓄᒃᑎᖅᑎᑦᑎᓇᓱᓕᕌᖓᑕ “ᑭᒃᑯᓕᒫᑦ ᖃᓄᐃᖁᙱᖢᒋᑦ,” ᐅᖃᖅᑐᖅ.

ᑕᒪᕐᒥᒃ ᐃᒡᓗᖃᖅᑐᑦ ᓄᒃᑎᖅᑕᐅᔭᕆᐊᓖᑦ ᑲᐱᔭᐅᕌᓂᒃᓯᒪᔪᐃᓐᓇᐃᑦ, ᐅᖃᖅᑐᖅ.

ᐅᓇ ᓄᒃᑎᖅᑎᑦᑎᔪᒪᓂᖅ ᐱᓕᕆᐊᖑᓕᓚᐅᖅᓯᒪᔪᖅ ᐃᖃᓗᖕᓂ ᓄᕙᒡᔪᐊᕐᓇᖅ-19-ᒧᑦ ᐋᓐᓂᐊᑲᑕᓕᖅᑎᓪᓗᒋᑦ ᐄᐳᕉᑉ ᕿᑎᐸᓗᐊᓂᒃ, ᑕᕝᕙᓂᓗ ᒪᐃ 8 ᑎᑭᑎᓪᓗᒍ 74-ᖑᓇᐅᑦᑐᑦ ᐋᓐᓂᐊᖃᖅᑐᑦ.

Share This Story

(0) Comments

Join the Conversation

Your email address will not be published. Required fields are marked *

*