“ᑲᐱᓯᑲᑕᖕᓂᖅ” ᓄᓇᕕᒃᒥ ᐱᓕᕆᐊᖑᒃᑲᓐᓂᕐᓂᐊᖅᑐᖅ

ᓄᓇᕕᒃᒥ ᓄᓇᓕᓕᒫᓄᑦ ᐋᓪᓕᓕᐊᖃᕐᓇᙱᑦᑐᓕᕆᔨᒃᑯᑦ ᐃᓄᓕᕆᔨᒃᑯᓪᓗ “ᑲᐱᓯᑲᑕᖕᓂᐊᕐᒪᑕ” ᐱᒋᐊᕐᓗᑎᒃ ᔭᓄᐊᕆ 21-ᒥ ᕕᕝᕗᐊᕆ ᓄᙳᐊᓄᑦ.

ᐅᓇ “ᑲᐱᓯᑲᑕᖕᓂᖅ” ᑕᒪᐃᓐᓂ ᓄᓇᕕᒃ ᓄᓇᓕᖏᓐᓂᒃ ᐱᓕᕆᐊᖑᓂᐊᖅᑐᖅ ᐅᓪᓗᓂᒃ ᒪᕐᕉᖕᓂᒃ ᑕᓪᓗᒪᓄᑦ, ᒪᓕᒡᓗᑎᒃ ᓇᓃᓐᓂᖏᓐᓂᒃ. ᒪᑐᐃᖓᓂᐊᕐᑐᖅ ᑭᒃᑯᑐᐃᓐᓇᕐᓄᑦ ᑕᒫᓂ ᓄᓇᖃᖅᑐᓂᒃ ᐅᑭᐅᖃᖅᑐᓂᒃ ᑕᓪᓕᒪᓂᒃ ᐅᖓᑖᓄᑦ ᑲᐱᔭᐅᓯᒫᓂᙱᑦᑐᓄᑦ ᓄᕙᒡᔪᐊᕐᓇᖅ-19-ᒧ. ᓱᕈᓰᑦ ᐊᒻᒪ ᐃᓅᓱᒃᑐᑦ ᑕᓪᓕᒪᓂᒃ 17-ᓄ ᐅᑭᐅᖃᖅᑐᑦ ᓯᕗᓪᓕᖅᐹᖓᓂᒃ ᐊᐅᑉᐸᖓᓂᓪᓘᓐᓃᑦ ᑲᐱᔭᐅᔪᓐᓇᕐᓂᐊᕐᑐᑦ ᑲᐱᓯᑲᑕᓐᓇᐅᑎᓪᓗᒍ. ᐃᓐᓇᐃᑦ ᐅᑭᐅᓖᑦ 18 ᐅᖓᑖᓄᑦ ᑲᐱᔭᐅᔭᖅᑐᕈᓐᓇᖅᑐᑦ ᓯᕗᓪᓕᖅᐹᖓᓂᒃ ᐊᐃᑉᐸᖓᓂ ᐱᖓᔪᖓᓐᓂᓪᓘᓐᓃᑦ.

“ᑲᐱᓯᔾᔪᑎ ᓇᓗᓇᐃᖅᑕᐅᓯᒪᓪᓚᕆᖕᒪᑦ ᐊᐃᑦᑐᖅᑕᐅᓴᕋᐃᓐᓇᕈᓐᓃᕐᓇᕐᓂᖓᓂᒃ,” ᑲᑎᒪᔩ ᐅᖃᓚᐅᕐᑐᑦ ᕙᐃᔅᐳᒃᑯᑦ ᑐᓴᒐᒃᓴᓕᐅᖅᖢᑎᒃ. “ᑕᐃᒪᐃᓐᓂᖓᓄᑦ, ᑲᐱᔭᐅᒍᕈᑦ ᐃᑲᔪᕋᔭᕆᕗᑎᑦ ᑕᒫᓂ ᓄᓇᑦᑎᓐᓂᒃ ᐅᓗᕆᐊᓇᙱᓐᓂᕐᓴᐅᓂᖓᓂᒃ.”

ᑰᔾᔪᐊᕌᐱᒃ ᓯᕗᓪᓕᖅᐹᖑᓗᓂ ᐅᐸᒃᑕᐅᓂᐊᓚᐅᕐᑐᖅ ᑕᓪᓕᕐᒥᕐᒥᑦ ᓈᑦᑏᖑᔭᒧᑦ ᐱᒋᐊᕐᓗᓂ ᔭᓄᐊᕆ 29-ᒥ.

ᓇᓂ ᑲᐱᓯᑲᑕᖃᑦᑕᕐᓂᐊᕐᒪᖔᑦ ᖃᖓᒃᑯᓪᓗ ᓇᓗᓇᐃᖅᑕᐅᓯᒪᓂᐊᕐᑐᖅ ᓄᓇᓖᑦ ᕙᐃᔅᐳᒃᑯᑦ ᓴᖅᑭᔮᒐᖏᑦᑎᒍᑦ ᑕᒪᓐᓇ ᓄᓇᖓᓂ ᐱᒋᐊᓚᐅᖅᑎᓐᓴᒍ, ᑲᑎᒪᔩᑦ ᐅᖃᓚᐅᕐᑐᑦ.

ᑕᖅᑭᐅᓚᐅᕐᑐᒥ ᓄᓇᕕᒃ ᓯᕗᓪᓕᖅᐹᒥᒃ “ᑲᐱᓯᑲᑕᖕᓂᖃᓚᐅᕐᑐᑦ” ᖁᕕᐊᓱᒡᕕᒃᒧᐊᖅᐸᓪᓕᐊᑎᓪᓗᒍ. ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᑲᑎᒪᔨᖏᑦᑎᒍᑦ ᓄᓇᓕᖕᓂ ᑲᐱᔭᐅᔪᑦ 52 ᐳᓴᓐᑎᖏᑦ ᑕᒫᓂ ᑲᐱᔭᐅᓚᐅᕐᓯᒪᔪᑦ ᒪᕐᕈᐃᖅᑕᐅᓪᓗᑎᒃ ᑎᓯᐱᕆ 17-ᒥ.

ᑕᒪᒃᑯᐊ ᐋᓐᓂᐊᖅᑖᖅᐸᓪᓕᐊᔪᑦ 9-ᓄᑦ ᑎᑭᑐᐃᓐᓇᕋᓗᐊᖅᖢᓂ ᓄᓇᕕᒻᒥ ᑯᕕᐊᓱᒡᕕᙳᖅᐸᓪᓕᐊᑎᓪᓗᒍ, ᑕᒪᕐᒥᒃ ᓄᓇᕕᒻᒥᐅᑕᖅ “ᐅᓗᕆᐊᓇᖅᑐᒦᑦᑐᑦ” ᐊᒻᒪ ᐊᖏᕐᕋᖅᓯᒪᔭᕆᐊᖃᖅᖢᑎᒃ.

ᔭᓄᐊᕆ 19-ᒥ 283-ᖑᓚᐅᕐᑐᑦ ᓄᕙᒡᔪᐊᕐᓇᖅ-19-ᒥ ᐋᓐᓂᐊᖃᖅᑐᑦ ᓄᓇᕕᓕᒫᒥᑦ ᐃᓚᖃᖅᖢᑎᒃ 93-ᓂ ᑰᔾᔪᐊᖅᒥ.

ᓄᕙᒡᔪᐊᕐᓇᖅ-19 ᓄᓇᕕᒃᒥ ᓄᓇᓕᓕᒫᓂᒃ ᐱᑕᖃᕐᓂᕋᖅᑕᐅᓚᐅᕐᑐᖅ ᑭᓯᐊᓂ ᐅᑯᓇᓂ ᐅᒥᐅᔭᖅ ᐊᒻᒪ ᐊᑯᓕᕕᒃᒥᑦ.