ᐃᖃᓗᖕᓂ ᑎᑕᐅᓯᕆᓂᕐᒧᑦ ᑲᑐᔾᔨᖃᑎᒌᑦ ᐱᑖᕐᐳᑦ $1-ᒥᓕᐊᓐ ᑖᓚᓂ ᐅᑭᐅᕐᑕᖅᑐᕐᒥ ᐊᑐᕈᒥᓇᖅᑐᓕᕆᓂᕐᒧᑦ ᓵᓚᒃᓴᐅᓯᐊᕐᒥ
ᐅᓇ ‘ᐃᒫ, ᐃᒪᓐᓇ’ ᐱᓕᕆᐊᖑᔪᖅ ᑐᕋᒐᖃᖅᑎᑕᐅᓇᓱᒃᑐᖅ ᐃᓄᐃᑦ ᑎᑕᐅᓯᕆᔪᓐᓇᕐᑕᖏᓐᓄᑦ ᐃᓕᓐᓂᐊᕈᑎᒃᓴᓂ ᐱᑕᖃᕈᓐᓇᕐᓯᑎᑦᑎᓂᕐᒥᒃ ᓄᓇᕗᒥᑦ ᐃᓕᓐᓂᐊᕐᕕᖕᓂ
ᐃᖃᓗᖕᓂ ᑎᑕᐅᓯᕆᓂᕐᒧᑦ ᑲᑐᔾᔨᖃᑎᒌᑦ “ᐃᒫ, ᐃᒪᓐᓇ” ᐱᓕᕆᐊᖑᔪᖅ ᓵᓚᒃᓴᓚᐅᓯᐊᓚᐅᕐᑐᑦ $1-ᒥᓕᐊᓐ ᑖᓚᓂ ᐆᒥᖓ Arctic Inspiration Prize (ᐅᑭᐅᕐᑕᖅᑐᕐᒥ ᐊᑐᕈᒥᓇᕐᑐᓕᕆᓂᕐᒧᑦ ᓵᓚᒃᓴᐅᓯᐊᕐᒥᒃ). ᐱᓕᕆᐊᖑᔪᖅ ᑐᕌᒐᖃᕋᓱᖕᓂᐅᓪᓗᓂ ᑎᑕᐅᑎᓕᕆᓂᕐᒥ ᐃᓄᖕᓅᖓᓗᐊᕐᑐᓂᒃ ᓄᓇᕗᒥᑦ ᐃᓕᓐᓂᐊᕐᕕᖕᓂ ᐃᓕᓐᓂᐊᕈᑎᒃᓴᓂᒃ. ᓵᓚᒃᓴᐅᓯᐊᕈᑏᑦ ᑐᓴᖅᑎᑦᑎᒍᑎᐅᓚᐅᕐᓯᒪᔪᑦ ᖁᕕᐊᓲᑎᖃᕐᓂᕐᒥᒃ ᕕᕝᕗᐊᕆ 19-ᒥᑦ. (ᐊᔾᔨᙳᐊᒥ ᐊᔾᔨᓕᐅᒐᖅ ᐅᑯᓇᙵᑦ Arctic Inspiration Prize/APTN ᓴᖅᑭᔮᖅᑎᑕᖓᓂᒃ)
For an English version of this story, see Iqaluit Music Society takes $1-million Arctic Inspiration Prize
ᐃᖃᓗᖕᓂ ᑎᑕᐅᓯᕆᓂᕐᒧᑦ ᑲᑐᔾᔨᖃᑎᒌᑦ ᐊᖏᕐᕋᐅᔾᔨᕗᑦ ᑕᒪᑐᒪᓂ ᐊᕐᕌᒍᒥ ᐅᑭᐅᕐᑕᖅᑐᕐᒥ ᐊᑐᕈᒥᓇᖅᑐᓕᕆᓂᕐᒧᑦ ᓵᓚᒃᓴᐅᓯᐊᕐᒥ (Arctic Inspiration Prize) $1-ᒥᓕᐊᓐ ᑖᓚᓂ ᐱᓕᕆᐊᒃᓴᓄᑦ ᐃᓄᖕᓅᖓᔪᓂᒃ ᑎᑕᐅᓯᕆᓂᕐᒥᒃ ᓄᓇᕗᑦ ᐃᓕᓐᓂᐊᕐᕕᖏᓐᓂᒃ.
ᐅᓇ ᐱᓕᕆᐊᒃᓴᖅ, “ᐃᒫ, ᐃᒪᓐᓇ,” ᐊᔪᕈᓐᓃᕐᓂᐊᓕᕐᑐᑦ ᐃᓕᖅᑯᓯᒃᑰᖓᔪᒥ ᐃᓕᓐᓂᐊᕌᓂᒃᑳᖓᑕ ᑎᑕᐅᓯᕆᓂᕐᒥ ᐱᓕᕆᐊᒃᓴᓂᒃ ᓱᕈᓯᕐᓄᑦ, ᐃᖅᑲᓇᐃᔮᖃᕈᑎᐅᓗᓂ ᑎᑕᐅᓯᕆᓂᕐᒥᒃ ᐃᓕᓐᓂᐊᖅᑎᒃᓴᓂᒃ ᐊᒻᒪᓗ ᐃᓅᓱᒃᑐᓂᒃ ᐃᑲᔪᖅᑐᐃᔨᒃᓴᓂᒃ ᓇᖕᒥᓂᖅ ᑎᑕᐅᓯᕆᓂᕐᒥᒃ ᐋᖅᑭᒃᓱᐃᒍᑎᒃᓴᓂᒃ ᓄᓇᓕᖕᓂᒃ ᓄᓇᕗᒻᒦᑦᑐᓂᒃ.
ᐅᑯᐊ ᐅᑭᐅᕐᑕᖅᑐᕐᒥ ᐊᑐᕈᒥᓇᖅᑐᓕᕆᓂᕐᒧᑦ ᓵᓚᒃᓴᖅᑐᓂᒃ ᑐᓴᖅᑎᑦᑎᒍᑎᖃᓚᐅᕐᑐᑦ ᕕᕝᕗᐊᕆ 19-ᒥᑦ ᐅᕙᓂ ᐅᑭᐅᕐᑕᖅᑐᕐᒥ ᐊᑐᕈᒥᓇᖅᑐᓕᕆᓂᕐᒧᑦ ᓵᓚᒃᓴᖅᑐᓕᕆᓂᖅ ᓯᕗᓪᓕᖅᐹᒥ ᖃᕋᓴᐅᔭᒃᑯᑦ ᖁᕕᐊᓱᖕᓇᐅᑎᓪᓗᒍ.
“ᓵᓚᒃᓴᖅᖢᓂ ᐆᒥᖓ ᐅᑭᐅᕐᑕᖅᑐᕐᒥ ᐊᑕᕈᒥᓇᖅᑐᓕᕆᓂᕐᒧᑦ ᓵᓚᒃᓴᐅᓯᐊᕐᓂᖅ ᐅᕙᑦᑎᓐᓄ ᓲᕐᓗ ᓯᓐᓇᒃᑐᕆᔭᕗᑦ ᑕᕝᕙᓪᓚᕆᐅᓕᖅᖢᓂ ᐅᕙᑦᑎᓐᓄᓕᒫᖅ,” ᐅᖃᓚᐅᕐᑑᒃ ᓇᐃᐅᒥ ᐃᔨᓯᐊᒃ ᐊᒻᒪ ᑖᓖᓐ ᓄᕿᙵᖅ, ᐱᓕᕆᐊᓄᑦ ᐊᖓᔪᖅᑳᖑᔫᒃ, ᑐᓴᒐᒃᓴᑎᒍᑦ ᕕᕝᕗᐊᕆ 19-ᒥᑦ.
ᑖᓐᓇ ᑮᓇᐅᔭᖅ ᐃᑲᔪᕈᑎᐅᓂᐊᕐᑐᖅ ᑖᒃᑯᓂᖓ ᑲᑐᔾᔨᖃᑎᒌᓂᒃ ᐊᖏᒡᓕᕚᓪᓕᖅᑎᑦᑎᒍᑎᐅᓗᓂ. ᑕᒪᒃᑯᐊ ᑮᓇᐅᔭᓕᐅᕋᓱᒐᑎᒃ ᑲᑐᔾᔨᖃᑎᒌᖑᔪᑦ ᓄᓇᕗᒥᑦ ᐊᕐᕌᒍᒧᑦ ᐃᑲᔫᓯᐊᖅᑖᖃᑦᑕᕐᓂᖏᓐᓄᑦ, ᓄᕿᙵᖅ ᐅᖃᓚᐅᕐᑐᖅ ᐊᔪᕐᓇᕐᓂᕋᖅᖢᓂᐅᒃ ᓯᕗᒧᑲᓪᓚᒃ ᐸᕐᓇᐅᓯᐅᕆᐊᒃᓴᖅ ᓲᖃᐃᒻᒪ ᖃᔅᓯᓂ ᑐᓂᔭᐅᓂᐊᕆᐊᒃᓴᖅ ᓇᓗᓇᖃᑦᑕᕐᒪᑦ.
“ᐊᕐᕌᒍᓂ 25-ᓂ ᐊᑕᐅᓯᑦᑕᐃᓐᓇᐸᓗᖕᒥ ᐱᓕᕆᐊᖃᕐᓯᒪᒐᑦᑕ ᓲᖃᐃᒻᒪ ᐊᖏᒡᓕᕚᓪᓕᕈᓐᓇᙱᓐᓇᑦᑕ,” ᐅᖃᖅᑐᖅ ᓄᕿᙵᖅ ᐊᐱᖅᓱᖅᑕᐅᑎᓪᓗᒍ ᑖᓐᓇ ᐱᓕᕆᐊᕆᔭᖓᑦ ᐃᓕᓴᕆᔭᐅᔾᔪᑎᒃᓴᒧᑦ ᓂᕈᐊᖅᑕᐅᓯᒪᓂᖓᓂᒃ.
ᐅᖃᓚᐅᕐᑐᖅ ᑖᓐᓇ ᐅᑭᐅᕐᑕᖅᑐᕐᒥ ᐊᑐᕈᒥᓇᖅᑐᓕᕆᓂᕐᒧᑦ ᓵᓚᒃᓴᐅᓯᐊᖅ “ᐱᐅᔪᓪᓛᓘᒃ” ᓵᓚᒃᓴᐅᓯᐊᖅ.
ᐃᖃᓗᐃᑦ ᑎᑕᐅᓯᕆᓂᕐᒧᑦ ᑲᑐᔾᔨᖃᑎᒌᖏᑦ ᐊᐅᔭᒃᑯᑦ ᐃᓕᓐᓂᐊᖅᑎᑦᑎᕙᒃᑐᑦ ᑎᑕᐅᓯᕆᓂᕐᒥᒃ ᐊᒻᒪᓗ ᕕᕝᕗᐊᕆᒥ ᓄᖃᖓᑲᐃᓐᓇᖅᑎᓪᓗᒋᑦ ᓇᓄᖅ ᐃᓕᓐᓂᐊᕐᕕᒃ ᓂᐊᖁᙴᒥᑦ, ᑖᕝᕙᓂ ᐃᑲᔪᖅᑎᐅᔪᑦ ᐊᔪᕈᓐᓃᕐᓴᖅᑎᑦᑎᖃᑦᑕᓚᐅᕐᑐᑦ ᕿᓚᐅᔾᔭᕐᓂᕐᒥᒃ, ᑲᑕᔾᔭᕐᓂᕐᒥᒃ ᐊᒻᒪ ᐊᒋᐊᒐᕐᓂᕐᒥᒃ.
ᑎᑕᐅᓯᕆᓂᕐᒥᒃ ᐃᓕᓐᓂᐊᖁᔨᔪᑦ ᐅᓄᕈᓘᔭᕐᒪᑕ ᓄᓇᕗᒥᑦ. ᑲᑐᔾᔨᖃᑎᒌᖑᔪᑦ ᐊᒋᐊᒐᕐᓂᒃ ᐊᒻᒪ ᐃᙱᕈᑎᓂᒃ (accordion) ᐃᓕᓐᓂᐊᕐᑎᑦᑎᕙᒃᑐᑦ ᐱᓇᓱᐊᕈᓯᐅᑉ ᓄᙳᐊᓂᒃ, ᑭᓯᐊᓂᓕ ᓄᕿᙵᖅ ᐅᖃᓚᐅᕐᑐᖅ ᑕᑕᓯᒪᓂᕋᖅᖢᓂᐅᒃ.
ᐅᖃᓚᐅᕐᑐᖅ ᐊᕐᕌᒎᓕᕐᑐᓂᒃ ᐊᓂᒍᕐᑐᓂᒃ, ᐃᓚᖏᑦ ᐊᖓᔪᖅᑳᖑᔪᑦ ᓄᓇᕗᒥᑦ ᓄᓇᓕᖕᓂ ᕿᑐᕐᖓᖏᓐᓂᒃ ᐃᖃᓗᖕᓄᑦ ᐊᐅᓪᓚᖅᑎᑦᑎᖃᑦᑕᕐᓯᒪᔪᑦ ᐃᓕᓐᓂᐊᕐᓂᐊᕐᒪᑕ ᑎᑕᐅᓯᕆᓂᕐᒥᒃ.
ᐊᒻᒪᓗ ᑕᐃᒪᐃᑦᑐᒥ ᐱᖃᖁᔨᓂᖅᑕᖃᖅᑎᓪᓗᒍ, ᐅᓄᕐᑐᑦ ᐃᓕᓐᓂᐊᕐᕖᑦ ᓄᓇᕗᒥᑦ ᑎᑕᐅᓯᕆᓂᕐᒧᑦ ᐃᓕᓴᐃᔨᖃᙱᖢᑎᒃ, ᐅᖃᓚᐅᕐᑐᖅ ᓄᕿᙵᖅ.
“ᑕᒫᓂ ᐊᖏᕐᕋᑦᑎᓐᓂ ᐱᒋᐊᖅᑎᑦᑎᒍᑦᑕ ᑎᑕᐅᓯᕆᓂᕐᒥᒃ ᐃᓕᓐᓂᐊᖅᑎᑦᑎᔨᒃᓴᓂᒃ, ᑕᐃᒪᓕ ᐅᓄᕐᓯᒋᐊᕈᑎᐅᓇᔭᕐᑐᖅ ᑎᑕᐅᓯᕆᓂᕐᒥᒃ ᐃᓕᓐᓂᐊᖅᑎᑦᑎᔨᒃᓴᓂ ᐅᓄᕐᓂᕐᓴᓂ ᓱᕈᓯᕐᓂ ᐊᔪᕈᓐᓃᕐᓴᖅᑎᑦᑎᓇᔭᕐᑐᓂᒃ.” ᐅᖃᕐᑐᖅ.
ᓄᕿᙵᖅ ᐅᖃᓚᐅᕐᑐᖅ ᐅᒃᐱᕈᓱᖕᓂᕋᖅᖢᓂ ᐅᓇ “ᐃᒫ, ᐃᒪᓐᓇ” ᐃᖅᑲᓇᐃᔮᒃᓴᓂᒃ ᓴᖅᑭᑎᑦᑎᒍᑎᐅᔪᓐᓇᕐᑐᖅ ᐃᓄᖕᓂ ᑎᑕᐅᓯᕆᔨᓂᒃ ᐊᒻᒪᓗ ᐃᑲᔪᕋᔭᖅᖢᓂ ᐃᓕᓐᓂᐊᕐᑎᓂᒃ ᐊᓂᒍᐃᔪᓐᓇᕐᓂᕐᒥᒃ ᐃᓕᓐᓂᐊᒐᒃᓴᓂᒃ, ᓲᖃᐃᒻᒪ “ᑎᑕᐅᓯᕆᓂᖅ ᓴᖅᑭᑦᑎᒍᑎᐅᓯᒪᖕᒪᑦ ᐱᐅᓯᕚᓪᓕᕈᑎᐅᓂᖓᓂᒃ ᓇᐃᓴᐅᓯᕆᓂᕐᒥᒃ ᐊᒻᒪ ᐅᖃᓕᒫᕈᓐᓇᕐᓂᕐᒥᒃ.”
“ᐊᕐᕌᒍᒐᓴᐅᓕᕐᑐᓂᒃ, ᑕᑯᓯᒪᒐᒪ ᓱᕈᓯᕐᓂᒃ ᐃᖕᒥᖕᓂ ᐅᒃᐱᕆᒍᓐᓇᖅᐹᓕᕐᓯᒪᔪᓂᒃ ᐊᒻᒪᓗ ᐅᖃᓪᓚᒍᓐᓇᕐᓂᕐᓴᐅᓕᖅᐸᒃᖢᑎᒃ,” ᐅᖃᖅᑐᖅ.
ᑎᑕᐅᓯᕆᓂᕐᒧᑦ ᑲᑐᔾᔨᖃᑎᒌᑦ ᐊᐅᓚᑕᐅᔪᖅ ᐊᔾᔨᒌᙱᑦᑑᑎᓂᒃ ᐊᑭᓕᕐᓱᖅᑕᐅᔪᓂᒃ ᐃᖅᑲᓇᐃᔭᖅᑎᓂᒃ, ᐃᑲᔪᖅᑎᓂᒃ ᐊᒻᒪ ᐃᓅᓱᒃᑐᓂᒃ ᐃᑲᔪᖅᑎᓂᒃ, ᐅᓄᕐᑐᕈᓗᐃᑦ ᐅᐸᒍᑎᓂᑯᑦ ᑎᑕᐅᓯᕆᓂᕐᒧᑦ ᐃᓕᓐᓂᐊᕐᓂᕐᒧᑦ, ᐊᒻᒪᓗ ᑭᖑᓂᐊᒍᑦ ᐃᖅᑲᓇᐃᔭᓕᕐᓂᑰᓪᓗᑎᒃ ᑖᒃᑯᓄᖓ ᑮᓇᐅᔭᓕᐅᕋᓱᒐᑎ ᑲᑐᔾᔨᖃᑎᒌᓄᑦ.
ᓇᐃᐅᒥ ᐃᔨᔅᓯᐊᒃ, ᐱᓕᕆᐊᒧᑦ ᐊᖓᔪᖅᑳᖑᖃᑕᐅᓯᖅ, ᐃᓚᒋᔭᐅᔪᖅ ᑖᒃᑯᓄᖓ. ᓄᕿᙵᐅᑉ ᐃᓕᓐᓂᐊᖅᑎᓚᐅᕐᓯᒪᔭᖓ ᑎᑕᐅᓯᕆᓂᕐᒥᒃ ᓱᕈᓯᐅᑎᓪᓗᒍ ᒫᓐᓇᓗ ᐃᙱᕈᑎᓂᒃ ᐃᓕᓐᓂᐊᖅᑎᑦᑎᕙᓕᕐᑐᖅ.
“ᖃᐅᔨᓚᙱᑦᑐᖓ ᓇᓃᓐᓇᔭᕆᐊᒃᓴᓐᓂ ᑎᑕᐅᑎᓕᕆᙱᒃᑯᒪ ᐃᓅᓯᒃᑯᑦ,” ᐅᖃᓚᐅᕐᓯᒪᔪᖅ ᓯᕗᓂᐊᓂ ᐊᐱᖅᓱᖅᑕᐅᑎᓪᓗᒍ, ᐅᖃᒃᑲᓐᓂᖅᖢᓂ ᑎᑕᐅᑎᓕᕆᓂᖅᑕᖃᕆᐊᖃᕐᓂᕋᖅᖢᓂᐅᒃ ᓄᓇᕗᑦ ᐃᓕᓐᓂᐊᕐᕕᖏᓐᓂᒃ ᐅᑯᑎᑐᓇᖅ ᐱᙳᐊᕈᑎᑦ ᐊᒻᒪ ᐃᖃᐃᓕᓴᕐᓂᖅ ᐱᓕᕆᐊᕆᔭᐅᕙᖕᓂᖓᑎᑐᑦ.
ᐅᓇ ᐊᐃᑉᐸᕆᓕᕐᑕᖓ ᑲᑐᔾᔨᖃᑎᒌᑦ ᑐᓂᓯᓪᓗᑎᒃ ᐱᓕᕆᐊᒃᓴᒧᑦ ᐃᓱᒪᒋᔭᐅᔪᒪᓂᕐᒥᒃ ᐅᑯᓄᖓ ᐅᑭᐅᕐᑕᖅᑐᕐᒥ ᐊᑐᕈᒥᓇᖅᑐᓕᕆᓂᕐᒧᑦ ᓵᓚᒃᓴᐅᓯᐊᒧᑦ.
ᑖᒃᑯᐊ ᑲᑐᔾᔨᖃᑎᒌᖑᔪᑦ ᑭᖑᓪᓕᖅᐹᓄᑦ ᓂᕈᐊᒐᒃᓴᓄᑦ ᐃᓂᑖᓚᐅᕐᓯᒪᔪᑦ ᐊᕐᕌᓂ ᒥᓕᐊᓐ ᑖᓚ ᓵᓚᒃᓴᐅᓯᐊᒃᓴᒧᑦ, ᑖᓐᓇᓗ ᑐᓐᓂᖅᑯᑎᐅᓪᓗᓂ ᐅᑯᓄᖓ ᓄᐊᑕᓐ ᑲᒻᐸᔅ (Northern Compass), ᐱᓕᕆᐊᒃᓴᖅ ᐃᑲᔪᕈᑎ ᐅᑭᐅᕐᑕᖅᑐᕐᒥ ᐃᓅᓱᒃᑐᓂᒃ ᖃᓪᓗᓈᓂᒃ ᐃᓕᓐᓂᐊᕈᑎᒃᓴᒃᑲᓐᓂᕐᓂᒃ.
ᐅᓇ ᐅᑭᐅᕐᑕᖅᑐᕐᒥ ᐊᑐᕈᒥᓇᖅᑐᓕᕆᓂᕐᒧᑦ ᓵᓚᒃᓴᐅᓯᐊᖅ ᐊᖏᓂᕐᐹᖑᔪᖅ ᐊᕐᕌᒍᒥᒃ ᓵᓚᒃᓴᐅᓯᐊᕆᔭᐅᕙᒃᑐᓂᒃ ᑲᓇᑕᒥ. ᐅᓇ ᓵᓚᒃᓴᐅᓯᐊᖅ ᐱᒋᐊᖅᑎᑕᐅᓂᑯ ᑲᓇᑕᒥᐅᑕᓂᒃ ᖃᓄᐃᓕᐅᕈᓘᔭᕐᑎᓂᒃ ᓰᒪ ᓱᕆᕝ ᐊᒻᒪ ᐋᓄᑦ ᕗᐃᑦᔨᒡ, ᑖᔅᓱᒥᖓ ᐱᒋᐊᖅᑎᑦᑎᓪᓗᑎᒃ 2012-ᒥᑦ ᐅᕙᓂ ᓄᓇᕐᔪᐊᒥ ᐅᑎᐅᕐᑕᕐᒥᐅᒃ ᐊᕐᕌᒍᖓᓄᑦ ᖃᐅᔨᓴᖅᑐᓕᕆᓂᕐᒥᒃ ᑲᑎᒪᓂᕐᒥ ᒪᓐᑐᕆᐊᒥᑦ.
ᑕᒪᑐᒪᓂ ᐊᕐᕌᒍᒥ, $3 ᒥᓕᐊᓐ ᑖᓚᐃ ᐅᖓᑖᓂ ᑐᓂᔭᐅᓯᒪᔪᑦ 7-ᓄᑦ ᐱᓕᕆᐊᒃᓴᓄᑦ ᐅᑭᐅᕐᑕᖅᑐᕐᒦᑦᑐᓂᒃ, ᐃᓚᒋᓪᓗᒍ $500,000, ᑖᓐᓇᓕ ᑐᓂᔭᐅᓚᐅᕐᑐᖅ ᓄᓇᕕᒃᒥᑦ ᐱᓕᕆᐊᒃᓴᒥ ᐃᓕᓐᓂᐊᖅᑎᑦᑎᓂᕐᒥᒃ ᓄᓇᖃᖅᑐᓂᒃ ᑐᓵᑦᑎᐊᕈᓐᓃᖅᐸᖕᓂᕐᒥᒃ ᐊᒻᒪᓗ ᐊᑐᐃᓐᓇᖃᕈᓐᓇᕐᓂᕐᒥᒃ ᑐᓵᑦᑎᐊᙱᑦᑐᓕᕆᓂᕐᒧᑦ ᐱᓕᕆᔨᐅᔪᓂᒃ.
ᐊᐃᑉᐸᖓᓕ ᓄᓇᕗᒥᐅᑕᑦ ᐱᓕᕆᖃᑎᒌᖑᔪᑦ ᓵᓚᒃᓴᓚᐅᕐᑐᑦ $500,000 ᓂᕿᖃᕈᓐᓇᑦᑎᐊᕐᓂᕐᒧᑦ ᐱᓕᕆᐊᒧᑦ, ᓂᕿᒃᓴᕗᑦ, ᑖᓐᓇᓗ ᑐᕌᒐᖃᕋᓱᒃᑐᖅ ᐃᓄᒃᓯᐅᑎᓂ ᓂᕿᓂᒃ ᑮᓇᐅᔭᓕᐅᕈᑎᖃᕋᓱᖕᓂᕐᒥᒃ ᑕᓗᕐᔪᐊᓂ.
(0) Comments