ᐃᖃᓗᐃᑦ ᐸᕐᓇᒃᐸᓪᓕᐊᓕᖅᐳᖅ ᐃᒃᓯᕋᕐᔪᐊᕌᐱᐅᑉ ᑎᑭᓛᕐᓂᖓᓂ

For English version, see Iqaluit starting to plan for Pope’s arrival

ᐃᖃᓗᐃᑦ ᐸᕐᓇᒃᐸᓪᓕᐊᓕᖅᐳᖅ ᑎᑭᓐᓂᐊᕐᓂᖓᓂ ᐃᒃᓯᕋᕐᔪᐊᕌᐱᒃ ᕗᕌᓐᓯᔅᒥ ᐳᓚᕋᖅᑎᓪᓗᒍ ᓄᓇᕗᒻᒥ ᐊᖓᔪᖅᑳᖃᕐᕕᖓᓄᑦ ᔪᓚᐃᒥ.

ᐃᒃᓯᕋᕐᔪᐊᓄᑦ ᐊᖓᔪᖅᑳᖃᕐᕕᖓ ᐅᖃᓚᐅᖅᐳᑦ ᑕᖅᑭᐅᓚᐅᖅᑐᒥ ᐃᒃᓯᕋᕐᔪᐊᕌᐱᒃ ᑲᓇᑕᒦᓐᓂᐊᕐᓂᖓᓂ ᔪᓚᐃ 24−ᒥ 30−ᒧᑦ, ᓄᖅᑲᕐᓂᖃᕐᓗᓂ ᐃᖃᓗᖕᓂ, ᐃᐊᑦᒪᓐᑕᓐᒥ ᐊᒻᒪ ᑯᐸᐃᒃ ᓄᓇᓕᐸᐅᔭᖓᓐᓂ. ᐃᒃᓯᕋᕐᔪᐊᓄᑦ ᐊᖓᔪᖅᑳᖃᕐᕕᖓ ᓱᓕ ᓇᓗᓇᐃᖅᓯᓯᒪᙱᓚᖅ ᓇᓕᐊᖕᓂ ᐅᓪᓗᕐᒥ ᐃᒃᓯᕋᕐᔪᐊᕌᐱᒃ ᐃᖃᓗᖕᓃᓐᓂᐊᕐᓂᖓᓂ.

ᐃᖃᓗᖕᓂ ᓄᓇᓕᐸᐅᔭᒥ ᑲᑎᒪᔨᐅᔪᑦ ᐅᖃᐅᓯᖃᓚᐅᖅᐳᑦ ᓂᕆᐅᒋᔭᐅᕐᔪᐊᕐᓂᐅᔪᒥ ᐳᓚᕋᕐᓂᐅᔪᒥ ᒪᐃ 24−ᒥ ᑲᑎᒪᔨᓄᑦ ᑲᑎᒪᓂᐅᔪᒥ.

ᑲᑎᒪᔨ ᔪᐊᓇᓯ ᐊᑯᒪᓕᒃ ᐅᖃᓚᐅᖅᐳᖅ ᖃᐅᔨᒪᓂᖓᓂ, ᑭᓇᑐᐃᓐᓇᒥᒃ ᐃᒃᓯᕋᕐᔪᐊᓄᑦ ᐊᖓᔪᖅᑳᖃᕐᕕᖓᓂ ᓱᓕ ᖃᐅᔨᒋᐊᖅᓯᓚᐅᙱᓚᑦ ᓄᓇᓕᐸᐅᔪᒧᑦ.

“ᐃᓱᒪᕗᖓ ᓄᓇᖃᖅᑎᒋᔭᕗᑦ. ᐅᑕᖅᑭᒐᓚᖕᒪᑕ ᖃᓄᐃᓕᖓᓂᐅᓂᐊᕐᓂᖓᓂ ᐳᓚᕋᕐᓂᐅᔪᒥ,” ᐊᑯᒪᓕᒃ ᐅᖃᓚᐅᖅᐳᖅ.

ᒪᐃᔭ ᑲᓂ ᐱᐅᓪ ᑭᖑᓂᐊᒍᑦ ᓇᓗᓇᐃᖅᓯᓚᐅᖅᐳᖅ ᑲᑎᒪᑎᓪᓗᒋᑦ, ᑎᑎᕋᕐᓂᐅᔪᒥ ᐱᓚᐅᖅᑎᓪᓗᒍ ᐊᐃᒥ ᐃᐅᓪᒍᔅᒪᒥ, ᓄᓇᓕᐸᐅᔭᐅᑉ ᐊᐅᓚᑦᑎᔨᖓ, ᐃᒃᓯᕋᕐᔪᐊᓄᑦ ᐊᖓᔪᖅᑳᖃᕐᕕᖓᓂ ᖃᐅᔨᒋᐊᕐᓂᖃᓚᐅᕐᓂᖓᓂ ᓄᓇᓕᐸᐅᔭᒥ ᐃᖅᑲᓇᐃᔭᖅᑎᐅᔪᓄᑦ ᑕᐃᑲᓂ ᐅᓪᓗᖓᓂ.

ᐱᐅᓪ ᐅᖃᓚᐅᖅᐳᖅ ᐃᒃᓯᕋᕐᔪᐊᓄᑦ ᐊᖓᔪᖅᑳᖃᕐᕕᖓᓂ ᐅᖃᐅᔾᔨᓚᐅᖅᐳᖅ ᐃᐅᓪᒍᔅᒪᒥ ᓄᓇᓕᐸᐅᔭᖅ ᐃᑲᔪᕆᐊᖃᕐᓂᐊᕐᓂᖏᓐᓂ ᐊᖅᑯᑎᓂ ᒪᑐᓯᒪᑎᑦᑎᓂᐅᔪᒥ ᐊᒻᒪᓗ ᖃᑦᑎᕆᔨᒃᑯᑦ ᑐᓂᓯᔭᕆᐊᖃᕋᔭᕐᓂᖏᓐᓂ ᓇᓗᓇᐃᖅᑕᐅᓯᒪᔪᓂ ᑐᐊᕕᕐᓇᖅᑐᒥ ᐊᒻᒪ ᑐᐊᕕᕐᓇᖅᑐᓕᕆᔨᓂ ᐃᒃᓯᕋᕐᔪᐊᕌᐱᖕᒧᑦ.

“ᐸᕐᓇᒃᓯᒪᕗᒍᑦ ᐊᒻᒪ ᐃᑲᔪᕈᒪᑦᑎᐊᖅᐳᒍᑦ ᐱᔪᓐᓇᕐᓂᑦᑎᓐᓂ … ᖁᕕᐊᓱᕐᔪᐊᖅᐳᖓ ᓄᓇᓕᐸᐅᔭᑦᑎᓐᓂ ᓂᕈᐊᖅᓯᓂᖓᓐᓂ ᐊᑕᐅᓯᐅᓗᓂ ᐃᓂᐅᓂᐊᖅᑐᒥ ᒪᒥᐊᕝᕕᒋᓂᐊᖅᑕᖓᓂ,” ᐱᐅᓪ ᐅᖃᓚᐅᖅᐳᖅ.

“ᓇᓗᓇᐃᖅᓯᔪᒻᒪᑦᑎᐊᖅᐳᒍᑦ ᐃᓚᒋᔭᐅᓂᑦᑎᓐᓂ ᑲᑎᙵᓂᐅᔪᒥᑦᑕᐅᖅ, ᑭᓯᐊᓂ, ᖃᐅᔨᒪᓚᐅᙱᓚᖓ ᑭᓯᐊᓂ ᒫᓐᓇᐅᔪᒥ.”

ᐃᒃᓯᕋᕐᔪᐊᕌᐱᐅᑉ ᐊᐅᓪᓛᕐᓂᖓᓂ ᑲᓇᑕᒧᑦ ᒪᓕᖕᓂᖃᖅᐳᖅ ᑲᑎᒪᓂᐅᔪᓂ ᐃᓚᐅᖃᑕᐅᔪᓂ ᐃᓄᖕᓂ, ᐊᓪᓚᖓᔪᓂ ᐊᒻᒪ ᐊᓪᓚᓂᑦ ᐃᒃᓯᕋᕐᔪᐊᓄᑦ ᐊᖓᔪᖅᑳᖃᕐᕕᖓᓂ ᒫᔾᔨᐅᑉ ᓄᙳᐊᓂ. ᑕᐃᑲᓂ ᑲᑎᒪᓂᐅᔪᓂ, ᒪᒥᐊᓚᐅᖅᐳᖅ ᐊᑐᕐᓂᖃᐅᑎᖓᓐᓂ ᑐᒃᓯᐊᕐᕕᒃ ᐱᓕᕆᓚᐅᕐᓂᖓᓂ ᐋᓐᓂᖅᓯᕆᓂᐅᔪᓂ ᓱᕈᓯᕐᓄᑦ ᑲᓇᑕᐅᑉ ᐊᐅᓪᓚᖅᑎᑕᐅᓪᓗᑎᒃ ᐃᓕᓐᓂᐊᕆᐊᖅᑎᑕᐅᕙᓚᐅᖅᑐᓂ ᐱᓕᕆᔾᔪᓯᖓᓂ.

ᑲᑎᒪᔨ ᕈᒪᐃᓐ ᓯᑏᕙᓐᓴᓐ, ᐃᖅᑲᓇᐃᔭᖅᑐᒥ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᒃᑯᓐᓄᑦ, ᐅᖃᓚᐅᖅᐳᖅ ᑲᑐᔾᔨᖃᑎᒌᖓ ᐊᒻᒪ ᓄᓇᕗᒻᒥ ᑐᙵᕕᒃᑯᑦ ᐃᓚᐅᖃᑕᐅᕌᓂᒃᓯᒪᕗᑦ ᓯᕗᓪᓕᖅᐸᐅᔪᒥ ᑲᑎᒪᓂᐅᔪᒥ ᐸᕐᓇᐃᓂᕐᒧᑦ ᐃᒃᓯᕋᕐᔪᐊᕌᐱᐅᑉ ᐳᓚᕋᕐᓂᖓᓂ.

ᓯᑏᕙᓐᓴᓐ ᐅᖃᓚᐅᖅᐳᖅ ᓄᓇᓕᐸᐅᔭᖅ ᖃᐃᖁᔭᐅᓪᓗᐊᓚᐅᖅᐳᑦ ᐅᑯᓄᖓ ᓯᕗᓪᓕᖅᐸᐅᔪᓂ ᑲᑎᒪᓂᐅᔪᓂ.

“ᐅᓇ ᐱᓕᕆᒃᓴᖃᕐᔪᐊᕐᓗᓂ ᖃᓄᐃᓐᓂᐅᓂᐊᖅᐳᖅ … ᓄᓇᓕᐸᐅᔭᐅᑉ ᐃᓚᖓ ᒥᑭᑦᑐᒻᒪᕆᑯᓘᓂᐊᖅᑐᒃᓴᐅᕗᖅ, ᑭᓯᐊᓂ ,” he ᐅᖃᓚᐅᖅᐳᖅ.

“ᓯᓚᒥ ᖃᓄᐃᓐᓂᖃᕐᓂᐊᖅᐳᖅ ᐊᒻᒪ ᐊᖏᔪᒻᒪᕆᐊᓘᓂᐊᖅᐳᖅ … ᐃᓱᒪᒧᑦ ᐊᒃᓱᕈᕐᓇᕐᓂᐊᖅᐳᖅ ᑭᐅᓂᐅᔪᒥ ᐳᓚᕋᕐᓂᐅᔪᒥ ᐊᖏᐸᓗᖕᓂᐊᖅᑐᒥ ᓄᓇᖃᖅᑎᐅᔪᓄᑦ.”

ᑲᑎᒪᔨ ᓴᐃᒪᓐ ᓇᑖᖅ ᐅᖃᓚᐅᖅᐳᖅ ᑕᑯᔪᒪᓂᖓᓂ ᐃᓱᒪᒧᑦ ᐋᓐᓂᐊᖃᕐᓇᙱᑦᑐᓕᕆᔨᐅᔪᒥ ᐃᓂᒋᔭᐅᔪᒥ ᐳᓚᕋᕐᓂᖃᖅᑎᓪᓗᒍ ᐊᑐᐃᓐᓇᖃᕐᓂᕐᒥ ᐃᑲᔪᖅᓱᐃᓂᐅᔪᒥ ᐆᒪᐃᓐᓇᕐᓂᑯᓄᑦ ᐊᒻᒪ ᐃᓚᖏᓐᓄᑦ.

ᐱᐅᓪ ᐅᖃᓚᐅᖅᐳᖅ ᑲᑎᒪᖃᑎᖃᓚᐅᕐᓂᖓᓂ ᐋᑐᕚᒥ ᑲᓇᑕᒥ ᐸᓖᓯᒃᑯᓐᓂ ᐃᓚᒋᔭᐅᔪᒥ ᐱᔾᔪᑎᖃᖅᑐᒥ ᐱᔨᑦᑎᕋᕐᓂᐅᑉ ᐱᑕᖃᕐᓂᖓᓂ ᓄᓇᓕᐸᐅᔭᒥ ᖃᓄᐃᓐᓂᖃᖅᑎᓪᓗᒋᑦ. ᐅᖃᓚᐅᕆᕗᖅ ᐃᓚᒋᔭᐅᔪᓂ ᐃᒃᓯᕋᕐᔪᐊᕌᐱᐅᑉ ᑲᑎᙵᓂᐅᔪᓂ ᓄᓇᓕᖕᒦᑉᐳᑦ ᐃᓂᒋᔭᐅᒧᒥ ᐳᓚᕋᒃᑲᓐᓂᕐᓂᕐᒧᑦ.

“ᑕᑯᓚᐅᖅᑎᓪᓗᒋᑦ ᐃᓂᒋᓂᐊᖅᑕᖓᓐᓂ, ᖃᐅᔨᒃᑲᓐᓂᐊᖅᐳᒍᖅᑲᐃ,” ᐱᐅᓪ ᐅᖃᓚᐅᖅᐳᖅ.

ᐱᐅᓪ ᐅᖃᓚᐅᖅᐳᖅ ᓄᓇᓕᖕᓃᔾᔮᙱᓐᓂᖓᓂ ᐃᒃᓯᕋᕐᔪᐊᕌᐱᐅᑉ ᑎᑭᓐᓂᐊᕐᓂᖓᓂ, ᑭᓯᐊᓂ ᒪᐃᔭᐅᑉ ᑐᖏᓕᖓ ᓵᓚᒪᓐ ᐊᕙ ᑐᙵᓱᒃᑎᑦᑎᓇᔭᖅᐳᖅ ᐃᓂᖓᓂ.

ᐅᓂᒃᑳᕆᓂᒃᑲᓐᓂᐅᔪᓂ ᓄᓇᓕᐸᐅᔭᐅᑉ ᐃᓚᐅᓂᖓᓂ ᐳᓚᕋᕐᓂᐅᔪᒥ ᐅᖃᐅᓯᐅᓂᐊᖅᐳᖅ ᒪᓕᒃᑐᒥ ᑲᑎᒪᔨᒃᑯᓐᓂ ᑲᑎᒪᓂᖓᓐᓂ, ᐱᐅᓪ ᐅᖃᓚᐅᖅᐳᖅ.

ᑕᐃᓐᓇ ᑲᑎᒪᓂᐅᔪᖅ ᐋᖅᑭᒃᑕᐅᓯᒪᕗᖅ ᔫᓂ 14−ᒥ, ᐅᖃᐅᓯᐅᓪᓗᓂ ᓄᓇᓕᐸᐅᔭᒥ ᐃᖃᓗᖕᓂ ᐃᑭᐊᖅᑭᕕᖓᓐᓂ.