ᑕᒪᒃᑭᓂ-ᓄᓇᖃᖅᑳᖅᓯᒪᔪᓂ ᑲᑎᙵᓂᐅᔪᓂ ᐸᕐᓇᒃᐳᑦ ᓂᐅᕕᕐᓂᕐᒥ ᓄᐊᑦᐅᐃᔅᑎᐅᓪᒥ

For English version, see All-Indigenous consortium plans to buy Northwestel

ᑲᑎᙵᓂᐅᔪᒥ ᓄᓇᖃᖅᑳᖅᓯᒪᔪᓂ ᑲᑐᔾᔨᖃᑎᒌᖑᔪᓂ ᐸᕐᓇᒃᐳᑦ ᓂᐅᕕᕐᓂᐊᕐᓂᕐᒥ ᓄᐊᑦᐅᐃᔅᑎᐅᓪᒥ, ᐊᖏᓛᖑᔪᒥ ᑐᓴᐅᒪᑎᑦᑎᔾᔪᑎᓂ ᑐᓂᓯᔨᐅᔪᒥ ᐅᑭᐅᖅᑕᖅᑐᒥ, ᐱᓕᕆᓂᐅᔪᒥ ᑎᑭᐅᒪᔪᒧᑦ $1 ᐱᓕᐊᓐᓂ, ᑲᒻᐸᓂᐅᑉ ᓇᖕᒥᓂᖃᖅᑎᖓ Bell Canada ᐅᖃᐅᓯᖃᓚᐅᖅᐳᑦ ᔫᓂ 11−ᒥ.

Sixty North Unity, ᑲᑎᙵᓂᐅᔪᒥ ᓄᓇᖃᖅᑳᖅᓯᒪᔪᓂ ᐱᓕᕆᖃᑎᒌᒃᑐᓂ, ᓄᐊᑦᐅᐃᔅᑎᐅᓪᒥ ᐊᖏᓛᖑᔪᒥ ᑐᓴᐅᒪᑎᑦᑎᔾᔪᑎᓂ ᑲᑦᐸᓂᐅᔪᒥ ᓄᓇᕐᔪᐊᓕᒫᒥ ᑕᒪᒃᑭᐅᒪᔪᒥ ᓄᓇᖃᖅᑳᖅᓯᒪᔪᓂ ᓇᖕᒥᓂᖃᖅᑎᐅᓂᕐᒥ, ᐅᖃᐅᓯᐅᓪᓗᓂ ᑐᓴᒐᒃᓴᓕᐊᖑᔪᒥ ᓴᖅᑭᑎᑕᐅᔪᒥ Bell Canada−ᑯᓐᓂ.

Sixty North Unity ᑐᕌᖅᑎᑕᐅᓯᒪᕗᖅ ᑕᐃᕕᑦ ᐅᒥᐅᓪᒍᐃᑦᑐᕐᒥ ᓄᓇᕗᒻᒥᐅᑕᖅ, ᑎᐊᕈᓪ ᐴᓕᐅ ᓄᓇᑦᓯᐊᕐᒥ ᐊᒻᒪ ᑎᕕᓂ ᐃᑯᑦ−ᒥᐊᕆᑦ ᔫᑳᓐᒥ.

ᓄᑖᖑᔪᓂ ᓇᖕᒥᓂᖃᖅᑎᐅᔪᓂ ᑲᑎᙵᓂᐅᔪᑦ ᐅᖃᓚᐅᖅᐳᖅ ᓄᓇᓕᐅᔪᓂ ᐊᒻᒪ ᓇᖕᒥᓂᕆᔭᐅᔪᓂ ᐱᕚᓪᓕᕈᑎᖃᕐᓂᐊᖅᐳᑦ ᐱᐅᓂᖅᓴᐅᔪᒥ ᑲᑎᙵᓂᖃᖅᑐᒥ ᐸᕐᓇᖕᒪᑕ ᐊᖏᔪᒥ ᐊᑭᑐᔫᑎᓂ ᑲᑎᖅᓱᖅᑕᐅᕙᓪᓕᐊᔪᓂ ᑮᓇᐅᔭᓂ ᑐᖅᑯᖅᑕᐅᓯᒪᓪᓗᑎᒃ ᐱᕈᖅᐸᓪᓕᐊᑎᑕᐅᔪᓂ ᒪᕐᕈᐃᓪᓗᐊᕐᓂᖓᓂ ᖃᕋᓴᐅᔭᒃᑰᕐᓂᕐᒥ ᓱᒃᑲᓂᐅᔪᓂ ᕙᐃᐸᒨᖅᑐᓂ ᓂᐅᕕᖅᐸᒃᑐᓂ ᐊᒻᒪ ᐊᑐᐃᓐᓇᖃᖅᑎᑦᑎᓗᑎᒃ ᐊᑦᑎᒃᑐᒥ−ᓄᓇᕐᒧᐊᒥ ᐅᐃᔾᔮᕐᓂᖓᓂ ᖃᖓᑦᑕᖅᑎᑕᐅᓯᒪᔪᒥ ᓄᑖᙳᖅᐸᓪᓕᐅᔪᒥ ᓄᓇᓕᖕᓄᑦ ᓄᓇᕗᒻᒥ.

ᓄᐊᑦᐅᐃᔅᑎᐅᓪᒥ ᐊᖓᔪᖅᑳᖓ ᑰᑎᔅ ᓵ ᑕᐃᓯᓚᐅᖅᐳᖅ ᐱᓕᕆᓂᐅᔪᒥ ᐊᖏᔪᒻᒪᕆᐊᓗᖕᒥ ᐃᖏᕐᕋᓂᐅᔪᒥ ᑮᓇᐅᔾᔭᒃᓴᓂᕐᒧᑦ ᓴᐃᒻᒪᖃᑎᒌᖕᓂᐅᔪᒥ.

“ᐅᑕᖅᑭᔪᓐᓇᙱᓚᖓ ᑭᓱᓂ ᐅᖓᕙᕆᐊᖅᑕᐅᓂᐅᓂᐊᖅᑐᓂ ᐅᓇ ᓄᑖᖑᔪᖅ ᐱᖠᕆᖃᑎᒌᖕᓂᐅᔪᒥ ᓇᒃᓴᕐᓂᐊᕐᓂᖓᓂ ᐅᑭᐅᖅᑕᖅᑐᒥ ᑲᓇᑕᒧᑦ,” ᓵ ᐅᖃᓚᐅᖅᐳᖅ ᐱᓇᓱᐊᕈᓯᐅᓚᐅᖅᑐᒥ ᐅᖃᐅᓯᒃᓴᓕᐊᖓᓂ.

“ᖁᔭᓕᕗᒍᑦ ᓯᕗᓕᐅᖅᑎᐅᓂᐅᔪᓂ ᐊᒻᒪ ᐃᑲᔪᖅᓯᖅᑕᐅᓂᐅᔪᓂ ᐱᓚᐅᖅᑕᑦᑎᓐᓂ Bell Canada−ᒥ ᖄᖏᖅᓯᒪᔪᓂ ᐊᕐᕌᒍᓄᑦ 36−ᓄᑦ ᐊᒻᒪ ᐅᑕᖅᑭᔪᓐᓇᙱᓚᖓ ᐱᒋᐊᕐᓂᐊᕐᓂᕐᒥ ᐆᒥᖓ ᓄᑖᖑᔪᒥ ᐱᓕᕆᓂᐅᔪᒥ Sixty North Unity−ᑯᓐᓂ.”

Bell Canada ᐅᖃᓚᐅᖅᐳᖅ ᑲᒻᐸᓂ ᐸᕐᓇᒃᐳᖅ ᐊᑐᕐᓂᕐᒥ ᑮᓇᐅᔭᓕᐊᖑᔪᓂ ᓂᐅᕕᖅᑕᐅᓂᖓᓂ ᐊᑭᓖᓂᕐᒥ ᐃᓚᖏᓐᓂ ᐊᑭᓕᒃᓴᐅᔪᓂ. ᑮᓇᐅᔭᒧᑦ ᐱᓕᕆᐊᖑᔪᖅ ᒪᓕᖕᓂᖃᕐᓂᐊᖅᐳᖅ ᐋᖅᑭᒋᐊᖅᑕᐅᓂᐅᔪᓂ ᐊᒻᒪ ᐃᓚᖏᓐᓂ ᒪᑐᕙᓪᓕᐊᓂᖓᓂ ᖃᓄᐃᓕᖓᓂᐅᔪᓄᑦ, ᑲᒻᐸᓂᒃᑯᑦ ᑐᓴᒐᒃᓴᓕᐊᖓ ᐅᖃᓚᐅᖅᐳᖅ.

Sixty North Unity ᐋᖅᑭᐅᒪᑎᑦᑏᓐᓇᕐᓂᐊᖅᐳᖅ ᐱᑕᖃᖅᐸᒌᖅᑐᒥ ᓄᐊᑦᐅᐃᔅᑎᐅᓪᒥ ᑲᑎᙵᓂᐅᔪᓂ, ᐃᓚᖃᖅᑐᒥ ᒫᓐᓇᐅᔪᒥ ᐊᖓᔪᖅᑳᖓᓂ ᓵᒥ, ᐊᒻᒪ ᐱᓕᕆᕙᓪᓕᐊᓗᑎᒃ ᐊᖏᒡᓕᒋᐊᕐᓂᐅᔪᒥ ᓄᓇᖃᖅᑳᖅᓯᒪᔪᓂ ᑭᒡᒐᖅᑐᐃᓂᐅᔪᒥ ᐃᖅᑲᓇᐃᔭᖅᑎᖁᑎᖏᓐᓂ ᐃᓚᒋᔭᐅᓗᓂ ᐊᖏᒡᓕᒋᐊᖅᑐᒥ ᐱᓕᒻᒪᒃᓴᓂᐅᔪᒥ ᐊᒻᒪ ᐃᓇᑦᑎᔨᖃᕐᓂᐅᔪᒥ.

“ᐅᓇ ᐱᓂᐅᔪᖅ ᐅᕙᑦᑎᓐᓂ ᐱᔪᓐᓇᖅᑎᑦᑎᕗᖅ ᑐᕌᖅᑎᑦᑎᓂᕐᒥ ᑭᐅᖏᓐᓇᕐᓂᕐᒥ ᐱᓪᓚᕆᐅᔪᒥ ᐃᓚᑰᓂᐅᔪᒥ ᑐᓴᐅᒪᑎᑦᑎᔾᔪᑎᓂ ᐱᔨᑦᑎᕋᕐᓂᐅᔪᒥ ᐅᑭᐅᖅᑕᖅᑐᒥ ᓄᓇᓕᑦᑎᓐᓂ,” ᐅᒥᓪᒍᐃᑦᑐᖅ ᐅᖃᓚᐅᖅᐳᖅ.

“ᐊᖏᒡᓕᒋᐊᖅᑐᒥ ᑲᑎᖅᓱᖅᑕᐅᕙᓪᓕᐊᔪᓂ ᑮᓇᐅᔭᓂ ᑐᖅᑯᖅᑕᐅᓯᒪᓪᓗᑎᒃ ᐱᕈᖅᐸᓪᓕᐊᑎᑕᐅᔪᓂ ᕙᐃᐸᒥ ᐊᒻᒪ ᐊᑦᑎᒃᑐᒥ ᓄᓇᕐᔪᐊᒥ ᐅᐊᔾᔮᕐᓂᖓᓂ ᓄᓇᓖᑦ ᐊᑐᖅᐸᒃᑕᖏᓐᓂ ᐊᐅᓚᔪᓐᓇᖁᓪᓗᒋᑦ ᐱᔪᓐᓇᕐᓂᖃᖅᐳᖅ ᐊᓯᔾᔨᖅᓯᓂᖓᓂ ᐅᑭᐅᖅᑕᖅᑐᒥ ᐊᒻᒪ ᐅᕙᑦᑎᓐᓂ ᐃᓕᓯᓗᓂ ᓇᓕᒧᑦᑐᒥ ᑐᖕᒪᕐᓂᐅᔪᒥ ᐊᒥᐊᒃᑯᖓᓂ ᑲᓇᑕᒥ.”