ᒪᓕᒐᓕᐅᕐᑎ ᓄᖅᑲᖓᑎᑕᐅᓚᐅᑲᒃᑐᖅ ᒪᓕᒐᓕᕆᕕᒡᔪᐊᕐᒥ ᐃᓄᒋᐊᓂᒃ ᐋᖓᔮᓚᐅᕐᓂᖓᓄᑦ

For English version, see MLA suspended from legislature for public intoxication

ᒪᓕᒐᓕᐅᕐᑎ ᔪᐃᓕ ᖃᐃᕐᓂᖅ ᓄᖃᖓᑎᑕᐅᓚᐅᑲᒃᑐᖅ ᓄᓇᕗᒥᑦ ᒪᓕᒐᓕᕆᕕᓄᒡᔪᐊᕐᒥ ᐱᓇᓱᐊᕈᓯᐅᓚᐅᕐᑐᒥ ᐋᖓᔮᕐᓂᕋᖅᑕᐅᑎᓪᓗᒍ ᒪᓕᒐᓕᕆᕕᒡᔪᐊᒥ.

ᖃᐃᕐᓂᖅ, ᑭᒡᒐᖅᑐᐃᔪᖅ ᐊᒥᑦᑐᖅᒥ ᐅᑯᓂᖓ ᓴᓂᕋᔭᒃᒥ ᐊᒻᒪ ᐃᒡᓗᓕᐅᑉ ᐃᓚᖓᓂᒃ, ᑲᑎᒪᔪᓄᑦ ᐅᐸᖁᔭᐅᔪᓐᓃᓚᐅᕐᑐᖅ ᐅᕝᕙᓘᓐᓃᑦ ᑲᑎᒪᔨᕋᓛᓄᑦ ᑲᑎᒪᔪᓂᒃ ᐊᒻᒪ ᑲᑎᒪᔨᐅᓇᓱᖕᓂᕐᒧᑦ ᑲᑎᒪᔪᓄᑦ ᑭᓯᐊᓂ ᔫᓂ 6 ᑎᑭᑉᐸᑦ.

ᒪᓕᒐᓕᐅᕐᑎᑦ ᓂᕈᐊᓚᐅᕐᑐᑦ ᓄᖃᖓᑎᑕᐅᓚᐅᑲᖁᔭᐅᓪᓗᓂ ᑲᑎᒪᔨᕐᔪᐊᓂᒃ ᐅᓇ ᐃᖃᓗᐃᑦ-ᓯᓈᒧᑦ ᒪᓕᒐᓕᐅᕐᑎ ᔮᓇᑦ ᐱᑦᓯᐅᓛᖅ ᐳᕉᔅᑐ ᐱᒋᐊᖅᑎᑦᑎᔾᔪᑎᓕᐅᕐᑎᓪᓗᒍ ᑕᒪᑐᒧᖓ ᔫᓂ 2-ᒥ.

ᐳᕉᔅᑐ ᐱᖁᔨᕗᖔᕈᑎᖓ ᐅᖃᕐᓯᒪᓚᐅᕐᑐᖅ ᖃᐃᕐᓂᖅ “ᐱᓕᕆᐊᖃᕋᓱᓚᐅᕐᒪᓐ ᓈᒻᒪᙱᓐᓂᓕᒃᑯᑦ ᐅᕙᓂ ᑲᑎᒪᕕᒡᔪᐊᒥ ᐃᓚᖃᖅᖢᓂ ᐃᓄᒋᐊᓂᒃ ᐊᖓᔮᕐᓂᖓ.”

ᐅᖃᒃᑲᓐᓂᓚᐅᕐᑐᖅ ᖃᐃᕐᓂᖅ “ᐃᓱᒪᒃᓴᖅᓯᐅᕈᑎᖃᕆᐊᖃᕐᓂᖓᓂᒃ ᑲᒪᒋᔭᖃᕐᓂᖓᓂᒃ ᓂᕈᐊᕐᓯᒪᔪᓂᒃ.”

ᖃᐃᕐᓂᖅ ᐅᖃᓪᓚᒃᖢᓂ ᒪᓕᒐᓕᕆᕕᒡᔪᐊᕐᒥ ᖃᓄᐃᓕᐅᕐᓂᕆᔭᖓ ᐊᑐᓚᐅᕐᓂᖓᓂ. ᑭᓯᐊᓂᓕ ᐅᖃᐅᓯᖃᓚᐅᙱᑦᑐᖅ ᖃᓄᐃᓕᓂᑰᖕᒪᖓ ᐅᕝᕙᓘᓐᓃᑦ ᓇᓂ ᑕᐃᒪᐃᓕᐅᕐᓂᕐᒪᖔᑦ.

“ᐅᕙᓐᓂᑐᐊᖅ ᑕᐃᒪᐃᑎᑦᑐᖓ. ᒪᒥᐊᓇᖅ. ᒪᒥᐊᓪᓚᕆᒃᑐᖓ ᐱᓕᕆᖃᑎᒋᕙᒃᑕᓐᓄᑦ,” ᐅᖃᕐᑐᖅ.

“ᖃᓄᐃᓕᖓᖁᔭᐅᓂᕋ ᖃᓄᐃᓐᓂᕕᓂᓐᓄᑦ ᖃᓄᐃᙱᑦᑎᐊᕐᑐᖅ.”

ᖃᐃᕐᓂᖅ ᐅᖃᓚᐅᕐᑐᖅ ᑲᔪᓯᑐᐃᓐᓇᕐᓂᐊᕈᒪᓪᓗᓂ ᓂᕈᐊᖅᑐᕕᓂᕐᓂᒃ ᐱᔨᑦᑎᕋᕐᑎᐅᓗᓂ ᒪᓕᒐᓕᐅᖅᑎᐅᓂᒃᑯᑦ. ᓯᕗᓪᓕᖅᐹᒥ ᓂᕈᐊᖅᑕᐅᓚᐅᕐᓯᒪᔪᖅ 2017-ᒥ ᐊᒻᒪᓗ ᓂᕈᐊᕆᔭᐅᒃᑲᓐᓂᖅᖢᓂ ᐅᒃᑑᐱᕆᐅᓚᐅᕐᓯᒪᔪᒥᒃ.

“ᐊᑐᓗᐊᔭᓐᓂᓐᓄᑦ ᐃᑲᔪᖅᑕᐅᓇᓱᒃᑲᓗᐊᖅᑐᖓ … ᐅᖃᕐᑕᓐᓂᓪᓗ ᐊᑐᕋᓱᒃᐸᒃᓗᓂ ᐊᒻᒪ ᐃᑲᔪᖅᑕᐅᓇᓱᓪᓚᕆᖕᓂᐊᖅᖢᖓ,” ᐅᖃᕐᑐᖅ.

ᖃᐃᕐᓂᖅ ᐊᓂᓕᖅᖢᓂ ᒪᓕᒐᓕᕆᕕᒡᔪᐊᕐᒥᓐ.

ᐊᐱᕐᓱᖅᑕᐅᑎᓪᓗᒍ ᐳᕉᔅᑐ ᐅᖃᐅᓯᖃᕈᒪᓚᐅᙱᑦᑐᖅ ᖃᓄᐃᒻᒪ ᐃᓄᒋᐊᓂᒃ ᐊᖓᔮᓚᐅᕐᓯᒪᓂᖓᓂᒃ.

“ᐱᓕᕆᐊᖃᖃᑦᑕᕋᑦᑕ ᓈᒻᒪᙱᓕᐅᕈᑎᓂ ᓴᖅᑭᖃᑦᑕᖅᑐᓂᒃ ᐱᓕᕆᐊᖃᖅᑎᓪᓗᑕ ᒪᓕᒐᓕᕆᕕᒡᔪᐊᒥᒃ ᐊᒻᒪᓗ ᐅᓪᓗᒥ ᑕᐃᒪᐃᑐᐃᓐᓇᖅᑲᐅᕗᒍᑦ,” ᐳᕉᔅᑐ ᐅᖃᕐᑐᖅ.

ᒪᓕᒐᓕᕆᕕᒡᔪᐊᕐᒥ ᒪᓕᒐᐃᑦ ᐅᖃᕐᓯᒪᖕᒪᑕ ᐃᓚᒋᔭᐅᔪᑦ ᐱᖁᔭᓕᐅᕈᓐᓇᕐᓂᖏᓐᓂᒃ ᑲᑎᒪᔾᔪᑎᖏᓐᓂᒃ ᐊᒻᒪᓗ ᖃᓄᐃᓕᐅᕐᕕᐅᕙᒃᑐᓂᒃ ᐃᓚᖃᖅᖢᓂ ᐃᓚᒋᔭᐅᔪᓂᒃ ᐋᖅᑭᒃᓯᒪᓇᓱᒃᑎᑦᑎᓂᕐᒥᒃ.

ᐃᓚᖃᕐᒥᔪᖅ ᐱᔪᓐᓇᕐᓂᖃᕐᓂᕐᒥᒃ ᐃᓚᒋᔭᐅᔪᓂᒃ ᓄᖃᖓᑎᑦᑎᓚᐅᑲᒍᓐᓇᕐᓂᕐᒥᒃ ᒪᓕᒐᓕᕆᕕᒡᔪᐊᕐᒥᓐ.

ᓇᓯᓕᒃᒧᑦ ᒪᓕᒐᓕᐅᕐᑎ ᔫᓴᕝ ᐃᓇᒐᔪᒃ ᖁᖅᑭᐊᖅ ᒪᓕᒐᓕᐅᕐᑎᑐᐊᖑᓚᐅᕐᑐᖅ ᐊᖏᙱᖢᓂ ᐱᖁᔨᕗᖔᕈᑎᒥᒃ. ᐊᐃᕕᓕᒃᒧᑦ ᒪᓕᒐᓕᐅᕐᑎ ᓵᓚᒪᓐ ᒪᓕᑭ ᓂᕈᐊᕈᒪᓚᐅᙱᑦᑐᖅ.

ᐊᐱᕐᓱᖅᑕᐅᑎᓪᓗᒍ ᖁᖅᑭᐊᖅ ᐅᖃᓚᐅᕐᑐᖅ “ᖁᕕᐊᓱᓗᐊᓚᐅᙱᓐᓂᕋᖅᖢᓂ” ᐱᖁᔨᕗᖔᕈᑎ ᐱᒋᐊᖅᑎᑦᑎᔾᔪᑎᐅᓂᖓᓂᒃ, ᑭᓯᐊᓂᓕ ᖃᓄᐃᓕᐅᕈᑎᓂᒃ “ᑲᒪᒋᔭᖃᖃᑦᑕᕆᐊᖃᕋᑦᑕ.”

“ᓂᐱᒋᔭᐅᖕᒪᓐ ᓄᓇᓕᖁᑎᖏᓐᓄᑦ ᐊᒻᒪᓗ ᑖᒃᑯᐊ ᓂᐱᖃᕆᐊᖃᖅᖢᑎᒃ,” ᖁᖅᑭᐊᖅ ᐅᖃᕐᑐᖅ.

“ᓂᐱᖃᕈᓐᓇᑦᑎᐊᕐᒪᓐ.”