ᐃᖃᓗᖕᓂ ᓄᓇᖃᕐᑐᑦ ᑎᕆᒐᓂᐊᕐᔪᒃᓂ ᑕᑯᑲᑕᖕᓂᕋᖅᑐᑦ

ᐃᖃᓗᖕᓂ ᑎᕆᒐᓂᐊᕐᔪᒃ ᒪᕐᕉᖕᓂ ᕿᒧᒃᓯᐅᑎᓂ ᕿᒻᒦᖕᓂ ᐹᖃᑎᖃᓚᐅᕐᑐᖅ ᖃᐅᔨᓴᖅᑕᐅᓪᓗᓂ ᐱᓪᖤᙱᓴᖅᑐᕕᓂᖅ ᖃᐅᔨᔭᐅᓚᐅᕐᑐᖅ.

ᓄᓇᕗᒥ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᑖᔅᓱᒥᖓ ᖃᐅᔨᓴᖅᑕᐅᔾᔪᑎᓂᒃ ᑐᓴᖅᑎᑦᑎᓚᐅᕐᑐᑦ ᓄᕕᐱᕆ 16ᖑᑎᓪᓗᒍ ᐊᒻᒪᓗ ᓄᓇᖃᖅᑐᓂᒃ ᐅᔾᔨᖅᓱᖁᔨᓪᓗᑎᒃ ᑎᕆᒐᓂᐊᕐᔪᖕᓂ.

ᐅᓇ ᑐᓴᒐᒃᓴᖅ ᐅᖃᐅᓯᐅᓕᓚᐅᕐᑐᖅ ᑕᖅᑭᓪᓗᐊᖑᓕᕐᑐᒥ ᐃᓄᐃᑦ ᓴᖅᑭᑎᑦᑎᑲᑕᓕᕐᑎᓪᓗᒋᑦ ᑎᕆᒐᓂᐊᕐᔪᖕᓂ ᑕᑯᖃᑦᑕᕐᓯᒪᓂᖏᓐᓂᒃ.

ᐆᒧᖓᓕ ᔪᐊᓂ ᕘᓚᓐ ᐋᕆᐊᒃᒧᑦ ᐅᓪᓛᒃᑯᑦ ᐸᐃᓯᑰᑲᑕᒃᖢᓂ ᑎᕆᒐᓂᐊᕐᔪᖕᓂ ᖃᓂᓈᖅᑕᐅᓯᒪᓗᐊᕆᔪᖅ.

“ᐸᐃᓯᑰᕐᑕᐃᓕᒪᑲᑕᒃᑐᖓ ᐊᑐᕆᐊᑉ ᐊᓯᐊᒍᑦ ᑭᓯᐊᓂᓕ ᓲᕐᓗ ᓇᓂᔭᐅᖏᓐᓇᖅᖅᑐᖓ,” ᐅᖃᖅᑐᖅ.

ᐊᑕᐅᓯᕐᒧ ᑎᕆᒐᓂᐊᕐᔪᒃᒧ ᒪᓕᒃᑕᐅᓚᐅᕐᓯᒪᓐᓂᕐᖢᓂ ᓂᐊᖁᙴᑉ ᓯᒡᔭᖅᐸᓯᐊᓂᒃ ᐅᕗᖓ ᐅᐃᕖᑦ ᐃᓕᓐᓂᐊᕐᕕᖓᓄᑦ, ᐅᖃᖅᑐᖅ.

“ᐳᐊᓗᓐᓄ ᐅᓗᕆᐊᓇᙱᑦᑐᓛᓗᖕᒧ ᒥᓗᕆᐊᓚᐅᕐᓯᒪᔭᕋ,” ᐅᖃᖅᑐᖅ ᐃᒡᓚᕐᓯᓪᓗᓂ.

“ᑐᕐᖢᓛᕐᕕᒋᑲᑕᒃᖢᒍ ᑖᓐᓇ ᐅᕙᓐᓂ ᒪᓕᒃᑐᖅ ᐊᒻᒪᓗ ᐸᐃᓯᑰᓐᓄ ᑐᓗᕆᐊᕋᓗᐊᖅᖢᒍ ᑭᓯᐊᓂᓕ ᒪᓕᑐᐃᓐᓇᖅᖢᓂ.”

ᐹᓪ ᓄᔭᓕᐊ, ᓂᐊᖁᙴᒥ ᐃᓅᓂᑯ, ᐅᖃᓚᐅᕐᑐᖅ ᑎᕆᒐᓂᐊᕐᔪᒃᑕᖃᐅᕐᓂᖅᓴᐅᓕᕐᓂᖓᓂ ᓱᖃᐃᒻᒪ ᐊᕕᙵᖅᑕᖃᐅᕐᓂᖅᓴᐅᖕᒪᑦ.

“ᖃᐅᔨᒪᔭᐅᖕᒪᑦ ᐊᕕᙵᖅᑕᖃᐅᕐᓂᕐᓴᐅᒃᐸᑦ ᑕᐃᒪᓕ ᑎᕆᒐᓂᐊᕐᔪᒐᓱᑦᑎᐊᕐᓇᖅᑐᖅ,” ᐅᖃᖅᑐᖅ.

ᕗᓘᕌᓐᔅ ᓚᐱᐊ ᓚᐱᐅᕐ ᐳᓕᓐ, ᐃᖃᓗᖕᓂ ᖃᐅᔨᓴᖅᑎᐅᔪᖅ ᑎᑎᕋᐅᓯᖃᓵᓚᐅᕐᑐᖅ ᖃᐅᔨᓴᕈᑎᕕᓂᖏᓐᓂᒃ ᑎᕆᒐᓂᐊᕐᔪᒃᓂᒃ ᐅᕙᓂ ᕿᑭᖅᑖᓗᒃᒥᑦ (Bylot Island), ᐅᖃᓚᐅᕐᑐᖅ ᑎᕆᒐᓂᐊᕐᔪᐃᑦ ᑕᑯᔭᐅᖃᑦᑕᕐᓂᕐᓴᐅᓂᐊᓕᕐᑐᑦ ᒫᓐᓇᐅᔪᖅ ᐅᑭᐅᕐᑕᖅᑐᕐᒥ ᓄᓇᓖᑦ ᐱᕈᖅᐸᓪᓕᐊᓂᖏᓐᓄᑦ.

ᐊᒃᑕᑯᑕᖃᕐᓂᕐᓴᐅᓕᕐᓂᕐᒧᑦ ᐊᒻᒪᓗ ᓂᕿᑕᖃᐅᖅᖢᓂ ᓄᓇᓕᖕᓂ, ᓚᐱᐅᕐ ᐳᓕᓐ ᐅᖃᓚᕐᑐᖅ ᑕᐃᒪᓕ ᑕᒪᒃᑯᐊ ᑎᕆᒐᓂᐊᕐᔪᒃᓄ ᓄᓇᓕᖕᓄᐊᕈᑎᐅᓂᕐᓴᐅᖕᒪᑕ.

“ᓄᓇᓕᖕᓄᐊᔭᒻᒪᑐ ᐃᓄᖃᖅᑐᓄᓪᓘᓐᓃᑦ ᓲᖃᐃᒻᒪ ᓂᕆᔭᒃᓴᖃᓕᖃᑦᑕᕐᒪᑕ ᑖᒃᑯᐊ ᑎᕆᒐᓂᐊᕐᔪᐃᑦ,” ᐅᖃᖅᑐᖅ.

ᓚᐱᐅᕐ ᐳᓕᓐ ᐅᖃᓚᐅᕐᑐᖅ ᑎᕆᒐᓂᐊᕐᔪᐃᑦ ᖃᓄᐃᓕᐅᕈᓯᒋᑲᑕᒃᑕᖏᑦ ᐃᖃᓗᐃᑦ ᖃᓂᒋᔭᖓᓂ ᐃᓕᖅᑯᓯᕆᙱᒻᒪᔾᔪᒃ. ᓲᕐᓗ ᐃᓄᖕᓂ ᑲᑉᐱᐊᓱᒃᓴᕋᐃᓐᓂᕐᓴᐅᕙᒃᑐᑦ ᐊᒻᒪ ᕿᒫᑐᐃᓐᓇᖅᐸᒃᖢᑎᒃ.

ᑎᕆᒐᓂᐊᕐᔪᒃ ᐃᓕᖅᑯᓯᖅᓱᖅᑰᔨᙱᑉᐸᑦ ᐅᕝᕙᓘᓐᓃᑦ ᑮᓯᑲᑕᒃᐸᑦ, ᓂᕐᔪᑎᓂᒃ ᐅᕝᕙᓘᓐᓃᑦ ᐃᓄᖕᓂᑦ, ᑕᐃᒪᓕ ᑖᓐᓇ ᐋᓐᓂᐊᖃᑐᐃᓐᓇᕆᐊᖃᕐᑐᖅ.

“ᑎᕆᒐᓂᐊᕐᔪᐃᑦ ᐱᓪᖤᙱᓴᔭᒻᒪᑕ ᐊᒻᒪᓗ ᐊᓯᒥᓂᒃ ᐊᐃᑦᑐᖅᓯᔪᓐᓇᖅᖢᑎᒃ ᓄᕙᖏᑦᑎᒍᑦ ᐊᒻᒪ ᑮᓯᑲᑕᒃᖢᑎᒃ, ᑕᐃᒪᓕ ᐃᓄᐃᑦ ᐅᔾᔨᕈᓱᒋᐊᖃᑦᑎᐊᖅᑐᑦ,” ᐅᖃᖅᑐᖅ ᓚᐱᐅᕐ ᐳᓕᓐ.

ᓄᓇᕗᒥᑦ ᒐᕙᒪᒃᑯ ᐋᓐᓂᐊᖃᕐᓇᙱᑦᑐᓕᕆᔨᒃᑯᑎᒍᑦ ᑐᓴᐅᒪᑎᑦᑎᓚᐅᕐᑐᑦ ᑎᕆᒐᓂᐊᕐᔪᒃᓂ ᐃᖃᓗᖕᓂ ᐊᒻᒪ ᐸᖕᓂᕐᑑᒥ ᐅᒃᑑᐱᕆ 22-ᒥ ᐊᒻᒪ ᓄᕕᐱᕆ 1-ᒥ “ᐅᓄᕐᓯᕚᓪᓕᖅᑐᓂ” ᑕᑯᔪᓂᒃ ᑕᒪᐃᓐᓂ ᓄᓇᓕᖕᓂ.

ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᑭᓇᑐᐃᓐᓇᕐᒥ ᑮᔭᐅᔪᕕᓂᕐᒥᒃ ᑯᑭᖏᓐᓄᓪᓘᓐᓃᑦ ᖃᓄᐃᑕᐅᔪᕕᓃᑦ ᑎᕆᒐᓂᐊᕐᔪᒃᓄᑦ ᐅᕝᕙᓘᓐᓃᑦ ᕿᒻᒥᓄ ᐋᓐᓂᐊᕕᒃᒧᑦ ᖃᐅᔨᓴᖅᑕᐅᔭᖅᑐᖁᔨᓪᓗᑎᒃ ᒫᓐᓇᐅᔪᖅ.

ᐱᓪᖤᙱᔭᕈᑎᒋᔭᐅᔪᑦ ᐊᐃᑦᑑᑎᐅᔪᓐᓇᕐᒪᑕ ᕿᒻᒥᓄᑦ ᐊᒻᒪ ᐃᓄᖕᓄᑦ ᑮᔭᐅᒃᐸᑕ.

“ᑭᓇᑐᐃᓐᓇᖅ ᐱᓪᖤᙱᓴᓕᕈᓐᓇᕐᒪ ᑲᒪᒋᔭᖃᑐᐃᓐᓇᕐᓗᓂ ᐋᒃᑐᐃᒍᓂᓘᓐᓃᑦ ᐋᓐᓂᐊᖃᖅᑐᒥ ᓂᕐᔪᑎᒥᒃ ᕿᓪᓕᐊᖃᖅᐸᑕ ᑖᓐᑯᐊ ᐱᓕᕆᐊᖃᖅᑐᑦ,” ᐅᖃᕐᓯᒪᔪᖅ ᑐᓴᒐᒃᓴᕆᔭᐅᔪᖅ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓂ.