ᐃᖃᓗᖕᓂ ᑎᑎᕋᐅᔭᖅᑎ ᑕᑯᕗᖅ ‘ᐱᔪᒪᓂᕐᔪᐊᖑᔪᒥ’ ᐱᖅᑯᓯᑐᖃᖅᑎᒍᑦ ᐃᓄᖕᓄᑦ ᑲᑭᓂᕐᓂᑦ

ᑲᐃᕋ ᕿᓚᕝᕙᖅ ᑐᕌᖅᐸᓪᓕᐊᕗᖅ ᐅᐃᓂᐱᐊᒡᔪᑦ ᑕᑕᑦᑎᐊᖅᑐᒥ ᐊᑭᖃᙱᑦᑐᓂ ᑲᑭᓃᑦ ᖃᓄᐃᓐᓂᐅᔪᒥ ᐱᓇᓱᐊᕈᓯᐅᓂᐊᖅᑐᒥ

ᐃᖃᓗᖕᓂ ᑲᑭᓂᕐᓂ ᑎᑎᕋᐅᔭᖅᑎ ᑲᐃᕋ ᕿᓚᕝᕙᖅ ᑐᕌᖅᐸᓪᓕᐊᕗᖅ ᐅᐃᓂᐱᐊᒡᒧᑦ ᐱᓇᓱᐊᕈᓯᓕᒫᕐᒥ ᖃᓄᐃᓐᓂᐅᔪᒥ ᐱᓕᕆᓂᐊᖅᖢᓂ ᐊᑭᖃᙱᑦᑐᓂ ᐱᖅᑯᓯᑐᖃᖅᑎᒍᑦ ᑲᑭᓂᕐᓂᑦ ᐃᓄᖕᓄᑦ ᐱᓕᕆᔾᔪᔾᔭᐅᕙᒃᑐᓂ. ᐊᐅᓚᑕᐅᓪᓗᓂ ᒫᓂᑑᐸᒥ ᐃᓄᖕᓄᑦ ᑲᑐᔾᔨᖃᑎᒌᖑᔪᒧᑦ, ᖃᓄᐃᓐᓂᖅ ᑕᑕᑦᑎᐊᓚᐅᖅᐳᖅ ᐃᓗᐊᓂ 30 ᒥᓂᑦᓂ ᐅᖃᐅᓯᐅᓂᖓᓂ, ᕿᓚᕝᕙᖅ ᐅᖃᓚᐅᖅᐳᖅ. (ᑲᐃᕋ ᕿᓚᕝᕙᖅ ᐊᔾᔨᓕᐅᖅᑕᖓ)

By ᒫᑕᓕᓐ ᕼᐊᐅᕕᑦᒧᑦ

For English version, see Iqaluit artist sees ‘big demand’ for traditional Inuit tattoos

ᑲᐃᕋ ᕿᓚᕝᕙᖅ ᐅᖃᖅᐳᖅ ᓂᕆᐅᓚᐅᖅᓯᒪᙱᓚᖅ ᐱᔪᒪᔭᐅᕐᔪᐊᕐᓗᓂ ᑲᑭᓂᕐᓄᑦ ᑎᑎᕋᐅᔭᖅᑎᐅᓂᕐᒥ ᐆᒃᑐᕋᑲᑕᓕᖅᑎᓪᓗᒍ ᐅᕕᓂᙳᐊᒥᑦ ᐊᕐᕌᒍᑦ ᖁᓕᐅᓕᖅᑐᓂ.

“ᑎᑭᓴᐃᓚᐅᖅᐳᖓ ᐱᒋᐊᓕᕋᑖᖅᑐᒧᑦ ᐱᓕᕆᔾᔪᑎᒥᒃ ᐊᒻᒪ ᐱᒋᐊᓚᐅᖅᐸᕋ ᐊᖏᕐᕋᓐᓂ ᐅᕙᓐᓄᑦ ᐱᔭᕆᐅᖅᓴᓇᓱᖕᓂᕐᒧᑦ ᐊᓕᐊᓇᐃᒋᓪᓗᒍ, ᑎᑭᐅᑎᓚᐅᖅᓯᒪᔾᔮᕋᓱᒋᙱᖦᖢᖓ ᑕᒪᐅᙶᓗᒃ ᐅᕝᕙᓘᓐᓃᑦ ᑕᐅᑐᙳᐊᕐᓇᖓ ᐃᒪᐃᑦᑐᙳᕋᔭᕐᓂᖓᓂ,” ᐃᖃᓗᖕᓂ-ᑐᙵᕕᓕᒃ ᑕᑯᒃᓴᐅᔪᓂ ᑎᑎᕋᐅᔭᖅᑎ ᐅᖃᓚᐅᖅᐳᖅ ᐅᖃᓘᑎᒃᑯᑦ ᐊᐱᖅᓱᖅᑕᐅᓪᓗᓂ.

“ᐃᓗᐊᖅᓯᔾᔫᒥᒐᒪ ᐊᒻᒪ ᐅᕙᓐᓂᒃ ᑲᑭᒻᓂᖃᑦᑕᓕᓚᐅᖅᐳᖓ ᐊᒻᒪ ᐃᓚᖏᓐᓂ ᐱᖃᓐᓇᕆᔭᓐᓂ ᐊᒻᒪ ᐃᓚᓐᓂ, ᐅᔾᔨᕆᓚᐅᖅᐳᖓ ᐱᔪᒪᓂᖃᕐᔪᐊᕐᓂᖓᓂ.”

ᒫᓐᓇ, ᐱᖅᑯᓯᑐᖃᖅᑎᒍᑦ ᐃᓄᐃᑦ ᑲᑭᓃᑦ, ᐅᕝᕙᓘᓐᓃᑦ ᑲᑭᓃᑦ, ᖃᐅᔨᒪᔭᐅᓂᖏᓐᓂ ᐃᓄᒃᑎᑐᑦ, ᐊᑕᐅᓯᐅᓪᓗᓂ ᕿᓚᕝᕙᐅᑉ ᐱᓕᕆᑦᑎᐊᕐᓂᕆᕙᖓ.

ᐊᔪᙱᓐᓂᖓᓂ ᐅᐃᓂᐱᐊᒡᓕᐊᕈᑎᓂᐊᖅᐸᖓ ᐱᓇᓱᐊᕈᓯᐅᓂᐊᖅᑐᒥ ᐱᓇᓱᐊᕈᓯᓕᒫᒥ ᑲᑭᓂᕐᓂᑦ ᖃᓄᐃᓐᓂᐅᔪᒥ ᐊᐅᓚᑕᐅᔪᒥ ᒫᓂᑑᐸᒥ ᐃᓄᐃᑦ ᑲᑐᔾᔨᖃᑎᒌᖑᔪᓄᑦ ᕕᕗᐊᕆ 11−ᒥ ᕕᕗᐊᕆ 17−ᒧᑦ, ᑐᓂᓯᓂᐊᖅᐳᖅ ᐱᖅᑯᓯᑐᖃᖅᑎᒍᑦ ᑲᑭᓂᕐᓂᑦ ᐃᓄᖕᓄᑦ ᓄᓇᓕᐸᐅᔭᒥ ᐊᑭᖃᙱᑦᑐᒥ.

ᑕᒪᒃᑭᑦ ᐊᑐᐃᓐᓇᐅᔪᓂ ᐃᓂᒃᓴᐅᔪᓂ ᐃᓐᓄᒃᑕᐅᓚᐅᖅᐳᑦ ᐃᓗᐊᓂ 30 ᒥᓂᑦᓂ ᐅᖃᐅᓯᒃᓴᓕᐊᖑᔪᒥ, ᐅᖃᓚᐅᖅᐳᖅ, ᐊᒻᒪ ᐅᑕᖅᑭᓂᕐᒧᑦ-ᑎᑎᕋᖅᓯᒪᓂᐅᔪᖅ ᒫᓐᓇ 100−ᓂ ᐊᑎᓕᐅᕆᓯᒪᓂᖃᓕᖅᐳᖅ.

ᕿᓚᕝᕙᖅ ᐃᓱᒪᕗᖅ ᐱᔪᒪᓂᖃᕐᔪᐊᕐᓂᖓᓂ ᓄᓇᓕᐸᐅᔭᓂ ᓲᕐᓗ ᐅᐃᓂᐱᐊᒡᒥ ᖃᔅᓯᒐᓚᖕᓂ ᑲᑭᓂᕐᓂᑦ ᐱᓕᕆᕝᕕᖃᕐᓂᖓᓂ, ᐊᒃᓱᕈᕐᓇᕐᓂᖓᓂ ᐃᓄᖕᓄᑦ ᓄᓇᖃᖅᑐᓂ ᖃᓪᓗᓈᑦ ᓄᓇᖓᓐᓂ ᓇᓂᓯᓂᕐᒥ ᐃᓄᖕᓂ ᑲᑭᓂᓕᕆᔨᐅᔪᒥ ᑐᑭᓯᐅᒪᔪᒥ ᐃᓕᖅᑯᓯᒧᑦ ᐱᒻᒪᕆᐅᓂᖓᓂ ᑲᑭᓂᕐᓂᑦ.

“ᑲᑎᙵᓂᐅᓂᖓᓂ ᐱᓂᐊᖅᑕᕐᓂ ᐊᒻᒪ ᖃᓄᖅ ᐃᓕᖕᓄᑦ ᑐᑭᖃᕐᓂᖓᓂ ᐱᓪᓚᕆᐅᕗᖅ ᐱᓕᕆᔪᖃᕈᓂ ᑭᓇᑐᐃᓐᓇᒥᒃ ᐃᒻᒥᓂᒃ ᑐᑭᓯᐅᒪᔭᖓᓐᓂ,” ᕿᓚᕝᕙᖅ ᐅᖃᓚᐅᖅᐳᖅ.

ᑕᒪᒃᑭᒐᓚᑦ ᕿᓚᕝᕙᐅᑉ ᐱᓕᕆᔾᔪᔾᔨᕙᒃᑕᖏᓐᓂ ᐊᕐᓇᐅᕗᑦ, ᐱᓗᐊᖅᑐᒥ ᑕᐃᒃᑯᐊ ᕿᓂᖅᑐᓂ ᐱᖅᑯᓯᑐᖃᖅᑎᒍᑦ ᑲᑭᓂᕐᓂᑦ, ᐊᒻᒪ ᐅᑭᐅᖏᓐᓂ ᐊᔾᔨᒌᓲᖑᙱᓚᑦ ᐃᓅᓱᒃᑐᓂ ᐃᓄᑐᖃᕐᓄᑦ.

ᑲᑭᓃᑦ ᕿᓚᕝᕙᐅᑉ ᐱᓕᕆᔾᔪᔾᔨᖃᑦᑕᖅᑕᖏᓐᓂ ᐃᓕᓯᒐᔪᒃᐳᑦ ᓇᖕᒥᓂᖅ ᑲᑎᙵᓂᖃᕐᓂᖏᓐᓂ ᐃᓚᖏᓐᓄᑦ ᐊᒻᒪ ᓄᓇᓕᖕᒧᑦ.

ᑭᓯᐊᓂ, ᐃᓚᖏᑦ ᐃᓕᔭᐅᓂᐅᔪᓂ ᐊᒻᒪ ᖃᓄᐃᑦᑑᓂᖓᓂ ᐱᓗᐊᖅᑐᒥ ᐱᔭᐅᔪᒪᒐᔪᒃᐳᑦ: ᑮᓇᒃᑯᑦ ᑲᑭᓃᑦ, ᑕᐃᔭᐅᔪᓂ ᑐᓐᓃᑦ, ᐃᓕᓯᒪᒐᔪᒃᑐᓂ ᖃᐅᒃᑯᑦ ᐅᕝᕙᓘᓐᓃᑦ ᑕᔾᓗᒃᑯᑦ; ᑐᑭᓕᐊᕐᓂᑯᓗᐃᑦ ᐊᒻᒪ ᐊᖕᒪᓗᑭᑖᓂᑦ ᖃᓪᓗᐃᑦ ᐊᑖᓂ; ᑲᑭᓃᑦ ᑐᓄᒃᑯᑦ ᐊᒻᒪ ᑐᓂᕐᔪᒃᑯᑦ ᑭᒡᒐᖅᑐᐃᓂᕐᒥ ᐊᒪᐅᑎᒥ, ᐊᒻᒪ ᐊᒡᒐᐅᑎᒥ, ᐊᒡᒐᒥᒃ ᐊᒻᒪ ᐃᓄᒐᙳᐊᓂ ᑲᑭᓂᕐᓂᑦ.

ᐊᓯᐊᓂ ᐱᓕᕆᓯᒪᔪᒥ ᐱᐅᒋᔭᐅᔪᒥ ᐃᕐᓂᓂᕐᒧᑦ ᑲᑭᓂᕐᓂᑦ, ᑲᑭᓂᖅᑕᐅᒐᔪᒃᖢᑎᒃ ᖁᑦᑎᖕᓂᖅᓴᐅᔪᒥ ᖁᒃᑐᕋᕐᓂᑦ.

“ᐅᓇ ᐱᓕᕆᐊᖑᒐᔪᒃᐳᖅ ᐊᕐᓇᖅ ᐃᕐᓂᓂᐊᓕᕌᖓᑦ ᐅᕝᕙᓘᓐᓃᑦ ᕿᑐᕐᙵᖅᑖᕈᒪᒍᓂ,” ᕿᓚᕝᕙᖅ ᐅᖃᓚᐅᖅᐳᖅ.

“ᑕᖅᓯᖅᓱᐃᓲᖑᕗᒍᑦ ᖁᒃᑐᕋᓂ ᐱᐅᔪᐊᓗᖕᒥ ᐊᒻᒪ ᓇᓗᓇᐃᒃᑯᑕᓕᐅᖅᖢᑕ ᐱᓕᕆᓂᐅᔪᒥ ᐱᔪᒪᔭᖓᓐᓂ ᓄᑕᕋᓛᖓ ᐃᓅᒍᓂ, ᓯᕗᓪᓕᖅᐹᖑᔪᖅ ᑕᑯᓂᐊᖅᑕᖓᓂ ᐅᓴ ᑎᑎᕋᐅᔭᒐᖅ ᐊᓈᓇᖓᑕ ᖁᒃᑐᕋᖏᓐᓂ.”

ᕿᓚᕝᕙᖅ ᐊᓈᓇᐅᕗᖅ ᐃᒻᒥᓂᒃ ᑭᓯᐊᓂ ᐅᖃᖅᐳᖅ ᐃᓱᒪᓂᖓᓂ ᐃᓚᓯᓂᕐᒥ ᑕᐃᔅᓱᒥᖓᑦᑎᐊᕚᓗᒃ ᑲᑭᓂᕐᓂᑦ ᓇᖕᒥᓂᖅ ᑲᑭᓂᖃᕐᓂᖓᓂ ᓇᓗᓇᐃᖅᓯᓂᕐᒧᑦ ᐊᓈᓇᐅᓂᖓᓂ.

ᐅᖃᓚᐅᖅᐳᖅ ᒫᓐᓇᐅᓕᖅᑐᒥ, ᑕᑯᕙᓪᓕᐊᑐᐃᓐᓇᖅᐳᖅ ᐅᓄᕐᓂᖅᓴᐅᔪᓂ ᐃᓄᖕᓂ ᐱᖅᑯᓯᑐᖃᖅᑎᒍᑦ ᑲᑭᓂᓕᖃᖅᑐᓂ, ᐱᓗᐊᖅᑐᒥ ᒪᒃᑯᖕᓂᖅᓴᐅᔪᓂ ᐱᐅᓯᖃᑎᒌᖑᔪᓂ ᑲᑎᖃᑎᖃᒃᑲᓐᓂᕈᒪᔪᓂ ᐃᓕᖅᑯᓯᖓᓐᓂ.

“ᐱᒋᐊᓪᓚᕆᓲᖑᕗᖅ ᑐᑭᓯᐅᒪᓂᕐᒥ ᐊᑐᖅᑕᐅᕙᓚᐅᖅᑐᓂ ᐊᒻᒪ ᒫᓐᓇᐅᔪᖅ ᖃᓄᐃᓕᖓᓂᖏᓐᓂ ᓄᓇᖃᖅᑳᖅᓯᒪᔪᓄᑦ ᐃᓄᖕᓄᑦ ᑲᓇᑕᒥ, ᐃᒃᐱᒍᓱᒃᑲᒪ ᐊᒥᓱᐊᓗᖕᓂ ᐊᖅᓵᖅᑕᐅᓯᒪᒐᑦᑕ ᐱᐅᓯᖃᑎᒌᖑᔪᓂᑦ,” ᕿᓚᕝᕙᖅ ᐅᖃᓚᐅᖅᐳᖅ.

“ᖃᐅᔨᒪᕗᖓ ᐃᓚᖏᓐᓂ ᐃᓄᖕᓂ ᐃᒃᐱᒍᓱᒃᑐᓂ ᐱᓕᕆᐊᖑᓪᓗᐊᙱᓐᓂᖓᓂ, ᐅᕝᕙᓘᓐᓃᑦ [ᐃᒃᐱᒍᓱᒃᐳᑦ] ᐊᑲᐅᙱᓕᐅᕈᑎᖃᕐᓂᐊᕐᓂᖏᓐᓂ ᑭᓱᑐᐃᓐᓇᒧᑦ ᐱᔾᔪᑕᐅᔪᓄᑦ, ᐊᒻᒪ ᑕᒪᓐᓴ ᖃᓄᐃᙱᓚᖅ.”

ᑭᓯᐊᓂ ᐱᐅᔪᕐᔪᐊᖑᕗᖅ ᐊᒻᒪ ᐱᒻᒪᕆᐅᕗᖅ ᐸᐸᑦᑎᓂᕐᒥ ᐊᑐᖅᑕᐅᕙᖕᓂᑯᒥ ᐆᒪᑎᑦᑎᓗᓂ ᐃᓄᐃᑦ ᐅᖃᐅᓯᖃᓲᖑᖕᒪᑕ ᐅᓂᒃᑳᖅᑐᐊᒥᓂᒃ ᓴᓇᐅᒐᓕᕆᓂᒃᑯᑦ, ᐅᖃᓚᐅᖅᐳᖅ. ᐊᒻᒪᓗ, ᕿᓚᕝᕙᖅ ᐃᓚᒋᐊᖅᓯᓚᐅᖅᐳᖅ, ᑲᑭᓂᖃᖅᖢᓂ ᑕᑯᒃᓴᐅᕐᔪᐊᖅᑐᒥ ᐃᓂᐅᔪᓂ ᓲᕐᓗ ᑮᓇᒃᑯᑦ ᐊᒻᒪ ᐊᒡᒐᒃᑯᑦ “ᐊᖏᓪᓗᓂ ᐱᔪᓐᓇᕐᓂᖃᕐᓂᕐᒥ ᐅᖃᐅᓯᒃᓴᐅᕗᖅ.”

“ᐃᒪᓐᓇᐅᓪᓚᕆᒃᐳᖅ ᐆᒻᒪᖅᑎᑦᑎᒃᑲᓐᓂᕐᓂᕐᒥ ᐃᓕᖅᑯᓯᑦᑎᓐᓂ ᐊᒻᒪ ᐅᐱᒍᓱᖕᓂᕐᒥ ᑭᓇᐅᓂᑦᑎᓐᓂ,” ᕿᓚᕝᕙᖅ ᐅᖃᓚᐅᖅᐳᖅ.

Share This Story

(1) Comment:

  1. Posted by love on

    great initiative and sharing. way to go MIA we need this with KIA etc

Join the Conversation

Your email address will not be published. Required fields are marked *

*