‘ᑭᓱᓕᕆᔭᒃᓴᖃᙱᑦᑐᑦ’ ᓱᕈᓰᑦ ᐅᔭᕋᖕᓂ ᒥᓪᓗᖃᑦᑕᖅᑐᑦ ᑖᒃᓯᓂᒃ, ᐃᖃᓗᐃᑦ ᒪᐃᔭᖓ ᐅᖃᖅᑐᖅ

ᓄᓇᓕᐸᐅᔭᐃᑦ ᑭᓱᓕᕆᔭᒃᓴᖃᙱᓗᐊᕐᓂᕐᒥᒃ ᐱᓕᕆᐊᖃᕆᐊᖃᖅᑐᑦ ᐊᒻᒪᓗ ‘ᐅᖃᓪᓚᖃᑎᖃᓪᓚᕆᒡᓗᑎᒃ’ ᐊᔾᔨᒌᒃᑎᑦᑎᕙᙱᓐᓂᕐᒥᒃ, ᒪᐃᔭ ᑭᐊᓂ ᐱᐊᓪ ᐅᖃᓚᐅᕐᑐᖅ ᖃᓄᐃᓕᔪᖄᓪᓚᓚᐅᖅᖢᓂ ᐱᓇᓱᐊᕈᓯᐅᑉ ᓄᙳᐊᓂ

ᐃᖃᓗᖕᓂ ᑖᒃᓯᓂ ᐊᖁᑎᐅᔪᑦ ᓄᓇᓯᐅᑎᖏᓐᓂᒃ ᓄᖅᑲᖅᑎᑦᑎᓚᐅᕐᑐᑦ ᓈᑦᑏᖑᔭᓛᕐᓂᐊᑉ ᐅᓐᓄᖓᓂᒃ ᓈᒻᒪᒃᓴᙱᓐᓂᕐᒥᖕᓂᒃ ᖃᐅᔨᒪᑎᑦᑎᓇᓱᒃᖢᑎᒃ ᐆᒥᖓ ᐸᒡᕕᓵᕆᔭᐅᕙᖕᓂᕐᒥᒃ ᐊᒻᒪ ᐊᔾᔨᒌᙱᑦᑎᑕᐅᕙᖕᓂᕐᒥᒃ ᐃᖅᑲᓇᐃᔮᖏᑦᑎᒍ ᐊᑐᖃᑦᑕᖅᑕᖏᓐᓂᒃ. (ᐊᔾᔨᓕᐅᕆᔨᒃ ᐱᐅᓪ ᕗᐃᓕᐊᒻᔅ)

By ᑕᐃᕕᑦ ᓛᕼᐄᑦ ᐊᒻᒪ ᑰᕆ ᓚᐅᕌᒃ

For an English version of this story, see ‘Bored’ kids responsible for throwing rocks at taxis, Iqaluit mayor says

ᑭᓱᓕᕆᔭᒃᓴᖃᙱᓗᐊᕐᓂᖏᑦ ᐃᓚᖏᑦ ᐃᖃᓗᖕᓂ ᓱᕈᓰ 12 ᑐᖔᓂ ᐊᕐᕌᒍᓖᑦ ᖃᓄᐃᓕᐅᖅᑎᑦᑎᓗᐊᓕᓚᐅᕐᑐᑦ ᐅᔭᕋᖕᓂᒃ ᒥᓗᕆᐊᑲᑕᒃᑎᓪᓗᒋᑦ ᑖᒃᓯᓕᕆᔨᓄᑦ ᑕᐃᒪᓐᓇᓗ ᑖᒃᑯᐊ ᑖᒃᓯᓕᕆᔩᑦ ᐊᑯᑲᑕᒍᓐᓃᓚᐅᖅᓯᒪᓪᓗᑎᒃ ᐃᑲᕐᕋᒐᓴᒻᒪᕆᖕᓂᒃ ᓈᑦᑏᖑᔭᓛᕐᓂᐊᑉ ᐅᓐᓄᖓᓂ, ᒪᐃᔭ ᑭᐊᓂ ᐱᐊᓪ ᐅᖃᓚᐅᕐᑐᖅ.

ᐱᐊᓪ ᑲᑎᒪᑎᑦᑎᓚᐅᕐᑐᖅ ᓇᒡᒐᔾᔭᐅᒥ ᐅᓐᓄᓴᒃᑯᑦ ᐅᑯᓇᙶᖅᓯᒪᔪᓂᒃ ᓄᓇᓕᐸᐅᔭᓂᒃ, ᐸᓖᓯᒃᑯᓐᓂᒃ, ᒪᓕᒐᓕᕆᔨᒃᑯᓐᓂᒃ, ᑖᒃᓯᓕᕆᔨᒃᑯᓐᓂᒃ ᐊᒻᒪ ᐊᖅᑯᑎᒋᐅᔪᓂᒃ ᑕᒪᒃᑯᐊ ᑖᒃᓯᓄᑦ ᐊᖅᑯᑎᐅᔪᑦ ᖃᓄᖅ ᐊᑦᑕᓇᖅᑐᒦᙱᓐᓂᖅᓴᐅᔪᕐᓇᕋᔭᕐᓂᖏᓐᓂᒃ ᐃᖅᑲᓇᐃᔮᖏᓐᓂᒃ.

ᐅᑯᓇ ᑖᒃᓯᓄᑦ ᐊᖅᑯᑎᔪᑦ ᐅᖃᕋᓗᐊᕐᑎᓪᓗᒋᑦ ᑕᒪᒃᑯᐊ ᖃᓄᐃᓕᐅᕈᑎᐅᔪᑦ ᐊᔾᔨᐅᙱᑎᑦᑎᓂᕐᒨᖓᓂᖏᓐᓂᒃ, ᐱᐊᓪ ᐅᖃᓚᐅᕐᑐᖅ ᑭᒃᑯᓪᓗᐊᑕᕐᓂᒃ ᑖᒃᑯᐊ ᒥᓪᓗᓚᐅᕋᓱᒋᙱᖢᓂᖏᑦ. ᑭᓯᐊᓂᓕ ᒪᐃᔭ ᐅᖃᓚᐅᕐᑐᖅ ᓄᓇᓖᑦ “ᐅᖃᐅᓯᖃᓪᓚᕆᒋᐊᖃᕐᓂᖏᓐᓂᒃ” ᐊᔾᔨᒌᙱᑎᑦᑎᕙᖕᓂᕐᒥᒃ.

“ᐃᓱᒪᔪᖓᓕ ᓱᕈᓰᑦ ᑭᓱᓕᕆᔭᒃᑲᖃᙱᓗᐊᖅᑐᑦ,” ᐱᐊᓪ ᐅᖃᓚᐅᕐᑐᖅ ᐊᐱᖅᓱᖅᑕᐅᑎᓪᓗᒍ ᑲᑎᒫᓂᒃᑎᓪᓗᒋᑦ. “ᑭᓱᓕᕆᔭᒃᓴᖃᙱᓐᓂᕐᒧᑦ ᐱᓕᕆᐊᖃᓕᖅᑐᒃ ᑐᑭᖃᙱᓗᐊᖅᑐᓂᒃ.”

ᐅᔭᕋᖕᓄ ᒥᓪᓗᖃᑦᑕᕐᓂᖅ ᑖᒃᓯᓄᑦ ᐊᑐᖅᑕᐅᓕᓵᙱᑦᑐᖅ ᓄᓇᕗᑦ ᐊᖓᔪᖅᑳᖃᕐᕕᖓᓂ ᑕᒪᓐᓇᓗ ᐊᕐᕌᒎᓕᖅᑐᓂᒃ ᐊᓂᒍᓵᖅᓯᒪᔪᓂᒃ ᑕᐃᒪᐃᓕᐅᑲᑕᓗᐊᖅᖢᑎᒃ, ᑖᒃᑯᐊᓗ ᓄᓇᓖᑦ ᐊᔾᔨᒌᙱᑦᑑᑎᓂᒃ ᐃᓄᖃᖅᐸᓪᓕᐊᓂᖏᓐᓄᑦ ᕿᕐᓂᖅᑕᓂᒃ ᐅᓄᕈᓘᔭᖅᑐᓂ ᐱᑕᖃᓕᕐᒥᖕᒪᑦ ᓄᓇᓕᖕᓂᒃ. ᐅᓄᕈᓘᔭᕐᒪᑕ ᑖᒃᓯᓄᑦ ᐊᖁᑎᐅᕙᒃᑐᑦ ᕿᕐᓂᖅᑑᖕᒪᑕ. ᐊᖓᔪᖅᑳᕆᔭᐅᔪᓂᒃ ᓱᕈᓯᖏᓐᓄᑦ ᐅᖃᓪᓚᒃᑎᑦᑎᖃᑦᑕᕐᓂᖅ ᐊᔾᔨᒌᒃᑎᑦᑎᕙᙱᓐᓂᕐᒥᒃ ᐊᒻᒪᓗ ᐅᓗᕆᐊᓇᕈᑎᓂᒃ ᐅᕝᕙᓘᓐᓃᑦ ᐅᔭᕋᖕᓄ ᒥᓪᓗᖃᑦᑕᕐᓂᖅ ᐃᓚᒋᔭᐅᔪᑦ ᓄᓇᓕᐸᐅᔭᓄᑦ ᐊᒻᒪ ᐸᓖᓯᓄᑦ ᐱᓕᕆᐊᖑᔭᕆᐊᖃᕐᓂᐊᖅᑐᓂᒃ ᑲᑎᒫᓚᓚᐅᖅᖢᑎᒃ ᓇᒡᒐᔾᔭᐅᒥᑦ, ᐱᐊᓪ ᐅᖃᖅᑐᖅ.

ᓈᑦᑏᖑᔭᐅᓚᐅᕐᑐᒥᓐ, 6 ᑖᒃᓯᓂᒃ ᐊᖁᑎᐅᔪᑦ ᐅᖃᐅᓯᖃᓚᐅᕐᓯᒪᖕᒪᑕ ᐅᔭᕋᖕᓄᑦ ᒥᓪᓗᖅᑕᐅᑲᑕᖕᓂᕐᒧᑦ ᖃᓄᐃᓕᒍᑎᓂᒃ — ᐱᖓᓱᓂᒡᓗ ᓄᓇᓯᐅᑏᑦ ᐃᒐᓛᖏᓐᓂ ᓄᑎᒍᑎᐅᓚᐅᖅᖢᓂ — ᓄᓇᓕᐸᐅᔭᐃᑦ ᒪᓕᒐᕋᓛᓕᕆᔨᖏᓐᓄᑦ ᐊᒻᒪ ᐸᓖᓯᒃᑯᓐᓄᑦ. ᓄᓇᓕᖕᓄᓪᓕ ᒪᓕᒐᕋᓛᓕᕆᔨᓄᑦ ᐊᖅᑭᑦᑐᖓᓴᒍᑎᐅᓂᕋᖅᑕᐅᓚᐅᕐᒪᑦ ᐊᒻᒪᓗ ᐸᓖᓯᒃᑯᓐᓄᑦ ᐱᓕᕆᐊᖑᔭᕆᐊᖃᕆᔭᐅᓪᓗᓂ, ᑭᓯᐊᓂᓕ ᐸᓖᓯᒃᑯᑦᑕᐅᖅ ᐊᓯᖏᓐᓂᒃ ᐱᓕᕆᐊᖃᓚᐅᕐᒥᖕᒪᑕ ᐊᑕᐅᑦᑎᒃᑰᖅᑐᓂᒃ.

ᑐᒃᑐ ᑖᒃᓯᓄᑦ ᓇᖕᒥᓂᖃᖅᑎ ᑖᓂ ᓴᕚᑦ ᐸᓖᓯᒃᑯᑦ ᑕᒪᑐᒧᖓ ᐅᖃᕐᕕᐊᖃᑦᑕᖅᓯᒫᓂᖕᓂᖏᓐᓂᒃ ᑭᓯᐊᓂᓕ ᐃᓚᐃᓐᓇᑯᓗᖏᓐᓄᑦ ᑭᐅᔾᔪᑎᖃᖃᑦᑕᓚᐅᕐᒪᑕ. ᐸᓖᓯᒃᑯᑦ ᑕᒪᑐᒧᖓ ᑭᐅᓚᐅᙱᒻᒪᑕ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ.

ᑖᓂᐅᓪ ᕗᕇᔨ, ᑖᒃᓯᒥ ᐊᖁᑎᐅᔪᖅ, ᐅᖃᓚᐅᖅᑐᖅ ᐃᒥᐊᓘᑎᒥᒃ ᒥᓗᕆᐊᖅᑕᐅᓚᐅᕐᓯᒪᓂᖓᓂᒃ ᓄᓇᓯᐅᑎᖓᓃᖢᓂ. ᐃᓚᒋᔭᐅᓚᐅᕐᑐᕐᓕ ᑖᒃᓯᓂ ᐊᖅᑯᑎᓂ ᓄᖅᑲᓚᐅᕐᑐᓂᒃ ᓈᑦᑏᖑᔭᓛᕐᓂᐊᑉ ᐅᓐᓄᖓᓂᒃ ᓄᓇᓯᐅᑎᒋᔭᐅᔪᓂᒃ ᒥᓪᓗᖅᑐᖃᑲᑕᓗᐊᓚᐅᕐᑎᓪᓗᒍ. (ᐊᔾᔨᙳᐊᖅ ᐅᕙᙵᑦ ᑕᐃᕕ ᓛᕼᐄᑦ)

ᑕᒪᒃᑯᓄᖓ ᑭᐅᔭᐅᑲᑕᙱᓗᐊᕐᓂᕐᒧᑦ ᑖᒃᓯᓕᕆᔨᐅᔪᑦ ᓄᓇᓯᐅᑎᖏᓐᓂᒃ ᓄᖅᑲᖅᑎᑦᑎᓕᓚᐅᕐᒪᑕ ᐅᖃᖅᖢᑎᒃ ᐊᖁᑎᑦ ᐱᑦᑎᐊᙱᓐᓂᐊᓗᖕᒥᒃ ᐊᒻᒪ ᐊᔾᔨᒌᙱᑎᑦᑎᓗᐊᕐᓂᐊᓗᖕᒥ ᓵᙵᐃᓐᓇᐅᔭᕐᓂᕋᖅᖢᑎᒃ ᐃᖅᑲᓇᐃᔮᖏᑦᑎᒍᑦ. ᑕᐃᒪᐃᓐᓂᖓᓄᓪᓗ ᓇᖕᒥᓂᕆᔭᐅᔪᓂᒃ, ᐃᓚᖃᖅᖢᑎᒃ ᐃᒥᕆᐊᖅᑐᕐᕕᖕᓂᒃ ᒪᑐᑎᑦᑎᓕᓚᐅᕐᑐᑦ.

“ᐅᓇ ᑕᐃᒪᐃᔾᔪᑎᐅᓗᐊᓕᓚᐅᕐᑐᖅ ᑖᒃᑯᐊ ᐊᖁᑎᒋᔭᐅᔪᑦ ᑐᓵᔭᐅᙱᓗᐊᕋᓱᒋᓕᕐᓂᖏᓐᓄᑦ,” ᐱᐊᓪ ᐅᖃᖅᑐᖅ.

ᓇᒡᒐᔾᔭᐅᑎᓪᓗᒍ, ᑖᓂᐅᓪ ᕗᕆᔨ, ᐊᖁᑎᒋᔭᐅᔪᖅ ᑐᒃᑐ ᑖᒃᓯᒧᑦ, ᐅᖃᓚᐅᕐᑐᖅ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ ᓈᒻᒪᒃᓴᙱᑦᑐᓂᒃ ᐃᓚᐅᓕᓚᐅᕐᓂᖓᓄᑦ ᓲᖃᐃᒻᒪ ᓇᖕᒥᓂᖅ ᓄᓇᓯᐅᑎᖓᑕ ᐃᒐᓛᖓ ᓱᕋᒃᑕᐅᓚᐅᕐᓯᒪᖕᒪᑦ ᐅᔭᕋᖕᓄᑦ ᒥᓪᓗᕈᑎᒋᔭᐅᔪᓄᑦ.

ᐋᒃᓯᒥ ᐊᖁᑎᐅᔪᑦ ᓇᖕᒥᓂᖅ ᓄᓇᓯᐅᑎᖃᖅᑐ ᐊᑭᓖᖃᑦᑕᕆᐊᖃᕐᒪᑕ ᓱᕋᒃᑕᐅᔪᓂᒃ, ᕗᕆᔨ ᐅᖃᓚᐅᕐᑐᖅ ᐅᖃᖅᖢᓂ ᐊᑭᓖᔭᕆᐊᖃᓚᐅᕐᓯᒪᓂᖓᓂᒃ $1,500 ᐃᒐᓛᖓᓄᑦ.

“ᓇᖕᒥᓂᖅ ᓄᓇᓯᐅᑎᒋᒐᒃᑯ, ᐋᖅᑭᒃᓱᖃᑦᑕᕆᐊᖃᕋᒃᑯ,” ᕗᕆᔨ ᐅᖃᖅᑐᖅ, ᐅᖃᒃᑲᓐᓂᖅᖢᓂ ᓄᓇᓯᐅᑎᓂᒃ ᓴᓇᕙᒃᑐᑦ ᐃᖃᓗᖕᓂ ᐊᑭᑐᔪᐊᓘᓂᕋᖅᖢᓂᒋ ᐊᒻᒪᓗ ᐃᓛᓐᓇ ᐱᓇᓱᐊᕈᓯᕐᓂᒃ ᐱᖓᓱᓂᒃ ᐃᓚᒃᓴᓂᒃ ᐅᑕᖅᑭᕙᒃᖢᑎᒃ.

ᑕᒪᒃᑯᓇᙵᑦ ᐅᔭᕋᖕᓂ ᒥᓪᓗᖅᐸᒃᑲᓗᐊᖅᖢᑎᒃ ᐅᖃᓚᐅᕐᒥᔪᖅ ᐃᒥᐊᓘᑎᒃᑯᕕᖕᒧᑦ ᒥᓗᕆᐊᖅᑕᐅᓚᐅᕐᓯᒪᓂᖓᓂᒃ.

ᕗᕆᔨ ᐅᖃᓚᐅᕐᑐᖅ ᐅᓇ ᓄᐊᑦᒫᓪᓗ ᑏᔭᐃ ᓂᐅᕕᕐᕕᕋᓛᓪᓗ ᖃᓂᒋᔭᖏᑦ ᐱᐅᙱᓗᐊᖅᑐᐊᓘᖕᒪᑕ ᒥᓪᓗᖅᑐᓄᑦ. ᑕᒫᙵᓪᓕ ᒥᓪᓗᖃᑦᑕᑐᓄᑦ ᐊᒻᒪᓗ ᐸᓖᓯᓄᑦ ᑭᐅᔭᐅᙱᓗᐊᕐᓂᖅ ᐃᓚᒋᓪᓗᒍ ᑖᒃᓯᓕᕆᔨᓄᒃ ᓄᖅᑲᖓᒍᑎᐅᓚᐅᕐᑐᖅ ᓈᑦᑎᖑᔭᓛᕐᓂᐊᕐᒥᓐ ᐅᖃᒃᑲᓐᓂᖅᑐᖅ.

ᒪᐃᔭ ᐅᖃᓚᐅᕐᒪ ᐃᓚᒋᔭᐅᔪᕐᓕ ᐋᖅᑭᒋᐊᕈᑎᐅᓇᔭᖅᑐᓄᑦ ᓇᓂᓯᓇᓱᒡᓗᑎᒃ ᐃᓅᓱᒃᑐᓄᑦ ᖃᓄᐃᓕᐅᕈᑎᐅᔪᓐᓇᖅᑐᓂᒃ ᑖᒃᑯᐊ ᑖᒃᓯᓄᑦ ᐊᖁᑏᑦ ᓴᐳᔾᔭᐅᓯᒪᔾᔪᒥᓂᐊᕐᒪᑕ ᐃᖅᑲᓇᐃᔭᖅᑎᓪᓗᒋᑦ ᐊᒻᒪᓗ ᐃᑭᒪᔨᒋᕙᒃᑕᖏᑦ.

ᐸᓖᓯᒃᑯᑦ ᐊᒻᒪ ᓄᓇᓕᐸᐅᔭᓄᑦ ᐱᓕᕆᔨᒻᒪᕆᐅᔪᑦ ᐃᓚᖏᓐᓄᑦ ᐃᒡᓗᓄᑦ ᐳᓚᕋᕐᓂᐊᖅᑐᑦ ᓇᓗᓇᐃᖅᑕᐅᓯᒪᔪᓄᑦ ᑖᒃᓯᓕᕿᔨᓄᑦ ᐊᖓᔪᖅᑳᕆᔭᐅᔪᑦ ᐅᖃᓪᓚᖃᑎᒋᔭᐅᔪᓐᓇᕐᓂᐊᕐᒪᑕ ᐱᒻᒪᕆᐊᓘᓂᖓᓂᒃ ᐱᕐᕈᓗᐊᕿᑎᑦᑎᑦᑕᐃᓕᓂᖅ ᐊᒻᒪ ᐃᓱᒪᒋᔭᖃᑦᑎᐊᕆᐊᖃᕐᓂᖅ.

“ᐱᓕᕆᐊᖃᓕᕈᒪᙱᓐᓇᑦᑕ ᖃᓄᐃᓕᐅᖅᑎᑦᑎᓂᐊᕈᒪᓗᑕ. ᐅᐸᑲᑕᒋᐊᖃᕋᑦᑕ ᐃᑲᔪᖃᑦᑎᒌᒍᒪᓂᕐᒧᑦ,” ᐱᐊᓪ ᐅᖃᖅᑐᖅ.

ᐃᓱᒪᒃᓴᕐᓯᐅᓚᐅᑲᖕᓂᐊᖅᑐᑦ ᐃᓕᓐᓂᐊᕐᕕᖕᓄᑦ ᐅᐸᒍᑎᓂᐊᕐᓂᕐᒥᒃ ᐃᓚᒋᔭᐅᓗᑎᒃ ᐃᑯᐊᓪᓚᒃᑎᑦᑎᑦᑕᐅᓕᓂᕐᒧᑦ ᐱᓕᕆᐊᖃᖅᑐᓂᒃ ᑖᒃᑯᐊᓗ ᐃᓕᓐᓂᐊᖅᑐᓄᑦ ᖃᓄᐃᓕᐅᕈᑎᖃᖅᓯᒫᓂᓕᖅᖢᑎᒃ.

ᐅᒃᑑᐱᕆ 4-ᒥᑦ ᑕᒪᑐᒧᖓ ᖃᐅᔨᒋᐊᖅᑎᑕᐅᓛᕐᑐᑦ ᖃᓄᐃᓕᐅᓕᕐᒪᖔᑦ ᐅᑯᐊ ᓄᓇᓕᐸᐅᔭᐃᑦ ᐱᕐᕈᓗᐊᕿᑎᑦᑎᑦᑕᐃᓕᓂᕐᒧᑦ ᑲᑎᒪᔨᕋᓛᑦ ᑲᑎᒪᓕᖅᐸᑕ, ᑖᒃᑯᐊᓗ ᐃᒃᓯᕙᐅᑕᕆᔭᐅᓪᓗᓂ ᐱᐊᓪ ᑖᒃᑯᓄᖓ.

ᓄᓇᓖᑦ ᓄᓇᓕᖕᓃᑦᑐᓄᑦ ᐃᓱᒪᒋᔭᐅᑦᑎᐊᕆᐊᖃᕐᒪᑕ ᖃᐅᔨᒪᑎᑕᐅᓗᑎᒡᓗ, ᒪᐃᔭ ᐅᖃᖅᑐᖅ.

“ᐃᓚᖏᑦ ᓱᕈᓰᑦ ᓱᖁᑎᒋᔭᐅᓇᓱᒋᙱᓗᐊᖃᑦᑕᕐᒪᑕ ᐃᑲᔪᖅᑕᐅᓇᓱᒋᙱᖢᑎᒃ,”

ᑕᒪᐅᓇᑦᑕᐃᓐᓇ ᐊᖓᔪᖅᑳᖑᔪᑦ ᑲᒪᒋᔭᒃᓴᖃᕐᒪᑕ ᓱᕈᓯᖏᓐᓂᒃ ᖃᐅᔨᒪᑎᑦᑎᓗᑎᒃ ᐊᔾᔨᒌᙱᑎᑦᑎᓂᖅ ᓈᒻᒪᙱᓐᓂᖓᓂᒃ.

“ᐅᖃᓪᓚᖃᑎᖃᒻᒪᕆᒋᐊᖃᕋᑦᑕ ᐱᓪᓚᕆᖕᓂ ᐊᒻᒪᓗ ᖃᓄᕐᓘᑎᐅᓂᕋᐃᑲᑕᖕᓂᕐᒥᒃ ᐊᓂᒍᐃᓗᑕ. ᑕᐃᒪᓕ ᐊᖓᔪᖅᑳᓄᑦ ᐅᖃᕈᒪᓪᓗᖓ ᓱᕈᓯᖏᓐᓄᑦ ᐅᖃᓪᓚᖁᓪᓗᒋᑦ ᐅᔭᕋᖕᓂᒃ ᒥᓪᓗᖃᑦᑕᕐᓂᕐᒥᒃ.” — ᒪᐃᔨ ᑭᐊᓂ ᐱᐊᓪ

ᐱᐊᓪ ᐅᖃᓚᐅᕐᑐᖅ ᑖᒃᓯᓄᑦ ᐊᖁᑏᑦ ᐅᓗᕆᐊᓇᙱᑦᑐᒥᒃ ᐃᖅᑲᓇᐃᔭᕐᕕᖃᖃᑦᑕᕆᐊᖃᕐᓂᖏᓐᓂᒃ ᐊᒻᒪᓗ ᐱᒻᒪᕆᐊᓘᖃᑕᐅᓂᖏᓐᓂᒃ ᓇᒧᙵᐅᔭᕆᐊᖃᖅᐸᖕᓂᕐᒧᑦ, ᐱᓗᐊᖅᑐᒥ ᓄᓇᓖᒃ ᑭᒃᑯᓕᒫᓅᖓᔪᓄᑦ ᐸᓯᖃᙱᒃᑯᑎᒃ.

“ᐊᖅᑯᑎᑦᑎᓐᓃᑦᑕᕆᐊᖃᕐᒪᑕ,” ᒪᐃᔭ ᐅᖃᖅᑐᖅ.

 

Share This Story

(0) Comments

Join the Conversation

Your email address will not be published. Required fields are marked *

*