ᐸᓐᓂᕐᑑᕐᒥᐅᑕᖅ ᖃᖓᑕᓲᖅᑎ ᐊᖏᕐᕋᖓᓂ ᖃᖓᑕᓲᒃᑯᑦ ᒥᑦᑕᕆᐅᖅᐳᑦ

For the English version of this story, please see Pangnirtung pilot lands at home for the first time.

ᐅᓇ ᔫᓴᕝ ᐋᑯᓗᔾᔪᒃ ᒥᓐᓂᐊᓕᕋᒥ ᐸᓐᓂᕐᑑᒧ ᐊᒻᒪ ᖃᖓᑕᓲᓂ ᐃᖏᕐᕋᑎᓕᕐᒪᒍ ᖃᖓᑕᓲᒃᑯᕕᒃᒧᑦ ᑕᑯᓚᐅᕐᓯᒪᔪᖅ ᐃᒪᓐᓇ: ᐃᒡᓘ ᐃᓗᐊ ᐊᒻᒪ ᓯᓚᑖ ᐃᓄᖕᓂ ᑕᑖᓚᐅᕐᓯᒪᔪᖅ ᑖᔅᓱᒥᖓ ᑐᙵᓱᒃᑎᑦᑎᔭᖅᑐᖅᑐᓂᒃ.

“ᐅᖃᐅᔾᔭᐅᓯᒪᓚᐅᕐᑐᖓ ᐃᓄᖕᓂ ᖃᖓᑕᓲᒃᑯᕕᖕᒦᑦᑐᖃᕐᓂᐊᕐᓂᖓᓂ ᑭᓯᐊᓂᓕ ᖃᐅᔨᒪᓚᐅᙱᑦᑐᖓ ᖃᔅᓯᐅᓂᐊᕆᐊᒃᓴᖏᓐᓂᒃ ᑕᐃᑯᙵᖅᑐᑦ,” ᐋᑯᓗᔾᔪᒃ ᐅᖃᕐᑐᖅ.

“ᐅᓇ ᐊᑐᕈᒪᐃᓐᓇᖅᑕᕋ ᓱᓕᓕᓚᐅᕐᑐᖅ.”

ᐋᑯᓗᔾᔪᒃ, 24, ᖃᖓᑕᓲᖅᑎᐅᔪᖅ ᓇᓗᓇᐃᒃᑯᑎᖃᖅᖢᓂ ᓯᕗᓪᓕᖅ ᖃᖓᑕᓲᖅᑎ ᑲᓃᑎᐊᓐ ᓄᐊᑦᑯᓐᓂ. ᒪᐃ 18-ᒥ ᓯᕗᓪᓕᖅᐹᒥ ᐊᖏᕐᕋᖓᓄᑦ ᖃᖓᑕᓲᖅ ᐊᑐᖅᑕᖓ ᒥᓚᐅᕐᓯᒪᔪᖅ.

ᑲᓃᑎᐊᓐ ᓄᐊᑦ ᖁᕕᐊᓲᑎᖃᓚᐅᕐᓯᒪᖕᒪᑕ ᑖᔅᓱᒥᖓ ᐅᓪᓗᕐᒥ ᐊᒻᒪ ᕙᐃᔅᐳᒃᑯᑦ ᐊᒻᒪ ᐃᓐᔅᑕᒍᕌᒻᑯ ᓴᖅᑭᑕᐅᓪᓗᑎ ᑖᔅᓱᒪ ᐋᑯᓗᔾᔫᑉ ᖃᓄᐃᓕᓯᒪᓕᕐᑕᖓ.

ᑖᓐᓇ ᖃᖓᑕᓲᖅᑎᐅᓕᓵᖅᑐᖅ ᐅᖃᓚᐅᕐᑐᖅ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ ᖃᖓᑕᓲᖅᑎᐅᔪᒪᓕᓚᐅᕐᓯᒪᓂᕋᖅᖢᓂ ᑕᐅᑐᒃᐸᒃᖢᓂ ᖃᖓᑕᓲᓂᑦ ᑎᑭᑉᐸᒃᑐᓂᒃ ᐊᒻᒪ ᐊᐅᓪᓚᓕᕌᖓᑕ ᐸᓐᓂᕐᑑᒥ ᐱᕈᖅᓴᖅᑎᓪᓗᒍ.

“ᐅᓇ ᐊᔾᔨᖃᓚᐅᕐᓯᒪᙱᒻᒪᑦ,” ᐅᖃᕐᑐᖅ.

ᐋᑯᓗᔾᔪᒃ ᐊᔪᕈᓐᓃᖅᓴᑲᑕᓕᓚᐅᕐᓯᒪᔪᖅ ᖃᖓᑕᓲᖅᑎᐅᓂᕐᒥ ᓄᓇᖃᖅᑳᖅᑐᑦ ᐱᓕᕆᐊᒃᓴᓄᑦ ᐃᓕᓐᓂᐊᕐᕕᒃᒥ ᑕᓱᕌᓐᑐ, ᐋᓐᑎᐅᕆᐅᒥ 2018-ᖑᑎᓪᓗᒍ.

ᐊᒃᓱᕈᓐᓇᖃᑦᑕᓚᐅᕐᓯᒪᔪᖅ. ᐋᓐᓂᐊᕕᒡᔪᐊᕐᓇᒥ ᓄᕙᒡᔪᐊᕐᓇᖅ-19 ᐋᓐᓂᐊᕆᔭᐅᑲᑕᒃᑎᓪᓗᒍ ᐃᓕᓐᓂᐊᖏᓐᓇᓚᐅᕐᓯᒪᔪᖅ ᐊᒻᒪᓗ ᐃᓕᓐᓂᐊᖅᑕᖏ ᑭᖑᕙᕆᐊᖅᖢᑎᒃ ᐃᓕᓐᓂᐊᕐᕕᖓᑕ ᖃᖓᑕᓲᖃᕐᕕᖓ ᐃᑭᑎᓪᓗᒍ 2022-ᖑᑎᓪᓗᒍ, ᐃᓗᐊᓃᑦᑐᓪᓗ ᖃᖓᑕᓲᑦ ᐊᑐᕈᓐᓇᐃᓪᓕᓪᓗᑎᒃ.

ᐊᓂᒍᐃᓕᓚᐅᕐᓯᒪᔪᖅ 2023-ᒥ.

“ᑕᒪᑦᑕ ᐊᓂᒍᐃᕈᓘᔭᓚᐅᕐᓯᒪᔪᒍᑦ ᐊᒻᒪ ᐅᕙᑦᑎᓐᓂ ᐅᒃᐱᕆᓪᓗᑕ ᐱᓕᕆᔪᓐᓇᕐᓂᑦᑎᓐᓂ,” ᐋᑯᓗᔾᔪᒃ ᐅᖃᕐᑐᖅ.

ᒫᓐᓇᓕ, ᐅᖃᕐᑐᖅ ᐃᓱᒪᓂᕋᖅᖢᓂ ᐊᖓᔪᖅᑳᙳᕈᒪᓪᓗᓂ (ᑳᑉᑕᓐ) ᐊᒻᒪ ᖃᖓᑕᕙᒡᓗᓂ ᑲᓃᑎᐊᓐ ᓄᐊᑦᑯᑦ ᐳᐃᖕ 737 ᖃᖓᑕᓲᖓᓂ, ᐊᖏᓛᖅ ᖃᖓᑕᓲᖁᑎᒋᔭᐅᔪᖅ ᑖᒃᑯᓄᖓ.

ᐋᑯᓗᔾᔪᒃ ᐅᖃᓚᐅᕐᑐᖅ ᐃᓱᒪᓂᕋᕆᓪᓗᓂ ᐊᔪᕈᓐᓃᕈᑎᖏᑦ ᐃᑲᔪᖁᓇᔭᕐᓂᕋᖅᖢᓂᒋᑦ ᓄᓇᕗᒻᒥᐅᓂ ᐱᔪᒪᔭᖏᓐᓂᒃ ᐱᓇᓱᒃᑎᓪᓗᒋᑦ.

“ᐊᑐᕈᒪᔭᖏᓐᓂᒃ ᐊᑐᓕᕈᓐᓇᕐᒥᖕᒪᑕ, ᐊᒻᒪᓗ ᑕᐃᒪᑐᖅ ᖃᖓᑕᓲᑎᐅᓂᕐᒥ ᐱᓇᓱᖕᓂᐊᕆᕗᑦ,” ᐅᖃᕐᑐᖅ.