ᒧᒥᓛᖅ ᖃᖅᑲᖅ ᑐᓴᖅᑎᑦᑎᕗᖅ ᓂᕈᐊᒐᒃᓴᐅᒃᑲᓐᓂᔾᔮᙱᓐᓂᕐᒥᓂᒃ

‘ᐊᑕᐅᑦᑎᒃᑯᑦ, ᑕᑯᑎᑦᑎᔪᓐᓇᓚᐅᖅᓯᒪᔪᒍᑦ ᐅᑭᐅᕐᑕᖅᑐᕐᒥᐅᑕᑎᒍᑦ ᖃᓄᐃᑦᑐᓂᒃ ᐊᑐᖃᑦᑕᕐᓂᑦᑎᓐᓂᒃ,’ ᓄᓇᕗᒧᑦ ᒪᓕᒐᓕᐅᖅᑎ ᐅᖃᖅᑐᖅ

ᒧᒥᓛᖅ ᖃᖅᑲᖅ ᑐᓴᖅᑎᑦᑎᕗᖅ ᐱᓇᓱᐊᕈᓯᐅᓚᐅᖅᑐᒥᓐ ᓂᕈᐊᒐᒃᓴᐅᒃᑲᓐᓂᓛᙱᓐᓂᕋᖅᖢᓂ ᓄᓇᕗᒧᑦ ᒪᓕᒐᓕᐅᖅᑎᒃᓴᒧᑦ. (ᐊᔾᔨᙳᐊᖁᑎᒋᔭᐅᔪᖅ)

By ᒥᓚᓂ ᐅᕆᑦᓵᑦ

For an English version of this story, see Mumilaaq Qaqqaq announces she will not seek re-election

ᒧᒥᓛᖅ ᖃᖅᑲᖅ ᐅᖃᖅᑐᖅ ᓂᕈᐊᒐᒃᓴᐅᒃᑲᓐᓂᔾᔮᙱᓐᓂᕋᖅᖢᓂ ᒪᓕᒐᓕᕆᕕᒡᔪᐊᕐᒧᑦ ᓄᓇᕗᒥᑦ ᑭᒡᒐᖅᑐᐃᓗᓂ.

ᐅᓇ 27-ᓂ ᐊᕐᕌᒍᓕᒃ ᑲᑎᒪᔨᕐᔪᐊᖅ ᑕᐃᒪᓐᓇ ᐅᖃᓕᓚᐅᖅᑐᖅ ᐱᓇᓱᐊᕈᓯᑲᓪᓚᖕᓂ ᐃᓱᒪᒃᓴᖅᓯᐅᕈᑎᖄᓪᓚᓚᐅᖅᖢᓂ ᐊᒻᒪ ᐅᖃᓪᓚᖃᑎᖃᑲᑖᓪᓚᓚᐅᖅᖢᓂ ᐃᓚᖏᓐᓂᒃ, ᑎᑎᕋᖅᓯᒪᓚᐅᖅᑐᖅ ᑐᕕᑐᒃᑯᑦ ᒪᐃ 20-ᒥᑦ.

“ᑕᒪᑐᒥᖓ ᐱᓇᓱᒍᒪᔪᓐᓃᕋᓗᐊᕈᒪ ᒫᓐᓇ, ᑕᒪᕐᒥᒃ ᐃᓄᐃᑦ ᓄᓇᕗᒻᒥᐅᓪᓗ ᖃᐅᔨᒪᔭᕆᐊᖃᖅᑐᑦ ᐊᓯᙳᖅᑎᑦᑎᔪᓐᓇᕐᓂᖏᓐᓂᒃ ᐊᒻᒪᓗ ᓂᐱᕗᑦ ᐱᒻᒪᕆᐅᖃᑕᐅᓂᖓᓂᒃ.”

ᓂᕈᐊᖅᑕᐅᓯᒪᕝᕕᖓ ᐃᓱᓕᑉᐸᓪᓕᐊᓕᖅᑎᓪᓗᒍ, ᐅᖃᓚᐅᕐᑐᖅ ᐱᓕᕆᖃᑎᖃᐃᓐᓇᕐᓂᐊᕐᓂᕋᖅᖢᓂ ᐅᓇ ᓄᓘᔮᖕᓂ ᐅᔭᕋᒃᓯᐅᖅᕕᒃ ᐊᖏᒡᓕᒋᐊᖅᑎᑕᐅᔪᒪᓂᖓᓄᑦ ᑕᒪᒃᑯᓂᖓ ᑎᒍᒥᐊᖅᑎᐅᔪᓂᒃ ᐃᓱᒪᒋᔭᖃᑦᑎᐊᕐᓂᐊᖅᓂᖓᓂᒃ ᐊᒻᒪᓗ ᓄᓇᕗᒻᒥᐅᑦ ᐃᑲᔪᕈᑎᖃᖅᑎᑕᐅᑦᑎᐊᕐᓗᑎᒃ ᓄᕙᒡᔪᐊᕐᓇᖅ-19 ᐋᓐᓂᐊᕕᒡᔪᐊᕐᓇᖅᒧᑦ.

“ᐱᔪᓐᓇᕐᓂᖃᑐᐊᕌᖓᒪ ᐱᓇᓱᐃᓐᓇᖃᑦᑕᓚᐅᖅᑐᖓ ᐊᒻᒪ ᓂᐱᖃᕈᑎᒋᕙᒃᖢᒋᑦ,” ᐅᖃᖅᑐᖅ, ᐃᒡᓗᓕᕆᓂᖅᒧᑦ ᐅᓂᒃᑳᓕᐊᕕᓂᖏᓐᓂᒃ ᓇᓗᓇᐃᒃᑯᑎᖃᖅᖢᓂ ᐊᒻᒪᓗ ᐃᓱᒫᓘᑎᒋᔭᐅᔪᓂᒃ ᓂᓪᓕᕈᑎᒋᓯᒪᔭᖏᓐᓂᒃ ᒪᓕᒐᓕᕆᕕᒡᔪᐊᖅᒥᓐ.

ᐅᖃᓚᐅᕐᒥᔪᖅ ᒪᓕᒐᓕᕆᕕᒡᔪᐊᕐᒥᓐ ᓄᓇᖃᖅᑳᖅᑐᑦ ᐅᖃᐅᓯᖏᑦ ᐃᓚᐅᑎᑕᐅᖃᑦᑕᖁᓪᓗᓂᒋᑦ ᒐᕙᒪᑐᖃᒃᑯᑦ ᓂᕈᐊᕈᑎᒋᕙᒃᑕᖏᓐᓂᒃ.

“ᖃᐅᔨᒪᒐᑦᑕ, ᒐᕙᒪᑐᖃᒃᑯᑦ ᐱᓕᕆᕝᕕᖏᑦ ᐆᑐᓇᖅ ᒪᓕᒐᓕᕆᕕᒡᔪᐊᖅᑎᑐᑦ ᐊᓯᙳᖅᑎᒐᒃᓴᐅᙱᑦᑎᐊᕐᒪᑕ ᐊᒻᒪᓗ ᒐᕙᒪᐅᔪᑦ ᓄᓇᖃᖅᑳᖅᑐᓂᒃ ᐃᑲᔪᖅᐸᙱᖢᑎᒃ ᑭᓯᐊᓂ ᐊᒃᓱᕈᕐᓇᖅᑐᓕᕆᑎᑕᐅᒻᒪᕆᒃᑯᑎᒃ,” ᑎᑎᕋᕐᓯᒪᖕᒥᔪᖅ.

“ᐊᑕᐅᑦᑎᒃᑯᑦ ᑕᑯᑎᑦᑎᔪᓐᓇᓚᐅᖅᓯᒪᔪᒍᑦ ᐅᑭᐅᕐᑕᖅᑐᕐᒥᐅᑕᑎᒍᑦ ᖃᓄᐃᑦᑐᓂᒃ ᐊᑐᖃᑦᑕᕐᓂᑦᑎᓐᓂᒃ — ᐅᓄᓗᐊᕐᓂᖏᓐᓂᒃ ᐃᒻᒥᓃᕐᓂᖅᒧᑦ ᐃᓅᔪᓐᓃᖅᓯᒪᔪᓂᒃ, ᐃᒡᓗᒃᓴᖃᙱᓗᐊᕐᓂᖅᒥᒃ, ᐊᒻᒪᓗ ᐃᓄᐃᑦ ᐊᒃᓱᕈᕈᑎᒋᕙᒃᑕᖏᓐᓂᒃ ᖃᐅᑕᒫᓐ ᐃᓅᓂᖅᒧᑦ ᐱᔪᓐᓇᐅᑎᖏᑦᑎᒎᖓᔪᒃᑯᑦ — ᑲᓇᑕᒥᐅᑕᓄᑦ.”

ᖃᖅᑲᖅ ᓂᕈᐊᒐᒃᓴᐅᒃᑲᓐᓂᕐᓂᖅᒥᓂᒃ ᒫᔅᓯᒥ ᓴᖅᑭᑎᑦᑎᓚᐅᕐᓯᒪᔪᖅ, ᐅᖃᓚᐅᖅᓯᒪᓪᓗᓂ ᕕᕝᕗᐊᕆᒥ ᓇᓗᓂᕋᖅᖢᓂ ᓂᕈᐊᒐᒃᓴᐅᒃᑲᓐᓂᕐᓂᐊᕆᐊᒃᓴᖓᓂᒃ.

ᓂᐅ ᑎᒧᑯᕌᑎᒃ ᐹᑎᓄᑦ ᒪᓕᒐᓕᕆᔨᐅᔪᖅ ᓯᕗᓪᓕᖅᐹᒥᒃ ᓂᕈᐊᖅᑕᐅᓚᐅᖅᓯᒪᔪᖅ 2019-ᒥᑦ ᒐᕙᒪᑐᖃᒃᑯᓐᓄᑦ ᓂᕈᐊᕐᓇᐅᑎᓪᓗᒍ, ᐊᒻᒪᓗ ᓂᕈᐊᒐᒃᓴᐅᓂᕋᓕᓚᐅᖅᓯᒪᓪᓗᓂ ᐃᓱᑲᓴᑦᑎᐊᖓᓂᒃ.

“ᐱᓇᓱᑦᑎᐊᕈᒪᓚᐅᕐᓯᒪᔪᖓ ᐃᑲᔪᖅᑎᐅᓗᖓ ᐃᓄᖕᓂᒃ ᐊᒻᒪ ᓄᓇᕗᒻᒥᐅᓂᒃ… ᐅᓇ ᓂᕈᐊᒐᒃᓴᐅᓇᓱᖕᓂᕋ ᓲᕐᓗ ᐱᓇᓱᒍᑎᒋᑐᐃᓐᓇᖅᖢᒍ ᑭᓯᐊᓂᓕ ᐃᑲᔪᖅᑕᐅᕈᓘᔭᕐᓂᓐᓄᑦ ᓄᓇᕗᓕᒫᒥᑦ ᐅᓄᖅᑐᓂᒃ ᐃᓄᖕᓂ ᑲᒪᑎᑦᑎᔪᓐᓇᓚᐅᖅᑐᒍᑦ.”

ᑐᓴᒐᒃᓴᓕᐊᖓ ᐅᑯᓂᖓ ᐊᓐᑏᐲᑯᓐᓂᒃ, ᑲᓐᓲᕕᑎᕝ ᐊᒻᒪ ᓕᐳᕈᑯᓐᓂᒃ ᓂᕈᐊᒐᒃᓴᖃᙱᔾᔪᑎᒋᔭᖓ ᓄᓇᕗᒥᑦ ᑭᒡᒐᖅᑐᐃᓇᔭᖅᑐᒥ ᑭᖑᓪᓕᖅᒥᓐ ᒐᕙᒪᑐᖃᒃᑯᑦ ᓂᕈᐊᖅᑎᑦᑎᓕᖅᐸᑕ ᑕᐃᒪᓐᓇᓗ ᑐᓴᑲᑕᖕᓇᕈᓘᔭᖅᖢᓂ ᑲᓇᑕᒥᐅᑕᑦ ᖃᓂᒃᑐᒃᑯᑦ ᓂᕈᐊᕆᐊᖅᑎᑕᐅᓛᕆᐊᒃᓴᖏᓐᓂᒃ.

ᐊᐱᖅᓱᖅᑕᐅᑎᓪᓗᒍ ᒪᐃ 20-ᒥᑦ, ᖃᖅᑲᖅ ᑐᓴᒐᒃᓴᓕᐅᓚᐅᙱᑎᓪᓗᒍ, ᐅᖃᓚᐅᕐᓯᒪᔪᖅ ᐃᓄᖕᓂ ᐊᐱᕆᔭᐅᒐᒥ ᖃᓄᐃᒻᒪᓐ ᒪᓕᒐᓕᕆᔨᙳᕈᒪᓯᒪᖕᒪᖔᑦ, ᑭᐅᑐᐃᓐᓇᖅᓯᒪᔪᖅ ᐃᓅᓯᖓᓂ ᒪᓕᒐᓕᕆᓂᑐᐃᓐᓇᕐᒥ ᐊᑐᖅᓯᒪᓂᖓᓂᒃ.

“ᐃᓅᑎᓪᓗᖓ ᓄᓇᖃᖅᑳᖅᑐᒧᑦ, ᑕᐃᒪᓕ ᑕᒪᓐᓇ ᒪᓕᒐᓕᕆᓂᖅᒨᖓᓂᖅᒧᑦ ᑭᓯᐊᓂ,” ᐅᖃᖅᑐᖅ.

“ᐱᐅᒋᒐᓗᐊᕈᒃᑯ ᐋᒃᑲᓘᓐᓃᑦ, ᐱᑕᖃᐃᓐᓇᔭᕐᒪᓐ ᐅᖃᖅᑕᐅᓯᒪᙱᑦᑐᒥᓐ, ᑐᓴᖅᑕᐅᓯᒪᙱᑦᑐᒥᒃ, ᑕᑯᔭᐅᓯᒪᙱᑦᑐᓂᒃ ᐊᖓᔪᖅᑳᖑᓂᕐᒧᑦ ᐱᓕᕆᓂᐅᔭᕆᐊᓕᖕᒥᒃ … ᑭᓯᐊᓂᓕ ᐊᒃᑐᐃᓂᖃᕈᓐᓇᒻᒪᕆᒃᖢᓂ ᐃᓅᓯᕐᒥᒃ ᐊᒻᒪ ᖃᓄᐃᓕᐅᕈᑎᒋᓇᔭᖅᑕᖓᓂᒃ.”

ᐊᐱᖅᓱᖅᑕᐅᓪᓗᓂ ᔭᓄᐊᕆ 8-ᒥ, ᖃᖅᑲᖅ ᐅᖃᐅᓯᖃᓚᐅᖅᓯᒪᔪᖅ ᒪᑯᐊ ᐃᓄᐃᑦ ᓇᖕᒥᓂ ᐱᓇᓱᒍᓐᓇᙱᓐᓄᑦ ᐱᔪᓐᓇᐅᑎᖃᙱᓐᓂᖏᑦ ᐊᒃᑐᐃᓯᒪᓂᕋᖅᖢᓂᐅᒃ ᐃᖅᑲᓇᐃᔮᕆᔪᒪᓇᔭᖅᑕᖓᓄᑦ.

“ᐃᒪᓐᓇ ᐱᔪᓐᓇᕐᓂᖃᓚᐅᕈᒪ ᓇᖕᒥᓂᖅ ᐱᔪᒪᓂᕐᒥᒃ, ᐱᕈᕋᔭᓚᐅᖅᑐᖓ ᓯᕗᕚᒃᑲ ᑭᒃᑰᓂᖏᓐᓂᒃ ᖃᐅᔨᒪᓗᒋᑦ, ᑐᑭᓯᓯᒪᓂᖃᓚᐅᖅᑐᖓ ᐃᓅᓂᓐᓂᒃ, ᐊᒃᑐᐊᓂᖃᕐᓂᓐᓂᒃ ᐃᓕᖅᑯᓯᕐᒥᓐ ᐊᒻᒪ ᐊᑐᖅᑕᐅᕙᒃᑐᑐᖄᓗᖕᓂᒃ,” ᐅᖃᖅᑐᖅ.

“ᑕᐃᒪᐃᓚᐅᖅᐸᑦ ᐃᓕᑦᑎᕚᓪᓕᖅᓯᒪᓇᔭᓚᐅᖅᑐᖓ ᑭᓇᐅᓂᓂᒃ ᐊᒻᒪᓗ ᑭᓱᙳᕈᒪᓂᓐᓂᒃ,” ᐅᖃᖅᑐᖅ. “ᐊᒻᒪᓗ ᑕᐃᒪᐃᓚᐅᖅᐸᑦ ᒪᓕᒐᓕᕆᔨᐅᖃᑕᐅᓇᔭᓚᐅᙱᑦᑐᖓ.”

“ᐊᓯᐊᓂᖔᖅ ᐱᓕᕆᐊᖃᕋᔭᓚᐅᖅᑐᖓ ᒪᐅᓇ ᓴᓇᐅᒐᓕᕆᓂᒃᑯᑦ, ᒧᒥᕐᑎᐅᓗᖓ. ᖁᕕᐊᒋᒐᒃᑯ ᒧᒥᖅᖢᓂ, ᑎᑕᐅᓰᑦ ᑐᓴᕐᓂᕆᓪᓗᒋᑦ ᐊᒻᒪᓗ ᐊᓐᓄᕌᕆᔭᐅᕙᒃᑐᑦ.”

ᐊᐱᕆᔭᐅᑎᓪᓗᒍ ᒫᔅᓯ 5-ᒥ ᑭᓱᒥ ᐱᒃᑯᒋᔭᖃᓛᖑᓯᒪᖕᒪᖔᑦ ᓯᕗᓪᓕᖅᐹᒥ ᒪᓕᒐᓕᕆᔨᕐᔪᐊᖑᓪᓗᓂ, ᐅᖃᐅᓯᖃᒪᐅᕐᑐᖅ ᐅᖃᓪᓚᒍᓐᓇᓚᐅᕐᓂᕐᒥᓂᒃ ᑲᑎᒪᕕᒡᔪᐊᖅᒥᓐ ᖃᓰᖅᑐᒻᒪᕆᒃᖢᓂ, ᐊᒻᒪᓗ ᐱᓇᓱᐊᕈᓯᕐᓂᒃ ᕿᒥᕐᕈᐊᖅᑎᑕᐅᓂᖓᒍᑦ ᐅᔾᔨᕈᓱᓕᖅᑎᑦᑎᒐᓱᖕᓂᖅᒥᒃ ᓄᓇᕗᒥᑦ ᐃᒡᓗᑭᒃᓴᓗᐊᕐᓂᖅᒥᒃ, ᐊᒻᒪᓗ ᐅᓇ ᐊᓐᑏᐲᑯᑦ ᐊᖓᔪᖅᑳᖓ ᔭᒦᑦ ᓯᖕ ᐃᖃᓗᖕᓄᑦ ᐳᓛᖅᑎᓪᓗᒍ 2019 ᓂᕈᐊᕐᓇᐅᑉ ᓯᕗᓂᐊᒍᑦ — ᐳᓛᖅᑎᓪᓗᒋᑦ ᐸᓛᒃ ᕼᐋᑦ ᑳᕕᑐᕐᕕᒃᒧᑦ, ᓂᐅᕕᐊᒃᓴᖃᒐᓚᒃᑐᓂᒃ ᐅᐸᒍᑎᓯᒪᓪᓗᑎᒃ ᐊᒻᒪᓗ ᕿᒧᒃᓯᖃᑕᐅᓪᓗᑎᒃ ᐊᒻᒪᓗ ᑲᑐᔾᔨᖃᑎᒌᓂᒃ ᐅᐸᑲᑕᒃᖢᑎᒃ ᓯᕗᓕᐅᑎᒐᓚᖕᓂᒃ.

ᒪᐃ 20-ᒥ ᐅᖃᐅᓯᖏᓐᓂ, ᐅᖃᓚᐅᖅᓯᒪᔪᖅ ᐊᓯᖏᓐᓂ ᐊᓐᑏᐲᖑᖃᑎᖏᓐᓄᑦ ᑐᓵᔭᐅᖃᑦᑕᕐᓂᕋᖅᖢᓂ ᐊᒻᒪᓗ ᐱᓇᓱᒻᒪᕆᓚᐅᕐᓂᕋᖅᖢᓂᒋᑦ ᐃᓄᖕᓂᒃ ᐊᒻᒪ ᓄᓇᕗᒻᒥᐅᓂᒃ ᐃᑲᔪᕈᒪᓂᖏᓐᓂᒃ.

Share This Story

(1) Comment:

  1. Posted by kataisee on

    Mumilaaq atinga titiratriaqsimangittuq Mamilaalasimangmat.

Join the Conversation

Your email address will not be published. Required fields are marked *

*