ᑳᑦᑐᖅ (ᐊᕐᓇᖅ ᑳᑦᑐᖅᓱ) – ᓯᕗᓪᓕᖅ 3

ᖃᓄᖅ, ᐊᕐᓇᖅ ᓴᒧᕐᒥᒃ, Summer ᖃᐅᔨᓚᐅᕐᓂᐊ ᓱᓕᔪᒥᒃ ᐅᑭᐅᕐᑕᕐᑐᒦᓐᓂᕐᒥᒃ

ᐃᖃᓗᐃᑦ ᑕᐃᔭᖓ ᕿᑭᕐᑕᖅ ᑐᑦᑐᓕᒃ – ᑐᑦᑐᓄᑦ ᐃᓂᒋᔭᐅᒻᒪᑦ – ᑭᓯᐊᓂ ᓄᑖᑎᒍᑦ ᖃᐅᔨᓴᕐᑕᐅᓯᒪᓂᖏᑎᒍᑦ ᐃᓱᒪᒋᐅᓯᒪᔪᑦ ᑐᖁᕋᕐᐸᓪᓕᐊᓂᖏᓐᓂᒃ.. (ᑎᑎᕋᕐᔭᕐᓯᒪᔭᖏᑦ ᑯᕆᔅᑕ ᒃᓛᓯᓐ)

By ᓖᓴ ᒍᕆᒍᐊ

For an English version of this story, see Kaattuq (She is hungry) – part three

ᐋᑦᓚ ᐅᖓᓛᒃ, ᓄᓇᕗᒻᒥ ᐆᒪᔪᓕᕆᓂᕐᒧᑦ ᒥᓂᔅᑕᐅᔪᖅ, ᒪᒥᓚᐅᕐᓯᒪᔪᖅ ᒪᓕᒐᓕᐅᕐᕕᒻᒥ ᐅᑭᐅᖑᑎᓪᓗᒍ ᑲᑎᒪᑎᓪᓗᒋᑦ ᐊᒻᒪ ᑐᓴᕐᑎᑦᓯᓪᓗᓂ ᐊᕐᕌᒍᓕᒫᒥ ᐊᑲᕆᔭᐅᖏᑦᑐᒥᒃ ᓄᖅᑲᕐᑎᑦᓯᓯᒪᓂᕐᒧᑦ ᑐᑦᑐᓯᐅᕈᓐᓇᕐᓂᕐᒥᒃ ᑐᑦᑐᓕᒻᒥ, ᖃᐅᔨᒪᔭᐅᓂᖃᕐᑐᖅ ᐃᓄᖏᓐᓄᑦ ᑐᑦᑐᓕᒃ. ᓈᓚᐅᑎᒃᑯᑦ ᑐᓴᕐᓴᐅᔪᑦ, ᖃᓪᓗᓈᑎᑐᑦ, ᑐᓴᕐᓴᐅᓚᐅᕐᒪᑕ ᓴᒧᕐ ᐊᓪᓚᕕᐊᓂ ᐊᒻᒪ ᓈᓚᓕᕋᒥ ᓱᓕᕆᔭᒥᓂᒃ ᓄᖅᑲᐅᑎᓪᓗᓂ. ᓴᒧᕐ, ᓄᓇᕗᑦ ᑐᑦᑐᓂᒃ ᖃᐅᔨᒪᔨᒻᒪᕆᐊ, ᓂᕆᐅᒋᕇᓚᐅᕋᒥᐅᒃ. ᐃᓱᒪᒃᓴᓕᐅᕈᑎᒋᓐᓂᕋᒥᐅᒃ ᑐᑦᑐᓂᐊᖃᑦᑕᖁᔨᖏᓐᓂᖅ ᐊᒻᒪ ᐃᑲᔪᓚᐅᕐᑐᖅ ᑐᓴᒐᒃᓴᓃᑦᑐᒃᓴᓕᕆᓂᕐᒧᑦ. ᑭᓯᐊᓂ ᑕᐃᒪᐃᒃᑲᓗᐊᕐᑎᓪᓗᒍ, ᑭᒃᑯᑐᐃᓐᓇᕐᓄᑦ ᑐᓴᕐᑕᐅᓯᒪᓕᕐᑐᑦ, ᓱᓕᔪᖅ.

ᐋᑦᓚ ᐃᓄᑦᑎᑐᑦ ᐅᖃᓕᒪᓯᔪᖅ, ᐅᓂᒃᑳᓯᓪᓗᓂ ᓯᕗᓪᓕᕐᐹᒥ ᑐᑦᑐᓂᐊᓚᐅᕐᓯᒪᓂᕐᒥᓂᒃ ᑐᑦᑐᓕᒻᒥ ᐊᕐᕌᒍᖃᕐᓱᓂ 14,ᓂᒃ ᐊᒻᒪ ᖃᓄᖅ ᐅᐱᖅᑲᑎᒋᓚᐅᕐᓯᒪᓂᕐᒥᓂᒃ ᓂᕆᖃᑎᖃᓕᕋᒥ ᐃᓚᒥᓂᒃ ᐊᒻᒪ ᐃᓚᓐᓈᒥᓂᒃ. ᑕᐃᒪ ᖃᓪᓗᓈᕐᑎᑑᓕᕐᑎᑕᐅᓂᖓ ᑐᒃᓯᐊᑦᓯᐊᕐᓇᕈᓐᓇᐃᕐᓱᓂ ᐊᒻᒪ ᑐᑭᓯᓇᑦᓯᐊᕋᑎᒃ ᑐᑭᓯᒋᐊᕐᕕᒃᓴᑕᐃ ᐱᔾᔪᑎᖃᕐᑐᑦ ᓯᓚᐅᑉ ᐊᓯᔾᔨᕐᐸᓪᓕᐊᓂᐊᓂᒃ ᐊᒻᒪ ᐆᒪᔪᑦ, ᓯᓚᐅᑉ ᖃᓄᐃᑦᑑᒍᓯᖏᓐᓂᒃ ᐊᒻᒪ ᓯᑯᑉ ᒥᒃᓵᓄᑦ ᐊᒻᒪ ᐱᒻᒪᕆᐅᓂᖏᓐᓂᒃ ᑎᑎᕋᕐᑕᐅᔭᕆᐊᖃᓂᖏᑕ ᐊᓯᔾᔨᕐᑐᕐᐸᓪᓕᐊᔪᑦ. ᖃᐅᔨᒪᓚᐅᕐᑐᖅ ᖃᓄᐃᓘᕋᓱᐊᕐᒪᖔᑦ. ᐅᖃᐅᓯᖃᓚᐅᕐᒪᑦ ᖃᐅᔨᒪᒻᒪᕆᓐᓂᕐᒥᒃ ᖃᐅᔨᓴᕐᑎᓄᑦ.

ᓂᓪᓕᖏᑲᐃᓐᓇᕐᓱᓂ, ᐃᒥᓕᕋᒥ ᐃᒪᑐᐃᓐᓇᕐᒥᒃ, ᐊᒻᒪ ᐅᖃᓕᒫᓕᕐᑐᖅ ᑎᑎᕋᕐᓯᒪᓪᓗᑎᒃ ᑐᓴᕐᑎᑦᓯᒍᑎᓂᒃ ᑐᑦᑐᓂᐊᕈᓐᓇᖏᑲᐃᓐᓇᕐᓂᐅᑉ ᒥᒃᓵᓄᑦ. ᑭᓇᑐᐃᓐᓇᖅ ᐊᖑᔭᐅᔭᓂ ᑐᑦᑐᑦᑐᖅ ᑐᑦᑐᓕᒻᒥᑦ ᒪᓕᒐᕐᑎᒍᑦ ᓵᑕᒃᓴᐅᔪᓐᓇᕐᓯᓪᓗᓂ ᒪᓕᓪᓗᒋᑦ ᐆᒪᔪᓕᕆᓂᕐᒧᑦ ᐱᖁᔭᕐᔪᐊᖅ ᐊᒻᒪ ᐊᑭᓖᑎᑕᐅᑐᐃᓐᓇᕆᐊᖃᓕᕐᓱᑎᒃ, ᐅᖃᕐᑐᖅ. ᐃᖏᑦᓱᓂ ᐃᓱᒪᒃᑯᑦ ᐊᓯᐅᑲᐃᓐᓇᖅᑰᔨᓚᐅᕐᓱᓂ. ᐅᑎᕐᑐᖅ ᑕᓚᕕᓴᒧᑦ ᖃᒥᒋᐊᕐᑐᕐᓱᒍ.

ᓴᒧᕐ ᑕᒪᑐᓂᖓ ᖁᕕᐊᓱᒍᑎᖃᕆᐊᖃᕐᑐᕕᓂᐅᒐᓗᐊᖅ. ᐊᒃᑐᐃᓂᖃᕈᓐᓇᕐᒪᑦ ᐃᓱᒪᓕᐅᕈᑎᖃᓂᒃᑯᑦ ᒐᕙᒪᒃᑯᑦ ᒪᓕᒐᖓᓂᒃ – ᓯᕗᓪᓕᕐᐹᒥ ᓄᕐᕋᖏᓐᓄᑦ, ᐆᒪᔪᕐᓂᐊᕐᑎᒻᒪᕆᑦ ᑭᓯᐊᓂ ᐊᕿᐊᕈᕐᒥᖏᑦ ᐲᑦᓴᕕᓂᐅᔮᓕᕐᑐᑦ, ᐅᐃᔮᕐᓱᑎᓪᓗ ᐊᒡᒐᖏᑦ. ᐹᑎ, ᒥᓂᔅᑕᐅᑉ ᑐᓪᓕᐊ, ᓯᓐᓇᓕᕋᔭᕐᒪᑦ ᓴᒧᕐ ᐱᓕᕆᖃᑕᐅᓂᐊᓄᑦ ᐊᒻᒪ ᕿᓂᕈᓐᓇᕐᑐᖅ ᐃᓱᐃᓪᓕᐅᑎᒃᓴᓂᒃ. ᐋᑦᓚᐅᑉ ᑭᒡᒐᕐᑐᕐᑕᖏᑦ ᓂᓐᖓᒃᑲᔭᕐᑐᑦ ᐆᒪᔪᕐᓯᐅᕈᓐᓇᕐᓂᒧᑦ ᐱᔪᓐᓇᐅᑎᒥᓂᒃ ᐊᕐᓵᕐᑕᐅᒍᑎᒃ. ᐊᑲᐅᖏᓕᐅᕈᑕᐅᒻᒪᕆᓕᕋᔭᕐᑐᖅ ᓱᒋᐊᓪᓚᒍᑕᐅᓕᕐᓗᓂ. ᒎᑎ, ᐱᓕᕆᑦᓯᐊᕋᓗᐊᕐᐳᖓᖃᐃ ᓱᓕᔪᒃᑯᑦ, ᓱᒧᕐ ᐃᓱᒪᓕᕐᑐᖅ.

ᐱᒋᐊᕐᓂᐊᓂ ᕕᕗᐊᕆᐅᑉ, ᐅᓪᓗᑐᖃᐅᓕᕐᑎᓪᓗᒍ ᑖᕐᓚᓪᓕᕇᓚᐅᕐᓯᒪᒻᒪᑦ. ᒪᑐᓪᓗᓂᐅᑉ ᐊᓪᓚᕕᓂ ᐊᒻᒪ ᐃᑯᒻᒪᖅᑯᑎᖏᑦ ᖃᒥᑦᓱᓂᓕᒋᑦ ᑕᑯᒋᐊᕈᒪᓪᓗᓂ ᓯᓚᒧᑦ, ᐊᒻᒪ ᐃᖏᒃᑲᑦᑐᖅ ᖃᓂᑦᓴᕐᓱᓂ ᐃᒐᓛᒥᒃ. ᐃᒐᓛᒃᑯᑦ ᑐᓴᕐᓴᐅᔪᖅ ᐱᕐᓯᕙᓗᑦᑐᖅ, ᖃᓂᑦᑐᒻᒪᕆᐊᓘᓪᓗᓂ ᕿᖓᕐᓄᑦ. ᐊᑎᒋᓯᒪᐅᕐᑐᑦ ᑕᑯᒃᓴᐅᕙᑦᑐᑦ ᓄᓇᒃᑰᕈᑎᓂ ᖃᐅᒻᒪᖁᑎᖏᑎᒍᑦ ᐊᒻᒪ ᐊᓯᐅᑲᐅᑎᒋᓪᓗᑎᒃ ᑕᕐᕋᑎᑐᒃ. ᑭᒃᑰᒻᒪᖔᑕ ᓇᓗᓇᕐᑐᑦ. ᑲᑎᓐᖓᔪᑦ ᕿᒻᒦᑦ ᓂᓪᓕᐊᓯᔪᑦ ᐃᓯᒐᖏᑦ ᖁᐊᕐᓱᑎᒃ. ᐃᒃᓯᕙᐅᑕᒥᓄᑦ ᐃᓂᓪᓚᒋᐊᓪᓚᑉᐳᖅ ᓂᐱᖃᕐᑐᒧᑦ.

ᖄᖏᕐᑕᒃᑯ, ᐃᓱᒪᓕᕐᑐᖅ. ᑲᒪᒋᒋᐊᖃᓚᐅᕐᒪᑕ. ᓱᓕᕙ?

ᑲᓱᑦᑐᕐᑐᖃᕐᒪᑦ ᒪᑐᒥᒃ. “ᐃᓯᕆᑦ,” ᐅᖃᕐᑐᖅ.

“ᓱᔪᖑᑯᐊ ᐃᑯᒻᒪᖁᑏᑦ? ᓂᐊᖁᓐᖑᒐᕕᑦ ᐅᕝᕙᓘᓐᓃᑦ ᖃᓄᖅ’?” ᐊᐱᕆᔪᖅ ᑕᓐᑲᓐ, ᐱᓕᕆᖃᑎᒥᓂᒃ.

“ᐋᒃᑲ, ᐋᒃᑲ. ᖃᒥᒍᓐᓇᕐᑕᑎᑦ.”

“ᑕᑯᓚᐅᕐᐱᐅᒃ ᐅᖃᐅᓯᖏᑦ?”

“ᐄᖕ. ᓴᓐᖏᔪᑦ.”

ᑕᓐᑲᓐ ᖃᓂᓪᓕᒋᐊᕐᓱᓂ ᐊᒻᒪ ᓂᐱᑭᓪᓕᒋᐊᕐᑐᖅ. “ᑎᑎᕋᕐᓯᒪᔪᑦ ᕿᒥᕐᕈᑲᐃᓐᓇᕐᓚᕘᒃ, ᐃ? ᖃᐅᔨᒪᓚᐅᖏᑦᑐᖓ ᓱᒍᒪᒻᒪᖔᑦ – ᓯᑯ ᐊᒻᒪ ᓄᕗᔭᐃᑦ ᐊᒻᒪ ᐊᓯᖏᑦ.”

“ᐃᓄᑦᑎᑑᓕᕆᐊᓖᑦ ᖃᓪᓗᓈᑎᑐᓪᓗ ᐊᒥᓱᐊᓗᐃᖅᑲᐃ.”

“ᐅᐃᓪ, ᖁᔭᓕᐅᑎᕙᒋᑦ ᓴᒧᕐ. ᐊᕐᕌᒍᓕᒫᒥ ᐃᖅᑲᓇᐃᔭᕐᓯᒪᓕᕋᕕᑦ ᐊᒻᒪ ᐊᐅᓚᑦᔭᐃᕙᓪᓕᐊᒋᐊᖃᓕᕐᑐᑎᑦ. ᒫᓂ,” ᐅᖃᕐᑐᖅ, ᑐᓂᓯᓪᓗᓂᓗ ᑎᑎᕋᕐᓯᒪᔪᓂᒃ. ᑎᑎᕋᐅᕐᔭᕐᓯᒪᔪᖅ ᓴᒧᕐᖑᐊᒥᒃ ᓇᔾᔪᖃᖑᐊᕐᓱᓂ ᐊᒻᒪ ᑎᒍᒥᐊᕐᓱᓂᐅᒃ ᐊᑦᑐᐊᑎᑦᓱᓂᐅᒃ ᓴᕝᕕᒥᓄᑦ. “ᑐᑦᑐ ᐊᕐᓇᖅ. ᑕᐃᒫᒃ ᒥᓂᔅᑕᒧᑦ ᑕᐃᔭᐅᕙᒃᑲᒥ.”

“ᓱᓕᕕᑦ, ᑕᐃᒪᓐᓇ ᑕᐃᒻᒫᖔ?” ᕿᒥᕐᕈᒃᑲᓐᓂᓯᓪᓗᓂ ᑎᑎᕋᐅᔭᕐᓯᒪᔪᒥᒃ, ᐊᒡᒐᓂᓗ ᐆᒪᑎᒥᓄᑦ ᐊᑦᑐᑎᑦᓱᒋᑦ. “ᑖᓐᓇ ᐋᖅᑭᓐᓂᕋᕕᐅᒃ?”

“ᐄᖕ, ᐱᓕᕆᐊᖃᕋᒪᑦ ᑲᔪᓯᑎᒋᐊᓕᓐᓂᒃ ᐊᒻᒪ ᐅᓇ ᓇᓂᖅᑲᐅᒐᒃᑯ ᐃᓄᓐᓂᒃ ᐃᔪᕆᓴᐅᑎᑎᑐᑦ ᑎᑎᕋᕕᐅᔪᓐᓇᕐᑐᑦ. ᖁᕕᐊᓇᒻᒪᕆᑦᑐᖅ.”

“ᖁᔭᓐᓇᒦᒃ ᑕᓐᑲᓐ. ᓂᑲᒍᓱᑦᓯᐊᕐᓂᖅ.”

“ᐱᐅᓂᕐᓴᐅᒻᒪᑦ ᐱᓕᕆᓂᕐᒥᑦ ᐆᒥᖓ. ᑐᑦ ᑐ ᐊᕐᓇᖅ,” ᐃᓐᖏᕐᑐᖅ, ᐊᒡᒐᓂᓗ ᓂᐊᖁᒥᓄᑦ ᐊᑦᑐᐊᑲᑕᑦᓱᒋᒃ.

“ᑕᐃᒪ,” ᐅᖃᕐᑐᖅ ᖁᖓᑦᓱᓂ.

ᑕᓐᑲᓐ ᑕᑯᒋᐊᕐᑐᖅ ᓴᒧᕐ ᓵᖓᓄᑦ ᐹᒻᒪᑦᓱᓂ ᐊᒻᒪ ᐃᓯᔾᔪᓕᕐᑐᖅ, “ᑕᒪᓐᓇ ᐊᒃᓱᐊᓗᒃ ᖁᕕᐊᓇᖏᑦᑑᒍᓐᓇᕐᑐᖅ, ᐃᓚᓐᓈᒃ. ᐅᐱᒋᓚᐅᕐᓚᕗᑦ ᒥᑭᔫᑏᑦ ᑲᔪᓯᑦᓯᐊᕐᓯᒪᔪᑦ.”

“ᓱᓕᕗᑎᑦ.”

ᖁᐃᕐᓱᓕᕐᑐᖅ ᐊᑕᐅᓯᐊᕋᓂ. “ᖃᓂᒻᒪᑉᐸᓪᓕᐊᖂᕋᒪ’,” ᑕᑯᓴᕐᑐᖅ. “ᐅᓐᓄᓴᒃ ᓄᖅᑲᓂᐊᕋᒪ ᐃᖅᑲᓇᐃᔭᕐᓂᓐᓂᑦ.”

“ᐆᑭ,” ᓴᒧᕐ ᐅᖃᕐᑐᖅ, ᖄᕐᓯᓪᓗᓂ. ᐃᖅᑲᓇᐃᔭᕇᒪᑕ, ᓴᒧᕐ ᐊᐃᒃᓯᕐᓱᓂ ᐃᒥᐊᓗᒻᒥᒃ ᐊᒻᒪ ᐃᒐᓕᕐᑐᖅ ᑐᓕᒫᕕᓂᕐᓂᒃ ᑭᓯᐊᓂ ᐊᖏᕐᕋᕋᒥ, ᐱᓱᔪᖔᓕᕐᑐᖅ ᐃᓗᕕᕐᓄᑦ. ᑳᖏᑦᓯᐊᓚᐅᕋᒥ.

*****

“ᑎᓪᓗᑦᑐᕐᑐᖅ, ᑎᓪᓗᑦᑐᕐᑐᖅ!”

ᐹᑎ ᐊᓪᓚᕕᖓᓃᑦᑐᕕᓂᖅ ᓱᓇᐅᕙ ᓴᒧᑉ ᖃᐅᒻᒪᑦ, ᑏᑑᕐᓱᓂᓗ ᑎᒍᒥᐊᕐᑕᒥᓂᒃ. “ᐅᖃᐅᓯᕆᕆᓚᐅᒃᑭᑦ ᑐᑭᓯᒋᐊᕐᕕᒃᓴᐃᑦ ᑐᑦᑐᑦ ᒥᒃᓵᓄᑦ ᒥᓂᔅᑕ ᐊᐱᖅᑯᑎᒃᓴᖃᑐᐃᓐᓇᕆᐊᖃᒪᑦ? ᐊᐱᕐᓱᕐᑕᐅᓂᐅᔭᕐᒪᑦ ᓯᐊᕈ ᐊᒻᒪ ᖃᐅᔨᒪᖏᑦᓯᐊᒻᒪᕆᑑᔭᕈᒪᖏᒻᒪᑦ.”

“ᑐᑭᓯᐊᖏᓪᓗᑏᑦ, ᔨᐊ,” ᓴᒧᕐ ᐅᖃᖅᑐᖅ. “ᑕᐃᒪᓐᓇ ᐊᑲᐅᒋᔭᐅᖏᑦᑐᖅ ᑕᒪᐃᓐᓄᑦ.”

“ᖃᐅᔨᒪᕗᖓ ᒥᓂᔅᑕ ᖃᐃᓂᐅᔭᖅᑐᖅ. ᑐᑦᑐᓂᐊᖃᑦᑕᕈᓐᓇᐃᕐᓂᖅ ᓈᒻᒪᓈᓚᐅᕐᒪᑦ. ᐊᑲᐅᓈᕋᓂ ᐅᔭᓐᓄᑦ ᑐᑭᓯᐊᓂᒃ ᐆᒪᔪᓂᒃ.”

“ᑕᐃᔭᐅᔾᔪᓯᑦᓯᐊᖅ.”

ᐋᑎ ᐅᑯᖓᓪᓗᓂ ᐅᒃᑯᐃᕈᑎᒧᑦ, ᑭᐅᓐᓂ ᑭᕕᒋᐊᕐᑕᖏᒃ ᐊᓪᓗᕆᐊᕐᓱᓂ, ᓴᖑᓗᓂ ᓴᐅᒥᒻᒧᑦ ᐊᒻᒪ ᑕᓕᕐᐱᒧᑦ ᐊᖅᑯᑎᒃᑰᕐᓗᓂ ᓱᕈᐊᓗᒃᑯᑦ. “ᒥᓂᔅᑕ ᐱᑦᑎᐊᖑᐊᖃᑦᑕᕐᓯᒪᔪᖅ ᐃᓕᓐᓄᑦ. ᑕᒪᓐᓇ ᐊᑲᐅᔪᖅ. ᐊᖑᑎᓂᒃ ᐱᐅᒃᓴᕐᓂᕐᓴᖅ ᑭᖑᓪᓕᐅᑎᓪᓗᑎᑦ. ᐊᒻᒪᓗ ᐊᕐᓇᓂᒃ ᓯᕗᓂᐊᓂ.” ᐅᖃᕐᑐᖅ. “ᐊᒥᓱᐊᓗᐃᑦ ᐊᓂᒍᕐᓯᒪᓕᕐᒪᑕ ᐊᓪᓛᑦ ᓇᐃᓴᕋᑦᓴᐅᖏᑦᑐᑦ.”

“ᐄᓗᑭᐊᖅ.”

ᐅᓪᓗᓂ ᑭᖑᓂᖏᓐᓂ, ᐊᖑᓇᓱᑦᑏᑦ ᑲᑎᓐᖓᐅᕐᑐᑦ ᓂᓪᓕᐊᒍᑎᖃᓚᐅᕐᓯᒪᔪᑦ ᑐᑦᑐᓂᐊᖁᔭᐅᖏᓐᓂᐅᑉ ᒥᒃᓵᓄᑦ, ᐊᒻᒪ ᑐᓴᒐᒃᓴᓕᕆᔨᖃᐅᕐᓱᓂ ᐊᒻᒪ ᓄᑖᓂᒃ ᐊᑐᕐᓱᑐᒃ ᑐᓴᒐᒃᓴᓕᐅᕈᑎᓂᒃ ᑐᓴᕐᑕᐅᑎᑦᓯᓪᓗᑎᒃ ᓇᒧᓕᒫᖅ ᐊᒻᒪ ᐃᓚᖓᒍᑦ ᐊᑑᑎᖃᓗᐊᖏᑦᑐᓂᒃ. ᑭᖑᓂᐊᒍᑦ ᕼᐊᑭᕐᑐᖅ ᓵᓚᑦᓴᓚᐅᕐᓯᒪᔪᑦ ᐊᒻᒪ ᑲᑎᒪᔨᐅᔪᖅ ᐅᖃᕐᓱᓂ ᑐᓴᕐᓂᖏᑦᑐᒥᒃ ᐊᒻᒪ ᓂᐱᓕᐅᕐᑕᐅᓐᓂᕐᑐᖅ ᑐᓂᔭᐅᓪᓗᓂᓗ ᐃᓚᓐᓇᕆᔭᖓᓄᑦ ᓇᒧᑐᐃᓐᓈᓕᕐᓂᕐᒪᑦ, ᐊᑲᐅᖏᓕᐅᕈᑕᐅᒪᕆᓕᐅᕐᓯᒪᔪᖅ ᓴᖅᑭᑕᐅᓯᒪᓂᖓ. ᓱᓕᓚᐅᕐᒪᑦ, ᐃᒫᒃ ᑭᒃᑯᑐᐃᓐᓇᐃᑦ ᖃᐅᔨᒪᔪᑦ ᑐᑦᑐᓕᒻᒥᑦ ᑐᑦᑐᖃᑦᑕᕐᓯᒪᒻᒪᑕ ᓴᓗᓐᓂᕐᓴᓂᒃ ᐊᒻᒪ ᐅᓄᕈᓐᓇᐃᕐᓂᕐᓴᐅᓪᓗᑎᒃ. ᐃᓄᑐᖃᐃᑦ ᐊᕐᕌᒍᒐᓵᓗᓐᓂ ᐅᖃᐅᓯᕆᖃᑦᑕᕐᓯᒪᔭᑐᖃᖓ ᑕᒪᓐᓇ.

ᐅᓪᓗᒥ ᐅᓪᓗᑐᐃᓐᓇᐅᕗᖅ, ᖃᑖᖓᓪᓗᓂ ᑮᓇᖓ ᑕᓐᑲᓐ ᐊᓂᔪᖅ ᐊᓪᓚᕕᒻᒥᓂᑦ ᐊᒻᒪ ᒪᑐᓪᓗᓂᐅᒃ. ᐃᒃᓯᕙᓕᕐᑐᖅ ᐊᐱᕆᓚᐅᕋᓂ. ᐃᔨᖏᓪᓗ ᐊᐅᐸᕐᓱᑎᒃ.

“ᐃᒋᑕᐅᒐᒪ ᐃᖅᑲᓇᐃᔮᓐᓂᑦ.”

“ᐆ ᑕᓐᑲᓐ, ᐊᒃᑲ!”

“ᐋᑎ ᐅᖃᕐᑐᖅ ᑎᑎᖅᑲᖁᑎᖃᓂᕋᕐᓱᓂᓕ ᐊᓪᓚᕕᒻᒥᓂ ᐊᒥᓱᐊᓗᓐᓂᒃ ᐱᔾᔪᑎᖃᕐᑐᓂᒃ ‘ᑲᔪᓯᑦᓯᐊᕐᓯᒪᖏᑦᑐᓂᒃ ᐊᒻᒪ ᐊᑲᐅᖏᓕᐅᕈᑕᐅᓯᒪᔪᓂᒃ,” ᐅᖃᕐᓱᓂ. “ᑕᒪᒃᑯᓄᖓ ᐃᓚᐅᓐᓂᕋᕕᑦ?” ᓴᒧᕐ ᓇᑎᕐᒧᑦ ᑕᑯᓴᕐᑐᖅ. ᑕᓐᑲᓐ ᓂᐊᖁᓂ ᐊᐅᓚᓪᓗᒍ ᐅᒃᐱᕈᓱᒍᓐᓇᐃᕐᑐᖅ. “ᕗᐊᐅ.”

“ᐊᐱᕆᓯᒪᒻᒫᖓ ᖃᐅᔨᓴᖁᓪᓗᖓ ᐃᓕᓐᓂᒃ ᑭᓯᐊᓂ ᑐᓂᓯᓚᐅᖏᑕᕋ, ᓱᓕᑦᓯᐊᕐᐳᖓ.”

“ᓴᓪᓗᔪᑦ.”

‘ᑕᓐᑲᓐ, ᑕᑯᓴᕐᓱᓂᖓ. ᐃᓱᒪᕕᑦ ᑕᒪᑐᒪᖓ ᐃᑲᔪᕋᔭᕐᑐᕆᓪᓗᖓ?” ᐅᖃᕐᑐᖅ, ᑕᑯᓐᓇᕐᓱᒍ ᐹᑎ ᐊᓪᓚᕕᖓᓂ.

“ᓱᒧᓪᓕ ᐅᖃᐅᑎᓐᓂᖏᓐᓇᕕᖓ ᐅᓗᕆᐊᓇᕐᑐᖃᕐᑐᑦ, ᓱᒧᑦ? ᔨᓴᔅ, ᓱᓇᐅᕙᓕ ᐃᓚᓐᓇᕇᑦᑐᒍᒃ.”

“ᒪᒥᐊᓇᖅ. ᖃᐅᔨᒪᖏᓐᓇᒪ ᖃᓄᐃᓘᕆᐊᖅ!”

“ᐆᑭ. ᐆᑭ. ᐸᓯᔭᑦᓴᐅᖏᓪᓚᑎᑦ,” ᐅᖃᕐᑐᖅ, ᑕᓕᓂ ᖁᒻᒧᑦᑎᑦᓱᒋᑦ. “ᑕᐃᒫᑦᓴᐃᓐᓇᖅ ᒪᑭᑕᒐᓱᐊᑐᐃᓐᓇᖃᑕᐅᒐᕕᑦ, ᓱᓕᕙ?” ᐊᒡᒐᓂ ᐸᑎᑦᑕᕐᓱᒋᒃ ᐃᒃᓯᕙᐅᑕᒥᓄᑦ. “ᕗᐃᓪ, ᑕᒪᓐᓇ ᐊᒃᓱᐊᓗᒃ ᐊᑲᕐᓇᖏᑦᑐᖅ ᐱᐅᖏᑦᑐᖅ.”

“ᐊᓯᐊᓂᒃ ᐃᖅᑲᓇᐃᔮᒃᓴᕐᓯᐅᓂᐅᔭᕐᕕᑦ ᐅᕝᕙᓘᓐᓃᑦ ᐅᑎᕐᓂᐅᔭᕐᐱᑦ ᓄᓇᓐᓄᑦ?”

“ᖃᐅᔨᒪᖏᑦᑐᖓ. ᑯᔭᖓ.” ᐊᓂᕐᓵᕐᑐᓕᕐᑐᖅ, ᐅᑎᕐᑕᕐᓱᒍ ᖃᓂᕐᒥᒍᑦ. “ᓱᓕ ᕿᓂᕐᑑᔭᕐᓱᓂ ᐊᑲᐅᖏᑦᑐᓂᒃ. ᑭᓇ ᖃᐅᔨᒪᒐᔭᕐᒪᒃ?”

“ᖃᓄᖅ ᐃᑲᔪᕈᓐᓇᕐᐸᒋᑦ?”

“ᐃᕕᒐᖃᕐᐱᑦ ᓱᕐᕋᓇᕐᑐᒥᒃ?”

“ᒪᒥᐊᓇᖅ, ᐱᓲᒍᖏᑦᑐᖓ.”

“ᐊᖏᖏᑦᑐᑎᑦ.”

*****

ᑕᖅᑮᑦ ᐊᒥᓱᑦ ᐊᓂᒍᕐᑐᑦ ᐃᒃᑮᓇᕐᑐᐊᓘᓚᐅᕐᑎᓪᓗᒍ, ᑖᕐᓱᓂ ᐅᑭᐅᕐᒥ. ᐱᕐᓯᑲᑕᐃᓐᓇᐅᔭᕐᓱᓂᓗ ᕕᕗᐊᕆᒥ ᐊᒻᒪ ᑭᖑᓂᐊᓂ ᒪᕐᔨᒥ ᐃᒃᑮᓇᕐᑐᒻᒪᕆᐅᓪᓗᓂ ᐃᒫᒃ ᖃᓪᓗᓈᑦ ᓄᓇᖓᓂᕐᒥᐅᑕᐃᑦ ᐃᓪᓗᒦᑐᓐᓇᕐᓱᑎᒃ, ᓯᓚᕆᓯᒪᖏᑦᓯᐊᕐᑐᑦ ᖃᒃᑯᑐᑦ, ᐸᓂᕐᓱᑎᒃ ᐅᕕᓂᖏᑦ. ᐅᐱᕐᖔᖑᒐᓗᐊᒥ ᐅᖅᑰᔪᐊᓘᖏᑐᐃᓐᓇᕆᐊᖃᒥᔪᖅ ᖃᐅᒪᔪᒻᒪᕆᐅᒐᓗᐊᕐᓗᓂ, ᑭᒃᑯᓕᒫᓄᑦ ᒪᑭᒍᑕᐅᓪᓗᓂ ᐅᖅᑰᓂᐊ, ᓴᒧᕐ ᐃᓱᒪᓚᐅᕐᑐᖅ. ᐅᓪᓗᑕᒫᑦ ᒪᕐᔨᒥ ᐊᒻᒪ ᐊᐃᕆᓕᒥ, ᑲᒪᒋᔭᖃᐃᓐᓇᓚᐅᕐᑐᖅ ᐅᓪᓗᐃᑦ ᑕᑭᓪᓕᕙᓪᓕᐊᓂᖏᓐᓂᒃ 6,ᓂ ᓇᑉᐸᕐᒧᑦ ᒥᓂᑦᓄᑦ ᐅᓪᓗᐃᑦ ᑕᑭᓪᓕᕙᓪᓕᐊᓂᖓᓂᒃ. ᐃᓄᖏᑦ ᒪᑭᑉᐸᓪᓕᐊᓕᕐᐸᑦᑐᑦ ᕿᓂᓕᕐᓱᑎᓪᓗ ᐊᓯᐅᔨᔭᕕᓂᕐᒥᓂᒃ. ᐅᐱᕐᖔᖅ ᐱᕈᕐᕕᐅᒻᒪᑦ ᐊᒻᒪ ᓄᑕᐅᓕᕆᐊᓪᓚᓐᓇᕐᓱᓂ. ᐊᑎᖃᕈᒪᓐᓂᕋᓗᐊᕋᒥ ᔅᐳᕆᖕ,ᒥ, Spring..

ᓴᒧᕐ ᐅᑯᖓᓕᕐᑐᖅ ᑐᓴᕋᒥ ᑐᑦᑐᓂᐊᕈᓐᓇᕐᓂᐅᑉ ᓄᖅᑲᕐᑎᑕᐅᓂᐊᓂᒃ, ᐃᖏᕐᕋ.ᕆᐊᖃᓕᕐᓱᓂ ᑲᑎᒪᓂᕐᒧᑦ ᐊᒻᒪ ᑲᑎᒪᑎᑦᓯᓂᕐᒧᑦ. ᐃᓄᓕᕆᔨᑐᖃᒃᑯᑦ ᐃᒃᐱᒋᔭᖃᓕᕐᒪᑕ ᐅᑭᐅᕐᑕᕐᑐᑐᒥ ᐅᕐᓯᐊᓗᓐᓂᐊᕐᓂᕐᒥᒃ ᐊᒻᒪ ᓴᒧᕐ ᑲᒪᒋᑦᑕᐃᓕᒪᔭᖏᑦ. ᑐᓴᕈᒪᓪᓕᕐᓯᒪᔪᖅ ᑕᓐᑲᓐ ᐃᔪᕐᓇᕐᓂᐊᓂᒃ. ᐊᐅᓪᓚᖅᑰᓚᐅᕐᓯᒪᔪᖅ ᐊᓂᒍᕐᓯᒪᓕᕐᑎᓪᓗᒍ ᑕᖅᑭᖅ ᐃᒋᑕᐅᓚᐅᕐᓱᓂ ᐃᖅᑲᓇᐃᔭᖓᓂᑦ ᐊᒻᒪ ᑕᐃᒪᖓᓂ ᑐᓴᕐᕕᒋᓚᐅᖏᑕᖓ. ᐱᓇᓱᐊᕈᓯᑦ ᐊᓂᒍᓚᐅᕐᑎᓐᓇᒋᑦ ᐅᐱᕐᖓᒃᐸᓪᓕᐊᓕᕐᑎᓪᓗᒍ ᒪᓕᒐᓕᐅᕐᕕᒻᒥ ᒪᐃᖑᑎᓪᓗᒍ, ᒥᓂᔅᑕᐅᑉ ᐊᓪᓚᕕᖓᓄᐊᓚᐅᕐᓯᒪᔪᖅ.

“ᓘᑦᑖᖅ ᒧᐊᕐᓴᓐ! ᐃᑎᕐᓗᑎᑦ.”

“ᑐᑭᓯᐊᒍᒪ….”

‘ᐋᒃᑲ, ᐋᒃᑲ, ᐃᖏᓪᓗᑎᑦ.” ᐃᖏᑦᓱᓂᓗ ᐊᒻᒪ ᑕᑯᓐᓇᓕᕐᑐᖅ ᒥᑭᔪᑯᓗᒻᒥᒃ ᓴᓇᓐᖑᐊᒐᕐᒥᒃ ᕿᓚᐅᔾᔭᖑᐊᕐᓱᓂ ᑎᕿᕐᑯᐊᓃᑦᑐᒥᒃ ᐊᓪᓚᕕᐊᑕ. ᐊᑭᓐᓴᒥ ᐊᔾᔨᖑᐊᕐᑕᖃᕐᓱᓂ ᖁᖓᑦᑐᓂᒃ ᑐᐱᐅᑉ ᓴᓂᐊᓂ, ᐅᒥᐊᕐᒥᓗ ᐊᒻᒪ ᓯᑭᑑᓂ. ᐊᒃᓱᐊᓗᒃ ᖁᕕᐊᓱᖅᑰᔨᔪᑦ. “ᖃᓄᖅ ᐃᑲᔪᕈᓐᓇᕐᐸᒋᑦ?” ᐅᖃᕐᓱᓂ.

‘ᕗᐃ, ᐊᖑᑏ, ᑕᖅᑮᑦ ᐊᒥᓱᑦ ᐊᓂᒍᕐᓯᒪᓕᕐᒪᑕ ᑐᑦᑐᓂᐊᕆᐊᖃᖏᓐᓂᕐᖅ ᓴᖅᑭᑕᐅᓚᐅᕐᑎᓪᓗᒍ ᐊᒻᒪ ᑐᓴᕈᒪᕗᖓ ᖃᓄᖅ ᐃᓄᐃᑦ ᐅᖃᖃᑦᑕᕐᓯᒪᓕᕐᒪᖔᑕ ᑕᒪᑐᒧᖓ.”

“ᐊᔪᕈᓐᓇᐃᕐᓴᕐᑐᑦ. ᐃᒪᖏᑦ ᒪᒃᑯᑦᑐᑦ ᐊᖑᑏᑦ ᓱᓕ ᐊᖑᓇᓱᒍᒪᖃᑦᑕᕐᑐᑦ ᐊᒻᒪ ᐊᓱᐃᓪᓛᒃ ᑲᔪᓯᒍᑎᒃ, ᐃᒻᒥᓂᒃ ᑲᒪᒋᒋᐊᖃᕋᔭᕐᑕᖓ ᑭᖓᓂᐊᒍᑦ. ᑭᓯᐊᓂ ᐆᒪᔪᐅᕐᓯᐅᕐᑎᓕᒫᑲᓴᐃᑦ ᖃᐅᔨᒪᔪᑦ ᑕᒪᓐᓇ ᑐᑦᑐᒍᓐᓇᖏᑲᐃᓐᓇᕐᓂᖅ ᐊᑐᕆᐊᖃᓂᐊᓂᒃ.” ᐃᒃᓯᕙᐅᑕᒧᑦ ᐃᖏᒋᐊᓪᓚᑦᑐᖅ ᐊᒻᒪ ᖃᓪᓕᒋᐊᒃᑲᓐᓂᓕᕆᓪᓗᓂ ᐅᑎᕐᑕᕐᓱᓂ. “ᐅᑯᓂᖓ ᑕᑯᑎᓂᐊᖏᓐᓇᐅᔭᕐᐸᒋᑦ!” ᒪᑐᐃᕐᓱᓂᐅᒃ ᐊᒧᔫᓂ ᐊᒻᒪ ᑎᒍᓯᔪᖅ ᐴᑦᓴᔭᒥᒃ ᐊᒻᒪ ᖁᖓᑦᓱᓂ. ᐃᓗᐊᓂ ᖁᕐᓱᕐᑕᐅᑉ ᐴᒃᓴᐅᑉ ᓴᐳᒻᒥᓯᒪᔪᑦ ᐊᐅᑦᑕᔫᒥᒃ ᖄᓕᕐᓯᒪᓪᓗᑎᒃ.

ᓴᐳᕐ ᑕᐸᐃᕐᓱᓂ. “ᑖᓐᓴ ᓄᓴᖑᐊᖅ ᐊᑖᑕᑦᓯᐊᕕᑦ ᑎᑎᕋᐅᔭᕐᓂᑯᖓ?” ᐋᑦᓚᐅᑉ ᖃᓪᓗᖏᒃ ᖁᒻᒧᑦᑎᑦᓱᓂᒋ5, ᐊᖏᕐᑐᖅ. “ᐆ ᒪᐃ, ᐅᖃᕐᑐᖅ, ᑎᒍᓪᓗᓂᒋᑦ ᑕᑦᑕᕆᓪᓗᓂᒋᑦ ᐊᒻᒪ ᓱᒃᑲᐃᑦᑐᒥᒃ ᓂᐅᕆᐊᕐᕐᓱᓂ ᓲᕐᓗ ᑕᑯᒃᓴᐅᑎᑦᓯᔪᑎᒍᑦ ᐊᖅᑯᑎᒥ ᐊᑯᓂᓂᑕᕕᓂᕐᓂᒃ. ᑐᑦᑐᓕᐅᑉ ᑎᑎᕋᐅᔭᕐᓯᒪᓂᖓ ᓱᓕᓚᐅᕐᑐᖅ. ᑎᑎᕋᖅᓯᒪᓪᓗᓂ ᐆᒪᔪᖑᐊᑯᓗᓐᓂᒃ ᓄᓇᒥ ᐊᒻᒪ ᐃᒪᖃᐅᕐᓱᓂ. ᐋᑦᒪ ᖃᐃᓪᓗᓂ ᓵᒧᑦ ᓇᖏᕐᓕᕐᑐᖅ ᓴᓂᐊᓂ.

“ᑕᑯᑦᓴᐅᔪᑦ ᐱᒻᒪᕆᐅᑎᑕᐅᖃᑦᑕᕐᓯᒪᔪᑦ ᐃᒻᒥᓄᑦ ᐊᒃᓱᐊᓗᒃ ᐱᓐᓇᕆᒐᒥᒋᑦ – ᐊᓪᓛᒃ ᒥᑭᔫᑎᑯᓗᐃᑦ ᑲᖏᕐᓱᐃᑦ ᐊᒻᒪ ᓄᓇᐃᑦ ᐃᒪᕐᒥ ᐃᖃᓪᓕᐊᕐᕕᒋᖃᑦᑕᕐᓯᒪᔭᖏᑦ ᐊᒻᒪ ᓇᑦᓯᕐᓯᐅᕐᕕᒋᓪᓗᒋᑦ,” ᐅᖃᕐᑐᖅ, ᑎᒃᑯᐊᕐᓯᓪᓗᓂᓗ ᑎᑭᕐᒥᓄᑦ ᑎᑎᕐᓯᒪᓂᖏᓐᓂᒃ. “ᑭᓯᐊᓂ ᐃᓚᖏᑦ ᑐᑭᓯᓇᑦᓯᐊᖏᑦᑐᑦ.” ᓂᐱᖃᕈᓐᓇᐃᑳᓪᓚᑦᑑᒃ. ᓴᒧᕐ ᑕᑯᓪᓗᓂ ᒥᑭᔪᑯᓗᒻᒥᒃ ᑐᑦᑐᑦᒥ, ᓯᕕᖓᔪᓂ ᐊᒻᒪ ᓇᕐᓴᓂ. “ᑭᒃᑯᑐᐃᓐᓇᐃᑦ ᐃᒃᐱᒋᔭᖃᕐᐳᑦ ᓇᒻᒥᓂᖅ,” ᐅᖃᕐᓱᓂ. “ᐃᖅᑲᐅᒪᔭᖃᕋᑦᑕᓕ ᐱᒻᒪᕆᐅᑎᑕᑦᑎᓐᓂᒃ ᑭᓯᐊᓂ.”

“ᑕᒪᓐᓇ ᓱᓕᒻᒪᕆᑦᑐᖅ.”

“ᐃᓄᐃᑦ ᑎᑎᕋᐅᔭᑐᐊᕐᒪᒍ ᑲᑎᓐᖓᓗᑎᒃ, ᓱᓕᓂᕐᓴᐅᒻᒪᑕ.”

ᑕᑯᓴᕐᓱᓂᐅᒃ ᐊᒻᒪ ᖁᔭᓕᕐᑕᖓ. ᕿᐊᖑᓱᓕᑳᓪᓚᒻᒪᕆᑦᑐᖅ ᖁᕝᕕᐅᕐᓗᓂ ᐊᒻᒪ ᓄᖅᑲᕐᑎᑕᖓ. “ᖃᐅᔨᓴᖏᑦᑐᖓ ᖃᓄᖅ ᓂᓪᓕᕆᐊᖅ. ᑖᓐᓇ ᐱᐅᔪᒻᒪᕆᐊᓗᒃ ᐃᑦᑕᕐᓂᓴᖅ.” ᓂᐊᖁᓂ ᐊᐅᓚᑎᐊᕐᔪᑦᑕᖓ ᓂᓪᓕᕋᓂ ᐃᓱᒪᒋᔭᒥᓂᒃ.

“ᐄᖕ, ᐊᓐᓂᕆᔭᒻᒪᕆᐊᓗᒐ,” ᐅᖃᕐᑐᖅ. ᑐᓂᓯᓪᓗᓂ ᓄᓇᖑᐊᒥᒃ ᐊᒻᒪ ᐴᒃᑲᓐᓂᕐᑕᖓ ᐴᒃᓴᒧᑦ ᐊᒻᒪ ᐃᖏᒋᐊᕐᑐᒃᑲᓐᓂᕐᑐᖅ, ᐊᒡᒐᖏᑦ ᓵᒥᓄᐊᕐᓱᒋᒃ. “ᑐᑦᑐᐃᑦ ᐅᓄᕐᓯᒋᐊᒃᑲᓐᓂᓛᕐᑐᑦ. ᐊᒻᒪ ᐃᓄᐃᓪᓗ ᒪᑭᒋᐊᒃᑲᓐᓂᕐᓗᑎᒃ.”

*****

ᐅᒍᓯᑎᐅᑉ ᓄᓐᖑᐊᓂ, ᓴᓂᐊᓂ 6 ᐅᓐᓄᒃᑯᑦ ᐊᐃᐹᖑᑎᓪᓗᒍ ᐅᓪᓛᒃᑯᑦ, ᓴᒧᕐ ᐃᖅᑯᒻᒪᓚᐅᕐᓯᒪᔪᖅ ᐅᖄᓚᐅᑎᐊ ᓯᕙᓂᓕᕐᒪᑦ. ᑎᒍᓪᓗᓂᐅᒃ ᓵᒥᓂᑦ: ᖃᕆᑕᐅᔭᒃᑯᑦ ᑎᑎᖅᑲᖏᑦ ᕋᔨᓄᓪ, ᐊᖓᔪᖅᑳᖓᓐᓂᑦ, ᑎᕙᓂ, ᑐᓴᒐᒃᓴᓕᕆᔨ, ᐳᕋᐃᓐ ᓛᑯᕐᓴᓐ. ᓛᑯᕐᓴᓐ. ᖃᓄᕐᓕ ᐊᑎᖓ ᑐᓴᐅᒪᒐᒃᑯ?

ᒪᑐᐃᕐᓂᐅᓴᓕᕐᑎᓪᓗᓂᐅᒃ ᑎᑎᖅᑲᖏᓐᓂᒃ ᕆᔨᓄᓪ ᐅᖄᓚᐅᑎ ᓯᕙᓂᕐᑐᖅ.

“ᓴᒧᕐ? ᖃᓄᐃᖏᒃᑲᓗᐊᕐᐳᑎᒃ ᐊᒻᒪ ᐃᖅᑲᒪᕕᑦ?”

ᐃᔨᖏᒥᓂᒃ ᐊᑦᓴᓗᑦᓱᓂ. “ᐄᒐᓚᑦ.”

“ᐊᓕᐊᓇᐃ. ᑕᐃᒪᐃᒻᒪᑦ…” ᓂᐱᖃᕋᓂ, “ᑲᒻᐸᓂ ᐃᓕᓐᓂᒃ ᐱᓕᕆᑎᑦᓯᓚᐅᕐᑐᑦ ᖃᐅᔨᓴᕐᓂᕐᒥᒃ ᐅᕐᓱᐊᓗᒻᒥᒃ ᕿᒪᐃᖅᑲᐅᔪᑦ ᓄᓇᒧᑦ ᐱᔪᓐᓇᐅᑎᖃᕋᑎᒃ. ᕿᒪᐃᓪᓗᑎᒃ ᐃᑎᕐᓴᐅᓂᐊᓄᑦ. ᖃᐅᔨᒪᕗᖓ ᖃᓄᖅ ᑐᑭᖃᒪᖔᑦ.”
“ᐆ ᑳᑦ….”

“ᓯᕐᒥᑦ ᑰᖏᑦ ᖃᖅᑲᓃᑦ ᑰᑦᑐᐊᓘᕙᑦᑐᑦ ᓂᐱᓕᐊᓘᓪᓗᑎᒃ ᐊᐅᔭᒃᑯᑦ ᐊᒻᒪ ᐅᐊᓴᕐᓱᑎᒃ ᓱᓇᓕᒫᓂᒃ ᐅᑯᐊ ᐱᖃᓯᐅᑎᓪᓗᒋᑦ, ᒫᓐᓇᕋᑖᖑᓚᐅᕐᑐᖅ, ᐅᖓᑖᓄᑦ 2 ᑕᐅᓴᓐ ᓕᑐᕐᔅ ᐅᕐᓱᒃᓴᖓ ᑎᒻᒥᔫᑦ. ᐅᐊᑲᓪᓚᖔᒃ, ᐊᖏᔪᒻᒪᕆᐊᓗᒃ! ᐊᓯᐅᓪᓗᑎᒃ.”

ᓴᒧ ᐃᒃᓯᕙᓪᓗᓂ ᑖᕐᑎᓪᓗᒍ, ᑐᓴᕐᓴᐅᒻᒪᕆᓕᕐᑐᖅ ᑎᓪᓕᑦᑖᕐᓂᖓ ᓲᕐᓗ ᐊᓇᐅᓪᓕᒐᕐᑎᑐᑦ ᓂᐊᖁᐊᓂ. ᓄᔭᕐᒥᓂᒃ ᐃᓪᓚᐃᕆᐊᕐᑐᖅ ᐊᒡᒐᒥᓄᑦ.

“ᕿᒪᐃᒍᓐᓇᖏᓐᓇᑦᑕ ᐊᑦᑕᓇᕐᑐᓂᒃ ᓄᓇᒧᑦ ᐃᓱᒪᕐᓱᑐᐃᓐᓇᕐᓂᒃᑯᑦ ᐱᔪᓐᓇᐅᑎᖃᐅᓪᓗᑕ, ᓴᒧᕐ! ᖃᓄᖅ ᐃᓱᒪᓐᓂᕋᕕᑦ? ᐱᓕᕆᐊᒃᓴᖃᕐᑎᑕᐅᒐᑦᑕ ᓴᐳᒻᒥᓂᕐᒥᒃ ᓄᓇᒥᒃ, ᑐᖁᓐᓇᕐᑐᓕᕆᕕᒋᖏᓪᓗᒍ!”

“ᐆᑭ, ᐋ…” ᕿᒪᐃᖅᑲᐅᔪᖅ ᐃᓪᓗᐊᕈᓯᒥᓂᒃ ᑖᕐᑎᓪᓗᒍ ᐊᒻᒪ ᓇᖏᕐᓱᓂ ᐅᓪᓛᒃᑯᑦ ᖃᐅᒪᑎᓪᓗᒍ ᐴᓛᕐᕕᖓ, ᐅᑎᕐᑕᑲᑕᑦᑐᖅ ᓯᓂᐅᑎᒥᓂ. “ᓛᓚᒋᑦ, ᓇᓂᒍᓐᓇᖅᑰᕋᑦᑎᒍ ᐅᕐᓱᐊᓗᖃᐅᑏᑦ ᐊᓄᕆᒧᑦ ᑎᑦᑕᐅᓚᐅᕐᑎᓐᓇᒋᑦ. ᓱᓕ ᐃᓗᓕᖃᕐᐸᑕ ᒑᓯᒥᒃ ᓴᓗᐊᑐᐃᓐᓇᕐᓂᖏᑉᐸᑦ ᐱᓇᓱᐊᕈᓯᐅᓯᒪᓕᕐᑐᓂ.”

“ᐄᖃᐃ? ᑕᒃᑰᒃ, ᐳᕋᐃᐊᓐ ᓚᑯᕐᑕᓐ ᒥᓚᐅᕐᑐᖅ ᖃᖓᑕᓱᒃᑯᑦ ᐊᔾᔭᕐᓯᓪᓗᓂ ᓂᐅᕐᕈᔨᓂᒃ ᐊᒻᒪ ᐃᓄᓐᓂᒃ ᑕᓯᐅᕐᑎᓂᒃ ᐊᒻᒪ ᐅᕐᓯᑲᓐᓂᕆᐊᖃᕐᑐᕆᒪᐅᕋᑦᑕ AvGas,ᑯᓐᓂ ᓂᐅᕕᐊᕕᓂᐊᓂ…ᑕᐃᑲᓐᖓᑦ. ᐃᓄᐃᑦ ᖃᐅᔨᒪᔪᑦ, ᓴᒧᕐ. ᐅᖄᓚᐅᑎᒐ ᓄᖅᑲᕈᓐᓇᐃᓪᓕᔪᖅ.”

“ᐊᐃᑦᑖ, ᐊᐃᑦᑖ.” ᓂᐅᕆᐊᕐᑐᖅ ᓲᕐᓗ ᐆᓇᕐᑐᒥᒃ ᖃᓗᕐᒥᒃ ᓂᓪᓕᑎᕆᔪᖅ. ᓚᑯᕐᒪᓐ ᖃᖓᑕᔫᖏᑦ. ᓱᓕᔪᖅ. ᓂᐊᖁᕐᒥᓂᒃ ᐊᑦᑐᐃᑲᑕᓕᕐᑐᖅ ᐊᒡᒐᖏᓪᓗ ᐊᐅᓚᓪᓗᑎᒃ. ᐃᓱᒪᔪᖓ, ᐃᓱᒪᔪᖓ.

“ᑲᑎᒪᓛᕐᑐᒍᑦ ᒥᓂᔅᑕᐅᑉ ᐊᓪᓚᕕᐊᓂ, 8,ᒥ ᐅᓪᓛᒃᑯᑦ.” ᐅᖃᕐᑐᖅ. “ᐅᒃᐱᕆᓚᐅᕐᐸᒋᑦ, ᓴᒧᕐ. ᓱᓕᕗᖓ ᐅᒃᐱᕆᓚᐅᕐᐸᒋᑦ.” ᓂᕕᓐᖓᕐᓱᓂᐅᒃ ᐅᖄᓚᐅᑎ.

ᐅᖄᓚᐅᑎᖓ ᐅᕐᓱᕈᒻᒪᕆᑦᑐᖅ ᐊᐅᒃᑲᓂᖓᓂᐊᓄᑦ. ᐅᑎᕐᓱᓂ ᓯᓂᕝᕕᒥᓄᑦ ᕿᓂᓕᕐᑐᖅ ᑲᒥᓪᓛᕈᑎᒥᓂᒃ ᓂᕆᕕᒻᒧᐊᓕᕐᓱᓂᓗ. ᐃᔭᓗᐃᑦ ᐱᕆᓐᓂᐊᓂᑦ ᓂᕕᖓᐅᕐᓱᑎᒃ ᐅᓯᖓᓯᖓᓂᑦ ᕿᓪᓕᒻᒪᕆᓕᕐᑐᑦ ᐊᓯᕙᐅᑉ ᐅᓪᓗᖓᑎᑐᑦ ᐊᒻᒪ ᐊᐅᓚᓪᓗᑎᒃ, ᐱᓱᓐᓂᐊᓄᑦ ᓇᓗᓇᕋᑎᒃ ᓇᒧᓕᒫᖅ. ᐃᖏᑦᑐᖅ, ᖁᕝᕕᐅᓕᕐᑐᖅ ᐋᓐᓂᓗᐊᒧᑦ ᐊᒻᒪ ᑲᓐᖑᓱᒧᑦ. ᐊᓂᕐᓵᕆᐊᓚᐅᕐᓱᓂ ᒪᒥᐊᓐᓂᕐᒧᑦ ᐃᒻᒥᓂᒃ ᑭᖑᓪᓕᕐᐹᒥ ᐊᒻᒪ ᑎᓕᐅᖔᓯᔪᖅ.

ᑏᑐᕐᓂᐊᕐᑕᖓ ᐊᑐᐃᓐᓇᕈᕐᒪᑦ, ᓇᖏᓕᕐᑐᖅ ᐃᒐᓛᑉ ᓵᖓᓂ ᐊᒻᒪ ᑕᑯᓐᓇᓕᕐᓱᓂ ᓯᓚᒧᑦ. ᑐᓗᒐᐃᑦ ᐊᒻᒪ ᓇᐅᔮᑦ ᑎᒻᒥᐊᑲᑕᑦᑐᑦ ᐊᕐᓵᕋᓚᐅᑎᔪᑦ ᑭᓱᒥᒃᑭᐊᖅ ᐊᖅᑯᑎᒥ. ᓴᐅᓂᕕᓂᐅᖅᑰᔨᔪᒥᒃ ᓂᕿᓕᒻᒪᕆᐅᓪᓗᓂ. ᐃᓴᕈᒥᒍᑦ ᐹᔪᑦ. ᑐᓵᓪᓗᓂᒋᓪᓗ ᖁᖁᐊᕐᑑᔮᕐᑐᑦ ᓂᒋᖏᑦ ᐊᓪᓛᑦ ᐊᓕᒍᒃᑯᑦ ᑐᓴᕐᓴᐃᑦ. ᐃᖃᓗᐃᑦ ᐃᒪᖓ ᓯᐊᕐᓇᖅ ᑕᐅᑦᑐᖓ ᓯᕿᓐᓂᕐᑎᓪᓗᒍ ᓇᕿᑦᑐᒥᒃ ᑕᑯᓪᓗᒍ ᑕᕐᕋᕐᑑᑎ ᓲᕐᓗ ᒥᓛᕐᓯᒪᔪᖅ. ᓯᕿᓐᓯᑦᐊᕐᑐᖅ ᑕᐅᕗᖓᓕᒫᖅ ᐊᐅᔭᒥ. ᐃᔨᕐᕕᒃᓴᖃᖏᑦᑐᖅ. ᑭᓯᐊᓂ ᐃᒻᒪᖄ ….ᓱᕋᑦᑎᕐᓯᒪᔪᑦ ᕿᒪᑯᐃᑦ ᐅᖓᑖᓂ.

*****

ᓴᒧᑦ ᑭᖑᓪᓕᕐᐸᐅᓚᐅᕐᑐᖅ ᐃᑎᕐᓱᓂ ᑲᑎᒪᓂᕐᒧᑦ. ᕆᔨᓄᓪ ᑐᓂᓪᓗᓂᐅᒃ ᓂᕿᓂᒃ. ᒥᓂᔅᑕᐅᑉ ᑕᑯᓴᖏᑕᖓ ᐃᔨᒃᑯᑦ. ᑕᑯᓐᓇᕐᓱᓂ ᐊᑭᓐᓴᒧᑦ ᐊᒻᒪ ᐃᒐᓛᒧᑦ ᓯᓚᓗᒋᐊᓕᕐᑎᓪᓗᒍ. ᑳᐱᑐᕐᓱᓂ ᐊᒻᒪ ᑎᒍᒥᐊᕐᓱᓂ ᑎᑎᖅᑲᓂᒃ. ᐹᑎ ᐸᕝᕕᓇᕿᓪᓗᓂ ᐊᒻᒪ ᐅᖃᓕᒪᖃᑎᓕᒃ ᑐᓴᒐᒃᓴᓂᐊᕐᑎᓂᒃ. ᑎᕙᓂ ᖃᐃᓯᒪᖃᑕᐅᓪᓗᓂ ᐱᖃᑎᖃᕐᓱᓂ ᐊᖓᔪᖅᑳᒥᓂᒃ, ᒧᕇ-ᔫᓯ, ᓄᔭᖏᑦ ᒧᓯᒪᓪᓗᑎᒃ ᑐᑭᖃᖏᑦᑐᑦ ᐊᒻᒪ ᑯᑭᖏᑦ ᖃᓂᐊᓗ ᐊᐅᐸᓪᓚᕆᑦᓴᕐᓯᒪᕕᑦᔪᐊᕐᓱᑎᒃ ᐊᐅᐸᕐᑐᒻᒪᕆᐊᓗᒻᒥᒃ. ᕆᔨᓄᓪ ᐊᑐᕐᓱᓂ ᑲᔪᕈᔪᒻᒥᒃ ᓯᓛᕐᓯᒪᔪᒥᒃ ᐅᕕᓂᕈᕐᒥᒃ ᐊᒻᒪ ᐃᔨᖏᑦ ᒥᑭᔪᒍᓘᓪᓗᑎᒃ ᐊᒻᒪ ᑕᖃᓯᒪᒧᑦ ᐃᒧᓪᓘᒃ, ᓲᕐᓗ ᐊᓕᕙᑎᑐᑦ. ᖁᐃᕐᓱᕆᐊᕐᑐᑦ 8ᒧᐊᑐᐊᕐᒪᑕ.

“ᖁᔭᓐᓇᒦᒃ ᑕᒪᑦᓯ ᖃᐃᒐᑦᓯ.” ᐅᐃᕐᓱᕐᑐᖅ, ᓂᐱᖅᑯᕐᑐᒋᐊᓪᓚᑦᓱᓂ ᐊᒻᒪ ᐊᑯᓂᐅᓂᕐᓴᐅᓪᓗᓂ, ᐊᒻᒪ ᑭᖑᓂᐊᒍᑦ ᐅᖃᐅᓯᖃᓕᕐᑐᖅ ᐅᕐᓱᐊᓗᒻᒥᒃ ᕿᒪᑯᒥᒃ ᓂᐅᕆᐊᕐᑐᒻᒪᕆᐅᓪᓗᓂ, ᓱᕐᓗ ᒪᔪᕋᕐᑐᑐᑦ ᖃᖅᑳᒧᑦ ᑭᖏᓐᓂᕐᐹᒧᑦ. “ᑲᒪᒋᓂᐊᕐᑕᕗᑦ, ᑐᓴᒐᒃᓴᕐᓂᒃᑰᕐᓂᐊᕐᑐᖅ ᐅᓪᓗᕈᒥᑕᕐᓇᓕᕐᐸᑦ – ᓴᐃᓈᕐᓗᒋᑦ, ᓱᓕ ᐅᖃᐅᓯᒃᓴᐃᑦ, ᔭᑕ, ᔭᑕ. ᐱᕕᒃᓴᖃᕐᑎᑕᐅᓂᐊᕋᑦᑕ. ᓴᒧᕐ?”

ᓂᐊᖁᖁᖓ ᐊᐅᓚᑲᑕᓕᕐᑐᖅ. ᓴᒧᕐ ᐸᑕᐅᔮᓕᕐᑐᖅ ᓂᐊᖂᔭᒥ ᐊᓪᓚᐃᑦ ᓂᕆᑎᓪᓗᒋᑦ: ᑭᓱᓕᒫᖏᓐᓂᒃ ᑐᒃᓯᕋᕐᑐᑎᑐᑦ. ᑐᓄᓂ ᒪᑭᒋᐊᕐᓱᒍ, ᖁᖓᓯᓂ ᑯᒥᓕᕐᑕᖓ ᐊᒻᒪ ᓴᓪᓗᒋᐊᓯᓪᓗᓂ ᐊᑦᓚ ᓵᑦᑕᖓ. ᓂᐱᖃᖏᑦᓴᐅᑎᒋᔪᖅ ᓲᕐᓗ ᒪᑐᑎᑐᑦ ᒪᑐᔪᑎᑐᑦ ᐊᒻᒪ ᐊᒡᒐᖏᑦ ᐊᐅᒃᑲᓂᖓᓯᓪᓗᑎᒃ. ᐃᒥᕐᓂᐊᕐᑕᒥᓂᒃ ᑯᕕᓯᓪᓗᓂ ᐃᒪᖃᐅᑎᒧᑦ ᐊᒻᒪ ᐃᒥᓕᕐᑕᖓ. ᑕᐃᒪᓗ ᓄᑮᕐᓂᐅᓴᔫᔮᓯᑳᓪᓚᑦᑐᖅ, ᓲᕐᓗ ᑖᕐᑐᒥ ᐊᒻᒪ ᓴᓗᐊᓕᕐᓱᓂ ᐃᒪᕐᒥᒃ. ᓂᓐᖓᐅᒪᒧᖃᐃ. ᑳᒧᓪᓗᑭᐊᖅ.

ᐊᑭᒋᐊᕐᓂᖅ. ᑐᑭᓯᐊᔭᐅᖏᑦᓯᐊᕋᒥ. ᑭᓇᒥᒃ ᓯᓚᐃᕐᔨᔪᖅ? ᐊᖓᔪᖅᑳᒥᓄᑦ ᐊᑎᕐᑕᐅᒋᐊᓕᕕᓂᐅᒐᓗᐊᖅ ᐅᑭᐊᒃᓵᒥᒃ ᕙᓪ.

“ᒪᒥᐊᑉᐳᖓ,” ᐅᖃᕐᓱᓂ, ᐅᖃᕐᓱᓂᓗ ᐋᑦᓚᒧᑦ. “ᐱᔪᓐᓴᐅᑎᖃᓚᐅᖏᓐᓇᒪ. ᐃᓱᐃᓪᓕᑎᕆᕗᖓ.” ᐋᑦᓚ ᓯᑯᖏᓕᕐᑐᖅ ᓂᐊᖁᒥᒍᑦ ᐊᒃᑳᕐᓱᓂ.

“ᑭᓯᐊᓂ ᐊᑐᕆᐊᖃᕐᑕᓕᒫᕗᑦ ᐱᔪᓐᓇᐅᑎᖃᕈᑕᐅᔭᕆᐊᓖᑦ! ᑕᒪᓐᓇ ᑐᑭᓯᐊᖏᓐᓴᕕᐅᒃ ᓱᓕ,” ᕆᔨᓄᓪ ᓂᓪᓕᕐᑐᖅ, ᐊᐅᐸᓪᓕᕐᓱᓂᓗ.

“ᖃᖓᑕᓲᖅ Blue Sky ᐊᐱᕆᒻᒪᑕ ᐅᕐᓱᐊᓗᖃᕆᐊᖃᓂᕐᒥᒃ, ᑲᒪᒋᔭᖃᓚᐅᕋᒪ ᓇᔾᔪᓂᒃ ᒪᓕᒐᕐᓂᒃ ᓱᕋᐃᒍᑎᓂᒃ ᐊᒻᒪ …”

“ᐊᐃᕕᕐᒧᑦ? ᓇᓃᓐᓂᕋᕕᓪᓕ ᐱᔾᔪᑕᐅᑎᓪᓗᒋᑦ?” ᕆᔨᓄᓪ ᐊᐱᕆᔪᖅ.

“ᐱᐊᓂ ᐊᐅᓪᓚᕐᓯᒪᓚᐅᕐᒪᑦ. ᑕᓐᑲᓐ ᑲᓂᒪᓪᓗᓂ. ᑲᒪᒋᔭᖃᕆᐊᖃᓚᐅᕋᕕᑦ ᑮᓇᐅᔭᐃᑦ ᐸᕐᓇᒃᑕᐅᓂᖏᓐᓂᒃ.”

“ᓱᓕᔪᑎᑦ,” ᑎᕙᓂ ᐅᖃᕐᑐᖅ. “ᑎᒍᓚᓂᖅ ᐃᔨᕋᕐᑐᕐᓱᑎᒃ. ᐊᒻᒪ ᐅᖃᐅᓯᖃᕆᐊᖃᓂᖅ ᖄᕐᑎᑦᓯᖃᑦᑕᕐᓂᕐᒥᒃ ᓴᖅᑭᓚᐅᕐᒪᑕ…ᐱᓇᓱᐊᕈᓯᓗᓚᐅᕋᑦᑕ.”

“ᖃᓄᕐᓕ ᐅᖃᐅᑎᓐᓂᕋᕕᒋᑦ ᖃᖓᑕᓲᓖᑦ Blue Sky,ᒥᒃ?” ᕆᔨᓄᓪ ᐊᐱᕆᔪᖅ.

“ᐅᖃᐅᑎᓚᐅᕐᑕᒃᑲ ᐅᕐᓱᐊᓗᒻᒥᒃ ᓴᓂᕐᕙᐃᖁᓪᓗᒋᑦ ᐊᒻᒪ ᓇᓂᓯᖁᓪᓗᒋᑦ ᓂᐅᕕᕈᓐᓇᕐᑐᒥᒃ.”

“ᐊᑎᓕᐅᕈᑎᒋᓚᐅᕐᐱᐅᒃ?”

ᑕᑯᓐᓇᕐᓱᓂ ᐊᒡᒐᒥᓂᒃ, ᒪᑭᑎᒋᐊᕐᑕᖓ ᑕᓪᓗᓂ, ᐋᒃᑳᕐᓱᓂᓗ.

ᑐᑭᖃᖏᑦᑐᖅ. ᐱᓕᕆᑦᓯᐊᕿᖏᑦᑐᖅ. ᑕᐃᒫᒃ ᐊᑲᐅᓂᕐᓴᖅ ᑕᐃᓗᒍ.

“ᐆ….ᑮ,” ᕆᔨᓄᓪ ᐅᖃᕐᑐᖅ, ᓂᐊᖁᒥᒍᓪᓗ ᐊᒃᑳᕐᓱᓂ ᓲᕐᓗ ᐃᖅᑲᕐᑐᐃᔨᑎᑐᑦ ᒪᒃᑯᑦᑐᒧᑦ ᐅᖃᓕᒪᔪᑦ. “ᑎᕙᓂ, ᑎᑎᕋᕐᓂᐊᕐᐳᑎᑦ ᑐᓴᒐᒃᓴᓂᓐᓂᐊᕐᑐᒥᒃ ᐅᖃᐅᓯᖃᕐᑐᓂᒃ ᒪᓕᒐᕐᓂᒃ ᓱᕋᐃᓂᕐᒥᒃ. ᐅᖃᓗᑎᑦ ᑕᒪᓐᓇ ᐱᒻᒪᕆᐅᑎᒃᑲᑦᑎᒍ, ᖃᐅᔨᓴᕋᑦᑎᒍᓗ ᖃᓄᐃᓕᓂᕕᓂᖏᑦ, ᐊᖅᑭᑦᓱᐃᓂᕐᓴᐅᓗᑕᓗ ᒪᓕᒐᕐᓂᒃ ᐊᑐᕐᑕᐅᔪᓂᒃ, ᓱᓕ, ᓱᓕ.”

ᐹᑎ ᓂᐱᖃᕈᓐᓇᐃᕐᑐᖅ. “ᑕᓐᑲᓐ ᓱᓕ ᐃᖅᑲᓇᐃᔭᓚᐅᕐᓯᒪᕙ ᑕᒫᓂ, ᐄᓚᒃ? ᖃᐅᔨᒪᑦᓯᐊᕋᑦᓯ ᑕᒪᑐᒪᖓ ᑲᒪᖃᑕᐅᓐᓂᖏᑦᑐᖅ?” ᑕᑯᓴᕐᑐᖅ ᓴᒧᕐᒧᑦ. “ᐅᑭᐊᒃᓴᒧᐊᖓᔪᕐᓂᐊᓂᐊᕈᑦᑕ, ᐸᓯᒍᓐᓇᕐᑕᓄᑦ.”

“ᐋᒃᑲ,” ᐅᖃᕐᑐᖅ ᓴᒧᕐ, ᖁᕕᐊᓱᖏᕋᑖᖅᑲᐅᓪᓗᓂ, ᐊᑯᓂᐅᖏᑦᑐᖅ, ᐊᑐᕐᓂᐅᔭᑦᓯᐊᓕᕐᑐᖅ ᐃᓱᒪᒋᓯᒪᔭᓂᒃ ᑭᓯᐊᓂ ᐱᓐᖏᖑᐊᕐᑐᖅ. “ᑕᒪᓐᓇ ᐅᕙᓐᓂᖔᕐᑐᖅ.”

“ᐸᕕᓴᑦᑕᐅᒋᐊᖃᕋᑦᑕ,” ᕆᔨᓄᓪ ᐅᖃᕐᑐᖅ. “ᓇᓄᐃᑦ … ᓱᓇᖃᕐᐸ?”

“ᐃᒫ,” ᑎᕕᓂ ᐅᖃᕐᑐᖅ, ᐅᖄᓚᐅᑎᒃᑯᑦ, “ᑲᑎᒪᕐᔪᐊᕐᓂᐊ ᔪᓇᐃᑎᑦ ᓇᐃᓴᓐᒥ ᑕᖅᑭᐅᓚᕐᑐᒥ ᓂᐅᔪᐊᒃᒥ. ᒥᓂᔅᑕᒋᔭᕗᑦ ᐱᖃᑎᖃᓛᕐᑐᖅ ᑎᓕᔭᐅᓯᒪᔪᒥᒃ. ᑲᒪᒋᒋᐊᓪᓚᒍᓐᓇᕋᔭᕋᑦᑎᒍ ᑲᒪᒋᒪᐅᕐᓯᒪᔭᕗᑦ ᐆᒪᔪᑦ ᐊᒥᐊᓕᑲᒥ.” ᐅᖃᐅᓯᖃᕐᓱᓂ ᐅᖃᓚᐅᑎᒃᑯᑦ ᐊᒻᒪ ᑳᐱᑐᕐᓱᓂ ᐃᓪᓗᐊᒍᑦ. ᐱᓯᑎ.

“ᐱᖕᑰ!” ᕆᔨᓄᓪ ᐅᖃᖅᑐᖅ. “ᒥᓂᔅᑕ ᒥᓂᔅᑐᕐ, ᑎᑎᕋᕆᐊᖃᖅᐱᑕ ᐅᖃᐅᓯᒃᓴᖏᓐᓂᒃ ᓇᓄᐃᑦ ᒥᒃᓵᓄᑦ ᐃᒃᐱᒋᔭᖃᓗᑕ ᐃᓄᐃᑦ ᖃᐅᔨᒪᔭᑐᖃᖏᓐᓂᒃ ᐊᒻᒪ ᐃᓄᐃᑦ ᐆᒪᔪᕐᓯᐅᕈᓐᓇᕐᓂᕐᒧᑦ ᐱᔪᓐᓇᐅᑎᖏᓐᓂᒃ?”

ᐋᑦᓚ ᖃᓂᕐᒥᓂᒃ ᑭᒻᒥᑦᓱᓂ, ᐃᓱᒪᓕᕐᑐᖅ. “ᐆᑭ,” ᐅᖃᕐᑐᖅ.

“ᐊᑲᐅᔪᒻᒪᕆᐊᓗᒃ. ᓴᒧᕐ, ᑲᑎᑎᓪᓗᒋᑦ ᐃᖅᑲᓇᐃᔭᖃᑎᑎᑦ ᕿᓂᕐᓂᐊᕐᒪᑕ ᐅᕐᓱᐊᓗᖃᐅᑎᓂᒃ. ᐃᖅᑲᓇᐃᔭᕐᑎᑦᓯᓗᑎᒃ ᓄᓇᓕᓐᓂᖓᕐᑐᓂᒃ, ᐊᑏ. ᐊᓯᐊᓘ?” ᐊᑦᓚ ᖁᐃᕐᓱᕐᑐᖅ ᐊᒻᒪ ᑕᑯᓴᕐᑕᐅᓕᕐᑐᖅ ᑕᒪᐃᓐᓄᑦ.

“ᓯᐊᕉᑎᓪᓗᒍ ᓱᕈᓯᑯᓘᓪᓗᖓ,” ᐅᖃᕐᑐᖅ, “ᐅᕙᖓᓗ ᐃᓚᓐᓇᕆᔭᕋᓗ ᐊᑐᓚᐅᕐᓯᒪᒐᓐᓄᑦ ᐊᑖᑕᒪ ᐅᒥᐊᖓᓂᒃ ᐊᐱᕆᖅᑳᓚᐅᕐᓇᓄᒃ. ᐅᑎᓚᐅᕐᓯᒪᒧᒍᒃ ᐃᖃᓗᑦᑐᐊᓗᓪᓗᓄᒃ ᐊᒥᓱᓂᒃ ᐊᒻᒪ ᐊᒥᓱᑦ ᖁᕕᐊᓱᓚᐅᕐᓯᒪᔪᑦ ᐅᐱᒍᓱᑦᑎᓪᓗ, ᑭᓯᐊᓂ ᐅᒥᐊᖅ ᓴᕐᕙᐅᓚᐅᕐᓯᒪᒻᒪᑦ ᐃᐱᑦᓯᐊᕐᓂᖏᓐᓇᑦᑎᒍ ᐊᒻᒪ ᐊᐳᓚᐅᕐᓯᒪᔪᖅ ᐅᔭᕋᓐᓄᑦ ᐃᑭᒪᑎᓪᓗᑕᓗ.” ᐊᑦᓚ ᑎᒃᑯᐊᕐᓯᔪᖅ ᐊᒻᒪ ᖁᖓᑦᓱᓂ ᑕᐋᑦᓚ ᓂᐸᐃᑲᐃᓐᓇᕐᑐᖅ. ᒧᕆ-ᔫᓯ ᑕᑯᓐᓇᕐᓕᕐᑐᖅ ᑯᑭᒥᓂᒃ. ᐹᑎᓗ ᑕᑯᓐᓇᕐᓱᓂ ᐅᖄᓚᐅᒻᒥᒃ. ᕆᔨᓄᓪ ᓂᓪᓕᕐᑐᖅ, ᑭᓯᐊᓂ ᐋᑦᓚ ᐃᓴᑦᓱᓂ ᖁᖓᑦᑐᖅ ᑐᑭᓯᑎᑦᓯᒍᑎᒥᓂᒃ ᑕᒪᑐᒪ ᑲᒪᒋᔭᐅᓯᒪᖏᓐᓂᐊᓂᒃ.

“ᐊᑖᑕᒐ ᖃᓄᐃᒃᓴᓚᐅᖏᑦᑐᖅ ᑭᓇ ᐸᓯᔭᒃᓴᐅᖓᓗᐊᕐᒪᖔᑦ. ᑭᓯᐊᓂ ᑲᑕᖓᑲᐃᓐᓇᓚᐅᕐᑐᖅ ᐅᒥᐊᖓ ᓱᕋᑦᑎᕐᒪᑦ ᐱᔾᔪᑎᒋᓪᓗᒍ ᐱᒻᒪᕆᐅᒻᒪᑦ ᐃᓚᒌᓕᒫᓄᑦ. ᐃᑲᕐᕋᒐᓵᓗᓐᓂ ᐋᖅᑭᒃᓱᕐᐸᓚᐅᕋᑦᑎᒍ ᐊᐅᔭᒥ. ᐱᔭᕇᕋᓗᐊᕐᑎᓪᓗᒍ, ᕿᓚᒍᑎᓚᒍᑎᓚᐅᕐᓯᒪᔮᖓ ᓈᒻᒪᑦᑐᒥᒃ ᐊᒻᒪ ᐊᐱᕆᓪᓗᓂᖓ ᓇᑭᐊᓗᒃ ᐃᖃᓗᓐᓂᕐᒪᖔᒪ.”

ᓴᒧᕐ ᐃᖅᑲᓇᐃᔭᖃᑎᖏᑦ ᓂᓪᓕᐊᓇᑎᒃ ᐊᑳᕐᑐᑦ, ᐃᒃᓯᕙᑦᓯᐊᕐᓱᑎᒃ, ᐊᓂᒍᒪᓕᕐᑐᑦ. ᐊᑦᒪ ᑕᑯᓴᕐᓱᓂ ᓴᒧᕐᒧᑦ ᐊᒻᒪ ᑕᑯᓐᓇᑲᐃᓐᓇᕐᑕᖓ ᓂᐱᖃᕋᓂ ᐊᑯᓂᐅᖏᑦᑐᖅ. ᐃᓱᒫᓗᒍᓐᓇᐃᕐᑐᖅ ᐲᕐᒪᑦ ᓱᕐᓗ ᐊᓄᕆᑐᑦ. ᐋᑦᓚ ᖁᔭᓕᓪᓗᓂ ᖃᐃᔪᓂᒃ, ᓇᖏᓚᐅᕐᓱᓂ ᐊᓂᔪᖅ. ᑕᐃᓐᓄᑦ ᒪᓕᑦᑕᐅᓪᓗᓂ ᑭᓯᐊᓂ ᒪᓕᓐᓇᓂ ᓴᒧᑦ, ᑕᑯᓐᓇᐅᔭᓕᓱᓂ ᓯᓚᓗᑦᑐᒥ ᐃᓄᑐᐊᖅ. ᐊᑯᓂᐅᖏᑦᑐᖅ ᖃᓐᓂᓛᓕᕐᒥᔪᖅ, ᐃᓱᒪᓕᕐᑐᖅ. ᑲᖏᕐᓱᖅ ᓯᑯᓂᒫᕐᑐᖅ ᐊᒻᒪ ᑖᕐᓯᓗᓂ. ᓴᒧᕐ ᐅᑎᓛᕐᒥᔪᖅ.

ᐅᑯᐊ ᐅᖃᓕᒫᒐᒃᓴᑦ ᑲᔪᓯᒍᓐᓇᕐᑎᑕᐅᓯᒪᔪᑦ ᐃᑲᔪᕐᑎᒋᓪᓗᒋᑦ ᑲᓇᑕᒥ ᑲᑎᒪᔨᓄᑦ ᑎᑎᕋᐅᔭᕐᓂᕐᒧᑦ ᐊᒻᒪ ᐸᒥ ᑎᑎᕋᐅᔭᕐᕕᒧᑦ ᓴᓇᖑᕐᑐᓕᕆᓂᕐᒧᑦ.

Share This Story

(0) Comments

Join the Conversation

Your email address will not be published. Required fields are marked *

*