ᒪᑭᕝᕕᒃ ᐅᖃᐅᓯᖓ ᒪᓕᒋᐊᓖᑦ ᓴᙱᓗᐊᖅᐳᑦ: ᓂᕈᐊᒐᒃᓴᐅᓇᔭᖅᑐᖅ

For English version, see Makivvik language rules for president too strict, says would-be candidate 

ᒪᑭᕝᕕᒃ Corp. ᖃᐅᔨᒋᐊᖅᐳᖅ ᐱᔪᓐᓇᕐᓂᕆᔭᕆᐊᓕᖏᓐᓂ ᓂᕈᐊᒐᒃᓴᙳᕈᒪᓇᔭᖅᑐᓂ ᐊᖓᔪᖅᑳᖓᓐᓄᑦ, ᐊᑕᐅᓯᖅ ᓂᕈᐊᒐᒃᓴᙳᕋᔭᓚᐅᖅᑐᖅ ᐅᓇᑕᖅᐳᖅ ᐅᖃᐅᓯᕐᒥ ᐱᔭᕆᐊᖃᕐᓂᐅᔪᒥ ᐅᖃᖅᐳᖅ ᓄᖅᑲᖅᑎᑦᑎᓚᐅᕐᓂᖓᓂ ᐱᓇᓱᐊᕐᓂᖓᓂ.

ᐱᓕᕆᓂᐅᔪᖅ ᓂᕈᐊᒐᒃᓴᙳᖅᑎᑦᑎᓂᕐᒥ ᓂᕈᐊᒐᒃᓴᓂ ᑐᕌᖅᑎᑦᑎᓂᕐᒥ ᓄᓇᕕᖕᒥ ᐃᓄᖕᓄᑦ ᑲᑐᔾᔨᖃᑎᒌᖑᔪᓄᑦ ᒪᑐᓚᐅᖅᐳᖅ ᔭᓄᐊᕆ 8−ᒥ.

ᓂᕈᐊᕐᓂᖃᕐᓂᐊᕐᒪᑦ ᕕᕗᐊᕆ 1−ᒥ ᐊᖓᔪᖅᑳᖑᓂᐅᔪᒧᑦ ᒪᑭᕝᕕᖕᒧᑦ, ᑎᒥᖁᑕᐅᔪᑦ ᓴᖅᑭᑎᑕᐅᓯᒪᔪᓂ ᑭᒡᒐᖅᑐᐃᓂᕐᒥ ᐃᓄᖕᓂ ᓄᓇᕕᖕᒥ. ᐲᑕ ᐋᑕᒥ ᓂᕈᐊᖅᑕᐅᓚᐅᖅᐳᖅ ᐊᕐᕌᒍᓄᑦ−ᐱᖓᓱᓄᑦ ᐊᖓᔪᖅᑳᖑᓂᕐᒥ ᖄᖏᖅᓯᒪᔪᒥ ᓂᕈᐊᕐᓂᐅᓚᐅᖅᑐᒥ 2021−ᒥ.

ᐊᑕᐅᓯᖅ ᐊᑎᐅᔪᒥ ᓂᕈᐊᒐᒃᓴᓃᔾᔮᙱᑦᑐᖅ ᑕᒪᑐᒪᓂ ᓂᕈᐊᕐᓂᐅᔪᒥ, ᑭᓯᐊᓂ, ᔭᐃᓴᓐ ᐃᑦᑑᕗᖅ.

ᐃᑦᑐᖅ ᒪᓐᑐᕆᐋᓪᒥᐅᑕᐅᕗᖅ ᑭᓯᐊᓂ ᐱᕈᖅᓴᓯᒪᕗᖅ ᑲᖏᖅᓱᐊᓗᔾᔪᐊᕐᒥ ᐊᒻᒪ ᓄᓇᖃᖅᓯᒪᕗᖅ ᖃᔅᓯᒐᓚᖕᓂ ᓄᓇᕕᖕᒥ ᓄᓇᓕᐅᔪᓂ.

ᐃᓄᐃᑦ ᖃᖓᑕᓲᖓᓐᓂ ᖃᖓᑕᓲᖅᑎᐅᓚᐅᖅᓯᒪᕗᖅ ᑭᓯᐊᓂ ᐊᒃᓱᕈᖅᓯᒪᕗᖅ ᖄᖏᖅᓯᒪᔪᓂ ᐊᕐᕌᒍᓄᑦ ᖁᓕᓄᑦ ᓇᓂᓯᓇᓱᐊᕐᓂᕐᒥ ᐃᖅᑲᓇᐃᔮᒃᓴᒥ ᓄᓇᕕᖕᒥ ᐱᔾᔪᑎᖃᖅᑐᒥ ᐃᓄᒃᑎᑐᑦ ᐅᖃᐅᓯᕐᒥ ᐱᔭᕆᐊᖃᕐᓂᐅᔪᒥ, ᐅᖃᓚᐅᖅᐳᖅ.

“ᐅᖃᕈᓐᓇᑦᑎᐊᙱᓚᖓ. ᖃᐅᔨᒪᕗᖓ ᖃᐅᔨᓴᕋᔭᕈᒪ ᐊᔪᙱᓐᓂᓐᓂ ᐃᓄᒃᑎᑐᑦ, ᐅᖃᕋᔭᖅᐳᖓ ᕿᑎᐊᓃᓐᓂᓐᓂ,” ᐅᖃᓚᐅᖅᐳᖅ.

“ᑎᑎᕋᕈᓐᓇᖅᐳᖓ ᐅᖃᓕᒫᕈᓐᓇᖅᐳᖓ ᐅᖃᐅᓯᕐᒥ, ᖃᐅᔨᒪᕗᖓ ᐅᖃᐅᓯᕐᓂ ᐊᒥᓱᐊᓗᖕᓄᑦ ᖃᐅᔨᒪᔭᓐᓂ, ᐱᖅᑯᓯᑐᖃᕐᓂ, ᑐᓴᖅᐸᒃᑕᓐᓂ ᐃᓚᓐᓂᑦ. ᖃᐅᔨᒪᕙᕋ ᐃᓕᖅᑯᓯᖅ, ᐃᒃᐱᒋᑦᑎᐊᖅᐸᕋ ᐃᓕᖅᑯᓯᖅ.”

ᐃᑦᑐᖅ ᐅᖃᓚᐅᖅᐳᖅ ᐱᓇᓱᐊᕈᒪᓚᐅᖅᐳᖅ ᐊᖓᔪᖅᑳᒃᓴᒧᑦ ᒪᑭᕝᕕᖕᒥ ᑕᑯᕙᒃᑕᖓᓂ ᐱᕼᖃᙱᓗᐊᕐᓂᖓᓂ ᓯᕗᓕᐅᖅᑎᐅᓂᕐᒥ ᑕᐃᑲᓂ, ᑭᓯᐊᓂ ᐅᖃᓚᐅᖅᐳᖅ ᓴᐱᓕᖅᓯᒪᕗᖅ ᓲᖑᓗᐊᖅᑐᒥ ᐅᖃᐅᓯᕐᒥ ᐱᔭᕆᐊᖃᕐᓂᐅᔪᓂ ᓄᖅᑲᖅᑎᑦᑎᓚᐅᖅᑐᒥ ᑐᒃᓯᕋᕐᓂᕐᒧᑦ ᐱᓇᓱᐊᕐᓂᕐᒥ.

ᓂᕈᐊᒐᒃᓴᙳᖅᑎᑕᐅᓂᕐᒥ ᑕᑕᑎᕆᐊᓕᒃ ᐊᖓᔪᖅᑳᒃᓴᓄᑦ ᓂᕈᐊᒐᒃᓴᐅᔪᓄᑦ ᐅᖃᖅᓯᒪᕗᖅ ᑐᒃᓯᕋᖅᑐᑦ ᐃᓄᒃᑎᑐᑦ ᐅᖃᕈᓐᓇᑦᑎᐊᕆᐊᖃᖅᐳᑦ.

ᑲᑎᖅᓱᐃᔭᕆᐊᖃᖅᐳᑦ 10−ᓂ ᐊᑎᓕᐅᕆᓂᐅᔪᓂ ᓄᓇᕗᒻᒥᐅᓂ ᑕᓪᓕᒪᓪᓗᐊᓂ ᐊᔾᔨᒌᙱᑦᑐᓂ  ᓄᓇᕕᖕᒥ ᐃᓄᖕᓂ ᓄᓇᓕᐅᔪᓂ ᓱᓕᓂᕋᐃᔪᒥ ᐅᖃᕈᓐᓇᑦᑎᐊᕐᓂᖏᓐᓂ, ᐊᒻᒪ ᐊᑎᓕᐅᕐᓂᕐᓂ ᐱᖓᓱᓂ ᒪᑭᕝᕕᖕᒥ ᑲᑎᒪᔨᐅᔪᓂ ᓱᓕᓂᕋᐃᔪᒥ ᐅᖃᕈᓐᓇᑦᑎᐊᕐᓂᖏᓐᓂ ᐃᓄᒃᑎᑐᒻᒥ.

ᐃᑦᑐᖅ ᐅᖃᓚᐅᖅᐳᖅ ᐱᔭᕆᐊᖃᕐᓂᐅᔪᒥ ᓂᕈᐊᒐᒃᓴᐅᓂᕐᒧᑦ ᐅᖃᕈᓐᓇᑦᑎᐊᕐᓂᖓᓂ ᐃᓄᒃᑎᑐᒻᒥ ᐅᖃᐅᓯᕐᒥ ᐊᔾᔨᒌᙱᑎᑦᑎᓂᐅᒐᓚᒃᐳᖅ.

“ᐅᖃᕋᔭᖅᐳᖓ ᐃᓄᐃᑦ ᐅᕙᓐᓂ ᖃᐅᔨᒪᔪᓂ ᐊᒻᒪ ᐅᕙᓐᓂ ᑕᑯᓯᒪᔪᓂ ᓄᓇᒥ ᐊᒻᒪ ᖃᐅᔨᒪᓪᓗᑎᒃ ᑭᓇᐅᓂᓐᓂ, ᐅᖃᕋᔭᖅᐳᑦ ‘ᐄ, ᐱᖅᑯᑎᕝᓯᑐᖃᖅᑎᒍᑦ ᐃᓅᕗᖅ,’” ᐅᖃᓚᐅᖅᐳᖅ.

“ᑕᐃᒫᒃ ᐊᑲᐅᙱᓚᖅ. ᐅᖃᐅᓯᕐᒥ ᖃᐅᔨᒪᙱᓗᐊᕐᓂᓐᓂ ᐅᕙᓐᓂᒃ ᐱᔪᓐᓇᖅᑎᑦᑎᙱᓚᖅ ᓯᕗᒧᐊᕆᒃᑲᓐᓂᕐᓂᕐᒧᑦ ᐊᒻᒪ ᐱᓕᕆᑦᑎᐊᕈᓐᓇᕐᓗᖓ ᐃᓅᓯᕐᒥ.

“‘ᐃᓄᒃᑎᑐᑦ ᐅᖃᕈᓐᓇᙱᒻᒪᑦ ᑕᐃᒫᒃ ᐃᓅᙱᓚᖅ,’ ᐊᒻᒪ ᑕᒪᓐᓇ ᐋᓐᓂᕐᓇᖅᐳᖅ ᐅᕙᓐᓄᑦ ᐊᒃᓱᕈᕈᕋᓱᐊᓲᖑᒐᒪ ᐃᓄᑦᑎᐊᕙᐅᓂᖅᓴᐅᓂᕐᒥ ᓄᓇᕕᖕᒥ,” ᐃᑦᑐᖅ ᐅᖃᓚᐅᖅᐳᖅ, ᐅᖃᖅᖢᓂ ᐱᔪᓐᓇᕐᓂᖅᑖᖅᑎᑕᐅᓯᒪᕗᖅ ᓯᕿᓂᕐᒥᐅᑦ ᐊᒻᒪ ᐅᐊᖕᓇᒥ ᑯᐸᐃᖕᒥ ᐊᖏᕈᑕᐅᔪᒥ.

ᓂᕈᐊᒐᒃᓴᙳᖅᑎᑦᑎᓂᕐᒥ ᑕᑕᑎᕆᐊᓕᒃ ᐱᑕᖃᙱᓗᐊᕆᕗᖅ ᐅᓂᒃᑳᕆᓯᒪᓂᐅᔪᒥ ᑭᓱᑦ ᐋᖅᑭᒃᓯᓯᒪᓂᖓᓂ ᐃᓄᒃᑎᑐᑦ ᐅᖃᕈᓐᓇᑦᑎᐊᕐᓂᖓᓂ ᐊᒻᒪ ᖃᓄᖅ ᓂᕈᐊᒐᒃᓴᙳᖅᑎᑦᑎᔪᖅ ᓇᓗᓇᐃᖅᓯᓇᔭᕐᓂᖓᓂ ᓂᕈᐊᒐᒃᓴᐅᔫᑉ ᐊᔪᙱᓐᓂᖏᓐᓂ, ᐃᓚᒋᐊᖅᓯᓚᐅᖅᐳᖅ.

“ᐅᖃᐅᓯᖃᖃᑦᑕᙱᓚᑦ ᐃᓄᓕᒫᓄᑦ ᖃᓄᖅ ᓇᓗᓇᐃᖅᓯᓇᔭᕐᓂᖏᓐᓂ ᐅᑯᓂᖓ ᐃᓄᖕᓂ,” ᐅᖃᓚᐅᖅᐳᖅ.

“ᐅᖃᓕᒫᕐᓂᐅᕗᖅ, ᑎᑎᕋᕐᓂᐅᕗᖅ, ᐅᖃᓪᓚᖕᓂᐅᕗᖅ. ᒪᓕᒐᖃᙱᓚᑦ ᖃᓄᖅ ᓇᓗᓇᐃᖅᓯᓇᔭᕐᓂᖏᓐᓂ ᐅᑯᓂᖓ ᐃᓄᖕᓂ [ᐅᖃᕈᓐᓇᑦᑎᐊᕐᓂᖏᓐᓂ].”

ᐃᑦᑐᖅ ᐊᑲᐅᙱᓕᐅᕈᑎᖃᕆᕗᖅ ᐱᔭᕆᐊᖃᕐᓂᐅᔪᒥ ᐱᖓᓱᓂ ᒪᑭᕝᕕᖕᒥ ᑲᑎᒪᔨᐅᔪᓂ ᐊᑎᓕᐅᕆᓂᕐᒥ ᑐᒃᓯᕋᖅᑑᑉ ᐃᓄᒃᑎᑐᑦ ᐅᖃᕈᓐᓇᑦᑎᐊᕐᓂᖓᓂ.

“ᐅᖃᕋᔭᒻᒪᕆᒃᐳᖓ ᓄᖅᑲᖅᑎᑦᑎᓂᐅᔪᒥ ᒪᓕᒐᓕᕆᓂᕐᒥ ᑭᓇᑐᐃᓐᓇᒥᒃ ᐱᓕᕆᖃᑎᒋᓇᔭᖅᑕᓐᓂ ᐊᖏᖅᑕᐅᔭᕆᐊᖃᕐᓂᖓᓂ ᑲᑎᙵᓂᕆᔭᐅᓂᖓᓄᐊᕋᓱᖕᓂᕐᒥ,” ᐅᖃᓚᐅᖅᐳᖅ.

ᑭᒡᒐᖅᑐᐃᔨᐅᔪᓂ ᒪᑭᕝᕕᖕᒥ ᑭᐅᓚᐅᙱᓚᑦ ᑐᒃᓯᕋᕐᓂᐅᔪᒥ ᐅᖃᐅᓯᒃᓴᓕᐅᕐᓂᕐᒧᑦ ᐆᒧᖓ ᐅᓂᒃᑳᓕᐊᖑᔪᒧᑦ.

ᐃᑦᑐᖅ ᐅᖃᓚᐅᖅᐳᖅ ᐅᖃᖃᑎᖃᖅᓯᒪᕗᖅ ᓂᕈᐊᖅᑐᓕᕆᔨᒻᒪᕆᐅᔪᒥ ᐊᑲᐅᒃᓴᙱᓐᓂᖓᓂ ᐊᒻᒪ ᐅᖃᓚᐅᖅᐳᖅ ᐸᕐᓇᒃᐳᖅ ᓴᖅᑭᑎᓐᓂᐊᕐᓂᖓᓂ ᒐᕙᒪᒃᑯᓐᓄᑦ ᐱᓕᕆᔨᕐᔪᐊᖑᔪᓄᑦ.

ᐃᓄᒃᑎᑐᑦ ᐱᔭᕆᐊᖃᕐᓂᐅᔪᓂ ᓲᖑᓗᐊᕈᓐᓃᖅᑎᑕᐅᓂᖏᓐᓂ ᓄᓇᕗᒻᒥᐅᑦ ᐃᓕᖅᑯᓯᑎᒍᑦ ᐃᓅᔪᓂ ᓄᖅᑲᖅᑎᑕᐅᙱᓐᓂᖏᓐᓂ ᐊᖓᔪᖅᑳᙳᕋᓱᐊᕐᓂᖏᓐᓂ ᐃᓄᒃᑎᑐᑦ ᐅᖃᕈᓐᓇᑦᑎᐊᙱᒃᑯᑎᒃ ᐊᑐᒐᒃᓴᐃᑦ ᐋᖅᑭᒃᑕᐅᓯᒪᓂᖏᑎᒍᑦ ᑲᑐᔾᔨᖃᑎᒌᖑᔪᒥ.

“ᐃᓱᒪᑦᑎᐊᕆᒃᐳᖓ, ᐃᓄᑦᑎᐊᕙᐅᕗᖓ. ᐅᖃᕈᒪᕙᕋ ᑕᒪᓐᓇ ᐊᒻᒪ ᓇᖏᖅᓯᓗᖓ ᐱᔪᓐᓇᕐᓂᕆᔭᓐᓂ ᐃᓄᐃᑦ ᐱᒋᓪᓗᐊᖅᑕᖏᓐᓂ ᑭᓯᐊᓂ ᐊᖅᓵᖅᑕᐅᓯᒪᓂᖏᓐᓂ ᐅᖃᐅᓯᕐᒥ ᐱᔾᔪᑎᖃᑐᐃᓐᓇᕐᓂᕐᒧᑦ,” ᐃᑦᑐᖅ ᐅᖃᓚᐅᖅᐳᖅ.

In this case, would you like to add an ending quotation mark after the period?