ᐊᕐᕕᐊᕐᒥᐅᑕᖅ ᐊᖑᑎ ᓂᕆᐅᒍᒪᓂᕋᓚᐅᕐᑐᖅ “ᐃᓕᖅᑯᓯᕐᒧᑦ” ᐅᑎᕈᓐᓇᕈᒪᓂᕐᒥ ᐅᓇ ᒐᕙᓇ ᔭᓄᕈᓪ ᐊᕐᕌᒍ ᓄᑖᒧᑦ ᐅᖃᓪᓚᒃᑎᓪᓗᒍ

ᔫ ᖃᕆᑕᖅ ᓄᓇᕗᒥᑦ ᑭᒡᒐᖅᑐᐃᓚᐅᕐᑐᖅ ᐅᓇ ᑕᕐᕆᔭᒐᒃᑯᑦ ᐸᐃᔭᑦ 2021 ᐊᕐᕌᒍᒧᑦ ᐅᖃᓪᓚᒃᑎᓪᓗᒍ

ᐊᕐᕕᐊᓂ ᓄᓇᖃᕐᑐᖅ ᔫ ᖃᕆᑕᖅ ᓂᕆᐅᒍᒪᓂᕋᓚᐅᕐᑐᖅ “ᐃᓕᖅᑯᓯᕐᒧᑦ” ᐅᑎᕈᓐᓇᕈᒪᓪᓗᓂ ᓄᓇᕗᒥᑦ ᑭᒡᒐᖅᑐᐃᓪᓗᓂ ᐅᖃᓪᓚᒃᑎᓪᓗᒍ ᒐᕙᓇ ᔭᓄᕈ ᐊᕐᕌᒍᒧᑦ ᓄᑖᒧᑦ. (ᐊᔾᔨᓕᐅᕆᓯᒪᔪᖅ ᒐᕙᓇ ᔭᓄᕉᑉ ᖃᕋᓴᐅᔭᒃᑯᑦ ᓴᖅᑭᔮᒐᖓᓂᒃ)

By ᑯᕆ ᓚᐅᕌᒃ

For an English version of this story, see Arviat man shares hope for “normalcy” during Governor General’s new year message

ᐊᕐᕌᒍ “ᐊᒃᓱᕈᓐᓇᖅᑐᖃᓚᐅᕐᑎᓪᓗᒍ” ᐃᓕᖅᑯᓯᕐᒧᑦ ᐅᑎᕈᒪᓂᕐᒥ ᓂᕆᐅᖕᓂᖃᓚᐅᕐᑐᖅ ᔫ ᖃᕆᑕᖅ 2021-ᒥᑦ — ᑖᓐᓇᓗ ᑲᓇᑕᒥᐅᑕᓄᑦ ᐃᓱᒪᒋᔭᐅᓪᓗᓂ ᐅᓇ ᒐᕙᓇ ᔭᓄᕈᓪ ᓄᑖᒥ ᐊᕐᕌᒍᒧᑦ ᐅᖃᓪᓚᒃᑎᓪᓗᒍ.

ᓄᕙᒡᔪᐊᕐᓇᖅ-19 ᓴᖅᑭᔮᓪᓚᕆᒃᓯᒪᓚᐅᕐᑐᖅ ᐅᓇ ᒐᕙᓇ ᔭᓄᕈᓪ ᔫᓕ ᐸᐃᔭᑦ ᑕᕐᕆᔭᒐᒃᓴᒃᑯᑦ ᐅᖃᓪᓚᒃᑎᓪᓗᒍ ᖃᕋᓴᐅᔭᒃᑯᑦ ᓴᖅᑭᔮᒐᖓᒍᑦ.

“ᑭᓱᓕᒫᑦ ᐊᓯᙳᕐᒪᑕ” ᐱᔾᔪᑎᒋᓪᓗᒍ ᐋᓐᓂᐊᕐᓈᓗᒃ, ᐸᐃᔭᑦ ᐅᖃᖅᑐᖅ. “ᑭᓇᑐᐃᓐᓇᖅ ᐃᓱᒪᓚᐅᙱᑦᑐᖅ ᖃᓄᖅ 2020 ᑎᑭᐅᔾᔨᓯᒪᓂᐊᕆᐊᒃᓴᖓᓂᒃ.”

ᖃᕆᑕᐅᑉ ᓇᔭᖓ, ᓄᓇᕗᒥᑦ ᑲᒥᓯᓇᐅᓚᐅᕐᓯᒪᔪᖅ ᓇᓕ ᑕᑉᑕᖁᑦ ᑯᓱᒐᖅ, ᑖᔅᓱᒥᖓ ᐅᖃᓪᓚᖁᔨᓚᐅᕐᓯᒪᔪᖅ ᑕᕐᕆᔭᒐᒃᓴᒃᑯ ᐅᑯᐊ ᒐᕙᓇ ᔭᓄᕈᒃᑯᑦ ᑎᑎᕋᕐᕕᖓ ᑖᔅᓱᒧᖓ ᓇᓕᒧᑦ ᐅᖄᓚᓚᐅᕐᑎᓪᓗᒋᑦ. ᓄᕕᐱᕆᐅᑎᓪᓗᒍ, ᑖᓐᓇ ᐊᖏᓚᐅᕐᓯᒪᔪᖅ ᑭᓯᐊᓂᓕ ᐳᐃᒍᖅᖢᓂᐅᒃ ᑭᓯᐊᓂ ᐸᐃᔭᑦ ᑎᑎᕋᕐᕕᖓᓂᒃ ᖃᕋᓴᐅᔭᒃᑯᑦ ᑎᑎᕋᕐᕕᐅᒐᒥ ᐱᓇᓱᐊᕈᓯᑦ ᐱᖓᓱᑦ ᐊᓂᒍᕐᑎᓪᓗᒍ.

“ᑕᒪᓐᓇ ᑕᒪᐅᖓ ᑎᑭᓯᒪᓇᓱᒋᓚᐅᙱᑕᕋ,” ᐅᖃᖅᑐᖅ ᖃᕆᑕᖅ, ᖃᐅᔨᓴᖅᑎᐅᕙᒃᑐᖅ ᐊᖅᑭᐅᒪᕝᕕᒃ ᑲᑐᔾᔨᖃᑎᒌᓄᑦ, ᐅᖄᓚᐅᑎᒃᑯᑦ ᐊᐱᖅᓱᖅᑕᐅᑎᓪᓗᒍ ᐊᕐᕌᒍ ᓄᑖᑉ ᐅᓪᓗᖓᓂᒃ.

ᑕᕐᕆᔭᒐᒃᓴᒃᑯᑦ, ᐸᐃᔭᑦ ᐊᕕᒃᑐᕐᓯᒪᓂᒃᑯᑦ ᒐᕙᓇ ᔭᓄᕈᒧᑦ ᑐᒡᓕᕆᔭᐅᔪᓂᒃ ᐊᒻᒪᓗ ᑎᐅᕆᑑᕆᓂᒃ ᑲᒥᓯᓇᓂ ᐃᓚᐅᑎᑦᑎᓪᓗᓂ “ᐃᓱᒪᒋᔭᖏᓐᓂᒃᑕᐅᖅ ᐅᖃᓪᓚᖕᓂᐊᕐᒪᑕ ᐊᒻᒪ ᓂᕆᐅᒋᔭᖏᓐᓂᒃ ᐊᕐᕌᒍᒥ ᐊᒡᒋᖅᑐᒥᑦ.”

ᓄᓇᕗᒥᐅᑦ ᐅᖃᕈᓐᓇᓕᕐᑎᓪᓗᒋᑦ, ᑭᒡᒐᖅᑐᐃᔨᖃᓚᐅᕐᑐᑦ ᖃᕆᑕᖅᒧᑦ, ᑖᓐᓇ ᐊᕐᕕᐊᓂ ᓄᓇᖃᕐᑐᖅ, ᑖᒃᑯᐊᓗ ᐊᒃᑐᖅᑕᐅᓯᒪᓛᖑᓪᓗᑎᒃ ᓄᕙᒡᔪᐊᕐᓇᖅ-18-ᒧᑦ ᓄᕕᐱᕆᒥᑦ.

“ᑕᑯᕙᓪᓕᐊᓗᑕ ᐃᓕᖅᑯᓯᕐᒧᑦ ᐅᑎᕐᐸᓪᓕᐊᓂᕐᒥᒃ ᐊᒻᒪᓗ ᐋᓐᓂᐊᖅᑐᑦ ᖃᓄᐃᑦᑐᓐᓃᕐᓵᓕᓗᑎᒃ,” ᖃᕆᑕᖅ ᐅᖃᖅᑐᖅ.

ᓄᓇᕗᑦ ᓇᓗᓇᐃᕐᓯᓯᒪᔪᑦ 266-ᓂᒃ ᓄᕙᒡᔪᐊᕐᓇᖅ-19-ᒥᒃ ᐋᓐᓂᐊᖃᖅᑐᓂᒃ, 222 ᐊᕐᕕᐊᓂᙶᖅᖢᑎᒃ, ᐅᑯᑎᒎᓇᕐᓕ ᒐᕙᒪᒃᑯᑦ ᑎᓯᐱᕆ 30-ᒥᑦ ᐅᓂᒃᑳᖏᓐᓂᒃ ᑭᖑᓪᓕᕐᐹᓂᒃ.

ᑖᔅᓱᒪᓕ ᐃᓚᓪᓚᕆᖏᑦ ᓄᕙᒡᔪᐊᕐᓇᖅ-19-ᒧᑦ ᐊᒃᑐᖅᑕᐅᓚᐅᙱᑦᑐᑦ ᑭᓯᐊᓂᓕ ᖃᕆᑕᖅ ᐅᖃᓚᐅᕐᑐᖅ “ᐊᒃᓱᕈᕐᓇᖅᑐᐊᓘᓂᖓᓂᒃ” ᖃᐅᔨᒪᓪᓗᓂ ᐃᓚᒋᔭᖏᑦ ᐃᓚᖏᑦ ᑕᒪᑐᒥᖓ ᐋᓐᓂᐊᖃᕐᓂᖏᓐᓄᑦ.

ᐋᓐᓂᐊᕐᓇᕆᔭᐅᔪᖅ ᐊᐃᑦᑑᑎᐅᑦᑕᐃᓕᓪᓗᓂ, ᓄᓇᕗᒻᒥᐅᓕᒫᑦ ᐱᓇᓱᐊᕈᓰᖕᓂ ᒪᕐᕉᖕᓂ ᒪᑐᓯᒪᑎᑕᐅᓚᕐᓯᒪᔪᑦ ᓄᕕᐱᕆ ᓄᖑᓕᕐᑎᓪᓗᒍ ᐊᒻᒪ ᑎᓯᐱᕆ ᐱᒋᐊᓕᓵᕐᓂᖓᓂ.

ᓄᓇᕗᒥᑦ ᐊᑕᐅᓯᕐᒥ ᓇᓗᓇᐃᕐᓯᓯᒪᓚᐅᕐᑐᑦ ᓄᕙᒡᔪᐊᕐᓇᖅ-19-ᒧᑦ ᐃᓅᔪᓐᓃᕐᑐᕕᓂᕐᒥᑦ ᐊᕐᕕᐊᕐᒥᐅᑕᒥ ᑎᓯᐱᕆᐅᑉ ᕿᑎᐊᓂ. ᓄᓇᕗᑦ ᐊᕐᕌᒍᒥ ᐃᓱᓕᑦᑎᓚᐅᕐᑐᑦ ᐱᖓᓱᐃᓐᓇᕐᓂᒃ ᑯᕉᓇ ᕙᐃᕋᔅᒥ ᐋᓐᓂᐊᖃᖅᑐᖃᖅᖢᓂ.

ᑕᒪᒃᑯᐊ ᓴᖅᑭᔮᖃᑕᐅᔪᑦ ᑭᒡᒐᖅᑐᐃᓂᒃᑯᑦ ᓇᓗᓇᐃᖅᑕᐅᖃᑦᑕᓚᐅᕐᑐᑦ ᑕᐃᔭᐅᒍᑎᖏᓐᓂᒍᑦ ᐃᒪᓐᓇ “ᓂᕐᓱᕐᓇᖅᑐᖅ” ᐅᕝᕙᓘᓐᓃᑦ ᓘᑕᓇᓐᑦ ᒐᕙᓇᑎᑐᑦ, ᐅᓇᓕ ᖃᕆᑕᖅ ᓇᓗᓇᐃᖅᑕᐅᓪᓗᓂ ᐃᒪᓐᓇᑐᐃᓐᓇᖅ “ᐊᕐᕕᐊᓂᒃ ᓄᓇᖃᖅᑐᖅ.”

ᑕᒪᒃᑯᐊ ᓘᑕᓇᓐᑦ ᒐᕙᓇᐅᔪᑦ ᐅᖃᖁᔭᐅᖕᒪᑕ 2020 ᒥᒃᓵᓄᑦ ᐊᑕᐅᓯᕐᒥ ᐅᖃᐅᓯᒃᑯᑦ, ᐅᖃᓚᐅᕐᑐᑦ “ᐱᓇᓱᒍᓐᓇᕐᓂᖅ,” “ᒪᓂᑐᐃᓐᓇᙱᓐᓂᖅ,” ᐊᒻᒪ “ᖁᔭᓕᓂᕐᒥᒃ.”

ᖃᕆᑕᕐᓕ ᐅᖃᓚᐅᕐᑐᖅ ᐃᒪᓐᓇ “ᐊᒃᓱᕈᕐᓇᖅᑐᖅ.”

ᐅᑯᐊ ᒐᕙᓇ ᔭᓄᕈᑯᑦ ᑎᑎᕋᕐᕕᖓᑦ ᐊᔾᔨᓕᐅᕐᓯᒪᔪᓂᒃ ᑭᐅᖃᑦᑕᖁᔨᓚᐅᕐᑐᑦ ᐊᐱᖅᑯᑎᒃᓴᐅᔪᓂᒃ ᒪᑯᓂᖓ ᑭᓱᓂᒃ ᖁᕕᐊᓲᑎᖃᕐᓂᖓᓂᒃ 2020-ᒥᑦ ᐊᒻᒪ ᑭᓱᓂᒃ ᓂᕆᐅᒋᔭᖃᕐᒪᖔᑦ 2021-ᒥᑦ.

“ᐃᓱᒪᒃᓴᕐᓯᐅᖃᑦᑕᕆᐊᖃᓚᐅᕋᒪ ᖃᓄᐃᓕᓂᐊᕆᐊᒃᓴᓐᓂᒃ ᕿᓚᒥᕈᓗᒃ,” ᐅᖃᖅᑐᖅ.

ᐊᔾᔨᓕᐅᕆᑲᑕᒋᐊᖃᕐᓂᖓᓄᑦ ᖃᕆᑕᖅ ᓯᕗᓪᓕᕐᐹᒥᑦ ᐅᖄᓚᐅᑎᕋᓛᒥᒍᑦ ᐊᔾᔨᓕᐅᕋᓱᓚᐅᕐᑐᖅ.

“ᐅᕙᓐᓂᓪᓘᓐᓃᑦ ᐊᔾᔨᓕᐅᕆᕙᙱᓐᓇᒪ ᐅᖄᓚᐅᑎᕋᓛᒃᑯᑦ,” ᐅᖃᖅᑐᖅ ᖃᕆᑕᖅ, ᐅᖃᒃᑲᓐᓂᖅᖢᓂ ᐱᓕᕆᐊᖃᖅᑎᑦᑎᓕᓚᐅᕐᓂᖓᓂᒃ ᐃᕐᓂᖓᓂᒃ ᐅᑭᐅᓕᒃ 13-ᓂᒃ ᑕᒪᒃᑯᓂᖓ ᐱᓕᕆᐊᕆᓇᓱᒃᑕᖓᓄᑦ.

ᐸᐃᔭᑦ, ᓯᓚᐃᓐᓇᕐᒧᙵᐅᓯᒪᓂᑯ, ᐅᖃᓚᐅᕐᑐᖅ “ᖁᔭᓐᓇᒦᒃ ᖃᐅᔨᓴᖅᑐᓕᕆᓂᖅ” ᐊᒻᒪᓗ ᓄᕙᒡᔪᐊᕐᓇᖅ-19-ᒧᑦ ᑲᐴᑎᒃᓴᓕᐅᕐᓂᖅ — ᒪᑯᑎᑐᓇᖅ ᒪᑑᓇ ᑲᐴᑎᒃᓴᑎᑐᑦ ᐃᖃᓗᖕᓄᑦ ᑎᑭᓵᓚᐅᕐᑐᑦ ᐱᓇᓱᐊᕈᓯᐅᓚᐅᕐᑐᒥᑦ — ᒫᓐᓇ “ᖃᐅᒪᓂᖅᑕᖃᓕᕐᓂᖓᓂᒃ ᓱᓪᓗᑯᑖᑉ ᐃᓱᐊᓂᒃ.”

“ᑕᐃᒪᓕ ᒫᓐᓇ ᐊᒃᓱᕈᕐᓂᕐᓴᐅᔭᕆᐊᖃᖅᐳᒍᑦ ᐊᒻᒪ ᐊᓯᑦᑎᓐᓂᒃ ᑲᒪᒋᔭᖃᑦᑎᐊᑲᑕᒡᓗᑕ ᐊᒻᒪ ᕿᓄᐃᓵᕐᓯᒪᓗᑕ,” ᐸᐃᔭᑦ ᐅᖃᖅᑐᖅ.

Share This Story

(0) Comments

Join the Conversation

Your email address will not be published. Required fields are marked *

*