ᐋᑐᕚᒥ ᓄᓇᓕᐸᐅᔭᓄᑦ ᑲᑎᒪᔨ ᓈᒻᒪᒃᓴᙱᑦᑐᖅ ᓄᑖᒥ ᓛᒐ ᐹᕕᓐᓴᕐᒥ

ᐋᑐᕚᓂ ᓄᓇᓕᐸᐅᔭᓄᑦ ᑲᑎᒪᔨ ᓈᒻᒪᒃᓴᙱᑦᑐᖅ ᓴᓇᔭᐅᔪᒪᔪᒥᒃ ᓄᑖᒥ ᓛᒐ ᐹᕕᓐ ᑐᔪᕐᒥᕕᒃᓴᒥ, ᐅᖃᐅᓯᖃᖅᖢᓂ ᑭᒡᒐᖅᑐᖅᑕᖏᑦ ᓈᒻᒪᒃᓴᙱᓐᓂᖏᓐᓄᑦ.

260 ᐅᖓᑖᓂ ᐅᐸᒍᑎᔪᖃᓚᐅᕐᑐᖅ ᓴᖅᑭᔮᒐᒃᓴᖅ ᑭᒃᑯᓕᒫᓂᒃ ᑐᓴᖅᑎᑦᑎᔾᔪᑎᓕᕆᓂᕐᒥᒃ ᐄᐳᕈᓪ 26-ᖑᑎᓪᓗᒍ ᐅᖃᐅᓯᖃᕐᑐᓂᒃ ᓄᑖᒥ ᓛᒐ ᐹᕕᓐ ᑐᔪᕐᒥᕕᓕᐅᕈᒪᓂᕐᒥᒃ ᐋᑐᕚᒥ ᒫᓂ ᕼᐊᓐ ᑲᐸᑉ ᒥᒃᓵᓂ.

ᓛᒐ ᑐᔪᕐᒥᕕᒃ ᐋᓐᓂᐊᕕᓕᐊᖅᑐᓄᑦ ᑐᔪᕐᒥᕕᐅᖃᑦᑕᕐᑐᖅ ᓄᓇᕗᒻᒥᐅᓄᑦ ᑲᒪᒋᔭᐅᔭᕆᐊᓕᖕᓂᒃ ᐋᑐᕚᒥ ᐊᒻᒪᓗ ᑲᒡᒍᑎᖃᕐᑐᓄᑦ (ᑳᓐᓱ), ᐅᓗᕆᐊᓇᖅᑐᒦᑦᑐᓄᑦ ᓯᖓᐃᔪᓄᑦ ᓱᕈᓯᕐᓄᓪᓘᓐᓃᑦ ᑲᒪᒋᔭᐅᔭᕆᐊᖃᕐᑐᓄᑦ ᓄᓇᕗᒥᑦ ᐊᑐᐃᓐᓇᐅᔪᓐᓇᙱᑦᑐᓄᑦ.

“ᐋᓐᓂᐊᕕᒃᒧᑦ ᐊᐅᓪᓚᕆᐊᖃᖃᑦᑕᕐᒪᑕ ᓄᓇᕗᒻᒥᐅᑕ ᐱᔨᑦᑎᕋᖅᑕᐅᑦᑎᐊᕈᓐᓇᕐᓂᐊᕐᒪᑕ ᐊᓯᖏᑦᑎᑐᑦ ᑲᓇᑕᒥᐅᑕᓂ ᐊᑐᐃᓐᓇᕆᔭᐅᔪᓂᒃ,” ᐅᖃᕐᑐᖅ ᕼᐃᐅᕆ ᕕᓕᐅᕋᑎ, ᑲᑎᒪᔨᓄᑦ ᐃᒃᓯᕙᐅᑕᖅ ᓛᒐ ᑐᔪᕐᒥᕕᒃᒧᑦ.

ᑲᑎᒪᔨ ᑕᐃᐊᓐ ᑏᓐᔅ, ᑭᒡᒐᖅᑐᐃᔨ ᒐᓛᔅᑐ-ᓴᐅᑦᒌᑦᒧᑦ ᑕᒫᓂᓗ ᐃᒡᓗᓕᐅᕐᕈᒪᓪᓗᑎᒃ ᐅᖃᓚᐅᕐᑐᖅ ᐃᑲᔪᖅᑐᐃᙱᓐᓂᖓᓂᒃ ᑐᒃᓯᕋᐅᑎᒥᒃ “ᒫᓐᓇ ᐋᖅᑭᒃᑕᐅᓯᒪᓂᖓᒍᑦ.”

“ᐃᓱᒪᒋᔭᐅᓂᖓᓂᒃ ᑕᒫᓂ ᓄᓇᖃᕐᑐᓂᒃ ᐃᓱᒪᒐᒪ ᐃᒡᓗ ᐊᖏᓗᐊᖅᑐᐊᓘᓂᖓᓂᑦ ᖁᑦᑎᖕᓂᖓᒍᑦ ᐊᒻᒪᓗ ᐋᖅᑭᒃᑕᐅᓯᒪᓂᖓᒍᑦ,” ᐅᖃᕐᑐᖅ.

ᐅᓇ 6-ᓂ ᓇᑎᕋᖃᕐᑐᒃᓴᖅ ᐃᒡᓗ 22 ᒦᑕᓂ ᖁᑦᑎᖕᓂᖃᕋᔭᕐᑐᖅ ᐊᕕᒃᑐᕐᓯᒪᓗᓂ ᑎᓴᒪᐅᓕᖓᓗᓂ ᐊᔾᔨᒌᙱᑦᑐᓂ ᐃᓯᕆᐊᕐᕕᖃᕐᓗᓂ, ᑎᑎᕋᐅᔭᕐᓯᒪᔪᖅ ᒦᒐᓐ ᑑᔭ ᐋᕿᒃᓯᒪᔭᖓᒍᑦ.

ᐅᓇ ᓄᑖᖅ ᓛᒐ ᑐᔪᕐᒥᕕᒃ ᐋᖅᑭᒃᓱᖅᑕᐅᓇᔭᕐᑐᖅ ᕘᑕᓐ ᐸᕐᓇᐅᑎᓕᕆᔩᑦ ᐊᒻᒪ ᐋᖅᑭᒃᓱᐃᔨᓄᑦ ᐱᓕᕆᖃᑎᖃᕐᓂᒃᑯᑦ DTAH ᑎᑎᕋᐅᔭᒐᖅᑎᓂᒃ ᐃᒡᓗᒃᓴᓂᒃ.

ᐅᓇ ᓯᕗᓪᓕᕐᐸᐅᓇᔭᓚᐅᕐᑐᖅ ᐃᒡᓗᓕᐊᕆᔭᐅᓗᓂ ᓛᒐ ᑐᔪᕐᒥᕕᒃᒧᑦ ᑖᓐᓇᓗ ᐱᖓᓱᐃᖅᖢᓂ ᓄᒃᑎᕈᑎᐅᖃᑦᑕᕐᓯᒪᓪᓗᓂ ᑕᐃᒪᙵᑦ ᒪᑐᐃᓚᐅᕐᓯᒪᑎᓪᓗᒍ 2000-ᒥ.

ᒫᓐᓇᓕ ᐃᒡᓗᖁᑎᒋᔭᐅᔪᖅ ᐅᕆᑦᔅᒪᓐ ᕉᑦᒥ ᐃᓄᖃᕈᓐᓇᕐᒪᑦ 195-ᓂ ᐋᓐᓂᐊᕐᕕᓕᐊᕐᑐᓂᒃ ᑭᓯᐊᓂᓕ ᕕᓕᐅᕋᑎ ᐅᖃᓚᐅᕐᑐᖅ ᐃᓄᒋᐊᓗᐊᓕᔭᓐᓂᖓᓂᒃ ᐊᒻᒪᓗ ᖃᐅᔨᓴᖅᑕᐅᔭᕐᑐᖅᑐᑦ ᐊᓯᖏᓐᓄᑦ ᑐᔪᕐᒥᕕᖕᓄᐊᖅᑕᐅᔭᕆᐊᖃᖅᐸᒃᖢᑎᒃ.

ᐅᓇ ᓄᑖᖅ ᐃᒡᓗ ᐃᓄᒋᐊᖕᓂᕐᓴᐅᔪᓐᓇᓕᕋᔭᕐᑐᖅ 350-ᓄ ᐃᒡᓗᕈᓯᖃᕐᓗᓂ 220-ᓂ ᐊᒻᒪᓗ ᖃᓂᒃᓴᕐᓂᕐᓴᐅᓗᓂ ᒥᑦᑕᕐᕕᒃᒥ ᐊᒻᒪ ᐋᓐᓂᐊᕕᒐᓚᖕᓂ ᐋᑐᕚᒥ, ᑑᔭ ᐅᖃᕐᑐᖅ.

ᑭᓯᐊᓂᓕ ᐅᓄᕐᑐᑦ ᓄᓇᖃᕐᑐᐃᑦ ᐃᓱᒫᓘᑎᖏᓐᓂᒃ ᐅᖃᑲᑕᓚᐅᕐᒪᑕ ᐊᒃᑐᐃᔾᔪᑎᐅᓇᔭᕐᑐᓂᒃ ᖃᓂᒋᔭᖏᓐᓃᑦᑐᓂᒃ.

ᓄᓇᓯᐅᑎᓄ ᐃᖏᕐᕋᕝᕕᐅᓗᐊᓕᕋᔭᕐᓂᖓ ᐊᒻᒪᓗ ᐱᕐᕈᓗᐊᕿᑎᑦᑎᑦᑕᐃᓕᓂ ᐃᓱᒫᓘᑎᒋᔭᐅᓗᐊᓚᐅᕐᑐᑦ.

ᓛᒐ ᑐᔪᕐᒥᕕᒃᒥ ᐅᖃᓪᓚᒃᑎ ᐱᐊᓪ ᒪᒃᑯᑎ ᐅᖃᓚᐅᕐᑐᖅ ᐃᒡᓗ ᓄᓇᓯᐅᑎᓂᒃ ᐱᑕᖃᖅᑎᑦᑎᓂᕐᓴᐅᓇᔭᙱᓐᓂᖓᓂ ᓲᖃᐃᒻᒪ ᓇᖕᒥᓂᖅ 8-ᓂ ᓄᓇᓯᐅᑎᖃᕐᒪᑕ ᐋᓐᓂᐊᕐᕕᓕᐊᖅᑐᓂᒃ ᐊᒡᔭᖅᓯᑲᑕᒍᑎᓂᒃ ᒥᑦᑕᕐᕕᖕᒧᑦ, ᐋᓐᓂᐊᕕᖕᓄᑦ ᐊᒻᒪ ᑕᑯᔭᐅᕝᕕᒃᓴᖏᓐᓄᑦ.

ᐊᓯᖏᑦ ᐃᓱᒫᓗᑎᒋᔭᐅᓚᐅᕐᑐᑦ ᓄᓇᖃᕐᑐᓂ ᖁᑦᑎᖕᓂᕆᓂᐊᕐᑕᖓ ᐊᒻᒪ ᐊᖏᑎᒋᓂᖓ ᐃᒡᓘᑉ, ᐊᑦᑕᓇᖅᑐᒦᑦᑕᐃᓕᑎᑦᑎᓂᕐᒥᒃ ᐅᐸᒐᐅᕙᒃᑐᓂᒃ ᑐᔪᕐᒥᔪᓄᑦ, ᐊᒻᒪᓗ ᓄᓇᓕᖕᓂ ᑐᓴᕋᓱᙱᓗᐊᕐᓂᖏᓐᓂᒃ ᐅᑯᐊ ᓛᒐ ᐹᕕ ᑭᒡᒐᖅᑐᐃᔨᖏᑦ ᐊᒻᒪ ᓄᓇᖃᕐᑐᓂᒃ.

ᐊᑕᐅᓯᖅ ᓄᓇᖃᕐᑐᖅ ᐊᑎᓕ ᒪᑕᓕᓐ ᔫᒻᑯ ᐅᖃᓚᐅᕐᑐᖅ ᐃᓱᒫᓘᑎᖃᕐᓂᕋᖅᖢᓂ ᐊᒃᑐᐃᒍᑎᐅᓇᔭᕐᑐᓂᒃ ᐃᒡᓗ ᓴᓇᔭᐅᒃᐸᑦ ᑕᐃᒪᓐᓇ ᐊᖏᑎᒋᓗᓂ ᐆᒧᖓ ᐃᑲᖃᐅᑎᓄᑦ ᐊᒃᓱᕈᕈᑎᐅᓗᐊᓕᕋᔭᕐᓂᖓᓂᒃ ᑕᒫᓃᑦᑐᓄᑦ.

“ᐅᓇ ᐃᒡᓗ ᓂᐅᕕᓚᐅᕐᓯᒪᒐᒃᑯ ᐊᒻᒪᓗ ᑮᓇᐅᔭᑲᓪᓚᒻᒪᕆᖕᓂ ᐊᑐᕐᕕᒋᓪᓗᒍ. ᐊᓯᐊᓄᓪᓗ ᓄᒃᑎᕈᓐᓇᕋᔭᙱᖢᖓ, ᑕᐃᒪᓗ ᐅᖃᕈᓐᓇᕐᑐᖓ ᓈᒻᒪᙱᓗᐊᕐᓂᖓᓂᒃ ᓄᓇᓕᐸᐅᔭᐃᑦ ᐋᖅᑭᒋᐊᖅᓯᓚᐅᕐᓂᖏᓐᓂᒃ ᓄᓇᐅᑉ ᖃᓄᐃᓕᖓᓂᒃᓴᖓᓂ ᐃᓱᒪᒋᔭᐅᙱᖢᑎᒃ ᑕᒫᓂᓄᓇᖃᕐᑐᑦ. ᑕᒫᓃᖄᓚᐅᕐᕋᑦᑕ,” ᐅᖃᕐᑐᖅ.

ᐃᓚᖏᑦᑕᐅ ᑕᒫᓂ ᓄᓇᖃᕐᑐᑦ ᐃᑲᔪᕐᑐᐃᑐᐃᓐᓇᓚᐅᕐᑐᑦ ᓛᒐ ᑐᔪᕐᒥᕕᒃ ᓴᓇᔭᐅᔪᒪᓂᖓᓂᑦ ᑕᒫᓂ. “ᓛᒐ ᑐᔪᕐᒥᕕᒃ ᐃᓂᑦᑎᐊᕚᓗᑦ ᐱᓕᕆᐊᖑᓪᓗᓂ ᐊᑕᐅᓯᑐᐊᖑᙱᑦᑐᓄᑦ. ᐱᓕᕆᐊᖃᕐᓯᒪᓕᕐᑐᑦ ᐊᑯᓂᕈᓗᑦ ᐊᒻᒪᓗ ᐱᓕᕆᔪᓐᓇᑦᑎᐊᖅᖢᑎᒃ ᐊᒻᒪᓗ ᖁᕕᐊᓱᒻᒪᕆᒃᖢᖓ ᑕᕝᕙᓂ ᓄᓇᑦᑎᓐᓃᓐᓂᐊᓂᖏᓐᓂᒃ,” ᐅᖃᕐᑐᖅ ᔭᓃᓐ ᕙᓚᑦ, ᑕᒫᓂ ᓄᓇᖃᖃᑕᐅᔪᖅ.

ᐅᖃᓚᐅᕐᑐᖅ ᒐᕙᒪᑐᖃᒃᑯᑦ ᐱᓕᕆᐊᖃᕐᓂᖓᓂᒃ ‘ᓇᓂᓚᕗᑦ ᐱᓕᕆᐊᒃᓴᒥᒃ’, ᐃᑲᔪᖃᑦᑕᖅᑐᑦ ᐃᓄᖕᓂ ᐃᓚᖏᓐᓂᒃ ᓇᓂᓯᔪᓐᓇᐃᓪᓕᓯᒪᔪᓂᒃ ᑕᒪᐅᖓ ᐳᕙᒡᓗᒋᐊᖅᑐᕕᓂᕐᓂᒃ 1940-ᖏᓐᓂᒃ ᑎᑭᖢᒍ 1960-ᖏᑦ.

ᐅᖃᓚᐅᕐᑐᖅ ᐱᓕᕆᕝᕕᒃᑕᖃᕐᓗᓂ ᓛᒐ ᑐᔪᕐᒥᕕᒃᑐᑦ ᐱᑕᖃᕆᐊᖃᕐᒪ ᓄᓇᕗᒻᒥᐅᑦ ᐋᓐᓂᐊᕈᑎᖏᓐᓄᑦ ᑲᒪᒋᔭᐅᔪᓐᓇᕐᓂᐊᕐᒪᑕ ᐊᒻᒪᓗ ᐃᓚᖏᓐᓂᒃ ᐅᖓᓯᒃᓴᓗᐊᙱᓪᓗᑎᒃ.

“ᐅᖃᕈᒪᑐᐃᓐᓇᖅᖢᖓ ᖃᓂᒋᔭᑦᑎᓐᓃᑦᑐᓄᑦ ᑐᑭᓯᖁᓪᓗᒋᑦ ᐱᒻᒪᕆᐊᓘᓂᖓᓂᒃ ᐊᒻᒪ ᐱᐅᔪᐊᓘᓂᖓᓂᒃ ᓛᒐ ᑐᔪᕐᒥᕕᒃ ᐊᒻᒪᓗ ᐱᓪᓚᕆᐊᓘᓂᖓᓂᒃ ᐊᒻᒪ ᐱᖁᑎᑦᑎᐊᕙᐅᓪᓗᓂ, ᑕᐃᒪᓗ ᓄᓇᖃᕐᑐᑎᒍᑦ ᓚᑭᒻᒪᕆᐅᔪᒍᑦ ᑕᒫᓃᑦᑐᓐᓇᕐᓂᖏᓐᓂᒃ,” ᕙᓚᑦ ᐅᖃᕐᑐᖅ.

“ᐅᖃᕈᒪᑐᐃᓐᓇᖅᖢᖓ ᐃᓱᒪᒃᓴᖅᓯᐅᕈᓐᓇᖁᔨᓪᓗᖓ ᐊᒻᒪᓗ ᐃᓂᖃᖅᑎᑦᑎᔪᒪᓗᑎᒃ.” ᑏᓐᔅ ᐅᖃᓚᐅᕐᑐᖅ ᕿᒥᕐᕈᐊᓚᐅᖅᖢᓂ ᐱᓇᓱᒍᑎᒋᔭᐅᔪᓂᒃ ᐊᒻᒪᓗ ᓄᓇᓕᖕᓂ ᐃᓱᒪᒋᔭᐅᔪᓂᒃ ᐅᖃᐅᓯᕐᓂᒃ ᐊᒻᒪᓗ ᓄᓇᓕᐸᐅᔭᓄᑦ ᐃᖅᑲᓇᐃᔭᖅᑎᒋᔭᐅᔪᑦ ᐃᓱᒪᓕᐅᕆᓂᐊᕐᓗᑎᒃ ᓄᓇᓕᖕᓄᑦ ᐸᕐᓇᐅᓯᐅᖅᑎᓄᑦ ᑖᓐᓇ ᐃᓱᒪᓕᐊᕆᔭᐅᔪᖅ ᐊᖏᖅᑕᐅᒪᖔᑦ ᐸᕐᓇᐅᑎ.

ᓱᓕ ᖃᑯᒍ ᐅᖃᕐᓯᒪᙱᑦᑐᑦ ᓛᒐ ᑐᔪᕐᒥᕕᒃ ᑐᒃᓯᕋᐅᑎᖓ ᐸᕐᓇᐅᑎᓕᕆᓂᕐᒧᑦ ᑲᑎᒪᔨᕋᓛᓄᑦ ᐱᓕᕆᐊᖑᓂᐊᕐᒪᖔᑦ.