ᐊᑯᓕᕕᒃᒥᐅᑕᖅ ᐊᕐᓇᐅᑉ ᐃᓚᖏ ᑭᐅᔭᐅᔪᒪᔪᑦ ᐸᓖᓯᓂᒃ ᑎᒍᔭᐅᓯᒪᑎᓪᓗᒍ ᐃᓅᔪᓐᓃᖅᑎᓪᓗᒍ

For an English version of this story, please see Akulivik woman’s family wants answers after her police-custody death.

ᐃᓚᒋᔭᐅᔪᑦ ᐊᕐᓇᒧᑦ ᐊᑯᓕᕕᒃᒥᐅᑕᒧᑦ ᖃᐅᔨᓇᓱᒃᑐᑦ ᐃᓅᔪᓐᓃᓚᐅᖅᑎᓪᓗᒍ ᐸᓖᓯᓂᒃ ᑎᒍᔭᐅᓯᒪᑎᓪᓗᒍ.

ᓗᐃᓴ ᕿᓗᕿ, 33, ᐃᓅᔪᓐᓃᓚᐅᕐᓯᒪᔪᖅ ᒫᔅᓯ 4ᒥ ᑎᒍᔭᐅᑎᓪᓗᒍ ᐋᖓᔮᕐᓂᖓᓄᑦ ᐊᖅᑯᑎᒥᒃ, ᑕᐃᒪᓐᓇ ᐅᖃᕐᓯᒪᓚᐅᕐᑐᑦ ᑐᓴᒐᒃᓴᑎᒍᑦ ᐅᑯᓇᙵᑦ Bureau des enquêtes indépendantes, ᑯᐸᐃᒃᒥ ᖃᐅᔨᓴᖃᑦᑕᖅᑐᑦ ᐸᓖᓯᒃᑯᓐᓄᑦ ᑲᒪᒋᔭᐅᔪᓂᒃ ᐃᓅᔪᓐᓃᖅᑐᖃᕌᖓᑦ ᐋᓐᓂᖅᑐᖃᕌᖓᓪᓘᓐᓃᑦ.

“ᖃᐅᔨᔪᒪᒐᑦᑕ ᑖᔅᓱᒧᖓ,” ᐅᖃᖅᑐᖅ ᓕᔨ ᐱᐊᑦᓯ ᕿᓗᕿ, ᓗᐃᓴᐅᑉ ᓄᑲᖓ ᐊᖓᔪᖓᓗᑭᐊᖅ. “ᖃᐅᔨᔪᒪᒐᑦᑕ ᖃᓄᐃᓕᓂᑰᒋᐊᒃᓴᖓᓂᒃ.”

ᓕᔨ ᐱᐊᑦᓯ ᐅᖃᓚᐅᕐᑐᖅ ᑖᓐᓇ ᐃᓚᖏᓪᓗ ᐊᒃᓱᕈᕈᑎᖃᕐᓯᒪᓂᖏᓐᓂᒃ ᑕᐃᒪᙵᑦ ᓗᐃᓴ ᐃᓅᔪᓐᓃᓚᐅᕐᑎᓪᓗᒍ, ᑭᓯᐊᓂᓕ ᑲᔪᓯᓇᓱᐃᓐᓇᕐᑐᑦ.

“ᐃᓚᖏᓐᓂ ᐃᓱᒪᒋᔭᖃᐃᓐᓇᖃᑦᑕᓚᐅᕐᑐᖅ,” ᓕᔨ ᐱᐊᑦᓯ ᐅᖃᖅᑐᖅ. “ᐃᓚᖏᓐᓂᒃ ᐃᑲᔪᐃᓐᓇᖃᑦᑕᓚᐅᕐᑐᖅ.”

ᓗᐃᓴ ᖃᐅᔨᒪᔪᓐᓃᕐᓯᒪᔪᖅ ᖃᐅᔨᔭᐅᓚᐅᕐᓯᒪᔪᖅ ᑎᒍᔭᐅᓯᒪᕝᕕᖓᓂᒃ, ᐊᓯᖏᓐᓂᒃ ᑎᒍᔭᐅᓯᒪᔪᓂᒃ ᐊᕙᓗᔭᐅᓯᒪᓪᓗᓂ ᐊᒻᒪᓗ ᑕᐃᒪᐃᓕᓐᓂᖅᖢᓂ ᐃᑲᕐᕋᑦ ᑕᓪᓕᒪᑦ ᐊᓂᒍᖅᑎᓪᓗᒋᑦ ᑎᒍᔭᐅᓚᐅᕐᑎᓪᓗᒍ ᐅᖃᕐᓯᒪᔪᑦ ᑐᓴᒐᒃᓴᓕᐊᒃᑯᑦ.

ᑯᐸᐃᒃᒥ ᑐᖁᖓᔪᓕᕆᔨ ᑕᒪᑐᒥᖓ ᖃᐅᔨᓴᖃᑕᐅᔪᖅ ᐃᓅᔪᓐᓃᕈᑎᖓᓂᒃ, ᑎᑎᕋᕐᓯᒪᓚᐅᕐᑐᖅ ᑖᔅᓱᒪ ᑎᑎᕋᕐᓯᖓᓂ.

ᐃᓚᐃ ᐊᖏᔪ, ᐊᑯᓕᕕᒃᒥ ᒪᐃᔭ, ᐅᖃᓚᐅᕐᑐᖅ ᑕᒪᓐᓇ ᐊᒃᑐᖅᓯᒪᓂᖓᓂᒃ ᐃᒻᒥᓄᑦ ᓲᖃᐃᒻᒪ ᓗᐃᓴᐅᑉ ᐃᓚᒋᖕᒥᒻᒪᒍ.

ᓄᓇᓖᑦ ᐃᓅᔪᓐᓃᖅᑎᓪᓗᒍ ᐃᓱᒫᓘᑎᖃᕐᓂᖏᑦ ᓇᓗᓇᙱᑦᑐᑦ, ᐊᒻᒪᓗ ᐅᖃᖅᖢᓂ ᐃᓚᖏᑦ ᓄᓇᖃᕐᑐᑦ ᐅᖃᑲᑕᒃᖢᑎᒃ ᐸᓖᓯᓄᑦ ᐱᑦᑎᐊᖅᑕᐅᓯᒪᙱᑦᑕᕆᐊᒃᓴᖓᓂᒃ.

“ᑖᔅᓱᒥᖓ ᐊᒃᓱᕈᕈᑎᖃᕋᑦᑕ,” ᐊᖏᔪ ᐅᖃᖅᑐᖅ. “ᐊᐃᑦᑖᖑᒐᓗᐊᖅ ᐊᑐᓪᓗᐊᙱᑦᑐᒥᒃ ᐊᑐᓚᐅᕋᑦᑕ.”

ᐊᖏᔪ, ᐸᓖᓯᙳᐊᖑᖃᑕᐅᖕᒥᔪᖅ ᓄᓇᓕᖕᓂ ᐊᑯᓕᕕᒃᒥ, ᐅᖃᓚᐅᕐᑐᖅ ᐃᓄᐃᑦ ᓄᓇᓕᖕᓃᑦᑐᑦ ᑐᓴᕆᐊᖃᕐᒪᑕ ᖃᓄᐃᓕᔾᔪᑎᕕᓂᕐᒥᒃ, ᑭᓯᐊᓂᓕ ᖃᐅᔨᓴᖅᑐᓂᒃ ᐱᓕᕆᑎᑦᑎᑐᐃᓐᓇᕐᑐᑦ ᐊᒻᒪ ᖃᓄᐃᓕᔾᔪᑎᕕᓂᖓᓂ ᐅᑕᖅᑭᓪᓗᑎᒃ ᐱᐊᓂᒃᑕᐅᒃᐸᑦ.

“ᐅᒃᐱᕆᙱᓪᓗᒋᑦ ᐅᖃᐅᓯᐅᑲᑕᒃᑐ,” ᐅᖃᖅᑐᖅ ᐊᖏᔪ. “ᑐᓴᖅᑎᓐᓂᐊᖅᐸᔅᓯ ᖃᐅᔨᔭᐅᔾᔪᑎᓂᒃ ᖃᐅᔨᓴᖅᑐᑦ ᐱᐊᓂᒃᑕᐅᓚᐅᕐᑎᓪᓗᒍ … ᐃᑲᔪᕋᓱᖔᓚᐅᕐᑕ, ᑖᒃᑯᓂᖓ ᐃᓚᒌᓂᒃ ᐃᓚᙵᖅᑐᓂᒃ.”

ᓇᓕᐊᒃ ᐸᓖᓯ ᐊᑯᓕᕕᒃᒥᑦ ᓄᖃᖓᑎᑕᐅᓕᓚᐅᙱᑦᑐᖅ ᑕᒪᑐᒧᖓ ᖃᓄᐃᓕᔾᔪᑎᐅᓂᑯᒧᑦ, ᐅᖃᓚᐅᕐᑐᖅ ᐅᓇ ᔮᓐ ᕗᕌᓐᓱᐊ ᒨᕆᓐ, ᓄᓇᕕᒃᒥ ᐊᖓᔪᖅᑳᑉ ᑐᒡᓕᖓ ᐸᓖᓯᒃᑯᑦ ᐊᐅᓚᑕᖏᓐᓄᑦ.

ᖃᐅᔨᓴᖅᑎᑦ ᖃᐅᔨᓴᕐᓂᐊᖅᑐᑦ ᑕᒪᑐᒥᖓ ᐊᑯᓂᕈᓗᒃ ᐅᖃᓚᐅᕐᑐᑦ ᑖᒃᑯᓄᖓ ᐅᖃᕐᑎᒋᔭᐅᔪᖅ ᖃᕋᓴᐅᔭᒃᑯᑦ.