ᐱᓕᕆᔫᒃ ᐱᒋᐊᖅᑎᑦᑎᒃᑲᓐᓂᕋᓱᒃᑐᑦ ᐊᓯᐅᔨᔭᐅᓯᒪᓕᕐᑐᒥᒃ ᐃᖃᓗᐃᑦ ᐊᒥᕋᖏᓐᓂᒃ ᕿᑐᓕᓴᐃᓂᕐᒥᒃ

For English version, see Pair working to revive the lost skill of fish tanning

ᑐᓂᓕᖅᓱᐃᔨ ᐊᕐᓴᓂᖅ ᑎᐊ ᐊᒻᒪ ᐱᓕᕆᐊᖃᓪᓚᕆᒃᑐᖅ ᐃᖃᓗᐃᑦ ᐊᒥᕋᖏᓐᓂᒃ ᕿᑐᓕᓴᐃᓂᕐᒥᒃ ᔭᐃᓂ ᓵᖕ ᐃᑲᔪᖅᑑ ᐱᒋᐊᖅᑎᑦᑎᒃᑲᓐᓂᕐᓂᕐᒥᒃ ᐱᓕᕆᔾᔪᓯᐅᓂᑯᒥᒃ ᓄᓇᕕᒃᒥ.

ᑖᒃᑯᐊ ᐱᓕᕆᖃᑎᒌᒃᑐᒃ ᖃᖓᑦᑎᐊᓵᖅ ᐃᖃᓗᐃᑦ ᐊᒥᕋᖏᓐᓂᒃ ᕿᑐᓕᓴᐃᓂᕐᒥᒃ ᐃᓕᓐᓂᐊᖅᑎᑦᑎᓚᐅᕐᒪᑎ ᐊᑯᓕᕕᒃᒥ ᐊᒻᒪ ᐃᕗᔨᕕᒃᒥ ᐃᓚᒋᔭᐅᓪᓗᓂ ᐃᓕᖅᑯᓯᑎᒍᑦ ᐱᓕᕆᐊᒃᓴᒥᒃ (Ilirqusitigut program), ᐃᓕᖅᑯᓯᓕᕆᓂᕐᒧᑦ ᐱᓕᕆᓂᐅᔪᖅ ᐃᓐᓇᕐᓂ ᐃᓕᓐᓂᐊᖅᑎᑦᑎᓂᒃᑯᑦ ᓄᓇᕕᒃᒥ ᐃᓕᓐᓂᐊᖅᓕᕆᓂᕐᒧᑦ ᑲᑎᒪᔨᖏᑦᑎᒍᑦ.

“ᐃᓱᒪᓚᐅᕐᓯᒪᙱᑦᑐᖓ ᐃᒪᓐᓇ ᐱᓕᕆᐊᖃᕋᔭᕆᐊᒃᓴᓐᓂ,” ᐅᖃᕐᑐᖅ ᑎᐊ, ᓵᖕ ᓴᓂᑦᑎᐊᖓᓂ ᐃᒃᓯᕚᖅᖢᓂ ᐅᖄᓚᑎᓪᓗᒋᑦ ᑐᔪᕐᒥᕕᖓᓂᒃ ᐊᑯᓕᕕᒃᒥ.

ᐅᑯᐊ ᐃᓕᓐᓂᐊᕈᑏᑦ ᐊᑐᖅᑕᐅᔪᓐᓇᖅᑐᑦ ᐃᓕᓐᓂᐊᕐᕕᐊᓗᖕᒥ ᐃᓕᓐᓂᐊᕈᑎᓂᒃ ᐃᓚᒋᐊᕈᑎᐅᔪᓐᓇᕐᓗᑎᒃ. ᐃᓱᒪᔪᐃᓪᓕ ᑕᒪᐃᓐᓂ 14ᓂ ᓄᓇᕕᒃ ᓄᓇᓕᖏᓐᓂᒃ ᖃᐃᖁᔭᐅᔪᒪᓪᓗᑎᒃ.

ᐅᓇ ᓯᕗᓪᓕᖅᐹᖑᓚᐅᕐᑐᖅ ᑎᐊ ᐃᓚᐅᑎᓪᓗᒍ ᓵᖕᒥ ᐃᑲᔪᕐᓂᐊᕐᓗᓂ ᐃᖃᓗᐃᑦ ᐊᒥᕋᖏᓐᓂᒃ ᕿᑐᓕᓴᐃᓂᕐᒥᒃ ᐃᓕᓐᓂᐊᖅᑎᑦᑎᓂᕐᒥᒃ. ᐅᑯᐊ ᐃᓕᓐᓂᐊᖅᑐᓕᕆᔨᒃᑯᑦ ᑲᑎᒪᔨᖏᑦ ᐃᓄᖕᓂ ᐃᓕᓐᓂᐊᖅᑎᑕᐅᓗᑎᒃ ᐃᓄᐃᑦ ᑕᐃᒪᓕ ᑎᐊ ᒪᓕᑲᑕᒃᑐᖅ ᓵᖕᒥ ᖃᐅᔨᓂᐊᕐᒪᑦ ᐊᔪᕈᓐᓃᕐᓴᕈᑎᓂᒃ ᐊᒻᒪᓗ ᐊᓯᒥᓄᑦ ᐃᓕᓐᓂᐊᖅᑎᑦᑎᔾᔪᑎᒋᔪᓐᓇᕐᓕᕐᓗᓂᒋᑦ.

ᓵᖕ ᐱᓕᕆᓯᒪᔪᖅ ᐅᑯᓇᓂ ᐃᓄᒃᔪᐊᒃ, ᑰᔾᔪᐊᖅ, ᓴᓪᓗᐃᑦ ᐊᒻᒪ ᐳᕕᕐᓂᑐᖅᒥ. ᐊᑯᓕᕕᒃ ᐊᒻᒪ ᐃᕗᔨᕕᒃ ᒥᑭᓛᖑᔪᑦ ᓄᓇᓕᖕᓂ ᐃᓕᓐᓂᐊᖅᑎᑦᑎᕝᕕᒋᔭᖏᓐᓂ.

ᑖᔅᓱᒧᖓ ᑐᕌᒐᕆᔭᐅᔪᖅ ᐊᔾᔨᒋᑐᐃᓐᓇᖅᑕᖓ: ᐱᒋᐊᖅᑎᑦᑎᒃᑲᓐᓂᕐᓂᖅ ᐱᓕᕆᔾᔨᔪᓯᐅᓚᐅᕐᓯᒪᔪᒥ ᐊᑐᖅᑕᐅᕙᒍᓐᓃᖅᑐᒥ.

“ᐅᓇ ᐊᓯᐅᑎᑕᐅᑐᐃᓐᓇᕐᓯᒪᔪᖅ ᐊᒻᒪ ᐱᔭᐅᑐᐃᓐᓇᖅᓯᒪᓪᓗᓂ,” ᐅᖃᕐᑐᖅ ᓵᖕ, ᕚᓐᑰᕙᒥᐅᑕᖅ ᐊᒻᒪᓗ ᐃᓕᓐᓂᐊᖅᑎᑦᑎᓯᒪᓪᓗᓂᒃ ᐃᖃᓗᐃᑦ ᐊᒥᕋᖏᓐᓂᒃ ᕿᑐᓕᓴᐃᓂᕐᒥᒃ ᐊᕐᕌᒍᓂ ᑕᓪᓕᒪᓂ.

ᑖᔅᓱᒪ ᐃᖃᓗᐃᑦ ᐊᒥᕋᖏᓐᓂᒃ ᕿᑐᓕᓴᐃᓂᖅ ᐊᑐᖅᑕᐅᕙᓚᐅᖅᑐᓂᒃ ᐃᓄᖕᓄ ᐊᔾᔨᖃᓪᓚᕆᙱᒃᑲᓗᐊᖅᖢᓂ, ᐅᖃᓚᐅᕐᑐᖅ ᑕᒪᓐᓇ ᐱᓕᕆᐊᖃᕐᓂᖅ ᐃᖅᑲᐅᒪᑎᑦᑎᔾᔪᑎᐅᓇᓱᒃᑐᖅ ᖃᓄᕐᓗ ᐊᓯᖏᑦ ᐃᓄᐃᑦ ᑕᐃᒪᐃᑐᓂᒃ ᐱᓕᕆᐊᖃᖅᐸᖕᓂᖏᓐᓂᒃ.

“ᐃᓅᙱᖢᖓ,” ᐅᖃᕐᑐᖅ ᓵᖕ, “ᖃᐅᔨᒪᙱᑦᑐᖓ ᖃᓄᖅ ᐱᓕᕆᐊᖑᕙᓚᐅᕐᓯᒪᖕᒪᖔᑕ. ᐅᓇ ᐅᔾᔨᕈᓱᓕᖅᐹᓪᓕᕈᑎ ᐅᕝᕙᓘᓐᓃᑦ ᐃᖅᑲᐅᒪᔾᔪᑎ ᑕᐃᒪᓐᓇᓗ ᐃᓄᖕᓄ ᖃᐅᔨᔭᐅᑎᑦᑐᒪᓪᓗᒍ.”

ᐃᓕᓐᓂᐊᖅᑎᑦᑎᑎᓪᓗᒋᑦ ᑕᒪᕐᒥ ᐊᑐᓂ ᐃᓕᓐᓂᐊᖃᑕᐅᔪᑦ ᓇᖕᒥᓂᖅ ᐃᖃᓗᖃᓚᐅᕐᑐᑦ. ᑖᒃᑯᐊ ᐊᒥᕋᖏ ᐲᔭᖅᖢᒋᑦ ᐊᒻᒪᓗ ᕿᑐᓕᓴᐅᑎᒥ ᐃᓪᓕᕆᓪᓗᒋᑦ (tannin).

ᑕᕐᓴᒃᓴᒥ ᐃᓚᔭᐅᔪᓐᓇᖅᖢᑎᒃ ᕿᑐᓕᓴᐅᑎ ᐊᒻᒪᓗ ᐸᓂᕐᓯᐊᕆᓚᐅᕐᓗᒋᑦ ᐊᒻᒪ ᖃᓄᐃᓕᐅᕐᑕᐅᓚᐅᕐᓗᑎ ᑖᓐᓇ ᐱᓕᕆᔪᖅ ᐃᖃᓘᑉ ᐊᒥᕋᖓᓂᒃ ᕿᓯᐅᔭᖁᑎᖃᓕᖅᖢᓂ.

ᐃᓕᓐᓂᐊᖅᑎᐅᔪᑦ ᓴᓇᓚᐅᕐᑐᑦ ᑮᓇᐅᔭᒃᑯᕕᖕᓂᒃ, ᓯᐅᑎᕈᑎᓂᒃ, ᓂᕈᒥᐊᒐᕐᓂᒃ ᐊᒻᒪᓗ ᒥᕐᓱᕈᑎᖃᕐᕕᖕᓂᒃ. ᐃᖃᓗᐃᑦ ᐊᒥᕋᖏᑦ ᕿᓯᐅᔭᙳᖅᑎᑕᐅᓯᒪᔪᑦ ᐊᑐᖅᑕᐅᔪᓐᓇᖅᑐᑦ ᖃᓄᐃᑦᑐᑐᐃᓐᓇᖅᑎᑐᑦ ᕿᓯᐅᔭᖅᑎᑐᑦ ᐅᖃᓚᐅᕐᑐᖅ ᓵᖕ.

ᐃᓕᖅᑯᓯᑎᒍᓪᓕ, ᑎᐊ ᐅᖃᕐᑐᖅ, ᐱᖁᑎᖃᕐᕖᑦ ᓇᖕᒪᒐᐃᑦ ᐊᒻᒪᓗ ᖃᐅᓯᓕᔭᙱᑦᑐᓂᒃ ᔭᐸᓕᐅᕈᓐᓇᖅᖢᑎᒃ ᑕᒪᒃᑯᓇᙵᑦ ᐃᖃᓗᐃᑦ ᐊᒥᕋᖏᓐᓂᒃ ᕿᓯᐅᔭᙳᖅᑎᓯᒪᔪᓂᒃ, ᑭᓯᐊᓂᓕ ᑕᒪᒃᑯᓂᖓ ᐱᓕᕆᐊᕆᓂᐅᕙᓚᐅᕐᑐᑦ ᐊᓯᐅᑎᑕᐅᓚᐅᕐᓯᒪᖕᒪᑕ ᐃᓄᖕᓂ ᐱᔭᐅᓪᓗᑎᒃ ᓄᓇᓕᒃᑕᖃᑲᑕᓕᖅᑎᓪᓗᒍ.

ᐅᖃᓚᐅᕐᑐᖅ, “ᑕᒪᓐᓇ ᐃᑲᔪᕈᑎᒻᒪᕆᒃ ᓄᑖᓂ ᐊᔪᕈᓐᓃᕐᓴᖅᖢᖓ ᐅᕝᕙᓘᓐᓃᑦ ᐃᒻᒪᑲᓪᓚᒃ ᐃᓕᖅᑯᓯᐅᓚᐅᖅᑐᓂᒃ ᓄᓇᓕᖕᓂ ᐱᓕᕆᖃᑎᖃᐅᔭᖅᖢᖓ.”