ᒋᐅᓪ ᒪᕐᕈᓕᐊᑦ, ᐊᓈᓇᖓ ᓵᙵᕗᑦ ᐱᕋᔭᖕᓂᒃᑯᑦ ᓯᓚᐃᕐᕆᓂᐅᔪᒥ ᐃᖅᑲᖅᑐᖅᑕᐅᓂᕐᒥ

For English version, see Gill sisters, mother face fraud charges

ᐱᕋᔭᖕᓂᕐᒧᑦ ᐃᖅᑲᖅᑐᒐᒃᓴᐅᓂᖏᓐᓂ ᐅᑯᓄᖓ ᐱᖓᓱᓄᑦ ᐋᓐᑎᐊᕆᐅᒥᐅᑕᓄᑦ ᐊᕐᓇᓄᑦ ᐱᕋᔭᖕᓂᒃᑯᑦ ᑮᓇᐅᔭᖅᑖᕐᓂᕐᒥ ᒪᕐᕉᖕᓂ ᐃᓄᖕᓄᑦ ᑲᑐᔾᔨᖃᑎᒌᖑᔪᓄᑦ ᑎᑭᓚᐅᖅᐳᖅ ᑐᙵᓇᖅᑐᒥ ᑐᓴᒐᒃᓴᐅᓂᖓᓂ ᐃᖃᓗᖕᓂ ᐊᖑᑎᒧᑦ ᐃᓚᖏᑦ ᐃᓚᓕᐅᔾᔭᐅᑎᓪᓗᒋᑦ ᐊᑲᐅᙱᓕᐅᕈᑕᐅᔪᒧᑦ.

ᒪᕐᕈᓕᐊᑦ ᐊᒥᐅᕋ ᒋᐅᓪ ᐊᒻᒪ ᓇᑦᔭ ᒋᐅᓪ, 25, ᐊᒻᒪ ᐊᓈᓇᖓ ᑲᕆᒪ ᒪᓐᔨ, ᐊᑐᓂ ᐃᖅᑲᖅᑐᒐᒃᓴᐅᓕᖅᐳᑦ ᒪᕐᕉᖕᓂ ᐱᕋᔭᖕᓂᒃᑯᑦ ᓯᓚᐃᕐᕆᓂᐅᔪᒥ $5,000 ᐅᖓᑖᓄᑦ, ᑲᓇᑕᒥ ᐸᓖᓯᒃᑯᑦ ᐅᖃᓚᐅᖅᐳᖅ ᑐᓴᒐᒃᓴᓕᐊᖑᔪᒥ ᑐᓂᔭᐅᔪᒥ ᓯᑎᐱᕆ 21−ᒥ.

ᐸᓖᓯᒃᑯᑦ ᐅᖃᓚᐅᖅᐳᖅ ᕿᑎᐊᓂ ᐅᒃᑐᐱᕆ 2016−ᒥ ᐊᒻᒪ ᓯᑎᐱᕆ 2022−ᒧᑦ, ᐊᕐᓇᐃᑦ ᑐᒃᓯᕋᓚᐅᖅᐳᑦ ᐊᒻᒪ ᐱᓪᓗᑎᒃ ᐃᓄᖕᓄᑦ ᐱᔪᓐᓇᕐᓂᑖᖅᑎᑕᐅᓯᒪᔪᓄᑦ ᖃᓄᐃᓕᖓᓂᐅᔪᒥ ᑎᒍᐊᖅᑕᐅᓯᒪᓂᕋᖅᖢᑎᒃ ᐃᓅᓪᓗᑎᒃ ᓱᕈᓯᐅᓂᖏᓐᓂ, ᐅᕘᓇ ᓄᓇᕗᒻᒥ ᑐᙵᕕᒃᑯᓐᓄᑦ.

ᓄᓇᕗᒻᒥ ᑐᙵᕕᒃᑯᑦ ᑲᑐᔾᔨᖃᑎᒌᖑᕗᑦ ᑲᒪᒋᔭᖃᖅᑐᒥ ᓇᓗᓇᐃᖅᓯᓂᕐᒥ ᓱᓕᓂᕆᕋᕈᑎᑦ ᓴᓇᓯᒪᔪᓂ ᐃᓄᖕᓄᑦ ᐅᕘᓇ ᓄᓇᕗᒻᒥ ᐊᖏᕈᑕᐅᔪᒥ ᐱᓕᕆᐊᖑᓂᖏᓐᓂ.

ᐅᖃᐅᓯᐅᓪᓗᓂ ᑲᓇᑕᒥ ᐸᓖᓯᒃᑯᓐᓄᑦ, ᐊᕐᓇᐃᑦ ᐊᑐᓚᐅᖅᐳᑦ ᖃᓄᐃᓕᖓᓂᐅᔪᒥ ᐱᕋᔭᖕᓂᒃᑯᑦ ᑮᓇᐅᔭᖅᑖᕐᓂᕐᒥ ᑲᑭᕙᒃ ᑲᑐᔾᔨᖃᑎᒌᖑᔪᓂᑦ ᐊᒻᒪᓗ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖑᔪᓂᑦ ᑮᓇᐅᔭᖃᖅᑎᑕᐅᓂᐅᔪᒥ ᐊᑐᐃᓐᓇᐅᑐᐃᓐᓇᖅᑐᓄᑦ ᐃᓄᖕᓄᑦ ᐱᔪᓐᓇᕐᓂᖅᑖᖅᑎᑕᐅᓯᒪᔪᓄᑦ ᐱᓂᕐᒧᑦ ᑐᓂᕐᕈᓯᐊᓂ ᐊᒻᒪ ᐊᑭᖃᙱᑦᑐᒥᒃ ᐃᓕᓐᓂᐊᕆᐊᒃᑲᓐᓂᕈᓯᐊᖏᑦ ᐊᔪᙱᓛᖑᓂᐊᒍᑦ ᐱᓪᓗᒍ.

ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖑᔪᓄᑦ ᐊᑕᐅᓯᐅᕗᖅ ᐱᖓᓱᓂ ᐊᕕᒃᑐᖅᓯᒪᓂᐅᔪᓂ ᐃᓄᖕᓄᑦ ᑲᑐᔾᔨᖃᑎᒌᖑᔪᓂ ᓄᓇᕗᒻᒥ. ᑲᑭᕙᒃᑯᑦ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖑᔪᑦ ᐃᓕᓐᓂᐊᖅᑎᓄᑦ ᑮᓇᐅᔭᓄᑦ ᐃᑲᔪᖅᓱᐃᕕᐅᕗᖅ ᐱᓕᕆᕝᕕᐅᓪᓗᓂ.

ᑲᓇᑕᒥ ᐸᓖᓯᒃᑯᑦ ᐱᒋᐊᖅᑎᑦᑎᓚᐅᖅᐳᑦ ᖃᐅᔨᓴᐃᓂᖏᓐᓂ ᐊᐃᑉᕆᓕᒥ ᐃᓅᖃᑎᒌᖑᔪᓄᑦ ᓯᐊᒻᒪᖅᑎᑦᑎᓂᐅᔪᒥ ᐊᑐᖅᑎᐅᔪᑦ ᐊᐱᖅᓱᖅᑎᓪᓗᒋᑦ ᐊᒥᐅᕋ ᐊᒻᒪ ᓇᑦᔭ ᐃᓅᓂᕋᕐᓂᖏᓐᓂ.

ᑭᑎ ᓄᐊ, ᓴᐅᒥᖕᒥ, ᐊᒻᒪ ᐃᕐᓂᖓ ᓄᐊ ᓄᐊ, ᐅᕙᓂ ᑕᑯᒃᓴᐅᕗᑦ ᐅᕙᓂ ᒫᔾᔨ 2023−ᒥ ᑐᓴᒐᒃᓴᓕᕆᔨᒃᑯᑦ ᐊᔾᔨᖁᑎᖓᓐᓂ. ᑭᑎ ᐃᓅᔪᓐᓃᓚᐅᖅᐳᖅ ᔪᓚᐃ 13, 2023−ᒥ. (ᑐᓴᒐᒃᓴᓕᕆᔨᒃᑯᑦ ᐊᔾᔨᖁᑎᖓ ᑕᐃᕕᑦ ᐱᐊᓐᒥ)

ᕿᑎᐊᓂ 2021−ᒥ ᐊᒻᒪ 2023−ᒧᑦ, ᒪᕐᕈᓕᐊᑦ ᐊᐅᓚᑦᑎᓚᐅᖅᐳᑦ ᖃᕋᓴᐅᔭᑎᒍᑦ ᓇᖕᒥᓂᖃᕐᓂᐅᔪᒥ ᑕᐃᔭᐅᔪᒥ Kanata Trade Co., ᓂᐅᕕᐊᒃᓴᖃᖅᖢᑎᒃ ᓴᓇᐅᒐᓂᑦ ᓲᕐᓗ ᐅᕕᓂᕈᕐᓂ ᐊᒻᒪ ᓄᕙᒡᔪᐊᕐᓇᖅ-19 ᒪᑐᐊᕐᓂ ᑕᖅᓯᖅᓱᖅᓯᒪᔪᓂ ᓄᓇᖃᖅᑳᖅᓯᒪᔪᓂ ᑎᑎᕋᐅ.ᒐᕐᓂ.

ᑲᒻᐸᓂᐅᑉ ᐃᑭᐊᖅᑭᕕᖓᓐᓂ, ᒋᐅᓪᔅ ᐃᓅᓂᕋᓚᐅᖅᐳᑦ. ᐃᓅᓂᕋᐃᓚᐅᕆᕗᑦ ᓯᐊᒻᒪᖅᑎᑦᑎᓂᕐᒥ ᐅᖃᐅᓯᖃᕐᓂᖓᓂ ᑲᒻᐸᓂᖓᓄᑦ.

ᖃᑭᔾᔪᑎᓂ ᑐᓂᓯᓂᐊᕐᓂᕋᐃᓚᐅᖅᐳᑦ Indspire−ᑯᓐᓄᑦ, ᐊᔪᖅᓴᖅᑐᓄᑦ ᑐᓂᓯᕙᒃᑐᓄᑦ ᑮᓇᐅᔭᓕᐅᕋᓱᐊᙱᑦᑐᒥ ᑐᓂᓯᕙᒃᑐᓂ ᐃᓕᓐᓂᐊᕈᑎᒧᑦ ᐊᑭᓕᐅᑎᒃᓴᓂ ᑮᓇᐅᔭᓂᒃ ᓄᓇᖃᖅᑳᖅᓯᒪᔪᓄᑦ ᐃᓕᓐᓂᐊᖅᑎᐅᔪᓄᑦ.

Indspire ᐅᖃᓚᐅᖅᐳᖅ ᔪᓚᐃᒥ ᑐᓂᓯᓯᒪᓂᖏᓐᓂ ᐃᓕᓐᓂᐊᕈᑎᒧᑦ ᐊᑭᓕᐅᑎᒃᓴᓂ ᑮᓇᐅᔭᓂᒃ ᒪᕐᕈᓕᐊᓄᑦ ᐃᓕᓐᓂᐊᕐᓂᖏᓐᓂ ᑯᐃᓐ ᓯᓚᑦᑐᖅᓴᕐᕕᒡᔪᐊᖓᓂ ᑭᖕᔅᑎᓐ, ᐋᓐᑎᐊᕆᐅᒥ, ᐊᒻᒪ ᑮᓇᐅᔭᑦ ᐅᑎᖅᑎᖁᔭᐅᕗᑦ.

Indspire ᐅᖃᖅᑎᐅᔪᖅ ᐳᕌᓐᑎᓪ ᒥᐅᐊᓰᔾ ᑭᐅᓚᐅᙱᓚᖅ ᓄᓇᑦᓯᐊᖅ ᑐᓴᒐᒃᓴᓕᕆᔨᒃᑯᓐᓄᑦ ᑐᒃᓯᕋᕐᓂᐅᔪᓂ ᑐᓴᒐᒃᓴᓂ ᖃᔅᓯᓂ ᑮᓇᐅᔭᓂ ᒋᐅᓪᔅ ᐱᓚᐅᕐᓂᖏᓐᓂ. ᐊᔪᖅᓴᖅᑐᓄᑦ ᑐᓂᓯᕙᒃᑐᓄᑦ ᑮᓇᐅᔭᓕᐅᕋᓱᐊᙱᑦᑐᒥ ᑐᓂᓯᓚᐅᙱᓚᑦ ᐃᓄᓕᒫᓄᑦ ᑭᐅᓂᐅᔪᒥ ᐃᖅᑲᖅᑐᒐᒃᓴᐅᓂᐅᔪᓄᑦ.

ᓄᓇᕗᒻᒥ ᑐᙵᕕᒃᑯᑦ ᐲᖅᓯᓚᐅᖅᐳᑦ ᒪᕐᕈᓕᐊᓂ ᐃᓚᐅᖃᑕᐅᓂᖏᓐᓂ ᑎᑎᕋᖅᓯᒪᓂᐅᔪᒥ ᐃᓚᒌᑦ ᑭᑎ ᓄᐊᒧᑦ — ᐃᓅᓪᓗᓂ ᐊᕐᓇᖅ ᐃᖃᓗᖕᓂ ᓄᓇᕗᒻᒥ ᑐᙵᕕᒃᑯᑦ ᐅᖃᖅᐳᑦ ᑎᑎᕋᖅᓯᒪᓂᖓᓂ ᒪᕐᕈᓕᐊᑦ ᐊᓈᓇᒋᔭᐅᓂᖓᓂ — ᐅᖃᓚᐅᖅᐳᖅ ᐱᓕᕆᖃᑎᖃᙱᑦᑎᐊᕐᓂᖓᓂ ᒋᐅᓪᔅᓄᑦ.

ᑭᑎᐅᑉ ᐃᕐᓂᖓ, ᓄᐊ ᓄᐊ, ᐅᖃᓚᐅᖅᐳᖅ ᖁᕕᐊᓱᓚᐅᖅᐳᖅ ᐃᓕᑦᑎᓂᕐᒥ ᒪᕐᕈᓕᐊᑦ ᐊᒻᒪ ᐊᓈᓇᖓ ᐃᖅᑲᖅᑐᒐᒃᓴᙳᕐᓂᖏᓐᓂ.

ᐅᖃᓚᐅᖅᐳᖅ ᐱᕕᒃᓴᖃᕆᐊᖃᕐᓂᖓᓂ ᐃᓱᒪᒃᓴᖅᓯᐅᕐᓂᖓᓂ ᑐᓴᒐᒃᓴᐅᔪᒥ, ᐱᓗᐊᖅᑐᒥ ᑭᑎ ᐃᓅᔪᓐᓃᓚᐅᕐᓂᖓᓂ ᑕᖅᑭᑦ ᒪᕐᕉᓕᖅᑐᓂ ᖄᖏᖅᓯᒪᓕᖅᑐᓂ.

“ᖁᕕᐊᓱᕐᔪᐊᕋᔭᖅᑐᒃᓴᐅᕗᖅ ᖃᓄᐃᓕᖓᓂᖓᓂ ᐃᖅᑲᖅᑐᒐᒃᓴᐅᔪᓄᑦ ᓯᕗᒻᒧᐊᕆᔭᐅᓂᖏᓐᓂ, ᐊᒻᒪ ᐱᓗᐊᖅᑐᒥ ᖁᕕᐊᓱᒃᐳᖅ ᐊᓈᓇᖓ ᐱᔭᐅᖃᑕᐅᓂᖓᓂᑦᑕᐅᖅ — ᒪᕐᕈᓕᐊᑐᐊᖑᙱᑦᑐᑦ,” ᓄᐊ ᐅᖃᓚᐅᖅᐳᖅ.

“ᓂᕆᐅᒋᓪᓚᕆᓚᐅᖅᐸᕋ ᐊᑯᓂᐅᓂᖅᓴᐅᓂᐊᕐᓂᖓᓂ ᑕᖅᑭᓂ 6−ᓂ, ᑕᐃᒫᒃ ᐅᓇ ᓱᒃᑲᔪᒻᒪᕆᐅᕗᖅ.”

ᐊᐃᑉᕆᓕᒥ, ᓄᐊ ᓄᐊ ᐅᖃᐅᔾᔨᓚᐅᖅᐳᖅ ᓄᓇᑦᓯᐊᖅ ᑐᓴᒐᒃᓴᓕᕆᔨᒃᑯᓐᓂ ᐃᓚᖏᑦ ᖃᐅᔨᒪᓂᖏᓐᓂ ᒪᓐᔨᒥ ᐊᐃᑉᐸᖃᖅᑎᓪᓗᒍ ᐊᑖᑕᒋᓚᐅᖅᓯᒪᔭᖓᓐᓂ ᖃᔅᓯᒐᓚᖕᓂ ᐊᕐᕌᒍᓂ ᖄᖏᖅᓯᒪᓕᖅᑐᓂ.

ᑭᓯᐊᓂ, ᖃᐅᔨᒪᓚᐅᙱᓚᑦ ᒋᐅᓪᑯᑦ ᐃᓚᐅᖃᑕᐅᓕᖅᓯᒪᓂᖏᓐᓂ ᐃᓅᓂᖏᓐᓂ ᐅᕝᕙᓘᓐᓃᑦ ᐅᖃᐅᓯᐅᓪᓗᓂ ᓄᓇᕗᒻᒥ ᑐᙵᕕᒃᑯᓐᓄᑦ ᐅᖃᓚᐅᕐᓂᖏᓐᓂ ᑭᑎ ᐊᓈᓇᓪᓚᕆᒋᔭᐅᓂᖓᓂ.

ᐅᖃᐅᓯᐅᓪᓗᓂ ᓄᓇᕗᒻᒥ ᑐᙵᕕᒃᑯᓐᓄᑦ, ᒪᓐᔨ ᐅᖃᓚᐅᕐᓂᖓᓂ ᑎᒍᐊᓚᐅᕐᓂᖓᓂ ᒪᕐᕈᓕᐊᖑᔪᓂ.

ᐊᑲᐅᙱᓕᐅᕈᑕᐅᔪᖅ ᐱᒋᐊᓚᐅᖅᑎᓪᓗᒍ ᑭᓯᐊᓂ ᓯᕗᓂᐊᓂ ᓄᓇᕗᒻᒥ ᑐᙵᕕᒃᑯᑦ ᐅᖃᐅᓯᖃᓚᐅᖅᑎᓪᓗᒍ ᖃᐅᔨᓴᖅᑕᐅᓂᖓᓂ, ᐊᒥᐅᕋ ᒋᐅᓪ ᐅᖃᐅᔾᔨᓚᐅᖅᐳᖅ ᓄᓇᑦᓯᐊᖅ ᑐᓴᒐᒃᓴᓕᕆᔨᒃᑯᓐᓂ ᓄᓇᕗᒻᒥ ᑐᙵᕕᒃᑯᑦ ᐃᓚᐅᖃᑕᐅᓂᖏᓐᓂ ᐊᐅᒃᑕᔫᓂ ᐃᒻᒥᓂᒃ ᐊᒻᒪ ᒪᕐᕈᓕᐊᖑᖃᑎᖓᑕ ᑐᓂᔭᐅᓚᐅᕐᓂᖏᓐᓂ “ᓄᑕᕋᐅᑎᓪᓗᒋᑦ” ᐊᒻᒪᓗ “ᖃᐅᔨᒪᓂᖃᓚᐅᙱᓚᑦ ᐃᓚᐅᖃᑕᐅᓂᐅᔪᒥ ᐱᓕᕆᓂᐅᔪᒥ.”

ᒪᓐᔨ ᐊᒻᒪ ᐸᓂᖏᑦ ᓯᕗᓪᓕᖅᐹᒥ ᓴᖅᑭᓐᓂᖃᕆᐊᖃᓚᐅᖅᐳᑦ ᐅᒃᑐᐱᕆ 30−ᒥ ᐃᖃᓗᖕᓂ. ᐸᓯᔭᐅᓂᐅᔪᓂ ᐊᕐᓇᓄᑦ ᖃᐅᔨᓴᖅᑕᐅᓯᒪᙱᓚᑦ ᐃᖅᑲᖅᑐᐃᕕᖕᒥ.

ᓄᐊ ᓄᐊ ᐅᖃᓚᐅᖅᐳᖅ ᐃᓱᒪᒋᔭᖃᕐᓂᖓᓂ ᐅᐸᖕᓂᖓᓂ ᓯᕗᓪᓕᖅᐹᖑᔪᒥ ᓴᖅᑭᑦᑕᕆᐊᖃᕐᓂᖓᓂ.

“ᐊᖏᐸᓗᒃᖢᓂ ᐱᓕᕆᓂᐅᕗᖅ ᐃᖅᑲᖅᑐᒐᒃᓴᐅᓂᖏᓐᓂ ᐱᕋᔭᖕᓂᒃᑯᑦ ᑮᓇᐅᔭᖅᑖᕐᓂᕐᒥ ᓄᓇᖃᖅᑳᖅᓯᒪᔪᒧᑦ ᑎᒥᖁᑕᐅᔪᒥ,” ᐅᖃᓚᐅᖅᐳᖅ.

ᖄᖏᖅᓯᒪᓕᖅᑐᓂ ᑕᖅᑭᓂ 6−ᓂ, ᓄᓇᑦᓯᐊᖅ ᑐᓴᒐᒃᓴᓕᕆᔨᒃᑯᓐᓂ ᖃᔅᓯᒐᓚᖕᓂ ᐱᓇᓱᐊᖅᓯᒪᕗᑦ — ᐅᖃᓘᑎᒃᑯᑦ, ᖃᕋᓴᐅᔭᑎᒍᑦ ᑎᑎᕋᕐᓂᒃᑯᑦ ᐊᒻᒪ ᐃᓅᖃᑎᒌᖑᔪᓄᑦ ᓯᐊᒻᒪᖅᑎᑦᑎᓂᐅᔪᒥ — ᐅᖃᖃᑎᖃᕐᓂᕐᒥ ᒋᐅᓪ ᒪᕐᕈᓕᐊᖑᔪᓂ ᐊᒻᒪ ᒪᓐᔨᒥ, ᐃᓚᖃᖅᑐᒥ ᐃᖅᑲᖅᑐᒐᒃᓴᐅᔪᓂ ᐅᖃᐅᓯᐅᓚᐅᖅᑎᓪᓗᒋᑦ ᓯᑎᐱᕆ 21−ᒥ.

ᐊᒥᐅᕋ ᒋᐅᓪ ᕿᓚᒻᒥᐅᔪᒥ ᐅᖃᓗᓚᐅᖅᐳᖅ ᐊᒻᒪ ᖃᕋᓴᐅᔭᑎᒍᑦ ᑎᑎᕋᓚᐅᖅᐳᖅ ᓄᓇᑦᓯᐊᖅ ᑐᓴᒐᒃᓴᓕᕆᔨᒃᑯᓐᓂ ᒫᔾᔨᐅᑉ ᓄᙳᐊᓂ, ᐅᖃᖅᖢᓂ “ᐱᒋᐊᖅᑕᐅᑲᑕᖕᓂᖏᓐᓂ ᖃᕋᓴᐅᔭᑎᒍᑦ ᐊᑭᕋᖅᑐᕐᔪᐊᖅᑐᓂ ᐃᓄᖕᓂ.”

ᓄᓇᕗᒻᒥ ᑐᙵᕕᒃᑯᑦ ᐊᖓᔪᖅᑳᖓ ᐊᓗᑭ ᑰᑦᑎᖅ ᐅᖃᓚᐅᖅᐳᖅ ᐃᖅᑲᖅᑐᒐᒃᓴᙳᖅᑎᑕᐅᓂᖏᓐᓂ ᒋᐅᓪᔅᓄᑦ ᐊᒻᒪ ᒪᓐᔨᒧᑦ “ᐃᓕᓯᕗᖅ ᐅᒃᐱᕈᓱᖕᓂᐅᔪᒥ ᐱᓕᕆᓂᐅᔪᒥ.”

ᐲᖅᑕᐅᓚᐅᖅᑎᓪᓗᒋᑦ ᒪᕐᕈᓕᐊᑦ ᐃᓚᒋᔭᐅᖃᑕᐅᓂᖏᓐᓂ ᑎᑎᕋᖅᓯᒪᓂᐅᔪᒥ, ᑰᑦᑎᖅ ᐅᖃᓚᐅᖅᐳᖅ ᓄᓇᕗᒻᒥ ᑐᙵᕕᒃᑯᑦ ᑐᓂᓯᓚᐅᖅᐳᑦ ᐅᓪᓗᓂ 30−ᓂ ᐃᖅᑲᖅᑐᐃᕕᖕᒧᑦ ᐊᔪᐃᓐᓇᕆᐊᖃᕐᓂᕐᓂᕐᒥ ᑕᐃᔅᓱᒥᖓ ᐃᓱᒪᓕᐊᖑᔪᒥ. ᑭᓯᐊᓂ ᒋᐅᓪᔅ ᑭᐅᓚᐅᙱᓚᑦ, ᐅᖃᓚᐅᖅᐳᖅ.

“ᐃᓕᓴᖅᓯᕗᖓ ᒪᓕᒐᓕᕆᓂᕐᒧᑦ ᐱᓕᕆᔾᔪᓯᖓ ᐱᕋᔭᒃᓯᒪᙱᓐᓂᖏᓐᓂ ᑭᓯᐊᓂ ᑕᑯᑎᑕᐅᒍᑎᒃ ᐸᓯᔭᒃᓴᐅᓂᖓᓂ, ᑭᓯᐊᓂ ᐅᒃᐱᕈᓱᑦᑎᐊᖅᐳᖓ ᑐᓂᓚᐅᕐᓂᑦᑎᓐᓂ ᐱᓕᕆᓂᐅᔪᒥ ᐅᕙᑦᑎᓐᓂ ᑐᓂᓯᓂᕐᒧᑦ ᖄᒃᑲᓐᓂᐊᒍᑦ ᑐᓴᒐᒃᓴᓂ,” ᑰᑦᑎᖅ ᐅᖃᓚᐅᖅᐳᖅ ᐊᐱᖅᓱᖅᑕᐅᓂᐅᔪᒥ.

“ᑭᓯᐊᓂ ᓯᕗᒻᒧᐊᕆᒍᑎᒃ ᓱᓕᔪᓂ ᑐᓴᒐᒃᓴᓂ, ᐃᓱᒪᕗᖓ ᒫᓐᓇᐅᔪᒥ ᖃᐅᔨᒪᕗᒍᑦ ᐃᓅᙱᓐᓂᖏᓐᓂᑦ.”

ᖄᖏᖅᓯᒪᓕᖅᑐᓂ ᑕᖅᑎᓂ 6−ᓂ, ᐅᖃᓚᐅᖅᐳᖅ ᖃᓄᐃᓕᖓᓂᐅᔪᖅ ᐊᔭᐅᕆᓯᒪᓂᖓᓂ ᓄᓇᕗᒻᒥ ᑐᙵᕕᒃᑯᓐᓂᑦ ᕿᒥᕐᕈᓂᖏᓐᓂ ᓇᖕᒥᓂᖅ ᐃᓚᐅᖃᑕᐅᓂᐅᔪᓂ ᐱᓕᕆᓂᐅᔪᒥ ᓇᓗᓇᐃᖅᓯᓂᖓᓐᓄᑦ ᐊᑑᑎᖃᑦᑎᐊᕐᓂᖓᓂ.

“ᖁᕝᕙᕆᐊᖅᑎᑦᑎᓯᒪᕗᒍᑦ ᐱᓕᒻᒪᒃᓴᓂᕐᒥ ᓄᓇᕗᒻᒥ ᑐᙵᕕᒃᑯᓐᓂᑦ ᓄᓇᓕᖕᓂ ᖃᐅᔨᒪᖃᑎᒌᒃᑎᐅᔪᓂ, ᐊᒻᒪᓗᑦᑕᐅᖅ ᓄᓇᓕᖕᓂ ᐃᓚᐅᖃᑕᐅᓂᐅᔪᒥ ᑲᑎᒪᔨᕋᓛᖑᔪᓄᑦ ᐃᓚᒋᔭᐅᔪᓂᑦ,” ᑰᑦᑎᖅ ᐅᖃᓚᐅᖅᐳᖅ.

“ᐸᕐᓇᐅᑎᖃᖅᐳᒍᑦ ᑲᔪᓰᓐᓇᕐᓂᕐᒥ ᑖᔅᓱᒥᖓ ᐱᓕᒻᒪᒃᓴᐃᔪᓐᓇᕐᓂᐊᕋᑦᑕ ᑕᒪᒃᑭᓂ ᓄᓇᓕᖕᓂ ᖃᐅᔨᒪᖃᑎᒌᒃᑎᐅᔪᓂ ᐊᒻᒪᓗ ᑕᒪᒃᑭᓂ ᐃᓚᒋᔭᐅᔪᓂ ᓄᓇᓕᖕᓂ ᐃᓚᐅᖃᑕᐅᓂᐅᔪᒥ ᑲᑎᒪᔨᕋᓛᖑᔪᓂ.”