ᐅᑎᕐᑎᓪᓗᒋᑦ ᐃᓄᒃᑐᑦ ᐊᑏᑦ, ᓄᓇᕗᑦ ᑐᙵᕕᒃᑯᑦ ᓄᓇᕗᒥᑦ ᕼᐋᒻᒪᓚᒃᑯᓐᓂᒃ ᐱᖁᔨᕗᑦ

ᑭᓱᑕᖃᕐᒪᑦ ᐃᓄᒃᑐᑦ ᐊᑎᕐᒥ?

ᐅᑎᖅᑎᑦᑎᓂᖅ ᐃᓄᐃᑦ ᐊᑐᖅᓯᒪᓂᑯᑐᖃᖓᓂᒃ ᐊᒻᒪ ᐅᖃᐅᓯᕐᓂᒃ, ᓄᓇᕗᑦ ᑐᙵᕕᒃ ᑎᒥᖓᑦ ᐅᖃᖅᑐᖅ.

ᐃᓄᐃᑦ ᓇᖕᒥᓂᖅ ᑲᑐᔾᔨᖃᑎᒌᖓ ᐃᓱᒪᖁᔨᓯᒪᓕᕐᐳᖅ 14-ᓂ ᕼᐋᒻᒪᓚᐅᔪᓂᒃ ᓄᓇᕗᒥᑦ ᖃᓪᓗᓈᑐᑦ ᐊᑎᖃᖅᑐᓂᒃ ᓱᓕ ᐃᓄᒃᑐᑦ ᐊᑎᑐᖃᖏᓐᓄᑦ ᐅᑎᕐᑎᑦᑎᔪᒪᓂᕐᒥᒃ.

“2019 ᐊᕐᕌᒎᓂᖓᓂᒃ ᓄᓇᕐᔪᐊᒥ ᓄᓇᖃᖅᑳᖅᑐᑦ ᐅᖃᐅᓯᖓᓄᑦ, ᐃᓚᖓᓪᓕ ᐱᓕᕆᐊᕆᓪᓗᐊᖃᑦᑕᖅᑕᕗᑦ ᐅᓇ ᐃᓄᒃᑐᑦ ᐅᖃᐅᓯᐅᑉ ᐱᔪᓐᓇᐅᑎᖏᓐᓂᒃ,” ᐅᖃᖅᑐᖅ ᓄᓇᕗᑦ ᑐᙵᕕᒃ ᐊᖓᔪᖅᑳᖓ ᐊᓗᑭ ᑰᑦᑎᖅ, “ᐊᒻᒪᓗ ᖃᓄᖅ ᐃᓄᐃᑦ ᐱᔨᑦᑎᕋᖅᑕᐅᔪᓐᓇᕐᓗᑎᒃ ᐃᓄᒃᑐᑦ ᐅᖃᐅᓯᖅ ᐊᑐᕐᓗᒍ.”

“ᐃᓱᒪᓚᐅᕋᒪ ᑕᒪᓐᓇ ᖃᐅᔨᑎᑦᑎᔾᔪᑎᐅᓇᔭᕆᐊᒃᓴᖓᓂᒃ ᑲᓇᑕᒥ ᐅᖓᑖᓄᓪᓘᓐᓃᑦ ᐃᓄᐃᑦ ᐅᑎᖅᑎᑦᑎᓕᕐᓂᖏᓐᓂᒃ ᐅᖃᐅᓯᖏᓐᓂ ᐱᔪᓐᓇᐅᑎᓂᒃ.”

ᐊᒥᓱᑦ ᓄᓇᕗᒻᒥᐅᑕᑦ ᓄᓇᖏᓐᓂ ᐃᓄᒃᑐᑦ ᑕᐃᓯᖃᑦᑕᕐᒪᑕ, ᑰᑦᑎᖅ ᐅᖃᖅᑐᖅ, ᑭᓯᐊᓂᓕ ᖃᓄᐃᓕᐅᕈᑎᑕᖃᕐᒪᑦ ᐊᑎᑐᖃᖏᓐᓂᒃ ᐊᑎᖃᓪᓚᕆᓕᕈᓐᓇᕐᓂᕐᒥᒃ.

ᓄᓇᕗᑦ ᑐᙵᕕᒃᑯᑦ ᓇᒡᓯᐅᔾᔨᓚᐅᕐᑐᑦ ᑎᑎᖃᓂᒃ 14-ᓄᑦ ᓄᓇᓕᖕᓄᑦ ᐊᑐᖃᑦᑕᖅᑐᓂᒃ ᖃᓪᓗᓈᑐᑦ ᐊᑎᕆᑎᑕᐅᔪᓂᒃ ᒫᑦᓯ 2019-ᖑᓚᐅᕐᑐᒥᑦ, ᐃᓱᒪᖁᔨᓯᒪᔪᓂᒃ ᐊᑎᑐᖃᖏᓐᓄᑦ ᐅᑎᕈᒪᓂᕐᒥᒃ, ᐊᒻᒪᓗ ᖃᓄᐃᓕᐅᕆᐊᖃᕐᓂᖏᓐᓂᒃ ᑕᐃᒪᐃᓐᓂᐊᕈᑎᒃ.

ᐅᑯᑎᒎᓇᕐᓕ ᓄᓇᕗᑦ ᕼᐋᒻᒪᓚᒃᑯᑦ ᐱᖁᔭᕐᔪᐊᖓᒍᑦ, ᑲᑎᒪᔩᑦ ᑐᒃᓯᕋᐅᓯᐅᕈᓐᓇᕐᒪᑕ ᐊᑎᕐᒥᒃ ᐊᓯᙳᖅᑎᑦᑎᔪᒪᓂᕐᒥᒃ ᐅᑯᓄᖓ ᓄᓇᓕᖕᓄᑦ ᒐᕙᒪᒃᑯᓐᓄᓪᓗ ᐱᔨᑦᑎᕋᖅᑎᒃᑯᓐᓄᑦ ᒥᓂᔅᑕᖓᓄᑦ.

ᖃᔅᓯᒐᓴᐅᓕᕐᒪᑕ ᑕᐃᒪᐃᓕᐅᕈᑎᐅᓂᑯ, ᖃᖓᑦᑎᐊᓵᖑᓛᕐᓕ 2015-ᒥᑦ, ᐅᓇ ᓇᐅᔮᒃ ᖃᓪᓗᓈᑐᑦ ᐊᑎᖓᓂᒃ ᐅᕇᐹᔅ ᐸᐃᒥ ᐊᓯᙳᖅᑎᑦᑎᓪᓗᒋᑦ ᕼᐋᒻᒪᓚᒃᑯᑎᒍᑦ ᓇᐅᔮᓂᑦ.

ᖃᔅᓯᒐᓴᐃᑦᑕᐅᖅ ᐊᓯᖏᑦ ᓄᓇᓖᑦ ᑕᐃᒪᐃᓯᒪᖕᒥᔪᑦ 1980-ᖏᓐᓂᒃ ᐊᒻᒪ 1990-ᖏᓐᓂᒃ, ᓄᓇᕗᑦ ᐱᒋᐊᖅᑕᐅᓚᐅᕐᑎᓐᓇᒍ, ᐃᓚᖃᖅᖢᑎᒃ ᐅᑯᓂᖓ, ᐃᖃᓗᐃᑦ (Frobisher Bay-ᖑᓂᑯ), ᖁᒡᓗᖅᑑᑦ (Coppermine), ᑭᒻᒥᕈᑦ (Lake Harbour), ᕿᑭᖅᑕᖅᔪᐊᖅ (Broughton Island) ᐊᒻᒪ ᑰᒑᕈᒃ (Pelly Bay).

ᑭᙵᐃᑦ ᐃᓱᒪᒋᔭᖃᓕᕐᒥᔪᖅ ᐊᓯᖑᖅᑎᑦᑎᔪᒪᓂᕐᒥᒃ. ᕿᑭᖅᑖᓗᖕᒥ ᓄᓇᓕᐅᔪᖅ ᐊᑦᑎᖅᑕᐅᓚᐅᕐᓯᒪᖕᒪᑦ ᐳᕆᑎᔅᓯᒥᐅᑕᖅ ᐊᖓᔪᖅᑳᕕᓂᖅ (ᑳᑉᑕᓐ) ᑎᓴᒪᒋᔭᐅᔪᖅ Earl of Dorset 1600-ᖏᓐᓂ, ᑭᓯᐊᓂᓕ ᑖᓐᓇ ᖃᐅᔨᒪᔭᐅᓂᕐᓴᐅᕙᒃᑐᖅ ᐃᓄᒃᑐᑦ ᐊᑎᖓᒍᑦ, ᑭᙵᐃᑦ.

ᐃᓚᖏᑦ ᓄᓇᖃᖅᑐᑦ ᓄᓇᖓᓂᒃ ᑕᐃᓯᕙᒃᑐᑦ ᐃᒪᓐᓇ ᓯᑯᓯᓚᖅ, ᖃᓂᒋᔭᖓᓂ ᑲᖏᖅᖢᒃᑕᖃᕐᒪᑦ ᓯᑯᔪᓐᓇᙱᑦᑐᒥ ᐅᑭᐅᓕᒫᖅ.

ᑕᖅᑭᓂ ᐊᓂᒍᓵᕐᓯᒪᓕᕐᑐᓂᒃ, ᕼᐋᒻᒪᓚᒃᑯᑦ ᑲᑎᒪᔨᖏ ᓄᓇᓕᖕᓂ ᐅᖃᓪᓚᖃᑎᖃᓚᐅᕐᓯᒪᖕᒪᑕ ᓈᓚᐅᑎᑎᒍᑦ ᐊᒻᒪ ᑐᓴᐅᒪᔾᔪᑎᒃᑯᑦ, ᐃᓱᒪᓕᖁᓪᓗᒋ ᑖᓐᓇ ᕼᐋᒻᒪᓚᐅᔪᖅ ᐊᓯᐊᓂᒃ ᐊᑎᖃᓕᖅᑎᑕᐅᓂᕐᒥᒃ.

ᕼᐋᒻᓚᒃᑯᑦ ᐱᓕᕆᔨᒻᒪᕆᖏᑦ ᐸᕐᓇᒃᓯᒪᖕᒪᑕ ᓂᕈᐊᖅᑎᑦᑎᓂᐊᕈᒪᓪᓗᑎᒃ ᐅᑭᐊᒃᓵᖅ ᕼᐋᒻᒪᓚᒃᑯᓐᓄᑦ ᓂᕈᐊᕐᓇᐅᓕᕐᐸᑦ, ᑖᒃᑯᐊ ᓂᕈᐊᖅᑐᑦ ᓇᓗᓇᐃᖁᔭᐅᓪᓗᑎᒃ ᐃᑲᔪᕆᐊᒃᓴᖏᓐᓂᒃ ᐋᒃᑲᓘᓐᓃᑦ ᓄᓇᐅᑉ ᐊᑎᖓ ᐊᓯᔾᔨᖅᑕᐅᔪᒪᓂᖓᓂᒃ.

ᑰᑦᑎᖅ ᐅᖃᓚᐅᕐᒥᔪᖅ ᑐᓴᓚᐅᕐᓂᕋᕆᓪᓗᓂ ᓴᓪᓕᕐᒥ ᕼᐋᒻᒪᓚᒃᑯᑦ ᑲᑎᒪᔨᖏᑦ ᑕᐃᒪᐃᑦᑐᒪᔭᕆᐊᒃᓴᖏᓐᓂᒃ, ᐊᒻᒪᓗ ᐅᑯᐊ ᐃᖃᓗᒃᑑᑦᑎᐊᕐᒥ ᕼᐋᒻᒪᓚᒃᑯᑦ, ᑖᒃᑯᐊᓗ ᓄᓇᓕᖕᓂ ᐃᓐᓇᑐᖃᕐᓂ ᖃᐅᔨᓇᓱᒃᖢᑎ ᐊᑎᖓᓂᒃ ᐊᓯᔾᔨᕈᒪᓂᕐᒥᒃ.

“ᑕᒪᓐᓇ ᓄᓇᓕᖕᓂᙶᕆᐊᖃᕐᒪᑦ,” ᐅᖃᖅᑐᖅ.

ᔫᓇᐃᑕᑦ ᓇᐃᓴᓐᔅ ᑕᐃᓯᓚᐅᕐᒪᑕ 2019 ᐊᕐᕌᒎᓂᐊᕐᓗᓂ ᓄᓇᖃᖅᑳᖅᑐᑦ ᐅᖃᐅᓯᖏᓐᓄᑦ, ᐅᖃᐅᓯᖃᓗᐊᖅᖢᑎᒃ ᓴᐳᔾᔭᐅᓯᒪᔭᕆᐊᖃᕐᓂᕐᒥᒃ, ᓴᕿᔮᖅᑎᑦᑎᒃᑲᓐᓂᕐᓂᕐᒥᒃ ᐊᒻᒪᓗ ᖃᐅᔨᒪᔭᐅᑎᑦᑎᒃᑲᓐᓂᕐᓂᕐᒥᒃ ᓄᓇᕐᔪᐊᒥ ᐊᑐᖅᑕᐅᕙᒃᑐᑦ 7,000-ᓂᒃ ᓄᓇᖃᖅᑳᖅᑐᑦ ᐅᖃᐅᓯᖏᓐᓂᒃ—2,680 ᐃᓱᒪᒋᔭᐅᔪᑦ ᐊᓯᐅᓕᒑᑐᐃᓐᓇᕆᐊᖃᕐᓂᖏᓐᓂᒃ.

ᑰᑦᑎᖅ ᐅᖃᓚᐅᕐᑐᖅ ᓄᓇᕗᑦ ᑐᙵᕕᒃᑯ ᑕᒪᓐᓇ ᐊᑐᖅᖢᓂᔾᔪᑦ “ᑐᓴᖅᑕᐅᓇᓱᖕᓂᕐᒥᒃ” ᐱᑕᖃᕆᐊᖃᒻᒪᕆᓕᕐᓂᕐᒥᒃ ᓴᐳᔾᔨᓯᒪᓂᕐᒥᒃ ᐊᒻᓴ ᓴᕿᑎᑦᑎᕚᓪᓕᕐᓂᕐᒥᒃ ᐃᓄᒃᑐᑦ ᐊᑐᖅᑕᐅᓂᖓ ᓄᓇᕗᒥᑦ, ᑎᓕᐅᕆᒃᑲᓐᓂᖅᖢᓂ ᑕᒪᐃᓐᓂ ᓄᓇᕗᑦ ᒐᕙᒪᖓᓂᒃ ᐊᒻᒪ ᒐᕙᒪᑐᖃᒃᑯᓐᓂᒃ ᐊᑐᓕᖅᑎᑦᑎᖁᔨᓪᓗᓂ ᓴᐳᔾᔨᓯᒪᒍᑎᐅᓇᔭᖅᑐᓂᒃ.

ᐃᓚᖓᒍᑦ, ᖃᔅᓯᒐᓴᖕᒪᑕ ᐊᔾᔨᒌᙱᑦᑐᓂᒃ ᐃᓄᒃᑐᑦ ᐊᑎᕐᓂᒃ ᐊᑐᖅᑕᐅᔪᓂᒃ ᓄᓇᕗᑦ ᓄᓇᓕᖏᓐᓂᒃ; ᐱᓪᓚᕆᒃᑕᖃᙱᒻᒪᑦ ᓇᓗᓇᐃᔭᐃᓯᒪᓪᓚᕆᒃᑐᓂᒃ ᐃᓄᒃᑐᑦ ᐊᑎᕐᓂᒃ ᓄᓇᓕᖕᓂ ᓇᓗᓇᐃᒃᑯᑎᐅᕙᓚᐅᕐᑐᓂᒃ.

ᐊᑖᒍᑦ ᓄᓇᕗᒥᑦ ᓄᓇᓖᑦ ᓱᓕ ᖃᓪᓗᓈᑐᑦ ᐊᑎᖏᓐᓂᒃ ᐊᑐᖅᐸᒃᑐᑦ, ᓴᓂᑦᑎᐊᖓᒍᑦ ᐃᓄᒃᑐᑦ ᐊᑎᖏᑦ:

• Cambridge Bay (Ikaluktutiak) ᐃᖃᓗᒃᑑᑦᑎᐊᖅ
• Gjoa Haven (Uqsuqtuuq) ᐅᖅᓱᖅᑑᖅ
• Hall Beach (Sanirajak) ᓴᓂᕋᔭᒃ
• Baker Lake (Qamaani’tuaq) ᖃᒪᓂᑦᑐᐊᖅ
• Chesterfield Inlet (Igluligaarjuk) ᐃᒡᓗᓕᒑᕐᔪᒃ
• Rankin Inlet (Kangiqliniq) ᑲᖏᖅᖠᓂᖅ
• Whale Cove (Tikiraqjuaq) ᑎᑭᕋᖅᔪᐊᖅ
• Coral Harbour (Salliq) ᓴᓪᓕᖅ
• Clyde River (Kangiqtugaapik) ᑲᖏᖅᑐᒑᐱᒃ
• Pond Inlet (Mittimatalik) ᒥᑦᑎᒪᑕᓕᒃ
• Arctic Bay (Ikpiarjuk or Tununirusiq) ᐃᒃᐱᐊᕐᔪᒃ ᐅᕝᕙᓘᓐᓃᑦ ᑐᓄᓂᕈᓯᖅ
• Grise Fiord (Ausuittuq) ᐊᐅᓱᐃᑦᑐᖅ
• Resolute Bay (Qausuittuq) ᖃᐅᓱᐃᑦᑐᖅ
• Cape Dorset (Kinngait) ᑭᙵᐃᑦ