ᐋᓐᓂᕐᓱᐃᕆᕙᖕᓂᖅ ᑖᒃᓯᓄ ᐊᖅᑯᑎᓂ ᐅᖃᐅᓯᐅᔪᖅ ᐊᑦᑕᕐᓇᖅᑐᒦᑎᑦᑎᑦᑕᐃᓕᓂᕐᒧᑦ ᑲᑎᒪᔨᕋᓛᓄᑦ
ᑭᒃᑯᓕᒫᓂᒃ ᐅᔾᔨᕈᓱᓕᖅᑎᑦᑎᓂᕐᒧᑦ ᐱᓕᕆᐊᖑᔪᖅ ᓴᖅᑭᔮᖅᑎᑦᑎᓪᓗᑎᒃ ᑖᒃᓯᓄ ᐊᖁᑏᑦ ᐃᓅᓯᖏᓐᓂᒃ ᐃᓱᒪᒋᔭᖃᕐᓂᕐᒧᑦ
ᐃᖃᓗᖕᓂ ᑭᒃᑯᓕᒫᓂᒃ ᐊᑦᑕᕐᓇᖅᑐᒦᑎᑦᑎᑦᑕᐃᓕᓂᕐᒧᑦ ᑲᑎᒪᔨᕋᓛᑦ ᐅᖃᐅᓯᖃᖅᑐᑦ ᖃᓄᖅ ᐱᓕᕆᐊᖃᕈᓐᓇᕐᒪᖔᑦ ᑖᒃᓯᓄ ᐊᖅᑯᑎᓂᒃ ᓄᓇᓕᖕᓂ. (ᐊᔾᔨᙳᐊᖁᑎᒋᔭᐅᔪᖅ)
For an English version of this story, see Abuse hurled at Iqaluit cab drivers discussed at safety committee
ᐃᖃᓗᐃᑦ ᑭᒃᑯᓕᒫᓄᑦ ᐊᑦᑕᕐᓇᖅᑐᒦᑎᑦᑎᑦᑕᐃᓕᓂᕐᒧᑦ ᑲᑎᒪᔨᕋᓛᑦ ᐃᓱᒪᒃᓴᖅᓯᐅᕐᒪᑕ ᖃᓄᖅ ᐃᓱᒪᒋᔭᖃᑦᑎᐊᓕᖅᑎᑦᑎᔪᓐᓇᕐᓂᕐᒥᒃ ᓄᓇᓕᐸᐅᔭᐃᑦ ᑖᒃᓯᓄᑦ ᐊᖅᑯᑎᓂᒃ, ᑕᖅᑭᐅᓚᐅᕐᑐᒥ ᐅᔭᖅᑲᓄᑦ ᒥᓗᕆᐊᕐᕕᐅᑲᑕᓚᐅᖅᑎᓪᓗᒋᑦ ᐊᒻᒪ ᐊᔾᔨᐅᙱᑎᑕᐅᓂᕐᒧᑦ.
ᑲᑎᒪᑎᓪᓗᒋᑦ ᐅᒃᑑᐱᕆ 4-ᒥ ᑲᑎᒪᔨᕋᓛᓄᑦ ᐃᓚᒋᔭᐅᔪᑦ ᐅᖃᐅᓯᖃᓚᐅᕐᑐᖅ ᑖᒃᓯᓄᑦ ᐊᖅᑯᑏᑦ ᐱᑦᑎᐊᖅᑕᐅᖃᑦᑕᙱᓗᐊᕐᓂᖏᓐᓂᒃ ᐃᖃᓗᖕᓂ ᐊᒻᒪ ᐋᖅᑭᒍᑎᐅᔪᓐᓇᕋᔭᖅᑐᓂᒃ. ᑕᖅᑭᐅᓚᐅᕐᓯᒪᔪᒥᒃ ᑖᒃᓯᓄᑦ ᐊᖅᑯᑎᐅᔪᑦ ᐃᑲᕐᕋᖅ ᐃᓚᓪᓗᒍ ᐊᖁᑦᑐᓐᓃᓚᐅᕐᓯᒪᖕᒪᑕ ᓈᒻᒪᒃᓴᖅᓯᒪᙱᖢᑎᒃ ᐅᔭᖅᑲᓄᑦ ᒥᓪᓗᖅᑕᐅᖃᑦᑕᕐᓂᖏᓐᓂᒃ ᐊᒻᒪᓗ ᐊᔾᔨᐅᙱᑎᑕᐅᓗᐊᖃᕐᑕᕐᓂᕐᒧᑦ ᑖᒃᑯᐊ ᐊᖁᑎᐅᔪᑦ ᐊᒻᒪᓗ ᑕᐃᒪᐃᑕᐅᓂᕋᖅᖢᑎᒃ ᐊᕐᕌᒍᒐᓴᒻᒪᕆᐅᓕᕐᑐᓂᒃ.
ᒥᐅᕆᐅᓪ ᔭᓯᓐ, ᑭᒡᒐᖅᑐᐃᔨᒋᔭᐅᔪᖅ ᓄᓇᕗᒥᑦ ᕿᕐᓂᖅᑕᑦ ᑲᑐᔾᔨᖃᑎᒌᓄᑦ, ᐅᖃᐅᓯᖃᓚᐅᕐᑐᖅ ᖃᓄᐃᓕᐅᖅᑕᐅᕙᖕᓂᖓᓂᒃ ᐊᔾᔨᐅᙱᑎᑕᐅᓂᒃᑯᑦ ᑖᒃᓯᓂᒃ. ᐅᖃᓚᐅᕐᑐᖅ ᑖᓐᓇ ᐊᒻᒪ ᑖᒃᓯᒥ ᐊᖁᑎᐅᔪᖅ ᐊᔾᔨᐅᙱᓐᓂᕐᒧᑦ ᐱᐅᙱᓐᓂᕋᖅᑕᐅᓪᓗᑎᒃ ᑖᓐᓇ ᑖᒃᓯᒥ ᓂᐅᑎᓪᓗᒍ.
ᔭᓯᑲ ᔭᖕ, ᑭᒡᒐᖅᑐᐃᔨ ᓄᓇᕗᒥᑦ ᒐᕙᒪᒃᑯᑦ ᒪᓕᒐᓕᕆᔨᖏᓐᓄᑦ, ᐅᖃᓚᐅᕐᑐᖅ ᑭᒃᑯᓕᒫᓂᒃ ᐅᔾᔨᕈᓱᓕᖅᑎᑦᑎᓇᓱᒃᓂ ᓴᖅᑭᔮᖅᑎᑦᑎᓯᒪᔪᓂᒃ ᑖᒃᓯᓄᑦ ᐊᖁᑎᑦ ᐃᓅᓯᖏᓐᓂᒃ ᐃᑲᔪᕈᑎᐅᔪᓐᓇᕋᓱᒋᔭᖓ ᓄᓇᖃᖅᑐᓂᒃ ᑖᒃᑯᐊ ᐊᖁᑏᑦ ᐃᖅᑲᓇᐃᔮᑐᐃᓐᓇᕋᓱᙱᓐᓂᖏᓐᓂᒃ ᑭᓯᐊᓂᓕᑦᑕᐅᖅ ᐃᓅᓯᖃᖃᑕᐅᖕᒪᑕ.
“ᑖᒃᓯᒥ ᐊᖁᑎᑐᐃᓐᓇᐅᙱᑦᑐᖅ ᑭᓯᐊᓂᓕ ᑭᓇᐅᖕᒪᖔᑦ ᑖᒃᓯᒥ ᐊᖁᑎᐅᔪᖅ,” ᔭᖕ ᐅᖃᖅᑐᖅ.
ᑕᒪᐃᓐᓂ ᔭᓯᓐ ᐊᒻᒪᓗ ᐃᖃᓗᐃᑦ ᒪᐃᔭᖓ ᑭᐊᓂ ᐱᐊᓪ ᐊᖏᖃᑎᖃᓚᐅᕐᑑᒃ ᔭᖕ ᐃᓱᒪᒋᔭᖓᓂ.
ᔭᓯᓐ ᐅᖃᓚᐅᕐᑐᖅ ᑕᒪᒃᑯᐊ ᑖᒃᓯᓄ ᐊᖁᑏᑦ ᓄᓇᓕᖕᓂ ᐃᑲᔪᖅᑐᐃᓂᖏᓐᓂᒃ ᑕᐅᑐᒃᑕᐅᓕᕈᑎᒃ ᑕᒪᓐᓇ ᐃᑲᔪᕈᑎᐅᓇᔭᕐᓂᖓᓂᒃ ᐊᒻᒪ ᐱᐊᓪ ᐅᖃᖅᖢᓂ ᐅᓇ ᑭᒃᑯᓕᒫᓂ ᖃᐅᔨᒋᐊᖅᑎᑦᑎᓂᖅ ᐃᑲᔪᕈᑎᐅᓇᔭᕋᓱᒋᓪᓗᓂᐅᒃ ᑖᒃᑯᓄᖓ ᑲᑎᒪᔨᓄᑦ.
“ᐃᓄᐃᑦ ᐃᖕᒥᖕᓂ ᖃᐅᔨᒪᖃᑦᑕᐅᑎᓕᕋᔭᖅᑐᑦ ᕿᐸᒌᖃᑦᑕᐅᑎᙱᓪᓗᑎᒃ,” ᐱᐊᓪ ᐅᖃᖅᑐᖅ.
ᓱᕈᓯᕐᓂᒃ ᐊᒻᒪ ᐃᓅᓱᒃᑐᓂᒃ ᐸᒡᕕᓵᕆᑎᑦᑎᑦᑕᐃᓕᒪᓗᑎᒃ ᑖᒃᓯᓂ ᐊᖁᑎᓂᒃ, ᐃᓅᓱᒃᑐᐃᑦ ᐃᖃᓗᖕᓂ ᖃᓄᐃᓕᐅᕈᑎᒃᓴᖏᓐᓂᒃ ᐱᑕᖃᕐᓂᕐᓴᐅᔭᕆᐊᖃᖅᑐᖅ, ᐅᖃᖅᑐᖅ ᒫᑦᔅ ᓵᓐᐹᑲᓐ, ᑭᒡᒐᖅᑐᐃᔨ ᓄᓇᕗᒥᑦ ᒐᕙᒪᒃᑯᑦ ᐃᓄᓕᕆᔨᒃᑯᓐᓄᑦ.
ᐱᓕᕆᐊᒃᓴᖅᑕᖃᙱᑎᓪᓗᒍ ᒪᐅᓇ ᖃᕋᓴᐅᔭᒃᑰᖓᔪᓂᒃ ᐅᕝᕙᓘᓐᓃᑦ ᐱᙳᐊᕈᑎᓕᕆᓂᒃᑯᑦ, ᓱᕈᓰᑦ ᐊᒻᒪᓗ ᐃᓅᓱᒃᑐᑦ ᐃᖃᓗᖕᓂ ᑭᓱᓕᕆᔭᒃᓴᖃᙱᓗᐊᒧᑦ ᓈᒻᒪᙱᖔᖅᑐᓂᒃ ᐱᓕᕆᐊᖃᓕᔭᒻᒪᑕ, ᐅᖃᒃᑲᓐᓂᖅᑐᖅ.
“ᐅᓇ ᐱᓕᕆᑦᑎᐊᕈᓘᔭᓕᕐᓇᖅᑑᒐᓗᐊᖅ ᑭᓯᐊᓂ ᓄᐊᒫᑦ ᖃᓂᒋᔭᖓᓃᑐᐃᓐᓇᑲᑕᓕᖅᐸᑕ ᐅᕝᕙᓘᓐᓃᑦ ᐃᓅᖕᓂ ᐱᖃᑎᖃᑲᑕᓕᖅᐸᑕ ᑖᒃᑯᓄᖓ ᐃᑲᔪᙱᓗᐊᖅᑐᓄᑦ,” ᓵᓐᐹᑲᓐ ᐅᖃᖅᑐᖅ.
ᐱᐊᓪ ᐊᐱᕆᓚᐅᕐᑐᖅ ᑕᒪᐃᓐᓂ ᔭᖕᒥᑦ ᐊᒻᒪ ᓵᓐᐹᑲᓐᒥᑦ ᑐᓴᒐᒃᓴᒃᑲᓐᓂᕐᓂᒃ ᐅᖃᐅᓯᒃᓴᓂ ᓴᖅᑭᑎᑦᑎᒃᑲᓐᓂᖁᓪᓗᓂᒋᑦ ᑭᖑᓪᓕᕐᒧᑦ ᑲᑎᒪᓕᕐᐸᑦ ᐊᑦᑕᕐᓇᕐᑐᒦᑎᑦᑎᑦᑕᐃᓕᓂᕐᒧᑦ ᑲᑎᒪᔨᕋᓛᑦ ᑲᑎᒪᒃᑲᓐᓂᓕᕐᐸᑕ ᐱᖁᔨᕗᖔᕈᑎᒥ ᐱᒋᐊᖅᑎᑦᑎᔪᓐᓇᓛᕐᒪᑕ ᓄᓇᓕᐸᐅᔭᐃᑦ ᑲᑎᒪᔨᖏᓐᓄᑦ.
(0) Comments