ᑲᑐᔾᔨᔩᑦ ᐅᖃᓚᐅᖅᑐᑦ ᐃᖃᓗᐃᑦ ᐃᓪᓗᓕᕆᔨᒃᑯᖏᑦ ᐊᑐᖃᑦᑕᖅᑐᑦ $100,000−ᓂᒃ ᐃᖅᑲᓇᐃᔭᖅᑎᓂᒃ ᐃᓇᖐᓯᓂᖏᓐᓂ

For English version, see Union says Iqaluit Housing Authority has spent $100,000 on replacement workers

ᐃᖃᓗᐃᑦ ᐃᓪᓗᓕᕆᔨᒃᑯᖏᑦ ᑮᓇᐅᔭᓂᑦ ᐊᑐᖃᑦᑕᓲᑦ ᐅᖓᑖᓄᑦ $100,000 ᐃᓇᖐᓪᓗᑎᑦ ᐃᖅᑲᓇᐃᔭᖅᑎᓂᒃ ᓄᖅᑲᖓᓂᖏᓐᓂ ᐃᖅᑲᓇᐃᔮᕐᒥᓂᒃ ᐱᔪᒪᓂᖏᓐᓂ, ᑲᓇᑕᒥ ᓯᕗᓕᖅᑎᖓᓐᓂ ᑭᒃᑯᑐᐃᓐᓇᐃᑦ ᐱᔨᑦᑎᕋᖅᑎᖏᓐᓂ ᑲᑐᔾᔨᔩᑦ ᑲᓇᑕᒥ ᑕᐃᒪᐃᓕᔪᑦ.

ᓯᐅᕋᓐ ᑎᓲᓴ, PSAC−ᑯᓐᓄᑦ ᑲᓇᑕᒥ ᓯᕗᓕᖅᑎ ᐊᖏᔪᖅᑳᑉ ᑐᖏᓕᖓ, ᐃᖃᓗᓐᓃᓚᐅᖅᑐᖅ ᐊᐃᐳᓗ 6−ᒥ ᐃᑲᔪᖅᑐᐃᓪᓗᓂ ᐃᓪᓗᓕᕆᔨᒃᑯᑦ 13−ᓂᒃ ᐃᖅᑲᓇᐃᔭᖅᑎᓂᑦ ᓄᖅᑲᖓᔪᓂᒃ ᓈᒻᒪᓴᓐᖏᓐᓂᖏᓐᓄᑦ ᐃᖅᑲᓇᐃᔭᕐᕕᖓᓐᓂ.

“ᓱᒻᒪᑦ ᐅᕙᑦᑎᓐᓂ ᐃᑲᔪᕈᒪᓐᖏᑦᑎᐊᖅᑲᑦ ᐃᖅᑲᓇᐃᔭᖅᑎᖁᑎᖏᓐᓂ? ᑲᓐᖑᓇᖅ.” ᐅᖃᖅᑐᓂ.

ᐃᖃᓗᐃᑦ ᐃᓪᓗᓕᕆᔨᒃᑯᑦ ᐅᖃᖅᑎᖓ ᑭᓐᑐᕋ ᑭᖕ ᓂᓪᓕᕈᒪᓚᐅᓐᖏᑦᑐᖅ ᐅᖄᓚᕕᐅᒻᒪᑦ ᓄᓇᑦᓯᐊᖅ ᐱᕙᓪᓕᐊᔪᓕᕆᔨᒃᑯᓐᓄᑦ. ᓇᓗᓇᐃᖅᓯᒍᓐᓇᓚᐅᓐᖏᒻᒥᔪᖅ ᑎᓲᓴᐅᑉ ᐅᖃᐅᓯᒥᓂᖏᓐᓂ ᐃᓪᓗᓕᕆᔨᒃᑯᑦ ᑮᓇᐅᔭᓂᒃ ᐊᑐᖅᓯᒪᓂᖏᓐᓂ ᐃᓇᖐᓪᓗᑎᑦ ᐃᖅᑲᓇᐃᔭᖅᑎᓂᒃ.

ᓄᖅᑲᖓᔪᑦ ᓈᒻᒪᓴᖏᓐᓂᖏᓐᓄᑦ ᐃᖅᑲᓇᐃᔭᖅᑏᑦ ᐊᓃᓚᐅᖅᑐᑦ ᓄᓇᓯᐅᑎᑕᖃᕐᓂᖅᐹᖑᓲᒥ ᓄᐅᕕᕐᕕᐊᓗᑉ ᓯᓚᑖᓂ ᐊᐃᐳᓗ 6−ᒥ, ᐃᓪᓗᓕᕆᔨᒃᑯᑦ ᐊᓪᓚᕕᖓᑦᑕ ᓴᓂᐊᓂᐅᓐᖏᑦᑐᖅ ᖃᖓᑕᓲᒃᑯᕕᐅᑉ ᖃᓂᒋᔭᖓᓐᓂ.

“ᑕᑯᔅᓴᐅᓂᖅᓴᐅᓂᐊᖅᑐᒋᓚᐅᕋᑦᑕ ᐊᓯᔾᔩᖁᔨᓪᓗᑕᓗ,” ᐅᖃᖅᑐᓂ ᓄᓇᕗᒻᒥ ᑲᑐᔾᔨᖃᑎᒌᖃᑕᐅᔪᖅ ᐃᖅᑲᓇᐃᔭᖅᑎᓄᑦ ᐊᖏᔪᖅᑳᖓ ᔭᐃᓴᓐ ᕉᓴᓐ.

ᐃᖅᑲᓇᐃᔭᖅᑏᑦ ᓄᖅᑲᖓᔪᑦ ᓈᒻᒪᓴᕐᓇᑎᑦ ᒫᔾᔨ 17−ᒥᓂᑦ, ᑮᒍᔾᔭᐅᓯᒪᓕᓚᐅᖅᓯᒪᓪᓗᑎᓪᓗ ᐃᖅᑲᓇᐃᔭᕐᕕᒥᓄᑦ ᒫᔾᔨ 19−ᒥ. ᑭᒡᒐᖅᑐᖅᑕᐅᓚᐅᖅᑐᖅ ᓄᓇᕗᑦ ᐃᖅᑲᓇᐃᔭᖅᑎᓄᑦ ᑲᑐᔾᔨᔨᓄᑦ, ᐃᓚᒋᔭᐅᖃᑕᐅᓪᓗᑎᑦ ᑭᒃᑯᑐᐃᓐᓇᕐᓄᑦ ᐱᔨᑦᑎᕋᖅᑎᓄᑦ ᑲᑐᔾᔨᔨᓄᑦ ᑲᓇᑕᒥ.

ᐃᖅᑲᓇᐃᔭᖅᑎᓄᑦ ᐊᖏᕈᑎᖓ ᐃᓱᓕᓚᐅᖅᓯᒪᒻᒪᑦ ᔫᓂᒥ 2020−ᐅᑎᓪᓗᒍ.

PSAC−ᑯᑦ ᐅᑭᐅᖅᑕᖅᑐᒥ ᓯᕗᓕᖅᑎᖓ ᐊᖏᔪᖅᑳᑉ ᑐᖏᓕᖓ ᓗᐊᕋᐃᓐ ᕌᓱ ᐅᖃᐅᔾᔨᓚᐅᖅᑐᖅ ᓄᓇᑦᓯᐊᖅ ᐱᕙᓪᓕᐊᔪᒃᑯᖏᓐᓄᑦ ᐊᐃᐳᓗ 5−ᒥ ᐱᕙᓪᓕᐊᓯᒪᓐᖏᑦᑎᐊᕐᖓᑕ ᐊᐃᕙᔾᔪᑕᐅᓯᒪᔫᒐᓗᐊᑦ ᐃᓪᓗᓕᕆᔨᒃᑯᓐᓂ.

“ᐊᖏᖃᑎᒌᔅᓯᒪᓐᖏᒻᒪᑕ ᑐᓂᒍᓐᓇᖅᑕᒥᓂᓪᓗ ᐱᑕᖃᕐᓇᑎᑦ ᑭᓱᒐᓛᑐᐃᓐᓇᑦᑎᐊᒥᑦ,” ᐅᖃᖅᑐᓂ.

“ᐊᖏᖃᑎᒌᒍᑎᑕᖃᕐᓂᐊᖅᑑᔮᓐᖏᓪᓚᕆᑦᑐᖅ ᒫᓐᓇᐅᔪᖅ.”

ᐃᓪᓗᓕᕆᔨᒃᑯᑦ ᐊᕐᕌᒍᑕᒫᖅ ᐊᑭᑦᑐᕆᐊᕈᑎᔅᓴᓂᑦ ᐊᑐᐃᓐᓇᐅᑎᑦᑎᓯᒪᔫᒐᓗᐊᑦ 1.25%−ᒥᑦ ᐊᒻᒪᓗ 1.5%−ᒥᑦ, ᕌᓱ ᐅᖃᓚᐅᖅᑐᖅ ᓄᓇᑦᓯᐊᖅ ᐱᕙᓪᓕᐊᔪᓕᕆᔨᒃᑯᖏᓐᓄᑦ.

ᕈᓴᓐ ᐅᖃᓚᐅᖅᑐᖅ ᑲᑐᔾᔨᔩᑦ ᓄᖅᑲᖓᔪᑦ ᓈᒻᒪᔾᔫᒥᔪᓂᑦ ᑮᓇᐅᔾᔭᔅᓴᒍᒪᓪᓗᑎᑦ ᐊᒻᒪᓗ ᐱᐅᓂᖅᓴᒥᑦ ᐅᑭᐅᖅᑕᖅᑐᒦᒍᓯᐊᖅᑖᖃᑦᑕᕈᒪᓪᓗᑎᑦ.

ᐅᖃᖅᑐᓂᓗ ᑲᑐᔾᔨᔩᑦ ᓴᖅᑮᔾᔮᖏᑦᑐᑦ ᖃᑦᑎᓂᒃ ᐊᑐᐃᓐᓇᐅᑎᑦᑎᓂᐊᕐᒪᖔᑕ ᑮᓇᐅᔾᔭᔅᓵᔅᓴᓂᒃ ᐊᐃᕙᔾᔪᑎᖃᕈᒪᓐᖏᒻᒪᑕ ᐊᖏᖃᑎᒌᒐᓱᐊᕐᓗᑎᑦ ᑭᒃᑯᑐᐃᓐᓇᕐᓄᑦ.

ᕈᓴᓐ ᐅᖃᖅᑐᓂᓗ ᐃᓪᓗᓕᕆᔨᒃᑯᑦ ᐊᑭᓖᒍᒪᒻᒥᔪᑦ ᐃᓚᖏᓂ, ᐊᑕᖏᓐᖏᓪᓗᒋᑦ, ᑕᐃᒃᑯᓂᖓ 13−ᓂᒃ ᓄᖅᑲᖓᔪᓂᒃ ᐃᖅᑲᓇᐃᔭᒥᓂᒃ ᓈᒻᒪᓴᓐᖏᓐᓂᖏᓐᓄᑦ ᓂᓪᓕᐊᒍᓐᓇᖁᓪᓗᖏᑦ ᐃᖅᑲᓇᐃᔭᕐᕕᒻᒥ ᐃᓄᑦᑎᑐᑦ. ᕈᓴᓐ ᐅᖃᖅᑐᓂ ᐊᑭᓕᖅᓱᖅᑕᐅᔪᐃᓐᓇᐅᒋᐊᓕᐅᒐᓗᐊᑦ ᐃᓄᑦᑎᑑᕈᓐᓇᑐᐃᓐᓇᐅᒻᒪᑕ ᐊᒻᒪᓗ ᐃᓄᑦᑎᑑᕈᓐᓇᕐᓗᑎᑦ ᐊᖏᕐᕋᒥᓂᒃ ᑕᐃᒫᒃ ᐃᓚᒋᒻᒪᒍ ᐃᖅᑲᓇᐃᔭᕐᕕᒻᒥ.

“ᐃᓚᐃᓐᓈᓪᓚᕆᒻᒪᑕ,” ᕈᓴᓐ ᐅᖃᖅᑐᓂ.

ᐅᖃᖅᑐᓂᓗ ᑲᑐᔾᔨᔩᑦ ᓈᒻᒪᓴᓐᖏᒻᒪᑕ ᐃᓪᓗᓕᕆᔨᒃᑯᑦ ᑐᔅᓯᕌᖏᓐᓂ ᖃᑦᑏᓐᓇᕈᖅᐹᓪᑎᑦᑎᒍᒪᓂᖏᓐᓂ ᕿᑐᕐᖓᑖᖅᑐᓄᑦ ᐃᕐᓂᕋᑖᖅᑐᒥᓂᕐᓄᑦ ᐊᖏᔪᖅᑳᕈᖅᑐᒥᓂᕐᓄᓪᓗ ᓄᖅᑲᖓᔾᔪᑎᔅᓴᖏᑕ ᐊᑭᓕᖅᓱᖅᑕᐅᔪᓐᓇᕐᓂᖏᓐᓂ.

ᑖᒃᑯᐊ ᕉᓴᓐ ᐊᒻᒪᓗ ᕋᓱ ᐅᖃᓚᐅᕐᒥᔫᒃ ᓈᒻᒪᓴᓐᖏᒻᒪᑎᒃ ᐃᓪᓗᓕᕆᔨᒃᑯᑦ ᑎᑭᑎᑦᑎᓂᖏᓐᓂ ᐃᓇᖐᔪᔅᓴᓂᒃ ᐃᖅᑲᓇᐃᔭᖅᑎᓂᒃ ᖃᓪᓗᓈᓂᑦ ᓄᖅᑕᖓᑎᓪᓗᒋᑦ ᐃᖅᑲᓇᐃᔮᕐᓂᑦ ᓈᒻᒪᓴᓐᖏᓐᓂᖏᓐᓄᑦ.

“ᑮᓇᐅᔭᓕᒫᑦ ᑕᐃᒫᓪᓗᐊᖅ ᐊᑐᖅᑕᐅᒋᐊᖃᕐᖓᑕ ᑳᓐᑐᓛᓂᒃ,” ᕉᓱ ᐅᖃᖅᑐᓂ.

ᕉᓱ ᐅᖃᖅᑐᓂᓗ, ᐃᓪᓗᓕᕆᔨᒃᑯᑦ ᐊᑭᓕᖅᓱᐃᑐᐃᓐᓇᖏᑦᑐᑦ ᐃᓇᒌᔪᓂᒃ ᐃᖅᑲᓇᐃᔭᖅᑎᓂᒃ ᒪᐅᓐᖓᐅᔾᔭᐅᓂᖏᓐᓂ ᑮᓇᐅᔭᓪᓗ ᖃᓪᓗᓈᓅᕈᔾᔭᐅᖔᖅᑐᑎᒃ, ᑭᓯᐊᓂᑦᑕᐅ ᐃᓅᓇᓱᐊᕈᑎᔅᓴᓄᑦ ᐃᖅᑲᓇᐃᔭᖅᑎᓄᑦ ᐊᒻᒪᓗ ᒪᓕᒐᓕᕆᔨᓄᑦ ᐊᐃᕙᓂᖏᓐᓂ ᐊᑭᓕᖅᓱᐃᔪᑦ.

ᕈᓴᓐ ᐅᖃᖅᑐᓂ ᑐᓴᓚᐅᖅᓯᒪᓐᖏᒪᒡᒎ ᐃᓪᓗᒥᑦ ᐊᑐᖅᑐᐊᖅᑐᒥ ᐅᓐᓂᓗᖅᓴᖅᑐᓂᒃ ᑕᐃᒪᓐᖓᓂ ᐃᖅᑲᓇᐃᔭᖅᑏᑦ ᓄᖅᑲᓚᐅᕐᖓᑕ ᓈᒻᒪᓴᓐᖏᓐᓂᖏᓐᓄᑦ.

ᕉᓴᓐ ᐅᖃᖅᑐᓂ ᓄᖅᑲᖓᔪᑦ ᐃᖅᑲᓇᐃᔭᖅᑏᑦ ᓈᒻᒪᓇᓐᖏᓐᓂᖏᓐᓄᑦ ᐊᑭᓕᖅᓱᖅᑕᐅᒐᓗᐊᑦ ᑲᑐᔾᔨᔨᓂᒃ. ᓂᕆᓂᐊᖅᑕᒥᓂᒃ ᐅᖅᑰᔾᔪᑎᔅᓴᓂᓪᓗ ᐊᓃᖅᑎᓪᓗᒋᑦ ᐊᑦᑕᓇᖅᑐᒦᖁᓇᒋᓪᓗ ᓯᓚᒥ ᓂᓪᓚᓱᑦᑐᒦᑎᓪᓗᒋᑦ.

“ᐃᑉᐱᓐᓂᐊᓂᕗᑦ ᖁᕝᕙᑦᑎᐊᖅᑐᖅ ᖁᕕᐊᑉᐳᖓᓪᓗ ᐃᓚᒋᔭᐅᔪᑦ ᖃᐅᔨᒪᒻᒪᑕ ᐱᔪᓐᓇᕆᐊᖃᖅᑕᒥᓂᒃ,” ᕈᓴᓐ ᐅᖃᖅᑐᓂ.