ᐅᕐᓱᐊᓗᒃᒧᑦ ᐊᒻᒪ ᒑᓯᒧᑦ ᓄᖃᖓᑦᑎᑦᑎᔭᕆᐊᖃᙱᑦᑐ ᑭᓯᐊᓂ ᐱᓕᕆᐊᒃᓴᓕᕆᓚᐅᕐᑎᓪᓗᒋᑦ, ᐅᖃᖅᑐᖅ ᓄᓇᕗᑦ ᒥᓂᔅᑕᖓ

For an English version of this story, see No more oil and gas moratoriums until after devolution, says Nunavut minister

ᒐᕙᒪᑐᖃᒃᑯᑦ ᐅᑕᕿᓪᓗᐊᕐᑐᑦ ᐱᓕᕆᐊᒃᓴᓕᕆᓂᕐᒧᑦ ᐊᖏᕈᑎ ᐊᑎᓕᐅᕐᑕᐅᓚᐅᕐᑎᓪᓗᒍ ᓄᓇᕗᒥ ᖃᓄᐃᓕᐅᖅᑎᑦᑎᒃᑲᓐᓂᓚᐅᙱᓐᓂᖏᓐᓂᒃ ᐅᑭᐅᕐᑕᖅᑐᕐᒥ ᐅᕐᓱᐊᓗᓕᕆᓂᕐᒧᑦ ᐊᒻᒪ ᒑᓯᓕᕆᓂᕐᒧᑦ, ᐅᖃᖅᑐᖅ ᑕᐃᕕᑦ ᐊᕿᐅᕈᒃ, ᓄᓇᕗᑦ ᐱᕙᓪᓕᐊᔪᓕᕆᓂᕐᒧᑦ ᐊᒻᒪ ᐃᖏᕐᕋᔾᔪᑎᓕᕆᓂᕐᒧᑦ ᒥᓂᔅᑕᖓᑦ.

ᐊᕿᐊᕈᒃ ᑕᐃᒪᐃᓕᓚᐅᕐᑐᖅ ᒪᓕᒐᓕᕆᕕᒡᔪᐊᕐᒥ ᑲᑎᒪᔨᒧ ᐊᐱᕆᔭᐅᑎᓪᓗᒍ ᓇᒡᒐᔾᔭᐅᒥ, ᒫᑦᓯ 9-ᒥᑦ ᐆᒧᖓ ᔮᓐ ᒪᐃᓐ, ᒪᓕᒐᓕᐅᕐᑎ ᐊᕐᕕᐊᑦ ᐅᐊᖕᓇᖓᓄᑦ-ᑎᑭᕋᖅᔪᐊᕐᒧᑦ, ᐊᐱᕆᑎᓪᓗᒍ ᓄᓇᕗᑦ ᒐᕙᒪᒃᑯᑦ ᖃᓄᐃᓕᖓᓕᕐᓂᖏᓐᓂᒃ ᐅᑭᐅᕐᑕᖅᑑᑉ ᐅᕐᓱᐊᓗᓕᕆᓂᕐᒥᒃ ᐊᒻᒪ ᒑᓯᓕᕆᓂᕐᒥᒃ ᓄᖅᑲᖓᑎᑕᐅᓕᕐᓂᑯᒥᑦ ᑲᓇᑕᐅᑉ ᐊᖓᔪᖅᑳᖓᓄᑦ ᔭᔅᑎᓐ ᑐᕉᑑᒧᑦ ᑎᓯᐱᕆ 2016-ᖑᑎᓪᓗᒍ.

ᑭᐅᔾᔪᑎᖓᓂ ᐊᕿᐊᕈᒃ ᐅᖃᐅᓯᖃᓚᐅᕐᑐᖅ ᐱᓕᕆᐊᒃᓴᓕᕆᓂᕐᒧᑦ ᐋᖅᑭᒃᓱᐃᓂᐅᓂᐊᖅᑐᓂᒃ ᓯᕗᓕᐅᕐᑎ ᔫ ᓴᕕᑲᑖᖅ ᐅᖃᐅᓯᕆᓚᐅᕐᓯᒪᔭᖓᓂ ᕕᕗᐊᕆ 20-ᐅᑎᓪᓗᒍ.

ᑕᐃᔅᓱᒪᓂ ᓴᕕᑲᑖᖅ ᐅᖃᓚᐅᕐᓯᒪᔪᖅ ᓄᓇᕗᑦ ᒐᕙᒪᒃᑯᑦ ᒐᕙᒪᑐᖃᒃᑯᓐᓂᒃ ᐋᖅᑭᒃᓱᐃᖁᔨᔪᓐᓃᖅᖢᑎᒃ ᓴᐳᔾᔭᐅᓯᒪᔪᒃᓴᓂᒃ ᓄᓇᓂᒃ ᑭᓯᐊᓂ ᒐᕙᒪᓕᕆᓂᕐᒥ ᐋᖅᑭᒃᓱᐃᓂᕐᒧᑦ ᐊᖏᕈᑎ ᐆᒧᖓ ᐊᐅᓚᑦᑎᒍᑎᐅᔪᓂᒃ ᓄᓇᓂᒃ ᐊᒻᒪ ᐊᑐᒃᑲᓐᓂᕈᓐᓇᖅᑐᓕᕆᓂᖅ ᓅᑕᐅᓚᐅᖅᑎᓪᓗᒋᑦ ᐋᑐᕚᒥ ᓄᓇᕗᒧᑦ.

ᐅᓇ ᑕᐃᔭᐃᔾᔪᑎᖃᖅᑐ ᓄᓇᕗᑦ ᖁᐊᕐᓵᕐᒪᑦ ᓄᓇᕗᑦ ᓴᙱᓂᖃᙱᓐᓂᖓᓄᑦ ᐋᑐᕚᒥ ᐊᑐᕋᔭᕆᐊᒃᓴᖏᓐᓂᒃ ᐋᖅᑭᒃᓱᐃᓗᑎᒃ ᓴᐳᔾᔭᐅᓯᒪᔪᒃᓴᓂᒃ ᓄᓇᓂᒃ, ᓴᕕᑲᑖᖅ ᐅᖃᓚᐅᕐᓯᒪᖕᒪᑦ ᕕᕗᐊᕆᒥ.

“ᐃᓱᒪᔪᖓ ᓯᕗᓕᐅᕐᑎᕗᑦ ᐅᖃᐅᓯᖃᑦᑎᐊᓚᐅᕐᓂᖓᓂᒃ ᒪᓕᒐᓕᕆᕕᒃᒥ ᐱᕙᓪᓕᐊᔪᓕᕆᓂᕐᒧᑦ ᓄᓇᕗᒥᑦ, ᑕᐃᒪᓕ ᐱᐊᓂᒃᓯᔭᕆᐊᖃᕋᑦᑕ ᒐᕙᒪᓕᕆᓂᕐᒧᑦ ᐱᓕᕆᐊᓄᑦ ᐊᖏᕈᑎᓂᒃ ᓄᖅᑲᑎᑦᑎᓂᖅᑕᖃᓚᐅᖅᑎᓐᓇᒍ. ᐃᓱᒪᒋᔭᒃᑯᓪᓕ ᑕᒪᓐᓇ ᐃᓚᖃᕐᒪᑦ ᐅᕐᓱᐊᓗᖕᒥᑦ ᐊᒻᒪ ᒑᓯᒥᑦ,” ᐊᕿᐊᕈᒃ ᐅᖃᓚᐅᕐᑐᖅ ᒪᐃᓐᒧᑦ.

ᑭᓯᐊᓂᓕ, ᐊᕿᐊᕈᒃ ᐃᓱᒪᔪᖅ ᖃᓂᑦᑐᒃᑯᑦ ᐅᕐᓱᐊᓗᖕᒧᑦ ᐅᕝᕙᓘᓐᓃᑦ ᒑᓯᒧᑦ ᐊᑐᖅᑐᐊᕐᓂᕐᒧᑦ ᑐᓂᓯᔪᓂᒃ ᐅᑭᐅᕐᑕᖅᑐᕐᒥᑦ ᑕᑯᔾᔮᕋᓱᒋᙱᖢᓂ.

ᓄᓇᕗᑦ ᓇᖕᒥᓂᖅ ᐃᓱᒪᓕᐅᕆᖃᑦᑕᕆᐊᖃᕐᑐᖅ

ᑭᓯᐊᓂᓕ ᐅᖃᓚᐅᕐᒪᓐ ᐱᒻᒪᕆᐅᓂᖓᓂᒃ ᓄᓇᕗᑦ ᐱᔪᓐᓇᕐᓂᖃᕆᐊᖃᕐᓂᖓᓂᒃ ᓇᖕᒥᓂᖅ ᐃᓱᒪᓕᐅᕈᑎᒃᓴᓄᑦ ᓯᕗᓂᑦᑎᓐᓂᒃ ᐅᕐᓱᐊᓗᓕᕆᓂᕐᒧᑦ ᐊᒻᒪ ᒑᓯᓕᕆᓂᕐᒧᑦ ᐱᕙᓪᓕᐊᔪᓕᕆᓂᒃᓴᓄᑦ ᒪᐅᓇ ᐱᓕᕆᐊᒃᓴᓕᕆᓂᕐᒧᑦ ᐊᖏᕈᑎᑎᒍᑦ—ᐊᒻᒪ ᓄᖅᑲᖅᑎᑦᑎᓂᐅᔪᑦ ᐊᒻᒪ ᓄᖅᑲᖓᑎᑦᑎᓂᐅᔪᑦ ᐅᕐᓱᐊᓗᖕᒧᑦ ᐊᒻᒪ ᒑᓯᓕᕆᓂᕐᒧᑦ ᐱᕙᓪᓕᐊᔪᓕᕆᓂᕐᒥᒃ “ᕿᓚᒥᐅᓗᐊᖑᓂᕋᖅᖢᓂᒋ.”

“ᓴᙱᔪᒥᒃ ᒐᕙᒪᓕᕆᓂᕐᒧᑦ ᐊᖏᕈᑎᖃᕆᐊᖃᕋᑦᑕ ᐅᖃᕈᓐᓇᕐᓗᑕ ᐅᕐᓱᐊᓗᖃᕈᒪᖕᒪᖔᑦᑕ ᐊᒻᒪ ᒑᓯᖃᕈᒪᖕᒪᖔᑦᑕ,” ᐊᕿᐊᕈᒃ ᐅᖃᖅᑐᖅ.

ᐅᑯᑎᑐᓈᙱᒻᒪ ᓄᓇᑦᓯᐊᕐᒥ ᐊᒻᒪ ᔫᑳᓐᓂ ᒐᕙᒪᖏᑦᑎᑐᑦ, ᐃᒪᓐᓇ ᓄᓇᕗᑦ ᒐᕙᒪᒃᑯ ᓱᓕ ᐱᔪᓐᓇᕐᓂᖃᙱᒻᒪᑕ ᐊᐅᓚᑦᑎᓂᕐᒥᒃ ᓄᓇᓂᒃ ᑭᒃᑯᓕᒫᓅᖅᑐᓄᑦ ᐊᒻᒪ ᐊᑐᒃᑲᓐᓂᕈᓐᓇᖅᑐᓂᒃ.

ᐊᒻᒪᓗ, ᓄᓇᕗᑦ ᒐᕙᒪᒃᑯᑦ ᐱᔪᓐᓇᕐᓂᖃᙱᑦᑐᑦ ᑮᓇᐅᔭᖅᑖᕈᓐᓇᕐᓂᕐᒥᒃ ᐅᕐᓱᐊᓗᓕᕆᓂᕐᒧᑦ, ᒑᓯᓕᕆᓂᕐᒧᑦ ᐅᕝᕙᓘᓐᓃᑦ ᐅᔭᕋᒃᓯᐅᕐᕕᖕᓂᒃ ᐱᓕᕆᐊᖃᖅᑐᓂᒃ ᓄᓇᓂᒃ ᑭᒃᑯᓕᒫᓅᖅᑐᓂᒃ.

ᓯᕗᓪᓕᒃᑯᑦ ᒐᕙᒪᓕᕆᓂᕐᒥ ᐱᓕᕆᐊᖃᓕᕐᓂᕐᒧᑦ ᐅᖃᓪᓚᑲᑕᖕᓂᕐᒥ, ᐅᕙᓂ ᐊᖏᕈᑎᓂ ᑎᑎᕋᕐᓯᒪᓂᖓᒍ ᐊᑎᓕᐅᖅᑕᐅᓂᑯ ᐋᒐᓯ 15, 2019-ᒥᑦ, ᑕᒪᑐᒥᖓ ᐊᓯᙳᖅᑎᑦᑎᓇᔭᖅᑐᖅ ᐱᓕᕆᕙᓪᓕᐊᓂᖅ ᑭᖑᓪᓕᖅᐹᓄᑦ ᒐᕙᒪᓕᕆᓂᒃᓴᓄᑦ ᐊᖏᕈᑎᓄᑦ ᑎᑭᐅᑎᒃᐸᑦ.

ᓯᕗᓪᓕᖅᐹᖅ ᐅᖃᓪᓚᖕᓂᒃᑯᑦ ᒪᑯᓂᖓ ᐅᖃᐅᓯᖃᕋᔭᖅᑐᑦ ᐊᑎᒃᑲᓐᓂᕈᓐᓇᖅᑐᓂᒃ ᓄᓇᓂᒃ, ᑕᕆᐅᕐᒥᐅᙱᑦᑐᖅ. ᓄᓇᒥ ᐅᕐᓱᐊᓗᒥ ᐱᑕᖃᕐᒥᖕᒪᑦ ᐊᒻᒪ ᒑᓯᖃᖅᑐᓂᒃ ᓄᓇᓄᒥᑦ.

ᒐᕙᒪᓕᕆᓂᕐᒧᑦ ᐊᖏᕈᑎᓂᒃ ᐅᖃᐅᓯᑕᖃᕐᒥᖕᒪᑦ ᐅᖃᖃᑎᖃᓛᕐᓂᕐᒥᑦ ᑕᕆᐅᕐᒥ ᐊᑐᒃᑲᓐᓂᕈᓐᓇᖅᑐᓕᕆᓂᕐᒥᒃ, ᐊᕿᐊᕈᒃ ᐅᖃᖅᑐᖅ, ᐅᖃᖅᖢᓂ ᐃᑲᔪᖅᑐᐃᓯᒪᓂᐊᕐᓂᖓᓂᒃ ᓴᕕᑲᑖᖅᒥᑦ ᓄᓇᕗᑦ ᐱᔪᓐᓇᕐᓂᖅᑖᕆᐊᖃᕐᓂᖓᓂᒃ ᓇᖕᒥᓂᖅ ᐃᓱᒪᓕᐅᕈᓐᓇᓕᕐᓗᑎᒃ.

“ᐱᒃᑯᒋᕙᕋ ᓯᕗᓕᐅᕐᑎᕗᑦ ᑕᒪᑐᒥᖓ ᐱᓇᓱᓪᓚᕆᖕᓂᖓᓂᒃ ᒐᕙᒪᓕᕆᓂᕐᒧᑦ ᐊᖏᕈᑎᓂᒃ ᐃᓚᐅᓪᓗᑎᒃ ᓄᓇᐃᑦ ᐊᒻᒪ ᐊᑐᒃᑲᓐᓂᕈᓐᓇᖅᑐᑦ, ᒪᑯᐊ ᐅᕐᓱᐊᓗᐃᑦ ᐊᒻᒪ ᒑᓰᑦ ᐃᓚᐅᓪᓗᑎᒃ. ᐅᓇ ᐃᑲᔪᐃᓐᓇᕐᓂᐊᖅᑕᕋ ᒐᕙᒪᑎᒍᑦ, ᐃᒪᓐᓇᐅᓂᖓᓄᑦ, ᐅᕙᒍᑦ ᐃᓱᒪᓕᐅᕆᔨᐅᒋᐊᖃᕋᑦᑕ.”

ᐊᕿᐊᕈᒃ ᖃᓄᐃᓕᖓᓂᖓ ᐅᕐᓱᐊᓗᓕᕆᓂᕐᒥᒃ ᐊᒻᒪ ᒑᓯᓕᕆᓂᕐᒥᒃ ᓄᖃᖓᑎᑦᑎᓂᐅᔪᒥ ᐊᔾᔨᐸᓗᒋᕙᖓ ᐲᑕ ᑕᑉᑑᓇᐅᑉ, ᓯᕗᓕᐅᕐᑎᐅᓂᑯ, ᓈᒻᒪᓴᓚᐅᕐᓯᒪᙱᓐᓂᖓᓂ 2016-ᒥᑦ ᐅᓇ ᑐᕉᑑ ᖃᐅᔨᓇᓱᙱᖢᑎ ᐅᑭᐅᕐᑕᖅᑐᕐᒥ ᓯᕗᓕᐅᕐᑎᓂ ᐋᖅᑭᒃᓯᓚᐅᖅᑎᓐᓇᒍ ᐆᒥᖓ ᑕᓪᓕᒪᓂ ᐊᕐᕌᒍᓂᒃ ᓄᖃᖓᑎᑦᑎᓂᐅᓂᐊᖅᑐᓂᒃ.

ᒐᕙᒪᑐᖃᒃᑯ ᐅᑭᐅᕐᑕᖅᑑᑉ ᑕᕆᐅᖏᓐᓂᒃ ᐅᕐᓱᐊᓗᓕᕆᓂᕐᒥᒃ ᐊᒻᒪ ᒑᓯᓕᕆᓂᕐᒥ ᓄᖃᖓᑎᑦᑎᓂᖓᓂᒃ ᑕᑯᒋᐊᒃᑲᓐᓂᓛᖅᑐᑦ 2021 ᑎᑭᓚᐅᕐᑎᓐᓇᒍ.

ᕿᑭᖅᑖᓘᓪᓕ ᑲᓇᖕᓇᖓᑕ ᓯᒡᔭᖏᓐᓄᑦ, ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᑦ, ᖃᓄᐃᓕᐅᕈᑎᒃᓴᓂᒃ ᐊᕙᑎᓕᕆᓂᕐᒧᑦ ᕿᒥᕐᕈᐊᑲᑕᓚᐅᖅᖢᑎᒃ, ᐃᓱᒪᓕᐅᕆᓕᓚᐅᕐᑐᑦ ᐅᓇ ᓄᖃᖓᑎᑦᑎᓂᐅᔪᖅ ᓴᓐᓂᕈᑎᐅᑉ ᐃᒪᖓᓂᒃ ᐊᒻᒪ ᕿᑭᖅᑖᓘᑉ ᐃᑭᖓᓂᒃ ᑲᔪᓯᑎᑕᐅᓗᓂ ᐊᕐᕌᒍᒃᑲᓐᓂᕐᓂᒃ ᑕᓪᓕᒪᓂ 2021 ᑎᑭᓚᐅᕐᑎᓪᓗᒍ.

ᑭᓯᐊᓂᓕ ᒐᕙᒪᑐᖃᒃᑯᑦ ᑭᐅᓚᐅᙱᑦᑐᑦ ᓱᓕ ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔩᑦ ᐃᓱᒪᓕᐊᕆᔭᖏᓐᓄᑦ.

ᒪᑯᓄᖓᓗ ᓄᓇᕗᑦ ᑕᕆᐅᖏᓐᓂᒃ ᐅᕐᓱᐊᓗᓕᕆᓂᖅ ᐊᒻᒪ ᒑᓯᓕᕆᓂᐅᑉ ᐊᑭᒋᓇᔭᖅᑕᖏᓐᓄᑦ ᑮᓇᐅᔭᑎᒍᑦ ᒫᓐᓇᓕᓴᕐᓂᒃ ᑎᑎᕋᐅᓯᐅᓯᒪᙱᑦᑐᑦ.

ᒪᑯᐊᓕ ᖃᐅᔨᓴᕐᓂᐅᕙᖕᓂᑯᑦ 1960-ᖏᓐᓂᒃ ᐊᒻᒪ 1970-ᖏᓐᓂᒃ ᖃᐅᔨᓯᒪᒍᑎᐅᔪᖅ ᓄᓇᕗᑦ ᑕᕆᐅᖏᑦ ᒫᓂ 20 ᐳᓴᓐᑎᖓᓃᓐᓇᓱᒋᔭᐅᓪᓗᓂ ᑲᓇᑕᓕᒫᒥᑦ ᐅᕐᓱᐊᓗᖃᖅᑐᓂᒃ ᐊᒻᒪ ᒑᓯᖃᕐᓂᐅᔪᓂᒃ.

ᐊᒻᒪᓗ ᑕᒪᒃᑯᐊ ᐱᓕᕆᐊᖑᓇᔭᕐᓂᖏᓐᓄᑦ, ᐊᕿᐊᕈᒃ ᐅᖃᓚᐅᕐᑐᖅ ᓄᓇᕗᑦ ᑕᒪᑐᒥᖓ ᐃᓱᒪᓕᐅᕆᔨᐅᒋᐊᖃᕐᓂᖏᓐᓂᒃ.

“ᓄᓇᕗᑦ ᑕᒪᒃᑯᓄᖓ ᐃᓱᒪᓕᐅᕆᔨᐅᔭᕆᐊᖃᕐᒪᑦ. ᐃᓱᒪᓕᐅᕆᔪᖃᕆᐊᖃᙱᒻᒪ ᒪᓕᒐᓕᕆᕝᕕᒃᑕ ᓯᓚᑖᒍᑦ,” ᐅᖃᖅᑐᖅ.