ᑲᑎᕕᒃ ᐃᓕᓐᓂᐊᖅᑐᓕᕆᔨᒃᑯᑦ ᑲᑎᒪᔨᑦ ᐃᖅᑲᓇᐃᔭᖅᑎᖏᑦ ᐊᖏᕐᑐᑦ ᓄᑖᒥ ᐃᖅᑲᓇᐃᔮᒧᑦ ᐊᖏᕈᑎᓂ

For an English version of this story please see Kativik School Board employees approve new collective agreement.

ᐅᓇ ᑲᑐᔾᔨᖃᑎᒌᓄᑦ ᐊᖓᔪᖅᑳᖅ ᑭᐅᕈᓕᓐ ᑎᒪᕆ ᐅᖃᓚᐅᕐᑐᖅ ᑲᑎᕕᒃ ᐃᓕᓐᓂᐊᖅᑐᓕᕆᔨᒃᑯᑦ ᑲᑎᒪᔨᓄᑦ ᐃᖅᑲᓇᐃᔭᖅᑎᑦ ᑕᑯᔪᓐᓇᕐᓂᐊᓯᔪᑦ ᐱᐅᓂᕐᓴᓂᒃ ᐃᑲᔫᑎᒃᓴᓂᒃ ᐊᒻᒪ ᐃᖅᑲᓇᐃᔭᕐᕕᐅᕙᒃᑐᓂᒃ ᐅᕘᓇ ᓄᑖᒃᑯᑦ ᐊᖏᖃᑎᒌᒍᑎᒃᑯ ᐊᖅᑭᒃᑕᐅᓚᐅᕐᑐᒥᓐ ᐱᓇᓱᐊᕈᓯᐅᓚᐅᕐᑐᖅ.

ᑲᑐᔾᔨᖃᑎᒌᑦ ᐃᓕᓐᓂᐊᖅᑐᓕᕆᔨᒻᒪᕆᖕᓄᑦ ᓄᓇᕕᒃᒥ ᐊᒻᒪ ᒫᓐᑐᕆᐊᑉ ᐱᖓᕐᓇᖓᓂ, ᑭᒡᒐᖅᑐᐃᓪᓗᑎᒃ 130-ᓂ ᐃᖅᑲᓇᐃᔭᖅᑎᓂᒃ, ᐊᒻᒪᓗ ᑲᑎᒪᔩᑦ ᐋᖅᑭᒃᓯᓚᐅᕐᑐᑦ ᐊᖏᖃᑎᒌᒍᑎᓂᒃ ᐄᐳᕈᓪ 4-ᒥ. ᐅᓇ ᐊᖏᕈᑎ ᐊᖏᕈᑎᒌᒍᑎᐅᓚᐅᕐᓯᒪᔪᖅ ᒫᔅᓯ 24-ᒥ.

ᓯᕗᓂᐊᓂ ᐊᖏᖃᑎᒌᒍᑎᕕᓂᖅ ᐃᓱᓕᓚᐅᕐᓯᒪᖕᒪᑦ 2020-ᒥ ᐊᒻᒪᓗ ᐃᖅᑲᓇᐃᔭᖅᑎᐅᔪᖅ ᐱᓕᕆᖃᑦᑕᕐᓯᒪᓪᓗᑎᒃ ᐊᖏᖃᑎᒌᒍᑎᖃᙱᖢᑎᒃ ᑕᐃᒪᙵᓂ.

ᐃᓕᓴᐃᔩᑦ ᐊᒻᒪ ᐃᑲᔪᖅᑎᒋᔭᐅᕙᒃᑐᑦ ᐃᖅᑲᓇᐃᔭᖅᑏᑦ ᑮᓇᐅᔭᓕᐊᖏᑦ ᐅᓄᕐᓯᕚᓪᓕᕐᓂᐊᕐᑐᑦ, ᐃᖅᑲᓇᐃᔭᕐᕕᖏᑦ ᐱᐅᓯᕚᓪᓕᖅᑕᐅᓗᑎᒃ, ᐃᑲᔫᑎᖃᒃᑲᓐᓂᕐᓗᑎᒃ ᓄᓇᖃᖅᑐᓂᒃ ᐃᖅᑲᓇᐃᔭᖅᑎᒋᔭᐅᔪᓄᑦ, ᐊᒻᒪᓗ ᓄᖅᑲᖅᑎᑦᑎᓗᓂ ᑲᑐᔾᔨᖃᑎᒌᓄᑦ ᓈᒻᒪᙱᓗᐊᕐᓂᒃᑯ ᖃᓄᐃᓕᐅᕈᑎᐅᕙᒃᑐᕕᓂᕐᓂᒃ, ᐅᖃᕐᑐᖅ ᑎᒪᕆ. ᐊᕐᕌᒎᖕᓄᑦ ᒪᕐᕉᖕᓄ ᐊᓂᒍᖅᓯᒪᔪᓄᑦ ᐊᑭᓕᐅᑎᐅᔭᕆᐊᖃᖅᑐᕕᓃᑦ ᒫᓐᓇ ᐋᖅᑭᒃᓱᖅᑕᐅᓪᓗᑎᒃ.

“ᑕᒪᕐᒥ ᐃᓚᒋᔭᕗᑦ ᐃᓱᒪᖕᒪᑕ ᐊᔾᔨᒌᙱᓐᓂᖅᑕᖃᓗᐊᕐᓂᖓᓂᒃ ᐃᓚᒋᔭᐅᔪᓄᑦ ᐃᖅᑲᓇᐃᔮᖃᖅᑐᓂᒃ ᖃᓪᓗᓈᓂᙶᖅᑐᓂᒃ ᐊᒻᒪᓗ ᓄᓇᕕᒻᒥᐅᑕᓂ ᐃᖅᑲᓇᐃᔮᖅᑖᖅᑎᑕᐅᕙᒃᑐᓂᒃ,” ᐅᖃᕐᑐᖅ.

“ᐅᑯᐊ ᐊᕕᒃᑐᕐᓯᒪᓂᒃᑯᑦ ᓈᒻᒪᙱᓕᐅᕈᑎᐅᕙᒃᑐᑦ ᒪᑯᓇᙶᕐᑐᑦ ᐊᑯᑦᑐᔫᑎᖃᕐᓂᖓᓂᒃ ᐃᓚᖓᒍᑦ ᐃᖅᑲᓇᐃᔭᖅᑎᒃᑯ ᓇᑭᙶᓂᖏᑦᑎᒍᑦ.”

ᐅᓇ ᓄᑖᖅ ᐱᓕᕆᑎᑦᑎᔾᔪᑎ ᐃᓚᖃᕐᑐᖅ 6 ᐳᓴᓐᑎᒥ ᑮᓇᐅᔭᓕᐊᕆᔭᐅᔪᑦ ᐅᓄᕐᓯᕚ[ᓕᕐᓂᐊᕐᓂᖓᓂᒃ ᐊᒻᒪᓗ ᐊᑐᓂ ᐃᓚᒋᔭᐅᔪᑦ $600-ᓂ ᑮᓇᐅᔭᖅᑖᖅᑎᑕᐅᓂᐊᖅᖢᑎᒃ ᑖᓐᓇ ᐊᖏᕈᑎ ᐊᑎᓕᐅᖅᑕᐅᒃᐸᑦ.

ᐊᓯᖏᑦ ᑭᓱᑖᕈᑎᐅᔪᑦ ᒪᑯᐊ ᐅᑭᐅᕐᑕᖅᑐᕐᒥ ᐃᖅᑲᓇᐃᔭᓕᕐᓯᒪᔪᑦ ᖃᓂᒋᔭᖃᕐᓂᕐᓴᐅᓕᕐᓗᑎᒃ ᖃᓪᓗᓈᓂ ᐃᖅᑲᓇᐃᔮᖅᑖᖅᑐᑦ ᐊᑭᓕᖅᑕᐅᔾᔪᑎᒋᕙᒃᑕᖏᓐᓄᑦ ᐃᓚᖃᖅᖢᓂ ᐃᓕᓐᓂᐊᖅᓯᒪᒃᑲᓐᓂᕐᓂᕐᒧᑦ ᓇᓗᓇᐃᒃᑯᑎᖃᖅᑐᑦ ᐊᑭᑦᑐᕆᐊᕐᓯᒪᓂᕐᓴᐅᓗᑎᒃ ᐊᒻᒪᓗ ᐃᓕᓐᓂᐊᖅᑐᓕᕆᓂᕐᒧᑦ ᐱᓕᕆᔨᐅᔪᑦ ᐃᓅᓯᓕᕆᔨᐅᔪᓪᓗ. ᐊᒻᒪᓗ ᐃᓚᒋᔭᐅᔪᑦ ᓄᓇᕕᒃᒥᑦ ᓄᓇᓕᖕᓂ ᐃᑲᔫᑎᑖᖃᑦᑕᕐᓂᐊᕐᒥᔪᑦ ᓂᕿᑖᕈᑎᓄᑦ ᐊᒻᒪ ᐃᒡᓗᒧᑦ ᐊᑭᓕᐅᑎᓄᑦ ᐊᑭᓕᖅᑕᐅᔾᔪᑎᖓᑕ ᖁᓛᒍᑦ.

ᑎᒪᕆ ᐅᖃᒪᐅᕐᑐᖅ ᓂᕿᑖᕈᑎᓄᑦ ᐃᑲᔫᑎᒃᓴᑦ ᓄᓇᓕᖕᓄᑦ ᐃᑲᔪᕈᑎᐅᓂᐊᕐᒥᔪᖅ ᓲᖃᐃᒻᒪ ᑲᑎᒪᔩᑦ ᐃᖅᑲᓇᐃᔭᖅᑎᖏ ᓄᓇᖏᓐᓂ ᓂᐅᕕᖃᑦᑕᕐᓂᕐᓴᐅᖕᒪᑕ ᖃᓪᓗᓈᓂᓪᓕ ᑎᑭᓴᐃᖃᑦᑕᕐᓂᕐᒥᒃ.

ᐃᓚᒋᔭᐅᔪᑦ ᐃᖅᑲᓇᐃᔭᕐᑐᑦ ᐅᑭᐅᕐᑕᖅᑐᕐᒥ ᐊᐅᓪᓛᕈᑎᑖᖃᑦᑕᕐᓂᐊᕐᒥᔪᑦ ᓄᓇᐃᓐᓇᕐᒥ ᐊᐅᓪᓚᕐᓯᒪᔾᔪᑎᖏᓐᓄᑦ.

“ᐃᓚᒋᔭᐅᔪᑦ ᐃᖅᑲᓇᐃᔭᓕᕐᓯᒪᔪᑦ ᖃᓪᓗᓈᓂᓐᙶᕐᓯᒪᓪᓗᑎᒃ ᐊᐅᓪᓚᕈᑎᓄᑦ ᐃᑲᔫᓯᐊᖅᑖᖃᑦᑕᕐᒪᑕ ᑕᐃᒪᓐᓇᓗ ᐊᐅᓪᓚᑲᑕᒍᓐᓇᕐᓂᕐᓴᐅᓪᓗᑎᒃ ᓄᓇᒋᓚᐅᖅᑕᖏᓐᓄᑦ ᐃᖅᑲᓇᐃᔭᓕᓚᐅᖅᑎᓐᓇᒋ ᑭᓯᐊᓂᓕ ᑕᒪᒃᑯᐊ ᓄᓇᓕᖕᓂ ᐃᖅᑲᓇᐃᔮᖅᑖᖅᑐᑦ ᑕᐃᒪᓐᓇ ᐃᑲᔫᑎᑖᖅᑎᑕᐅᕙᙱᒻᒪᑕ,” ᐅᖃᕐᑐᖅ.

“ᐅᓇ ᐃᓚᒋᔭᐅᔪᓄᑦ ᓄᓇᕕᒻᒥᐅᑕᓄᑦ ᐃᑲᔫᑎᒻᒪᕆᐅᔪᓐᓇᕐᓂᐊᕐᑐᖅ ᐃᖏᕐᕋᔪᓐᓇᓕᕐᖢᑎᒃ ᓄᓇᓕᖕᓄᑦ ᐊᔾᔨᒌᙱᑦᑐᓄᑦ ᐊᒻᒪᓘᓐᓃᑦ ᖃᓪᓗᓈᑦ ᓄᓇᖓᓄᑦ.”

ᐅᓇ ᓄᑖᖅ ᐊᖏᕈᑎ ᐃᓱᓕᓐᓂᐊᕐᑐᖅ ᒫᔅᓯ 31, 2023.