ᑲᓇᑕᐅᑉ ᐅᑭᐅᕐᑕᖅᑐᖓᓂ ᐅᒥᐊᕐᔪᐊᒃᑰᖅᑎᑦᑎᕙᖕᓂ HFO-ᒥ ᓄᖅᑲᖅᑎᑦᑎᓯᒪᓂᖅ ᑭᓯᐊᓂ 2029-ᒥ ᐅᕘᓇ IMO ᑐᓯᕋᐅᑎᖏᑦᑎᒍᑦ
“ᐊᑑᑎᖃᖅᑐᓂᒃ, ᑮᓇᐅᔭᓕᐅᕈᑎᐅᖃᑦᑕᕈᓐᓇᖅᑐᓄᑦ ᖃᓄᐃᓕᐅᕈᑎᒃᓴᓂᒃ ᐋᖅᑭᒃᓯᓯᒪᔭᕆᐊᖃᖅᑐᑦ ᓄᓇᕗᒻᒥᐅᑦ ᑕᒪᑐᒧᖓ ᐊᑭᓖᒋᐊᖃᔾᔮᙱᒻᒪᑕ,” ᓄᓇᕗᑦ ᒥᓂᔅᑕ ᐅᖃᖅᑐᖅ
ᐃᖅᑲᓇᐃᔭᖅᑎᒋᔭᐅᖃᑕᐅᔪᖅ ᐅᓂᐊᕈᑎᒥ ᐅᒥᐊᕐᒥ ᐃᖏᕐᕋᖃᑎᖃᖃᑦᑕᖅᑐᒥᓐ ᓄᓇᕗᑦ ᑲᓴᖕᓇᖓᓂ ᐅᑭᐅᕐᑕᖅᑐᕐᒥ ᐅᓯᑲᖅᑕᖅᑎᑦ (NEAS) ᑭᓴᕐᓯᒪᔪᖅ ᓯᑲᐅᒧᑦ ᕗᕉᐱᓱ ᐸᐃᒥ, ᐃᖃᓗᐃᑦ ᖃᓂᒋᔭᖓᓂᒃ. (ᐊᔾᔨᙳᐊᖁᑎᒋᔭᐅᔪᖅ)
For an English version of this story, see Canadian Arctic sealift could be exempt from HFO ban until 2029 under IMO proposal
ᑲᑎᒪᔨᕋᓛᕆᔭᐅᔪᑦ ᓄᓇᕐᔪᐊᕐᒥ ᐃᒪᕐᒥᐅᑕᓕᕆᓂᕐᒧᑦ ᑲᑐᔾᔨᖃᑎᒌᓄᑦ (International Maritime Organizations (IMO)), ᑲᑎᒪᓚᐅᕐᑎᓪᓗᒋᑦ ᓚᓐᑕᓐᒥ ᑕᖅᑭᐅᓚᐅᕐᑐᒥᑦ, ᑐᒃᓯᕋᐅᓯᐅᕐᓯᒪᓕᕐᒪᑕ ᐅᕐᓱᐊᓗᖕᓂ ᐅᑭᐅᕐᑕᖅᑑᑉ ᐃᒪᖓᒎᖃᑦᑕᖁᔨᔪᓐᓃᕐᖢᑎᒃ—ᐃᓚᖃᖅᖢᓂ ᑲᓇᑕᐅᑉ ᐅᑭᐅᕐᑕᖅᑐᖓᓂᒃ ᐅᒥᐊᕐᔪᐊᖑᕙᒃᑐᑦ ᐃᓚᐅᑎᑕᐅᙱᓪᓗᑎᒃ ᓄᑖᓂ ᐱᖁᔭᕐᓂᒃ ᔪᓚᐃ 1, 2029 ᑎᑭᓪᓗᒍ.
ᐅᓇ ᓈᒻᒪᒋᔭᐅᖅᑰᔨᔪᖅ ᑲᓇᑕᒥᐅᓄᑦ ᐅᑯᐊ ᓄᓇᕐᔪᐊᕐᒥ ᐃᒪᕐᒥᐅᑕᓕᕆᓂᕐᒧᑦ ᑲᑐᔾᔨᖃᑎᒌᖑᔪᑦ (IMO), ᔫᓇᐃᑕᑦ ᓇᐃᓴᓐᔅᑯᓐᓂ ᑎᒥᖁᑎᒋᔭᐅᔪᖅ ᐋᖅᑭᒃᓱᐃᔨᐅᔪᑦ ᓄᓇᕐᔪᐊᕐᒧᑦ ᒪᓕᒐᒃᓴᓂᒃ ᐅᒥᐊᕐᔪᐊᓕᕆᓂᕐᒧᑦ, ᐋᖅᑭᒃᓯᓂᐊᕐᓂᖏᓐᓂᒃ ᐋᖅᑭᒃᓱᕐᓯᒪᔪᓂᒃ ᐱᓕᕆᐊᖃᕐᓂᕐᒥ ᖃᓄᐃᓕᐅᕈᑎᓂᒃ ᑕᒪᒃᑯᐊ ᐅᕐᓱᐊᓗᒃᓴᐃᑦ (HFO) ᐅᑭᐅᕐᑕᖅᑐᒃᑰᖁᔭᐊᖃᑦᑕᙱᓐᓂᖏᓐᓄᑦ.
ᓴᖅᑭᔮᒐᖓᔪᖅ ᐅᕙᓂ ᓴᖅᑭᑕᐅᔪᒥ Cryopolitics ᓴᖅᑭᔮᒐᖓᓂᒃ ᕕᕗᐊᕆ 22-ᒥᑦ, ᒥᐊ ᐸᓇᑦ, ᓄᓇᓕᕆᓂᕐᒥ ᐃᓕᓴᐃᔨ ᐅᕙᓂ ᔫᓂᕘᓯᑎ ᕼᐋᖕ ᑳᖕᒥ, ᐅᖃᓚᐅᕐᑐᖅ ᓄᓇᕐᔪᐊᕐᒥ ᐃᒪᕐᒥᐅᑕᓕᕆᓂᕐᒧᑦ ᑲᑐᔾᔨᖃᑎᒌᓄᑦ ᐱᓕᕆᔨᐅᔪᑦ ᐃᓱᒪᓕᐅᕆᓚᐅᕐᓂᖏᓐᓂᒃ ᐅᓂᒃᑳᖏᑦᑎᒍ ᐅᑯᓄᖓ ᑲᑐᔾᔨᖃᑎᒌᖑᔪᑦ ᑲᑎᒪᔨᕋᓛᖏᓐᓄᑦ ᐅᑯᐊ ᐅᕐᓱᐊᓗᒃᓴᐃᑦ (HFOs) ᐅᑭᐅᕐᑕᖅᑐᕐᒧᐊᖃᑦᑕᖁᔭᐅᔪᓐᓃᕐᖢᑎᒃ ᐅᓇ ᑎᑭᒐᓱᖕᓂᖓᓂᒃ ᔪᓚᐃ 1, 2014.
ᑭᓯᐊᓂᓕ ᑕᒪᐅᓇᑦᑕᐃᓐᓇᖅ, ᑖᒃᑯᐊ ᐱᓕᕆᔨᐅᔪᑦ ᐃᓱᒪᓕᐅᕆᓚᐅᕐᑐᑦ ᐊᑐᖅᑎᑦᑎᙱᓪᓗᑎᒃ ᐃᑲᔫᑎᒋᔭᐅᓂᕐᒧᑦ ᐅᒥᐊᕐᔪᐊᓂᒃ ᐊᐅᓚᑦᑎᔨᐅᔪᓂᒃ ᐱᔨᑦᑎᕋᖃᑦᑕᖅᑐᓂᒃ ᓄᓇᕗᒥᑦ ᐊᒻᒪ ᓄᓇᕕᒻᒥ.
ᐃᒪᓐᓇ ᑭᓯᐊᓂ ᐃᓚᖃᕐᓗᓂ, ᐅᑭᐅᕐᑕᖅᑑᑉ ᓯᒡᔭᖓᓃᑦᑐᓂᒃ ᐃᓚᐅᑎᑦᑎᓇᔭᙱᑦᑐᑦ ᑖᓐᓇ ᐅᒥᐊᕐᔪᐊᖅ ᐊᐅᓚᖁᑎᖃᖅᐸᑦ ᐊᐅᓚᑦᑎᔪᓐᓇᕐᓂᕐᒥ ᑕᒫᓂ ᓄᓇᖃᕐᓂᖏᓐᓄᑦ ᐅᕝᕙᓘᓐᓃᑦ ᐱᔪᓐᓇᕐᓂᖏᓐᓄᑦ ᑎᑭᓪᓗᒍ ᔪᓚᐃ 1, 2019.
ᐅᓇ ᒪᑯᓄᖓᐅᓇᔭᖅᑐᒃᓴᐅᔪᖅ ᐅᒥᐊᕐᔪᐊᓄᑦ ᐅᓯᑲᖅᑕᖃᑦᑕᖅᑐᓂᒃ ᐃᓚᖓᒍᑦ ᓇᖕᒥᓂᕆᔭᐅᔪᓂᒃ ᐃᓄᖕᓄᑦ ᐅᑯᑎᑐᓇ ᓄᓇᕗᑦ ᑲᓇᖕᓇᖓᓂ ᐅᓯᑲᖅᑕᖅᑎᒃᑯᓐᓂᒃ (NEAS) ᐊᒻᒪᓗ ᓄᓇᕗᑦ ᓰᓕᖕᒃ ᐊᒻᒪ ᓴᐸᓚᐃ (Nunavut Sealink and Supply Inc.), ᑖᑯᐊ ᐊᕐᕌᒍᑕᒫᓐ ᐅᒥᐊᕐᔪᐊᓕᕆᔨᐅᖃᑦᑕᕐᒪᑕ ᐊᒻᒪᓗ ᐅᓇ ᓛᐸᑐᐊᒥᐅᓄᑦ ᓇᖕᒥᓂᕆᔭᐅᔪᖅ ᕗᑦᕗᐊᑦ ᐱᓕᕆᖃᑎᒌᑦ ᑲᒻᐸᓂᐅᔪᑦ (Woodward Group of Companies), ᑖᒃᑯᐊᓕ ᐅᕐᓱᐊᓗᖕᒥ ᐅᓯᑲᖅᑕᖅᑎᐅᔪᑦ ᐊᒥᓱᓄᑦ ᓄᓇᓕᖕᓄᑦ ᐊᐅᔭᒃᑯᑦ.
ᐊᓯᒃᑲᓐᓂᖓᓕ ᐅᖃᐅᓯᐅᓯᒪᖕᒥᔪᖅ ᐅᒥᐊᕐᔪᐊᓂᒃ ᑕᒪᑐᒧᖓ ᐊᒃᑐᖅᑕᐅᓇᔭᙱᑦᑐᓂᒃ ᐅᑯᐊ ᑐᐊᕕᕐᓇᖅᑐᓕᕆᔨᒃᑯᑦ, ᐅᕝᕙᓘᓐᓃᑦ ᐅᕐᓱᐊᓗᖕᒥ ᑯᕕᔪᖃᕋᔭᕐᓂᕐᒧᑦ ᐸᕐᓇᒃᓯᒪᔪᓂᒃ ᑐᐊᕕᕐᓇᖅᑐᓕᕆᔨᓂᒃ, ᐅᑯᐊ ᓄᓇᕐᔪᐊᕐᒥ ᐃᒪᕐᒥᐅᑕᓕᕆᓂᕐᒧᑦ ᑲᑐᔾᔨᖃᑎᒌᖑᔪᑦ (IMO) ᐅᓂᒃᑳᖏ ᐅᖃᕐᓯᒪᔪᑦ ᑲᑎᒪᔾᔪᑎᕕᓂᕐᓂᒃ.
ᐊᒻᒪᓗ ᐃᓚᖏᑦ ᐅᒥᐊᕐᔪᐊᑦ ᓴᓇᔭᐅᓯᒪᓂᖏᑦᑎᒍᑦ ᒪᓕᒃᓯᒪᔪᑦ ᐅᕐᓱᐊᓗᖃᐅᑎᓂᒃ ᓴᐳᔾᔨᓯᒪᑦᑎᐊᕐᓂᕐᒥ ᐊᒻᒪ ᐊᒃᑐᖅᑕᐅᓇᔭᙱᒻᒥᔪᑦ ᑎᑭᓪᓗᒍ ᔪᓚᐃ 1, 2029, ᓄᓇᕐᔪᐊᕐᒥ ᐃᒪᕐᒥᐅᑕᓕᕆᓂᕐᒧᑦ ᑲᑐᔾᔨᖃᑎᒌᖑᔪᑦ (IMO) ᐅᓂᒃᑳᖏ ᐅᖃᕐᓯᒪᔪᑦ.
ᑕᐃᒪᐃᓕᓂᖏᑦ ᓈᒻᒪᒋᔭᐅᖅᑰᔨᔪᑦ ᑲᓇᑕᐅᑉ ᒐᕙᒪᖓᓄᑦ, ᑖᒃᑯᐊᓗᑦ, ᖃᖓᑦᑎᐊᓵᖅ ᑎᑭᖢᒍ ᐃᑲᔪᖅᑐᐃᓯᒫᓂᒃᓯᒪᓚᐅᙱᑦᑐᑦ ᑕᒪᐃᓐᓂᑦ ᐅᕐᓱᐊᓗᒃᓴᓂᒃ (HFO) ᐱᑕᖃᕈᓐᓃᖅᑎᑦᑎᓂᕐᒥ ᐅᑭᐅᕐᑕᖅᑐᕐᒥᓐ.
ᑲᓇᑕ ᐃᑲᔪᓯᔪᖅ ᐃᓚᒋᐊᕐᓯᒪᓕᕐᑐᓂᒃ ᐊᑐᖁᔭᐅᙱᑦᑐᒧᑦ
ᑲᓇᑕᒥᐅᑕᑦ ᑕᒪᑐᒧᖓ ᖃᓄᐃᓕᖓᓂᖏ ᐊᓯᙳᓚᐅᕐᑐᖅ ᕕᕗᐊᕆ 18-ᒥᑦ ᐅᑯᐊ ᐃᖏᕐᕋᔾᔪᑎᓕᕆᔨᒃᑯᑦ ᒥᓂᔅᑕᖓ ᒫᒃ ᒑᓅ ᐊᒻᒪ ᓄᓇᖅᑲᑎᒋᙱᑦᑐᓄᑦ ᖃᓄᐃᓕᐅᕈᑎᓂᒃ ᒥᓂᔅᑕ ᕗᕌᓐᓱᐊ-ᕕᓕᑉ ᓵᒻᐸᐃᓐ ᑐᓴᖅᑎᑦᑎᓚᐅᕐᑎᓪᓗᒋᑦ ᐊᑕᐅᑦᑎᒃᑯᑦ ᐅᖃᐅᓯᖃᖅᖢᑎᒃ ᑲᓇᑕ ᐃᑲᔪᖅᑐᐃᓕᕐᓂᖓᓂᒃ ᐅᕐᓱᐊᓗᒃᓴᓂᒃ (HFO) ᐅᑭᐅᕐᑕᖅᑑᑉ ᑕᕆᐅᖓᒎᖁᔨᖕᒋᓐᓂᕐᒥᒃ ᐃᑲᔪᖅᑐᐃᓕᕐᓂᖏᓐᓂᒃ ᐅᕐᓱᐊᓗᒃᓴᓂᒃ ᑕᒪᐅᓈᖁᔨᙱᓐᓂᕐᒥᒃ—ᑕᒪᓐᓇ ᐱᓕᕆᐊᖑᕙᓪᓕᐊᓂᐊᕈᓂ.
ᑕᐃᒪᐃᔾᔪᑎᖃᖅᑐᖅ ᐃᖏᕐᕋᔾᔪᑎᓕᕆᔨᒃᑯᑦ ᑲᓇᑕᒥ ᐱᕙᓪᓕᐊᔪᓕᕆᓂᕐᒧᑦ ᐊᒃᑐᐃᒍᑎᓂᒃ ᖃᐅᔨᓴᕈᑎᖓ ᖃᐅᔨᒍᑎᐅᓚᐅᕐᒪᓐ ᒫᓐᓇᑲᐅᑎᒋ ᐅᕐᓱᐊᓗᒃᓴᓂᒃ ᐅᓯᖃᑦᑕᕐᓂᖅ ᓄᖅᑲᖅᑎᑕᐅᓂᖓ ᐊᑭᑐᓂᕐᓴᓂᒃ ᐊᑭᓕᐅᑎᐅᒍᑎᐅᖃᑦᑕᕋᔭᕐᓂᖓᓂᒃ ᐅᒥᐊᕐᔪᐊᓂᒃ ᐊᐅᓚᑦᑎᔨᓄᑦ.
ᑖᓐᓇᑦᑕᐅᖅ ᐊᑭᑦᑐᕈᑎᐅᓇᔭᕐᒪᓐ ᖃᔅᓯᒐᓴᖕᓄᑦ ᐱᖁᑎᓄᑦ ᐊᒻᒪ ᐱᔨᑦᑎᕋᐅᑎᓄᑦ ᓄᓇᕗᒥᑦ, ᒪᑯᓂᖓ ᓂᕿᓂᒃ, ᐃᒡᓗᒧᑦ ᐱᖁᑎᒃᓴᓂᒃ, ᐊᖑᓇᓱᒍᑎᓄᑦ, ᐋᓐᓂᐊᕐᕕᖕᓂ ᐱᖁᑎᒃᓴᓄᑦ ᐊᒻᒪᓗ ᐃᒡᓗᓕᐅᕈᑎᒃᓴᓄᑦ, ᐃᖏᕐᕋᔾᔪᑎᓕᕆᔨᒃᑯᑦ ᑲᓇᑕᒥ ᐅᖃᓚᐅᕐᑐᑦ.
ᑕᒪᒃᑯᐊ ᐊᑭᓕᐅᑎᒃᓴᒃᑲᓐᓂᐅᓇᔭᕐᑐᑦ ᐊᑐᓕᕋᔭᕐᑐᑦ ᐃᓚᖃᕐᓗᑎᒃ ᐊᓯᒃᑲᓐᓂᕐᓂᒃ ᐊᑭᓕᐅᑎᒃᓴᐅᓇᔭᖅᑐᓂᒃ ᐋᖅᑭᒃᑕᐅᔪᓂᒃ ᐅᕘᓇ ᓄᑖᒃᑯᑦ ᐃᖏᕐᕋᔾᔪᑎᓕᕆᔨᒃᑯᑦ ᑲᓇᑕᒥ ᐱᖁᔭᖓ ᐊᑐᖁᔨᓯᒪᓪᓗᑎᒃ ᐅᕐᓱᐊᓗᖕᓂ ᐃᒪᙳᕐᑎᑕᐅᓯᒪᓂᕐᓴᓂᒃ ᑖᓐᓇᓗ ᐱᒋᐊᖅᑎᑕᐅᓚᐅᕐᖢᓂ ᔭᓄᐊᕆ 1-ᒥᑦ.
ᑲᑎᖢᑎᒃ ᐊᒃᑐᐃᒍᑎᐅᓇᔭᖅᑐᑦ ᐅᕐᓱᐊᓗᖕᒧᑦ (low sulpur fuel) ᐱᖁᔭᐃᑦ ᐊᒻᒪ ᓯᕗᓂᒃᓴᒥ ᐅᕐᓱᐊᓗᒃᓴᒥ ᐅᑭᐅᕐᑕᖅᑑᑉ ᑕᕆᐅᖓᒎᖁᔨᙱᓐᓂᕐ ᐊᑭᖃᕋᔭᖅᑐᖅ ᓄᓇᕗᒥᑦ ᐃᒡᓗᖃᖅᑐᒧᑦ ᒪᐅᖓ $1,400-ᓂᒃ ᐊᕐᕌᒍᒥᓐ.
ᑕᒪᒃᑯᐊᓗ ᐊᑭᑦᑐᕆᐊᕈᑎᐅᔪᑦ ᐊᑭᓕᐅᑎᐅᓕᕋᔭᖅᖢᑎᒃ ᐊᕕᒃᑐᖅᑕᐅᓯᒪᓂᒃᑯᑦ ᐃᓄᖕᓄᑦ ᐊᒻᒪ ᐊᓯᖏᓐᓄᑦ ᓄᓇᖃᖅᑳᖅᑐᓂᒃ ᐅᑭᐅᕐᑕᖅᑐᕐᒥᐅᑕᓂᒃ, ᑖᒃᑯᐊᓗ ᑮᓇᐅᔭᓕᐅᙱᓐᓂᕐᓴᐅᓪᓗᑎᒃ ᖃᓪᓗᓈᓂᓪᓕ, ᐃᖏᕐᕋᔾᔪᑎᓕᕆᔨᒃᑯᑦ ᑲᓇᑕᒥ ᖃᐅᔨᓴᕐᓂᒃᑯᑦ ᖃᐅᔨᓚᐅᕐᑐᑦ.
ᑕᐃᒪᓕ ᑲᓇᑕ ᐱᕕᖃᒃᑲᓐᓂᕈᒪᓕᕐᑐᖅ “ᐃᑲᔪᕈᓐᓇᕐᓗᑎ ᓇᓕᒧᒌᒍᑎᐅᔪᓐᓇᖅᑐᓂᒃ ᐊᕙᑎᓕᕆᓂᒃᑯᑦ ᐱᑖᕈᑎᐅᔪᓐᓇᖅᑐᓂᒃ ᒪᑯᓄᖓ ᑮᓇᐅᔭᓕᐅᕈᑎᓕᕆᓂᕐᒧ ᐱᓪᓚᕆᐅᔪᓄᑦ ᐅᑭᐅᕐᑕᕐᑐᕐᒥᐅᑦ, ᓄᓇᖃᖅᑳᖅᑐᓄᓪᓗ ᐊᒻᒪ ᐃᓄᐃᑦ ᓄᓇᖏᓐᓂᒃ,” ᒑᓅ ᐊᒻᒪ ᓵᒻᐸᐃᓐ ᐅᖃᓚᐅᕐᑑᒃ ᐅᖃᐅᓯᒃᓴᖏᑦᑎᒍᑦ.
ᓄᓇᕗᑦ ᒐᕙᒪᒃᑯᑦ ᓄᓇᕗᒥᑦ ᓴᐳᔾᔭᐅᓯᒪᖁᔨᔪᖅ ᐅᕐᓱᐊᓗᖕᒥ ᑕᕆᐅᒃᑰᖅᑎᑦᑕᐃᓕᑎᑦᑎᓂᕐᒧᑦ
ᓄᓇᕗᑦ ᒐᕙᒪᒃᑯ ᐊᒻᒪ ᖁᐊᕐᓵᕐᒥᔪᑦ ᑮᓇᐅᔭᓕᐅᕋᓱᕐᓂᕐᒧᑦ ᖃᓄᐃᒍᑎᐅᓇᔭᕆᐊᒃᓴᖓᓂ ᐅᕐᓱᐊᓗᖕᒥ ᑕᕆᐅᒃᑰᖅᑎᑦᑕᐃᓕᑎᑦᑎᓂᖅ ᐊᑐᓕᖅᑎᑕᐅᑲᐅᕐᑐᓗᐊᕐᐸᓐ.
“ᐊᐅᓚᑕᐅᑦᑎᐊᙱᒃᑯᓂ, ᐅᓇ ᐅᕐᓱᐊᓗᖕᒥ ᑕᕆᐅᒃᑰᖅᑎᑦᑎᑦᑕᐃᓕᓂᖅ ᓈᒻᒪᙱᑦᑐᒥ ᐊᒃᑐᐃᒍᑎᖃᕐᓂᐊᕐᑐᖅ ᐃᓅᓯᕆᔭᐅᔪᓂᒃ ᐊᒻᒪ ᐃᓅᓯᖃᕋᓱᖕᓂᕐᒥᒃ ᓄᓇᕗᒻᒥᐅᓂᒃ ᑕᒪᐃᓐᓂ,” ᑕᐃᕕᑦ ᐊᕿᐊᕈᒃ, ᓄᓇᕗᒥᑦ ᐱᕙᓪᓕᐊᔪᓕᕆᔨᒃᑯᓐᓄᑦ ᐊᒻᒪ ᐃᖏᕐᕋᔾᔪᑎᓕᕆᔨᒃᑯᓐᓄᑦ ᒥᓂᔅᑕ, ᐅᖃᓚᐅᕐᑐᖅ ᒪᓕᒐᓕᕆᕕᒡᔪᐊᒥᑦ ᕕᕗᐊᕆ 21-ᒥᑦ.
“ᓂᖀᑦ, ᐃᒡᓗᐃᑦ ᐊᒻᒪ ᓴᓇᕝᕕᐅᔪᑦ ᐊᑭᖏᑦ ᖁᕝᕙᖅᐹᓪᓕᕋᔭᕐᓂᖏᑦ ᓂᕆᐅᓇᕋᔭᕐᒪᓐ, ᐊᒻᒪᓗ ᐱᕙᓪᓕᐊᔪᓕᕆᓂᐅᔪᑦ ᐱᒻᒪᕆᐅᔪᓄᑦ ᐱᓕᕆᐊᒃᓴᓄᑦ ᖃᓄᐃᓕᐅᕈᑎᓪᓗ ᓱᕈᑐᐃᓐᓇᕐᕋᔭᖅᖢᑎᒃ,” ᐊᕿᐊᕈᒃ ᐅᖃᖅᑐᖅ.
ᑕᐃᒪᐃᓕᐅᕐᑎᓪᓗᒍ, ᐊᕿᐊᕈᒃ ᐅᖃᓚᐅᕐᑐᖅ ᐅᖃᓪᓚᖃᑎᖃᓚᐅᕐᓂᖓᓂᒃ ᒑᓅᒥ ᑲᑎᒪᑎᓪᓗᒋ ᓯᕗᓂᐊᒍᑦ ᑕᒪᑐᒪᓂ ᑕᖅᑭᒥᓐ, ᐅᖃᐅᑎᓪᓗᓂᐅᒃ ᖃᓄᐃᓕᐅᖁᓂᕋᖅᖢᓂᐅᒃ ᓄᓇᕗᑦ ᑕᒪᑐᒧᖓ ᐅᕐᓱᐊᓗᖕᒥᑦ ᑕᕆᐅᒃᑰᖅᑎᑦᑎᑦᑕᐃᓕᓂᖅ ᐅᒥᐊᕐᔪᐊᒃᑯ ᐋᓐᓂᖅᑕᐅᓗᐊᖅᑕᐃᓕᖁᓪᓗᓂᒋ.
ᐊᕿᐊᕈᒃ ᐅᖃᓚᐅᕐᒥᔪᖅ ᖁᕕᐊᓱᖕᓂᕋᖅᖢᓂ ᓄᓇᕗᑦ ᑐᙵᕕᒃᑯᑦ ᐊᒻᒪ ᐃᓄᐃᑦ ᐅᑭᐅᕐᑕᖅᑐᕐᒥᑦ ᑲᑎᒪᔨᕐᔪᐊᖏᑦ ᐱᓇᓱᒃᓯᒪᓂᖏᓐᓂᒃ ᓄᓇᕗᑦ ᒐᕙᒪᒃᑯᑦ ᐱᓇᓱᐊᖅᑕᖓᑕ ᐊᔾᔨᐸᓗᐊᓂᒃ, ᐅᖃᐅᓯᖃᖅᖢᓂ ᓄᓇᕗᑦ ᑐᙵᕕᒃᑯᑦ ᐊᒻᒪ ᐃᓄᐃᑦ ᐅᑭᐅᕐᑕᖅᑐᕐᒥᑦ ᑲᑎᒪᔨᐅᕐᔪᐊᑦ ᑐᓴᒐᒃᓴᓕᐊᕆᓚᐅᕐᑕᖓᓂᒃ ᕕᕗᐊᕆ 18-ᒥᑦ.
ᓄᓇᕗᑦ ᑐᙵᕕᒃᑯᑦ ᐊᒻᒪ ᐃᓄᐃᑦ ᐅᑭᐅᕐᑕᖅᑐᕐᒥᑦ ᑲᑎᒪᔨᕐᔪᐊᑦ ᐃᑲᔪᖅᑐᐃᓯᒪᖕᒪᑕ ᐅᕐᓱᐊᓗᖕᒥ ᐅᒥᐊᕐᔪᐊᒃᑰᖅᑎᑦᑎᑦᑕᐃᓕᓂᕐᒥᑦ ᐅᑭᐅᕐᑕᖅᑐᕐᒥ ᐱᒋᐊᕐᓗᑎᒃ 2018-ᒥᑦ, ᐊᒻᒪᓗ ᓄᓇᕗᑦ ᑐᙵᕕᒃᑯᓐᓂᒃ ᑲᑎᒪᔭᖅᑐᖅᑐᑦ ᐊᓂᒍᐃᑎᑦᑎᓚᐅᖅᖢᑎᒃ ᑕᒪᐅᖔᖓᔪᒥ ᐅᒃᑑᐱᕆ 2018-ᒥᑦ.
“ᑕᕆᐅᕆᔭᑦᑕ ᐊᕙᓗᖓ ᓴᐳᔾᔭᐅᓯᒪᙱᓐᓂᖓ ᐊᓯᐊᒎᕈᑎᐅᙱᒻᒪᑦ, ᒪᑯᐊᑦᑕᐅᖅ ᓂᐅᕋᐃᓂᕐᒧᑦ ᐊᑭᓕᐅᑕᐅᕙᒃᑐᑦ ᐊᕙᑎᒋᔭᐅᔪᒥᑦ ᓴᐳᔾᔨᓯᒪᓂᕐᒥ ᓄᓇᓕᖕᓂ,” ᐅᖃᕐᓯᒪᓚᐅᕐᑐᖅ ᕕᕗᐊᕆ 18-ᒥᑦ ᐅᖃᐅᓯᒃᓴᕆᔭᐅᔪᓂᒃ ᐅᑯᓇᙵᑦ ᓄᓇᕗᑦ ᑐᙵᕕᒃᑯᑦ ᐊᒻᒪ ᐃᓄᐃᑦ ᐅᑭᐅᕐᑕᖅᑐᕐᒥᑦ ᑲᑎᒪᔨᐅᕐᔪᐊᓂᒃ.
ᓄᓇᕐᒧᐊᒥ ᐃᓄᐃᑦ ᑲᑐᔾᔨᖃᑎᒌᖏᑦ ᓈᒻᒪᒍᓱᓗᐊᙱᓚᑦ ᐃᓚᐅᙱᑎᑕᐅᓂᕐᔪᓂᒃ
ᑭᓯᐊᓂᓕ ᑐᓴᒐᒃᓴᓕᐊᕆᔭᐅᔪᑎᒍᑦ ᕕᕗᐊᕆ 25-ᒥᑦ, ᐃᓄᐃᑦ ᐅᑭᐅᕐᑕᖅᑐᕐᒥ ᑲᑎᒪᔨᕐᔪᐊᖏ ᐅᖃᓚᐅᕐᑐᑦ ᐃᓗᐊᕐᓴᓗᐊᙱᓐᓂᕋᖅᖢᑎᒃ ᑐᒃᓯᕋᐅᑎᒥ ᐃᓚᐅᑎᑕᐅᙱᑦᑐᓂᒃ ᐅᑯᓇᓂ ᐅᕐᓱᐊᓗᖕᒥ ᐅᒥᐊᕐᔪᐊᒃᑰᖁᔨᖏᓐᓂᖓᓂᒃ ᕿᒥᕐᕈᐊᕐᑕᐅᓕᕐᑐᒥᓐ.
ᑐᓴᒐᒃᓴᑎᒍᑦ, ᐅᖃᓚᐅᕐᒪᑕ “ᐊᒃᓱᓐ ᐃᑲᔫᑎᖃᕐᓂᐊᕐᓂᖏᓐᓂᒃ” ᑐᒃᓯᕋᐅᑎᒋᔭᐅᓯᒪᔪᑦ ᐅᕐᓱᐊᓗᖕᒥ ᐅᒥᐊᕐᔪᐊᒃᑰᖁᔨᖏᓐᓂᕐᒧᑦ ᒪᓕᖁᔭᐅᔪᓂᒃ, ᑭᓯᐊᓂᓕ ᐊᑭᓕᐅᑎᓄᑦ ᐃᓚᐅᑎᑕᐅᙱᓐᓂᕐᒥ ᓈᒻᒪᒃᓴᙱᖢᑎᒃ.
“ᓱᓕ ᐃᓱᒫᓘᑎᖃᕐᐳᒍ ᓈᒻᒪᙱᑦᑐᒃᑯᑦ ᐊᒃᑐᐃᒍᑎᐅᓇᔭᖅᑐᓂᒃ “ᐃᓚᐅᑎᑕᐅᙱᓐᓂᖅ” ᑲᔪᓯᓇᔭᕆᐊᒃᓴᖓᓂ ᓄᓇᑦᑎᓐᓂᒃ ᐃᓅᓯᑦᑎᓐᓂᒡᓗ ᐅᓗᕆᐊᓇᖅᑐᒦᓕᕋᔭᕆᐊᒃᓴᖏᓐᓂᒃ,” ᓖᓴ ᑯᐱᕈᐊᓗᒃ, ᐊᖓᔪᖅᑳᒧᑦ ᑐᒡᓕᕆᔭᐅᔪᖅ ᓄᓇᕐᔪᐊᒥ ᖃᓄᐃᓕᐅᒐᒃᓴᓄᑦ ᐅᑯᓇᙵᑦ ᐃᓄᐃᑦ ᐅᑭᐅᕐᑕᖅᑐᕐᒥ ᑲᑎᒪᔨᕐᔪᐊᑦ ᑲᓇᑕᒧᑦ ᐅᖃᓚᐅᕐᑐᑦ ᑐᓴᒐᒃᓴᓕᐊᑎᒍᑦ.
“ᑲᔪᓯᓂᐊᕐᑐᒍᑦ ᐃᑲᔪᕐᑐᐃᓂᕐᒥ ᑕᒪᐃᓐᓂ ᓄᖅᑲᖅᑎᑕᐅᓂᖅ ᐱᓕᕆᐊᖑᕙᓪᓕᐊᓗᓂ ᐅᕐᓱᐊᓗᖕᓂ ᑕᕆᐅᒃᑰᕐᑎᑦᑕᐃᓕᓂᖅ ᐊᑐᕐᓂᐊᕈᑎ ᐊᒻᒪᓗ ᑕᒪᓐᓇ ᓴᐳᔾᔨᓯᒪᒍᑎᐅᓗᓂ ᓄᓇᑦᑎᓐᓂᒃ ᐊᒻᒪ ᐊᕙᑎᒋᔭᑦᑎᓐᓂᒃ,” ᖁᐱᕈᐊᓗᒃ ᐅᖃᖅᑐᖅ, ᑕᐃᒪᓐᓇᓗ ᐃᓄᐃᑦ ᐅᑭᐅᕐᑕᖅᑐᕐᒥ ᑲᑎᒪᔨᕐᔪᐊᓂᒃ ᑕᐱᖃᓕᕈᑎᖃᕈᑎᐅᓪᓗᓂ ᐊᔾᔨᒌᙱᑦᑑᑎᓂᒃ ᐊᕙᑎᓕᕆᓂᕐᒧᑦ ᑲᑐᔾᔨᖃᑎᒌᖑᔪᓂᒃ.
ᐅᖃᓚᐅᕐᒥᔪᖅ ᐃᓄᐃᑦ ᐅᑭᐅᕐᑕᖅᑐᕐᒥ ᑲᑎᒪᔨᕐᔪᐊᑦ ᐊᑭᖃᕈᑎᒥ ᐊᑐᕐᓂᖏᑦ ᒪᑯᓄᖓ ᐊᑐᖁᔭᐅᔪᓂᒃ ᒪᓕᖏᓐᓂᕐᒧᑦ ᐅᑯᓇᙵᑦ ᐅᕐᓱᐊᓗᖕᓂ ᑕᕆᐅᒃᑰᕐᑎᑦᑕᐃᓕᓂᑯᓐᓂᒃ.
“ᐃᓅᓯᖃᓕᕋᑦᑕ ᐊᓯᙳᖅᐸᓪᓕᐊᔪᒥᓐ ᐅᑭᐅᕐᑕᖅᑐᕐᒥ ᐊᒻᒪᓗ ᓄᓇᖃᖅᑳᖅᑐᑦ ᓄᓇᓕᖏᑦ ᖁᐊᕐᓵᑎᒋᐊᖃᙱᖢᑎᒍᑦ ᐊᑭᑦᑐᕆᐊᕐᐸᓪᓕᐊᔪᓄᑦ,” ᖁᐱᕈᐊᓗᒃ ᐅᖃᖅᑐᖅ.
ᐅᕐᓱᐊᓗᖕᒥ ᑕᕆᐅᒃᑰᖅᑎᑦᑕᐃᓕᑎᑦᑎᓂᖅ ᒪᑯᓄᙶᕐᓯᒪᔪᖅ ᐅᕐᓱᐊᓗᖕᓂ, ᐃᔾᔪᖃᐅᕈᓘᔭᖅᖢᑎᒃ, ᑖᓚᐅᖂᔨᓪᓗᑎᒃ ᓴᓗᒻᒪᕐᓴᒐᕐᓂᙱᖢᑎᒃ ᓂᒡᓕᓇᖅᑐᒥ ᐃᒫᓂᒃ ᐊᒻᒪᓗ ᐃᑭᑎᑕᐅᒍᓂ ᕿᕐᓂᖅᑐᐊᓗᖕᒥ ᐳᔪᖃᖅᖢᓂ ᐅᕝᕙᓘᓐᓃᑦ ᕿᕐᓂᕐᑕᖅ ᑳᐸᓐ.
ᕿᕐᓂᖅᑕᑦ ᐳᔪᕈᔪᐃᑦ ᓯᑯᒧᐊᕈᑎ ᐊᐳᑎᒧᓪᓘᓐᓃ ᑕᐃᒪᓕ ᓯᕿᓂᕐᒥ ᐃᒃᐱᖕᓇᐃᓐᓇᙱᓐᓂᕐᓴᐅᓕᕐᖢᓂ ᐊᒻᒪᓗ ᐅᖅᑰᓂᕐᒥ ᑲᑎᕐᓱᐃᓂᕐᓴᐅᓕᕐᓗᑎ, ᑕᐃᒪᓐᓇᓗ ᓯᓚᐅᑉ ᐊᓯᙳᖅᐸᓪᓕᐊᓂᖓᓄᑦ ᐊᒃᑐᐊᓂᖃᖅᖢᓂ.
ᑕᒪᑐᒥᖓ ᐱᔾᔪᑎᖃᖅᖢᑎᒃ, 18 ᓄᓇᕐᔪᐊᒥ ᐊᕙᑎᓕᕆᓂᕐᒧᑦ ᑲᑐᔾᔨᖃᑎᒌᖑᔪᑦ, ᐅᕘᓈᖓᓪᓗᑎ ᑕᐃᔭᐅᔪᖅ ᓴᓗᒪᑎᑦᑎᓂᖅ ᐅᑭᐅᕐᑕᖅᑐᕐᒥ ᐱᓕᕆᖃᑎᒌ, ᐊᕐᕌᒍᒐᓴᖕᓂ ᐅᕐᓱᐊᓗᖕᓂ ᑕᕆᐅᒃᑰᖅᑎᑦᑎᑦᑕᐃᓕᓂᕐᒥ ᐱᓕᕆᐊᖃᕐᓯᒪᓕᕐᐳᑦ.
ᐊᒻᒪᑦᑕᐅᖅ ᐱᐅᒃᓴᙱᒻᒥᔪᑦ ᐃᓚᐅᑎᑦᑎᙱᔾᔪᑎᓂᒃ. ᓴᓗᒪᑎᑦᑎᓂᖅ ᐅᑭᐅᕐᑕᖅᑐᕐᒥ ᐱᓕᕆᖃᑎᒌᑦ ᐅᖃᐅᓯᒃᓴᒥ ᑐᓴᖅᑎᑦᑎᓚᐅᕐᑐᑦ ᐱᓇᓱᐊᕈᓯᐅᓚᐅᕐᑐᒥ ᐅᖃᖅᖢᑎᒃ ᐱᐅᒃᓴᙱᓐᓂᕋᖅᖢᑎᒃ ᐊᑭᓖᑎᑦᑎᓂᒃᑯ ᐃᓚᖏᓐᓂᒃ ᐊᑭᓖᑎᑦᑎᖃᑦᑕᕋᔭᙱᓐᓂᕐᒥᒃ ᑕᒪᓐᓇ ᐱᕕᖃᖅᑎᑦᑎᓇᔭᕐᒪᑦ ᐃᓚᖏᓐᓂᒃ ᐅᒥᐊᕐᔪᐊᓂᒃ ᐅᕐᓱᐊᓗᖕᒥ ᑕᕆᐅᒃᑰᖅᑎᑦᑎᓂᕐᒥ ᑎᑭᓪᓗᒍ 2029, ᑖᔅᓱᒥᖓᓗ ᐅᖃᐅᓯᖃᖅᖢᓂ ᓇᐅᒃᑯᑐᐃᓐᓇ “ᐱᕕᖃᕈᓐᓇᕐᓂᖓᓂᒃ.”
“ᐅᕐᓱᐊᓗᐃᑦ ᑕᕆᐅᒥ ᐃᑭᑎᑕᐅᕙᒃᑯᑎ ᐅᑭᐅᕐᑕᖅᑐᕐᒥ ᑎᑭᓪᓗᒍ ᔫᓂ 2029, ᐅᑭᐅᕐᑕᖅᑑᑉ ᓯᒡᔭᖏᓐᓂ ᓄᓇᓖ ᖁᐊᕐᓵᕐᓇᖅᑐᒦᓐᓇᔭᕐᒪᑕ ᐅᕐᓱᐊᓗᖕᓂ ᑯᕕᑐᐃᓐᓇᕆᐊᓕᖕᓂ ᐊᒻᒪᓗ ᓯᓚ ᐱᐅᔪᓐᓃᖅᐸᓪᓕᐊᓂᖓ ᓱᒃᑲᓂᕐᓴᐅᓗᓂ,” ᓵᓐ ᐳᕋᐃᐅ, ᐅᖃᖅᑎᒋᔭᐅᔪᖅ ᓴᓗᒪᑎᑦᑎᓂᖅ ᐅᑭᐅᕐᑕᖅᑐᕐᒥ ᐱᓕᕆᖃᑎᒌᓄᑦ ᐅᖃᓚᐅᕐᑐᖅ ᑕᓪᓕᕐᒥᐅᓚᐅᕐᓯᒪᔪᒥᓐ.
ᓄᓇᕐᔪᐊᒥ ᑕᕆᐅᕐᒥᐅᑕᓕᕆᔨᒃᑯᑦ ᐊᕙᑎᒋᔭᒥ ᓴᐳᔾᔨᓯᒪᓂᕐᒧᑦ ᑲᑎᒪᔨᕋᓛᖑᔪᑦ ᐅᖃᐅᓯᖃᑐᐃᓐᓇᕆᐊᖃᕐᑐᑦ ᐅᑭᐅᕐᑕᖅᑐᕐᒥ ᐅᕐᓱᐊᓗᖕᓂ ᑕᕆᐅᒃᑰᖅᑎᑦᑕᐃᓕᑎᑦᑎᓂᕐᒧ ᑐᒃᓯᕋᐅᑎ ᑲᑎᒪᕕᒃᓴᖓᓂ ᐅᒃᑑᐱᕆᒥ. ᐊᑐᓕᖅᑎᑕᐅᒍᓂ, ᓄᑖᑦ ᐱᖁᔭᐃᑦ ᐊᑐᓕᕐᓂᐊᖅᑐᑦ 2021 ᐅᐱᕐᖔᖓᓂᒃ, ᐊᒻᒪ ᐃᓚᒋᔭᐅᓕᕐᓗᑎᒃ ᓄᓇᕐᔪᐊᒥᑦ ᒪᓕᒐᓂᒃ ᑕᐃᔭᐅᔪᑦ ᓄᓇᕐᔪᐊᒥ ᑲᑎᒪᓂᕐᔪᐊᖅ ᓱᕈᖅᑎᑦᑎᑦᑕᐃᓕᓂᕐᒥᒃ ᐅᑯᓇᙵᑦ ᐅᒥᐊᕐᔪᐊᓂᒃ, ᖃᐅᔨᒪᔭᐅᖕᒥᔪᖅ ᐃᒪᓐᓇ “MARPOL.”
ᐅᕘᓇ MARPOL, ᐅᕐᓱᐊᓗᖕᒥ ᑕᕆᐅᒃᑰᕐᑎᑦᑕᐃᓕᑎᑦᑎᓂᖅ ᐋᓐᑖᑎᑲᒥ ᐊᑐᖅᑕᐅᓯᒪᓕᕐᑐᖅ 2010-ᒥᑦ ᐱᒋᐊᕐᖢᑎᒃ.
When I read Inukshuk, I always think “Inuk shook/sajuksuk”.. Talk about assimiliated Iniut resorting to archaic English writing in this day and age whent hey perfectly know well it’s inuksugaq or Inuksuk