ᐅᕌᒡᓚᓐ ᐅᔭᕋᒃᓯᐅᖅᕕᒃᒥ ᓄᖃᖓᓂᖅ ᐃᖅᑲᓇᐃᔮᒧᑦ ᐃᓱᓕᑉᐳᖅ

ᑲᑐᔾᔨᖃᑎᒌᓄᑦ ᐃᖅᑲᓇᐃᔭᖅᑏᑦ ᓂᕈᐊᕐᑐᑦ 60.8 ᐳᓴᓐᑎᒥ ᐃᖅᑲᓇᐃᔮᒧᑦ ᐊᖏᕈᑎᓂᒃ

ᐃᓚᒋᔭᐅᔪᑦ ᓴᕕᕋᔭᓕᕆᔨᓄᑦ ᑲᑐᔾᔨᖃᑎᒌᖏᓐᓂᒃ, ᓘᑯᓪ 9449, ᓂᕈᐊᓚᐅᕐᒪᑕ 60.8 ᐳᓴᓐᑎᖏ ᐊᖏᖅᖢᑎᒃ ᐊᖏᖃᑎᒌᒍᑎᒥ ᐃᖅᑲᓇᐃᔭᕐᓂᕐᒧᑦ ᐅᕌᒡᓚᓐ ᐅᔭᕋᒃᓯᐅᖅᕕᒃᒥ, ᑖᓐᓇ ᑕᖅᑭᓂᒃ ᐱᖓᓱᓂᒃ ᓈᒻᒪᒌᖃᑦᑕᐅᑎᙱᓐᓂ ᐃᓱᓕᖢᓂ. (ᐊᔾᔨᙳᐊᖁᑎᒋᔭᐅᔪᖅ)

By ᔨᐊᕝ ᐱᐊᑦᓯᐃ
ᓄᓇᓕᖕᓂ ᑐᓴᒐᒃᓴᓕᐅᕐᑎᐅᓂᕐᒧᑦ ᐱᓕᕆᐊᒃᓴᓄᑦ ᑐᓴᒐᒃᓴᓕᐅᕐᑎ

For English version, see Strike over: United Steelworkers ratify collective agreement with Raglan Mine

ᐅᓇ ᑕᖅᑭᓂᒃ ᐱᖓᓱᓂᒃ ᐃᖅᑲᓇᐃᔭᓂᒃ ᓈᒻᒪᒃᓴᙱᓐᓂᖅ ᐅᑯᓄᖓ ᐅᕌᒡᓚᓐ ᐅᔭᕋᒃᓯᐅᕐᕕᒃᒥ ᐊᒻᒪᓗ ᑲᑐᔾᔨᖃᑎᒌᑦ ᐃᖅᑲᓇᐃᔭᖅᑎᓄᑦ ᐃᓱᓕᑉᐳᖅ.

ᐃᓚᒋᔭᐅᔪᑦ ᓴᕕᕋᔭᓕᕆᔨᓄᑦ ᑲᑐᔾᔨᖃᑎᒌᓄᑦ, ᓘᑯᓪ 9449 — ᑭᒡᒐᖅᑐᐃᓪᓗᑎᒃ ᒫᓂ 630-ᓂ ᐅᔭᕋᒃᓯᐅᕐᕕᒃᒥ ᐃᖅᑲᓇᐃᔭᖅᑎᓂᒃ ᓂᕈᐊᓚᐅᕐᒪᑕ ᐃᖅᑲᓇᐃᔮᓄᑦ ᐊᖏᕈᑎᓂᒃ ᑖᒃᑯᐊᒃ ᑕᖅᑭᐅᓚᐅᖅᑐᒥᒃ, ᐅᖃᓚᐅᕐᑐᖅ ᑲᑐᔾᔨᖃᑎᒌᓄᑦ ᑭᒡᒐᖅᑐᐃᔨ ᓴᐃᒪᓐ ᒐᐃ.

ᒫᓃᑦᑐᑦ 71 ᐳᓴᓐᑎᖏᓐᓂᒃ ᑲᑐᔾᔨᖃᑎᒌᓄᑦ ᐃᓚᒋᔭᐅᔪᑦ ᓂᕈᐊᖃᑕᐅᓚᐅᕐᑐ.

ᐃᖅᑲᓇᐃᔭᖅᑎᐅᔪᑦ ᐃᖅᑲᓇᐃᔮᖏᓐᓄᑦ ᐅᑎᕐᐸᓪᓕᐊᓕᓚᐅᕐᑐᑦ ᐅᔭᕋᒃᓯᐅᖅᕕᒃᒥ ᓇᒡᒐᔾᔭᐅᒥ, ᒐᐃ ᐅᖃᕐᑐᖅ.

“ᐊᒃᓱᕈᓐᓇᓚᐅᑲᓚᐅᕐᑐᖅ ᑕᐃᑲᓂ ᑭᓯᐊᓂᓕ ᖁᕕᐊᒋᔭᕗᑦ ᐃᖅᑲᓇᐃᔭᖅᑎᕗᑦ ᐃᓱᒪᓚᐅᕐᕋᑦᑕ ᐅᕙᑦᑎᓐᓂᒃ ᐃᑲᔪᖅᑐᐃᓚᐅᕐᓂᖏᓐᓂᒃ,” ᐅᖃᕐᑐᖅ ᐊᐱᖅᓱᖅᑕᐅᑎᓪᓗᒍ.

“ᐅᕙᑦᑎᓐᓂ ᐱᓕᕆᑎᑦᑎᒻᒪᕆᓚᐅᕐᒪᑕ ᐋᔩᖃᑎᖃᖁᔨᓪᓗᑎᒃ ᐊᒻᒪᓗ ᐃᐅᓛᒥ ᐃᖅᑲᓇᐃᔮᓄᑦ ᐊᖏᕈᑎᓂᒃ ᐱᓇᓱᖁᔨᓪᓗᑎᒃ.”

ᒐᐃ ᐅᖃᕈᓐᓇᓚᐅᙱᑦᑐᖅ ᓄᑖᓂ ᐊᖏᕈᑎᐅᔪᓂᒃ ᑭᓯᐊᓂ ᐅᖃᖅᖢᓂ ᑖᓐᓇ ᐊᕐᕌᒍᓂᒃ ᑕᓪᓕᒪᓂᒃ ᓈᒻᒪᖕᓂᐊᕐᓂᕋᖅᖢᓂᐅᒃ.

ᑭᓯᐊᓂᓕ, ᐅᖃᓚᐅᕐᑐᖅ ᓯᕗᒧᒃᐸᓪᓕᐊᓂᕐᒧᑦ ᐃᓚᒋᔭᐅᔪᖅ ᑐᑭᓯᖃᑦᑕᐅᑎᓂᖅ ᑲᑐᔾᔨᖃᑎᒌ5 ᐊᒻᒪᓗ ᒐᓚᓐᑯᐊ ᐱᓕᕆᖃᑎᒌᑦ (Glencore Group), ᑲᒻᐸᓃᑦ ᓇᖕᒥᓂᖃᖅᑐᑦ ᐅᕌᒡᓚᓐ ᐅᔭᕋᒃᓯᐅᕐᕕᒃᒥᑦ, ᑖᒃᑯᐊ ᑕᒪᐃᓐᓂ ᑲᑎᒪᑲᑕᖕᓂᐊᕐᓗᑎᒃ ᖃᓄᖅ ᐱᐅᓯᕚᓪᓕᕋᔭᕐᓂᖓᓂᒃ ᐃᖅᑲᓇᐃᔭᕐᓂᐅᔪᖅ ᐃᖅᑲᓇᐃᔭᖅᑎᓄᑦ ᐅᔭᕋᒃᓯᐅᖅᕕᒃᒥ.

“ᐋᔩᖃᑎᒌᖕᓂᐅᖕᒪᓐ, ᐃᓚᖏᓪᓗ ᐅᖃᐅᓯᐅᔪᑦ ᓴᓂᕐᕙᒃᑕᐅᓯᒪᓪᓗᑎᒃ,” ᒐᐃ ᐅᖃᕐᑐᖅ, ᐅᖃᐅᓯᖃᒃᑲᓐᓂᖅᖢᓂ ᐃᓚᖏᑦ ᐃᓚᒋᔭᐅᔪᑦ ᑕᑯᒃᑲᓐᓂᕈᒪᓂᖏᓐᓂᒃ ᐱᐅᓯᕚᓪᓕᖅᑎᑕᐅᔪᓂᒃ ᖃᓄᐃᓕᐅᕐᕕᒋᔭᐅᔪᓂᒃ.

“ᑕᒪᐃᓐᓂ ᐱᓕᕆᐊᖃᖅᑐᑦ ᐊᖏᖃᑎᒌᓚᐅᕐᒪᑕ ᐃᒃᓯᕚᖃᑎᒌᒡᓗᑕ ᑕᒪᒃᑯᓂᖓ ᐅᖃᐅᓯᖃᕐᓗᑕ ᐊᒻᒪᓗ ᐱᓕᕆᐊᕆᓗᒋᑦ ᐱᐅᓯᕚᓪᓕᖅᑎᑦᑎᓇᓱᒡᓗᑎᒃ ᑭᒃᑯᓕᒫᓄᑦ.”

ᐅᕌᒡᓚᓐ ᐅᔭᕋᒃᓯᐅᕐᕕᒃ ᑐᓴᒐᒃᓴᓂ ᑐᓴᖅᑎᑦᑎᓚᐅᕐᑐᑦ ᓯᑎᐱᕆ 8-ᒥ ᑐᙵᓱᒃᑎᑦᑎᓪᓗᑎᒃ ᑲᑐᔾᔨᖃᑎᒌᑦ ᓂᕈᐊᕐᓂᖏᑦ.

“ᑐᙵᓱᒃᑎᑕᕗᑦ ᐊᖏᖃᑎᒌᒍᑎᒋᔭᐅᔪᖅ ᐆᒧᖓ ᓄᑖᒧᑦ ᐃᖅᑲᓇᐃᔮᓄᑦ ᐊᖏᕈᑎᓂᒃ ᐊᒻᒪᓗ ᐱᒋᐊᒃᑲᓐᓂᕈᓐᓇᕐᓯᓪᓗᑕ ᐱᓕᕆᖃᑎᒌᖕᓂᕐᒥᒃ ᑐᕌᒐᑦᑎᓐᓄᑦ, ᑕᒪᒃᑯᐊ ᐃᖅᑲᓇᐃᔭᖅᑏᑦ ᐅᓗᕆᐊᓇᙱᑦᑐᒦᑎᓐᓇᓱᒡᓗᒋᑦ,” ᐅᖃᓚᐅᕐᑐᖅ ᐅᕌᒡᓚᓐ ᐅᔭᕋᒃᓯᐅᖅᕕᒃᒧᑦ ᐊᖓᔪᖅᑳᖓᑕ ᑐᒡᓕᒐ ᐱᐊᕆ ᐳᕋᑦ.

ᑕᒪᕐᒥ ᐅᖃᓚᐅᕐᑐᑦ ᖁᕕᐊᓱᖕᓂᕋᖅᖢᑎᒃ ᐅᑎᕐᓂᐊᓕᕐᒪᑕ ᐅᔭᕋᒃᓯᐅᖅᕕᒃᒧᑦ, ᑖᓐᓇ ᓄᓇᕕᒃᒥ ᐊᐅᓚᑕᐅᓯᒪᓪᓗᓂ ᐊᕐᕌᒎᓕᖅᑐᓂᒃ 25-ᓂ.

ᒐᐃᒧᓪᓕ, ᖁᕕᐊᓱᒃᑐᖅ ᑲᑐᔾᔨᖃᑎᒌᓄᑦ ᐃᖅᑲᓇᐃᔭᖅᑏᑦ ᐅᑎᕐᓯᒪᓕᕐᓂᖏᓐᓂᒃ ᐅᔭᕋᒃᓯᐅᖅᕕᒃᒧᑦ, ᑭᓯᐊᓂᓕ ᐃᖅᑲᓇᐃᔮᒧᑦ ᐅᑎᕋᓱᖕᓂ ᖃᓄᐃᓕᐅᓚᐅᑲᖕᓇᕐᓂᐊᖅᖢᑎᒃ.

“ᐃᖅᑲᓇᐃᔭᖅᑎᐅᔪᑦ ᐅᑎᖅᐸᓪᓕᐊᓂᐊᖅᑐᑦ, ᒪᓕᒡᓗᑎᒃ ᐊᔾᔨᒌᙱᑦᑐᓂᒃ ᐱᓕᕆᕝᕕᖕᓄᑦ ᐊᒻᒪ ᐱᔭᐅᔭᕆᐊᓕᖕᓄᑦ,” ᐅᖃᕐᑐᖅ.

“ᐱᓕᕆᓪᓚᕆᖕᓇᔾᔮᙱᓚᐅᑲᒃᑐᖅ ᒫᓐᓇ, ᑖᓐᓇ ᐋᖅᑭᒃᓱᖅᑕᐅᕙᓪᓕᐊᒋᐊᖃᕐᓂᐊᕐᒪᑦ.”

ᐅᕌᒡᓚᓐ ᐅᔭᕋᒃᓯᐅᖅᕕᒃ ᓄᓇᕕᒃᒥ ᐊᖏᓂᖅᐹᖑᔪᖅ ᓇᖕᒥᓂᖃᖅᑎᐅᔪᓂᒃ ᐃᖅᑲᓇᐃᔭᖅᑎᑦᑎᔪᓂᒃ. ᐅᓇ ᓂᑯᓪᒥ ᐅᔭᕋᒃᓯᐅᕐᕕᒃ ᒪᑐᐃᓚᐅᕐᓯᒪᔪᖅ 1997-ᒥ ᐊᑎᓕᐅᓚᐅᕐᓯᒪᑎᓪᓗᒋᑦ ᐅᕌᒡᓚᓐ ᐊᖏᕈᑎᒥᒃ 1995-ᒥ.

ᐅᓇ ᐃᖅᑲᓇᐃᔭᖅᑎᓄᑦ ᓄᖃᖓᓂᐅᓚᐅᑲᒃᑐᖅ ᐃᓱᓕᓚᐅᕐᑐᖅ ᓯᑎᐱᕆ 8-ᒥ, ᐱᒋᐊᖅᖢᓂ ᒪᐃ 27-ᒥ ᑖᒃᑯᐊ ᑲᒻᐸᓂᐅᔪᑦ ᐊᒻᒪ ᑲᑐᔾᔨᖃᑎᒌᑦ ᐊᖏᖃᑎᒌᒍᓐᓚᐅᙱᒻᒪᑕ ᓄᑖᒥ ᐃᖅᑲᓇᐃᔮᓄᑦ ᐊᖏᕈᑎᓂᒃ ᐊᑐᖅᑕᐅᔪᕕᓂᕐᓂᒃ ᐊᑐᖅᑕᐅᖔᕋᓱᒃᑐᓂᒃ ᐃᓱᓕᓚᐅᕐᓂᖓᓂᒃ ᐊᖏᕈᑎᕕᓂᒃ ᐄᐳᕈᓪ ᐃᓱᓕᑎᓪᓗᒍ.

ᐆᒧᖓᓕ ᐊᒥᓕ ᐅᕈᓘ, ᐅᖃᖅᑎᒋᔭᐅᔪᖅ ᐅᕌᒡᓚᓐ ᐅᔭᕋᒃᓯᐅᖅᕕᒃᒧᑦ, ᐅᓇ ᐃᖅᑲᓇᐃᔮᒧᑦ ᓈᒻᒪᙱᓕᐅᕈᑎ ᓯᕗᓪᓕᖅᐹᖑᓚᐅᕐᑐᖅ ᑕᐃᒪᙵᑦ ᐱᒋᐊᓚᐅᕐᓯᒪᑎᓪᓗᒍ.

Share This Story

(0) Comments

Join the Conversation

Your email address will not be published. Required fields are marked *

*