ᐸᓐᓂᖅᑑᒥ ᐳᕙᒡᓗᒋᐊᒃᓴᖏᓐᓂᒃ ᖃᐅᔨᓴᕐᓂᖅ ‘ᐊᓂᒍᑦᑎᐊᖅᑐᖅ’: ᐋᓐᓂᐊᖃᕐᓇᙱᑦᑐᓕᕆᔨ (CPHO)

For English version, see Community-wide TB screening a ‘success,’ says Nunavut chief public health officer

ᐸᓐᓂᕐᑑᒥᑦ ᐱᓇᓱᐊᕈᓯᕐᓂ ᖁᓕᓂᒃ ᓄᓇᓕᖕᓃᑦᑐᑦ ᐳᕙᒡᓗᖕᓂᕐᒧᑦ ᖃᐅᔨᓴᖅᑕᐅᔾᔪᑎᖏ ᓴᖅᑭᑎᑦᑎᓕᓚᐅᕐᑐᖅ 6-ᓂ ᐳᕙᒡᓗᒃᑐᖃᕐᓂᖓᓂᒃ ᐊᒻᒪ 55-ᓂ ᐳᕙᒃᑯᑦ ᐋᓐᓂᐊᖃᕐᓂᖏᓐᓂᒃ ᓄᖅᑲᖓᑐᐃᓐᓇᖅᑐᓂᒃ.

“ᐱᓕᕆᓂᐅᔪᖅ ᐊᓂᒍᑦᑎᐊᖅᑐᐊᓘᓚᐅᕐᑐᖅ ᑕᑯᓪᓗᒋᓪᓕ ᓈᒻᒪᙱᓕᐅᕈᑎᖃᖅᑐᓂᒃ ᖃᐅᔨᔾᔪᑎᐅᓂᖓᓂᒃ,” ᐅᖃᕐᑐᖅ ᓘᒃᑖᖅ ᓵᓐ ᕗᐊᑎᐊᓪ, ᓄᓇᕗᒥᑦ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐊᖓᔪᖅᑳᖓ.

“ᑕᐃᒪᓐᓇᓗ ᐳᕙᒡᓗᖕᓂ ᓄᖑᑉᐸᓪᓕᐊᓂᕐᓴᐅᓂᐊᖅᖢᓂ ᓄᓇᓕᖕᓂ.”

ᕗᐊᑎᐊᓪ ᐅᖃᓪᓚᖃᑎᖃᓚᐅᕐᓯᒪᔪᖅ ᑎᓯᐱᕆ 7-ᒥ ᓄᓇᑦᓯᐊᕐᒥ ᐱᕙᓪᓕᐊᔪᓂᒃ ᖃᐅᔨᓴᕈᑎᒋᔭᐅᔪᓂᒃ, ᐃᖅᑲᓇᐃᔮᖓᓄᑦ ᐅᑎᓵᕐᓯᒪᑎᓪᓗᒍ ᑕᖅᑭᓂ 6-ᓂ ᓄᖅᑲᖓᑲᐃᓐᓇᓚᐅᖅᖢᓂ.

ᐳᕙᒡᓗᖕᓇᖅ ᐋᓐᓂᐊᖑᖕᒪᑦ ᐱᐅᔪᓐᓃᕈᑎᐅᓪᓗᓂ ᑭᓯᐊᓂᓕ ᐃᓅᓕᓴᐅᑎᓄᑦ ᓄᖑᑎᑕᐅᔪᓐᓇᖅᖢᓂ. ᐊᒃᑐᐃᔪᓐᓇᕐᒪᑦ ᑎᒥᒥᒃ ᓇᐅᒃᑯᑐᐃᓐᓇᖅ, ᑭᓯᐊᓂᓕ ᐳᕙᒃᑯᑦ ᐱᑕᖃᓛᖑᕙᒃᖢᓂ, ᐊᒻᒪᓗ ᐊᐃᑦᑑᑎᐅᔪᓐᓇᖅᖢᓂ ᐊᓯᒧᑦ ᐳᕙᒡᓗᒃᑐᒥ ᖁᐃᕐᓱᑲᑕᖕᓂᒃᑯᑦ ᐅᕝᕙᓘᓐᓃᑦ ᑕᕆᐅᒃᓴᑲᑕᖕᓂᒃᑯᑦ.

ᐃᓄᖕᓃᑦᑐᓐᓇᕐᒥᔪᖅ ᐳᕙᒃᑯᑦ ᐋᓐᓂᐊᖃᖅᑐᓂᒃ ᑕᒪᐅᖓᒥᐊᑲᑕᙱᑦᑐᓂᒃ, ᑕᐃᒪᓐᓇ ᐋᓐᓂᐊᖃᕆᐊᒃᑲᖓᓂ ᓴᖅᑭᔮᑐᖃᙱᖢᓂ ᐊᒻᒪ ᐊᐃᑦᑑᑎᐅᔪᓐᓇᙱᖢᑎᒃ.

ᐳᕙᒡᓗᒃᑐᑦ ᐊᐃᑦᑑᑎᐅᔪᓐᓇᕐᓗᑎᒃ ᖁᐃᕐᓱᑲᑕᓕᕐᓇᖅᑐᖅ, ᑕᖃᖓᐃᓐᓇᖅᑰᔨᓐᓇᖅᖢᓂ, ᓴᒡᕕᒃᑯᑦ ᐋᓐᓂᐊᕐᓇᖅᖢᓂ, ᐆᑎᕐᓇᖅᐸᒃᖢᓂ, ᐅᕿᒡᓕᕙᓪᓕᐊᓗᑎᒃ ᐅᕝᕙᓘᓐᓃᑦ ᐅᓐᓄᐊᒃᑯᑦ ᐊᐅᒪᔮᑲᑕᖕᓇᖅᖢᓂ. ᑕᒪᒃᑯᐊᓕ ᐳᕙᒡᓗᖕᓇᐃᑦ ᑕᒪᐅᖓᒥᐊᑲᑕᙱᑦᑐᑦ ᑲᒪᒋᔭᐅᙱᑉᐸᑕ ᐊᐃᑦᑑᑎᐅᑲᑕᓕᕈᓐᓇᖅᑐᑦ.

ᐸᓐᓂᖅᑑᒥ ᕼᐋᒻᒪᓚᒃᑯᑦ ᑎᑎᕋᕐᕕᖓ ᐊᑐᖅᑕᐅᓚᐅᕐᑐᖅ ᐱᓇᓱᐊᕈᓯᕐᓂ ᖁᓕᓂᒃ ᐳᕙᒡᓗᒃᓂᕐᒧᑦ ᖃᐅᔨᓴᖃᑕᒃᑎᓪᓗᒋ ᑖᓐᓇᓗ ᐃᓱᓕᓚᐅᖅᖢᓂ ᑎᓯᐱᕆ 2-ᒥ. (ᐊᔾᔨᓕᐅᕆᔨ ᑰᕆ ᓚᐅᕌᒃ)

ᓄᓇᕗᒥᑦ ᒐᕙᒪᒃᑯᑦ ᑐᓴᖅᑎᑦᑎᓚᐅᕐᓯᒪᔪᑦ ᐳᕙᒡᓗᑲᑕᒃᑐᓂᒃ ᐸᓐᓂᕐᑑᒥᑦ ᓄᕕᐱᕆ 2021-ᖑᑎᓪᓗᒍ. ᐋᓐᓂᐊᖃᕐᓇᙱᑦᑐᓕᕆᔨᐅᔪᑦ ᓇᓂᓯᓚᐅᕐᑐᑦ ᐳᕙᒡᓗᒃᑐᓂᒃ 46-ᓂ ᐃᓄᖕᓂ ᐊᒻᒪᓗ 256-ᓂ ᐳᕙᒡᓗᒃᑐᓂ ᓄᖃᖓᔪᓂᒃ ᐱᒋᐊᓕᓵᕐᓯᒪᓂᑯᓂᒃ ᑕᕝᕙᓂᑦᑕᐃᓐᓇᖅ ᐊᕐᕌᒍᒥ, ᑕᐃᒪᓐᓇ ᖃᐅᔨᓴᖅᑕᐅᒃᑲᓐᓂᕈᑎᓂᒃ ᖃᐅᔨᓚᐅᕐᑐᑦ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓂᙶᖅᑐᓂᒃ ᑎᓯᐱᕆ 8-ᖑᑎᓪᓗᒍ.

ᕗᐊᑎᐊᓪ ᐅᖃᓚᐅᕐᑐᖅ 1,128 ᐃᓄᐃᑦ ᐅᐸᓚᐅᕐᓂᖏᓐᓂᒃ ᓄᓇᓕᖕᓃᑦᑐᓕᒫᓂᒃ ᖃᐅᔨᓴᑲᑕᒃᑎᓪᓗᒋ ᑕᐃᒪᓕ 94 ᐳᓴᓐᑎᐅᓚᐅᕐᑐᖅ ᖃᐅᔨᓴᖅᑕᐅᔪᒪᓯᒪᔪᓂᒃ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓄᑦ.  ᑎᓯᐱᕆ 2 ᑭᖑᓪᓕᖅᐹᕆᓚᐅᕐᑕᖓᑦ ᐱᓕᕆᐊᖃᖅᖢᑎᒃ ᑖᔅᓱᒥᖓ.

ᑲᑎᑕᐅᕙᓪᓕᐊᔪᑦ ᖃᐅᔨᓴᖅᑕᐅᔾᔪᑎᓂ ᓄᓇᓕᖕᓂᙶᖅᑐᓂ ᐊᑐᖅᑕᐅᓂᐊᖅᑐᑦ ᖃᓄᑎᒋ ᑲᒪᒋᔭᐅᔾᔪᑎᕕᓃᑦ ᐊᒃᑐᐃᓂᖃᕐᓯᒪᔭᕆᐊᒃᓴᖏᓐᓂᒃ ᐊᒻᒪᓗ ᓯᕗᓂᒃᓴᒧᑦ ᐃᓱᒪᓕᐅᕆᔾᔪᑎᐅᔪᓐᓇᕐᓗᑎᒃ, ᕗᐊᑦᑎᐊᓪ ᐅᖃᕐᑐᖅ.

ᑕᒪᓐᓇ ᐱᓕᕆᐊᖑᓂᖓ ᐊᑭᖃᓚᐅᕐᑐᖅ ᒫᙵᑦ $2.5 ᒥᓕᐊᓐ ᑖᓚᓂ ᒪᐅᖓ $3.2 ᒥᓕᐊᓐ ᑖᓚᓄ, ᕗᐊᑦᑎᐊᓪ ᐅᖃᕐᑐᖅ, ᐅᖃᒃᑲᓐᓂᖅᖢᓂ ᐊᑭᓕᐅᑎᓪᓚᕆᐅᔭᕆᐊᓖᑦ ᓱᓕ ᖃᐅᔨᔭᐅᓚᐅᙱᓐᓂᖏᓐᓂᒃ. ᓄᓇᕗᑦ ᑐᙵᕕᒃᑯᑦ ᐃᑲᔫᑎᖃᓚᐅᕐᑐᑦ $2.5 ᒥᓕᐊᓐ ᑖᓚᓂ, ᐅᖃᓚᐅᕐᑐᖅ ᐅᖃᕐᑎᒋᔭᐅᔪᖅ ᑭᐊᕕᓐ ᑲᑉᓗᑦᓯᐊᒃ.

“ᑕᒪᓐᓇ ᑐᖓᐅᑦᑎᓯᒪᒃᐸᑦ ᐅᑯᓇᙵᑦ ᐊᑭᓕᖅᑕᐅᓇᔭᕐᑐᖅ ᓄᓇᕗᒥᑦ ᒐᕙᒪᒃᑯᓐᓄᑦ ᐅᕝᕙᓘᓐᓃᑦ ᓄᓇᕗᑦ ᑐᙵᕕᒃᑯᓐᓄᑦ,” ᕗᐊᑦᓯᐊᓪ ᐅᖃᕐᑐᖅ.

ᓄᓇᕗᒥᑦ ᒐᕙᒪᒃᑯᑦ ᑐᓴᖅᑎᑦᑎᓚᐅᕐᒥᔪᑦ ᐳᕙᒡᓗᒃᑐᖃᖅᑐᓂᒃ ᒪᕐᕉᖕᓂ ᓄᓇᓖᖕᓂ — ᒥᑦᑎᒪᑕᓕᒃᒥ ᐊᒻᒪ ᓈᐅᔮᓂ.

ᖃᐅᔨᓴᑲᑕᖕᓂᖅ ᐃᓱᓕᒃᑲᓗᐊᕐᒪᑦ ᓱᓕ ᐋᓐᓂᐊᕕᒃᒥ ᖃᐅᔨᓴᖃᑦᑕᖅᑐᑦ ᐊᐃᑦᑐᖅᑕᐅᑐᐃᓐᓇᕆᐊᖃᕋᓱᒋᔭᖏᓐᓂᒃ ᐅᕝᕙᓘᓐᓃᑦ ᐋᓐᓂᐊᑲᑕᓕᕐᐸᑕ ᐳᕙᒡᓗᒃᑐᓄ ᐋᓐᓂᐊᕆᔭᐅᔭᑦᑐᓂᒃ.

ᐸᓐᓂᕐᑑᖅ ᑎᓴᒪᒋᔭᐅᔪᖅ ᓄᓇᓕᖕᓂ ᐊᕐᕌᒍᑦ ᑕᓪᓕᒪᑦ ᐃᓗᐊᓂ ᓄᓇᖃᖅᑐᓂᒃ ᖃᐅᔨᓴᖅᑕᐅᔪᓂᒃ ᐅᑯᐊ ᑭᖑᓂᑦᑎᐊᖓᒍᑦ ᑎᑭᕋᕐᔪᐊᑉ, ᕿᑭᖅᑕᖅᔪᐊᖅ ᐊᒻᒪᓗ ᑭᙵᐃᑦ.

ᐳᕙᒡᓗᒃᑐᑦ ᐅᓄᕐᓂᖏᑦ ᑲᓇᑕᐅᑉ ᐅᐊᖕᓇᖓᓂ 100-ᖏᕐᓱᖅᖢᑎᒃ ᐅᓄᕐᓂᕐᓴᐅᔪᑦ ᐊᓯᖏᓐᓂᓪᓕ, ᐅᓇ ᓘᒃᑖᖅ ᒪᐃᑯᓪ ᐹᑐᓴᓐ, ᐊᖓᔪᖅᑳᕆᔭᐅᓚᐅᕐᓯᒪᔪᖅ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓄᑦ, ᐅᖃᓪᓚᖃᑎᖃᖅᑎᓪᓗᒍ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ ᓄᓇᓕᖕᓂ ᖃᐅᔨᓴᕈᑎᒋᓚᐅᕐᓯᒪᔭᖏᓐᓂᒃ ᓯᑎᐱᕆᐅᑎᓪᓗᒍ.

ᐅᑭᐅᕐᑕᖅᑐᕐᒥ ᐋᓐᓂᐊᖃᕐᑐᑦ ᒫᓂ 200-ᓂ 300-ᓄ ᐋᓐᓂᐊᖃᖅᑐᓂᒃ ᐅᑯᓇᙵᑦ 100,000 ᐃᓄᖕᓂ. ᐅᓇ ᐅᓄᕐᓂᕆᔭᐅᔪᖅ ᑲᓇᑕᓕᒫᒥ ᐅᓄᕐᓂᕆᔭᖏᑦᑎᒍᑦ 100,000-ᓂ ᐱᖓᓲᓂᖏᓐᓂᒃ.

ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᖃᐅᔨᓴᓂᕐᒥᒃ ᐱᓕᕆᐊᖃᓚᐅᕐᑐᑦ ᐱᓕᕆᖃᑎᖃᖅᖢᑎᒃ ᓄᓇᕗᑦ ᑐᙵᕕᒃᑯᓐᓂᒃ ᐊᒻᒪᓗ ᓄᓇᓖᑦ ᕼᐋᒻᒪᓚᒃᑯᖏᓐᓂᒃ.

ᐃᑲᔪᖅᑕᐅᒃᑲᓐᓂᓚᐅᕐᑐᑦ ᓄᓇᖃᖅᑳᖅᑐᓕᕆᔨᒃᑯᓐᓄᑦ ᐱᔨᑦᑎᕋᐅᑎᓕᕆᔨᓂᒃ ᑲᓇᑕᒥ ᐊᒻᒪᓗ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐱᓕᕆᐊᖃᖅᑐᓂᒃ ᑲᓇᑕᒥ.

 — ᐃᓚᖏᑦ ᑰᕆ ᓚᐅᕌᒃ ᑎᑎᕋᕐᓯᒪᔭᖏᓐᓂ