ᑭᖑᓪᓕᖅᐹᖅ ᓄᕙᒡᔪᐊᕐᓇᖅ-19-ᒥ ᐋᓐᓂᐊᖃᖅᑐᑦ ᐃᓱᒫᓘᑎᐅᕗᖅ ᐆᒥᖓ ᓄᓇᕕᒻᒧᑦ ᐃᖅᑲᓇᐃᔭᕆᐊᖃᑦᑕᖅᑐᓂ
ᑲᑎᕕᒃ ᐃᓕᓴᕐᓂᓕᕆᓂᒃᑯᑦ ᐅᖃᖅᑐᑦ ᖃᐅᔨᓴᕐᓂᖏᓐᓂᒃ ᐋᓐᓂᐊᖅᑖᖅᓯᒪᔪᒥ ᖃᖓᑕᑎᑕᐅᔪᕕᓂᕐᒥ ᐅᕗᖓ ᓴᓪᓗᐃᑦ
ᑲᑎᕕᒃ ᐃᓕᓴᕐᓂᓕᕆᓂᒃᑯᑦ ᖃᐅᔨᓴᕐᓂᖏᓐᓂᒃ ᖃᓄᐊᓗᒃ ᐃᒡᓗᓕᐅᖅᑎ ᐋᓐᓂᐊᖅᑖᕐᓯᒪᔪᖅ ᓄᕙᒡᔪᐊᕐᓇᖅ-19-ᒥ ᖃᖓᑕᑎᑕᐅᔪᓐᓇᓚᐅᕐᓂᖓᓂ ᓴᓪᓗᐃᑦᓄᑦ ᑕᒪᑐᒪᓂ ᑕᖅᑭ. (ᐊᔾᔨᙳᐊᖁᑎᒋᔭᐅᔪᖅ)
For an English version of this story, see Latest COVID-19 case raises concerns over Nunavik’s protocols for out-of-region workers
ᐃᒡᓗᓕᐅᖅᑎᐅᖃᑕᐅᔪᖅ ᓄᓇᕕᒻᒧᐊᓚᐅᕐᑐᖅ ᑕᒪᓐᓇ ᑕᕿᖅ ᐱᒋᐊᕐᓯᒪᓕᕐᑎᓪᓗᒍ ᐊᐃᑦᑐᖅᑕᐅᓯᒪᓪᓗᓂ ᓄᕙᒡᔪᐊᕐᓇᖅ-19-ᒥ ᑕᒫᓃᑦᑐᓐᓃᕐᑐᖅ, ᑭᓯᐊᓂᓕ ᑖᓐᓇ ᐃᓱᒫᓘᑎᐅᓕᕐᑐᖅ ᖃᓄᐃᓕᐅᕈᑎᐅᔪᓂᒃ ᐃᖅᑲᓇᐃᔭᖅᑎᓄᑦ ᓄᓇᕕᓕᐊᖃᑦᑕᖅᑐᓄᑦ.
ᑕᓪᓕᒪᑦ ᓴᓇᑎᑕᐅᔪᑦ ᑳᓐᑐᕌᒃᑏᓐ ᔪᓚᐃ 10-ᒥᑦ ᓴᓪᓗᐃᑦᓄᑦ ᑎᑭᓚᐅᕐᓯᒪᔪᑦ ᓴᓇᔭᖅᑐᖅᖢᑎᒃ ᐅᑯᓄᖓ ᑲᑎᕕᒃ ᐃᓕᓴᕐᓂᓕᕆᓂᒃᑯᓐᓄᑦ, ᓄᓇᕕᒻᒥ ᐃᓕᓐᓂᐊᕐᓂᓕᕆᔨᒃᑯᑦ.
ᑖᒃᑯᐊ ᓴᓇᔩᑦ ᐅᖃᓚᐅᕐᓯᒪᔪᑦ ᓄᕙᒡᔪᐊᕐᓇᖅ-19-ᒧᑦ ᖃᐅᔨᓴᖅᑕᐅᓚᐅᕐᓂᕋᖅᖢᑎ ᐃᑭᓚᐅᙱᓐᓂᖏᓐᓂᒃ ᐅᑭᐅᕐᑕᖅᑐᕐᒧᐊᓂᐊᖅᑐᒧᑦ, ᑖᒃᑯᐊᓕ ᐃᓚᖓᑦ ᐋᓐᓂᐊᖃᕐᓂᕋᖅᑕᐅᓪᓗᓂ. ᐋᓐᓂᐊᖃᕐᓂᕋᖅᑕᐅᔪᖅ ᓄᖃᖅᑎᑕᐅᓚᐅᕐᓯᒪᔪᖅ ᓴᓪᓗᐃᑦ ᖃᖓᑕᓲᒃᑯᕕᐊᓂᒃ ᑕᐃᑯᖓ ᑎᑭᑎᓪᓗᒍ ᐊᒻᒪ ᐃᓄᑑᓐᓇᖅᑐᒧᐊᖅᑕᐅᓪᓗᓂ.
ᓄᓇᑦᓯᐊᕐᒥ ᐱᕙᓪᓕᐊᔪᑦ ᖃᐅᔨᓚᐅᙱᑦᑐᑦ ᖃᐅᔨᓴᖅᑕᐅᒍᑎᕕᓂᕐᓂ ᑎᓴᒪᑦ ᐃᖅᑲᓇᐃᔭᖅᑎᐅᖃᑕᐅᔪᑦ, ᑭᓯᐊᓂᓕ ᑖᒃᑯᐊ ᑕᓪᓕᒪᑦ ᐊᐅᓪᓚᖅᑎᑕᐅᓚᐅᕐᑐᑦ ᑕᒫᙵᑦ ᔪᓚᐃ 14-ᒥᑦ ᐊᒻᒪ 15-ᒥᑦ, ᐅᑯᐊ ᐅᑭᐅᕐᑕᖅᑐᕐᒥ ᓄᓇᖃᖅᑐᑦ ᐅᖃᓚᐅᕐᑐᑦ.
“ᒫᓐᓇ ᖃᐅᔨᓴᖅᑐᒍᑦ ᑖᔅᓱᒥᖓ ᖃᓄᐃᓕᐅᕐᑐᖃᕐᓂᖓᓄᑦ ᐊᒻᒪᓗ ᐱᓕᕆᐊᕆᓂᐊᖅᖢᑎᒍᑦ ᓈᒻᒪᒃᑐᒃᑯᑦ,” ᑲᑎᕕᒃ ᐃᓕᓴᕐᓂᓕᕆᓂᒃᑯᑦ ᑐᑭᒧᐊᖅᑎᑦᑎᔨ ᐊᖓᔪᖅᑳᖅ ᕼᐃᐅᕆᐊᑦ ᑭᓕᐅᑕᒃ ᐅᖃᓚᐅᕐᑐᖅ ᑎᑎᕋᖅᑕᖏᓐᓂᒃ ᖃᕋᓴᐅᔭᒃᑯᑦ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ.
“ᓯᕗᓪᓕᐅᑎᔭᕆᐊᖃᖅᑕᕗᓪᓕ ᓄᓇᕕᒻᒥᐅᑎ ᓴᐳᑎᓯᒪᓗᑎᒍᑦ ᐅᑯᐊ ᐃᓕᓴᕐᓂᓕᕆᓂᒃᑯᑦ, ᐃᖅᑲᓇᐃᔭᖅᑎᖏ ᐊᒻᒪ ᓴᓇᑎᖃᑦᑕᖅᑕᖏᑦ ᒪᓕᒃᑎᑕᐅᓗᑎᒃ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᒪᓕᕈᔭᐅᔪᓂᒃ ᐊᒻᒪ ᑐᑭᒧᐊᕈᑎᓂᒃ.”
ᓄᓇᕕᒃ ᑐᐊᕕᕐᓇᖅᑐᓕᕆᔨᒃᑯᑦ ᑲᑎᒪᔨᖏᑦ (N-REPAC) ᐃᒡᓗᓕᐅᕐᓂᕐᒥᑦ ᒪᑐᐃᕐᓯᒃᑲᓐᓂᓚᐅᕐᑐ ᓄᓇᕕᒃᒥᑦ ᔪᓚᐃ 6-ᖑᑎᓪᓗᒍ, ᐋᖅᑭᒃᓯᓪᓗᑎᒃ ᓄᓇᕕᒻᒥᐅᑕᐅᙱᑦᑐᑦ ᓴᓇᔭᖅᑐᖅᐸᒃᑐᑦ ᑳᓐᑐᕌᑎᒍ ᐃᖅᑲᓇᐃᔭᖅᑎᖏᑦ ᐃᓄᑑᓐᓇᖅᑐᒦᑎᑕᐅᖃᑦᑕᕆᐊᖃᕐᓂᖏᓐᓂᒃ ᐊᒻᒪ ᖃᐅᔨᓴᖅᑕᐅᓗᑎᒃ.
ᑳᓐᑐᕌᒃᑎᐅᔪᑦ ᐅᖃᓕᒫᖃᑦᑕᖁᔭᐅᔪᑦ ᐊᒻᒪ ᐊᑎᓕᐅᕐᐸᒡᓗᑎᒃ ᒪᓕᖁᔭᐅᔪᓂᒃ ᐃᖅᑲᓇᐃᔭᖅᑎᖏᓐᓄᑦ ᓄᓇᕕᒻᒧᑦ ᐃᖅᑲᓇᐃᔭᕆᐊᖅᑐᖅᑐᓂᒃ.
ᑭᓯᐊᓂᓕ ᑖᓐᓇ ᒪᓕᒋᐊᓕᒃ, ᐋᖅᑭᒃᓱᖅᑕᐅᓯᒪᔪᖅ ᓄᓇᕕᒻᒥ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓂ ᐊᒻᒪ ᐃᓄᓕᕆᔨᒃᑯᓐᓄᑦ, ᓴᖅᑭᔮᖅᑎᑦᑎᓯᒪᖕᒪ ᐃᖅᑲᓇᐃᔭᖅᑎᐅᔪᑦ ᐅᓪᓗᓂ 14-ᓂ ᐃᓄᑑᓐᓇᙱᑦᑐᒦᙱᑦᑐᓐᓇᖅᑐ ᓄᓇᕕᒧᐊᓚᐅᖅᑎᓐᓇᒋᑦ.
“ᓴᓇᔨᐅᔪᑦ ᓄᓇᕕᓕᐊᕐᑐ ᐱᐅᒋᔭᐅᓂᕐᓴᐅᔪᑦ ᐃᓄᑑᓐᓇᖅᑐᒦᖃᑦᑕᕈᑎ ᐊᐅᓪᓚᓚᐅᙱᓐᓂᖏᓐᓂᒃ,” ᐊᑐᖁᔭᐅᔪᖅ ᐅᖃᕐᓯᒪᔪᖅ. “ᑕᒪᓐᓇ ᐊᔪᕐᓇᖅᐸᑦ, ᐃᓄᑑᓐᓇᖅᑐᒦᑦᑕᕆᐊᖃᖅᑐᖅ ᐅᑭᐅᕐᑕᖅᑐᕐᒥ.”
“ᓴᓇᔨᐅᔪᑦ ᐱᓕᕆᐊᒃᓴᖏᓐᓂᒃ ᐱᓕᕆᐊᖃᕈᓐᓴᖅᑐᑦ ᐃᓄᑑᑎᑕᐅᒐᓗᐊᕐᓗᑎᒃ, ᑕᐃᒪᓐᓇ ᐅᓗᕆᐊᓇᙱᓛᖑᓇᔭᕐᒪᑦ ᐊᐃᑦᑐᕐᓯᓗᐊᕐᓂᕐᒥᓐ,” ᐅᖃᕐᓯᒪᔪᖅ. “ᐃᓄᑑᓇᖅᑐᒦᖃᑦᑕᕆᐊᖃᖅᑐᑦ ᐃᖅᑲᓇᐃᔭᕈᓐᓃᕌᖓᑕ. ᐃᓄᑑᓐᓇᖅᑐᒦᖃᑦᑕᕆᐊᖃᖅᑐᑦ ᐅᓪᓗᓂᒃ 14-ᓂᒃ, ᑭᓯᐊᓂ ᑖᓐᓇ ᐊᕕᒃᑕᐅᓯᒪᔪᓐᓇᖅᖢᓂ ᐃᓚᖓ ᖃᓪᓗᓈᓃᓪᓗᓂ ᐃᒪᖓᓗ ᐅᑭᐅᕐᑕᖅᑐᕐᒥ.”
ᐅᑯᐊᓕ ᓴᓇᔨᐅᔪᑦ ᓴᓪᓗᐃᑦᓂ, ᑖᒃᑯᐊ ᓄᓇᓖ ᐃᓱᒪᓚᐅᕐᑐᑦ ᑖᓐᓇ ᐊᐃᑦᑐᖅᑕᐅᓯᒪᔪᖅ ᓴᓇᔨ ᓴᓇᓚᐅᕆᐊᒃᓴᖓᓂ ᐊᓯᐊᓂᒃ ᑯᐸᐃᒃ ᓂᒋᐊᓂ ᓄᓇᕕᒧᐊᓚᐅᖅᑎᓐᓇᒍ.
ᑭᓯᐊᓂᓕ ᓄᐊᑕᓐ ᕕᓕᔾᑯᑦ ᖃᐅᔨᒪᓚᐅᙱᓐᓂᕋᖅᑐᑦ ᖃᓄᐊᓗᒃ ᐃᑭᔪᓐᓇᓚᐅᕐᓂᖓᓂᒃ ᖃᐅᔨᓴᖅᑕᐅᒍᑎᖏᑦ ᖃᐅᔨᔭᐅᕌᓂᙱᑎᓪᓗᒍ.
ᐱᒋᐊᖅᖢᓂ ᔪᓚᐃ 14-ᒥᑦ, ᓄᓇᕕᓕᐊᖅᑐᑦ ᐃᒡᓗᓕᐅᕐᑎᐅᔪᑦ ᖃᐅᔨᓴᖅᑕᐅᖃᑦᑕᕆᐊᖃᓕᖅᑐᑦ ᑕᒪᐅᖓ ᐊᐅᓪᓚᓚᐅᙱᓐᓂᖏᓐᓂᒃ. ᖃᐅᔨᓴᖅᑕᐅᓐᓇᕐᓯᔪᒻ ᒪᓐᑐᕆᐊᒥ ᖃᖓᑕᓲᒃᑯᕕᒃᒥᑦ.
ᑕᒪᕐᒥᒃ ᓴᓇᔨᐅᔪᑦ ᖃᐅᔨᓴᖅᑕᐅᒃᑲᓐᓂᕆᐊᖃᕋᔭᖅᑐᑦ ᐅᓪᓗᑦ 7 ᐊᓂᒍᖅᐸᑕ ᓄᓇᕕᒻᒥ ᓄᓇᓕᖕᓄᐊᓚᐅᖅᑎᓪᓗᒋ, ᒪᓕᖁᔭᐅᓯᒪᔪᑦ ᐅᖃᕐᓯᒪᔪᑦ.
ᑭᓯᐊᓂᓕ ᓴᓪᓗᐃᓂᑦ ᖃᓄᐃᒍᑎᐅᔪᖅ ᐃᓱᒪᓇᕈᑎᐅᕗᖅ ᐱᖁᔭᐅᔪᑦ ᓈᒻᒪᙱᓗᐊᕐᓂᖏᓐᓂᒃ ᐅᓇ ᓄᕙᒡᔪᐊᕐᓇᖅ-19 ᓄᓇᕕᒧᐊᖅᑕᐅᑎᑦᑕᐃᓕᓪᓗᒍ.
ᐱᓕᕆᔨᒻᒪᕆᐅᔪᑦ ᓴᓪᓗᐃᓂᑦ ᐅᖃᓚᐅᕐᑐᑦ ᓇᓗᓇᐃᕐᓯᓯᒪᑦᑎᐊᙱᓗᐊᕐᓂᖅ ᒪᓕᒃᑕᐅᔭᕆᐊᓕᖕᓂ ᓄᓇᓕᐅᔪᓂᒃ ᐅᓗᕆᐊᓇᖅᑐᒦᒍᑎᐅᓂᖓᓂᒃ ᐊᒻᒪᓗ ᓈᒻᒪᙱᓕᐅᕈᑎᐅᓕᔭᖢᓂ ᓄᓇᖃᖅᑐᓄᑦ ᐊᒻᒪ ᑕᒪᐅᙵᖃᑦᑕᖅᑐᓄᑦ.
“ᑐᑭᓯᓯᒪᕗᒍ ᑲᑉᐱᐊᓱᖕᓂᕆᔭᐅᓂᕐᒥᑦ ᐊᒻᒪᓗ ᖃᓄᐃᒍᑎᐅᓯᒪᓕᕐᓂᖓᓂ ᓄᓇᖃᖅᑐᓂᒃ ᐊᒻᒪᓗ ᑕᒫᓂᕐᒥᐅᓕᒫᓂᒃ,” ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᑲᑎᒪᔨᖏ ᐅᖃᓚᐅᕐᑐᑦ ᔪᓚᐃ 15-ᒥᑦ ᐅᖃᐅᓯᒃᓴᖏᓐᓂᒃ.
“ᖃᐅᔨᒪᖁᔨᕗᒍᑦ ᑭᒃᑯᓕᒫᓂ ᑐᕌᒐᖃᕋᓱᖕᓂᑦᑎᓐᓂᒃ ᓄᓇᕕᒃ ᓄᕙᒡᔪᐊᕐᓇᖅ-19-ᖃᖅᑎᑦᑕᐃᓕᒪᑎᓪᓗᒍ.
“ᑕᒪᑐᒧᖓ ᐋᖅᑭᒃᓱᐃᕈᓘᔭᕆᐊᖃᙱᓐᓇᑦᑕ ᐊᒻᒪ ᐋᓐᓂᕈᑕᐅᓐᓇᖅᑐᓂᒃ ᐅᖃᕈᓘᔭᕐᓂᕐᒥ ᐱᔾᔪᑎᒋᓪᓗᒍ ᓄᕙᒡᔪᐊᕐᓇᖅ-19 ᑭᓇᑐᐃᓐᓇᒧᑦ ᓄᓇᖃᖅᑐᓄᑦ ᐊᒻᒪᓗ ᐃᖅᑲᓇᐃᔭᖅᑎᓄᑦ ᐱᔭᐅᔭᕆᐊᖃᒻᒪᕆᒃᑐᓄᑦ. ᐃᓱᒪᒌᑦᑎᐊᖃᑦᑕᐅᑎᒋᐊᖃᖅᐳᒍ ᓲᖃᐃᒻᒪ ᑕᒪᑦᑕ ᐊᒃᑐᖅᑕᐅᒐᑦᑕ ᐊᒻᒪᓗ ᐊᓂᒍᐃᒍᓐᓇᖅᖢᑕ.”
(0) Comments