ᐸᖕᓂᖅᑑᒥ ᐳᕙᒡᓗᖕᓂᕐᒧᑦ ᐅᐸᒡᕕᒃᓴᖅ ᐱᒻᒪᕆᐅᓪᓗᓂ ᐱᕕᒃᓴᐅᕗᖅ ᖃᐅᔨᓴᖅᑕᐅᓂᕐᒧᑦ: ᐋᓐᓂᐊᖃᕐᓇᙱᑦᑐᓕᕆᔨ

ᖃᐅᔨᓴᖅᑕᐅᓂᕐᒧᑦ ᐅᐸᒡᕕᒃᓴᖅ ᐱᓕᕆᐊᖑᓂᐊᖅᐳᖅ ᓯᑎᐱᕆᒥ ᓄᕕᐱᕆᒧᑦ ᕼᐋᒻᓚᐅᔪᒥ

ᓄᓇᕗᒻᒥ ᐃᓄᓕᒫᓄᑦ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐊᖓᔪᖅᑳᖓ ᓘᒃᑖᖅ ᓵᓐ ᐅᐊᑦᔅᑎᐅᓪ ᐊᔭᐅᕆᕗᖅ ᐃᓄᖕᓂ ᐸᖕᓂᖅᑑᒥ ᐃᓚᐅᖃᑕᐅᓂᖏᓐᓂ ᑎᑭᑉᐸᓪᓕᐊᔪᒥ ᐳᕙᒡᓗᖕᓂᖅ ᖃᐅᔨᓴᖅᑕᐅᓂᖏᓐᓂ ᐅᐸᒡᕕᒃᓴᒥ ᓯᑎᐱᕆᒥ ᐃᑲᔪᕐᓂᕐᒧᑦ ᑭᐅᓂᕐᒥ ᐅᓄᕐᓂᐅᔪᓂ ᐱᖃᖅᑐᓂ ᐊᒻᒪ ᓴᓂᖕᓂᕋᖅᑕᐅᔪᒥ ᖃᓄᐃᓐᓂᐅᔪᓂ ᓄᓇᓕᖕᓂ. (ᑐᓴᒐᒃᓴᓕᕆᔨᒃᑯᑦ ᐊᔾᔨᖁᑎᖓ)

By ᒫᑕᓕᓐ ᕼᐊᐅᕕᑦᒧᑦ

For English version, see Pangnirtung clinic important chance to get screened: health officer

ᐳᕙᒡᓗᖕᓂᖅ ᖃᐅᔨᓴᖅᑕᐅᓂᐅᔪᒥ ᑐᑭᓯᓇᑦᑎᐊᖅᑐᒥ ᐱᓕᕆᓂᐅᕗᖅ ᐊᒻᒪ ᓄᓇᕗᒻᒥ ᐃᓄᓕᒫᓄᑦ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐊᖓᔪᖅᑳᖓ ᓂᕆᐅᒃᐳᖅ ᐸᖕᓂᖅᑑᕐᒥᐅᑕᑦ− ᐊᐃᑦᑐᐃᓂᐅᔪᒥ ᑲᔪᓰᓐᓇᖅᓯᒪᔪᒥ ᑕᖅᑭᓄᑦ 19−ᓄᑦ— ᖃᐅᔨᓴᖅᑕᐅᓂᐊᖅᐳᑦ ᑎᑭᑉᐸᓪᓕᐊᔪᒥ ᐅᐸᒃᑕᐅᕝᕕᒃᓴᓕᐊᖑᔪᒥ.

“ᐳᕙᒡᓗᖕᓂᖅ ᓄᓇᕗᒻᒥ ᐋᓐᓂᐊᕈᑕᐅᖏᓐᓇᓲᖅ, ᐊᒻᒪ ᐊᑐᖅᖢᓂ ᐅᖃᐅᓯᕐᒥ ᐅᖃᖅᐳᖓ ᓇᒥᕈᓘᔮᕐᓂᖓᓂ,” ᐅᖃᓚᐅᖅᐳᖅ ᓘᒃᑖᖅ ᓵᓐ ᐅᐊᑦᔅᑎᐅᓪ.

ᐳᕙᒡᓗᖕᓂᕐᒥ ᐅᓄᕐᓂᐅᔪᓂ ᓄᓇᕗᒻᒥ ᐅᕙᙶᕈᓐᓇᖅᐳᑦ 70−ᒥ 300−ᖏᖅᓱᕐᓗᓂ ᖁᑦᑎᖕᓂᖅᓴᐅᔪᓐᓇᖅᐳᑦ ᐊᒥᐊᒃᑯᖓᓂ ᑲᓇᑕᒥ, ᐅᖃᓚᐅᖅᐳᖅ.

ᐊᐃᑦᑐᐃᓂᐅᔪᒥ ᐅᖃᐅᓯᐅᓚᐅᖅᐳᖅ ᐸᖕᓂᖅᑑᒥ ᓄᕕᐱᕆ 2021−ᒥ ᐊᒻᒪ ᑕᐃᒪᙵᓂ ᐅᓄᕐᓂᐅᔪᓂ ᐱᖃᖅᑐᓂ ᐱᕈᖅᐸᓪᓕᐊᖏᓐᓇᖅᓯᒪᕗᖅ.

ᓄᓇᕗᒻᒥ ᐋᓐᓂᐊᖃᕐᓇᙱᑦᑐᓕᖕᔨᒃᑯᑦ ᐅᖃᐅᓯᖃᖅᓯᒪᕗᑦ ᐊᐃᑦᑐᐃᓂᐅᔪᒥ ᑕᒪᑐᒪᓂ ᐊᕐᕌᒎᔪᒥ ᒥᑦᑎᒪᑕᓕᖕᒥ ᐊᒻᒪ ᓇᐅᔮᓂ.

ᐅᐸᒃᑕᐅᕕᒃᓴᖅ ᐸᖕᓂᖅᑑᒥ ᐋᖅᑭᒃᑕᐅᓯᒪᕗᖅ ᐊᐅᓚᓂᐊᕐᓂᖓᓂ ᓯᑎᐱᕆᒥ ᑕᐃᑯᖓ ᓄᕕᐱᕆᒧᑦ ᓄᓇᕗᒻᒥ ᒐᕙᒪᒃᑯᑦ ᐅᖃᐅᓯᖃᓚᐅᖅᐳᑦ ᖃᖓᒃᑲᓐᓂᐅᔪᒥ ᑕᖅᑭᐅᔪᒥ.

ᐅᐊᑦᔅᑎᐅᓪ ᐅᖃᓚᐅᖅᐳᖅ ᐳᕙᒡᓗᖕᓂᖅ ᖃᐅᔨᓴᖅᑕᐅᓂᖅ ᑐᑭᓯᓇᑦᑎᐊᖅᑐᒥ ᐱᓕᕆᓂᐅᕗᖅ.

ᐃᓄᐃᑦ ᐃᓯᕈᑎᒃ ᐅᐸᒃᑕᐅᕕᖕᒧᑦ, ᒪᓕᒃᑐᒥ ᐃᓅᓕᓴᖅᑕᐅᕙᓚᐅᕐᓂᖏᓐᓂ ᐊᑐᖃᑦᑕᖅᑕᖏᓐᓂ, ᑐᓂᔭᐅᓂᐊᖅᐳᑦ ᐅᕕᓂᒃᑯᑦ ᖃᐅᔨᓴᖅᑕᐅᓂᐅᔪᒥ ᐅᕝᕙᓘᓐᓃᑦ ᐊᐅᖏᖅᑕᐅᓂᐅᔪᒥ ᐳᕙᒡᓗᖕᓂᕐᒧᑦ.

ᐅᑎᕆᐊᖃᖅᐳᑦ ᖃᓄᐃᓕᖓᓂᖏᓐᓂ ᐃᑲᕐᕋᓂ 48−ᓂ 72−ᓄᑦ ᑭᖑᓂᐊᒍᑦ ᐊᒻᒪ ᑐᓂᔭᐅᑐᐃᓐᓇᕆᐊᖃᖅᐳᑦ ᑐᓂᕐᔪᖓᒍᑦ ᐊᔾᔨᓕᐅᖅᑕᐅᓂᕐᒥ.

“ᐊᒃᓱᕈᖅᖢᑕ ᕿᓂᖅᐳᒍᑦ ᑕᑯᒃᓴᐅᓂᐅᔪᒥ ᓇᓕᐊᑐᐃᓐᓇᒥᒃ ᓯᓂᖕᓂᕋᖅᑕᐅᔪᒥ ᐳᕙᒡᓗᖕᓂᕐᒥ ᐅᕝᕙᓘᓐᓃᑦ ᐱᖃᕐᓂᖓᓂ ᐋᓐᓂᐊᕐᓇᐅᔪᒥ,” ᐅᐊᑦᔅᑎᐅᓪ ᐅᖃᓚᐅᖅᐳᖅ.

ᐃᓄᐃᑦ ᐱᖃᕐᓂᕋᖅᑕᐅᔪᓂ ᓇᓗᓇᐃᖅᑕᐅᔪᓂ ᐊᑐᐃᓐᓇᖃᖅᑎᑕᐅᓂᐊᖅᐳᑦ ᐃᓅᓕᓴᖅᑕᐅᓂᐅᔪᒥ ᐋᖅᑭᒃᓱᖅᓯᒪᔪᒥ ᖃᓄᐃᓐᓂᖏᓐᓄᑦ, ᐊᒻᒪ ᖃᐅᔨᒋᐊᖅᑕᐅᒃᑲᓐᓂᕐᔪᐊᕐᓂᖃᕐᓂᐊᖅᐳᑦ ᓄᓇᓕᖕᓂ ᐊᑕᐅᓯᕐᒧᑦ ᒪᕐᕈᖕᓄᓪᓘᓐᓃᑦ ᐊᕐᕌᒍᓄᑦ ᑭᖑᓂᐊᒍᑦ.

ᐃᓛᓐᓂᒃᑯᑦ ᑐᓂᕐᔪᖓᒍᑦ ᐊᔾᔨᓕᐅᖅᑕᐅᓂᖃᓚᐅᖅᑎᓪᓗᒍ ᐅᐸᒃᓯᒪᔪᒥ, ᖃᐅᔨᓴᖅᑕᐅᓂᐅᒐᔪᒃᑐᒥ ᕿᓂᕐᓂᐅᔪᒥ ᐳᕙᒡᓗᖕᓂᖅ ᐳᕙᖏᓐᓂ, ᓘᒃᑖᑦ ᓇᓗᓇᐃᖅᓯᔪᓐᓇᕐᓂᐊᖅᐳᑦ ᐱᑕᖃᑐᐃᓐᓇᕆᐊᓕᖕᓂ ᐊᑲᐅᙱᓕᐅᕈᑕᐅᔪᓂ ᐳᕙᖕᓂ.

ᐳᕙᒡᓗᖕᓂᖅ ᐱᑎᑕᐅᕙᒃᐳᖅ ᐊᔾᔨᐅᙱᑦᑐᒥ ᓱᒃᑲᐃᑦᑐᒥ−ᐱᕈᖅᐸᓪᓕᐊᔪᒥ ᖁᐱᕐᕈᐊᕐᔪᐃᑦ ᐊᒃᑐᐃᔪᓐᓇᖅᑐᒥ ᓇᓕᐊᑐᐃᓐᓇᒥ ᑎᒥᒥᑦ, ᐃᓚᖃᖅᑐᒥ ᐳᕙᖕᓂ, ᐊᕿᐊᕈᕐᒥ, ᐆᒻᒪᑎᒥᒃ ᐊᒻᒪ ᖃᕋᓴᐅᑉ ᑲᕙᓯᖓᓂ.

ᐱᑎᑦᑎᔪᓐᓇᖅᐳᖅ ᐃᒻᒪᒃᓯᒪᓂᐅᔪᓂ, ᐊᖕᒪᖅᑎᕆᓂᐅᔪᓂ ᑎᒥᒥᑦ, ᐊᒻᒪ ᐊᒃᑐᐃᓂᖃᕈᓐᓇᖅᐳᖅ ᓇᒡᒍᐊᓂ.

ᒪᕐᕉᔪᓂ ᖃᓄᐃᑦᑑᓂᐅᔪᓂ ᐳᕙᒡᓗᖕᓂᕐᒧᑦ ᓱᔪᑦᑐᕐᓂ: ᐊᑕᐅᓯᖅ ᐱᖃᕐᓂᐅᔪᒥ ᐋᓐᓂᐊᕐᓇᒥ, ᐃᓅᓕᓴᖅᑕᐅᒐᔪᒃᑐᖅ ᑲᑎᙵᓂᐅᔪᒥ ᖃᔅᓯᒐᓚᖕᓂ ᐊᔾᔨᒌᙱᑦᑐᓂ ᐃᓅᓕᓴᐅᑎᓂ ᑐᓂᔭᐅᕙᒃᑐᓂ ᑕᖅᑭᓄᑦ 6−ᓂ 12−ᓄᑦ ᓇᐅᑦᑎᖅᓱᖅᑕᐅᓪᓗᓂ ᖃᓄᐃᓐᓂᐅᔪᒥ.

ᑭᓯᐊᓂ, ᑕᒪᕐᒥᒐᓚᐃᑦ ᐃᓗᖕᓂ ᐊᐃᑦᑐᖅᑕᐅᓯᒪᔪᓂ ᐱᖃᖅᐳᑦ ᑕᐃᔭᐅᔪᒥ “ᓯᓂᒃᑐᒥ ᐳᕙᒡᓗᖕᓂᕐᒥ” ᐅᕝᕙᓘᓐᓃᑦ ᒥᓂᖕᓂᕋᖅᑕᐅᔪᒥ ᐳᕙᒡᓗᖕᓂᕐᒥ ᓱᔪᑦᑐᕐᒥ.

“ᐊᐃᑦᑐᐃᓲᖑᙱᑦᑐᖅ,” ᐅᐊᑦᔅᑎᐅᓪ ᐅᖃᓚᐅᖅᐳᖅ ᐃᓄᖕᓂ ᓯᓂᖕᓂᕋᖅᑕᐅᔪᒥ ᐳᕙᒡᓗᖕᓂᖃᖅᑐᓂ. “ᖃᓄᐃᙱᑦᑑᔮᖅᐳᑦ, ᐋᓐᓂᐊᕐᓂᐅᑉ ᓇᓗᓇᐃᖅᑕᐅᒍᑎᖓᓂ ᐱᑕᖃᙱᓚᑦ, ᑕᐃᒫᒃ ᐆᑕᕐᓇᕐᓇᑎᒃ, ᐊᐅᒃᑲᓂᖃᕐᓇᑎᒃ ᐊᒻᒪ ᑕᐃᒪᓐᓇᒐᓚᒃ.”

ᐱᑕᖃᐃᓐᓇᕐᓂᖓᓂ ᓯᓂᖕᓂᕋᖅᑕᐅᔪᒥ ᐳᕙᒡᓗᖕᓂᕐᒥ ᓱᔪᑦᑐᕐᓂ ᓄᓇᓕᖕᓂ ᖃᐅᔨᓴᖅᑕᐅᓂᐅᔪᓂ ᐅᐸᒃᑕᐅᕕᒃᓴᓂ ᐃᑲᔪᕐᓂᖃᓗᐊᖅᐳᖅ ᓯᕗᓃᑦᑐᓐᓇᕐᓂᖏᓐᓂ ᐊᐃᑦᑐᐃᓂᐅᔪᒥ.

ᐋᓐᓂᐊᕐᓂᐅᑉ ᓇᓗᓇᐃᖅᑕᐅᒍᑎᖓ ᐳᕙᒡᓗᖕᓂᕐᒥ ᐊᔾᔨᒌᙱᑦᑐᓐᓇᖅᐳᖅ ᓇᒥ ᑎᒥᒥ ᓱᔪᓐᓂᐅᔪᒥ, ᐅᐊᑦᔅᑎᐅᓪ ᐅᖃᓚᐅᖅᐳᖅ, ᐊᒻᒪ ᐃᓛᓐᓂᒃᑯᑦ ᖃᔅᓯᒐᓚᖕᓂ ᐅᓂᒃᓯᒪᔪᓐᓇᖅᐳᖅ ᐊᑕᐅᑦᑎᒃᑯᑦ.

ᑕᐃᒪᐃᒐᔪᒃᑐᓂ ᐋᓐᓂᐊᕐᓂᐅᑉ ᓇᓗᓇᐃᖅᑕᐅᒍᑎᖓᓂ ᓱᔪᑦᑐᕐᓂ ᐃᓚᖃᖅᐳᖅ ᐅᓐᓄᐊᒃᑯᑦ ᐊᐅᒃᑲᓐᓂᖓᓂᐅᔪᒥ, ᓂᕆᔪᒪᑦᑎᐊᙱᓐᓂᖅ ᐊᒻᒪ ᓴᓗᒃᑎᑉᐸᓪᓕᐊᓂᐅᔪᒥ, ᐅᖃᓚᐅᖅᐳᖅ.

ᓱᔪᑦᑐᕐᓂ ᐳᕙᖕᓃᒃᑯᓂ, ᐊᐅᖕᒥ ᖁᐃᖅᓱᕐᓂᖃᕈᓐᓇᖅᐳᑦ, ᐊᒻᒪᓗᑦᑕᐅᖅ ᐊᓂᕐᓂᑭᒃᓴᕐᓂᕐᒥ ᐊᒻᒪ ᑐᓂᕐᔪᒥ ᐋᓐᓂᐊᕐᓂᐅᔪᒥ. ᐊᕿᐊᕈᕐᒦᑉᐸᑦ, ᐃᓄᐃᑦ ᐊᑐᑐᑐᐃᓐᓇᕆᐊᖃᖅᐳᑦ ᒥᕆᐊᙳᓂᕐᒥ ᐅᕝᕙᓘᓐᓃᑦ ᓈᙳᓂᕐᒥ, ᓱᔪᑦᑐᕐᓂ ᖃᕋᓴᐅᑉ ᑲᕙᓯᖓᓂ ᓴᖅᑭᑦᑐᓐᓇᖅᐳᖅ ᓂᐊᖁᙳᓂᐅᔪᒥ, ᓇᓗᓕᖅᓯᒪᓂᕐᒥ, ᒥᕆᐊᙳᓂᕐᒥ ᐅᕝᕙᓘᓐᓃᑦ ᒥᕆᐊᖅᓴᑲᑕᖕᓂᐅᔪᒥ.

ᖃᐅᔨᓴᖅᑕᐅᓂᐅᔪᒥ ᐅᐸᒡᕕᒃᓴᖅ ᐱᓕᕆᐊᖑᓂᐊᖅᐳᖅ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓂ ᐱᓕᕆᖃᑎᖃᕐᓗᑎᒃ ᓄᓇᕗᒻᒥ ᑐᙵᕕᒃᑯᓐᓂ, ᐃᑲᔪᖅᓱᐃᓂᐊᖅᑐᓂ ᑮᓇᐅᔭᖃᖅᑎᑦᑎᓂᕐᒥ ᐊᒻᒪ ᐃᓄᖕᓄᑦ ᐃᓕᖅᑯᓯᖓᓂ ᐱᔪᓐᓇᑦᑎᐊᕐᓂᕐᒥ ᐱᓕᒻᒪᒃᓴᓂᐅᔪᒥ.

ᐳᕙᒡᓗᖕᓂᖅ ᐊᐅᓚᓂᖃᖅᐳᖅ ᑭᓱᑐᐃᓐᓇᓂ ᓲᕐᓗ ᐸᖕᒥᐅᓗᐊᖅᑐᓂ ᐊᒻᒪ ᐱᐅᙱᓗᐊᖅᑐᓂ ᐃᓘᖃᖅᑎᑕᐅᓂᐅᔪᒥ, ᐊᓂᐊᑎᑦᑎᕙᓪᓕᐊᓂᐅᔪᒥ ᐱᑕᖃᙱᓗᐊᕐᓂᖓᓂ, ᐱᑕᖃᙱᓗᐊᕐᓂᖓᓂ ᐊᑐᐃᓐᓇᖃᕐᓂᕐᒥ ᓂᕿᑦᑎᐊᕙᖕᓂ, ᓂᕿᑦᑎᐊᕙᓕᕆᓂᕐᒥ ᖃᓄᐃᓕᖓᓂᖃᙱᓐᓂᐅᔪᒥ, ᐊᒻᒪ ᐊᓯᖏᓐᓂ ᒪᒥᔪᐃᑦᑐᓂ ᐋᓐᓂᐊᕐᓇᐅᔪᓂ.

ᐅᑯᐊ ᐱᔾᔪᑕᐅᔪᑦ ᐱᓕᕆᑎᓪᓗᒋᑦ, “ᓱᖏᐅᓐᓇᖅᐳᖅ ᑕᑯᓂᕐᒥ ᐳᕙᒡᓗᖕᓂᖅ ᑕᑯᒃᓴᐅᓕᕐᓂᖓᓂ, ᐊᒻᒪ ᓱᓕᕗᖅ ᓇᒥᑐᐃᓐᓇᖅ ᓄᓇᕐᔪᐊᓕᒫᒥ,” ᐅᐊᑦᔅᑎᐅᓪ ᐅᖃᓚᐅᖅᐳᖅ.

ᐅᐊᑦᔅᑎᐅᓪ ᐅᖃᕆᐊᓪᓚᓚᐅᖅᐳᖅ ᐳᕙᒡᓗᖕᓂᖅ ᐃᓅᓕᓴᖅᑕᐅᔪᓐᓇᑦᑎᐊᖅᖢᓂ ᐋᓐᓂᐊᕐᓂᐅᓂᖓᓂ.

“ᐅᕙᒍᑦ, ᓲᖃᐃᒻᒪ, ᐅᔾᔨᕈᓱᕕᒡᔪᐊᖅᐳᒍᑦ ᑕᐃᒪᐃᑉᐸᓚᐅᕐᓂᖓᓂ ᐃᓄᐃᑦ ᐱᔭᐅᓪᓗᑎᒃ ᓄᓇᓕᖕᓂ ᑕᐃᔅᓱᒪᓂᒃᑲᓐᓂᖅ ᐊᒻᒪ ᐱᑎᑦᑎᓯᒪᕗᖅ ᐱᓂᕐᓗᒡᔪᐊᕐᓂᐅᔪᒥ ᐃᓄᒋᐊᖑᔪᓂ,” ᐅᐊᑦᔅᑎᐅᓪ ᐅᖃᓚᐅᖅᐳᖅ.

“ᑕᒪᒃᑭᒐᓚᒃ ᑲᑉᐱᐊᓱᖕᓂᐅᔪᒥ ᐋᓐᓂᐊᕐᓇᒥ, ᐊᒥᓱᓂ ᐃᓱᒪᒋᔭᐅᓂᕐᓘᑕᐅᓂᖓᓂ ᐱᖃᕐᓂᕐᒥ. ᐊᐃᑦᑖᖑᒐᓗᐊᖅ.”

Share This Story

(0) Comments