ᐱᓕᕆᔾᔪᑎᓕᕆᓂᕐᒧᑦ ᑲᒻᐸᓂᐅᔪᑦ ᐱᓇᓱᐊᒐᖃᕈᒪᔪᑦ ᐊᔪᕈᓐᓃᕐᓴᖅᑎᑦᑎᓂᕐᒥᒃ ᐅᑭᐅᕐᑕᖅᑐᕐᒥ ᓄᓇᖃᖅᑳᖅᑐᓂᒃ ᐃᓅᓱᒃᑐᓂᒃ
PLATO Testing ᖃᐅᔨᓴᕈᑎᓕᕆᔨᒃᑯᑦ ᐅᖃᓚᐅᕐᑐᖅ ᐱᓕᕆᐊᖃᕈᒪᓂᕐᒥᒃᓄᓇᕗᒥᑦ: “ᐱᓕᕆᖃᑎᒃᓴᖅᖃᕈᒪ ᖃᐅᒃᐸᑦ ᐱᒋᐊᕋᔭᕐᑐᖓ”
PLATO Testing (ᖃᐅᔨᓴᕈᑎᓕᕆᔨᒃᑯᑦ), ᑲᒻᐸᓂᐅᔪᖅ ᐊᔪᕈᓐᓃᕐᓴᖅᑎᑦᑎᕙᒃᑐᑦ ᓄᓇᖃᖅᑳᖅᑐᑦ ᐃᓅᓱᒃᑐᖏᓐᓂᒃ ᖃᐅᔨᓴᖅᑎᑕᐅᓪᓗᑎᒃ ᖃᕋᓴᐅᔭᓂᒃ ᐃᓚᒃᓴᐅᔪᓂᒃ, ᐅᖃᕆᓪᓗᑎᒃ ᑕᒪᓐᓇ ᐅᑭᐅᕐᑕᖅᑐᕐᒧᑦ ᐱᕙᓪᓕᐊᒃᑲᓐᓂᕐᐸᓪᓕᐊᒍᑎᐅᓂᖓᓂᒃ, ᑐᓂᔭᐅᓚᐅᕐᑎᓪᓗᒋᑦ $500,000-ᓂᒃ ᐃᑲᔪᕈᑎᒃᓴᓂᒃ ᐅᕙᙵᑦ ᐅᕋᐃᕙᓐ ᓄᓇᖃᖅᑳᖅᑐᑦ ᐱᓕᕆᖃᑎᒌᓄᑦ (Raven Indigenous Capital Partners), ᐱᓕᕆᕝᕕᒃ ᐃᑲᔪᕈᑎᒃᓴᓕᕆᓂᕐᒥᒃ ᓄᓇᖃᖅᑳᖅᑐᑦ ᖃᓄᐃᓕᐅᕋᓱᒃᑕᖏᓐᓄᑦ. (ᐊᔾᔨᙳᐊᖅ ᐅᕙᙵᑦ PLATO Testing)
For an English version of this story, see Tech company sets sights on training northern Indigenous youth
ᕿᒪᐃᓚᐅᕐᓯᒪᑎᓪᓗᒍ ᐊᑐᕈᒪᓇᓱᒋᓚᐅᕐᑕᖓᓂᒃ ᓇᖕᒥᓂᖃᕐᓂᕐᒥᒃ ᐊᓯᐊᓂᒡᓗ ᐋᖅᑭᒃᓯᓯᒪᓇᓂ ᐅᑭᐅᖃᓕᕐᖢᓂ 43-ᓂᒃ, ᓯᑳᑦ ᑎᓚᓐ ᐅᖃᓚᐅᕐᑐᖅ ᐃᓱᒪᓕᕐᓂᕋᖅᖢᓂ ᐃᒻᒥᓄᑦ, “ᐊᑏ ᓄᓇᓕᐅᕐᑏ, ᑭᓱᑐᐃᓐᓇᒧᑦ ᐸᕐᓇᒃᓯᒪᓕᕐᑐᖓ.”
ᑕᕝᕙᓕ ᑎᑎᕋᕐᕕᐅᓪᓗᓂ ᖃᕋᓴᐅᔭᒃᑯᑦ.
ᖃᕋᓴᐅᔭᓄᑦ ᐃᓚᒃᓴᓂᒃ ᖃᐅᔨᓴᕐᕕᒃᒥᙶᖅᖢᓂ ᑲᒻᒪᓂᐱ ᓂᐅ ᐳᕋᓐᓱᕕᒃᒥᑦ ᑕᐃᔭᐅᔪᖅ PLATO Testing, ᒪᓂᓴᐅᑎᖃᖅᖢᑎᒃ ᐊᑭᖃᙱᑦᑐᓂᒃ ᐊᔪᕈᓐᓃᕐᓴᕈᑎᒃᓴᒥᑦ.
“ᐃᓱᒪᓚᐅᕐᑐᖓ ᐊᓕᐊᓇᐃᓗᐊᒧᑦ ᓱᓕᕗᖃᐃ.” ᑎᓚᓐ ᐅᖃᖅᑐᖅ.
ᑎᓚᓐ ᐃᓄᕕᐊᓗᒃᒥᐅᓂᒃ ᓯᕗᕚᓕᒃ, ᐊᒻᒪᓗ ᐃᓄᖕᓂ ᐅᓄᙱᑦᑐᓂᒃ ᑕᒪᑐᒥᖓ ᐱᓕᕆᐊᖃᕐᓯᒪᓪᓗᓂ. ᒫᓐᓇᓕ ᐃᖅᑲᓇᐃᔭᓕᕐᑐᖅ ᐅᑯᓄᖓ PLATO ᐊᖏᕐᕋᖓᓂᒃ ᑳᒍᕆᐅᑉ ᖃᓂᒋᔭᖓᓂᒃ, ᖃᐅᔨᓴᖃᑦᑕᖅᖢᓂ ᖃᕋᓴᐅᔭᓄᑦ ᐃᓚᒃᓴᓂᒃ ᓄᓇᕐᔪᐊᒥ ᐱᓕᕆᔨᒻᒪᕆᖕᓄᑦ ᐹᔅᑕᓐᓂ ᑐᙵᕕᖃᕐᑐᓂᒃ.
“ᓈᒻᒪᒃᑐᒦᓕᕐᑐᖓ, ᐋᖅᑭᒃᓯᒪᓪᓗᖓᓗ, ᐊᓕᐊᓇᐃᑦᑐᐊᓗᒃ.” ᐅᖃᖅᑐᖅ.
PLATO ᖃᐅᔨᓴᖃᑦᑕᕐᒪᑕ ᖃᕋᓴᐅᔭᓄᑦ ᐃᓚᒃᓴᐅᕙᒃᑐᓂᒃ ᐱᔨᑦᑎᕋᖅᑕᖏᓐᓄᑦ ᓄᐊᑦ ᐊᒥᐊᓕᑳᒦᑦᑐᓂᒃ ᐊᐅᓚᑦᑎᓯᓐᓈᖅ ᐊᔪᕈᓐᓃᕐᓴᕈᑎᒥᒃ, ᐊᒻᒪᓗ 175-ᓂ ᓄᓇᖃᖅᑳᑐᓂᒃ ᐃᓕᓐᓂᐊᕐᑎᓂᒃ ᐱᐊᓂᒃᑕᐅᓯᒪᓕᕐᖢᓂ ᒫᓐᓇᒧᑦ, ᐅᑯᑎᒎᓇᕐᓕ ᑐᓴᒐᒃᓴᓕᐊᕆᔭᐅᔪᓂᒃ ᑲᒻᐸᓂᐅᔪᒥ.
ᖃᕋᓴᐅᔭᑦ ᐃᓚᒃᓴᖏᓐᓂᒃ ᖃᐅᔨᓴᕐᑎᐅᔪᑦ ᓄᑖᓂᒃ ᖃᕋᓴᐅᔭᓄᑦ ᐃᓚᒃᓴᓂᒃ ᖃᐅᔨᓴᖃᑦᑕᖅᑐᑦ ᓈᒻᒪᙱᑦᑐᖃᕆᐊᒃᓴᖏᓐᓂᒃ ᓴᖅᑭᑕᐅᒻᒪᕆᓚᐅᕐᑎᓐᓇᒋᑦ.
PLATO ᓄᓇᖃᖅᑳᖅᑐᓂᒃ ᐱᓕᕆᔨᖃᕐᓂᕐᓴᐅᔪᒪᖕᒪᑕ ᒪᑯᓄᖓ ᓄᓇᕐᔪᐊᒥ ᖃᕋᓴᐅᔭᓄᑦ ᐃᓚᒃᓴᓂᒃ ᖃᐅᔨᓴᖃᑦᑕᕐᓂᕐᒥᒃ, ᐊᒻᒪᓗ ᐅᓇ ᑮᓇᐅᔭᖅ ᐃᑲᔫᑎᑖᕕᓂᖓᑦ $500,000 ᑕᐃᒪᐃᑎᑦᑎᒍᓐᓇᕐᓂᐊᕐᖢᓂ. ᑮᓇᐅᔭᐃᑦ ᐅᑯᓇᙶᕐᑐᑦ ᐱᓕᕆᕝᕕᒃᒥᑦ ᐱᓕᕆᐊᖃᕐᑐᒥᑦ ᓄᓇᖃᖅᑳᖅᑐᓄᑦ ᑐᕌᖓᔪᓂᒃ, ᐅᑯᓇᙵᑦ Raven Indigenous Capital Partners.
PLATO Testing ᐱᒋᐊᖅᑎᑦᑎᔨᖓ ᐊᒻᒪ ᐊᖓᔪᖅᑳᖑᓪᓗᓂ ᐊᐅᒪᑦᑎᔨ ᑮᑦ ᒫᑭᓐᑖᔅ ᐅᖃᓚᐅᕐᑐᖅ ᑖᓐᓇ ᑮᓇᐅᔭᖅ, ᑐᓴᖅᑎᑦᑎᒍᑎᐅᓂᑯ ᔭᓄᐊᕆ 13-ᒥᑦ, ᑖᒃᑯᓂᖓ ᑲᒻᐸᓂᐅᔪᓂᒃ ᑐᕌᒐᕆᔭᖓᓂ ᖃᓂᒡᓕᒋᐊᖅᑎᑦᑎᒃᑲᓐᓂᕈᑎᐅᓗᓂ ᐊᔪᕈᓐᓃᕐᓴᖅᑎᑦᑎᖃᑦᑕᕐᓂᕐᒥᒃ ᐊᒻᒪ ᐃᖅᑲᓇᐃᔭᓕᖅᑎᑦᑎᓂᕐᒥᒃ ᐊᒻᓚ ᐊᔪᕈᓐᓃᕐᓴᖅᑎᑦᑎᓂᕐᒥᒃ ᖃᕋᓴᐅᔭᓄᑦ ᐃᓚᒃᓴᓂᒃ ᖃᐅᔨᓴᖅᑎᐅᖃᑦᑕᕐᓂᐊᕐᑐᓂᒃ “ᑕᕆᐅᕐᒥ ᑕᕆᐅᒧᑦ ᐊᒻᒪ ᑕᕆᐅᕐᒧᑦ.”
“ᑕᐃᑯᙵᓛᕐᑐᒍᑦ ᖃᑯᒍᒃᑲᓐᓂᖅ,” ᐅᖃᖅᑐᖅ.
PLATO ᐊᔪᕈᓐᓃᕐᓴᖅᑎᑦᑎᖃᑦᑕᕐᓯᒪᔪᑦ ᓄᓇᖃᖅᑳᖅᑐᓂᒃ ᖃᕋᓴᐅᔭᓄᑦ ᐃᓚᒃᓴᓂᒃ ᖃᐅᔨᓴᖅᑎᑦᑎᓂᒃ 2015-ᒥ ᐱᒋᐊᖅᖢᑎᒃ, ᐅᑯᐊ ᒫᑭᓐᑖᔅ ᐅᖃᓚᐅᕐᑎᓪᓗᒍ ᓄᓇᖃᖅᑳᖅᑐᓂᒃ ᐱᕕᖃᕈᓐᓇᕐᓯᑎᑦᑎᔪᒪᑎᓪᓗᒍ ᑲᓇᑕᒥᐅᑕᓂᒃ.
ᐱᓕᕆᔾᔪᑎᓕᕆᓂᒃᑯᑦ, ᐅᖃᕐᑐᖅ, ᐃᖅᑲᓇᐃᔮᒃᓴᖅᑕᖃᐅᕐᓂᕐᓴᐅᖕᒪᑦ ᐃᓄᖕᓂ ᐅᓄᕐᓂᕐᓴᓂ ᐃᖅᑲᓇᐃᔭᕈᒪᔪᓂᒃ, ᑕᐃᒪᓕ ᐃᓚᖏᑦ ᓴᓇᔭᐅᔭᕆᐊᓖᑦ ᐊᓯᖏᓐᓄᑦ ᓄᓇᕐᔪᐊᒥ ᐱᓕᕆᐊᖑᑎᑕᐅᓕᕐᐸᒃᖢᑎᒃ.
“ᓄᓇᑦᑎᓐᓂᓪᓘᓐᓃ ᐃᓄᒃᑕᖃᐅᕐᒪᑦ ᐱᕕᖃᓕᕈᒪᓯᒪᔪᓂᒃ, ᖃᓄᐃᒻᒪᓪᓕ ᑕᒪᒃᑯᓄᖓ ᐊᖑᒻᒪᑎᐅᒪᓇᓱᙱᓚᒍᑦ ᐊᒻᒪᓗ ᐱᓕᕆᐊᒃᓴᓂᒃ ᑕᒫᓃᑎᑦᑎᓗᑕ,” ᐅᖃᖅᑐᖅ.
ᐊᔪᕈᓐᓃᕐᓴᕐᓂᕐᒧᑦ ᖃᓄᐃᓕᐅᕈᑎᒃᓴᖅ ᐅᑯᓇᓂ ᓄᓇᓕᕐᔪᐊᓂ ᐱᓕᕆᐊᖑᕙᒃᑐᑦ ᕆᔭᐃᓇ, ᒑᒍᕆ ᐊᒻᒪ ᓲ ᓴᐃᓐ ᒧᕆ ᐊᒻᒪᓗ ᐋᓐᓂᐊᕕᒡᔪᐊᕐᓇᖅᑕᖃᓚᐅᕐᑎᓐᓇᒍ, ᒫᑭᓐᑖᔅ ᐅᖃᓚᐅᕐᑐᖅ ᐅᖃᓪᓚᖃᑎᖃᓚᐅᕐᓂᖓᓂᒃ ᕗᐊᐃᑦᕼᐅᐊᔅ ᒪᐃᔭᖓᓄᑦ ᐱᒋᐊᕈᒪᑐᐃᓐᓇᕆᐊᖃᕐᓂᖓᓂᒃ ᑕᒪᑐᒥᖓ ᐱᓕᕆᐊᒥᒃ ᔫᑳᓐᒥ.
ᒫᑭᓐᑖᔅ ᐅᖃᓚᐅᕐᑐᖅ ᐊᔪᕐᓇᕐᑐᕈᓘᓂᖓᓂ ᐊᔪᕈᓐᓃᕐᓴᖅᑎᑦᑎᓕᕐᓂᕐᒥᒃ ᓄᑖᒥ ᓄᓇᓕᕐᔪᐊᓂᒃ ᐅᕝᕙᓘᓐᓃᑦ ᑎᐅᕆᑑᕆᒥ ᐆᑐᓇᖅ ᓄᓇᕗᑐᑦ ᕿᒪᐃᓚᐅᙱᓪᓗᑎᒃ ᓄᓇᕗᒥᑦ ᐊᔪᕈᓐᓃᕐᓴᕆᐊᕐᓗᑎᒃ ᓄᓇᓕᖕᓂ ᐱᔭᐅᔭᕆᐊᓕᖕᓂᒃ ᐊᒻᒪ ᐱᓕᕆᖃᑎᒌᖕᓂᕐᒥᒃ, ᑭᓯᐊᓂᓕ “ᐱᓕᕆᖃᑎᖃᓚᐅᕈᒪ ᑕᐅᕙᓂ, ᖃᐅᒃᐸᑦ ᐱᒋᕋᔭᕐᑐᖓ.”
ᒑᕈᕆᒥᓕ, ᑎᓚᓐ ᐅᖃᓪᓚᓚᐅᕐᑐᖅ ᐱᒻᒪᕆᐊᓘᓂᖓᓂᒃ ᓄᓇᖃᖅᑳᖅᑐᑦ ᐃᓅᓱᒃᑐᖏ ᑕᑯᖃᑦᑕᕈᑎ ᐊᓯᖏᓐᓂᒃ ᓄᓇᖏᓐᓃᑦᑐᓂᒃ ᐱᓕᕆᐊᖃᕐᑐᓂᒃ ᐱᓕᕆᔾᔪᑎᓕᕆᓂᕐᒥᒃ.
“ᑕᒪᑦᑕ ᖃᐅᔨᒪᓚᐅᙱᓐᓇᑦᑕ ᑕᒪᓐᓇ ᐃᖅᑲᓇᐃᔮᒃᓴᐅᓛᕐᓂᖓᓂᒃ, ᖃᐅᔨᒪᓚᐅᙱᓐᓇᑦᑕ ᑕᒪᒃᑯᐊ ᐱᑕᖃᕐᓂᖏᓐᓂᒃ ᐊᒻᒪᓗ ᑕᑯᑲᑕᓕᕐᖢᑕ ᐃᓄᖕᓂ ᑕᐃᒪᐃᑦᑐᓂᒃ ᐱᓕᕆᖃᑦᑕᕐᓯᒪᓕᕐᑐᓂᒃ ᐊᕐᕌᒍᓂᒃ 30-ᓂᒃ,” ᐅᖃᖅᑐᖅ.
ᑲᑎᒪᕕᒡᔪᐊᕐᕕᒃ ᑲᓇᑕᒥ ᐅᖃᐅᓯᓂᒃ ᓴᖅᑭᑎᑦᑎᓚᐅᕐᓯᒪᔪᑦ ᔭᓄᐊᕆ 15-ᒥᑦ ᐅᖃᕐᓯᒪᔪᓂᒃ ᐅᓄᕐᑐᑦ ᐅᑭᐅᕐᑕᖅᑐᕐᒥᐅᑕᑦ ᐊᒻᒪ ᐃᓄᑭᑦᑐᓂᒃ ᐃᓕᓐᓂᐊᕐᕕᐊᓗᐃᑦ ᐸᕐᓇᒃᑎᑦᑎᖃᑦᑕᙱᓗᐊᕐᓂᖏᓐᓂᒃ ᓄᓇᖃᖅᑳᖅᑐᓂᒃ ᐃᓕᓐᓂᐊᕐᑐᓂᒃ ᐃᓕᓐᓂᐊᒃᑲᓐᓂᕈᑎᒃᓴᓂ ᖃᐅᔨᓴᖅᑐᓕᕆᓂᕐᒥᒃ, ᐱᓕᕆᔾᔪᑎᓕᕆᓂᕐᒧᑦ, ᐊᐅᓚᒍᑎᒃᓴᓕᕆᓂᕐᒥᒃ ᐊᒻᒪ ᓇᐃᓴᐅᓯᕆᓂᕐᒥᒃ, ᐅᕝᕙᓘᓐᓃᑦ ᑕᐃᔭᐅᔪᖅ STEM ᐃᓕᓐᓂᐊᒐᒃᓴᑦ.
ᒫᓐᓇᓕ ᓄᓇᖃᕐᑳᖅᑐᑦ 4 ᐳᓴᓐᑎᒋᔭᐅᔪᑦ ᑕᒪᐃᓐᓂᓕᒫᖅ ᐃᓐᓇᕐᓂᒃ ᑲᓇᑕᒥᐅᑕᓂᒃ, ᐊᒻᒪᓗ 2 ᐳᓴᓐᑎᐅᑉ ᑐᖔᓂ ᐃᖅᑲᓇᐃᔭᖅᖢᑎᒃ ᐅᑯᓄᖓ STEM.
(0) Comments