ᐱᕋᔭᖕᓂᕐᔪᐊᖑᔪᑦ ᑲᑕᒃᐹᓪᓕᖅᐳᖅ, ᐊᖅᑯᒻᒥ−ᐱᔾᔪᑎᓖᑦ ᖃᓄᐃᓐᓂᐅᔪᑦ ᖁᕝᕙᕆᐊᖅᐳᑦ, ᓄᓇᕕᖕᒥ ᐸᓖᓯᒃᑯᑦ ᐅᖃᐅᔾᔨᕗᑦ ᑲᑎᕕᒃ ᐊᕕᒃᑐᖅᓯᒪᓂᐅᔪᒥ ᒐᕙᒪᒃᑯᑦ

ᐱᕋᔭᖕᓂᕐᔪᐊᖑᔪᑦ ᐊᒻᒪ ᐃᒻᒥᓃᕐᓂᐅᔪᑦ ᑲᑕᒃᐸᓪᓕᐊᕗᑦ ᓄᓇᕕᖕᒥ ᑕᒪᑐᒪᓂ ᐊᕐᕌᒎᔪᒥ, ᑭᓯᐊᓂ ᓄᓇᓯᐅᑎᒧᑦ−ᐱᔾᔪᑎᓕᖕᓂ ᖃᓄᐃᓐᓂᐅᔪᓂ ᖁᕝᕙᖅᐸᓪᓕᐊᕗᑦ.

ᑭᓯᐊᓂ, ᑐᑭᓯᓇᙱᓚᖅ ᑲᑕᒃᐸᓪᓕᐊᓂᖓᓂ ᐱᔾᔪᑎᒋᔭᖓᓂ ᐱᕋᔭᖕᓂᕐᔪᐊᖑᔪᓄᑦ, ᐃᓚᖃᖅᑐᒥ ᐃᓄᐊᖅᓯᓂᐅᔪᓂ ᐊᒻᒪ ᐋᓐᓂᖅᓯᕆᓂᐅᔪᓂ, ᐅᖃᓚᐅᖅᐳᖅ ᔮᓐ−ᕗᕌᓐᓱᐊ ᒧᐊᕆᓐ, ᓄᓇᕕᖕᒥ ᐸᓖᓯᒃᑯᑦ ᐱᔨᑦᑎᕋᖅᑎᒃᑯᑦ ᐊᖓᔪᖅᑳᑉ ᑐᖓᓕᖓ ᐊᐅᓚᑕᐅᓂᐅᔪᒥ, ᓄᑖᙳᕆᐊᖅᑎᑦᑎᓂᐅᔪᒥ ᑲᑎᕕᒃ ᐊᕕᒃᑐᖅᓯᒪᓂᐅᔪᒥ ᒐᕙᒪᒃᑯᓐᓄᑦ ᑲᑎᒪᔨᐅᔪᓄᑦ ᔫᓂ 1−ᒥ.

ᑐᓂᓯᓚᐅᖅᐳᖅ ᐅᓂᒃᑳᓕᐊᒥ ᑕᑯᒃᓴᐅᑎᑦᑎᔪᒥ ᐸᓖᓯᒃᑯᓐᓄᑦ-ᑭᐅᓂᕐᓄᑦ ᑭᓪᓕᓯᓂᐊᖅᑕᐅᓂᑯᓂ ᓯᕗᓪᓕᖅᐹᖑᔪᒥ ᑕᖅᑭᓄᑦ ᑎᓴᒪᓄᑦ ᑕᒪᑐᒪᓂ ᐊᕐᕌᒎᔪᒥ ᑕᐃᑲᓂᑦᑕᐃᓐᓇᖅ ᐱᓕᕆᓂᐅᓚᐅᖅᑐᒥ ᐊᕐᕌᓂᓂ.

ᐊᑕᐅᓯᖅ ᐱᔾᔪᑕᐅᑐᐃᓐᓇᕆᐊᓕᒃ ᑲᑕᒃᐹᓪᓕᕐᓂᖓᓂ ᐱᕋᔭᖕᓂᕐᔪᐊᖑᔪᓄᑦ ᒧᐊᕆᓐ ᐅᖃᓚᐅᖅᐳᖅ ᑕᑯᒃᓴᐅᑎᑦᑎᓂᖓᓂ ᖁᑭᐅᑎᓄᑦ ᑲᑉᐱᐊᓇᕐᓂᐅᔪᒥ ᓄᖅᑲᖅᑎᑦᑎᓂᐅᔪᒥ ᐱᓕᕆᓂᐅᔪᓂ ᐊᑐᓕᖅᑎᑕᐅᔪᒥ ᓄᓇᕕᖕᒥ ᐸᓖᓯᒃᑯᓐᓄᑦ, ᐃᓚᖃᖅᑐᒥ ᖁᑭᐅᑎᓄᑦ ᐊᑦᑕᓇᔾᔭᐃᖅᓯᓯᒪᓂᕐᒥ ᐱᓕᒻᒪᒃᓴᐃᓂᐅᔪᒥ ᐊᒻᒪ ᑎᑎᕋᖅᑕᐅᓯᒪᓂᖏᓐᓂ.

ᓄᓇᕕᖕᒥ ᐸᓖᓯᒃᑯᑦ ᑐᓂᓯᓯᒪᒋᕗᑦ ᐊᑭᖃᙱᑦᑐᓂ ᖁᑭᐅᑎᓄᑦ ᑮᒍᓐᓇᖅᑐᓂ ᖁᑭᐅᑎᖃᕐᕕᓂ — ᒧᐊᕆᓐ ᐅᖃᓚᐅᖅᐳᖅ ᐱᔪᓐᓇᖅᑎᑦᑎᔪᒥ ᓄᓇᕕᖕᒥᐅᓂ ᐊᑦᑕᓇᙱᑦᑐᒥ ᑐᖅᑯᐃᓂᖏᓐᓂ ᐊᒻᒪ ᖁᑭᐅᑎᖏᑦ ᑮᒃᓯᒪᑎᑕᐅᓗᑎᒃ ᐊᑐᖅᑕᐅᙱᑎᓪᓗᒋᑦ.

“ᐱᐅᓂᖅᓴᓂ ᐱᓕᕆᔾᔪᑎᒃᓴᖃᖅᐳᖅ ᐃᓕᓯᒪᔪᓂ ᐃᓄᖕᓄᑦ ᑐᖅᑯᑦᑎᐊᖅᓯᓂᖏᓐᓂ ᖁᑭᐅᑎᖏᓐᓂ,” ᒧᐊᕆᓐ ᐅᖃᓚᐅᖅᐳᖅ ᐊᐱᖅᓱᖅᑕᐅᓂᐅᔪᒥ. “ᓂᕆᐅᖕᓂᖃᖅᐳᒍᑦ ᑕᒪᓐᓇ ᑖᔅᓱᒥᖓ ᐱᔾᔪᑎᖃᕐᓂᖓᓂ, ᑕᐃᓐᓇ ᐊᑐᐃᓐᓇᖃᕐᓂᖅ ᑕᐃᒪᐃᑦᑐᓐᓃᕐᓂᖓᓂ ᑕᐃᔅᓱᒪᓂᒃᑲᓐᓂᖅᑐᑦ.”

ᐅᖃᓚᐅᖅᐳᖅ ᓄᓇᕕᖕᒥ ᐸᓖᓯᒃᑯᑦ ᑎᑭᓴᐃᓯᒪᕗᑦ ᐅᓄᕐᓂᖅᓴᓂ ᖁᑭᐅᑎᓄᑦ ᑮᒍᓐᓇᖅᑐᓂ ᖁᑭᐅᑎᖃᕐᕕᓂ ᑎᑭᓛᖅᑐᓂ ᐅᐱᕐᙶᖑᒃᑲᓐᓂᖅᐸᑦ.

ᒫᓐᓇᒧᑦ ᑎᑭᖦᖢᒍ, ᒪᕐᕉᖕᓂ ᐃᓄᐊᖅᓯᓯᒪᓂᖃᖅᐳᖅ ᓄᓇᕕᖕᒥ.

ᓯᕗᓪᓕᖅᐹᖑᔪᖅ ᔭᓄᐊᕆ 2−ᒥᐅᓚᐅᖅᐳᖅ ᐊᑯᓕᕕᖕᒥ. ᒧᐊᕆᓐ ᐅᖃᓚᐅᖅᐳᖅ ᑐᓂᓯᔪᓐᓇᙱᓐᓂᖓᓂ ᐅᓂᒃᑳᕆᓂᐅᔪᓂ ᐆᒧᖓ ᖃᓄᐃᓐᓂᐅᔪᒧᑦ “ᐃᓄᐃᑦ ᐃᓚᐅᔪᓂ ᒪᒃᑯᒃᑐᒻᒪᕆᐅᖕᒪᑕ ᐊᒻᒪ ᑎᑎᖅᑲᖁᑕᐅᔪᑦ ᓱᓕ ᖃᐅᔨᓴᖅᑕᐅᖕᒪᑦ.”

ᐊᓱᐃᓛᒃ ᐊᐃᑉᕆᓕ 13−ᒥ, ᐅᐃᓕ ᑐᒥᒃ, 29, ᐅᒥᐅᔭᕐᒥ ᐃᖅᑲᖅᑐᒐᒃᓴᙳᓚᐅᖅᐳᖅ ᐃᓄᐊᖅᓯᓂᕐᒥ ᐲᑕ ᓄᑲᖅᖠᖅ ᑯᕉ, 47, ᑐᖁᓚᐅᖅᑎᓪᓗᒍ ᑲᐱᔭᐅᓚᐅᖅᑎᓪᓗᒍ.

ᒫᓐᓇᐅᔪᒥ, ᐊᖏᒡᓕᒋᐊᕐᓂᐅᔪᒥ ᑐᖁᓂᖃᖅᑐᒥ ᓄᓇᓯᐅᑎᓂ ᐊᐳᖅᓯᓂᐅᔪᓂ ᐱᒋᐊᖅᑎᑦᑎᓂᖏᓐᓂ ᓄᓇᕕᖕᒥ ᐸᓖᓯᒃᑯᓐᓂ ᑐᕌᖅᑎᑦᑎᓂᖏᓐᓂ ᐋᖓᔮᖅᑐᓂ ᐊᖁᓐᓂᐅᔪᒥ ᐊᕕᒃᑐᖅᓯᒪᓂᐅᔪᒥ, ᒧᐊᕆᓐ ᐅᖃᓚᐅᖅᐳᖅ.

ᐅᖃᐅᔾᔨᓚᐅᖅᐳᖅ ᑲᑎᕕᒃ ᑲᑎᒪᔨᐅᔪᓂ ᐸᓖᓯᒃᑯᑦ ᐱᓕᒻᒪᒃᓴᖅᓯᒪᓕᖅᐳᑦ ᐊᑐᕐᓂᕐᒥ ᐊᓂᖅᓵᖅᑎᑦᑎᕕᖕᒥ ᐃᒥᐊᓗᓗᐊᖅᓯᒪᖕᒪᖔᑦ ᐱᓕᕆᔾᔪᑎᓂᑦ ᐅᖃᐅᔾᔨᕙᒃᑐᒥ ᐊᖁᑎᐅᔫᑉ ᐊᐅᖓᑕ ᐃᒥᐊᓗᖃᕐᓂᖓ ᖁᑦᑎᖕᓂᖅᓴᐅᒍᓂ ᓴᓕᒐᑎᒍᑦ ᑭᒡᓕᕆᔭᖓᓂ.

ᐊᓂᖅᓵᖅᑎᑦᑎᕕᖕᒥ ᐃᒥᐊᓗᓗᐊᖅᓯᒪᖕᒪᖔᑦ ᐊᑐᐃᓇᐅᙱᓚᑦ ᑕᒪᒃᑭᓂ ᓄᓇᓕᐅᔪᓂ, ᑭᓯᐊᓂ ᐊᑐᖅᑕᐅᕙᖕᓂᖏᓐᓂ, ᒧᐊᕆᓐ ᐅᖃᓚᐅᖅᐳᖅ, ᑐᓂᓯᓲᖑᕗᑦ ᓇᓚᐅᓯᒪᓂᖅᓴᐅᔪᓂ ᑐᓴᒐᒃᓴᓂ ᐸᓖᓯᒃᑯᓐᓄᑦ ᐊᖁᑎᐅᔫᑉ ᐋᖓᔮᕐᓂᖓᓂ ᑭᒡᓕᒋᔭᖓᓂ.

ᓄᓇᕕᖕᒥ ᐸᓖᓯᒃᑯᑦ ᐱᒋᐊᖅᓯᒪᒋᕗᑦ ᐊᖅᑯᒻᒥ ᖃᐅᔨᒋᐊᕐᕕᐅᔪᓄᑦ ᐊᖑᓯᓂᕐᒧᑦ ᐋᖓᔮᖅᑐᓂ ᐊᖁᑎᐅᔪᓂ ᐅᖃᖅᓯᒪᙱᑦᑐᒥ ᖃᖓᐅᓂᐊᕐᓂᖓᓂ ᐊᒻᒪ ᐃᓂᐅᔪᓂ ᓄᓇᓕᖕᓂ.

ᒧᐊᕆᓐ ᐅᖃᓚᐅᖅᐳᖅ ᐊᑕᐅᓯᕐᒥ ᒫᓐᓇᓕᓴᐅᔪᒥ ᖃᐅᔨᓴᐃᓂᐅᔪᒥ ᐳᕙᕐᓂᖅᑑᒥ ᖃᐅᔨᓴᕐᓂᖃᓚᐅᖅᐳᖅ 75−ᓂ ᐊᖁᑎᐅᔪᓂ, ᑐᕌᖅᑎᑦᑎᓂᖃᓚᐅᖅᑐᒥ ᒪᕐᕉᖕᓂ ᑎᒍᔭᐅᓂᐅᔪᓂ ᐋᖓᔮᖅᑐᓂ ᐊᖁᓐᓂᐅᔪᒥ.

“ᑐᕌᒐᒃᓴᖓ ᑭᒃᑯᓕᒫᒥ ᑎᒍᓯᓂᕐᒥᐅᙱᑦᑐᖅ, ᑐᕌᒐᒃᓴᖓ ᓄᖅᑲᖅᑎᑦᑎᓂᐅᔪᒥ,” ᐅᖃᓚᐅᖅᐳᖅ.

“ᐃᓄᖕᓂ ᐅᔾᔨᕈᓱᒃᑎᑦᑎᔪᒪᕗᒍᑦ ᐅᓗᕆᐊᓇᕐᓂᐅᔪᓂ ᐊᒻᒪ ᑕᒪᒃᑭᒐᓚᐃᑦ ᐅᓗᕆᐊᓇᖅᐳᑦ, ᓇᖕᒥᓂᖅ ᐊᒃᑐᖅᑕᐅᓲᖑᖕᒪᑕ, ᐱᓗᐊᖅᑐᒥ ᐃᓄᖕᓂ ᐃᓚᖏᓐᓂ ᐱᕐᕈᓗᐊᕿᓂᖃᖅᑐᓄᑦ, ᐋᓐᓂᓚᐅᖅᑐᓄᑦ ᐅᕝᕙᓘᓐᓃᑦ ᐊᐃᑦᑖᖑᒐᓗᐊᖅ ᑐᖁᓪᓗᑎᒃ.”

ᐊᒃᓱᕈᕐᓂᖃᕋᓗᐊᖅᑎᓪᓗᒋᑦ ᐃᖅᑲᓇᐃᔭᖅᑎᑖᕋᓱᐊᕐᓂᕐᒧᑦ, ᒧᐊᕆᓐ ᐅᖃᐅᔾᔨᓚᐅᖅᐳᖅ ᑲᑎᒪᓕᐅᔪᓂ ᓂᕆᐅᒃᐳᖅ ᑯᐸᐃᖕᒥ ᐸᓖᓯᒃᑯᓐᓂ ᑐᓂᓰᓐᓇᕐᓂᖓᓂ ᐊᕕᒃᑐᖅᓯᒪᓂᐅᑉ−ᐃᓗᐊᓂ ᐃᑲᔪᖅᓯᖅᑕᐅᓂᕐᒥ ᓄᓇᕕᖕᒥ ᐸᓖᓯᒃᑯᓐᓄᑦ.

ᑕᐃᒪᙵᓂ ᐃᑲᔪᖅᓱᐃᓂᐅᔪᖅ ᐱᒋᐊᓚᐅᕐᓂᖓᓂ ᐅᐱᕐᙶᖑᓚᐅᖅᑐᒥ, ᒧᐊᕆᓐ ᐅᖃᓚᐅᖅᐳᖅ, ᒪᕐᕉᖕᓂ ᐱᔨᑦᑎᕋᕐᓂᐅᔪᑦ ᐱᓕᕆᖃᑎᒌᒃᓯᒪᕗᑦ ᖃᔅᓯᒐᓚᖕᓄᑦ ᖃᐅᔨᓴᕐᓂᐅᔪᓂ ᐱᕋᔭᖕᓂᒃᑯᑦ ᓱᐴᖅᑐᒐᕐᓂ ᓱᓐᓂᕈᑕᐅᓲᓂ ᐊᒻᒪ ᐃᒥᐊᓗᖕᒥ ᐱᕋᔭᖕᓂᒃᑯᑦ ᓂᐅᕕᐊᒃᓴᖃᕐᓂᐅᔪᒥ ᖃᓪᓗᓈᑦ ᓄᓇᖓᓐᓂ ᓄᓇᕕᖕᒧᑦ.

ᒧᐊᕆᓐ ᐅᖃᓚᐅᖅᐳᖅ ᑲᓇᑕᒥ ᐸᓖᓯᒃᑯᑦ ᑐᖅᑯᐃᕝᕕᖓᓂ ᐊᕕᒃᑐᖅᓯᒪᓂᐅᔪᒥ ᐊᔪᕐᓇᙱᑎᑦᑎᓯᒪᕗᖅ ᓄᓇᕕᖕᒥ ᐸᓖᓯᒃᑯᓐᓂ ᓱᒃᑲᓕᓂᖅᓴᐅᔪᒥ ᐱᓕᒻᒪᒃᓴᐃᓂᕐᒥ ᐊᒻᒪ ᐃᓚᐅᖃᑕᐅᓂᐅᔪᓂ ᓄᓇᓕᖕᓂ ᐃᖅᑲᓇᐃᔭᖅᑎᑖᖑᔪᓂ.

ᐃᓚᖏᑦ ᓯᕗᓪᓕᖅᐹᖑᔪᓂ ᓄᓇᕕᖕᒥᐅᓂ ᐃᖅᑲᓇᐃᔭᖅᑎᑖᖑᔪᑦ ᐱᓕᕆᔪᓂ ᑕᖅᑭᓂ-6-ᓂ ᐱᓕᒻᒪᒃᓴᕐᓂᐅᔪᒥ ᑐᕌᒐᕆᔭᖓᓂ ᓂᕆᐅᒋᔭᐅᕗᑦ ᐃᖅᑲᓇᐃᔭᓕᕐᓂᐊᕐᓂᖏᓐᓂ ᐊᕕᒃᑐᖅᓯᒪᓂᐅᔪᒥ ᐊᕐᕌᓂᐅᓂᐊᖅᑐᒥ, ᐅᖃᓚᐅᖅᐳᖅ.