ᑳᑦᑐᖅ (ᐊᕐᓇᖅ ᑳᑦᑐᖅᓱ) – ᓯᕗᓪᓕᖅ 1

ᖃᓄᖅ, ᐊᕐᓇᖅ ᓴᒧᕐᒥᒃ, Summer ᖃᐅᔨᓚᐅᕐᓂᐊ ᓱᓕᔪᒥᒃ ᐅᑭᐅᕐᑕᕐᑐᒦᓐᓂᕐᒥᒃ

ᐃᖃᓗᐃᑦ ᑕᐃᔭᖓ ᕿᑭᕐᑕᖅ ᑐᑦᑐᓕᒃ – ᑐᑦᑐᓄᑦ ᐃᓂᒋᔭᐅᒻᒪᑦ – ᑭᓯᐊᓂ ᓄᑖᑎᒍᑦ ᖃᐅᔨᓴᕐᑕᐅᓯᒪᓂᖏᑎᒍᑦ ᐃᓱᒪᒋᐅᓯᒪᔪᑦ ᑐᖁᕋᕐᐸᓪᓕᐊᓂᖏᓐᓂᒃ.. (ᑎᑎᕋᕐᔭᕐᓯᒪᔭᖏᑦ ᑯᕆᔅᑕ ᒃᓛᓯᓐ)

By ᓖᓴ ᒍᕆᒍᐊ

For an English version of this story, see Kaattuq (She is hungry) – part one

ᖁᔭᓕᕗᒍᑦ ᐊᑐᐃᓐᓇᕈᕐᑎᑦᓯᒋᐊᖅ ᐃᓕᑦᓯᓐᓄᑦ, ᐅᖃᓕᒫᕐᑎᓄᓪᓗ, ᒫᓐᓇᒥ ᓄᖅᑲᖓᓇᕐᓂᐊᓂ ᐅᖃᓕᒫᒐᒃᓴᓂᒃ ᓇᐃᓈᕐᓯᒪᔪᓂᒃ ᐅᓂᒃᑲᐅᓯᐊᖏᓐᓂᒃ ᐃᖃᓗᒻᒥᐅᑕᐅᕙᓚᐅᕐᑑᑉ ᐊᒻᒪ ᓄᓇᑦᓯᐊᑉ ᑐᓴᒐᒃᓴᓕᐅᕐᑎᖏᓐᓄᑦ ᐃᖅᑲᓇᐃᔭᕐᑎᐅᓚᐅᕐᑑᑉ ᓖᓴ ᑯᕆᑯᐊᕐᒥᑦ. ᖃᐅᔨᒪᓗᓯ ᐅᓂᑳᕐᑐᐊᖏᑦ ᓱᓕᓪᓚᑦᑖᖏᒻᒪᑕ. ᖁᕕᐊᓱᒋᑦ ᐅᖃᓕᒫᕐᓗᑎᒃ!

ᓴᒧᕐ, Summer, ᓅᓚᐅᕐᓯᒪᒻᒪᑦ ᐅᑭᐅᕐᑕᕐᑑᑉ ᑲᓇᓐᓇᖓᓄᑦ ᐅᖅᑰᓂᕐᐸᐅᑎᓪᓗᒍ ᑕᐃᒪᖓᓂᑦ ᐊᒻᒪ ᑕᒪᓐᓇ ᑲᒪᒋᔭᐅᒻᒪᕆᓚᐅᕐᑐᖅ ᐆᖅᑯᔪᐊᓘᓂᖓ ᐊᒻᒪ ᓴᒧᕐ ᑕᐃᒫᑦᓴᐃᓐᓴᖅ ᐅᖃᐅᑎᔭᐅᖃᑦᑕᓚᐅᕐᑐᖅ, ᐊᑕᐅᓯᐊᕐᓇᓂ, ᐊᒻᒪ ᑕᒪᕐᒥᒃ ᐃᓱᒪᓪᓗᑎᒃ ᐱᒃᑲᐅᔪᕆᓪᓗᒍ ᐊᒻᒪ ᐊᔾᔨᐅᖏᓐᓇᓱᒋᓪᓗᒍ.

ᑎᑭᓚᐅᕐᓯᒪᔪᖅ ᓄᓇᕗᑦ ᒐᕙᒪᖃᕕᐊᓄᑦ ᕿᑎᐊᓂ ᔭᓄᐊᕆᐅᑉ ᐅᓪᓘᓐᓂ ᒪᕐᕉᓐᓂ ᓯᓚᓗᑦᓱᓂ ᐃᔾᔨᓕᓚᐅᕐᑎᓪᓗᒍ ᐃᖅᑲᓇᐃᔭᕆᐊᓯᓪᓗᓂ ᑲᒪᔨᒻᒪᕆᐅᒋᐊᖅ ᐆᒪᔪᓕᕆᓂᕐᒥᒃ ᐊᒻᒪ ᖃᐅᔨᓴᔨᐅᓂᕐᒧᑦ ᑐᑦᑐᓕᕆᓂᕐᒧᑦ ᐱᓇᓱᓐᓂᒃᑯᑦ ᒐᕙᒪᒃᑯᓐᓂ. ᐃᖃᓗᓐᓂ ᓯᓚᓗᓚᕐᐅᕐᓯᒪᑎᓐᓇᒍ ᔭᓄᐊᕆᒥ ᑭᖑᓂᕐᒥ. ᐃᓄᐃᑦ ᑲᒪᓕᓚᐅᕐᓯᒪᔪᑦ ᓯᓚᐅᑉ ᖃᓄᐃᓐᓂᐊᓂᒃ. ᕿᒻᒦᑦ ᑎᓱᕙᑦᓱᑎᒃ ᓯᑎᖓᔪᒥ ᓯᑯᐊᕐᓯᒪᓂᐊᓄᑦ ᐊᐳᑎᐅᑉ. ᑖᒃᓯᕐᑏᑦ ᓇᒧᑐᐃᓐᓇᖅ ᐊᖅᑯᑎᐅᖏᑦᑐᒧᑦ ᓄᖅᑲᖅᑲᑦᑕᓕᕐᓱᑎᒃ ᐊᒻᒪ ᐊᐳᖃᑦᑕᐅᑎᓪᓗᑎᒃ. ᓂᐅᕕᓂᓗ ᑮᓇᐅᔭᓕᐅᕈᑎᖃᕐᔪᐊᕐᓱᑎᒃ ᓂᐅᕕᒃᐊᒃᓴᖃᓂᕐᒧᑦ ᓵᑦᑐᐊᓗᓐᓂᒃ, ᐊᑭᑦᑐᓗᐊᕐᑕᐅᓯᒪᓪᓗᑎᓪᓗ ᓯᓚᓗᑕᐅᒌᒃᑯᑎᓂᒃ ᓱᕋᑦᓴᕋᐃᑦᑐᕈᓘᓪᓗᑎᒃ ᓂᐅᓐᖓᑦᓴᐃᑦᓱᑎᓪᓗ ᐊᓄᕆᒧᑦ, ᐊᒻᒪ ᐊᒥᓱᐊᓗᐃᑦ ᐹᓪᓚᑲᑕᓚᐅᕐᓯᒪᔪᑦ ᐊᒻᒪ ᑎᓪᓗᔭᓕᕐᓱᑎᒃ ᓰᖅᑯᒃᑯᑦ ᑕᐃᑦᓱᒪᓂ ᓴᒧᕐ ᑎᑭᑎᓪᓗᒋ ᒥᖃᑕᐅᓪᓗᓂ ᑕᑭᔪᑯᑖᕌᓗᒻᒧᑦ ᒥᒻᕕᒻᒧᑦ ᑕᐃᔭᐃᓪᓗᓂ ᐊᑎᖓᓂᒃ Martin Frobisher, ᑐᖁᖓᔪᑐᖄᓗᒻᒥᒃ ᐊᑎᐊ ᑉᕆᑦ.

“ᐋ,” ᐅᖃᓚᐅᕐᑐᖅ ᓴᒧᕐ, ᓄᔭᕐᓗᑦᑐᒻᒪᕆᐅᓪᓗᓂ ᒥᑦᑕᕐᕕᒻᒥ ᐊᓄᕆᒥᑦ ᐊᒻᒪ ᓯᓚᓗᒻᒥᑦ, ᐅᖃᕐᓱᓂᓗ ᕆᔨᓄᓪᒧᑦ, ᐊᖓᔪᖅᑳᕐᑖᓴᒥᓄᑦ, ᑲᑎᖃᕈᒪᓐᓂᕐᒪᑦ ᒥᑦᑕᕐᕕᐅᑉ ᐃᓗᐊᓂ ᑕᑯᒃᓴᐅᓪᓗᓂ ᖁᕐᓱᕐᑕᒥᓪᓗ ᐸᐃᑉᐹᒥᒃ ᑎᒍᒥᐊᕐᓱᓂ ᑎᑎᕋᕐᓯᒪᔪᒥᒃ ᓴᒧᕐ. “ᓯᓚᓗᓐᓂᐊᕐᑐᕆᑦᓯᖃᐅᖏᑦᑐᖓ.”

“ᑭᓇ ᑕᐃᒫᒃ ᓂᕆᐅᒐᔭᕐᒪᑦ?” ᑭᐅᓪᓗᓂ ᕆᔨᓄᓪ.

“ᓯᓚᐅᑉ ᐊᓯᔾᔨᕐᐸᓪᓕᐊᓂᐊᓄᑦ ᖃᐅᔨᓴᕐᑎᒻᒪᕇᒃ?”

“ᐄᖃᐃ.”

ᓴᒨᑉ ᐊᖓᔪᖅᑳᖏᒥᓄᑦ ᐊᑦᑎᕐᑕᐅᓐᓂᕐᒪᑦ ᓴᒧᕐᒥᒃ “ᓯᓚᕐᔪᐊᒧᑦ ᖃᐅᒻᒪᒍᑕᐅᖁᓪᓗᒍ ᐊᒻᒪ ᐅᖅᑰᑕᐅᖁᓪᓗᓂ.” ᑕᐃᒪᐃᒪᑉᐳᖅ ᑕᕝᕙ. ᓴᒧᕐ ᖁᕕᐊᒋᔭᖃᖏᒻᒪᕆᓚᐅᕐᑐᖅ ᐊᐅᔭᒥᒃ – ᐃᒃᓯᕙᓪᓗᓂ ᐊᑕᔪᖅᓯᒪᔪᖅ ᐊᐅᔭᕐᓯᐅᒻᒥᒃ ᐃᒃᓯᔭᕙᓪᓗᓂᓗ ᐊᐅᑦᑕᔫᒥ, ᑲᓈᖏᓪᓗ ᐅᖅᑰᔪᒻᒪᕆᐅᓪᓗᑎᒃ ᐊᐅᒃᑲᓂᖓᓪᓗᓂ ᓲᕐᓗ ᐊᓐᓄᕌᓂᒃ ᐃᕐᒥᐅᑎᑎᑐᑦ ᐆᓇᕐᓱᓂ. ᓴᒧᕐ ᐱᐅᒋᔭᖃᒪᑦ ᔭᐃᑲᓂ ᐊᒻᒪ ᖁᖓᓰᓕᑕᓂᒃ ᐅᖅᑰᔪᓂᒃ. ᐊᖓᔪᖅᑳᒥᓄᑦ ᐊᑦᓯᕐᑕᐅᒋᐊᓕᕕᓂᐅᒐᓗᐊᖅ ᕗᐃᓐᑐᕐ (Winter).

ᓴᒧᕐ ᐊᕐᕌᒍᖃᓚᐅᕐᓯᒪᔪᖅ 32,ᓂᒃ, ᑕᑭᓂᖃᓱᓂᓗ 5’1”,ᒥ ᐊᒻᒪ ᓄᓇᖏᑦ ᑲᔫᓪᓗᑎᒃ ᑕᑭᑎᒋᔪᑦ ᖁᖓᓯᖓᓄᑦ, ᓇᐃᓐᓂᕐᓱᐅᓪᓗᑎᒃ ᑐᓄᐊᒍᑦ ᐊᒻᒪ ᑕᑭᓂᕐᓴᐅᓪᓗᑎᒃ ᓵᖓᓂ ᑕᓪᓗᖏᓐᓂ ᐃᔨᕐᓯᒪᑎᑦᓯᓇᓱᒧᑦ ᖁᖓᓯᕐᒥᓂᒃ ᖁᐃᓂᒐᒥ. ᐃᓅᓕᕐᓂᕋᒥ ᐱᐅᓯᓕᒃ ᓴᐅᒥᐅᓪᓗᓂ ᐊᕐᓱᕈᕈᑎᖃᖃᑦᑕᕐᓯᒪᔪᖅ ᐅᓇᑕᕐᑕᐃᓕᓂᕐᒥᒃ ᓯᓚᕐᔪᐊᒥ, ᐃᒪᕐᔪᐊᒥᒃ ᓱᕈᕐᑕᐅᑦᑕᐃᓕᑦᓯᓂᕐᒧᑦ, ᐃᖅᑲᓇᐃᔭᕐᑎᓄᑦ ᐱᔪᓐᓇᐅᑎᓕᕆᓂᕐᒥᒃ, ᑐᕐᑐᓕᕆᓂᕐᒥᒃ, ᓇᐹᕐᑐᓕᕆᓂᕐᒥᒃ, ᖁᐱᕐᕈᐊᕈᓕᕆᓂᕐᒥᒃ, ᓱᓇᓃᔅᓗ ᓱᕈᓯᖏᓐᓂᒃ ᐃᖃᔪᕐᓯᒪᓪᓗᓂ (South Sudanese), ᐊᒻᒪ ᐊᓯᖏᓐᓂᒃ ᐱᓕᕆᓯᒪᔪᖅ. ᐃᓕᓐᓂᐊᕈᒪᒃᑲᐅᔪᑦ ᐊᒻᒪ ᐱᓕᕆᖃᐃᓐᓇᐅᔭᕐᓱᑎᒃ ᑭᒃᑯᑐᐃᓐᓇᕐᓄᑦ ᑭᓯᐊᓂᓕ ᓴᒧᕐ ᑕᐃᒪᐃᖏᒻᒪᑦ, ᑕᒪᓐᓇᓗ ᖁᕕᐊᒋᖏᖃᓯᐅᑎᔭᖓ.

*****

ᓯᓚᓗᒃ ᑖᓐᓇᑑᓚᐅᖏᒻᒪᑦ ᑲᒪᓇᕆᓚᐅᕐᑕᖓ ᓴᒧᕐ ᐊᑐᕐᑕᐊᓴ ᐅᑭᐅᕐᑕᕐᑐᒥᑎᓪᓗᒍ. ᐃᖃᓗᐃᑦ ᐃᓄᑭᓈᕆᓚᐅᕐᑕᖓ ᖃᐅᔨᒪᒍᒪᔪᒻᒪᕆᐊᓗᓐᓂᒃ ᐊᓯᒥᓂᒃ.

“ᓴᒧᕐᖑᕕᑦ? “ᐅᖃᖅᑐᖅ ᐹᑎ ᓚᕙᓚᐃᔅ, Patty Lovelace, ᐱᓕᕆᕕᒋᔭᖓ ᒥᓂᔅᑕᒧᑦ ᑐᓪᓕᕆᔭᐅᓪᓗᓂ, ᑮᓇᖓ ᐊᒻᒪᓗᕐᑐᖅ ᒫᕐᑎᒧᕐ, Maritimer ᓄᓇᖏᓪᓗ ᐃᕿᓱᓕᐅᓪᓗᑎᒃ ᐊᒥᐊᕐᓯᒪᔪᑦ ᑲᔪᕐᒥᒃ ᖀᕐᐸᓪᓕᐊᓕᕋᒥ ᐊᒻᒪ ᑭᒍᑎᖏᑦ ᐊᓪᓖᑦ ᓄᐃᑕᓂᕐᓴᐅᓪᓗᑎᒃ ᖃᓂᕐᓯᐅᕐᓯᒪᓪᓗᓂᓗ. ᐹᑎ ᐊᑐᓚᐅᕐᓯᒪᔪᖅ ᐊᕐᓇᓐᖑᔪᑎᒥᒃ ᐊᒻᒪ ᓄᕕᕐᓵᒥᒃ. ᑐᒃᓯᐊᕐᕕᒃᓯᐅᑎᓂᒃ ᐊᓐᓄᕌᓂᒃ ᐊᑐᕐᓱᓂ. ᑲᑎᓚᐅᕐᓯᒪᔫᒃ ᓂᕆᕕᒻᒥ ᓴᒧᕐ ᑐᓪᓕᕆᓕᕐᑕᖓᓂ ᐅᓪᓗᒥ ᐃᖅᑲᓇᐃᔭᓕᕐᑎᓪᓗᒍ.

“ᑐᑐᓂᐊᕐᑎᐅᕕᑦ ᐊᕐᓇᐅᓪᓗᑎᑦ,” ᐅᖃᕐᑐᖅ ᐹᑎ, ᑕᓕᕐᓂ ᖁᒻᒧᑦᑎᓯᒪᓪᓗᒋᒃ ᑐᑦᑑᑉ ᓴᔾᔪᖏᑎᑐᑦ.

“ᐅᕙᖓᐃᓐᓇ….”.

ᐹᑎ ᖃᓂᒃᓴᓕᕋᒥ ᓴᒧᒥᒃ ᓇᐃᒪᓕᕐᑐᖅ ᐱᐅᓴᐅᑎᖏᓐᓂᒃ. “ᐸᐃᑉᐹᖁᑎᒋᔪᔭᐃᑦ ᓴᓇᓯᒪᓚᐅᕐᓯᒪᔪᖅ ᐃᓪᒥᑦ ᐊᕐᕌᒍᒐᓴᐅᓕᕐᑐᒥ…” ᐹᑎ ᓂᐊᖁᒍᑦ ᐊᒃᑳᕐᑐᖅ. “ᐃᓱᒪᓂᖓ ᑲᒪᓇᓚᐅᕐᑐᖅ ᐱᓗᐊᕐᑎᑦᓯᓂᐊᒍᑦ. ᖃᓄᕐᓕ ᓴᐃᓇᓲᒍᒻᒪᑕ ᐃᓪᒃᓂᒃ? ᐊᑐᓲᒍᖏᒻᒪᑕ ᓇᓗᐃᒃᑯᑕᓂᒃ!” ᐃᔪᓕᕐᑐᖅ ᐊᒻᒪ ᐸᑎᑦᓯᓪᓗᓂ ᓴᒧᕐᒥᒃ ᐊᑦᑕᕆᓪᓗᒍ ᑐᐃᖓᒍᑦ ᐊᒻᒪ ᑐᓄᐊᒍᑦ ᐊᒡᒐᒥᓄᑦ.

“ᕼᐊ, ᕼᐊ, ᐋᒃᑲᖃᐃ.”

“ᐃᓱᒪᒋᔭᑦ ᑕᐃᒪᐃᖏᒻᒪᑦ ᐃᒃᐱᒍᓱᑦᓯᐊᕐᓂᒃᑯᑦ. ᑕᒪᓐᓇ ᐊᑲᐅᔪᖅ ᐃᓕᓐᓄᑦ.”

ᑕᐃᒫᓪᓕ ᐅᖃᕋᔭᖏᑦᑐᖓᓕ ᑕᒻᒪᕐᓯᒪᓂᕋᓗᒍ, ᐃᓱᒪᓕᓚᐅᕐᑐᖅ ᓴᒧᑦ. ᑲᓇᑕᐅᑉ ᐊᕕᒃᑐᕐᓯᒪᓂᐊᓂ ᓄᓇᖃᖅᑐᑎᑐᑦ ᐅᖃᓕᒪᒍᑎᖃᒪᑦ ᐃᓪᒃ (elk) ᓄᖑᑉᐸᓪᓕᐊᒻᒪᒐᑕ. ᖃᐅᔨᒃᑲᐃᒋᐊᖃᓚᐅᕐᑐᖅ ᑭᒃᑯᑐᐃᓐᓇᕐᓂᒃ. ᓲᖃᐃᒻᒪ, ᐃᓚᖏᑦ ᐅᒃᐱᕆᔭᖃᓗᐊᖏᑦᑐᑦ ᐱᓕᕆᔾᔪᓯᖏᓐᓂᒃ ᐊᒻᒪ ᓯᕗᓂᒃᓴᒧᑦ ᐅᐃᒻᒪᒃᑲᐅᓂᕋᕐᓱᒍ ᐊᒻᒪ ᐱᓕᒻᒪᒃᓴᕐᓯᒪᖏᓐᓂᕋᕐᓱᒍ ᖃᐅᔨᒪᔭᐅᔭᕇᕐᑐᓂᒃ. ᓱᓕ ᓂᓐᖓᐅᒪᔪᖅ ᓯᓚᑦᑐᕐᓴᕐᕕᒧᑦ ᐲᕐᑕᐅᓚᐅᕐᓯᒪᓂᕐᒥᓂᒃ ᑭᓯᐊᓂ ᑐᑭᓯᐊᓪᓗᓂᓗ ᓱᒧᑦ. ᐊᑭᒋᐊᒃᑲᐅᓚᐅᕐᒪᑦ ᐊᒻᒪ ᐃᓕᓐᓂᐊᕐᕕᑦ ᐊᑲᕐᓴᖏᒻᒪᕆᑦᑎᓪᓗᒋᑦ ᐊᑭᒋᐊᕐᑕᕐᓂᕐᒥᒃ.

“ᐄᖕ, ᓴᒧᕐ ᐅᖃᓚᐅᕐᑐᖅ ᐹᑎᒧᑦ. “ᐆᒪᔪᕐᓂᐊᕐᑎᒻᒪᕆᐅᕗᖓ. ᐆᒪᔪᓄᑦ ᐅᖃᕐᑎᐅᕗᖓ.” ᖃᓄᐃᑦᑑᓕᕐ,ᑦ, ᓘᕋᔅ, Lorax?

“ᐄᖕ, ᐄᖕ, ᐱᐅᔪᖅ, ᐊᑲᐅᔪᖅ.” ᐹᑎ ᐃᔨᒥᓂᒃ ᖄᖅᓯᕕᒋᕚ ᐊᒻᒪ ᐅᓗᐊᒃᑯᑦ ᓂᐱᖃᓱᓂ ᐅᖃᕐᓱᓂᓗ ᑭᒃᑯᓕᒫᓕ ᐊᑐᓲᒍᒻᒪᑕ ᑯᑭᑐᐊᓕᓐᓂᒃ, ᕿᒻᒥᕐᔪᐊᓂᒃ. “ᓈᓚᓚᐅᕆᑦ,” ᐃᓯᔾᔪᒃᓱᓂ. “ᑲᑎᓯᒪᓕᕐᐱᐅᒃ ᒥᓂᔅᑕ?”

“ᐋᒃᑲ.”

ᐹᑎ ᑕᑯᒋᐊᕐᑐᖅ ᑐᓄᐊᓂᑦ ᓴᒧᒥᒃ. “ᐃᒪᐃᕈᔪᑦᑐᖑᓇ…’ᐃᓕᖅᑯᓯᓕᕆᔨ’ ᐃᓄᒃ.” ᐅᖃᐅᓯᒃᓴᓕᐅᓚᐅᕐᑐᖅ ᖃᖓᑕᔫᒥ ᐊᒡᒐᒥᓄᑦ. “ᑲᒪᓗᐊᖏᒻᒪᖅ ᖃᐅᔨᓴᕐᑎᒻᒪᕆᐅᓂᕐᒥᒃ,’ ᖃᐅᔨᒪᒍᕕᑦ ᖃᓄᖅ ᐅᖃᕋᓱᐊᕐᓂᓐᓂᒃ. ᖃᐅᔨᒪᒋᑦᓯ ᐅᔾᔨᕐᑐᑦᓯᐊᕐᓗᓯ.”

“ᐅᖃᕐᐲᑦ ᖃᐅᔨᒪᓂᕋᕐᓱᑎᒃ ᐅᕝᕙᓘᓐᓃᑦ ᐃᒃᐱᒍᓱᑦᓯᐊᕐᑐᒃᓴᐅᒋᐊᖅ.”

“ᑕᒪᐃᓐᓂᒃ. ᐅᖃᐅᓯᕐᓂᒃ ᑲᑎᑎᕆᕙᒃᑲᒪ ᐃᓛᓐᓂᒃᑯᑦ ᓄᑖᓂᒃ ᐅᖃᐅᓯᓕᐅᕋᓱᐊᓕᑐᐊᕋᒪ.”  “Ahhhh.”

ᐹᑎ ᐊᒡᒐᒥᓂᒃ ᓂᐊᖁᒥᓄᐊᕐᓯᓪᓗᓂ ᐅᖃᕐᑐᖅ, “ᓯᕗᓪᓕᕐᐹᒥ…ᓇᔾᔪᐃᑦ!”

“ᐃᔪᕐᓇᖅ,” ᐅᖃᕐᑐᖅ. ᑐᕿᖃᑦᓯᐊᖏᑦᑐᒋᓪᓗᒍ, ᐃᓱᒪᓕᕐᑐᖅ.

ᐃᓱᒪᒋᓪᓗᒋᓪᓕ ᓇᔾᔪᖏᑦ ᑐᒃᑑᑉ, ᑐᑦᑐᐃᑦ ᓱᕐᕋᒃᓴᓖᑦ ᓇᔾᔪᖏᑦ ᐲᓲᒍᖏᒻᒪᑕ ᒥᖅᑯᐃᔭᕋᓗᐊᕐᓱᓂ, ᑕᐃᒪᐃᒻᒪᑦ ᐅᐸᓗᖓᐃᕐᓯᒪᒍᓐᓇᕐᑐᑦ ᓂᕿᓯᐅᕐᓂᕐᒧᑦ ᐊᒻᒪ ᓄᕐᕌᒃᓴᖏᑦ ᓂᕆᑦᓯᐊᖏᓐᓇᖃᑕᐅᓪᓗᑎᒃ. ᓴᒧᕐ ᐅᖃᓕᒫᖏᓐᓇᖃᑦᑕᕐᓯᒪᔪᖅ ᓄᓇᕗᒻᒥ ᑐᑦᑐᐃᑦ ᒥᒃᓵᓄᑦ ᑕᐃᒪᖓᓂᑦ ᐃᖅᑲᓇᐃᔮᕐᑕᕋᑕᓱᓂ. ᐊᒃᓱᐊᓗᒃ ᐱᐅᒃᓴᕐᑐᖅ ᑐᑦᑐᓂᒃ ᓄᕐᕋᓕᐅᕐᐸᑦᑐᓂᒃ. ᐊᒃᓱᐊᓗᒃ ᑲᒪᑦᓯᐊᒃᑲᐅᒻᒪᑕ ᐊᒻᒪ ᐊᕐᓱᕈᕈᑎᖃᐃᓐᓇᕐᓱᑎᒃ ᐱᐊᕋᕐᒥᓄᑦ, ᐊᔾᔨᒋᖏᑕᖓᓕ ᐊᓈᓇᒃᑯᖏᑕ.

ᐊᕐᕌᒍᑖᕐᑎᓪᓗᒍ ᓴᒧᕐ 15,ᓂᒃ ᐊᑖᑕᖓ ᕿᒪᐃᓚᐅᕐᓯᒪᒻᒪᑦ ᐃᓚᒥᓂᒃ ᐱᖃᑎᖃᓕᕋᒥ ᑲᑎᑦᑕᕕᓂᕐᒥᓂᒃ ᒪᒥᓴᕆᐊᕐᑐᕐᓯᒪᓪᓗᑎᒃ, ᐊᒻᒪ ᐊᓈᓇᖓᑕ ᓄᔭᖏᑦ ᐊᒥᐊᕐᓯᒪᒻᒪᑕ ᖁᕐᓱᕐᑕᒻᒪᕆᒻᒥᒃ ᓇᐃᑦᑑᓪᓗᑎᓪᓗ, ᐊᒻᒪ ᑭᒃᑯᕈᓘᔭᐃᑦ ᐃᓱᒪᔪᑦ ᑐᐃᓐᓄᑦ ᐊᖏᓪᓕᒋᐊᕈᑎᓂᒃ ᑕᑯᒥᓇᕋᓱᒋᓪᓗᒋᑦ ᐊᑐᕐᑐᑦ ᐊᓈᓇᖓᑕ ᐃᓪᓗᐊᑕ ᑲᑕᖓᓃᑦᑐᑦ ᐃᒥᐊᓗᑦᑐᑦ ᐊᒻᒪ ᓯᒡᒐᓕᐊᕐᑐᕐᓱᑎᒃ ᐊᒻᒪ ᐃᖏᕐᓱᑎᒃ ᐆᒥᖓ “ᐊᑲᐅᓈᖏᑦᑐᐊᓗᒃ ᐊᐅᔭᖅ” ᐃᓐᖏᐅᓯᓕᐊᕕᓂᖓ ᐸᓈᓇᕌᒪᐅᑉ, Bananarama ᖁᖓᑦᑎᑦᓯᓇᓱᐊᕈᑎᒋᓪᓗᒍ ᓴᒧᒥᒃ, ᑕᒪᓐᓇ ᐊᑑᑎᖃᕐᑎᓐᓇᒍ. ᐊᓈᓇᒃᑯᖏᑦ ᐊᕕᓐᓂᑰᒃ, ᐊᑐᓂᓪᓗ ᓇᖏᕐᐸᑦᑐᑦ ᐱᓐᖑᐊᑦ ᓴᓂᐊᓂ ᐅᕝᕙᓘᓐᓃᑦ ᐹᓪᓚᐅᑎᒋᔭᑦᓱᒋᑦ ᐃᑎᕐᓴᓕᐊᕕᓂᕐᓂ. ᑕᐃᒪᖓᓕᒫᖅ ᓱᕋᑦᑐᖃᐃᓐᓇᓲᖅ ᐊᒻᒪ ᕿᐊᔪᖃᓕᕐᓱᓂ.

ᓴᒧᕐ ᐃᓱᒪᓕᓚᐅᕐᑐᖅ ᓄᑖᒥᒃ ᐃᓅᓯᖃᕈᒪᓕᕐᓱᓂ ᐅᑭᐅᕐᑕᕐᑐᒥ ᑕᐃᒪᖓᓪᓗ ᑕᐃᒪᐃᒍᒪᓯᒪᓪᓗᓂ, ᑭᓯᐊᓂ ᑕᒪᓐᓇ ᐊᔪᕐᓇᒻᒪᕆᓚᐅᕐᑐᖅ.

“ᓴᒧᕐ? ᐃᔩᒃᑭᑦ ᖄᖅᓯᖏᓪᓗᒋᒃ ᐊᓯᐅᑐᐃᓐᓇᕐᓂᐊᕋᕕᑦ,” ᐅᖃᕐᓱᑎᒃ ᐸᓖᓯᒃᑯᑦ, ᓴᓐᖏᓵᕐᑐᐊᓘᓪᓗᓂ, ᑐᓂᓪᓗᓂᐅᓪᓗ ᑮᓂᒃ.

“ᓴᒧᕐ? ᑕᒻᒪᕐᓯᒪᓪᓗᑎᒃ ᖃᖓᑕᔫᒦᖏᒃᑲᓗᐊᕋᕕᑦ?” ᓂᓪᓕᕐᒥᔪᖅ ᑳᐱᑐᒃᑲᐃᔨ ᖃᓪᓗᑎᒥᓪᓗ ᑐᓂᓯᓪᓗ ᖃᐅᒻᒪᒃᑕᐅᓯᒪᓪᓗᐊᕐᑐᒥᒃ ᓯᕿᓂᕐᒧᑦ ᐊᑎᖓᓂᒃ ᒪᓕᓐᖏᖔᕐᓱᓂ.

“ᓴᒪ? ᑕᐃᒪᓐᓇᖓᐃ ᓇᐃᓗᐊᕐᓚᕐᐳᑎᑦ!” ᐅᖃᕆᕗᖅ ᐃᖅᑲᓇᐃᔭᖃᑎᖓ ᖁᑦᓯᖏᓐᓂᕐᓴᒥᒃ, ᐃᔪᓗᐊᕐᓂᑯᒧᑦ ᐃᔨᖏᒃ ᐊᒻᒪᓗᕈᓐᓇᐃᒻᒪᕆᑦᓱᑎᒃ, ᐅᓗᐊᖏᓪᓗ ᑲᔪᖑᓪᓗᑎᒃ.

“ᖃᓄᖅ ᑐᑭᖃᖅᑎᒃᑲᕕᐅᒃ ᑕᒪᓐᓇ?”

“ᓴᒧᕐ? ᑕᐃᒪᐃᒻᒪᑦ ᓇᐃᑦᑐᑲᓪᓚᐅᕗᑎᑦ!” ᐅᖃᖅᑐᖅ, ᓂᐊᖁᒻᒥᓂᓪᓗ ᐊᑦᑐᐃᑲᑕᑦᓱᓂ.

“ᐊᑲᐅᓈᑦᓯᐊᕐᑐᖅ.” ᑐᓴᕐᓯᒪᔭᖏᑦ ᑕᒪᒃᑯᐊ ᐊᒥᓱᐊᕐᑎᐊᓗᑦᓱᒋᑦ ᑭᓯᐊᓂ ᐃᓄᑦᑎᑐᑦ ᑐᓴᓚᐅᕐᓯᒪᖏᑦᑐᖅ ᑕᐃᒫᒃ, ᑕᐃᒪᐃᒻᒪᑦ ᑕᒪᓐᓇ ᑲᒪᓇᓚᐅᕐᑐᖅ.

ᒐᕙᒪᒃᑯᓐᓄᑦ ᐃᖅᑲᓇᐃᔭᕐᓂᕐᒥᓄᑦ ᐃᓪᓗᖃᕐᑎᑕᐅᓚᐅᕐᑐᖅ ᐊᑭᖃᖏᑦᑐᒥᒃ, ᒪᕐᕉᓐᓂᓪᓗ ᐃᓪᓗᐊᕈᓯᖃᕐᓱᓂ ᐃᓄᑑᑦᓯᐊᕐᓱᓂ, ᐊᖏᔪᐊᓗᒻᒥᒃ ᐃᒐᓕᒻᒥᒃ ᓵᖓᓪᓗᓂ ᐃᓗᕕᕐᓄᑦ ᐊᒻᒪ ᐃᒪᕐᖓᓄᑦ ᐃᖃᓗᐃᑦ. ᐱᐅᔪᐊᓘᓚᐅᕐᑐᖅ, ᖃᓂᑦᑐᑯᓘᓪᓗᓂᓗ ᑕᕆᐅᕐᒧᑦ ᐊᒻᒪ ᐊᑯᓂᐅᖏᑦᑐᖅ ᐱᓱᓪᓗᒍ ᐃᓄᒋᐊᓐᓂᖏᓐᓄᑦ. ᐊᒻᒪ ᐱᐅᒋᕐᔪᐊᕐᓱᒋᑦ ᐃᓗᕕᑦ. ᐃᓗᕕᖃᕐᕕᒻᒥ ᑐᖁᖓᒻᒪᑕ ᓲᖃᐃᒻᒪ ᓂᐱᖃᖏᑦᓯᐊᕐᑐᖅ ᐊᒻᒪ ᓴᐃᓪᓕᖓᔪᑦ. ᐃᓄᖏᓪᓕ ᑲᒫᓗᖏᑦᑐᑦ ᐃᓕᓐᓂᒃ.

“ᓇᒧᓐᖓᐃᕙᒻᒪᑕ?” ᐊᐱᕆᔪᖅ ᐊᕐᓇᖅ ᑮᓇᐅᔭᓕᕆᔨ. ᕝ

“ᓴᓂᐊᓄᑦ ᐃᓗᕕᑦ.”

“ᐋ.”

“ᓱᒻᒪᑦ?”

“ᐊᖑᑎᐅᑉ ᐃᓂᑐᖄᓗᐊ.”

“ᑭᓇᐅᑉ?”

“ᑭᖑᓪᓕᕐᐹᒥ ᑐᑦᑐᓂᐊᕐᑏᑦ.” ᐊᕐᓇᖅ ᑯᓪᓗᒥᓂᒃ ᖃᓂᕐᒥᓄᐊᕐᓯᓯᒪᓪᓗᓂ ᐊᕐᓗᒃᐸᖅ ᑐᓄᒧᑦ.

“ᐱᓐᖑᐊᕐᑎᐅᓯᒪᒻᒪᑦ ᖁᖁᐊᕈᑎᓅᑦ?” ᓴᒧᕐ ᐅᖃᕐᑐᖅ, ᓱᖁᑎᒃᓴᕐᑕᐃᓕᒪᓪᓗᓂ ᐅᖃᕋᓴᒃᑕᖓᓂᒃ. ᐊᑲᕐᓴᖏᑦᓯᐊᕋᒥ ᐅᖃᓕᒪᐅᑎᕐᓗᒃᑐᓂᒃ ᒪᖓᑦᓯᔪᓂᒃ.

“ᐋᒃᑲ,” ᐊᕐᓇᖅ ᓂᓪᓕᕐᑐᖅ. “ᐃᒥᖅ-ᐃᒥᖅ?”

“ᐆ.”

*****

“ᐃᓄᑐᖃᕐᓄᑦ ᐊᖃᕆᔭᐅᖏᑦᑐᖅ,” ᕆᔨᓄᓪ ᐅᖃᕐᐳᖅ, ᑯᓪᓗᒥᓂᓪᓗ ᑮᓯᓪᓗᓂ ᐊᒻᒪ ᑯᓪᓗᓂ ᖃᐅᔨᓯᕐᒪᑦ ᐊᓪᓚᕐᑎᓕᕆᓪᓗᓂᐅᒃ ᖃᕐᓕᒥᓄᑦ. ᐱᖓᓱᓂ ᐅᓪᓗᓂ ᓴᒧᑦ ᑎᑭᓚᐅᕐᑎᓪᓗᒍ ᐊᒻᒪ ᕆᔨᓄᓪ ᑐᑭᓯᑎᑦᓯᒋᐊᓕᓚᐅᕐᑐᖅ ᐆᒪᔪᓄᑦ ᐱᓕᔾᔪᑕᐅᔪᒥᒃ, ᐱᒋᐊᕈᑎᖃᕐᓱᓂ ᑐᑦᑐᕕᓂᕐᒥᒃ ᓂᐅᕕᐊᒃᓴᖃᖃᑦᑕᕐᓂᐅᑉ ᒥᒃᓴᓄᑦ ᖃᕆᑕᐅᔭᒃᑯᑦ. “ᐃᓱᒫᓗᒍᑎᖃᖅᑐᑦ ᐅᓄᕈᓐᓇᐃᓕᕐᓂᖏᓐᓂᒃ ᓂᕿᒃᓴᕆᓪᓗᒍ ᐊᒻᒪ ᐊᑲᐅᒍᓐᓇᐃᓕᕐᒪᑦ ᐃᓕᖅᑯᓯᖓᓄᑦ,” ᐅᖃᕐᑐᖅ, ᐅᖃᐅᓯᖃᕐᓱᓂᓗ ᐅᖃᐅᓯᕕᓂᕐᓂᒃ, ᓲᕐᓗ ᐃᓕᖅᑯᓯᕆᔭᐅᔪᑦ ᐊᑐᕐᑕᐅᓪᓚᕆᑦᑎᓐᓇᒋᑦ ᐅᖃᐅᓯᕆᓪᓗᓂᒋᑦ.

“ᑐᑭᓯᕗᖓ,” ᐅᖃᖅᑐᖅ.

“ᑭᓯᐊᓂ ᐊᖑᓇᓱᑦᑏᑦ, ᐃᓚᖏᑦ ᐊᓪᓛᑦ ᐃᓕᓐᓂᐊᕇᕐᓯᒪᖏᑦᑐᑦ ᐃᓕᓐᓂᐊᕐᕕᐊᓗᒻᒥ ᐊᒻᒪ ᑮᓇᐅᔭᓕᐅᕈᑎᑦᓯᐊᕙᐅᒻᒪᑦ…”

“ᖃᓄᑎᒋᖅ ᐊᑭᖃᕐᒪᑦ ᑐᑦᑐᕕᓂᖅ?”

“ᖃᐅᔨᒪᖏᑦᓯᐊᕐᑐᖓ.”

“ᑭᒃᑯᑦ ᓂᐅᕐᕈᑎᖃᕐᐸᒻᒪᑕ?”

“ᐊᒥᓱᐊᓗᐃᑦ.”

“ᑭᒃᑯᑦ ᓂᐅᕕᕐᐸᒻᒪᑕ?”

“ᐊᒥᓱᐊᓗᐃᑦ.”

“ᓇᑭᑦ?”

“ᓇᑭᓕᒫᖅ.”

“ᐆ…ᑭ, ᖃᐅᔨᒋᐊᕈᑦᑎᒍᖃᐃ ᖃᓄᐃᓘᓕᕐᒪᖔᑕ ᑭᐅᔪᓐᓇᕐᓂᐊᕐᒪᑕ ᐊᐱᒻᑯᑏᑦ.”

“ᑕᐃᒪᐃᓚᐅᕋᒪ.” ᐅᖃᐅᓯᖃᒃᑲᓐᓂᓕᕆᓪᓗᓂ ᐅᖃᐅᓯᕕᓂᕐᓂᒃ. ᓱᒧᑦ ᐅᖃᐅᓯᖃᐃᓐᓇᐅᔭᕐᐱᑦ ᐅᖃᐅᓯᕈᔭᐅᓯᒪᔪᓂᒃ? ᐃᔪᕐᓇᕐᑐᖃᒪᑕ ᖃᐅᔨᒪᖏᑕᓐᓃᒃ?

ᑕᐃᒪᑦᑕᐅᖅ ᑲᒪᓇᓗᐊᕐᒥᔪᖅ ᕿᑭᖅᑕᖅ ᐅᓇ Westminister Island. ᐃᓄᐃᑦ ᑕᐃᔭᖓ ᑖᓐᓇ ᕿᑭᖅᑕᖅ ᑐᒃᑐᓕᒃ – ᑐᑦᑐᖃᒪᑦ – ᑭᓯᐊᓂ ᑕᑯᓗᒋᑦ ᐅᓄᕐᓂᖏᑦ ᓇᓗᓇᖏᑦᑐᖅ ᑐᖁᕋᕐᐸᓪᓕᐊᔪᑦ ᐃᒻᒥᓂᒃ.

“ᐊᖑᑦ ᐅᖃᕋᓱᐊᕐᑐᖅ ᑐᑦᑐᓂᐊᕆᐊᖃᕈᓐᓇᐃᕐᓂᕐᒥᒃ ᑐᑦᑐᐃᑦ ᐅᓄᕐᓯᒋᐊᓪᓚᖁᓪᓗᒋᑦ ᐊᒻᒪ ᑕᒪᓐᓇ ᑐᑮᒍᕈᑕᐅᓚᐅᕐᑐᖅ ᑐᓴᒐᒃᓴᓂᐊᕐᑎᓄᑦ.” ᕆᔨᓄᓪ ᐊᐅᓚᑎᑦᓯᓪᓗᓂ ᐊᒡᒐᒥᓂᒃ ᑐᑭᓯᑎᑦᓯᒐᓱᐊᓕᕐᒥᔪᖅ. ᐊᑲᐅᖏᑦᑐᖃᐃ. “ᐊᑦᓚ ᐅᖓᓛ, ᒥᓂᔅᑕᕗᑦ ᐊᖑᓇᓱᒃᑎᐅᒻᒪᑦ ᐊᒻᒪ ᑐᒃᑐᓕᒻᒥᐅᓄᑦ ᑭᒡᒐᕐᑐᕐᑎᐅᓪᓗᓂ.”

“ᑎᒻᒥᔫᒃᑯᑦ ᓇᐃᓴᕈᓐᓇᕐᐱᑕ ᑐᑦᑐᓂᒃ.”

“ᐆᔅ. ᐊᑭᑐᔪᐊᓗᒃ.”

“ᖃᓄᑎᒋᖅ?”

“ᖁᓕᒥᒎᓕᒃᑯᑦ? 50 ᑕᐅᓴᒧᖃᐃ. ᐊᒻᒪ ᑎᑎᕋᖅᑕᐅᓯᒪᖏᑦᑐᑦ.”

“ᖃᓄᕐᓕ ᑎᑎᕋᕐᑕᐅᕙᒻᒪᑕ?”

“ᑎᑎᕋᕐᑕᐅᓯᒪᔪᓃᑦᑐᓂ ᐲᕐᕆᐊᓕᒃ ᖃᓄᑭᐊᖅ.”

“ᐊᔪᕐᓇᖏᒻᒫᑦ?”

“ᐊᓕᐊᓇᐃ, ᐄ. ᑕᐃᒪᖓᑦ ᑕᐃᒪᐃᓘᕐᐸᑦᑐᒍᑦ. ᐊᔾᔨᒌᖏᑦᑐᓄᑦ, ᐊᑭᓕᕆᐊᓕᓐᓄᑦ. ᐃᒃᐱᒋᔭᐅᕙᖏᒻᒪᑕ ᑮᓇᐅᔭᐃᑦ ᐸᕐᓇᒃᑕᐅᓯᒪᓂᖏᑦ.”

ᕆᔨᓄᓪ ᐃᖅᑲᓇᐃᔭᖃᑎᖁᓚᐅᕐᑕᖓ ᑕᓐᑲᓐᒥᒃ, Duncan, ᐅᒥᒻᒪᓂᐊᕐᑎᒥᒃ, ᖃᐅᔨᓴᖃᑦᑕᕐᓯᒪᓂᑰᒪᒻᒪᑦ ᖃᖓᑕᓲᒃᑯᑦ. ᑲᑎᓯᓚᐅᕐᑐᖅ ᑕᓐᑲᓐᒥᒃ ᐹᑎᕐᑎᓪᓗᒋᑦ ᐱᖃᑎᐊᓗᒌᓐᓂᕋᓗᐊᕋᒥᒃ ᓯᕗᓂᐊᓂ. ᑕᓐᑲᓐ ᖃᑖᑦᑐᖅ ᑮᓇᖓ, ᐊᒥᑦᑐᒍᓘᓪᓗᓂ ᐳᕆᓐᔅ ᐃᑦᓄᑦ ᐊᐃᓚᓐᒥᐅᖅ ᐃᒡᒐᖃᕐᓱᓂᓗ ᐃᔾᔪᔪᐊᓘᓐᓃᒃ ᐊᒻᒪ ᐊᒡᒐᑯᑖᖃᕐᓱᓂ ᐊᒥᑦᑐᒍᓗᓐᓂᒃ. ᐊᔾᔨᒋᖏᑦᓯᐊᕐᑕᖓ ᑕᐅᑦᑐᐊᑕ ᐅᒥᒻᒪᐅᑉ. ᖁᐱᕐᕈᒐᓛᖑᖅᑰᔨᓂᕐᓴᐅᒻᒪᑦ. ᐱᕈᕐᓂᑰᒐᒥ ᐃᖃᓪᓕᐊᕐᑎᓂᒃ ᐃᓚᖃᓱᓂ ᐃᓚᒌᑦ ᑭᓯᐊᓂ ᒥᕆᐊᖑᒃᓴᕋᐃᑦᑐᖅ ᒪᓪᓕᕐᑐᒥ ᑕᐃᒪᐃᒻᒪᑦ ᐃᓕᓐᓂᐊᕐᓯᒪᔪᖅ ᐃᓅᓯᓕᕆᓂᕐᒥᒃ.

“ᐅᖃᐅᑎᔭᐅᓚᐅᖏᓐᓇᒪ ᐱᕕᒃᓴᒥᒃ ᐊᓯᐅᔨᑐᐃᓐᓇᕐᓂᐊᕐᑐᒍᑦ, ᐃᖓᐃ?” ᐅᖃᕐᐳᖅ ᖁᕕᐊᓱᖃᑎᒌᑦᑐᓂ, ᓂᐱᖃᓗᐊᑲᓵᑦᓱᓂ, ᓴᒧᕐ ᑲᐃᒃᑐᕋᓱᐊᓕᕐᑎᓪᓗᒍ.

“ᐅᕕᓗᐃᑦ ᐊᑲᐅᓈᕐᓂᕐᓴᐅᒐᔭᕐᑐᕕᓃᑦ,” ᐅᖃᕐᑐᖅ, ᐃᔪᕈᑎᕆᓕᕐᓱᓂᐅᒃ ᓴᒧᑦ ᓂᐱᖅᑯᕐᑐᓪᓗᓂ ᐊᒻᒪ ᑐᐱᒻᒪᕆᑦᑐᖅ ᐊᒻᒪ ᖁᐃᕐᑐᓕᕐᓱᓂ ᑲᒃᑭᐅᑎᒧᑦ.

“ᐅᕕᓗᖅ!” ᐃᓯᔾᔪᑦᑐᖅ, ᐃᔨᓂᓗ ᐅᐃᔾᔮᕐᑎᓱᒋᒃ ᖄᕐᓯᓪᓗᓂᓗ.

ᑕᓐᑲᓐ ᓄᖅᑲᐅᑎᓚᐅᕐᓯᒪᔪᖅ ᐃᓅᓯᓕᕆᓂᕐᒥᒃ ᐆᒪᔪᓕᕆᓂᕐᒧᑦ ᐊᒻᒪ ᐅᑭᐅᕐᑕᕐᑐᒧᐊᕈᑎᒋᓯᒪᔭᖓ ᖁᔭᓕᒋᐊᖃᕐᑐᖅ ᑎᑎᖅᑲᓂᒃ ᐅᓂᒃᑳᕐᓯᒪᔪᓂᒃ ᐅᒥᒻᒪᓂᒃ ᐃᓛᓐᓂᒃᑯᑦ ᑕᑯᕙᓐᓂᕐᒥᒃ ᓛᐸᑐᐊᕐᒥ. ᐱᓕᕆᐊᒃᓴᒥᓂᒃ ᑲᔪᓯᑎᑦᓯᓯᐊᕐᓯᒪᖏᑦᑐᑦ ᓲᕐᓗ ᑕᓐᑲᓐᑐᑦ ᓄᓇᕗᒻᒥᐊᖃᑦᑕᕐᓯᒪᕗᑦ ᐱᔾᔪᑎᒋᓪᓗᒍ ᐃᖅᑲᓇᐃᔭᑎᒃᓴᖏᓐᓂᖅ ᒐᕙᒪᒃᑯᓐᓄᑦ ᐃᖅᑲᓇᐃᔮᕐᑕᕈᑕᐅᓕᕐᐸᒻᒪᒃ ᕿᓂᕐᑐᓄᑦ, ᐊᒻᒪ ᐱᕋᔭᑦᑎᓄᑦ. ᑕᓐᑲᓐ ᖁᕕᐊᒋᔭᖃᓪᓚᕆᑦᑐᖅ ᓯᑯᑑᑲᑕᒋᐊᖅ ᐊᒻᒪ ᐱᐊᑐᕆᐊᖅ ᑕᐃᒪᐃᒻᒪᑦ ᓈᒻᒪᓈᕐᑐᖅ. ᓈᒻᒪᓈᓗᐊᕐᑐᖃᐃ ᐅᑭᐅᕐᑕᕐᑐᒥ ᐊᓪᓛᑦ. ᐊᖑᔭᐅᓂᑰᓪᓗᓂᓗ ᐸᓖᓯᓄᑦ ᐃᒥᕐᓯᒪᓪᓗᓂ ᐊᖁᓐᓂᕐᒧᑦ ᐊᑐᕐᓱᓂ ᒐᕙᒪᒃᑯᑦ ᓄᓇᒃᑰᕈᑎᐅᖓᓂᒃ ᓯᕗᓂᑦᓯᐊᖓᓂ ᓴᒧᕐ ᑎᑭᓚᐅᕐᑎᓐᓇᒍ. ᕆᔨᓄᓪ ᖃᐅᔨᒃᑲᕐᓯᒪᔭᖓ ᐅᖃᐅᑎᓪᓗᒍ ᐃᒥᕐᓂᐊᕈᓂ, ᐊᑐᖃᑦᑕᖁᓪᓗᒍ ᓇᒻᒥᓂᖅ ᓄᓇᒃᑰᕈᑎᒥᓂᒃ.

ᓴᒧᕐ ᐅᖃᓕᒫᓚᐅᕐᑕᖏᑦ ᑐᑦᑐᓕᐅᑉ ᒥᒃᓵᓄᑦ ᑎᑎᕋᕐᓯᒪᔪᑦ ᑲᑎᖃᑎᖃᓚᐅᕋᓂ ᓱᓕ ᑕᓐᑲᓐᒥᒃ. ᓱᓕᔪᖅ – ᖃᖓᑕᓲᒃᑯᑦ ᖃᐅᔨᓴᕐᓃᑦ ᐅᑭᐅᕐᑕᕐᑐᒥ ᐊᑭᔪᐊᓘᕗᑦ. ᐅᖄᓚᓕᓚᐅᕐᑐᖅ ᑲᑉᐸᓂᒃᑯᓐᓄᑦ ᖃᐅᔨᒪᔭᒥᓄᑦ ᕗᐃᓂᐸᐃᒃᒥ.

“ᓱᓕᔪᖅ, ᓱᓕᔪᖅ, ᐱᔭᕇᖅᐸᕗᑦ ᐱᓕᕇᖃᑦᑕᕐᓯᒪᔪᒍᑦ ᐅᑭᐅᕐᑕᕐᑐᒥ,” ᐅᖃᖅᐳᖅ ᔮᑯ, ᑎᒻᒥᔫᖃᕕᒻᒥ, Blue Sky Aviation. ᐱᓕᕆᐊᒃᓴᓂᒃ ᖃᐅᔨᑎᑦᓱᓂᐅᒃ ᐊᒻᒪ ᖃᐅᔨᓴᖁᓚᐅᕐᑕᖓ ᖃᑦᓯᕌᕋᔭᕐᓂᖓᓂᒃ ᐊᑲᐅᓈᕆᐊᕐᓗᒍ ᖃᐅᔨᓴᖁᓪᓗᒍ.

“ᕗᐊ!” ᐅᖃᖅᑐᖅ ᑕᓐᑲᓐ, ᐃᒡᒐᖏᒃ ᓂᕕᖓᓪᓗᑎᒃ ᕿᖓᕐᒥᓂ ᐃᒥᕐᕈᓪᓗᓂᐊᓯ ᐅᖃᐅᓯᐅᓯᒪᔪᓂᒃ.

“ᖃᐅᔨᒪᒐᓗᐊᕋᕕᑦ ᐱᓕᕆᐊᕆᔭᒥᓂᒃ ᖃᐅᔨᒪᒐᓗᐊᕐᒪᖔᑕ?”

“ᐊᑐᕐᓯᒪᔭᒃᑲ ᒪᕐᕈᐃᕐᑐᕐᓱᒋᑦ.”
“ᐅᑭᐅᕐᑕᕐᑐᒦ?”

“ᐅᖃᕐᓯᒪᔪᑦ ᐅᑭᐅᕐᑕᕐᑐᒥ ᐱᓕᕆᓚᐅᕐᓯᒪᖏᓐᓂᕋᕐᓱᑎᒃ,” ᐅᖃᕐᑐᖅ, ᖃᐅᔨᒪᑦᓯᐊᕋᒥ ᐅᖃᐅᓯᖃᖅᑐᒃᓴᐅᒻᒪᑕ ᑖᒻᓴᓐᒥᒃ, ᒫᓂᑑᐸᒥ.

“ᐅᐃᓪ, ᐃᑲᔪᕐᑎᒋᔪᓐᓇᕐᑕᕗᑦ ᐊᑕᐅᓯᐊᕐᓗᒍ, ᖃᐅᔨᖅᑳᕐᓗᒍ ᖃᓄᐃᓘᕐᓂᐊ. ᐊᓯᔾᔨᕐᑐᐃᕙᓪᓕᐊᓚᕆᒃᑲᕕᒃ ᒫᓂ, ᑐᑦᑐᓂᐊᕐᑏ ᐊᕐᓈᒃ!” ᐅᖃᐱᓗᓕᕐᑐᖅ ᓂᕆᓪᓗᓂᓗ ᐃᒐᓯᒪᔪᒥᒃ. ᑭᖑᓂᐊᒍᓪᓗ ᐃᓐᖕᓯᒋᓪᓗᓂ ᐃᓐᖏᐅᓯᐊᓂᒃ Fleetwood Mac ᐃᓐᖏᐅᑎᖃᕐᓱᓂ ᐃᒻᒥᓂᕐᓱᕈᓐᓇᕐᓂᕐᒥᒃ ᑐᓴᕐᓂᖏᑦᓯᐊᕐᓱᓂ ᑭᓯᐊᓂ ᖁᖓᓐᓇᓱᕈᓘᔭᕐᑐᖅ. ᖁᕕᐊᓇᕐᑐᖅ ᐃᒃᐱᒋᔭᐅᑦᓯᐊᕐᓱᓂ ᐊᒻᒪ ᐅᒃᐱᕆᔭᐅᑲᓐᓂᓕᕆᐊᖅ. ᑕᐃᒪᐃᓚᐅᕐᓯᒪᒍᓐᓇᐃᕐᒪᑦ ᑕᐃᒪᖓᓂᑦ ᐃᓕᓐᓂᐊᓚᐅᕐᓯᐊᕐᑎᓪᓗᒍ ᐃᓪᒃ ᒥᒃᓵᓄᑦ ᐅᐱᒋᔭᐅᓚᐅᕐᓯᒪᓪᓗᓂ ᒪᒪᓕᐊ! ᐅᖃᓕᒫᒐᕐᓂ. ᐅᖃᐅᔾᔪᕐᑕᐅᑲᓪᓚᓕᕐᒥᔪᖅ ᐊᒻᒪ ᑕᒪᕐᒥᒃ ᐱᓕᕆᖃᑎᒌᑦᓯᐊᕋᓱᐊᕐᓱᑎᒃ. ᑭᓯᐊᓂ ᑕᒪᓐᓇ ᕿᓚᒥᐊᐱᒃ ᐊᑐᓚᐅᕐᑐᖅ ᑎᒍᔭᐅᖔᕐᒪᑕ ᐱᓕᕆᐊᖏᑦ ᐱᓕᕆᖃᑎᐃᖏᓐᓄᑦ, ᓯᓐᓇᔪᓄᑦ ᑲᔪᓯᑦᓯᐊᕐᓯᒪᓂᐊᓂᒃ ᐃᖅᑲᓇᐃᔮᒥᓂᒃ. ᐃᓱᒪᓕᓚᐅᕐᑐᖅ ᐹᑎ ᑕᒪᐃᓐᓂᒃ ᐅᖃᐅᔾᔪᐃᓯᒪᒻᒪᖔᑦ ᐊᑲᐅᖏᓕᐅᕈᑕᐅᔪᑦ ᒥᒃᓵᓄᑦ. ᖃᐅᔨᒪᔪᒃᓴᐅᒐᓗᐊᕐᓂᕐᒪᑦ ᖃᐅᔨᔭᐅᑦᓴᐅᑎᒋᓂᐊᕆᐊᖅ ᑭᒃᑯᓕᒫᓄᑦ. ᑭᓱᒥᑭᐊᖅ ᐱᔾᔪᑎᖃᕐᓱᑎᒃ. ᓯᓚᑐᔪᐊᓗᐃᑦ ᑐᒃᓯᐊᔭᐅᓂᕐᓗᒃᑕᐅᓲᒍᒻᒪᑕ. ᑕᒪᓐᓇ ᑐᓴᕆᐊᖅ ᑲᑕᓐᓇᓚᐅᕐᑐᖅ.

*****

“ᐅᓪᓛᒃᑯᑦ, ᓘᑦᑖᖅ ᒧᐊᕐᓴᓐ.”

ᓴᒧᕐ ᓇᖏᕐᓯᑦᓴᐅᑎᒋᓪᓗᓂ ᐅᓇᑕᕐᑐᒃᓴᑎᑐᑦ. ᐅᓪᓗᑦ ᐊᒥᓲᖏᑦᑐᑦ ᐊᓂᒍᕐᓯᒪᓕᕐᑎᓪᓗᒋᑦ ᑐᒃᑐᓕᒃ ᖃᐅᔨᓴᕋᔭᕐᓂᐊ ᐊᖏᕐᑕᐅᓚᐅᕐᑐᖅ ᐊᒻᒪ ᒥᓂᔅᑕ ᓇᖏᓚᐅᕐᑐᖅ ᐊᓪᓚᕕᖓᑕ ᐃᑎᕆᐊᕐᕕᐊᓂ.

“ᐅᓪᓛᒃᑯᑦ, ᒥᔅᑐᕐ ᒥᓂᔅᑐᕐ.”

“ᐱᔭᒃᓴᓕᐊᓘᕕᑦ?”

“ᐋᒃᑲ, ᐋᒃᑲ. ᐃᖏᑦᓯᐊᕆᑦ,” ᐅᖃᕐᑐᖅ, ᑎᒃᑯᐊᕐᓱᓂᓗ ᐃᒃᓯᕙᐅᑕᒧᑦ. ᒥᓂᔅᑕ ᓇᐃᑦᑑᓪᓗᓂ ᐊᒻᒪ ᓴᕝᕕᖅᑯᕐᑐᓪᓗᓂ ᐊᒻᒪ ᓱᕐᓗ ᑕᐅᑦᑐᖃᒐᓚᑦᓱᓂ ᑕᐃᕕᑦ ᓱᓱᑭᑎᑐᑦ ᐃᒡᒐᖏᓪᓗ ᓴᕕᕋᔭᖃᕋᑎᒃ ᐊᒻᒪ ᑲᒪᓇᕐᓱᓂ. ᑮᓇᖓᓗ ᑲᔪᕈᔪᒃ ᐊᒻᒪ ᓄᓇᖏᑦ ᐃᕿᓱᓕᕈᔫᓗᑎᒃ ᕿᕐᓂᕐᓱᑎᒃ ᕿᕐᓚᐅᓪᓗᓂ.

“ᐊᑯᓂ ᑕᕝᕙᓃᒍᓐᓇᖏᑦᑐᖓ,” ᐅᖃᕐᑐᖅ, ᕿᒥᕐᕈᓪᓗᓂᓗ ᓄᓇᖑᐊᖓᓂᒃ ᑐᑦᑐᓕᒻᒥ ᐊᑭᓐᓇᒥᑦᑐᒥᒃ ᐊᒻᒪ ᑕᓕᓂ ᐊᐅᓚᑎᑲᑕᑦᓱᒋᒃ ᑐᓄᒥᓄᑦ. ᐃᓚᒋᓕᐅᑎᓪᓗᓂᐅᒃ ᓴᒧᕐ. “ᓅᑦ ᕌᓴᒪᓯᓐ ᐊᐱᕆᓚᐅᕐᓯᒪᔪᖅ ᐊᑖᑕᑦᓯᐊᕐᓂᒃ ᓇᑭᑦ ᑐᑦᑐᒍᓐᓇᕐᒪᖔᕐᒥ ᐊᑖᑕᑦᓯᐊᒪ ᑭᐅᓚᐅᕐᓯᒪᔭᖓ ᑐᒃᑐᓕᒃ,” ᐅᖃᕐᓱᓂ, ᓄᓇᓐᖑᐊᒥᒃ ᑎᒃᑯᐊᕐᑐᖅ.
ᕋᓴᒥᓯᓐ ᐊᐱᕆᓚᐅᕐᓯᒪᔭᖓ ᑎᑎᕋᖁᓪᓗᒍ ᕿᑭᕐᑕᒥ ᐊᒻᒪ ᓇᓃᓐᓂᖏᓐᓂᒃ ᐊᒻᒪ ᐊᑖᑕᑦᓯᐊᕋ ᑕᐃᒪᐃᓚᐅᕐᑐᖅ. ᑕᐃᓂᔅ ᑕᑯᔭᒐᖃᕕᖏᓐᓂ ᓇᓂᓯᓚᐅᕐᑐᑦ ᐃᓚᖏᓐᓂᒃ ᐊᒻᒪ ᐅᑎᕐᑎᑕᐅᓪᓗᓂ 1980,ᓂ. ᓱᓕᐱᒋᔭᑲ.”

“ᕗᐊ,” ᐅᖃᕐᑐᖅ. ᐅᖃᓕᒫᕐᓯᒪᒐᒥ ᕋᓴᒪᓐ ᕿᒧᒃᓯᕐᓂᕕᓂᐊᓂᒃ ᐅᑭᐅᕐᑕᕐᑐᒥ. ᑐᑭᓯᒋᐊᕈᑎᓂᒃ. “ᑕᑯᒍᓐᓇᕐᐸᕋ ᓄᓇᖑᐊᖅ ᖃᖓᑐᐃᓐᓇᖅ?”

“ᐄᑦᑎᐊᖅ.”

“ᐅᒃᐱᕆᖏᑕᕋ ᐊᑖᑕᑦᓯᐊᑦ ᑲᑎᓯᓐᓂᕐᒪᑦ ᕌᓯᒪᓴᓐᒥᒃ. ᐅᐊᑲᓪᓚᖓᒃ ᑕᒪᓐᓇ, ᐅᐱᓐᓇᕐᑐᖅ.”

“ᕋᓴᒪᓐᓴᓐ, ᐄᖏ,” ᐅᖃᕐᑐᖅ, ᖁᖓᑦᓱᓂ.

“ᓲᖃᐃᒻᒪ,” ᓴᒧᕐ ᑕᑕᒥᑦᑐᖅ, ᑕᓗᕈᒃᑯᑎᓕᕐᓱᓂᓗ. ᐋᑦᓚ ᐅᐱᒋᔭᖃᒻᒪᕆᓚᐅᕐᒪᑦ ᒥᓂᔅᑕᐅᒋᐊᖅ ᑲᐱᓇᑦᒥ ᐊᒻᒪ ᐊᖏᕐᑕᐅᒋᐊᖅ ᐅᑕᖅᑭᒃᑲᐅᓪᓗᓂ. ᑭᓇᐅᓂᐊᑕ ᒥᒃᓵᓄᑦ ᑎᑎᕋᕐᓯᒪᔪᓂ ᑎᒍᒥᐊᕐᑐᖅ: ᐊᖓᔪᒃᓯᑦᐹᖅ 6,ᓂᑦ, ᐊᖑᓇᓱᑦᑎᓪᓚᕆᒃ, ᐃᓕᓐᓂᐊᕐᑕᒥᓂᒃ ᐱᐊᓂᒃᓯᒪᖏᑦᑐᖅ ᑭᓯᐊᓂ ᐅᑎᕐᓯᒪᓪᓗᓂ ᐸᐃᑉᐸᖁᑎᑖᕆᐊᕐᑐᕐᓱᓂ ᓇᓗᓇᐃᒃᑯᑕᒥᒃ, ᐃᔾᔪᐊᕋᒃᓴᑦᓯᐊᕙᒃ, ᑕᐅᑏᕐᑎ ᐊᒋᐊᒐᕐᑎ, ᐊᑖᑕᑦᓯᐊᕙᐅᓪᓗᓂ ᐊᒻᒪ ᐊᑖᑕᑦᓯᐊᖑᓪᓗᓂ. ᓱᓕ ᐊᒥᓱᑦ ᒥᒃᓵᓄᑦ ᐅᖃᐅᓯᒃᓴᑦ.

“ᑐᓴᐅᒪᔪᖓ ᑐᑦᑐᓂᒃ ᓇᐃᓴᐃᓂᐅᔭᕐᑐᑎᑦ.”

“ᐄ. ᐃᓱᒫᓗᒍᑎᖃᕐᐱᑦ ᑐᑦᑐᓂᒃ.”

ᐊᖏᕐᓱᓂ, ᑕᐅᑐᑦᓱᓂᓗ ᓄᓇᓐᖑᐊᒥᒃ. “ᒫᓂ ᑲᑎᑦᑕᒡᒍᔪᑦ ᐊᐅᔭᐅᑎᓪᓗᒍ, ᑕᑉᐹᓂ ᑭᖏᓐᓂᖓᓂ,” ᐅᖃᕐᑐᖅ, ᑎᒃᑯᐊᕐᑐᕐᓱᓂᓗ. “ᑕᑉᐹᓂ ᐊᓄᕆᔪᖅ, ᑭᑦᑐᕆᐊᖃᖏᓐᓂᕐᓴᐅᓪᓗᓂᓗ.”

ᓴᒧᕐ ᑎᑎᕋᐅᒻᒥᒃ ᑎᒍᓯᓪᓗᓂ ᐊᒻᒪ ᐊᒻᒪᓗᕐᑎᑎᑕᖏᑦ ᐃᓄᖏᑦ. “ᖁᔭᓐᓇᒦᒃ,” ᐅᖃᕐᓱᓂᓗ.

“ᐅᕝᕙᓗ. ᒪᓂᖅᑲᖅ ᒪᓴᐅᓪᓗᓂ. ᓂᕿᒃᓴᓕᒻᒪᕆᒃ ᑐᑦᑐᓄᑦ.”

“ᑕᒪᓐᓇ ᐃᑲᔪᕐᑐᒻᒪᕆᒃ,” ᐅᖃᕐᑐᖅ ᓴᒧᕐ, ᑎᑎᕐᓱᓂᐅᓪᓗ ᐊᒻᒪᓗᕐᑐᒥᒃ. ᒪᕐᕉᒃ ᓂᓪᓕᖏᓚᐅᑲᑦᓱᑎᒃ, ᑕᑯᓐᓇᓚᐅᕐᓱᒍ ᓄᓇᖑᐊᖅ ᐃᓯᕕᓯᒪᔪᑦ ᐃᒪᕐᔪᑦ ᑯᕝᕕᕆᓯᒪᕈᔪᑦᓱᓂ. “ᖃᐅᔨᒪᔪᒻᒪᕆᐊᓘᕗᑎᑦ ᓄᓇᐅᑉ

“ᖃᐅᔨᒪᔪᓯᒪᔪᖓ ᐃᓚᖏᓐᓂᒃ.”

ᐊᑕᐅᓯᐊᕐᓱᓂ ᐆᒪᔪᕐᓯᐅᕋᓱᐊᓚᐅᕐᓯᒪᔪᖅ ᖃᓂᒋᔭᖓᓂ ᓄᓇᓖᑦ, ᐅᖃᐅᑎᔭᐅᓚᐅᕐᓯᒪᔪᖅ, ᐱᕐᓯᓕᕐᑐᐊᓘᓂᖓᓂᒃ. ᐃᒡᓗᓕᐅᕐᑐᕕᓂᖅ ᐊᒻᒪ ᐃᑎᕐᓴᓕᐅᕐᓯᒪᓪᓗᓂ ᐅᓪᓗᓂ ᐱᖓᓱᓂ, ᐊᐳᑎ ᐊᐅᑉᐸᓪᓕᐊᑎᓪᓗᒍ ᓱᐴᔫᖓᓄᑦ ᐃᒪᓕᐅᕐᓱᓂ ᐊᒻᒪ ᓂᕿᑐᐊᖃᕐᓱᓂ ᓯᕙᓂᒃ ᐊᒻᒪ ᐃᖃᓗᒻᒥᒃ ᐱᑦᓯᒥᒃ. ᑎᓴᒪᖓᓂ ᐅᓪᓗᐊᓂ, ᐃᓚᖅᑭᐸᓪᓕᐊᓕᕐᑎᓪᓗᒍ ᐊᒻᒪ ᕿᓂᕐᑏᑦ ᑲᑎᑉᐸᓪᓕᐊᓕᕐᑐᕕᓃᑦ, ᐃᒻᒥᓂᒃ ᐅᑎᕐᑐᕕᓂᑦ ᓄᓇᓕᓐᓄᑦ.

“ᐃᖅᑲᐅᒪᔪᖓ ᐊᓄᕆᕙᓗᑦᑎᓪᓗᒍ ᑐᓴᕐᓴᐅᓪᓗᓂ ᐊᒻᒪ ᐃᓐᖏᐅᔭᕐᓱᖓ. ᐅᕐᓱᐊᓗᐃᕈᓕᓚᐅᕋᒪ ᐊᒻᒪ ᑲᑉᐱᐊᓱᓕᕐᓱᖓ. ᑭᓯᐊᓂ ᐊᑲᕆᖏᓐᓂᕐᐹᕆᓚᐅᕐᑕᕋ ᐃᓱᒫᓗᑦᑎᑦᓯᓂᐊᓗᒐ ᐃᓄᓐᓂᒃ. ᑭᒃᑯᓕᒫᑦ ᐃᓱᒫᓗᒍᑎᒃᓴᖃᕇᒪᑕ ᐃᓱᒫᓗᒍᑎᒃᓴᑲᓐᓂᕐᓂᒃ ᑐᓂᒋᐊᖃᖏᑦᑐᑦ.” ᑕᑯᓴᕐᓱᓂ ᓴᒧᕐᒧᑦ. ᓂᐱᖃᖏᑦᓯᐊᕐᑎᓪᓗᒍ ᑭᓯᐊᓂ ᑐᓴᕐᓴᐅᓪᓗᑎᒃ ᐅᐊᔭᒨᕐᑐᑦ ᐅᖅᑰᓴᐅᑏᑦ.

“ᐄᖕ, ᑕᐃᒪᐃᑦᑐᑦ,” ᐅᖃᕐᑐᖅ ᓴᒧᕐ, ᐊᐅᒃᑲᓂᖓᓪᓗᓂ ᐅᓂᕐᒥᒍᑦ ᑕᑯᒃᓴᐅᒧᓂᒃ.

ᖁᖓᑦᑐᖅ. “ᑲᔪᓯᑦᓯᐊᕐᓂᐊᕐᐳᑎᑦ ᖃᐅᔨᓴᓕᕈᕕᑦ. ᖁᕕᐊᓇᖅᑲᐅᕗᑦ ᐅᖃᓕᒪᖃᑎᖃᕆᐊᖅ ᐃᓕᓐᓂᒃ, ᓘᑦᑖᖅ ᒧᐊᕐᓴᓐ.”

“ᖁᔭᓐᓇᒦᒃ, ᐊᖑᑦ. ᑕᐃᒪᖓᓕᒫᖅ ᐊᓪᓚᕕᒐ ᒪᑐᐃᖓᓲᖑᓄᖅ.”

ᐊᓂᒐᓗᐊᕐᑎᓪᓗᒍ, ᓴᒧᕐ ᐃᖏᓕᓚᐅᕐᑐᖅ ᑕᖃᐃᕐᓯᓪᓗᓂ ᓵᒥᓄᑦ ᐹᒻᒪᑦᓱᓂ, ᓄᔭᖏᑦ ᓂᐱᓐᖓᓪᓗᑎᒃ ᖃᐅᖓᓄᑦ ᐊᐅᒃᑲᓂᖓᒧᑦ, ᑕᓕᖏᒃ ᐃᑯᓯᒥᓄᑦ ᐹᒻᒪᑦᓱᓂ ᑐᑭᓯᐊᓕᕐᑐᖅ. ᐱᖓᓱᓂ ᐅᓪᓗᓂ ᐃᓄᑐᐊᖅ ᐅᑭᐅᕐᑕᕐᑐᒥ ᐱᕐᓯᕐᑐᐊᓗᒻᒥ. ᐄᐃ!

ᑕᓐᑲᓐ ᓴᖅᑭᑳᓪᓚᒻᒥᔪᖅ ᒪᑐᒥ. “ᐱᖅᑲᐅᕕᒋᑦ ᑐᓴᕋᒃᓴᐃᑦ ᐊᐅᓪᓚᕐᑎᖅᑲᐅᔭᒃᑲ? ᐃᓚᖏᑦ ᐱᔾᔪᑎᖃᕐᑐᑦ ᐅᖃᐅᓯᐅᓯᒪᔪᓂᒃ ᑐᑦᑐᐃᑦ ᒥᒃᓵᓄᑦ ᐊᑲᐅᖏᓕᐅᕈᑕᐅᔪᑦ ᐊᓪᓚᓄᑦ ᒫᓂᑑᐸᒥ ᒥᒃᓵᓄᑦ. ᑕᑯᔪᒪᑐᐃᓐᓇᕆᐊᖃᕐᑕᑎᑦ.”

“ᐋᒃᑲ, ᒪᒥᐊᓇᖅ. ᑲᑎᒪᖃᑎᖃᓚᐅᕋᒪ ᒥᓂᔅᑕᒥᒃ.”

“ᓱᔪᖃᒪᑦ?”

ᓂᓪᓕᕋᓂ ᑐᐃᑦᑐᖅ. “ᖃᐅᔨᒐᓱᑐᐃᓐᓇᕐᐳᖓ, ᐄᖃᐃ.”.

“ᕼᐊᒻ.”

“ᓱᓇ?”

“ᐅᓂᒃᑳᕐᓂᕐᒫᑦ?”

“ᐄᖕ.”

“ᐅᓂᒃᑳᕈᒻᒪᐅᒻᒫᑦ, ᓱᓕᕚ? ᑕᐃᒪᓐᓇ ᑐᑭᓯᑎᑦᓯᒐᓱᐊᕈᓯᖃᕋᒥᖃᐃ.”

“ᓱᓇᒥᒃ ᐅᖃᐅᓯᖃᒪᑦ?”

“ᓱᓇᒥᒃ ᐅᓂᒃᑳᕐᓂᐊ ᒪᓕᓪᓗᒍ. ᐸᑎ ᑕᐃᒫᒃ ᐱᖅᑯᓯᖃᓂᕋᕐᓱᒍ ‘ᐊᖓᔪᖅᑲᐅᓯᕈᒪᓪᓗᓂ,” ᐃᔾᔪᐊᕐᓯᑲᐅᓪᓗᓂᓗ, “ᖃᐅᔨᒪᑎᑦᓯᓴᓱᐊᒧᑦ ᑭᓇ ᐊᖓᔪᖅᑳᖑᒻᒪᖔᑦ, ᓱᓕᕙ? ᓂᐲᑐᐃᓐᓇᕐᐸᑦᑐᖓ.” ᓴᒧᕐ ᐅᖃᐅᓯᕆᔭᖓᒍᑦ ᐹᑎᐅᖅᑰᔨᓂᕐᓴᖅ, ᓲᕐᓗ ᐅᖃᐅᓯᖃᓚᐅᕐᒪᑦ ᐃᓪᓂᒃ ᖃᐅᔨᓴᕐᓂᕐᒧᑦ ᓴᒧᒥᒃ ᑲᑕᑦᑎᑦᓯᓇᓱᐊᕐᓱᓂ.

“ᑐᓴᕐᐳᖓ ᐊᑎᕐᓃᒃ?”

“ᕼᐃᓗ, ᐊᖓᔪᖅᑳᑉ ᑐᓪᓕᐊ,” ᐅᖃᕐᑐᖅ ᓴᒧᕐ.

“ᐆ ᐊᑏ, ᐹᑎ. ᑐᑭᓯᓇᕐᐳᖔ?”

“ᐋᒃᑲ, ᐋᒃᑲ, ᐋᒃᑲ ᐊᓂᕙᓪᓕᐊᓯᕗᖓ,” ᑕᓐᑲᓐ ᐅᖃᕐᑐᖅ ᐊᓂᓪᓗᓂᓗ.

ᐹᑎ ᒪᑐᓯᓪᓗᓂ ᐅᒃᑯᐊᒥ ᐊᓂᓯᔪᖅ. ᓴᒧᕐ ᐃᒃᓯᕙᖁᔭᖓ ᐊᒻᒪ ᐃᖏᑦᓱᓂ.

“ᖃᓂᒋᓗᐊᖃᑦᑕᖏᓪᓗᒍ ᐊᖑᑦ,” ᐅᖃᖅᑐᖅ ᐹᑎ.

“ᑕᓐᑲᓐ?”

“ᓲᕐᓗ ᑐᖁᖓᓪᓗᓂ ᐱᓱᒻᒪᑦ.”

“ᖃᓄᖅ?”

ᐹᑎ ᐅᑯᖓᓪᓗᓂ ᓴᒧᕐ ᓵᖓᓄᑦ. “ᓈᒻᒪᖏᒻᒪᑦ ᐃᖅᑲᓇᐃᔮᒥᓄᑦ. ᖃᓄᑐᐃᓐ ᓇᖅ ᖃᐅᔨᒪᒍᕕᑦ ᐊᑐᕈᓐᓇᕐᑕᑦᑎᓐᓂᒃ, ᖃᐅᔨᒪᑎᓐᓂᐊᕐᐸᒻᒪ.” ᐹᑎᓗ ᐃᔨᒥᓂᒃ ᖄᕐᓯᕗᖅ ᐊᒻᒪ ᓂᓪᓕᐊᓕᕆᓪᓗᓂ ᑯᑭᑐᐊᓕᑦᑎᑐᑦ, ᓲᕐᓗ ᐱᖃᑎᐊᓗᒌᓐᓂᕐᐸᐅᓪᓗᑎᒃ.

“ᐅᕙᖓᓕ … ᐊᖏᖏᒃᑯᕕᑦ.”

“ᐊᓯᓕᒫᖏᑦ ᖃᓄᐃᖏᓚᑦ? ᐊᐅᔭᑦᑎᓐᓂ ᓇᐃᓴᐃᓂᐅᔭᖅᐱᑦ ᑐᑦᑐᓂᒃ? ᐊᑕᐅᓯᖅ, ᒪᕐᕉᒃ, ᑲᒦᒃᑭᒃ ᕿᓚᒃᑭᒃ?”

“ᐱᖓᓱᑦ, ᑎᓴᒪᑦ, ᒪᑐᐃᕈᒃ ᐅᒃᑯᐊᖅ,” ᐅᖃᑐᖅ ᓴᒧᕐ.

“ᓇᐃᓴᐃᑦᓯᐊᕐᓂᐊᖅᑯᑎᑦ ᑕᒻᒪᕐᑕᖏᓪᓗᑎᑦ, ᐊᐃ?” ᐸᑎ ᐃᔨᒥᓂᒃ ᖄᕐᓯᒋᕗᖅ.

“ᕼᐊ, ᐄ.” ᓴᒧᕐ ᖁᖓᓕᕐᑐᖅ ᑭᖑᑎᓂᒃ ᑭᒻᒥᑦᓱᒋᑦ.

ᓴᒧᕐ ᖁᕕᐊᒋᔭᖃᒪᑦ ᐃᒐᒋᐊᖅ, ᐅᖃᓕᒫᕆᐊᖅ, ᐱᓱᔪᒋᐊᖅ ᐊᒻᒪ ᑕᐅᑐᒋᐊᖅ ᐅᓂᒃᑳᕐᑐᓂᒃ ᐊᒻᒪ ᑕᒪᒃᑯᐊ ᑕᒪᕐᒥᒃ ᐱᒡᒐᓇᖏᑦᑐᖅ ᐃᖃᓗᓐᓂ. ᐃᖃᓗᓐᓂ ᑎᓂᒃᑳᓘᒻᒪᑦ ᓯᓕᑦᑐᐊᓗᒻᒥᒃ ᓯᒃᑯᓲᒍᓪᓗᓂ ᓯᒡᔭᖓ ᐊᕕᑦᑕᓛᕙᑦᑐᒥᒃ ᐅᑭᐅᒥ ᒪᓪᓕᐅᒍᑕᐅᔪᒥᒃ ᓯᑯᒧᑦ ᐊᐳᑎᖃᓱᓂᓗ ᑕᑯᒥᓇᕐᑐᐊᓗᒻᒥᒃ. ᓯᕿᓐᓂᑲᐃᓐᓈᕐᔪᓐᓂᐊᓂ ᐃᑲᕋᐃᓐᓇᑯᓗᓐᓂ ᐅᑭᐅᒃᑯᑦ, ᐊᓐᓄᕌᓯᒪᔪᒃᓴᐅᔪᖅ ᕿᓚᒻᒥ ᐃᖏᕐᕋᓲᑎᑐᑦ ᐊᒻᒪ ᐱᓱᓪᓗᓂ ᑐᖑᔪᒻᒪᕆᒃᑐᑯᑦ-ᖃᑯᕐᓗᓂ ᓯᓚᕐᔪᐊᒥ ᓯᑯᒃᑯᑦ, ᐱᓱᓪᓗᓂ ᓯᑯᒃᑯᑦ ᐊᒻᒪ ᐊᓂᕐᑎᕆᓂᕐᒥᓂᒃ ᐊᒻᒪ ᐱᓱᓐᓂᕐᒥᓂᒃ ᑐᓵᒍᓐᓇᒃᓗᓂ. ᑐᓄᓪᓗᒍ ᓄᓇᓖᑦ ᓲᕐᓗ ᓯᒪᕐᔪᖓᐊᒦᑦᑐᑎᑦ, ᐃᓄᑑᔮᕐᓱᑎᑦ, ᓴᒧᕐ ᐊᑲᐅᖏᓪᓗᓂᐅᒃ. ᑭᓯᐊᓂ ᑐᖁᒍᓐᓇᕐᒥᔪᒍᑦ ᑕᐅᕙᓂ ᐊᒻᒪ ᐱᓪᓗᐃᒍᓐᓇᕐᓱᑎᒃ ᓯᖏᕐᓂᒃᑯᑦ ᑐᖁᓗᑎᓪᓗ. ᓱᓕᔪᖅ ᑕᒪᓐᓇ.

ᑕᖅᑭᑦ ᑎᓴᒪᑦ ᐊᓂᒍᕐᓯᒪᓕᕐᑎᓪᓗᒋᑦ ᐅᑭᐅᕐᑕᕐᑐ ᒥᓕᕐᓂᐊ, ᓴᒧᕐ ᐃᓚᓐᓈᕐᑖᓚᐅᕐᑐᖅ ᐊᑎᒋᓕᐅᓲᒥᒃ. ᓄᐊᕋ, ᐃᖅᑲᓇᐃᔭᕐᑎᐅᔪᖅ ᓯᑎᒧᑦ, ᑕᐃᓪᓗᓂ ᐃᒻᒥᓂᒃ ᓲᕙᐃ ᐱᔾᔪᑎᒋᓪᓗᒍ ᓴᐃᓃᓯᒥᒃ ᐊᑖᑕᖃᕋᒥ ᐊᒻᒪ ᓂᐅᕙᐅᓐᓛᒥᐅᑕᐅᓪᓗᓂ ᐊᓈᓇᖓ. ᓄᔭᖏᑦ ᕿᕐᓂᕐᓱᑎᒃ ᓇᐃᑦᑑᓪᓗᑎᒃ ᐊᐃᓯᐊᓐᑯᖅᑰᔨᔪᖅ ᐊᒻᒪ ᑮᓇᖃᑦᓯᐊᕐᓱᓂ, ᑭᓯᐊᓂ ᐃᔨᖏᑦ ᐊᐃᕆᔅᑯᔮᕐᑑᒃ ᐊᒻᒪ ᐅᖃᓪᓚᓐᓂᖓ ᑕᒫᓂᕐᒥᐅᑕᐅᔮᕋᓂ.

“ᐊᑲᐅᓈᕐᑐᖅ ᓂᕈᐊᕐᑕᑦ. ᓂᕈᐊᕐᓂᐊᖅᑲᐅᒐᒪ ᐳᕐᐳᓪᒥ, ᑭᓯᐊᓂ ᓂᕈᐊᖔᖃᐅᔪᖓ ᑐᖑᔪᕐᑐᒥᒃ,” ᓄᐊᕋ ᐅᖃᕐᑐᖅ ᓴᕐᒧᕐᒧᑦ ᐅᓐᓄᐊᓂ ᑲᑎᒃᑲᒥᒃ.

“ᑐᖑᔪᕐᓱᓂ ᐃᓂᖃᓇᕐᑐᖅ,” ᑭᐅᕗᖅ ᓴᒧᕐ. ᐃᒃᓯᕙᓪᓗᑎᒃ ᓴᓂᓕᕇᑦᓱᑎᒃ ᐃᓕᓐᓂᐊᕐᕕᐊᓘᑉ ᓴᓇᕕᐊᓂ.

“ᓄᐊᕋ,” ᐅᖃᕐᑐᖅ ᓴᒧᕐ, ᓴᐃᒨᕆᐊᓕᕐᓱᒍᓗ.

“ᓴᒧᕐ.”

“ᓴᕐ? ᐊᑎᑦᓯᐊᕙᓗᖑᓇ !”

“ᑕᐃᒫᖑᖏᑦᑐᖅ ᖁᕕᐊᒋᖏᒻᒪᕆᓪᓗᒍ ᐊᐅᔭᖅ.”

“ᕼᐊᕼᐊ“! ᐃᒫᖑᖏᑦᑐᖅ! ᒥᕐᓱᒃᑲᐅᖏᓚᖓ? ᓱᒧᒃᑭᐊᖅ ᐊᑎᓕᐅᕐᓂᕋᒪ,” ᓄᐊᕋ ᐅᖃᕐᑐᖅ, ᐃᓚᓗᐃᓐᓇᓱᐊᕐᓱᓂ ᒥᖅᑯᑎᒥᒃ.

“ᐃᓕᓐᓂᐊᕐᑐᑎᑦ.”

“ᐱᕕᒃᓴᖃᕈᒪ.” ᓄᐊᕋ ᑕᑯᓴᕐᑐᑦ ᓄᕕᓯᓪᓗᓂᓗ ᒥᖅᑯᒧᑦ ᑭᓪᓚᑭᑦᑐᑯᓗᒻᒧᑦ ᐊᑯᓂᓗ ᐃᕙᓗᒐᓱᐊᕐᓱᒍ ᓄᕕᑕᐃᓐᓇᕐᑕᖓ. “ᕘ -ᕘ! ᓲᕐᓗ ᐃᓕᓐᓂᐊᕐᑐᑦ ᓇᑉᐸᖏᑦ, ᐃᖓᐃ?” ᐃᓕᓐᓂᐊᖃᑎᖏᑦ ᐃᓪᓚᕐᓯᓪᓗᑎᒃ ᐊᒻᒪ ᐅᑯᖅᑐᑕᖏᑦ. ᐃᓄᐃᑦ ᐊᒻᒪ ᓂᐅᕙᐅᓐᓛᒥᐅᑦ ᑐᓴᕐᓂᒍᓱᒻᒪᕆᒻᒪᑕ ᑕᐅᑏᕐᑐᓂᒃ, ᐃᔪᕆᓴᕆᐊᕐᓗ ᐊᒻᒪ ᓯᓚᒥᒃ, ᑕᐃᒪᐃᒻᒪᑦ ᐃᓅᖃᑎᒌᑦᑎᐊᕈᓐᓇᕐᑐᑦ.

“ᐃᒥᕆᐊᖃᒪᖓᓕᕐᑐᖓ ᑕᒪᓐᓇ ᑭᖑᔭᕐᐸᑦ. ᐃᕝᕕᑦ?” ᓄᐊᕋ ᐊᐱᕆᔪᖅ.

“ᐆ, ᐋ….ᐅᕙᖓᓕ…”

“ᐊᕐᓇᓂᐊᓲᒍᖏᑦᑐᖓ ᐅᕝᕙᓗᓐᓃᑦ ᖃᓄᕈᓘᔭᖅ’.”

“ᐋᒃᑲ, ᐋᒃᑲ, ᑕᐃᒫᖑᖏᑦᑐᖅ,” ᓴᓪᓗᓗᓂ ᐅᖃᕐᑐᖅ. ᓴᒧᕐ ᐅᓇᒻᒥᒋᔭᐅᓯᒪᒌᕐᒪᑦ ᐃᖃᓗᒻᒥᐅᓄᑦ ᐊᕐᓇᖃᑎᒌᑦᓱᑎᒃ ᐊᑉᐃᑉᐸᕇᓄᑦ. ᑕᒪᓐᓇ ᐅᖃᐅᓯᕆᒃᑲᓐᓂᕈᒪᐃᓪᓗᒍ. “ᐃᒥᐊᓗᒃᑯᒪ ᕗᐃᓐᒥᒃ ᖃᓄᐃᖅᑰᖏᒻᒪᑦ.”

ᐃᓚᖏᑦ ᐅᖃᓕᒫᕐᓗᒋᑦ ᒪᕐᕉᓐᓂ ᐅᓂᒃᑳᓂ ᐊᖃᒍᑦ ᓄᓇᑦᓯᐊᑉ ᑐᓴᒐᒃᓴᖓᑎᒍᑦ nunatsiaq.com

Share This Story

(0) Comments

Join the Conversation

Your email address will not be published. Required fields are marked *

*