ᐃᖅᑲᓇᐃᔭᖅᑎᐅᔪᑦ ᓄᓇᕕᒃᒥᑦ ᐃᓅᓕᑦᓯᕕᒃ ᐋᓐᓂᐊᕕᒻᒥ ᑐᓴᖅᑕᐅᑎᑦᑎᒻᒪᕆᒃᐳᑦ “ᐱᐅᙱᓪᓚᕆᒃᑐᒥ ᐃᖅᑲᓇᐃᔭᕐᕕᒻᒥ”

ᖃᓄᐃᙱᓚᐅᕋᓗᐊᖅᖢᑎᒃ, ᓈᒻᒪᙱᓕᐅᕈᑎᑕᖃᒃᑲᓐᓂᓕᕆᕗᖅ ᐃᓅᓕᓯᑦᓯᕕᒃ ᐋᓐᓂᐊᕕᒻᒥ ᐊᒻᒪ ᐃᓗᓕᕆᔨᒃᑯᓐᓂᑦ ᐳᕕᕐᓂᑐᖅᒥ.

ᑕᖅᑭᐅᕋᑖᕐᑐᓂᒃ 18-ᓂ, ᐱᑕᖃᕐᓯᒪᖕᒪᑦ “ᐱᓪᓚᕆᒃᑐᓂᒃ ᐊᒻᒪ ᐊᑐᑲᑕᐃᓐᓇᖅᑐᓂᒃ ᓈᒻᒪᙱᓕᐅᕈᑎᓂᒃ” ᐃᖅᑲᓇᐃᔭᖅᑎᐅᔪᑦ ᐊᑐᕐᓯᒪᓕᖅᑕᖏᓐᓂᒃ ᖁᑦᑎᖕᓂᕐᓴᓂ ᐱᓕᕆᖃᑎᖃᕋᓱᖕᓂᒃᑯᑦ” ᐅᕙᓂ ᐃᓅᓕᑦᓯᕕᒃᒥᑦ, ᐅᖃᕐᓯᒪᔪᖅ ᑎᑎᖃᑦ ᑐᓂᔭᐅᑲᑕᒃᑐᖅ ᑕᖅᑭᐅᓚᐅᕐᑐᒥᑦ ᐱᓕᕆᔨᒻᒪᕆᖕᓄᑦ ᐊᒻᒪ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᑲᑎᒪᔨᖏᑦᑕ ᐃᖅᑲᓇᐃᔭᖅᑎᖏᓐᓄᑦ ᐊᒻᒪᓗ ᐱᔭᐅᔪᓐᓇᓚᐅᖅᖢᓂ ᓄᓇᑦᓯᐊᕐᒥ ᐱᕙᓪᓕᐊᔪᓂᒃ.

ᖃᓄᐃᓕᖓᒍᑎᐅᔪᑦ ᓈᒻᒪᙱᓕᐅᕈᑎᒻᒪᕆᐅᖕᒪᑕ ᐃᖅᑲᓇᐃᔭᖅᑎᓄᑦ, ᐅᖃᕐᓯᒪᔪᑦ 14 ᐊᑎᓕᐅᕐᓯᒪᔪᑦ, ᐃᓚᖃᖅᖢᑎᒃ ᐃᖅᑲᓇᐃᔭᖅᑎᓂᒃ ᐃᓅᓕᑦᓯᕕᒃᒥᑦ ᐊᒻᒪᓗ ᑎᑎᕋᖅᑎᒋᔭᐅᔪᒥᒃ ᐅᐊᖕᓇᕐᒥᑦ ᓄᓇᒋᔭᐅᔪᒥᑦ ᐅᕙᓂ ᐳᕕᕐᓂᑐᖅᒥᑦ, ᐊᑎᓕᐅᓚᐅᕐᑐᑦ ᑎᑎᖃᓂᒃ ᐃᑲᔪᖅᑐᐃᓪᓗᑎᒃ ᐃᖅᑲᓇᐃᔭᖅᑎᓂᒃ.

ᑕᕝᕙᓂ ᑎᑎᖃᒥ, ᐅᖃᕐᓯᒪᖕᒪᑕ ᐅᓇ ᐃᓅᓕᑦᓯᕕᒃ “ᑭᐅᓗᒍᑎᐅᔪᒥᓇᖅᑐᒃᑯᑦ ᐃᖅᑲᓇᐃᔭᕈᓐᓃᖅᑎᑦᑎᓯᒪᖕᒪᑕ ᐊᒻᒪ ᓄᖃᖅᑎᑦᑎᓯᒪᓪᓗᑎᒃ ᐱᔾᔪᑎᖃᙱᖢᑎᒃ,”

ᑕᒪᒃᑯᐊ ᓄᖃᖅᑎᑦᑎᓚᐅᑲᖕᓂᐅᔪᑦ ᐊᒻᒪ ᐃᖅᑲᓇᐃᔭᕈᓐᓃᖅᑎᑦᑎᓂᐅᔪᑦ ᐃᓱᒫᓗᒍᑎᒻᒪᕆᐅᖕᒪᑕ ᓇᓗᓈᕿᓂᒃᑯᑦ, ᐃᖅᑲᓇᐃᔮᖃᕐᓂᐊᕋᓗᐊᕆᐊᒃᓴᒃᑯᑦ ᐊᒻᒪᓗ ᐃᓱᒫᓘᖕᓇᕈᑎᓂ ᐃᖅᑲᓇᐃᔭᖅᑎᐅᖃᑎᒌᑎᒍᑦ, ᐅᖃᖅᑐᖅ.

“ᐃᖅᑲᓇᐃᔭᕐᕕᐅᔪᖅ ᐋᓐᓂᐊᕕᒻᒥ ᖁᕕᐊᓇᙱᒻᒪᕆᖕᒪᑦ,” ᑎᑎᖃᐃᑦ ᐅᖃᕐᓯᒪᔪᑦ.

“ᐅᓇ ᐃᓅᓯᕐᒧᑦ ᓈᒻᒪᙱᒻᒪᑦ ᐃᖅᑲᓇᐃᔭᖅᑎᓄᑦ ᐅᕝᕙᓘᓐᓃᑦ ᐊᑐᖅᐸᒃᑐᓄᑦ ᐃᖅᑲᓇᐃᔭᖅᑐᑦ ᖃᓄᐃᓐᓂᖏᑦ ᓈᒻᒪᙱᑦᑐᒃᑰᖓᓗᐊᒧᑦ ᐊᒃᑐᐃᒍᑎᖃᓕᕐᒪᑦ ᐱᔨᑦᑎᕋᐅᑎᓕᕆᓂᕐᒥᒃ.”

ᐃᓄᐃᑦ ᑕᕐᓴᖃᖅᑐᑦ ᐊᒻᒪ ᐃᓄᓪᓚᕇᑦ ᓈᒻᒪᙱᑐᓕᐅᕈᑎᖃᓛᖑᕗᑦ, ᐅᖃᖅᑐᑦ ᑎᑎᖃᑦ, ᐅᖃᕐᓯᒪᓪᓗᓂ ᐃᖅᑲᓇᐃᔭᖅᑎᐅᔪᖅ, ᐊᓂᑕᐅᓂᑯ, ᐃᓅᔪᓐᓃᓚᐅᕐᓯᒪᓂᖓᓂᒃ ᐃᒻᒥᓃᕐᖢᓂ.

ᓄᓇᑦᓯᐊᕐᒥ ᐱᕙᓪᓕᐊᔪᑦ ᐊᐱᕆᓚᐅᕐᑐᑦ ᓄᓇᕕᒃ ᓄᓇᓕᓕᒫᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐊᒻᒪ ᐃᓄᓕᕆᓂᕐᒧᑦ ᑲᑎᒪᔨᐅᔪᓄ ᖃᓄᖅ ᑭᐅᓚᐅᕆᐊᒃᓴᖏᓐᓂᒃ ᓇᒡᒐᔾᔭᐅᑎᓪᓗᒍ, ᐋᒐᓯ 6-ᒥ.

ᖃᕋᓴᐅᔭᒃᑯᑦ ᑎᑎᕋᖅᑕᐅᔪᑦ ᑐᓴᐅᒪᔾᔪᑎᓕᕆᔨᒃᑯᖏᓐᓂᒃ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᑲᑎᒪᔨᖏᓐᓄᑦ ᐅᖃᓚᐅᕐᑐᖅ “ᐃᓕᔅᓯᓐᓄ ᐅᖃᖃᑎᖃᓛᖅᐳᒍᑦ ᐊᑐᐃᓐᓇᖅᑕᖃᓕᕐᐸᑦ.”

ᐅᓇ ᓯᕗᓪᓕᖅᐹᙳᙱᑦᑐᖅ ᐃᓅᓕᑦᓯᕕᒃᑯᑦ ᓈᒻᒪᙱᓕᐅᕈᑎᖃᓗᐊᕐᓯᒪᓂᖓ.

2007-ᒥ, ᓘᒃᑖᖅ ᕚᓂᐊ ᔨᒥᓂᔾ, ᑕᐃᔅᓱᒪᓂ ᐃᓅᓕᑦᓯᕕᒃᒧᑦ ᑐᑭᒧᐊᖅᑎᑦᑎᔨᐅᓚᐅᕐᓯᒪᔪᖅ ᐱᓕᕆᐊᒃᓴᓪᓚᕆᖕᓂᕐᒧᑦ ᐱᔨᑦᑎᕋᐅᑎᓂᑦ, ᐅᖃᓚᐅᕐᓯᒪᖕᒪᑦ ᐃᒪᓐᓇ ᓲᕐᓗ ᐃᓅᓕᑦᓯᕕᐅᑉ ᐱᐅᙱᔾᔪᑎᖓ ᖄᑐᐃᓐᓇᕆᐊᖃᓕᕐᓂᖓᓂᒃ: ᑐᑭᒧᐊᖅᑎᑦᑎᔨ ᐋᓐᓂᐊᓯᐅᖅᑎᓄᑦ ᓄᖅᑲᓚᐅᕐᑐᖅ, ᐊᒻᒪᓗ ᐊᒥᓱᕈᓘᔭᐃᑦ ᐋᓐᓂᐊᓯᐅᕐᑏᓐ, ᐊᒻᒪᓗ ᓘᑖᕆᔭᐅᔪᑦ ᐱᔭᒃᓴᖃᓗᐊᕈᓱᓕᖅᖢᑎᒃ.

ᑯᐸᐃᒃ ᕿᓂᓕᓚᐅᕐᑐᑦ ᑲᒪᔨᒻᒪᕆᐅᓂᐊᕐᑐᒥᓐ ᓈᒻᒪᙱᓕᐅᕈᑎᓕᖕᒥᑦ ᐋᓐᓂᐊᕕᐊᓗᒃᒥᑦ.

2006-ᖑᑎᓪᓗᒍ, ᑮᓇᐅᔭᐃᑦ ᑭᐱᔭᐅᑲᑕᓕᖅᑎᓪᓗᒋᑦ ᐱᔨᑦᑎᕋᐅᑎᓄᑦ ᐊᒃᑐᐃᒍᑎᒻᒪᕆᐅᓚᐅᕐᓯᒪᕗᖅ, ᐊᒻᒪᓗ, ᓯᕗᓂᐊᓂ 2005-ᒥ, ᓈᒻᒪᙱᓕᐅᕈᑎᖃᓚᐅᕐᓯᒪᓪᓗᑎᒃ ᐊᑭᓕᐅᑎᒃᓴᓕᐅᑲᑕᖕᓂᒃᑯ ᑕᒻᒪᕐᓯᒪᑲᑕᒃᖢᑎᒃ, ᐊᒥᓱᒻᒪᕆᖕᓂᒡᓗ ᐊᐅᓚᑦᑎᔨᖃᕐᓯᒪᓪᓗᑎᒃ, ᐃᖅᑲᓇᐃᔭᖅᑎᓂᒡᓗ ᐊᒻᒪ ᑲᑎᒪᔨᓂ ᐊᒻᒪᓗ ᐃᖅᑲᓇᐃᔭᕐᕕᒻᒥᑦ ᐋᓐᓂᕈᑎᐅᓇᔭᓗᐊᖅᑐᓄᑦ.

2012 ᑎᑭᑎᓪᓗᒍ, ᐃᓅᓕᑦᓯᕕᒃ ᐱᐅᓂᕐᓴᐅᖂᔨᓕᓚᐅᕐᓯᒪᔪᖅ: ᑯᐸᐃᒃ ᐋᓐᓂᐊᕕᐅᑉ ᐊᑭᓕᒃᓴᖏᓐᓂᒃ ᐲᖅᑕᐅᑎᑦᑎᑐᐃᓐᓇᓚᐅᕐᓯᒪᔪᑦ ᒫᓂ $100 ᒥᓕᐊᓐ ᐅᖓᑖᓃᑦᑐᓂᒃ, ᐊᒻᒪᓗ ᐋᓐᓂᐊᕕᒃ, 25-ᓂ ᐃᒡᓕᖃᕐᖢᓂ ᐳᕕᕐᓂᑐᖅᒥᑦ, ᐊᐅᓚᑕᐅᓂᖓᒍᑦ ᑮᓇᐅᔭᖃᕈᓐᓇᓚᐅᕐᓯᒪᔪᑦ $500,000 ᐅᖓᑖᓂ 2011-ᒥ.

ᑯᐸᐃᒃ ᐊᒻᒪ ᐊᖏᒡᓕᒋᐊᖅᑎᑦᑎᓚᐅᕐᓯᒪᔪᑦ ᐋᓐᓂᐊᕕᐅ ᐊᐅᓚᑦᑎᔾᔪᑎᒃᓴᖏᓐᓂ ᑕᐃᔅᓱᒪᓂ ᒫᓂ $18 ᒥᓕᐊᓐᑖᓚᐅᓚᐅᕐᑐᓂᒃ ᒪᐅᖓ $90 ᒥᓕᐊᓐᑖᓚᓄᑦ ᐊᕐᕌᒍᒧᑦ.

ᐃᓅᓕᑦᓯᕕᒃ, ᐃᖅᑲᓇᐃᔭᖅᑎᑦᑎᕙᒃᑐᖅ ᒫᓂ 1,000-ᓂ ᐃᖅᑲᓇᐃᔭᑲᐃᓐᓇᖅᐸᒃᑐᓂᒃ ᐊᒻᒪ ᐃᖅᑲᓇᐃᔭᓪᓚᕆᒃᑐᓂᒃ ᐊᔾᔨᒌᙱᑦᑐᓂᒃ ᐃᑲᕐᕋᓕᐅᕐᐸᒃᖢᑎᒃ, ᑲᒪᒋᔭᖃᕐᒥᔪᖅ 7-ᓂᒃ ᑕᓯᐅᔭᕐᔪᐊᕐᒥᑦ ᓄᓇᓕᖕᓂ ᐊᒻᒪ ᑲᒪᒋᔭᖃᖅᖢᑎᒃ ᐋᓐᓂᐊᖅᑐᓕᕆᓂᕐᒧᑦ ᐱᔨᑦᑎᕋᐅᑎᓂᒃ ᓄᓇᕕᒻᒥᐅᓂᒃ ᒪᓐᑐᕆᐊᒦᑦᑐᓂᒃ.