ᑲᓇᑕᒥ ᐃᓄᐃᑦ ᑲᑐᔾᔨᖃᑎᒌᖏᑦ ᐊᖏᒡᓕᒋᐊᖅᑎᑦᑎᓂᕐᒥᒃ ᖃᓄᐃᓕᐅᕈᑎᒃᓴᒥᑦ ᐃᓄᐃᑦ ᓄᓇᖓᓂ

ᑲᓇᑕᒥ ᐃᓄᐃᑦ ᑲᑐᔾᔨᖃᑎᒌᖏᑦ ᑐᓴᖅᑎᑦᑎᒻᒪᕆᓚᐅᕐᐳᑦ ᑭᓇᑐᐃᓐᓇᓄᑦ ᑲᓇᑕᒥ ᒐᕙᒪᑐᖃᒃᑯᓐᓄᑦ ᐊᐅᓚᑦᑎᔨᐅᓕᕐᓂᐊᖅᑐᓄᑦ: ᐱᒋᐊᖅᑎᑦᑎᓗᑎᒃ ᐊᖏᔪᒻᒪᕆᖕᒥᑦ ᑲᓇᑕᒧᑦ ᐊᑦᑕᖃᑕᐅᔾᔪᑎᒃᓴᒥᑦ ᐃᓄᐃᑦ ᓄᓇᖓᓂ “ᓇᓕᒧᒃᓯᐅᑎᔪᓐᓇᖅᑐᒥᒃ ᐋᕿᒃᓱᖅᑕᐅᕙᓪᓕᐊᓂᕆᔭᐅᓂᑯᖓᓂ ᑲᓇᑕᓕᒫᒃᑯᑦ ᓄᓇᓯᐅᑎᓄᑦ ᐊᖅᑯᑎᓕᐊᖑᓂᑯᒥᒃ ᐅᕝᕙᓘᓐᓃᑦ ᓄᓇᓯᐅᑎᑯᑖᒧᑦ ᐊᖅᑯᑎᓕᐊᕕᓂᖅᑐᑦ ᐊᑦᑕᑕᖃᑎᒌᒍᑎᒥ ᑲᓇᑕᐅᑉ ᑲᓇᖕᓇᖓᓂᒃ ᐱᖓᖕᓇᖓᓄᑦ.”

ᑖᓐᓇ ᐃᑲᔪᖅᑐᖅᖢᓂᔾᔪᒃ, ᐃᓄᐃᑦ ᑕᐱᕇᑦ ᑲᓇᑕᒥ ᓴᕿᑎᑦᑎᓚᐅᕐᑐᑦ 9-ᖑᕐᓯᒪᔪᓂᒃ ᐅᖃᐅᓯᒃᓴᓂᒃ ᓯᕗᓪᓕᐅᑎᑕᐅᖁᔭᐅᔪᓂᒃ ᒪᓕᒐᓕᐅᖅᑎᒃᓴᐅᓂᕐᒧᑦ ᓂᕈᐊᒐᒃᓴᐅᔪᓄᑦ ᐃᓱᒪᒋᔭᐅᖁᔭᐅᔪᓂᒃ ᒫᓐᓇ ᒐᕙᒪᑐᖃᒃᑯᓐᓄᑦ ᓂᕈᐊᒐᒃᓴᐅᓂᕐᒧᑦ ᒪᓂᓴᑲᑕᒃᑎᓪᓗᒋᑦ.

“ᐃᓄᐃᑦ ᓄᓇᖓᑦ ᓴᓇᕝᕕᐅᓯᒪᙱᓛᙳᖕᒪᑦ ᑲᓇᑕᓕᒫᒥᑦ. ᐃᓄᐃᑦ ᐊᑐᕐᒪᑕ ᐊᔾᔨᒌᒃᑎᑕᐅᙱᓐᓂᕐᒥᒃ ᐊᓯᖏᑦ ᑲᓇᑕᒥᐅᑕᑦ ᑕᐅᑐᒃᖢᒋᑦ, ᐊᒻᒪᓗ ᐊᓯᖏᓐᓂᒃ ᑲᓇᑕᒥᐅᑕᓂᒃ ᐃᓄᐃᑦ ᓄᓇᖓᓃᑦᑐᓂᒃ,” ᐃᓄᐃᑦ ᑕᐱᕇᑦ ᑲᓇᑕᒥ ᑐᓴᒐᒃᓴᓕᐊᒃᑯᑦ ᐅᖃᓚᐅᕐᑐᑦ.

ᑕᒪᑐᒧᖓ ᐃᓚᒋᓪᓗᒍ, ᐃᓄᐃᑦ ᑕᐱᕇᑦ ᑲᓇᑕᒥ ᓴᖅᑭᑎᑦᑎᓚᐅᕐᒥᔪᑦ ᖃᓄᐃᑦᑐᓂᒃ ᐱᔪᒪᓂᖏᓐᓂᒃ ᑭᖑᓪᓕᕐᒥᑦ ᒐᕙᒪᑐᖃᒃᑯᓐᓄᑦ 2020-ᒥ ᐊᑐᖅᑐᒃᓴᓕᕆᓕᖅᐸᑕ, ᑕᐃᒪᐃᑦᑐᓪᓗ ᓴᖅᑭᑕᐅᓂᐊᕐᑐᒃᓴᐅᓪᓗᑎᒃ ᕕᕝᕗᐊᕆᒥ ᒫᑦᓯᒥᓪᓘᓐᓃᑦ.

ᑖᓐᓇ ᐊᐅᓚᔾᔪᑎᒃᓴᓄᑦ ᑐᓐᓂᖁᑕᐅᔪᖅ ᐱᖁᔨᓯᒪᒻᒪᕆᒃᑐᖅ ᑭᖑᓪᓖᑦ ᒐᕙᒪᐅᓕᕐᓂᐊᖅᑐᑦ ᑲᓇᑕᒧ ᑲᔪᓯᓂᐊᖁᓪᓗᒋ ᐊᑐᓕᖅᑎᑦᑎᕙᓪᓕᖏᓐᓂᒃ ᐃᓄᐃᑦ ᓄᓇᖓᓄᑦ ᐊᑐᐊᒐᕐᓂᒃ ᒪᑯᓄᖓ ᐃᓄᖕᓄᑦ ᑐᕌᖓᔪᓄᑦ ᐃᑲᔫᑎᒃᓴᓂᒃ.

“ᐃᓄᐃᑦ ᑕᐱᕇᑦ ᑲᓇᑕᒥ ᐅᖃᐅᔾᔨᔪᑦ ᑕᒪᐃᓐᓂ ᐊᕕᒃᑐᕐᓯᒪᓂᒃᑯᑦ ᒐᕙᒪᓕᕆᔨᐅᔪᑦ ᐱᓇᓱᐊᒐᖃᖁᓪᓗᒋᑦ ᐊᑐᓕᖅᑎᑦᑎᓂᕐᒥᒃ ᐃᓄᐃᑦ ᓄᓇᖓᓄᑦ ᐊᑐᐊᒐᕐᒥᑦ ᑕᒪᐃᑎᒍᑦ ᒐᕙᒪᓕᕆᓂᒃᑯᑦ, ᐃᓄᐃᑦ ᐊᑐᐃᓐᓇᖃᕈᓐᓇᖁᓪᓗᒋᑦ ᐊᒻᒪ ᐃᑲᔫᑎᖃᕈᓐᓇᕐᓗᑎᒃ ᐊᑐᐊᒐᕐᓂᒃ, ᐱᓕᕆᐊᒃᓴᓂᒃ ᐊᒻᒪ ᖃᓄᐃᓕᐅᕈᑎᒃᓴᓂᒃ ᐊᑐᖅᑕᐅᓇᓱᒃᑐᓂᒃ ᐃᓄᖁᑎᑦᑎᓐᓄᑦ ᐃᑲᔪᕈᑎᒃᓴᓂᒃ,” ᐃᓄᐃᑦ ᑕᐱᕇᑦ ᑲᓇᑕᒥ ᐊᖓᔪᖅᑳᖓ ᓇᐃᑕᓐ ᐅᐱᐊᑦ ᐅᖃᓚᐅᕐᑐᖅ ᑐᓴᒐᒃᓴᓕᐅᕐᓂᒃᑯᑦ.

ᑕᒪᐃᓐᓂ ᒪᕐᕉᒃ ᑎᑎᖅᑳᒃ ᐃᓗᓕᖃᖅᑐᑦ ᐅᑯᓂᖓ ᐱᔭᐅᔪᒪᒻᒪᕆᒃᑐᓂᒃ:

• ᐊᑦᑕᑕᖅᑎᑦᑎᓗᑎᒃ ᑕᒪᐃᓐᓂ 51-ᓂ ᐃᓄᐃᑦ ᓄᓇᖓᓂ ᓄᓇᓕᖕᓂᒃ ᐊᑐᕐᓗᑎ ᐸᐅᐳ ᐋᑉᑎᒃ (fibre optic) ᑐᓴᐅᒪᔾᔪᑎᓕᕆᔾᔪᑎᓂᒃ ᐅᓇ ᑎᑭᐊᓂᓚᐅᕐᑎᓐᓇᒍ 2031.
• ᐱᑕᖃᕈᓐᓃᖅᑎᑦᑎᓗᑎᒃ ᐱᓕᕆᔾᔪᑎᓄᑦ ᓈᒻᒪᙱᓕᐅᕈᑎᓂᒃ ᐃᓄᐃᑦ ᓄᓇᖓᓐᓂᒃ ᐅᓇ ᑎᑭᐊᓂᓚᐅᕐᑎᓐᓴᒍ 2030.
• ᐃᒡᓗᐃᑦ ᑭᖑᕙᓯᒃᑕᐅᓯᒪᓂᖏᑦ ᐃᓱᓕᑎᑕᐅᓗᑎᒃ ᑕᒪᐃᓐᓂ ᑎᓴᒪᓂᒃ ᐃᓄᐃᑦ ᓄᓇᖓᓂ ᐊᕐᕌᒎᒃ ᒪᕐᕉᒃ ᐃᓗᖓᒍᑦ.
• ᐋᕿᒃᓱᐃᒃᑲᓐᓂᕐᓗᑎᒃ ᐊᑐᓗᐊᕐᓂᕐᒧᑦ ᐃᑲᔪᖅᑕᐅᕝᕕᒃᓴᓂᒃ.
• ᐋᕿᒃᓱᐃᒃᑲᓐᓂᕐᓗᑎᒃ ᐃᓛᒌᒃᑐᑦ ᐱᑦᑎᐊᖃᑦᑕᐅᑎᙱᓗᐊᒧᑦ ᕿᒫᕝᕕᒃᓴᓂᒃ ᐊᒻᒪ ᐃᒡᓗᒋᔭᐅᓚᐅᑲᒍᓐᓇᖅᑐᓂᒃ.
• ᑮᓇᐅᔭᓂᒃ ᐊᑐᒃᑲᓐᓂᕐᓗᑎᒃ ᐃᓄᓄᑦ ᐃᓱᒪᒃᑯᑦ ᐋᓐᓂᐊᖁᖅᑐᓂᒃ ᐊᒻᒪᓗ ᐃᒻᒥᓃᖅᑎᑦᑎᑦᑕᐃᓕᓂᕐᒧᑦ.

9-ᖑᔪᑦ ᓇᓗᓇᐃᖅᑕᐅᓯᒪᔪᑦ ᐃᓄᐃᑦ ᑕᐱᕇᑦ ᑲᓇᑕᒥ ᐅᖃᐅᓯᖏᓐᓂᒃ ᓯᕗᓪᓕᐅᑎᑕᐅᖁᔭᐅᔪᑦ ᐃᒪᐃᓕᖓᔪᑦ:

1. ᐱᓕᕆᐊᖃᕐᓗᑎᒃ ᐃᓅᖃᑎᒌᖕᓂᕐᒧᑦ ᖃᓄᐃᓕᐅᕐᕕᒃᓴᓂᒃ ᐊᒻᒪᓗ ᐃᒻᒥᓃᖅᑎᑦᑎᑦᑕᐃᓕᓂᕐᒧᑦ.
2. ᐱᓕᕆᐊᖃᕐᓗᑎᒃ ᐃᒡᓗᓕᕆᓂᕐᒧᑦ ᑕᒪᒃᑯᐊ ᐅᑕᕿᓯᒪᔪᓕᒫᑦ ᐃᒡᓗᖃᕈᓐᓇᖅᑎᑕᐅᓕᕐᓗᑎᒃ ᐃᓄᐃᑦ ᓄᓇᖓᓃᑦᑐᑦ ᐊᕐᕌᒎᖕᓂ ᒪᕐᕉᖕᓂᑦ ᓂᕈᐊᖅᑕᐅᓚᐅᖅᑎᓪᓗᒋᑦ.
3. ᐱᓕᕆᐊᖃᕐᓗᑎᒃ ᐆᒻᒪᖁᑎᓕᕆᓂᕐᒥᒃ ᐊᒻᒪᓕ ᓯᓚᐅᑉ ᖃᓄᐃᑉᐸᓪᓕᐊᓂᖓᓂᒃ, ᑲᓇᑕᒥᐅᑕᑦ ᒑᓯᒥᙶᖅᑐᓂᒃ ᓯᓚᐃᓐᓇᕐᒧᙵᐅᕙᓪᓕᐊᔪᖃᕈᓐᓃᖁᓪᓗᒍ ᐅᓇ ᑎᑭᓚᐅᖅᑎᓐᓇᒍ 2050.
4. ᐱᓕᕆᐊᖃᕐᓗᑎᒃ ᓴᙱᒃᑎᕚᓪᓕᕈᑎᒃᓴᓂᒃ ᐃᓄᐃᑦ-ᒐᕙᒪᑐᖃᒃᑯᑦ ᐱᓕᕆᖃᑎᒌᖕᓂᖏᓐᓂᒃ.
5. ᐱᓕᕆᐊᖃᕐᓗᑎᒃ ᐃᒡᓗᓕᐅᕐᓂᕐᒥᑦ ᓴᓇᕝᕕᒃᓴᐅᓂᐊᖅᑐᓂᒃ ᐊᒻᒪ ᑮᓇᐅᔭᓕᐅᕐᓂᒃᑯᑦ ᐃᒻᒥᒃᑰᕈᓐᓇᕐᓯᓂᕐᒥᒃ, ᐱᒋᐊᕈᑎᖃᕐᓗᑎᒃ ᓴᖅᑭᑎᑦᑎᓂᕐᒥᒃ ᐅᑭᐅᕐᑕᖅᑐᕐᒥᑦ ᐱᖁᑎᒃᓴᓄᑦ ᐃᑲᔫᑎᒃᓴᓂᒃ, ᑖᓐᓇᓗ ᐊᑐᐃᓐᓇᐅᔪᓐᓇᕐᓗᓂ ᑕᒪᐃᓐᓂᑦ ᑎᓴᒪᐅᓕᖓᔪᓂᒃ ᐃᓄᐃᑦ ᓄᓇᖏᓐᓂᒃ, ᐱᒋᐊᕐᕈᑎᖃᕐᓗᑎᒃ ᑐᓐᓂᖅᑯᓯᐊᕐᒥᑦ $1 ᐱᓕᐊᓐ ᑖᓚᓂᒃ.
6. ᐱᓕᕆᐊᖃᕐᓗᑎᒃ ᐃᓕᓐᓂᐊᕐᓂᓕᕆᓂᕐᒥᒃ ᐃᓕᓐᓂᐊᕈᑎᐅᔪᑦ ᐊᔾᔨᒌᒃᑎᑕᐅᓂᕐᓴᐅᓕᕐᓗᑎᒃ ᐃᓄᖕᓄᑦ ᐊᒻᒪ ᐃᓅᙱᑦᑐᓄᑦ.
7. ᐊᑐᓕᖅᑎᑦᑎᓗᑎᒃ ᒪᓕᒐᓂᒃ ᒪᓕᒋᐊᖃᕆᓯᒪᔪᓂᒃ ᑐᓐᓂᖅᑯᑎᐅᓂᑯᓂᑦ ᑲᓇᑕᒥ ᖃᐅᔨᓇᓱᖕᓂᕐᒥᒃ ᐊᓯᐅᓯᒪᔪᓂᒃ ᐊᒻᒪ ᐃᓄᐊᖅᑕᐅᓯᒪᔪᓂᒃ ᓄᓇᖃᖅᑳᖅᑐᑦ ᐊᕐᓇᖏᓐᓂᒃ, ᐃᓚᖃᕐᓗᓂ 46-ᓂ ᐃᓄᖕᓄᑦ ᑐᕌᖓᓗᐊᖅᑐᓂᒃ ᒪᓕᒐᓕᕆᓂᒃᑯᑦ ᐱᓕᕆᐊᖑᔭᕆᐊᓕᖕᓂᒃ.
8. ᐱᓕᕆᐊᖃᕐᓗᑎᒃ ᓂᕿᖃᙱᓗᐊᖅᐸᒃᑐᓂᒃ ᐊᒻᒪ ᓂᕿᖃᕈᓐᓇᙱᓗᐊᕐᓂᕐᒥᒃ.
9. ᐱᓕᕆᐊᖃᕐᓗᑎᒃ ᓯᕗᒧᒃᑎᑉᐸᓪᓕᐊᑎᑦᑎᓂᕐᒥᒃ ᐃᓄᐃᑦ ᐱᔪᒪᓂᖏᒍᑦ ᖃᐅᔨᓴᖅᑐᓕᕆᓂᕐᒥᒃ.

ᐃᓄᐃᑦ ᑕᐱᕇᑦ ᑲᓇᑕᒥ ᐃᓕᖁᓯᖃᕐᒪᑕ ᐊᕕᒃᑐᖅᓯᒪᓂᒃᑯᑦ ᑲᒪᒋᔭᖃᙱᓐᓂᕐᒥᒃ, ᐊᒻᒪᓗ ᓇᓕᐊᓐᓂᒃ ᒪᓕᒐᓕᐅᖅᑎᐅᓂᒃᑯᑦ ᐱᓕᕆᐊᖃᖅᑐᓂᒃ ᐃᑲᔪᖅᑐᐃᓯᒪᓇᑎᒃ.

ᑭᖑᓪᓕᖅᐹᒥᓪᓕ ᓰᐲᓰᑯᑦ ᑲᓇᑕᒧᑦ ᖃᐅᔨᓴᕈᑎᒋᔭᖏᓐᓂᒃ, ᐅᕙᙵᑦ ᓯᑎᐱᕆ 20-ᒥᑦ, ᓕᐳᕈᓪ ᒪᓕᒐᓕᕆᔩᑦ ᑲᓇᑕᒥ ᐊᒻᒪᓗ ᑲᓐᓲᕕᑎᕝᑯᑦ ᑲᓇᑕᒥ ᖃᐅᔨᓴᕈᑎᑎᒍᑦ ᓇᓕᒧᒌᓚᐅᕐᑐᑦ.

ᐅᓇ ᓂᕈᐊᖅᑐᓕᕆᓂᒃᑯᑦ ᖃᐅᔨᓴᕈᑎ, ᑖᓐᓇᓗ ᑲᑎᕐᓱᐃᒍᑎᐅᓪᓗᓂ ᑕᒪᐃᓐᓂᒃ ᑭᒃᑯᓕᒫᓅᖓᔪᓂᒃ ᖃᐅᔨᓇᓱᒍᑎᓂᒃ ᑲᑎᑕᐅᓯᒪᔪᓂᒃ, ᐃᒪᐃᓕᖓᕗᖅ ᒫᓐᓇ ᑲᓐᓲᕕᑎᕝᑯᑦ 34.7 ᐳᓴᓐᑎ ᐃᑲᔪᖅᑐᖅᑕᐅᓂᖏᑦ, ᓕᐳᕈᑯᑦ ᒫᓂ 34.1 ᐳᓴᓐᑎᒥᑦ, ᓂᐅ ᑎᒧᑯᕌᑎᒃ ᐹᑎᑯᑦ 13.5 ᐳᓴᓐᑎᒥᑦ, ᐊᒻᒪ ᐅᑯᐊ ᒍᕇᓐ ᐹᑎᑯ 9.6 ᐳᓴᓐᑎᒥᑦ, ᐸᓚᒃ ᑯᐸᑯᐊ 4.4 ᐳᓴᓐᑎ ᐊᒻᒪᓗ ᐲᐳᔅ ᐹᑎ ᑲᓇᑕᒥ 2.8 ᐳᓴᓐᑎᒦᖢᓂ.

ᓂᕈᐊᖅᑐᓕᕆᓂᒃᑯᑦ ᖃᐅᔨᓴᕈᑎ ᐊᒻᒪ ᐃᒪᐃᓕᖓᔪᑦ ᐅᑯᐊ ᓕᐳᕈᒃᑯᑦ ᐱᕕᖃᕐᓂᕐᓴᐅᔭᕆᐊᒃᓴᖏᓐᓂᒃ ᐅᓄᕐᓂᕐᓴᓂᒃ ᐃᒃᓯᕙᐅᑕᓂᒃ.

ᒐᕙᒪᑐᖃᒃᑯᓐᓄᑦ ᓂᕈᐊᕐᓇᐅᓛᖅᑐᖅ ᐅᕙᓂ ᓇᒡᒐᔾᔭᐅ, ᐅᒃᑑᐱᕆ 21.