ᑎᒍᔭᐅᓯᒪᕝᕕᒃᒥᑦ ᓄᒫᓇᕈᑏᑦ: ᓄᓇᕗᒥᑦ ᑎᒍᔭᐅᕙᒃᑐᑦ ᐅᓄᕐᓂᖏᑦ ᐅᓄᕐᓂᕐᓴᐅᓕᓚᐅᕐᑐᑦ ᐊᕐᕌᓂ

ᑕᒪᐅᓇᑦᑕᐃᓐᓇᖅ, ᑎᒍᔭᐅᕙᒃᑐᑦ ᑕᐅᑐᒃᖢᒋᑦ ᐃᓐᓇᐃᑦ ᓄᓇᕗᒥᑦ—621 ᐅᑯᓇᙵᑦ 100,000—ᖁᑦᑎᖕᓂᕐᓴᐅᓯᒪᕗᖅ ᐊᓯᓕᒫᖏᓐᓂᒃ ᐊᕕᒃᑐᖅᓯᒪᓂᒃᑯᑦ ᐳᕌᕕᓐᓯᓂᒃ ᐊᒻᒪ ᑎᐅᕆᑑᕆᓂᒃ, ᐅᑯᑎᒎᓇᕐᓕ ᐅᓂᒃᑳᓕᐊᖑᓂᑯᑎᒍᑦ ᓴᕿᑕᐅᔪᓂᒃ ᒪᐃ 9-ᒥ ᐅᑯᓇᙵᑦ ᓇᐃᓴᐃᔨᐅᕙᒃᑐᓂᒃ ᑲᓇᑕᒥᑦ ᒪᓕᒐᓕᕆᓂᕐᒨᖓᔪᓂᒃ (StatCan’s Canadian Centre for Justice Statistics).

ᑎᒍᔭᐅᔪᑦ ᐅᓄᕐᓂᖏᑦ ᓄᓇᑦᓯᐊᕐᒥ ᑕᐃᒪᓐᓇᑲᓴᒃ ᖁᑦᑎᖕᓂᖃᓚᐅᕐᑐᑦ, ᐃᒪᓐᓇ 527 ᐅᑯᓇᙵᑦ 100,000, ᑖᓐᓇᓕ 50 ᐳᓴᓐᑎᒥᑦ ᐊᑦᑎᖕᓂᕐᓴᐅᓚᐅᕐᒥᔪᖅ ᔫᑳᓐᒥᓪᓕ, ᐃᒪᓐᓇ 191 ᐅᑯᓇᙵᑦ 100,000.

“ᑎᒍᔭᐅᓯᒪᔪᑦ ᐅᓄᕐᓂᖏᑦ ᑕᒪᐃᓐᓂᒃ ᐱᖓᓱᓂ ᑎᐅᕆᑑᕆᓂᒃ ᑲᑎᓯᒪᓪᓗᑎᒃ ᖁᑦᑎᖕᓂᕐᓴᒻᒪᕆᐊᓘᓚᐅᕐᑐᖅ ᐳᕌᕕᓐᓰᑦ ᐊᒻᒪ ᑎᐅᕆᑑᕇᑦ ᐅᓄᕐᓂᕆᕙᒃᑕᖏᓐᓂᒃ,” ᐅᓂᒃᑳᑦ ᐅᖃᕐᓯᒪᓚᐅᕐᑐᑦ.

ᑕᒪᐃᓐᓂ ᐱᖓᓱᓂᒃ ᑎᐅᕆᑑᕆᓂᒃ, ᑎᒍᔭᐅᓯᒪᔪᑦ ᐅᓄᕐᓂᖏᑦ ᖄᖏᐅᑎᓯᒪᓚᐅᕐᑐᑦ ᑲᓇᑕᓕᒫᖅ ᑕᐅᑐᒃᖢᒍ ᐊᒻᒪᓗ ᐳᕌᕕᓐᓯᑎᒍᑦ. ᑭᓯᐊᓂᓕ ᓄᓇᑦᓯᐊᖅ ᐊᒻᒪ ᔫᑳᓐᒥ ᑎᒍᔭᐅᔪᑦ ᐅᓄᕐᓂᖏᑦ, ᓱᓕ ᖁᑦᑎᒃᑲᓗᐊᖅᖢᑎᒃ, ᐅᓄᕈᓐᓃᖅᐸᓪᓕᐊᔪᑦ.

ᓄᓇᕗᒥᓪᓕ, ᑎᒍᔭᐅᔪᑦ ᐅᓄᕐᓂᖏᑦ ᐅᓄᕐᓯᕚᓪᓕᓚᐅᕐᑐᑦ 7 ᐳᓴᓐᑎᒥ.

ᐅᓇ ᐃᒡᓗᖔᖓᓄ ᐋᕿᒃᓯᒪᔪᖅ ᑲᓇᑕᓕᒫᖅ ᖃᓄᐃᒍᓯᐊ ᑕᐅᑐᒃᖢᒍ. ᐅᓂᒃᑳᓂᒃ ᓇᐃᓴᐅᑏᑦ ᓴᕿᑎᑦᑎᓯᒪᔪᑦ, ᑲᓇᑕᓕᒫᑎᒍᑦ, ᐅᓄᙱᓐᓂᕐᓴᐃᑦ ᑲᓇᑕᒥᐅᑕᑦ ᑎᒍᔭᐅᓯᒪᕝᕕᒃᒧᐊᕐᓯᒪᓂᖏᓐᓂᒃ ᐳᕌᕕᓐᓯᖏᓐᓂᒃ ᐅᕝᕙᓘᓐᓃᑦ ᒐᕙᒪᑐᖃᒃᑯᑦ ᑎᒍᔭᐅᓯᒪᕝᕕᖏᓐᓄᑦ.

“ᑲᓇᑕᒥ ᑎᒍᔭᐅᓯᒪᔪᑦ ᐅᓄᕐᓂᖏᑦ ᓇᓕᒧᒌᑲᑕᖏᓯᒪᑎᓪᓗᒋ ᐊᕐᕌᒍ 25 ᐃᓗᐊᓂᑦ, ᐅᓄᕈᓐᓃᖅᐸᓪᓕᐊᓯᒪᐃᓐᓇᖅᑐᑦ ᐊᕐᕌᒍᑕᒫᓐ ᐊᕐᕌᒍᓂ ᑕᓪᓕᒪᓂᒃ ᑭᖑᓪᓕᖅᐹᓂᒃ,” ᐅᓂᒃᑳᑦ ᐅᖃᕐᓯᒪᔪᑦ.

“2017/2018-ᒥ, ᑲᓇᑕᒥ ᑎᒍᔭᐅᓯᒪᔪᑦ ᐅᓄᕐᓂᖏᑦ ᐃᒪᐃᓕᖓᓚᐅᕐᑐᖅ 131 ᐃᓐᓇᐃᑦ ᐅᑯᓇᙵᑦ 100,000 ᐃᓄᒋᐊᖕᓂᓕᖕᓂᒃ, 4 ᐳᓴᓐᑎᒥᑦ ᐅᓄᕈᓐᓃᖅᐹᓪᓕᕐᓯᒪᓪᓗᓂ 2016/17-ᒥᑦ,” ᐅᓂᒃᑳᑦ ᐅᖃᖅᑐᑦ.

“ᑎᒍᔭᐅᓯᒪᔪᑦ ᐅᓄᕐᓂᖏᑦ” ᑐᑭᖃᖅᑐᖅ ᐃᓐᓇᐃᑦ ᑎᒍᔭᐅᓯᒪᓂᕆᕙᒃᑕᖏᑦ ᐃᖃᖅᑐᐃᕕᒃᑯᑦ, ᐃᖃᖅᑐᖅᑕᐅᓂᐊᕐᓂᖏᓐᓂ ᑎᒍᔭᐅᓯᒪᔪᑦ ᐅᕝᕙᓘᓐᓃᑦ ᐊᓯᐊᒍᑦ ᑎᒍᔭᐅᓯᒪᓚᐅᑲᒍᑎᒧᑦ, ᐅᓂᒃᑳᑦ ᐅᖃᕐᓯᒪᔪᑦ.

ᐅᓂᒃᑳᑦ ᐅᖃᐅᓯᖃᕐᓯᒪᙱᑦᑐᑦ ᖃᔅᓯᑐᕆᐊᒃᓴᖓᓂᒃ ᓄᓇᕗᒧᑦ ᑎᒍᔭᐅᓯᒪᔪᓄᑦ.

ᐱᔾᔪᑎᖃᕐᑐᕐᓕ ᑕᒪᐅᖓ ᑮᓇᐅᔭᓕᕆᔾᔪᑎᐅᔪᑦ ᓄᓇᕗᒧᑦ ᐊᑐᐃᓐᓇᐅᙱᒻᒪᑕ, ᐅᓂᒃᑳᑦ ᐅᖃᕐᓯᒪᔪᑦ.

ᑭᓯᐊᓂᓕ ᓄᓇᑦᓯᐊᕐᒥ, ᐊᑭᖃᖅᑐᖅ $435 ᐅᓪᓗᖅ ᐊᑕᐅᓯᖅ ᐊᑕᐅᓯᕐᒧᑦ ᑎᒍᔭᐅᓯᒪᔪᒧᑦ ᐊᒻᒪᓗ ᔫᑳᓐᒥ, $507 ᐅᓪᓗᖅ ᐊᑕᐅᓯᖅ ᐊᑕᐅᓯᕐᒧᑦ ᑎᒍᔭᐅᓯᒪᔪᒧᑦ.

ᑎᒍᔭᐅᓯᒪᔪᓄᓪᓕ ᐊᑯᓂᐊᓘᓂᐊᖅᑐᓄᑦ, ᐊᑭᖃᖅᑐᖅ $330 ᐅᓪᓗᖅ ᐊᑕᐅᓯᖅ ᐊᑕᐅᓯᕐᒧᑦ ᑎᒍᔭᐅᓯᒪᔪᒧᑦ, ᑕᒪᐃᓐᓂ ᑕᐅᑐᒃᖢᒋ ᐳᕌᕕᓐᓯᓂᒃ ᐊᒻᒪ ᑎᐅᕆᑑᕆᓂᒃ ᑎᒍᔭᐅᓯᒪᔪᑦ ᐊᑭᒋᓪᓗᐊᖅᑕᖓ ᒫᓃᑦᑐᖅ $233 ᐅᓪᓗᖅ ᐊᑕᐅᓯᖅ ᐊᑕᐅᓯᕐᒧᑦ ᑎᒍᔭᐅᓯᒪᔪᒧᑦ.

ᐃᖃᖅᑐᖅᑕᐅᕝᕕᒃᓴᖏᓐᓂ ᐅᑕᕿᓂᕐᒧᑦ ᑎᒍᔭᐅᓯᒪᔪᑦ ᐅᓄᕐᓂᕐᓴᐅᔪᑦ ᐱᕋᔭᒃᓯᒪᔾᔪᑎᒧᑦ ᑎᒍᔭᐅᓯᒪᔪᓂᒃ

ᐊᓯᒃᑲᓐᓂᐊᒍᑦᑕᐅᖅ ᓄᓇᕗᑦ ᑎᒍᔭᐅᓯᒪᔪᑦ ᐅᓄᕐᓂᕆᔭᖏᑦ ᓄᓇᕗᒥᑦ, ᐊᓯᖏᑦᑎᑐᑦ 8-ᖑᔪᑎᑐᑦ, ᐃᖃᖅᑐᖅᑕᐅᕝᕕᒃᓴᒧᑦ ᐅᑕᕿᔪᐃᑦ ᑎᒍᔭᐅᓯᒪᔪᑦ ᐅᓄᕐᓂᕐᓴᐅᔪᑦ ᐱᕋᔭᒃᓯᒪᓂᕐᒧᑦ ᑎᒍᔭᐅᓯᒪᔪᓂᒃ, ᐅᓂᒃᑳᑦ ᖃᐅᔨᓂᕋᓚᐅᕐᑐᑦ.

ᓄᓇᕗᒥ, ᓇᑉᐸᖏᑦᑕ ᐅᖓᑖᓃᑦᑐᑦ ᑕᒪᐃᓐᓂ ᑎᒍᔭᐅᓯᒪᔪᓂᒃ—55 ᐳᓴᓐᑎ—ᐃᖃᖅᑐᖅᑕᐅᓂᒃᓴᒧᑦ ᐅᑕᕿᓂᕐᒧᑦ ᑎᒍᔭᐅᓯᒪᓚᐅᕐᑐᑦ.

“ᐃᑲᖅᑐᖅᑕᐅᓂᒃᓴᒧᑦ ᐅᑕᕿᓂᕐᒧᑦ” ᑎᒍᔭᐅᓯᒪᑦ ᐸᓯᔭᒃᓴᙳᖅᑎᑕᐅᓯᒪᔪᑦ ᐱᕋᔭᒃᓯᒪᓂᕐᒧᑦ ᑭᓯᐊᓂᓕ ᑎᒍᔭᐅᓯᒪᔭᕆᐊᖃᖅᖢᑎᒃ ᑭᓯᐊᓂ ᐃᖃᖅᑐᐃᕕᓕᕆᔨᒃᑯᑦ ᑖᓐᓇ ᐱᓕᕆᐊᓂᐊᓂᒃᑯᓂ.

ᐱᓕᕆᔾᔪᓯᐅᔪᖅ ᓈᒻᒪᙱᓕᐅᕈᑎᖃᕐᑐᖅ, ᓲᖃᐃᒻᒪ ᐅᑕᕿᔪᑦ ᑎᒍᔭᐅᓯᒪᔪᑦ ᐊᑐᐃᓐᓇᖃᙱᓐᓂᕐᓴᐅᕙᒃᒪᑕ ᖃᓄᐃᓕᐅᕈᑎᒃᓴᓂᒃ ᑎᒍᔭᐅᓯᒪᓪᓚᕆᒃᑐᓄᑦ.

“ᐅᓄᕐᓂᕐᓴᐃᑦ ᐃᓐᓇᐃᑦ ᐅᑕᕿᓂᕐᒧᑦ ᑎᒍᔭᐅᓯᒪᔪᑦ ᒪᑯᓇᙵᓪᓕ ᑎᒍᔭᐅᓯᒪᔭᕆᐊᓕᖕᓂ ᒪᑯᓇᓂ ᐳᕌᕕᓐᓯᓂᒃ-ᑎᐅᕆᑑᕆᓂᒃ ᐃᑲᔪᖅᑕᐅᕕᖕᒥᑦ ᖃᓄᐃᓕᐅᕈᑎᐅᓕᕐᓇᕐᒪᑦ ᐊᒃᑐᐊᔪᓄᑦ ᐱᔨᑦᑎᕋᐅᑎᓂᒃ ᑎᒍᔭᐅᓯᒪᔪᓄᑦ, ᒪᑯᑎᑐᓇᖅ ᒪᒥᓴᕈᓐᓇᕐᓂᒃᑯᑦ ᐊᒻᒪ ᐃᒡᓗᖃᖅᑎᑕᐅᓂᒃᑯᑦ, ᓇᓗᓇᕐᓂᖏᓐᓂᒃ ᖃᓄᖅ ᐊᑯᓂᐅᑎᒋᔪᖅ ᑎᒍᔭᐅᓯᒪᓂᐊᕆᐊᒃᓴᖏᓐᓂᒃ,” ᐅᓂᒃᑳᑦ ᐅᖃᕐᓯᒪᔪᑦ.

ᑭᓯᐊᓂᓕ ᖃᓄᐃᓕᐅᕈᓯᐅᔪᖅ ᐅᓄᕐᓯᕙᓪᓕᐊᓂᖅ ᑎᒍᔭᐅᕙᒃᑐᑦ ᐃᓄᐃᑦ ᐅᑕᕿᓂᕐᒧᑦ ᐃᖃᖅᑐᖅᑕᐅᓂᐊᕐᓂᕐᒥᓂᒃ ᓴᕿᑎᑦᑎᓯᒪᔪᖅ “ᐃᓕᖁᓯᖅ ᐊᓯᙳᕐᓂᖓᓂᒃ” ᒪᐅᓇ ᐃᖃᖅᑐᐃᕕᓕᕆᓂᒃᑯᑦ.

“ᑕᐅᑐᒃᑕᐅᓂᐅᔪᕐᓕ ᒪᐅᓇ ᖁᐊᕐᓵᕐᓇᙱᓐᓂᕐᓴᐅᑎᒐᓱᒃᖢᒍ ᑭᒃᑯᓕᒫᓄᑦ, ᐃᓚᒋᓪᓗᒍ ᖁᐊᕐᓵᕐᓇᕈᑎᐅᑐᐃᓐᓇᕆᐊᖃᕐᓂᖅ ᐱᕋᔭᒃᑲᓐᓂᕋᔭᕆᐊᒃᓴᖏᓐᓂᒃ, ᑕᐃᒪᓕ ᐃᖃᖅᑐᐃᕕᐅᔪᑦ ᓂᕈᐊᕐᓂᕐᓴᐅᕙᒃᐳᑦ ᐸᓯᔭᒃᓴᙳᖅᑎᑕᐅᓯᒪᔪᑦ ᐅᑕᕿᑎᑕᐅᓗᑎᒃ ᖃᓄᐃᓕᐅᕈᑎᒋᓂᐊᖅᑕᖏᓐᓂᒃ ᐃᖃᖅᑐᖅᑕᐅᓂᒃᑯᑦ,” ᐅᓂᒃᑳᑦ ᐅᖃᕐᓯᒪᖕᒥᔪᑦ.

ᖃᓂᒋᔭᖓᓂᒃ 2,000 ᐱᔭᐅᓯᒪᔪᑦ

ᐊᓯᒃᑲᓐᓂᖓ ᓇᐃᓴᐅᑎᑎᒍ ᖃᐅᔨᓴᕈᑎᓂᒃ ᐅᖃᐅᓯᐅᔪᑦ ᐅᓇ ᖃᔅᓯᐅᓂᖏᑦ “ᑎᒍᔭᐅᔪᑦ,” ᑐᑭᖃᕐᖢᓂ ᑎᒍᔭᐅᕝᕕᒃᒧᐊᖅᑐᓂᒃ, ᑎᒍᔭᐅᓯᒪᕝᕕᓪᓚᕆᖕᓄᑦ ᐅᕝᕙᓘᓐᓃᑦ ᓄᓇᓕᖕᓂᑦ ᑲᒪᒋᔭᐅᔭᕆᐊᖃᕐᓂᒃᑯᑦ, ᒪᑯᑎᑐᓇᖅ, ᐅᐸᒍᑎᖃᑦᑕᕆᐊᖃᕐᓂᖅᑎᑐᑦ.

ᓄᓇᕗᒥ, ᑎᒍᔭᐅᔪᑦ ᖃᔅᓯᐅᓂᖏᑦ 2017–18 ᐃᒪᐃᓕᖓᓚᐅᕐᑐᑦ:

• ᐃᖃᖅᑐᐃᕕᒃᑯᑦ ᑎᒍᔭᐅᓯᒪᔪᑦ: 415
• ᐅᑕᕿᔪᑦ ᖃᓄᐃᑕᐅᔾᔪᑎᒃᓴᖏᓐᓄᑦ ᑎᒍᔭᐅᓯᒪᔪᑦ: 567
• ᐃᖃᖅᑐᐃᕕᒃᑯᑦ ᑎᒍᔭᐅᓯᒪᔪᑦ ᓄᓇᓕᖕᓂᒃ ᑲᒪᒋᔭᐅᔭᕆᐊᖃᕐᓂᕐᒧᑦ: 900
• ᑲᑎᖢᑎᒃ ᖃᔅᓯᐅᓂᖏᑦ ᐃᑲᔪᖅᑕᐅᕕᒃᒧᐊᖅᑐᑦ: 1,882

ᐊᑕᐅᓯᖅ ᐃᓱᒫᓘᖕᓇᓗᐊᕐᑐᕐᓕ ᓇᐃᓴᐃᔨᓕᕆᓂᒃᑯᑦ ᐅᓇ ᖃᔅᓯᐅᓗᐊᕐᓂᖏᑦ ᓄᓇᖃᖅᑳᖅᑐᑦ ᐃᓐᓇᐃᑦ ᑎᒍᔭᐅᓯᒪᔪᑦ 2017/18-ᒥ: 30 ᐳᓴᓐᑎᐅᔪᑦ ᐳᕌᕕᓐᓂᓯᑎᒍᑦ ᐊᒻᒪ ᑎᐅᕆᑑᕆᓂᒃ ᑎᒍᔭᐅᓯᒪᔪᓂᒃ ᐊᒻᒪᓗ 29 ᐳᓴᓐᑎᒋᔭᐅᓪᓗᑎᒃ ᒐᕙᒪᑐᖃᒃᑯᑦ ᑎᒍᔭᐅᓯᒪᕝᕕᖏᓐᓂᒃ.

ᓄᓇᖃᖅᑳᖅᑐᑦ 4.9 ᐳᓴᓐᑎᖏᓐᓃᑦᑐᑦ ᑲᓇᑕᐅᑉ ᐃᓄᒋᐊᖕᓂᖏᑦᑎᒍᑦ, ᐅᑯᑎᒎᓇᕐᓕ 2016-ᒥ ᓇᐃᓴᐃᒍᑎᕕᓂᕐᓂᒃ.