ᐅᕐᓱᐊᓗᐃᑦ ᑯᑐᒃᐸᓪᓕᐊᕙᒃᑐᑦ, ᑕᑕᐅᔾᔨᓂᑯᑦ ᑯᕕᖅᑕᖅᕖᑦ ᐃᓕᓐᓂᐊᖅᑎᓂᒃ ᐊᓂᔭᕆᐊᖃᕈᑎᐅᔪᑦ ᐃᓕᓐᓂᐊᕐᕕᒃᓂ

For an English version of this story, please see: When schools have to close: Fuel leaks, sewer floods push Nunavut students out.

ᐅᓇ ᐱᖃᑎᖓ ᐱᖓᓱᐃᓕᖓᔪᓂᒃ ᐅᓂᒃᑳᓕᐊᓂᒃ ᖃᐅᔨᓴᕐᓂᕐᒥᒃ ᓄᓇᕗᑦ ᐃᓕᓐᓂᐊᕐᕕᖏᑦᑕ ᐃᒡᓗᖁᑎᖏᓐᓂᒃ ᐊᒻᒪᓗ ᖃᓄᖅ ᐊᒃᑐᐃᓯᒪᖕᒪᖔᑕ ᐃᓕᓐᓂᐊᖅᑎᑦᑎᓂᕐᒥ ᓄᓇᕗᒥᑦ. ᑕᑯᒋᐊᓛᖅᐳᑎ ᐃᓚᖓ 3-ᒥ ᐊᒡᒋᖅᑐᓂᒃ ᐱᓇᓱᐊᕈᓯᕐᓂᒃ.

ᓱᓪᓗᐃᑦ ᖄᖅᑐᕕᓃᖅ, ᑕᑕᐅᔾᔨᓂᑯᑦ ᑯᕕᖅᑕᖅᕖᑦ ᐊᒻᒪ ᐅᕐᓱᐊᓗᖃᐅᑏᑦ ᑯᑐᒃᐸᓪᓕᐊᔪᑦ ᓄᓇᕗᒥᑦ ᓄᑕᐅᔪᓐᓃᕐᓯᒪᔪᓂᒃ ᐃᓕᓐᓂᐊᕐᕕᖕᓂ ᒪᑐᔾᔪᑎᐅᑲᑕᒃᑐᑦ.

ᓯᑎᐱᕆ 2021ᓪᓗ ᔫᓂ 2023ᓪᓗ ᐊᑯᓐᓂᖓᓂᒃ 16 ᐃᓕᓐᓂᐊᕐᕖᑦ ᒪᑐᔭᐅᔭᕆᐊᖃᓚᐅᕐᑐᑦ ᐋᖅᑭᒃᑕᐅᓯᒪᓂᕐᒨᙱᑦᑐᖅ ᑲᑎᖢᑎᒃ 31-ᖏᓱᖅᖢᑎᒃ, ᑎᑎᖃᑎᒍᑦ ᑎᑎᕋᕐᓯᒪᓚᐅᕐᑐᑦ ᓄᓇᑦᓯᐊᕐᒥ ᐱᕙᓪᓕᐊᔪᑦ ᐱᔭᖏᓐᓂᒃ ᐃᓕᓐᓂᐊᕐᓂᓕᕆᔨᒃᑯᓐᓂᒃ.

ᐅᑯᐊ ᒪᑐᓯᔾᔪᑎᐅᔭᕆᐊᖃᓚᐅᕐᑐᑦ ᑲᑎᖢᑎᒃ 111.5 ᐅᓪᓗᕐᓂ ᓂᕆᐅᓇᙱᑦᑐᓂᒃ ᓄᓇᕗᓕᒫᒥᑦ. ᐃᓚᖏᑦ ᒪᑐᔾᔪᑎᐅᔪᑦ ᐅᓪᓗᕐᓂ ᐊᑕᐅᓯᕐᒥ ᒪᕐᕉᖕᓄᓪᓘᓐᓃᑦ ᒪᑐᓯᒪᔾᖃᑦᑕᖅᖢᑎᒃ ᒪᑯᓄᖓ ᓄᓇᓖᑦ ᖃᒥᓐᓂᖏᓐᓄᑦ ᐅᕝᕙᓘᓐᓃᑦ ᓄᓇᓖᑦ ᐃᒪᖃᙱᓗᐊᕐᓂᖏᓐᓄᑦ. ᐊᓯᖏᑦ ᐅᓪᓗᒐᓴᖕᓂ ᒪᑐᓯᒪᓚᐅᕐᑐᑦ ᐱᓇᓱᐊᕈᓯᕐᓂᓪᓘᓐᓃᑦ ᐊᖏᔪᓂᒃ ᓱᕋᒍᑎᐅᔪᓂᒃ ᐋᖅᑭᒃᓱᐃᓇᓱᒃᑎᓪᓗᒋᑦ.

14 ᐃᓕᓐᓂᐊᕐᕖᑦ ᒪᑐᓚᐅᕐᓯᒪᔪᑦ 2021-22 ᐃᓕᓐᓂᐊᕐᓇᐅᓂᖓᓂᒃ ᐃᒡᓗ ᖃᐅᒻᒪᖅᑯᑎᖃᙱᓗᐊᕐᓂᐊᓄᑦ, ᓂᒡᓚᓱᓗᐊᕐᓂᖏᓐᓄᑦ, ᖃᑦᑎᕈᑏᑦ ᓱᓪᓗᖏᑦ ᓱᕋᒃᓂᖏᓐᓄᑦ ᑕᐃᒪᓐᓇᓗ ᐃᒻᒥᕈᑎᐅᕙᒃᖢᑎᒃ ᓇᑎᖏᓐᓄᑦ, ᐊᓂᕐᑎᕆᑦᑎᐊᕐᓇᙱᓗᐊᕐᓂᕐᒧᑦ, ᑎᐱᖃᕐᓂᖓᓂᒃ ᖁᐊᔾᔭᐃᑯᓕᓄᑦ ᐃᓚᒋᔭᐅᕙᒃᑐᑦ ᓴᖅᑭᓕᕐᓂᖏᓐᓄᑦ, ᑏᓱᓪᒥ ᑯᕕᔪᖃᕐᓂᖓᓄᑦ ᐊᒻᒪᓗ ᑯᕕᖅᑕᖅᕕᒃ ᑕᑕᓗᐊᕐᓂᖓᓄᑦ, ᑖᒃᑯᐊᓗ ᐊᓯᖃᕆᓪᓗᑎᒃ ᓈᒻᒪᙱᓕᐅᕈᑎᓂᒃ.

2023-ᒥᑐᐊᖅ, ᑎᓴᒪᑦ ᐃᓕᓐᓂᐊᕐᕖᑦ ᒪᑐᔭᕆᐊᖃᓚᐅᖅᑐᑦ ᑲᑎᖢᑎᒃ ᐅᓪᓗᓂᒃ 81-ᓂ.

ᐃᒡᓗᓕᐅᑉ ᓯᕗᓃᑦ ᐃᓕᓐᓂᐊᕐᕕᖓ ᒪᑐᓯᒪᓚᐅᕐᓯᒪᔪᖅ ᐅᓪᓗᕐᓂ 19-ᓂ ᑎᓯᐱᕆ 24, 2022-ᒥ ᔭᓄᐊᕆ 30-ᒧ ᐅᕐᓱᐊᓗᖃᐅᑎᖓ 1,200 ᓖᑕᓂ ᑯᕕᑎᓪᓗᒍ.

ᓕᐅ ᐅᓴᒃ ᐃᓕᓐᓂᐊᕐᕕᒃ ᑲᖏᖅᖠᓂᖅᒥ ᒪᑐᓯᒪᓚᐅᕐᓯᒪᔪᖅ ᐅᓪᓗᕐᓂ ᑕᓪᓕᒪᓂᒃ (5) ᔭᓄᐊᕆ ᐱᒋᐊᓕᓵᕐᓯᒪᑎᓪᓗᒍ ᐊᒻᒪᓗ ᐅᓪᓗᒃᑲᓐᓃᖕᓂ ᒪᕐᕉᖕᓂ ᐱᓇᓱᐊᕈᓰᒃ ᒪᕐᕉᒃ ᐊᓂᒍᖅᑎᓪᓗᒋᑦ ᑭᖑᓂᐊᒍᑦ, ᒪᑐᔾᔪᑎᐅᑲᑕᓚᐅᕐᑐᖅ ᑎᐱᖃᓗᐊᕐᓂᖓ ᖁᐊᔾᔮᐃᒃᑯᑎᓄᑦ ᐃᓚᒋᔭᐅᕙᒃᑐᒥᒃ ᒐᓚᐃᑳᓪᒥ (glycol) ᑯᕕᕈᔪᑲᑕᖕᓂᖓᓄᑦ.

ᑯᕕᖅᑕᖅᕕᒃ ᑕᑕᓗᐊᕐᓂᖓᓄᒃ ᒪᑐᔾᔪᑎᐅᓚᐅᕐᒥᔪᖅ ᖃᖅᑲᓕᒃ ᐃᓕᓐᓂᐊᕐᕕᒃᒥ ᑭᒻᒥᕈᒻᒥ ᐅᓪᓗᕐᓂ 6-ᓂ ᒪᐃᒥ.

ᐊᒻᒪᓗ ᐱᓗᐊᖅᑐᖃᕐᓂᒃᑯᑦ, ᑕᓗᕐᔪᐊᑉ ᓇᑦᓯᓕᒃ ᐃᓕᓴᕐᕕᒃ ᒪᑐᓚᐅᕐᓯᒪᔪᖅ ᐅᓪᓗᕐᓂ 49-ᓂ ᐃᓕᓐᓂᐊᕐᓇᓂᒃ ᕕᕝᕗᐊᕆ 7-ᒥ ᐊᐃᕆᓕ 17-ᒧ ᑕᒪᑐᒪᓂ ᐊᕐᕌᒍᒥ 90 ᓖᑕᓂ ᑏᓱᓪᒥ ᑯᕕᔪᖃᖅᑎᓪᓗᒍ ᐃᓕᓐᓂᐊᕐᕕᒃᒥ.

ᓄᖅᑲᕈᑎᐅᕙᒃᑐᓂᒃ ᐅᓄᕈᓐᓃᖅᐹᓪᓕᖅᑎᑦᑎᓂᖅ

ᐃᓕᓐᓂᐊᕐᕕᒃ ᒪᑐᔭᕆᐊᖃᓕᕌᖓᑦ ᓂᕆᐅᓇᙱᑦᑐᒧᑦ, ᐃᓕᓐᓂᐊᕐᓂᓕᕆᔨᒃᑯᑦ ᕿᓂᖃᑦᑕᕐᑐᑦ ᐃᓂᒋᔭᐅᔪᓐᓇᕋᔭᖅᑐᓂᒃ ᐊᑐᖅᑕᐅᔪᓐᓇᖅᑐᓂᒃ ᐃᓕᓐᓂᐊᖅᑎᓄᑦ, ᐅᑲᓚᐅᕐᑐᖅ ᐃᓕᓐᓂᐊᕐᓂᓕᕆᔨᒃᑯᑦ ᒥᓂᔅᑕᖓ ᐹᒥᓚ ᒍᕉᔅ.

“ᐱᓕᕆᐊᖃᕋᓱᖃᑦᑕᖅᑐᒍᑦ ᓈᒻᒪᙱᓕᐅᕈᑎᓂ ᐊᔪᕈᓐᓃᑐᐊᕌᖓᑦᑕ ᑖᒃᑯᐊ ᐃᓕᓐᓂᐊᖅᑏᑦ ᐃᓕᓐᓂᐊᕐᕕᖕᒦᓐᓂᕐᓴᐅᑎᓐᓇᓱᒃᖢᒋᑦ,” ᐅᖃᕐᑐᖅ.

ᐃᓛᓐᓂᒃᑯᑦ, ᐃᓕᓐᓂᐊᖅᑏᑦ ᐃᓕᓐᓂᐊᖅᑎᑕᐅᕙᒃᑐᑦ ᓂᑭᑦᑖᖅᑎᑕᐅᓪᓗᑎᒃ ᐃᓕᓐᓂᐊᕐᕕᖃᑦᑎᐊᙱᑦᑕᕌᖓᑕ, ᐅᕝᕙᓘᓐᓃᑦ ᐃᓕᓐᓂᐊᕈᑎᖏᓐᓂᒃ ᐊᖏᕐᕋᐅᔾᔨᑎᑕᐅᕙᒃᖢᑎᒃ.

ᐅᓇ ᖃᖅᑲᓕᒃ ᐃᓕᓐᓂᐊᕐᕕᒃ ᒪᑐᓯᒪᑎᓪᓗᒍ, ᓇᓗᓇᐃᒃᑯᑎᐅᓪᓗᓂ, ᒍᕇᑦ 11 ᐊᒻᒪ 12 ᐃᓕᓐᓂᐊᕐᕕᐊᓗᒃᒥ ᐃᓕᓐᓂᐊᖅᑎᑕᐅᓚᐅᕐᓯᒪᔪᖅ ᓄᓇᕗᑦ ᓯᓚᑦᑐᖅᓴᕐᕕᒃᒥ ᓴᓂᑦᑎᐊᖓᓃᑦᑐᒥᒃ ᐃᒡᓗᒥ ᐊᒻᒪᓗ ᐊᓯᖏᓐᓂ ᒍᕇᑦᒦᑦᑐᑦ ᐊᖏᕐᕋᐅᑎᑕᐅᓚᐅᕐᓯᒪᔪᑦ ᐃᓕᓐᓂᐊᒐᒃᓴᖏᓐᓂᒃ, ᐅᖃᓚᐅᕐᑐᖅ ᐃᓕᓐᓂᐊᕐᓂᓕᕆᔨᒃᑯᑦ ᐅᖃᕐᑎᖓ ᑯᕆᔅᑕ ᐊᐃᒥ ᖃᕋᓴᐅᔭᒃᑯᑦ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ.

‘ᐃᖅᑲᓇᐃᔭᕐᓂᖅ ᖁᐊᕐᓵᓇᖅᑐᒥᒃ ᐃᖅᑲᓇᐃᔭᕐᕕᒃᒥ’

ᑭᓯᐊᓂᓕ ᑕᒪᓐᓇ ᖃᓄᐃᓕᐅᕋᓱᒃᖢᓂ ᐃᓱᒫᓗᖕᓇᕐᒪᑦ, ᐅᖃᕐᑐᖅ ᔮᔅᑎᓐ ᒫᑦᓴᑦ, ᐊᖓᔪᖅᑳᖅ ᓄᓇᕗᒥᑦ ᐃᓕᓴᐃᔩᑦ ᑲᑐᔾᔨᖃᑎᒌᓄᑦ ᑖᒃᑯᐊᓗ ᑭᒡᒐᖅᑐᐃᔨᐅᓪᓗᑎᒃ ᒫᓃᑦᑐᓂᒃ 900-ᖏᓐᓂ ᐃᓕᓴᐃᔨᓂᒃ ᓄᓇᕗᓕᒫᒥᑦ.

“ᒪᑐᓂᐅᔪᑦ ᑕᐃᒪᐃᑦᑐᓄᑦ ᐊᒃᑐᐃᓂᖃᕈᓐᓇᕐᒪᑕ ᐃᓕᓐᓂᐊᖅᑏᑦ ᐃᓕᓐᓂᐊᖅᑕᖏᓐᓄᑦ, ᐊᒻᒪᓗ ᐃᓕᓴᐃᔨᑦ ᐱᓕᕆᐊᖏᓐᓂᒃ ᐱᓕᕆᑦᑎᐊᕈᓐᓇᕋᔭᙱᖢᑎᒃ,” ᒫᑦᓴᑦ ᐅᖃᕐᑐᖅ.

ᐃᓕᓴᐃᔩᑦ ᐃᖅᑭᐊᙳᓕᖅᑐᑦ “ᖃᓄᐃᓕᐅᖁᔭᐅᓗᐊᖃᑦᑕᕐᓂᖏᓐᓂᒃ” ᐱᓕᕆᖁᔭᐅᓪᖢᑎᒃ ᐃᓕᓐᓂᐊᕐᕖᑦ ᒪᑐᓯᒪᓂᖏᓐᓂᒃ, ᐅᖃᕐᑐᖅ, ᒪᑯᓂᖓ ᐱᓕᕆᔾᔪᑎᒃᓴᓂᒃ ᐊᓂᒍᐃᔾᔪᑎᐅᑦᑎᐊᕈᓐᓇᖅᑐᓂᒃ ᐱᖃᖅᑎᑕᐅᓇᑎᒃ ᑕᒪᒃᑯᓄᖓ ᖃᓄᐃᓕᐅᕆᐊᖃᓕᕐᓇᖅᑐᓄᑦ.

“ᐊᔾᔨᒋᔭᐅᙱᓂᖏᓐᓂᒃ ᐊᓯᖏᓐᓃᑦᑐᓂᒃ ᑲᓇᑕᒥ ᒪᑯᓂᖓ ᖃᕋᓴᐅᔭᒃᑯᑦ ᐃᓕᓐᓂᐊᕈᑎᓂᒃ ᒪᑐᓯᒪᓂᖏᓐᓄᑦ ᐃᓕᓐᓂᐊᕐᕖᑦ, ᖃᐅᔨᒪᔭᕆᐊᖃᕋᑦᑕ ᐃᓱᖃᕈᑎᐅᔭᑦᑐᓂᒃ ᖃᕋᓴᐅᔭᒃᑯᑦ ᐃᓕᓐᓂᐊᕈᑎᓂᒃ ᓄᓇᕗᒥᑦ ᐅᓄᕐᑐᓂᒃ ᓄᓇᓕᑦᑎᓐᓂ,” ᐅᖃᕐᑐᖅ.

“ᖃᕋᓴᐅᔭᒃᑯᑦ ᐃᓕᓐᓂᐊᕐᓂᖅ ᐊᓂᒍᖅᑕᐅᑦᑎᐊᕈᓐᓇᕋᔭᖅᑐᖅ ᓈᒻᒪᒃᑐᓂᒃ ᐱᖁᑎᖃᐅᕈᑎᒃ ᒪᑯᓂᖓ ᐱᓕᕆᔾᔪᑎᓂᒃ, ᐊᑦᑕᑕᕈᓐᓇᐅᑎᓂᒃ ᐊᒻᒪ ᐊᖓᔪᖅᑳᙱᓐᓄᑦ ᐃᑲᔪᖅᑐᖅᑕᐅᓗᑎᒃ ᐊᒻᒪ ᖃᓄᐃᓕᐅᖁᔭᐅᕙᒡᓗᑎᒃ ᐊᖏᕐᕋᖏᓐᓂᒃ.”

ᒫᑦᓴᑦ ᐅᖃᓚᐅᕐᑐᖅ ᑐᓴᓚᐅᕐᓂᕋᖅᖢᓂ ᓈᒻᒪᒃᓴᑲᑕᖏᑦᑐᓂᒃ ᐃᓚᖏᓐᓂ ᐃᓕᓴᐃᔨᓂᒃ ᐃᖅᑲᓇᐃᔭᕐᓂᖏᓐᓂᒃ “ᖁᐊᕐᓵᕐᓇᖅᑐᒥ”.

ᐅᖃᖅᖢᓂ ᐃᓕᓴᐃᔩᑦ ᓴᓇᖁᔭᐅᔾᔪᑎᓂᒃ ᑐᓂᓯᖃᑦᑕᕐᓂᕋᖅᖢᓂᒋ ᖃᐅᔨᔭᕌᖓᒥᒃ ᓴᓇᔭᐅᔭᕆᐊᓕᖕᓂ ᐃᓕᓐᓂᐊᕐᕕᖏᓐᓂᒃ, ᑭᓯᐊᓂᓕ ᑕᒪᒃᑯᐊ ᓱᖅᑲᐃᓗᐊᖅᑐᒥᓐ ᐱᓕᕆᐊᖑᕙᖕᒪᑕ.

“ᐊᑐᖃᑦᑕᕐᓯᒪᓕᕐᑕᓐᓂᓪᓕ ᐃᓕᓐᓂᐊᖅᑐᓕᕆᓂᒃᑯᑦ, ᒪᑯᐊ ᓱᕋᒃᑕᐅᔪᑦ ᐃᒐᓛ ᕿᓚᒥᐊᓗᒃ ᓴᓇᔭᐅᕙᒃᑐᑦ ᑭᓯᐊᓂᓕ ᒪᑯᐊ ᒪᒃᐱᕐᑕᖅᑐᑦ, ᐹᑦ, ᓇᑎᕋᐃᑦ ᐹᓪᓚᒡᕕᐅᔭᑦᑐᑦ ᐊᒻᒪ ᐅᖁᒃᓯᒪᔪᑦ ᑕᖅᑭᒐᓴᐃᑦ ᐊᓂᒍᖅᑎᓪᓗᒋᑦ  ᐱᓕᕆᐊᕆᔭᐅᓇᓱᖃᑦᑕᕐᒪᑕ,” ᐅᖃᕐᑐᖅ.

ᓴᓪᓗᐃᑦ ᓴᒃᑯ ᐃᓕᓐᓂᐊᕐᕕᒃᒥ, ᓇᓗᓇᐃᒃᑯᑎᒋᓪᓗᒍ, ᐃᓕᓐᓂᐊᖅᕕᐅᑉ ᐊᑖᓂ ᐃᒪᕐᓱᒃ ᐅᖁᒍᑎᐅᓂᖓ ᐃᓱᒫᓘᑎᖃᕈᑎᐅᓚᐅᕐᒥᖕᒪᑎ..

ᐃᓕᓐᓂᐊᖅᑏᑦ ᓄᓇᕗᒥᑦ ᓯᓚᑦᑐᖅᓴᕐᕕᒃᒥ ᐃᓕᓐᓂᐊᖃᑦᑕᖅᑐᑦ ᐊᒃᑐᐊᔪᒥᒃ ᓴᒃᑯ ᐃᓕᓐᓂᐊᖅᕕᒃᒧᑦ ᐊᓂᔭᕆᐊᖃᓚᐅᕐᒥᔪᑦ ᒫᔅᓯᒥ ᓈᒻᒪᙱᓕᐅᕈᑎᖃᖅᖢᑎᒃ ᐅᖁᖃᕐᓂᖓᓂᒃ.

ᔭᐃᒻᔅ ᓯᑳᑦ, ᐃᓕᓴᐃᔨᒻᒪᕆᒃ ᐊᒻᒪ ᒥᑭᑦᑐᑯᓗᖕᓂ ᐆᒪᔪᓂᒃ ᖃᐅᔨᓴᖅᑎ ᓯᓚᑦᑐᖅᓴᕐᕕᐊᓗᒃᒥ ᑐᕌᓐᑐᒥ ᑖᓚ ᓛᓇ ᐃᓕᓐᓂᐊᕐᕕᒃᒥ ᐋᓐᓂᐊᖃᖅᑕᐃᓕᓂᕐᒧᑦ, ᐅᖃᓚᐅᕐᑐᖅ ᐅᖁᖕᒥ ᐱᑕᖃᖅᐸᑦ ᐋᓐᓂᐊᖃᓕᕐᓇᖅᑐᖅ ᐱᐅᒃᓴᙱᓐᓂᕐᒥᒃ ᐊᒻᒪ ᐳᕕᓕᕈᑎᐅᓕᕐᓗᓂ, ᑕᒋᐅᒃᓴᑲᑕᓕᕐᓗᑎᒃ, ᐃᔨᖏᑦ ᐅᖏᓚᑲᑕᓕᕐᓗᑎᒃ ᐅᕝᕙᓘᓐᓃᑦ ᐊᓂᕐᓵᑦᑎᐊᑲᑕᒍᓐᓃᕐᓗᑎᒃ.

“ᐃᓱᒪᔪᒃᓴᐅᕗᓯ ᑕᒪᒃᑯᐊ ᐃᓕᓐᓂᐊᕐᕕᖕᒥ ᐊᑐᖅᑕᐅᔪᑦ ᐊᒃᑐᐃᓂᖃᕈᓐᓇᕐᓂᖏᓐᓂᒃ ᐃᓕᓐᓂᐊᕋᓱᖕᓂᕐᒧᑦ ᐊᒻᒪᓗ ᐱᓕᕆᐊᖃᕐᑐᖅ ᐱᓕᕆᔪᓐᓇᑦᑎᐊᙱᓪᓗᓂ ᑕᐃᒪᐃᑦᑐᒥᒃ,” ᓯᑳᑦ ᐅᖃᕐᑐᖅ.

ᓴᒃᑯ ᐃᓕᓐᓂᐊᕐᕕᒃ ᐱᓕᕆᐊᖑᑐᐃᓐᓇᕆᐊᖃᓕᕐᑐᖅ ᐊᕐᕌᒎᖕᓂ ᒪᕐᕉᖕᓂ $65 ᒥᓕᐊᓐ ᑐᖅᑐᒥ ᓄᑖᙳᕆᐊᖅᑕᐅᓗᓂ ᐅᑭᐅᒃᓴᖅ.

ᐅᓄᕐᓯᕙᓪᓕᐊᓂᖏᓐᓂ ᐃᓕᓐᓂᐊᖃᑦᑕᖅᑐᑦ ᐅᓄᕐᑐᓂᒃ ᕼᐋᒻᒪᓂᒃ, ᐊᒻᒪᓗ ᓄᑕᐅᔪᓐᓃᖅᐸᓪᓕᐊᓂᖏᑦ ᐃᒡᓗᐃᑦ ᑖᒃᑯᓄᖓ ᐃᓂᒋᔭᐅᓂᐊᕐᓗᑎᒃ ᐃᓱᒫᓘᑎᒋᔭᐅᒃᑲᓐᓂᕐᒪᑦ ᒫᑦᓴᑦ ᐅᖃᓚᐅᕐᒥᔪᖅ.

“ᐃᓱᒫᓗᖕᓇᕐᒪᑦ ᑕᒪᒃᑯᐊ ᐃᓕᓐᓂᐊᕐᕖᑦ ᐋᖅᑭᒃᓱᐃᕈᓘᔭᕆᐊᖃᕐᓂᖏᓐᓂᒃ ᐃᓕᓐᓂᐊᖅᑐᑦ ᐃᓂᖃᕈᓐᓃᕌᖓᑕ ᐃᓕᓐᓂᐊᕐᕕᖏᓐᓂᒃ,” ᐅᖃᕐᑐᖅ.

ᐊᐱᕆᔭᐅᑎᓪᓗᒍ ᖃᐅᔨᒪᔭᕆᐊᒃᓴᖓᓂᒃ ᐃᓕᓐᓂᐊᕐᕖᑦ ᐅᓗᕆᐊᓇᓂᖏᓐᓄᑦ ᐃᓱᒫᓘᑎᒋᔭᐅᔪᓂᒃ ᐅᑯᓇᙵᑦ ᓄᓇᕗᒥᑦ ᐃᓕᓴᐃᔨᑦ ᑲᑐᔾᔨᖃᑎᒌᓄᑦ, ᐃᓕᓐᓂᐊᕐᓂᓕᕆᓂᕐᒧᑦ ᒥᓂᔅᑕ ᐹᒥᓚ ᒍᕉᔅ ᐅᖃᓚᐅᕐᑐᖅ ᑕᒪᑐᒥᖓ ᑐᓴᓚᐅᙱᓐᓂᕋᖅᖢᓂ.

ᐅᖃᓚᐅᕐᒥᔪᖅ ᒫᓐᓇ ᐃᓱᒫᓘᑎᑕᖃᙱᓐᓂᖓᓂᒃ ᐃᓕᓐᓂᐊᕐᕖᑦ ᐅᖁᖃᓕᕆᐊᒃᓴᖏᓐᓂᒃ ᐊᓯᖏᓐᓂ ᓄᓇᕗᒥᑦ ᐃᓕᓐᓂᐊᕐᕕᖕᓂ.

ᓂᕿᓕᐅᕐᕕᒃᒥ ᐊᑐᖃᑦᑕᖅᑐᑦ ᐃᓕᓐᓂᐊᖅᑐᑦ ᐅᓄᓗᐊᕐᓂᖏᓐᓄᑦ

ᐆᒧᖓᓕ ᓴᓂᕋᔭᒃᒧᑦ ᒪᓕᒐᓕᐅᖅᑎᒧᑦ ᔪᐃᓕ ᖃᐃᕐᓂᖅᒧᑦ, ᕼᐋᒻᒪᓚᒃᑯᑦ ᐊᕐᓇᖅᔪᐊᖅ ᐃᓕᓐᓂᐊᕐᕕᒃ ᓂᕿᓕᐅᕐᕕᖓ ᐊᑐᖅᑕᐅᖃᑦᑕᕐᓂᖓᓂᒃ ᐃᓕᓐᓂᐊᕐᕕᒋᔭᐅᒃᑲᓐᓂᖅᖢᓂ.

ᐅᓇ ᖁᑦᑎᓛᖑᖃᑕᐅᓚᐅᕐᑐᖅ ᑕᑕᐅᔾᔨᓂᕐᒧᑦ ᓈᒻᒪᙱᓕᐅᕈᑎᓂᒃ, ᐊᓇᕐᕕᖏᑦ ᑕᑕᐅᔾᔨᓪᓗᑎᒃ, ᑮᑕᖃᙱᖢᓂ ᑕᒪᐃᓐᓂ ᒪᑐᐃᕐᓯᔪᓐᓇᖅᑐᒥ ᐹᓂᒃ ᐊᒻᒪᓗ ᐃᒐ ᐋᖅᑭᒃᑕᐅᓯᒪᙱᑦᑐᖅ ᓱᓕ ᐊᕐᕌᒎᓕᖅᑐᓂᒃ ᑕᓪᓕᒪᓂᒃ.

“ᐅᓇ ᐊᒃᑐᐃᓂᖃᕐᒪᑦ ᐃᓕᓐᓂᐊᖅᑏᑦ ᐃᓕᓐᓂᐊᕈᑎᖏᓐᓄᑦ ᐊᒻᒪᓗ ᐃᓕᓴᐃᔨᓄᑦ ᓄᖃᖅᓵᓕᔾᔪᑎᐅᓂᕐᓴᐅᕙᒃᖢᓂ ᓄᓇᕗᒥᑦ ᐃᓕᓴᐃᔨᐅᓂᕐᒥᒃ,” ᒫᑦᓴᑦ ᐅᖃᕐᑐᖅ.

ᑕᒪᒃᑯᐊ ᐃᓕᓐᓂᐊᕐᕕᖕᓂ ᐊᐅᓚᑦᑎᔨᐅᔪᑦ ᑐᓴᐅᒪᑎᑦᑎᒃᑲᓐᓂᕈᓐᓇᖅᐸᑕ ᐃᓱᒪᓕᐅᕆᔨᐅᕙᒃᑐᓂᒃ ᓱᕋᒃᓯᒪᔪᓕᕆᓂᒃᑯᑦ ᓯᕗᓪᓕᐅᔭᕆᐊᖃᖅᑐᓂᒃ, ᒫᑦᓴᑦ ᐅᖃᕐᑐᖅ, ᑕᐃᒪᓕ ᓱᕋᒃᓯᒪᔪᓕᕆᓂᖅ “ᓱᒃᑲᓐᓂᕐᓴᐅᔪᓐᓇᕋᔭᕐᑐᖅ.”

“ᓱᕈᓯᕐᓂ ᐱᓕᕆᐊᖃᕐᖢᓂ, ᐱᒻᒪᕆᐊᓘᖂᔨᙱᑦᑐᑦ ᓯᕗᓪᓕᐅᑎᔭᕆᐊᓕᓪᓘᓐᓃᑦ ᐱᓕᕆᐊᕆᔭᐅᑲᐅᖅᑐᕆᐊᖃᕐᒪᑕ,” ᐅᖃᕐᑐᖅ.

“ᐃᓕᓐᓂᐊᕐᕖᑦ ᐃᓄᖃᐃᓐᓇᐅᔭᕐᒪᑕ, ᐅᓪᓗᓕᒫᖅ ᐊᑐᖅᑕᐅᕙᒃᖢᑎᒃ ᐊᒻᒪᓗ ᐅᓐᓄᒃᑯᑦ ᐊᒻᒪ ᐱᓇᓱᐊᕈᓯᐅᑉ ᓄᙳᐊᒍᑦ. ᐃᓱᒪᒐᒪ ᓯᕗᓪᓕᐅᑎᑕᐅᔭᕆᐊᖃᕐᓂᖏᓐᓂᒃ ᓱᕋᒃᓯᒪᔪᓕᕆᓂᒃᑯᑦ. ᐃᓕᓐᓂᐊᕐᕖᑦ ᒪᑐᔭᐅᔭᕌᖓᑕ ᒪᑯᐊ ᐃᖅᑲᓇᐃᔭᖅᑎᑐᐊᖑᙱᑦᑐᑦ ᐊᒻᒪ ᐃᓕᓐᓂᐊᖅᑏᑦ ᐊᒃᐱᒍᓱᖃᑦᑕᕐᒪᑕ ᑭᓯᐊᓂᓕᑦᑕᐅᖅ ᑕᒪᕐᒥ ᓄᓇᖃᖅᑐᓕᒫᑦ.”

ᓂᕆᐅᓛᖅᐳᓯ: ᐃᓚᖓ 3 ᐅᑯᓇᓂ ᑎᑎᕋᖅᑕᐅᓯᒪᔪᓂᒃ ᕿᒥᕐᕈᐊᖅᑐᖅ ᐊᑯᓂᕈᓗ ᐊᑐᖅᑕᐅᔪᓐᓇᖅᑐᓂᒃ ᐋᖅᑭᒍᑎᒃᓴᓂᒃ ᓄᓇᕗᒥᑦ ᐃᓕᓐᓂᐊᕐᕕᖕᓂ ᓱᕋᒃᓯᒪᔪᓕᕆᓂᕐᒧᑦ.