‘ᑐᙵᓂᖃᑦᑎᐊᖅᑐᖅ’ ᒥᐊᕆ ᓴᐃᒪᓐ ‘ᖁᕕᐊᑉᐳᖅ’ ᐊᖏᕐᕋᖅᓯᒪᓂᖓᓂ ᓄᓇᕕᖕᒥ

For English version of this story, see ‘Even-keeled’ Mary Simon ‘excited’ to be home in Nunavik

ᐃᓄᒃᑎᑐᒻᒥ ᐅᖃᐅᓯᖅᑕᖃᙱᓚᖅ “Her Excellency−ᒧᑦ” — ᑕᐃᒎᓯᓪᓚᕆᐅᔪᖅ ᑐᓂᔭᐅᔪᒥ ᑯᐃᑉ ᑭᒡᒐᖅᑐᖅᑎᖓ ᑲᓇᑕᒥ ᒥᐊᕆ ᓴᐃᒪᓐᒧᑦ.

ᓯᐊᕋ ᐊᓘᐸ, ᐊᑕᐅᓯᐅᔪᒥ ᓄᓇᓕᖕᓂ ᐱᓕᕆᔨᓪᓚᕆᐅᔪᖅ ᐅᑕᖅᑭᔪᒥ ᑐᙵᓱᒃᑎᑦᑎᓂᕐᒥ ᓴᐃᒪᓐᒥ ᓯᕗᓪᓕᖅᐹᖓᓂ ᐅᓪᓗᖓᓂ ᐳᓚᕋᕐᓂᖓᓂ ᓄᓇᕕᖕᒧᑦ ᓇᒡᒐᔾᔭᐅᒥ ᐅᓪᓛᖓᓂ, ᐅᖃᐅᓯᕆᓚᐅᖅᐸᖓ ᑐᓴᒐᒃᓴᓕᕆᔨᐅᔪᓄᑦ ᑲᑎᑦᑐᓄᑦ ᒪᑭᕕᒃ ᑎᒥᖁᑕᐅᔪᒥ ᑲᑎᒪᕝᕕᖓᓂ ᑰᔾᔪᐊᕐᒥ ᓇᒡᒐᔾᔭᐅᒥ ᐅᓪᓛᖓᓂ.

ᓴᐃᒪᓐ, ᑕᐃᓯᔪᒥ ᑰᔾᔪᐊᕐᒥ ᐊᖏᕐᕋᕆᓂᕋᖅᖢᓂᐅᒃ, ᐳᓚᕋᖅᐳᖅ ᐊᕕᒃᑐᖅᓯᒪᓂᐅᔪᒥ ᓯᕗᓪᓕᖅᐹᒥ ᑕᐃᒪᙵᓂ ᓯᕗᓂᐊᓂ ᓄᕙᒡᔪᐊᕐᓇᖅ-19−ᒥ ᐊᒥᓱᓂ ᖃᓂᒻᒪᓐᓇᐅᔪᒥ ᐊᒻᒪ ᓯᕗᓪᓕᖅᐹᒥ ᑯᐃᑉ ᑭᒡᒐᖅᑐᖅᑎᙳᕐᓂᖓᓂ ᑲᓇᑕᒥ ᐊᕐᕌᒍᑲᓴᖕᒥ.

ᓯᕗᓪᓕᖅᐹᖑᔪᒥ ᓄᖅᑲᕐᓂᐅᔪᒥ ᓯᕗᓪᓕᖅᐸᐅᔪᒥ ᓴᐃᒪᓐ ᐅᓪᓗᓂ-ᑕᓪᓕᒪᓂ ᐳᓚᕋᕐᓂᖓᓂ ᐅᐊᖕᓇᒥ ᑯᐸᐃᖕᒥ ᐊᕕᒃᑐᖅᓯᒪᓂᐅᔪᒥ ᑲᑎᒪᓂᐅᓚᐅᖅᐳᖅ ᑭᒡᒐᖅᑐᖅᑎᖓᓂ ᓄᓇᕕᖕᒥ ᑲᑐᔾᔨᖃᑎᒌᖑᔪᓂ ᐊᖓᔪᖅᑳᖃᕐᕕᖓᓂ ᒪᑭᕕᖕᒥ, ᑲᑐᔾᔨᖃᑎᒌᖑᔪᑦ ᓴᖅᑭᑎᑕᐅᓯᒪᔪᒥ ᑎᒍᒻᒥᓂᖏᓐᓂ ᒪᓕᒐᕐᔪᐊᖑᔪᓂ ᐱᔪᓐᓇᕐᓂᕆᔭᐅᔪᓂ ᓄᓇᕕᐅᑉ ᐃᓄᖕᓄᑦ ᐃᓄᒋᐊᖕᓂᐅᔪᓄᑦ.

ᒪᑭᕕᒃ ᐊᖓᔪᖅᑳᖓ ᐲᑕ ᐋᑕᒥ ᑐᙵᓱᒃᑎᑦᑎᓚᐅᖅᐳᖅ ᓴᐃᒪᓐᒥ ᐊᒻᒪ ᐅᐃᖓᓂ ᐅᐃᑦ ᓄᕋᐃᓱᕐᒥ.

“ᑕᑯᓚᐅᖅᓯᒪᔾᔮᕋᓱᒋᓚᐅᙱᓚᖓ ᐃᓄᖕᒥ ᑯᐃᑉ ᑭᒡᒐᖅᑐᖅᑎᖓ ᑲᓇᑕᒥ,” ᐋᑕᒥ ᐅᖃᓚᐅᖅᐳᖅ. “ᖁᕕᐊᕐᔪᐊᖅᐳᖓ ᐅᕙᓃᓐᓂᕐᓂ, ᑭᒃᑯᓕᒫᑦ ᖁᕕᐊᕐᔪᐊᖅᐳᑦ ᐃᓄᖕᒥ ᑯᐃᑉ ᑭᒡᒐᖅᑐᖅᑎᖓ ᑲᓇᑕᒥ ᐅᕙᓃᓐᓂᖓᓂ ᐅᕙᑦᑎᓐᓂ.”

“ᖁᕕᐊᑉᐳᖓᑦᑕᐅᖅ,” ᓴᐃᒪᓐ ᑭᐅᓚᐅᖅᐳᖅ.

ᓴᐃᒪᓐ ᐃᖅᑲᐅᒪᓚᐅᖅᐳᖅ ᐃᓚᖏᓐᓂ ᓱᕈᓯᐅᑎᓪᓗᒍ ᐃᖅᑲᐅᒪᓂᕆᔭᒥᓂ ᑰᔾᔪᐊᕐᒥ, ᐃᓚᖃᖅᑐᒥ ᑕᖕᒫᕐᓂᕐᒥ ᓄᓇᒥ ᐱᖃᓐᓇᕆᔭᖏᓪᓗ.

ᐅᖃᓚᐅᖅᐳᖅ ᐅᑎᖅᑐᐃᓐᓇᐅᓚᐅᖅᐳᖅ ᐃᒻᒥᓄᑦ ᖃᖓᑕᓲᖅ ᑎᑭᐅᑎᓕᖅᑎᓪᓗᒍ ᓄᓇᓖᑦ ᖁᓛᖓᒍᑦ.

“ᖁᕕᐊᕐᔪᐊᓗᐊᓚᐅᕋᔪᙱᓚᖓ, ᑐᙵᓂᖃᑦᑎᐊᒐᔪᒃᑐᖓ, ᑭᓯᐊᓂ ᒥᓐᓂᐊᓕᕋᑦᑕ ᐃᑉᐸᒃᓴᖅ, ᐃᓱᒪᓚᐅᖅᐳᖓ ᓱᕈᓯᐅᓂᕆᓚᐅᖅᑕᓐᓂ,” ᓴᐃᒪᓐ ᐅᖃᓚᐅᖅᐳᖅ. “ᖁᕕᐊᓇᕐᔪᐊᓚᐅᖅᐳᖅ ᐊᖏᕐᕋᕐᓂᕐᒥ, ᑕᒪᐅᙵᖅᓯᒪᙱᓚᖓ ᐊᕐᕌᒍᑲᓴᖕᓄᑦ ᐱᖓᓱᓄᑦ ᐱᔾᔪᑎᖃᖅᑐᒥ ᐊᒥᓱᓄᑦ ᖃᓂᒻᒪᓐᓇᐅᔪᒥ.”

ᓴᐃᒪᓐ, ᒪᑭᕕᒃᑯᓐᓄᑦ ᐊᖓᔪᖅᑳᖑᓚᐅᖅᓯᒪᔪᒥ, ᐊᒻᒪ ᐋᑕᒥ ᐅᖃᓪᓚᓚᐅᖅᐳᑦ ᐱᒻᒪᕆᐅᓂᖓᓂ ᐅᖓᕙᕆᐊᖅᓯᓂᐅᔪᒥ ᐃᓄᐃᑦ ᒪᑭᒪᑎᑦᑎᓂᕐᒥ ᓄᓇᕕᖕᒥ, ᐊᒻᒪ ᐱᔭᕆᐊᖃᕐᓂᐅᔪᒥ ᑯᐸᐃᒃ ᒐᕙᒪᒃᑯᓐᓂ ᑎᒃᑯᐊᖅᓯᓂᖏᓐᓂ ᐋᔩᖃᑎᒌᒃᑎᐅᔪᒥ ᐅᑯᓇᓂ ᐅᖃᔾᓚᖕᓂᐅᔪᓂ. ᐋᑕᒥ ᓴᖅᑭᑎᑦᑎᒃᑲᓐᓂᓚᐅᖅᐳᖅ ᐃᓱᒪᒋᔭᖃᕐᓂᐅᔪᒥ ᓇᖕᒥᓂᖅᓱᖅᑐᒥ ᒐᕙᒪᐅᔪᒥ 2021−ᒥ ᐅᑎᓚᐅᖅᑎᓪᓗᒍ ᒪᑭᕕᒃᑯᓐᓄᑦ ᐊᖓᔪᖅᑳᖑᓂᖓᓂ.

ᒪᕐᕉᒃ ᐅᖃᓪᓚᐅᓯᖃᓚᐅᕆᕗᑦ ᑐᓂᓯᓂᕐᒥ ᐱᐅᓂᖅᓴᐅᔪᒥ ᐋᓐᓂᐊᖃᕐᓇᙱᑦᑐᓕᕆᓂᕐᒥ ᐸᖅᑭᔭᐅᓂᐅᔪᒥ ᐊᕕᒃᑐᖅᓯᒪᓂᐅᔪᒧᑦ ᓴᖅᑭᑎᑕᐅᓂᖓᓂ ᐊᒻᒪ ᓇᑉᐸᖅᑎᕆᓂᐅᔪᒥ ᓄᑖᖑᔪᒥ ᐊᒻᒪ ᐱᐅᓯᒋᐊᖅᑐᒥ ᐋᓐᓂᐊᕕᖕᒥ.

ᒪᑭᕕᒃ ᑭᖑᓂᐊᒍᑦ, ᓴᐃᒪᓐ ᐊᒻᒪ ᒪᓕᒃᑎᖏᑦ ᑕᐅᓄᙵᐅᓚᐅᖅᐳᑦ ᖃᓕᕈᓯᕐᒥ ᑰᔾᔪᐊᑉ ᐅᐊᖕᓇᒥ ᓄᓇᓕᐅᔪᓄᑦ ᐃᒡᓗᕐᔪᐊᖓᓄᑦ ᑲᑎᒪᖃᑎᖃᕐᓂᕐᒥ ᒪᐃᔭ ᒥᐊᕆ ᔪᕼᐋᓇᔅᒥ ᐊᒻᒪ ᓄᓇᓕᖕᓂ ᑲᑎᒪᔨᐅᔪᓂ.

ᐊᒥᓱᐃᑦ ᓄᓇᓕᖕᓂᕐᒥᐅᑕᓂ, ᑕᑯᐱᓛᒍᒪᓚᐅᖅᑐᓂ ᐊᖏᕐᕋᓂᕐᒥᐅᑕᒥ ᐱᓯᑎᐊᓗᖕᒥ, ᓂᐅᕝᕕᐅᕆᐊᓚᐅᖅᐳᑦ ᓴᐃᒪᓐᒥ. ᑎᒎᑎᓚᐅᖅᐳᑦ ᐊᒥᓱᓂᑦ, ᐃᕿᑦᑎᓪᓗᓂᓗ ᐱᖃᓐᓇᕆᔭᒥᓂ ᐊᒻᒪ ᐃᓚᒥᓂᑦ, ᐊᒻᒪ ᐳᓚᕋᖅᖢᓂ ᖃᔅᓯᒐᓚᖕᓂ ᑲᑐᔾᔨᖃᑎᒌᖑᔪᓂ ᑰᔾᔪᐊᕐᒥ ᓯᕗᓪᓕᖅᐹᖓᓂ ᐅᓪᓗᖓᓂ ᓄᓇᕕᖕᒥ ᐳᓚᕋᕐᓂᐅᔪᒥ.

“ᒥᐊᕆ ᐱᖃᓐᓇᕆᓂᖅᐹᕆᓚᐅᖅᐸᕋ ᐱᕈᖅᓴᑎᓪᓗᑕ… ᐅᐱᒋᕐᔪᐊᖅᐸᕋ, ᐊᒻᒪ ᑭᖑᓂᖃᕐᔪᐊᖅᐳᖅ ᑭᓯᐊᓂ,” ᐅᖃᓚᐅᖅᐳᖅ ᓗᐃᓴ ᐱᐊᕐᑎ ᒪᐃ, ᓴᐃᒪᓐ ᓱᕈᓯᐅᑎᓪᓗᒋᑦ ᐱᖃᓐᓇᕆᓛᕆᓚᐅᖅᑕᖓ ᐊᒻᒪ ᐅᑯᐊᖓ.

ᒪᐃ ᑎᔅᓯᒍᓱᓚᐅᖅᐳᖅ ᓴᐃᒪᓐ ᐊᓂᖓᓂ, ᓇᐹᖅᑐᓕᖕᒥ ᖃᖓᑕᓲᖅᑎᐅᔪᖅ ᔮᓂ ᒪᐃᒥ, “ᐱᓇᓱᐊᖅᑐᒥ” ᐃᒻᒥᓂᒃ ᒪᒃᑯᖕᓂᖅᓴᐅᑎᓪᓗᒋᑦ ᐊᒻᒪ ᐊᓱᐃᓛᒃ ᑲᑎᑎᑕᐅᓚᐅᖅᖢᑎᒃ.

ᓂᐅᕕᐅᓚᐅᖅᑎᓪᓗᒍ ᓴᐃᒪᓐᒥ ᐃᕿᑦᑎᕐᔪᐊᖅᖢᓂ, ᒪᐃ ᐃᖅᑲᐅᒪᓚᐅᕆᕗᖅ ᐱᒻᒪᕆᐅᓂᖓᓂ ᑲᓇᑕᐅᑉ ᓯᕗᓪᓕᖅᐹᖑᔪᒥ ᐃᓄᖕᒥ ᑯᐃᑉ ᑭᒡᒐᖅᑐᖅᑎᖓ ᑲᓇᑕᒥ ᐊᖏᕐᕋᐅᓂᖓᓂ.

“ᐅᕙᒍᑦ ᐃᓅᔪᑎᒍᑦ, ᒫᓐᓇ ᐃᓚᒋᔭᐅᓪᓚᕆᓕᖅᐳᒍᑦ, ᑭᓱᓪᓚᕆᐅᕗᖅ ᐅᕙᒍᑦ ᐱᕈᖅᓴᐃᓯᒪᕗᒍᑦ ᐆᒻᒪᑎᑦᑎᓐᓂ,” ᐅᖃᓚᐅᖅᐳᖅ. “ᓴᙱᔪᐊᓘᓪᓗᓂ ᐊᕐᓇᐅᕗᖅ, ᓴᙱᔪᒻᒪᕆᐊᓗᒃ.”

ᐱᔭᕇᓚᐅᖅᑎᓪᓗᒍ ᑲᑎᒪᖃᑎᖃᕐᓂᖓᓂ ᑰᔾᔪᐊᑉ ᑲᑎᒪᔨᖏᓐᓂ, ᓴᐃᒪᓐ ᒪᓕᖃᑎᒋᔭᖏᑦ ᐊᖁᓚᐅᖅᐳᑦ ᑰᔾᔪᐊᑉ ᓂᒋᐊᓄᑦ ᐃᓂᐅᔪᒧᑦ ᐃᓱᐊᖅᓴᕐᕕᒃ ᐸᓂᖅᓯᕐᕕᖓᓂ ᐱᓕᕆᕙᒃᑐᓂ ᒪᒥᓴᐃᓂᕐᒧᑦ ᐃᓄᖕᓂ ᓵᙵᔪᓂ ᐅᐃᕆᓯᒪᓂᐅᔪᓂ ᑐᓂᔭᐅᓪᓗᑎᒃ ᐃᓕᖅᑯᓯᒥᒃ ᐊᑐᕐᓂᑯᓂ ᓄᓇᒥ.

ᑕᐃᑲᓂ, ᓴᐃᒪᓐ ᓂᐅᕝᕕᐅᕆᐊᖅᑕᐅᓚᐅᖅᐳᑦ ᑲᑕᔾᔭᕐᓂᕐᒥ ᐊᒻᒪ ᕿᓚᐅᔾᔭᕐᓂᕐᒥ ᖁᙱᐊᖅᑕᐅᓂᐅᔪᒥ ᑎᑕᒃᑎᓂ ᓵᓐᑎ ᐃᒧᓪᓗᖕᒧᑦ ᐊᒻᒪ ᔮᓂᔅ ᐹᓯᓐᔅᒧᑦ. ᑲᑎᒪᖃᑎᖃᓚᐅᖅᐳᖅ ᐃᓱᐊᖅᓴᕐᕕᒃ ᐃᖅᑲᓇᐃᔭᖅᑎᖏᓐᓂ ᐊᒻᒪ ᒪᒥᓴᕆᐊᖅᓯᒪᔪᓄᑦ, ᐊᒻᒪ ᐊᓕᐊᓇᐃᒍᓱᓚᐅᖅᐳᖅ ᐊᔾᔨᒌᙱᕈᓘᔭᖅᑐᓂ ᓂᕿᓕᐊᖑᔪᓂ ᓂᕿᓪᓚᑦᑖᓂ ᐅᓪᓗᕈᒻᒥᑕᒥ, ᐃᓚᖃᖅᑐᒥ ᑐᒃᑐᒥ ᐊᒡᒍᐊᓚᕿᓵᕐᒥ.

“ᐅᐱᒋᕐᔪᐊᖅᐸᔅᓯ ᖃᓄᐃᓕᐅᕐᓂᔅᓯᓐᓂ, ᐅᐱᕐᔪᐊᖅᐳᖓ, ᐊᒻᒪ ᐃᓱᒪᕗᖓ ᐊᑕᐅᓯᐅᓪᓗᓂ ᐱᒻᒪᕆᐅᓂᖅᐹᖑᔪᒥ ᖃᓄᐃᓕᐅᕐᓂᔅᓯᓐᓂ ᓄᓇᕕᖕᒥ ᐃᑲᔪᕐᓂᕐᒧᑦ ᐃᓄᖕᓂ ᒪᒥᓴᕐᓂᕐᒧᑦ,” ᓴᐃᒪᓐ ᐅᖃᐅᔾᔨᓚᐅᖅᐳᖅ ᐃᖅᑲᓇᐃᔭᖅᑎᐅᔪᓄᑦ.

ᐅᓪᓗᕈᒻᒥᑕᓚᐅᖅᑎᓪᓗᒍ, ᓴᐃᒪᓐ ᑐᕌᓕᓚᐅᖅᐳᖅ ᓇᑉᐸᖅᑎᕆᔭᐅᓂᕐᒥ ᐃᓂᐅᔪᒧᑦ ᐃᓱᐊᖅᓴᕐᕕᐅᑉ ᓄᑖᖑᔪᒥ ᒪᒥᓴᕐᕕᒃᑖᕆᓂᐊᖅᑕᖓᓄᑦ.

ᐃᓚᒋᔭᐅᓪᓗᓂ ᓄᓇᕕᖕᒥ ᐳᓚᕋᕐᓂᐅᔪᒥ, ᓴᐃᒪᓐ ᐅᖃᓪᓚᒃᑐᒃᓴᐅᑕᐅᕗᖅ ᐃᓕᓐᓂᐊᖅᑎᓄᑦ ᐃᓕᓐᓂᐊᕐᕕᓂ ᑎᓴᒪᓂ ᓄᓇᓕᐅᔪᓂ ᐸᕐᓇᒃᓯᒪᔪᒥ ᐳᓚᕋᕐᓂᐊᕐᓂᖓᓂ. ᔮᓂᒻᒪᕆᒃ ᖁᑦᑎᒃᑐᒥ ᐃᓕᓐᓂᐊᕐᕕᖓᓂ, ᐊᔭᐅᕆᓚᐅᖅᐳᖅ ᐃᓕᓐᓂᐊᖅᑎᓂ ᑕᐅᑐᒃᑕᑐᐊᖃᑲᐃᓐᓇᕐᓂᖏᓐᓂ ᐃᓕᓐᓂᐊᕐᓂᕐᒥ ᐊᒻᒪᓗ ᐊᑐᐃᓐᓇᕐᓂᕐᒥ ᐃᓄᒃᑎᑐᒻᒥ ᖃᐅᑕᒫᒥ ᐃᓅᓯᐅᔪᒥ.

ᓴᐃᒪᓐ ᑭᐅᓚᐅᕆᕗᖅ ᐊᐱᖅᑯᑕᐅᔪᓂ ᐃᓕᓐᓂᐊᖅᑎᓂ ᑐᓴᕈᒪᔪᓂ ᐱᓕᕆᐊᒥᓂ ᑯᐃᑉ ᑭᒡᒐᖅᑐᖅᑎᖓ ᑲᓇᑕᒥ, ᐊᒻᒪᓗᑦᑕᐅᖅ ᐃᓚᖏᓐᓂ ᐱᕐᔪᐊᖑᔪᓂ ᐅᖃᐅᓯᐅᔪᓂ.

ᐊᑕᐅᓯᖅ ᐃᓕᓐᓂᐊᖅᑎ ᐊᐱᕆᓚᐅᖅᐳᖅ ᓴᐃᒪᓐᒥ ᐃᓄᐃᑦ ᒪᒃᑯᒃᑐᑦ ᓂᕆᐅᖕᓂᖃᓪᓗᐊᕐᒪᖔᑕ ᐱᐅᔪᓂ ᐊᓯᔾᔨᕐᓂᐅᓂᐊᖅᑐᓂ ᐅᑭᐅᖅᑕᖅᑐᒥ. ᓇᐃᑦᑐᒥ ᑭᐅᓂᖓ — ᐄ.

“ᓂᕆᐅᖕᓂᖃᐃᓐᓇᐅᔭᓪᓗᐊᖅᐳᒍᑦ, ᐃᓱᒪᕗᖓ ᐊᓯᔾᔨᕐᓂᖃᖅᑎᑦᑎᒍᑦᑕ, ᐃᓛᓐᓂᒃᑯᑦ ᓱᒃᑲᐃᑦᑐᒻᒪᕆᐅᔪᓐᓇᖅᐳᖅ, ᑭᓯᐊᓂ ᓂᕆᐅᖕᓂᖃᐃᓐᓇᕆᐊᖃᖅᐳᒍᑦ,” ᐅᖃᓚᐅᖅᐳᖅ.

ᓴᐃᒪᓐ ᑭᖑᓪᓕᖅᐹᖓᓂ ᓄᖅᑲᕐᓂᖓᓂ ᐅᓪᓗᖓᓂ ᑰᔾᔪᐊᕐᒥ ᐅᕙᓂᐅᓚᐅᖅᐳᖅ ᑐᓵᔨᐊᐱᒃ ᐃᓄᑐᖃᒃᑯᕕᖕᒥ ᑲᑎᒪᖃᑎᖃᕐᓂᕐᒥ ᐃᓚᖏᓐᓂ ᐊᖏᕐᕋᑲᖅᑎᐅᔪᓂ, ᒪᑐᓯᒪᓪᓗᓂ ᓯᐊᒻᒪᖅᑎᑦᑎᔨᐅᔪᓄᑦ. ᓄᓇᕕᖕᒥ ᐳᓚᕋᕐᓂᖓ ᑲᔪᓰᓐᓇᕐᓂᐊᖅᐳᖅ ᐊᐃᑉᐹᓂ ᐅᓪᓗᕐᒥ ᐊᐅᓪᓛᕐᓂᐅᔪᒥ ᑲᖏᖅᓱᐊᓗᔾᔪᐊᕐᒧᑦ, ᓄᓇᓕᒃ ᐃᓅᕝᕕᒋᓚᐅᖅᑕᖓᓂ.