ᐱᒋᐊᕈᑎᖃᕐᑕ 2023 ᓂᕆᐅᖕᓂᖃᕐᓂᒃᑯᑦ, ᒥᐊᓕ ᓴᐃᒪᓐ ᐅᖃᕐᑐᖅ

ᒐᕙᓇ ᔭᓄᕈᓪ ᐊᐃᑉᐸᖓ ᐊᕐᕌᒍᒧᑦ ᓄᑖᒧᑦ ᑐᓴᒐᒃᓴᖓ ᓂᕆᐅᖕᓂᖃᕐᓂᕐᒥᒃ ‘ᐱᒋᐊᕈᑎᖃᕈᑎᖃᕐᐳᖅ’

ᒐᕙᓇ ᔭᓄᕈᓪ ᒥᐊᓕ ᓴᐃᒪᓐ, ᐅᕙᓂ ᐊᔾᔨᖃᖅᑐᖅ ᒪᐃ 2022ᒥ, ᐃᓄᖕᓂ ᑲᑎᖁᔨᔪᖅ ᐊᒻᒪ 2023ᒥ ᓂᕆᐅᖕᓂᖃᖁᔨᓪᓗᓂ. (ᐊᔾᔨᓕᐅᕆᔨ ᔨᐊᕝ ᐱᐊᑦᓯᐄ)

By ᓄᓇᑦᓯᐊᕐᒥ ᐱᕙᓪᓕᐊᔪᑦ

For English version, see Head into 2023 with hope, says Mary Simon

ᒐᕙᓇ ᔭᓄᕈᓪ ᒥᐊᓕ ᓴᐃᒪᓐ ᑲᓇᑕᒥᐅᑕᓂᒃ ᐱᒋᐊᕈᑎᖃᖁᔨᔪᑦ 2023ᒥ ᓂᕆᐅᖕᓂᖃᕐᓂᒃᑯᑦ, ᐃᓱᒪᒋᒐᓗᐊᖅᖢᒍ “ᐊᒃᓱᕈᕐᓇᖅᑐᓂᒃ ᐊᒻᒪ ᐃᓱᒪᒋᓐᓇᖅᑐᓂᒃ” ᖃᓄᐃᓕᐅᕈᑎᖃᕈᓘᔭᓚᐅᖅᑎᓪᓗᒋᑦ 2022ᒥ.

“ᓂᕆᐅᖕᓂᖅ ᖃᓄᐃᓕᐅᓕᕈᑎᑦᑎᐊᕙᐅᖕᒪᓐ,” ᓴᐃᒪᓐ ᐅᖃᓚᐅᕐᑐᖅ ᐊᕐᕌᒍ ᓄᑖᒧᑦ ᑐᓴᒐᒃᓴᓕᐅᖅᑎᓪᓗᒍ ᑎᓯᐱᕆ 30ᒥ, ᐊᕐᕌᒍ ᓄᑖᑉ ᓯᕗᓂᐊᒍᑦ.

“ᐋᖅᑭᒃᓱᐃᔪᓐᓇᕐᑐᒍᑦ ᑭᒃᑯᓕᒫᓅᖓᓂᕐᓴᒥ ᓄᓇᒥ. ᐅᖃᓪᓚᖃᑎᒌᒍᓐᓇᕐᑐᒍᑦ – ᑐᑭᓯᖃᑦᑕᐅᑎᓂᕐᓴᐅᓂᐊᕋᑦᑕ ᐊᒻᒪ ᐃᓱᒪᒋᑦᑎᐊᕐᒥᓗᒋᑦ ᐊᔾᔨᒋᙱᑕᖏᓐᓂᒃ ᐃᓱᒪᖃᖅᐸᒃᑐᐃᑦ.” ᐅᖃᓚᐅᕐᑐᖅ 3 ᒥᓂᑦᔅ ᑕᑭᓂᓕᖕᒥ ᑕᕆᔭᒐᒃᑯᑦ ᐅᖃᓪᓚᒃᑎᓪᓗᒍ ᖃᓪᓗᓈᑐᑦ ᐊᒻᒪ ᐅᐃᕖᑐᑦ, ᖃᕋᓴᐅᔭᒃᑯᑦ ᓴᖅᑭᔮᒐᖓᓂ ᓴᖅᑭᔮᖅᑎᑕᐅᓪᓗᓂ.

ᐅᓇ ᐃᓱᒪᓇᐃᓐᓇᐅᔭᕐᑐᖅ “ᐋᓐᓂᕐᓇᕈᑎ ᐊᒻᒪ ᐃᓱᒪᒧᑦ ᐋᓐᓂᕈᑎᐅᓗᐊᖅᑐᑦ” ᓇᓂᓯᑎᓪᓗᒋᑦ ᓇᓗᓇᐃᖅᑕᐅᓯᒪᙱᑦᑐᓂᒃ ᐃᓗᕕᖕᓂ ᐃᓕᓐᓂᐊᕆᐊᕐᕕᐅᕙᓚᐅᕐᓯᒪᔪᓂᒃ ᐃᓚᒋᔭᐅᓚᐅᕐᑐᖅ “ᓱᓕᒻᒪᕆᒃᑐᐊᓗᖕᓂ ᑲᓇᑕᒥᐅᑕ ᑕᑯᓕᓚᐅᕐᒥᔭᖓᑦ 2022-ᖑᑎᓪᓗᒍ, ᓴᐃᒪᓐ ᐅᖃᓚᐅᕐᑐᖅ.

ᒐᕙᓇ ᔭᓄᕉᓂᖓᓄᑦ ᐅᐸᒍᑎᓚᐅᕐᓯᒪᔪᖅ ᐃᒃᓯᕋᕐᔪᐊᕌᓗᒃ ᕗᕌᓐᓯᔅ ᐃᖃᓗᖕᓄ ᐳᓛᖅᑎᓪᓗᒍ ᔪᓚᐃᖑᓚᐅᕐᓯᒪᔪᒥᒃ, ᐃᓚᒋᔭᐅᓪᓗᓂ ᐃᒃᓯᕋᕐᔪᐊᕌᓘᑉ ᐱᓇᓱᐊᕈᓯᕐᒥ ᑲᓇᑕᒥ ᐳᓛᖅᑕᖏᓐᓂᒃ.

ᖁᑦᑎᓛᖅ ᑳᑐᓕᒃᑯᓐᓄᑦ ᒪᒥᐊᓚᐅᕐᓯᒪᔪᖅ ᑐᒃᓯᐊᕐᕕᒃᒧᑦ ᐃᓚᒋᔭᐅᔪᖅ ᐃᓚᐅᓚᐅᕐᓯᒪᓂᖏᓐᓂᒃ ᑲᓇᑕᓗᒥ ᐃᓕᓐᓂᐊᕆᐊᕐᕕᓕᕆᓂᕐᒧᑦ ᐱᓕᕆᐊᖏᓐᓂᒃ – ᑖᓐᓇᓗ ᒐᕙᒪᒃᑯᓐᓄᑦ ᐊᑐᐊᒐᕆᔭᐅᓪᓗᓂ ᑎᑭᖢᑎᒃ 1990ᖏᑦ ᓄᓇᖃᖅᑳᖅᑐᑦ ᐃᓕᖅᑯᓯᖏᓐᓂᒃ ᐊᑐᕈᓐᓃᖅᑎᑕᐅᔪᓐᓃᖅᑎᑕᐅᓇᓱᒃᖢᑎᒃ ᐊᒻᒪᓗ ᐅᖃᐅᓯᖏᓐᓂᒃ ᐃᓕᓐᓂᐊᕆᐊᖅᑎᑕᐅᓪᓗᑎᒃ ᐃᓚᖏᓐᓄᑦ ᓄᓇᖏᓐᓄᓪᓗ ᐅᖓᓯᒋᔭᐅᔪᓄᑦ.

“ᐅᓇ ᐊᕐᕌᒎᓚᐅᕐᑐᖅ ᐊᓂᒍᕐᓯᒪᔪᖅ ᐋᖅᑭᒐᓱᒃᖢᒍ ᐊᒻᒪᓗ ᒫᓐᓇᐅᔪᖅ ᐊᒻᒪ ᓯᕗᓂᒃᓴᖃᑦᑎᐊᕐᓂᕐᓴᒥᒃ,” ᓴᐃᒪᓐ ᐅᖃᕐᑐᖅ.

“ᐋᖅᑭᒋᐊᒃᑲᓐᓂᕆᐊᖃᕋᑦᑎᒍᑦ ᓄᓇᖃᖅᑳᖅᑐᓪᓗ ᖃᓄᐃᓕᐅᕈᓯᕗᑦ ᐊᒻᒪ ᓄᓇᒥ ᐊᒃᑐᐊᓂᖃᕐᓂᖅ.”

ᐅᓇ ᐊᐃᑉᐸᖓ ᓴᐃᒪᓐ ᓄᑖᒧᑦ ᐊᕐᕌᒍᒧᑦ ᑐᓴᒐᒃᓴᓕᐊᕆᔭᖓᓂ ᐅᖃᐅᓯᕆᔭᖓ ᑭᒡᒐᖅᑐᐃᔨᙳᓚᐅᕐᓯᒪᑎᓪᓗᒍ ᑭᖕᒧᑦ ᑲᓇᑕᒥ 2021-ᖑᑎᓪᓗᒍ. ᓄᓇᕕᒃᒥ ᐃᓅᓯᒪᔪᖅ ᐃᓄᒃ ᓯᕗᓕᐅᕐᑎ ᓯᕗᓪᓕᖅᐹᕆᔭᐅᔪᖅ ᓄᓇᖃᖅᑳᖅᑐᓂᒃ ᐱᒻᒪᕆᐊᓗᖕᒥ ᐱᓕᕆᐊᖃᖅᖢᓂ.

2022ᒥ ᓴᐃᒪᓐ ᓄᓇᕕᒃᒧᙵᐅᓚᐅᕐᓯᒪᖕᒪᑦ ᐱᕈᕐᕕᖓᓄᑦ — ᐳᓛᕐᑐᖅ ᓯᕗᓪᓕᖅᐹᒥᒃ ᑕᐃᒪᙵᑦ ᒐᕙᓇ ᔭᓄᕈᙳᓚᐅᕐᓯᒪᖕᒪᓐ. ᐊᔾᔨᙳᐊᑦ ᐊᒻᒪ ᑕᕐᕆᔭᒐᓕᐊᑦ ᐳᓛᖅᑎᓪᓗᒍ ᓴᖅᑭᔮᖅᑎᑕᐅᓚᐅᕐᑐᑦ ᓴᐃᒪᓐ ᐊᕐᕌᒍᒧᑦ ᓄᑖᒧᑦ ᑐᓴᒐᒃᓴᓕᐅᖅᑎᓪᓗᒍ.

ᑕᒪᐃᓐᓂ ᐊᕐᕌᒍ ᓄᑖᒧᑦ ᑐᓴᒐᒃᓴᕆᔭᖏᑦ ᐊᒃᓱᕈᓐᓇᓵᖅᓯᒪᑎᓪᓗᒋᑦ ᐊᕐᕌᒍᐃᑦ.

ᐊᕐᕌᒍ ᓯᕗᓪᓕᕐᒥ ᑐᓴᒐᒃᓴᓕᐊᖓᓂᒃ ᓴᐃᒪᓐ ᑲᓇᑕᒥᐅᑕᓄᑦ ᐅᖃᓚᐅᕐᓯᒪᔪᖅ ‘ᐊᔪᐃᓐᓇᖅᑕ’ – ᐃᓄᒃᑎᑐᑦ – 2022, ᐅᓇ 2021 ᑕᐅᑐᒃᖢᒍ, ᐊᒻᒪᓗ ᓄᕙᒡᔪᐊᕐᓇᖅ-19 ᐱᑕᖃᓗᐊᑲᑕᒃᑎᓪᓗᒍ, ‘ᐊᒃᓱᕈᓐᓇᓚᐅᕐᒪᓐ ᐊᕐᕌᒍ.’

ᐃᓱᒪᒋᓪᓗᓂᐅᒃ ᐅᑭᐅᕐᑕᖅᑑᑉ ᐃᓚᖓ ᓯᕿᓂᖃᖃᑦᑕᙱᓐᓂᖓ ᐱᓇᓱᐊᕈᓯᑲᓪᓚᖕᓂᒃ ᐊᒻᒪ ᑕᖅᑭᒐᓴᖕᓂᒃ, ᓴᐃᒪᓐ ᐅᖃᓚᐅᕐᑐᖅ ᐃᓅᓯᖓᓄᑦ ᐊᒻᒪ ᐅᑭᐅᕐᑕᖅᑐᕐᒥ ᑐᙵᕕᖃᕐᓂᖓᓄᑦ ᐅᖃᓚᐅᕐᑐᖅ “ᐅᑭᐅᕐᑕᖅᑐᖅ ᐃᓅᓯᕐᒥ ᓄᖅᑲᖅᑎᑦᑎᕙᙱᒻᒪᑦ.”

“ᒫᓐᓇᐅᔪᕐᓕ ᐅᓂᒃᑳᖅᑐᐊᑲᑕᖕᓇᖅᓯᕗᖅ, ᐃᓅᓯᖅ ᐋᖅᑭᒋᐊᒃᑲᓐᓂᕐᓗᒍ ᐊᒻᒪ ᐊᑕᐅᑦᑎᒃᑯᑦ ᓯᕗᒧᑦ ᐱᒋᐊᕐᓗᑕ. ᑲᔪᓰᓐᓇᕋᓱᒡᓗᑕ.”

ᓴᐃᒪᓐ ᑯᐃᓐ ᐃᓕᓴᐱ II ᐃᓱᒪᒋᓚᐅᕐᒥᔭᖓ, ᑖᓐᓇ ᐃᓅᔪᓐᓃᓚᐅᕐᓯᒪᔪᖅ ᓯᑎᐱᕆᒥ ᐊᒻᒪᓗ ᑲᓇᑕᒧᑦ ᑯᐃᓐᖑᓪᓗᓂ ᐊᕐᕌᒍᓂᒃ 70ᓂ.

ᐊᖏᕐᕋᒧᓪᓕ ᖃᓂᓐᓂᕐᓴᒃᑯᑦ, ᑲᓇᑕᒥᐅᑕᑦ ᓯᓚᐅᑉ ᖃᓄᐃᓗᐊᑲᑕᖕᓂᖓᓂᒃ ᖃᐅᔨᖃᑦᑕᓚᐅᕐᑐᑦ ᐊᒻᒪᓗ ᓄᓇᓖᑦ ᐱᔭᐅᑲᐅᖅᑐᑲᑕᓗᐊᖅᖢᑎᒃ.

ᐊᒃᓱᕈᓐᓇᕋᓗᐊᖅᑎᓪᓗᒍ ᓴᙱᓇᓱᒃᖢᓂ ᐊᒻᒪ ᐱᓇᓱᐃᓐᓇᕋᓱᒃᖢᓂ, ᓴᐃᒪᓐ ᐅᐃᕖᑐᑦ ᐅᖃᓚᐅᕐᑐᖅ “ᐃᓄᑦᑎᐊᕙᐃᑦ ᐱᐅᔪᓂᒃ ᐱᓕᕆᐊᖃᖅᑐᑦ ᐊᓯᙳᖅᑎᑦᑎᔪᓐᓇᖅᑐᑦ.”

“ᐅᔾᔨᕈᓱᑦᑎᐊᕐᓗᑎᒃ ᐱᑦᑎᐊᕋᓱᒃᑐᓂᒃ, ᐃᓱᒪᒋᔭᖃᑦᑎᐊᕐᓗᑎᒃ ᐊᒻᒪ ᐋᑭᒃᑲᓐᓂᕈᓐᓇᕐᓂᕐᒥᒃ”

Share This Story

(0) Comments

Join the Conversation

Your email address will not be published. Required fields are marked *

*