ᐊᒃᑐᖅᑕᐅᖃᑕᐅᔪᖅ ᐃᖅᑲᓇᐃᔭᖅᑎ ᐅᖃᓪᓚᒃᐳᖅ ᐹᕕᓐᓛᓐ ᐃᖅᑲᓇᐃᔭᖅᑎᖏᓐᓂᒃ ᓄᖃᖅᑎᑦᑎᑲᑕᖕᓂᖏᓐᓂ

ᓯᓚᑖᓂ, ᓄᑖᖅ ᑕᒻᒫᓯᒪᕝᕕᒃ, ᓴᓇᔭᐅᓂᑯ ᑳᓐᑐᕌᑎᒍᑦ ᐃᖅᑲᓇᐃᔭᖅᑎᒋᔭᐅᔪᓂᒃ ᐅᔭᕋᒃᓯᐅᕐᕕᒃᒥᑦ, ᐋᖅᑭᒃᐸᓪᓕᐊᓕᓚᐅᕐᑐᖅ. ᑭᓯᐊᓂᓕ ᑐᙵᕕᒃᓴᖓᑕ ᐃᓚᐃᓐᓇᖓ ᐋᕿᒃᓯᒪᔪᖅ.

ᐅᓇ ᑕᐃᒪᐃᓚᐅᕐᓯᒪᔪᖅ ᓄᕕᐱᕆᐅᑉ ᓄᙳᐊᓂᑦ. ᐱᓇᓱᐊᕈᓯᐅᑉ ᓯᕗᓂᐊᓂᑦ, 500 ᐅᖓᑖᓂᒃ ᑳᓐᑐᕌᒃᑯᑦ ᐃᖅᑲᓇᐃᔭᖅᑎᐅᔪᑦ ᓄᓘᔮᖕᓂᑦ ᑎᑎᖃᖅᑖᖅᑐᓚᐅᕐᑐᑦ ᓇᓗᓇᐃᒃᑯᑎᓂᒃ ᐃᖅᑲᓇᐃᔭᕈᓐᓃᖅᑎᑦᑎᓂᐊᕐᓂᕐᒥᒃ ᐹᕕᓐᓛᓐᒥᑦ.

“ᓇᓗᓇᕐᓂᖓᓄᑦ ᐱᓕᕆᓂᖅ 2 ᐱᔪᓐᓇᐅᑎᖏᓐᓄᑦ ᐊᖏᖅᑕᐅᓂᐊᕐᓂᖏᓐᓂᒃ, ᐱᓕᕆᓂᐅᔪᑦ ᐊᒃᑐᐊᔪᑦ 2019-ᒥᑦ ᐱᓕᕆᐊᒃᓴᓄᑦ ᐸᕐᓇᐅᑎᑦ ᓄᖅᑲᖅᑎᑕᐅᓚᐅᕐᑐᑦ,” ᓴᓕᒪ ᐱᕋᓂ, ᑐᓴᒐᒃᓴᓕᕆᔨ ᐹᕕᓐᓛᓐᒧ ᐅᖃᓚᐅᕐᑐᖅ ᖃᕋᓴᐅᔭᒃᑯᑦ ᑎᑎᖃᑎᒍᑦ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ ᓄᕕᐱᕆ 13-ᖑᑎᓪᓗᒍ.

ᓯᕗᓪᓕᕐᒥᓪᓕ, 96-ᓂᒃ ᑳᓐᑐᕌᒃᑯᑦ ᐃᖅᑲᓇᐃᔭᖅᑎᒋᔭᐅᓂᑯᓂᒃ ᓄᖃᖅᑎᑦᑎᓂᕋᓚᐅᕐᑐᑦ. ᑭᓯᐊᓂᓕ ᑎᑎᖃᑎᒍᑦ ᑲᒻᐸᓂᐅᔪᖅ ᓇᒡᓯᐅᑎᔭᕕᓂᖓᓂᒃ ᑎᓯᐱᕆ 6-ᒥ ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᓐᓄᑦ, ᑲᒻᐸᓂᐅᔪᑦ ᒫᓐᓇ ᐅᖃᕐᓯᒪᓕᕐᑐᑦ 48-ᓂ ᐃᓄᖕᓂᒃ ᐃᖅᑲᓇᐃᔭᖅᑎᖃᑐᐃᓐᓇᕐᓂᕋᓕᕐᖢᑎᒃ.

ᐃᓚᒋᔭᐅᔪᖅ ᑳᓐᑐᕌᒃᑯᑦ ᐃᖅᑲᓇᐃᔭᖅᑎᒋᔭᐅᓪᓗᓂ ᐊᒃᑐᖅᑕᐅᖕᒥᔪᖅ ᓄᖃᖅᑎᑕᐅᓂᕐᒧᑦ ᐊᖏᓕᓚᐅᕐᑐᖅ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ ᓴᖅᑭᑕᐅᔾᔮᙱᒃᑯᓂ ᑭᓯᐊᓂ, ᓲᖃᐃᒻᒪ ᐹᕕᓐᓛᓐᑯᑦ ᐊᑐᐊᒐᖃᓚᐅᕐᒪᑕ ᐃᖅᑲᓇᐃᔭᖅᑎᐅᔪᑦ ᑐᓴᒐᒃᓴᓕᐅᖅᑎᓄᑦ ᐅᖃᓪᓚᖃᑦᑕᕐᓂᖏᓐᓄᑦ.

ᐅᖃᓪᓚᒃᑎᓪᓗᒍ ᓄᕕᐱᕆᐅᑉ ᓄᙳᐊᓂ, ᐅᖃᓚᐅᕐᓯᒪᔪᖅ ᐅᓄᙱᑦᑐᑯᓗᐃᑦ ᑳᖅᑐᕌᒃᑯᑦ ᐃᖅᑲᓇᐃᔭᖅᑎᑦ ᐃᖅᑲᓇᐃᔭᕐᓂᖏᓐᓂᒃ ᓱᓕ.

“ᓯᕗᓪᓕᕐᒥ ᖁᒃᓴᓪᓚᖕᓇᓚᐅᕐᑐᖅ,” ᐅᖃᖅᑐᖅ.

“ᖁᕕᐊᓇᓗᐊᓚᐅᙱᑦᑐᖅ ᓯᕗᓪᓕᕐᓂ ᐅᓪᓗᕐᓂ ᐊᒻᒪᓗ ᐃᓅᓯᕋ ᐃᓱᒪᒋᒃᑲᓐᓂᕆᐊᖃᓕᖅᖢᒍ. ‘ᐃᖅᑲᓇᐃᔭᖅᑎᑕᐅᔾᔮᔪᓐᓃᕋᒪ, ᐆᑮ, ᖃᓄᐃᓕᐅᕈᓐᓇᖅᐳᖓ ᐅᕝᕙᓘᓐᓃᑦ ᑭᓱᓂ ᐱᓕᕆᐊᖃᕈᓐᓇᖅᐳᖓ?”

ᐃᖅᑲᓇᐃᔭᖅᑎᐅᔪᖅ ᐃᖅᑲᓇᐃᔭᕐᓯᒪᔪᖅ ᐅᔭᕋᒃᓯᐅᕐᕕᓕᕆᓂᕐᒥᒃ ᐊᕐᕌᒍᓂᒃ 13-ᓂᒃ. ᓄᓘᔮᖕᓂᑦ ᑳᓐᑐᕌᒃᑎᐅᓪᓗᓂ ᐃᖅᑲᓇᐃᔭᓕᓵᕐᓂᑯ ᐊᕐᕌᒎᓚᐅᕐᑐᒥᑦ ᓄᓘᔮᖕᓂ ᐅᖁᒪᐃᑦᑐᓂ ᓄᓇᓯᐅᑎᓂ ᐊᖁᑎᐅᓪᓗᓂ.

ᐃᖅᑲᓇᐃᔭᖅᑎᐅᔪᖅ ᐅᖃᓚᐅᕐᑐᖅ ᐃᖅᑲᓇᐃᔭᕐᓂᖓ ᐃᓱᖃᖅᑎᑕᐅᓚᐅᕐᓂᖓᓂᒃ ᑎᓯᐱᕆ 13-ᒥᑦ, ᐊᒻᒪ ᐅᑎᕐᓂᐊᖅᓗᓂ ᔭᓄᐊᕆ ᐱᒋᐊᕐᓯᒪᓕᕐᑎᓪᓗᒍ.

ᑭᓯᐊᓂᓕ ᓇᓗᓇᐃᒃᑯᑎᑖᕆᔭᖓ ᐅᖃᕐᓯᒪᓚᐅᕐᑐᖅ ᓄᖃᕆᐊᖃᕐᓂᐊᕐᓂᖓᓂᒃ ᓄᕕᐱᕆᐅᑉ ᓄᙳᐊᓂᒃ, ᐅᑎᕐᕕᒃᓴᖓᓂᒃ ᐅᖃᕐᓯᒪᙱᖢᓂ.

“ᑐᓴᕈᓘᔭᖃᑦᑕᓕᓚᐅᕋᑦᑕ ᒫᓂ ᓯᑎᐱᕆ, ᐅᒃᑑᐱᕆᒥ. ᐅᖃᑲᑕᒃᖢᑎᒃ ᐊᕐᕌᒍ ᓄᑖᖅ ᐊᓂᒍᖅᐸᑦ ᓴᓇᔪᓐᓃᑐᐃᓐᓇᕆᐊᖃᕐᓂᑦᑎᓐᓂᒃ. ᖃᐅᔨᑦᑎᐊᓕᓚᐅᕐᑐᒍᑦ ᑭᒃᑯᓕᒫᓂᒃ ᑲᑎᒪᑎᑦᑎᓚᐅᖅᑎᓪᓗᒋᑦ ᐃᖃᓗᖕᓂᑦ. ᑖᓐᓇᓕ ᓇᓗᓇᐃᒃᑯᑎᐅᓚᐅᕐᑐᖅ ᐃᖅᑲᓇᐃᔭᕆᐊᒃᑲᓐᓂᔾᔮᙱᓐᓂᑦᑎᓐᓂᒃ,” ᐅᖃᖅᑐᖅ.

ᑕᕝᕙᓂ ᑲᑎᒪᓂᖅ ᐃᖃᓗᖕᓂ ᐋᖅᑭᒃᑕᐅᓯᒪᓚᐅᕐᓯᒪᖕᒪᑦ ᑭᖑᓪᓕᖅᐹᖑᓂᐊᕐᓗᓂ ᐅᑯᐊ ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏ ᑭᒃᑯᓕᒫᓂᒃ ᑐᓴᕋᓱᖕᓂᕐᒧᑦ ᑲᑎᒪᑎᑦᑎᓂᐊᕐᓗᑎᒃ ᓄᕕᐱᕆ 2-ᒥᑦ ᓄᕕᐱᕆ 6-ᒧᑦ ᐹᕕᓐᓛᓐ ᐱᓕᕆᓂᖅ 2 ᐊᖏᒡᓕᒋᐊᖅᑎᑦᑎᔪᒪᓂᖓᓂᒃ ᓄᓘᔮᖕᓂᑦ ᐅᔭᕋᒃᓯᐅᕐᕕᒃᒥᑦ.

ᐱᓇᓱᐊᕈᓯᓕᒫᖅ, ᐅᖃᓪᓚᒍᓐᓇᖅᑎᑕᐅᓯᒪᔪᑦ ᐅᑎᕐᑕᕋᐅᔭᓚᐅᕐᑐᑦ ᑲᒻᐸᓂᐅᑉ ᐊᖏᒡᓕᒋᐊᖅᑎᑦᑎᔪᒪᓂᖓᓄᑦ, ᐃᓚᖃᖅᖢᓂ 110 ᑭᓛᒥᑕᓂ ᑕᑭᓂᓕ ᓄᓇᓯᐅᑎᑯᑖᒧᑦ ᐊᖅᑯᑎ ᐅᐊᓇᒧᙵᐅᔪᖅ ᓄᓘᔮᖕᓂᙶᕐᓗᓂ ᓄᓘᔮᑦ ᑭᙳᐊᓂᑦ ᑐᓚᒃᑕᕐᕕᒃᒧᑦ. ᐊᖏᒡᓕᒋᐊᖅᑎᑦᑎᓂᐅᔪᖅ ᐅᔭᕋᒃᓯᐅᕐᕕᒃᒥᑦ ᓴᖅᑭᑎᑦᑎᕚᓪᓕᕈᑎᐅᓇᔭᖅᑐᖅ ᒫᓐᓇ 6 ᒥᓕᐊᓐ ᑕᓐᔅ ᓴᕕᕋᔭᒃᓴᐃᓂᒃ ᐊᕐᕌᒍᒧᑦ ᒪᐅᖓ 12 ᒥᓕᐊᓐ ᑕᓐᔅᓄᑦ.

ᑭᓯᐊᓂᓕ ᐃᓄᐃᑦ ᑲᑐᔾᔨᖃᑎᒌᖏᑦ ᑲᑎᒪᖃᑕᐅᔪᑦ ᐅᖃᖃᑦᑕᐃᓐᓇᓚᐅᕐᑐᑦ ᑐᓴᐅᒫᓂᙱᓗᐊᕐᓂᖏᓐᓂᒃ ᐹᕕᓐᓛᓐᒥᑦ ᓯᕗᒧᒃᑲᓐᓂᕆᐊᒃᓴᖅ.

“ᐃᓱᒫᓘᑎᖃᕋᑦᑕ ᑭᒃᑯᓕᒫᓂᒃ ᑐᓴᖅᑎᑦᑎᓂᐅᔪᑦ ᐱᐊᓂᖕᓂᐊᕆᐊᒃᓴᖓᓂᒃ ᑭᓱᓕᒫᑦ ᐱᐊᓂᒃᓯᒪᙱᑎᓪᓗᒋᑦ. ᐃᓄᐃᑦ ᐅᖃᓪᓚᖃᑎᒋᔭᐅᔭᕆᐊᖃᕐᒪᑕ ᐊᒻᒪᓗ ᑐᑭᓕᖕᒥᒃ ᐅᖃᐅᓯᖃᕐᓗᑎᒃ. ᑲᑎᒪᔭᖅᑐᖅᑐᑦ ᑕᒪᕐᒥᒃ ᑐᑭᓯᔪᒪᖕᒪᑕ ᓴᖅᑭᑕᐅᓯᒪᔪᓕᒫᓂᒃ ᐊᒻᒪᓗ ᖃᓄᖅ ᐊᒃᑐᐃᒍᑎᖃᕋᔭᕐᓂᖏᓐᓂᒃ ᓄᓇᕗᑦ ᑐᙵᕕᒃ ᑎᒥᖓᓂᒃ ᐊᒻᒪ ᑲᑐᔾᔨᖃᑎᒌᖑᔪᓂᒃ,” ᐊᓗᑭ ᑰᑦᑎᖅ, ᓄᓇᕗᑦ ᑐᙵᕕᒃ ᑎᒥᖓᑕ ᐊᖓᔪᖅᑳᖓ, ᐅᖃᓚᐅᕐᑐᖅ ᐅᐸᒃᓯᒪᔪᓄᑦ ᐅᖃᓪᓚᒍᓐᓇᖅᑎᑕᐅᓯᒪᔪᓂᒃ ᐊᒻᒪ ᑐᓵᔭᖅᑐᕐᓯᒪᔪᓂᒃ ᓄᕕᐱᕆ 6-ᖑᑎᓪᓗᒍ.

ᑰᑦᑎᖅ ᐱᒋᐊᖅᑎᑦᑎᓚᐅᕐᑐᖅ ᐱᖁᔨᕗᖔᕈᑎᒥ ᑖᓐᓇ ᑲᑎᒪᓂᖅ ᓄᖅᑲᖅᑎᑕᐅᑲᐅᑎᒋᖁᓪᓗᓂᐅᒃ ᐊᒻᒪᓗ ᑲᔪᓯᒃᑲᓐᓂᕐᓂᐊᕐᓗᑎᒃ ᑕᖅᑭᑦ 9 ᐊᓂᒍᖅᐸᑕ ᐊᕐᕌᒍᒃᐸᓪᓘᓐᓃᑦ.

ᐱᖁᔨᕗᖔᕈᑎ ᐃᑲᔪᖅᑕᐅᓚᐅᕐᑐᖅ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓂᒃ, ᑖᒃᑯᐊ ᓄᓇᖃᖅᑎᐅᖕᒪᑕ ᓄᓘᔮᖕᓂᒃ ᐅᔭᕋᒃᓯᐅᕐᕕᒋᔭᐅᔪᒥᒃ.

“ᐃᓱᒪᔪᖓᓕ ᐊᐱᖅᑯᑎᒃᓴᖅᑕᖃᐅᓗᐊᕐᓂᖓᓂᒃ ᐋᖅᑭᒃᑕᐅᕌᓂᒃᓯᒪᙱᑦᑐᓄᑦ. ᑕᐅᑐᒃᑕᒃᑯᓪᓕ, ᐃᓱᒪᓕᐅᕆᓂᐊᕈᕕᑦ ᓯᕗᓂᒃᓴᕐᓂᒃ, ᑐᓴᐅᒪᔭᐅᔭᕆᐊᖃᖅᑐᓕᒫᓂᒃ ᐱᓯᒪᓗᑎᒃ ᐃᓱᒪᓕᐅᕈᑎᐅᔪᓐᓇᕐᓂᐊᕐᒪ ᑐᑭᖃᕐᑐᒥᓐ. ᑕᐃᒪᐃᓚᐅᙱᒻᒪᑦ,” ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓄᑦ ᐊᖓᔪᖅᑳᖅ ᐲ.ᔭᐃ. ᐊᕿᐊᕈᖅ ᐅᖃᓚᐅᕐᑐᖅ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ ᑕᐃᔅᓱᒪᓂ.

ᐃᖅᑲᓇᐃᔭᖅᑎᓕ ᐅᖃᓪᓚᓚᐅᕐᑐᖅ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ ᑖᔅᓱᒧᖓ ᐊᒻᒪ ᐊᓯᖏᓐᓄᑦ ᐃᓄᖕᓄᑦ ᐃᖅᑲᓇᐃᔭᖅᑎᐅᖕᒥᔪᓄᑦ, ᐅᓇ ᓄᖅᑲᖅᑎᑦᑎᓂᖅ ᑐᑭᖃᖅᑐᖅ ᐃᖅᑲᓇᐃᔮᖃᕈᓐᓃᕐᓂᖏᓐᓂᒃ.

“ᑐᓴᓚᐅᕐᑎᓪᓗᑕ, ᑕᒪᑦᑕᕈᔪᒻᒪᕆᒃ ᓈᒻᒪᒃᓴᙱᒻᒪᕆᓚᐅᕐᑐᒍᑦ. ᐃᓛᑎᒍᓪᓗ ᐊᓯᐊᒎᕐᕕᖃᓗᐊᙱᖢᑕ,” ᐅᖃᖅᑐᖅ.

ᐃᖅᑲᓇᐃᔭᖅᑎ ᐅᖃᓚᐅᕐᑐᖅ ᐅᓄᕐᓂᕐᓴᐃᑦ ᐃᓄᐃᑦ ᑳᓐᑐᕌᒃᑯᑦ ᐃᖅᑲᓇᐃᔭᖅᑐᑦ ᓄᓘᔮᖕᓂ ᕿᑭᖅᑖᓘᑉ ᐅᐊᖕᓇᖅᐸᓯᐊᓂᙶᖅᓯᒪᔪᑦ: ᒥᑦᑎᒪᑕᓕᒃ, ᐃᒡᓗᓕᒃ, ᓴᓂᕋᔭᒃ, ᑲᖏᖅᑐᒑᐱᒃ ᐊᒻᒪ ᐃᒃᐱᐊᕐᔪᒃᒥᓐ.

“ᑕᒪᑦᑕᑲᓴᒃ ᓈᒻᒪᒃᓴᙱᒻᒪᕆᓚᐅᕐᑐᒍᑦ ᐅᑯᓄᖓ ᓄᓇᕗᑦ ᑐᙵᕕᒃᑯᓐᓄᑦ, ᕿᑭᖅᑕᓂᒃ ᐃᓄᐃᑦ ᑲᑐᔾᔨᖃᑎᒌᖏᑦ, ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᓐᓂᒃ. ᑖᒃᑯᐊ ᐃᓄᐃᑦ ᑲᑐᔾᔨᖃᑎᒌᖏᑦ ᐅᕙᑦᑎᓐᓂᒃ ᐃᑲᔪᓪᓗᐊᓚᐅᕐᑐᑦ ᑭᓯᐊᓂᓕ ᐃᖅᑲᓇᐃᔮᖃᕈᓐᓃᖅᑎᑦᑎᓪᓗᑎᒃ,” ᐅᖃᖅᑐᖅ.

ᐃᖅᑲᓇᐃᔭᖅᑎᐅᔪᖅ ᐅᖃᓚᐅᕐᑐᖅ ᐹᕕᓐᓛᓐᑯᑦ ᐃᖅᑲᓇᐃᔭᖅᑎᒥ ᑭᒡᒐᖅᑐᐃᔨᖃᓪᓗᐊᓚᐅᕐᑐᑦ ᑭᒃᑯᓕᒫᓂᒃ ᑐᓴᖅᑎᑦᑎᓂᕐᒧᑦ ᑲᑎᒪᑎᓪᓗᒋᑦ.

“ᐅᐸᒃᑎᑦᑎᓪᓗᐊᓚᐅᕐᑐᑦ ᐃᓄᖕᒥ ᑭᒡᒐᖅᑐᐃᔨᐅᓂᐊᕐᑐᒥ ᐃᖅᑲᓇᐃᔭᖅᑐᒥ ᐅᔭᕋᒃᓯᐅᕐᕕᒃᒥᑦ ᐊᒻᒪ ᐅᖃᕈᓐᓇᖅᑎᑕᐅᓗᓂ. ᐅᖃᐅᓯᒃᓴᕗᑦ ᑐᓴᖅᑕᐅᓪᓗᐊᓚᐅᕐᑐᑦ. ᐅᕙᑦᑎᓐᓂᒃ ᑐᓴᐅᒪᑎᑦᑎᓪᓗᐊᓚᐅᕐᑐ ᖃᓄᖅ ᐃᓱᒪᖕᒪᖔᑕ ᑕᒪᑐᒥᖓ. ᐃᓱᒪᒋᔭᐅᓚᐅᙱᑦᑎᐊᕋᑦᑕ ᑖᒃᑯᓇᙵᑦ,” ᐅᖃᖅᑐᖅ.

ᐅᖃᕆᓪᓗᓂ ᐃᓄᐃᑦ ᑲᑐᔾᔨᖃᑎᒌᖏᓐᓄᑦ ᐃᓱᒪᓂᕋᖅᖢᓂ ᑮᓇᐅᔭᖅᑖᖅᑎᑕᐅᓇᔭᕆᐊᒃᓴᖏᓐᓂᒃ ᑕᒪᒃᑯᐊ ᐃᓄᐃᑦ ᐃᖅᑲᓇᐃᔮᖃᕈᓐᓃᖅᑎᑕᐅᔪᑦ.

ᖃᖓᑦᑎᐊᓵᖅ, ᓄᓇᕗᑦ ᒐᕙᒪᒃᑯᑦ ᐊᒻᒪ ᐱᔨᑦᑎᕋᐅᑎᓕᕆᔨᑦ ᑲᓇᑕᒥ ᒪᓂᒻᒪᐃᓯᒪᓚᐅᕐᑐᑦ ᐃᖅᑲᓇᐃᔭᙱᑦᑐᖅᓯᐅᑎᑖᕈᑎᓂᒃ ᐃᖅᑲᓇᐃᔭᕈᓐᓃᖅᑎᑕᐅᔪᓄᑦ ᐅᔭᕋᒃᓯᐅᕐᕕᒃᒥᑦ.

ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᐊᒻᒪ ᓄᓇᕗᑦ ᑐᙵᕕᒃᑯᑦ ᑭᐅᔾᔪᑎᖏᑦ

ᓄᓇᑦᓯᐊᕐᒥ ᐱᕙᓪᓕᐊᔪᑦ ᐅᖃᓪᓚᒍᓐᓇᕐᓯᓚᐅᕐᑐᑦ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᓄᑦ ᐊᒻᒪ ᓄᓇᕗᑦ ᑐᙵᕕᒃᑯᓐᓄᑦ ᐃᖅᑲᓇᐃᔭᖅᑎᐅᑉ ᐅᖃᐅᓯᖓᑕ ᒥᒃᓵᓄᑦ.

ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᐅᖃᓚᐅᕐᑐᑦ ᐸᕐᓇᒃᐸᓪᓕᐊᓂᖏᓐᓂᒃ ᖃᓄᐃᓕᐅᕈᑎᒋᓂᐊᖅᑕᖏᓐᓂᒃ ᑖᒃᑯᐊ ᐳᓛᓚᐅᖅᑎᓪᓗᒋᑦ ᒥᑦᑎᒪᑕᓕᒃᒧᑦ ᑲᑎᖃᑎᖃᕆᐊᖅᑐᖅᖢᑎᒃ “ᐃᓄᖕᓂ ᐊᒃᑐᖅᑕᐅᒻᒪᕆᒃᑐᓂᒃ ᐃᖅᑲᓇᐃᔮᖃᕈᓐᓃᕐᓂᒃᑯᑦ ᐊᒻᒪᓗ ᓄᓇᓖᑦ ᓯᕗᓕᐅᕐᑎᐅᔭᕆᐊᖃᕐᓂᖏᓐᓂᒃ.”

ᑭᓯᐊᓂᓕ ᐅᔭᕋᒃᓯᐅᕐᕕᐅᑉ ᐱᓕᕆᓂᖅ 2-ᒥᑦ ᐊᖏᒡᓕᒋᐊᖅᑎᑦᑎᔪᒪᓂᖓ ᓇᓗᓇᖅᑐᒦᑦᑐᖅ ᓱᓕ. ᐹᕕᓐᓛᓐ ᐱᔪᒪᓚᐅᕐᑐᑦ ᑲᑎᒪᓂᖅ ᑲᔪᓯᑎᑕᐅᖁᓪᓗᓂᔾᔪᒃ ᐄᐳᕈᓪ 2020-ᒥᑦ, ᐅᑯᐊᓕ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᐊᒻᒪ ᓄᓇᕗᑦ ᑐᙵᕕᒃᑯ ᐃᓱᒪᓪᓗᑎᒃ ᐊᕐᕌᒍᒥ ᓄᖃᖓᖁᔨᓪᓗᑎᒃ. ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᑦ ᐅᖃᓚᐅᙱᑦᑐᑦ ᓱᓕ ᖃᓄ ᐊᑯᓂᐅᑎᒋᓂᐊᕆᐊᒃᓴᖓᓂᒃ ᓄᖃᖓᓂᐅᓂᐊᖅᑐᖅ.

“ᒫᓐᓇᓕ, ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᖃᐅᔨᓇᓱᒃᑐᑦ ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᓐᓂᒃ ᐆᒥᖓ ᓯᕗᓂᒃᓴᒥ ᖃᓄᐃᓕᐅᕈᑎᐅᓂᐊᖅᑐᓂᒃ ᐆᒧᖓ ᐱᓕᕆᓂᖅ 2 ᐊᕙᑎᓕᕆᓂᒃᑯᑦ ᖃᐅᔨᓴᕐᓂᕐᒧᑦ, ᐊᒻᒪᓗ ᑐᑭᓯᓇᕐᓂᕐᓴᓂᒃ ᑐᓴᕈᒪᓪᓗᑎᒃ ᐹᕕᓐᓛᓐᑯᓐᓂᑦ ᐸᕐᓇᐅᑎᒋᔪᒪᓂᐊᖅᑕᖏᓐᓂᒃ,” ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᑦ ᖃᕋᓴᐅᔭᒃᑯᑦ ᐅᖃᓚᐅᕐᑐᑦ.

“ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᑲᔪᓯᓂᐊᕐᑐᑦ ᐃᑲᔪᖅᑐᐃᔨᐅᓗᑎᒃ ᐃᓄᐃᑦ ᐳᔪᓐᓇᐅᑎᖏᓐᓂᒃ ᒪᐅᓇ ᐱᓗᐊᖅᑐᒥᑦ ᐊᕙᑎᓕᕆᓂᒃᑯᑦ ᐊᐅᓚᑦᑎᓂᕐᒥᒃ, ᓄᓇᓖᑦ ᐃᓚᐅᑎᑕᐅᔭᕆᐊᖃᕐᓂᖏᓐᓂᒃ, ᐊᖑᓇᓱᒃᐸᖕᓂᖅ, ᐃᖅᑲᓇᐃᔮᖃᕐᓂᕐᒥᒃ ᐊᒻᒪ ᐊᔪᕈᓐᓃᕐᓴᕈᑎᐅᔪᓐᓇᖅᑐᓂᒃ, ᑳᓐᑐᕌᒃᓯᕙᖕᓂᕐᒥᒃ ᐊᒻᒪᓗ ᐃᑲᔫᑎᒃᓴᓂᒃ ᐱᑖᖅᑎᑦᑎᕙᖕᓂᕐᒥᒃ ᓄᓇᓕᖕᓄᑦ ᐊᒃᑐᖅᑕᐅᓯᒪᔪᓂᒃ ᒫᓐᓇ ᐅᕗᓈᖓᔪᓂᒃ ᐃᓄᐃᑦ ᐊᒃᑐᖅᑕᐅᓂᐊᕐᓂᖏᓐᓄᑦ ᐃᑲᔫᓯᐊᖅᑖᕈᓐᓇᐅᑎᖏᓐᓄᓪᓗ ᐊᖏᕈᑎᓂᒃ,” ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᐅᖃᓚᐅᕐᑐᑦ.

ᓄᓇᕗᑦ ᑐᙵᕕᒃᑯᑦ ᐅᑕᕿᖕᒥᔪᑦ ᖃᓄᖅ ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏ ᖃᓄᐃᓕᓂᐊᕆᐊᒃᓴᖏᓐᓂᒃ ᓄᖃᖓᓂᕐᒧᑦ.

“ᓄᓇᕗᑦ ᑐᙵᕕᒃᑯᑦ ᑲᔪᓯᓯᒪᔪᑦ ᐃᑲᔪᖅᑐᐃᓪᓗᑎᒃ ᓄᓘᔮᖕᓂ ᐱᓕᕆᐊᒥᒃ. ᓄᓇᕗᑦ ᑐᙵᕕᒃᑯᑦ ᓈᒻᒪᒃᓴᙱᓪᓗᑎᐅᙱᑦᑐᖅ ᐊᖏᒡᓕᒋᐊᖅᑎᑦᑎᔪᒪᓂᕐᒥᒃ ᐅᔭᕋᒃᓯᐅᕐᕕᒃᒥᑦ ᑭᓯᐊᓂᓕ ᐃᓱᒫᓘᑎᖃᖅᑐ ᐱᓕᕆᐊᖑᔭᕆᐊᖃᕐᓂᖓᓂᒃ ᐃᓱᒪᒋᔭᖃᕐᓂᒃᑯᑦ ᐱᓕᕆᐊᒧᑦ ᐊᒻᒪᓗ ᐊᕙᑎᒋᔭᐅᔪᒥᑦ ᐊᒻᒪ ᐃᓕᖁᓯᑐᖃᕐᒥᑦ ᐊᒃᑐᐃᒍᑎᖏᓐᓂᒃ. ᑕᒪᓐᓇᓕ ᐊᔪᕐᓇᕐᒪ ᐱᓕᕆᕙᓪᓕᐊᓂᐅᔪᒃᑯᑦ ᑭᒃᑯᓕᒫᓂᒃ ᑐᓴᖅᑎᑦᑎᓂᖅ ᖃᓄᐃᑉᐸᓪᓕᐊᓂᖓᒍᑦ ᐅᓪᓗᓂ ᑕᓪᓕᒪᐅᓕᕐᑐᓂᒃ,” ᓄᓇᕗᑦ ᑐᙵᕕᒃᑯᑦ ᐅᖃᓚᐅᕐᑐᑦ ᖃᕋᓴᐅᔭᒃᑯᑦ ᐅᖃᐅᓯᖏᓐᓂᒃ.

ᓄᓇᕗᑦ ᑐᙵᕕᒃᑯ ᐅᖃᓚᐅᙱᑦᑐ ᖃᓄᐃᓕᐅᕐᓯᒪᔭᕆᐊᒃᓴᖏᓐᓂᒃ ᒪᑯᓄᖓ ᐃᓄᖕᓄᑦ ᐃᖅᑲᓇᐃᔮᖃᕈᓐᓃᖅᑐᓂᒃ.

ᓄᓘᔮᖕᓂᓪᓕ, ᐃᖅᑲᓇᐃᔭᕈᓐᓃᖅᑎᑕᐅᔪᖅ ᐸᕐᓇᓕᖅᑐᖅ ᓄᓘᔮᖕᓂ ᐊᐅᓪᓚᕐᓂᐊᕋᒥ ᐊᒻᒪᓗ ᐃᓱᒪᓪᓗᓂ ᑭᖑᓪᓕᖅᐹᖑᔭᕆᐊᒃᓴᖓᓂᒃ.

“ᐃᖅᑲᓇᐃᔮᕋ ᖁᕕᐊᒋᒐᒃᑯ ᐅᕙᓂ. ᐊᖓᔪᖅᑳᖃᑦᑎᐊᖅᖢᖓ, ᐃᖅᑲᓇᐃᔭᖅᑎᑦᑎᐊᕚᓗᐃᓪᓗ. ᑭᓯᐊᓂᓕ ᓯᕗᓂᒃᓴᕋ ᓇᓗᓇᕐᓯᔪᖅ—ᖃᓄᐃᓕᐅᕐᓂᐊᓕᖅᐳᖓ, ᓇᓂ ᐃᖅᑲᓇᐃᔮᖅᑖᕈᓐᓇᕋᒪ, ᐱᓗᐊᖅᑐᒥ ᕿᑲᕐᓇᐅᔭᓪᓕᐊᓕᖅᑎᓪᓗᒍ.”