ᒪᓕᒐᓕᐅᖅᑎᐅᓂᑯ ᐃᓕᓴᐱ ᓯᐅᑎᐊᐱᒃ ᐸᐅᒃᑐᑎᒃᑯᓐᓄᑦ ᑲᑎᒪᔨᐅᖃᑕᐅᓕᕐᑐᖅ

For English version, see Former MLA Elisapee Sheutiapik joins Pauktuutit board

ᐊᑯᓂᐊᓗᒃ ᐃᖃᓗᖕᓂ ᒪᓕᒐᓕᕆᓂᕐᒥᒃ ᐱᓕᕆᐊᖃᕐᓯᒪᔪᖅ ᐊᒻᒪᓗ ᐊᓂᒍᐃᓵᕐᓂᑰᓪᓗᓂ ᓄᓇᕗᑦᒥ ᐅᑭᐅᕐᑕᖅᑐᕐᒥ ᓯᓚᑦᑐᖅᓴᕐᕕᒃᒥ ᐃᓚᒋᔭᐅᓕᕐᑑᒃ ᐸᐅᒃᑑᑎᑦ ᐃᓄᐃᑦ ᐊᕐᓇᐃᑦ ᑲᓇᑕᒥ ᑲᑎᒪᔨᓄᑦ.

ᐸᐅᒃᑑᑎᑦ, ᑲᓇᑕᒥ ᑲᑐᔾᔨᖃᑎᒌ ᐃᑲᔪᖅᑐᐃᔨᐅᔪᑦ ᐃᓄᖕᓂ ᐊᕐᓇᓂᒃ ᑐᓴᖅᑎᑦᑎᓕᓚᐅᕐᑐᑦ ᑐᓴᒐᒃᓴᑎᒍᑦ ᐋᒐᓯ 11ᒥ ᐅᑯᐊ ᐃᓕᓴᐱ ᓯᐅᑎᐊᐱᒃ ᐊᒻᒪ ᐃᓯᓕᓇ ᓇᑦᓯᐊᐱᒃ ᑲᑎᒪᔨᐅᖃᑕᐅᓂᐊᓕᕐᓂᖏᓐᓂᒃ ᑲᑐᔾᔨᖃᑎᒌᑦ ᑭᖑᓪᓕᕐᒥ ᐊᕐᕌᒍᒧᑦ ᑲᑎᒪᕕᒡᔪᐊᓕᖅᐸᑕ 2024ᒥ.

ᓯᐅᑎᐊᐱᒃ ᓄᓇᕗᑦ ᐊᖓᔪᖅᑳᖃᕐᕕᐊᓂᒃ ᒪᐃᔭᐅᓚᐅᕐᓯᒪᔪᖅ 2003ᒥᑦ 2010ᒧᑦ ᐊᒻᒪᓗ ᑭᒡᒐᖅᑐᐃᓚᐅᕐᓯᒪᓪᓗᓂ ᐃᖃᓗᐃᑦ-ᓯᓈᓄᑦ ᓄᓇᕗᒥᑦ ᒪᓕᒐᓕᕆᕝᕕᖓᓂᒃ 2017ᒥᑦ 2021ᒧᑦ. ᒥᓂᔅᑕᐅᖃᑕᐅᓚᐅᕐᓯᒪᔪᖅ ᐃᓄᓕᕆᔨᒃᑯᓐᓄᑦ ᐊᒻᒪᓗ ᒥᓂᔅᑕᐅᓪᓗᓂ ᑲᒪᒋᔭᖃᖅᖢᓂ ᐊᖏᕐᕋᖃᙱᑦᑐᓕᕆᓂᕐᒥᒃ, ᓂᕆᔭᒃᓴᖃᒃᑲᓐᓂᖅᑎᑦᑎᓇᓱᖕᓂᕐᒥᒃ ᐊᒻᒪᓗ ᐊᕐᓇᓂᒃ ᑭᒡᒐᖅᑐᐃᓂᕐᒥᒃ.

ᓯᐅᑎᐊᐱᒃ ᐸᐅᒃᑑᑎᒃᑯᓐᓄᑦ ᐱᓕᕆᐊᖃᕐᓯᒪᔪᖅ ᑖᒃᑯᓄᖓ ᐊᖓᔪᖅᑳᖑᓪᓗᓂ 2010ᒥᑦ 2014ᒧᑦ. ᒫᓐᓇᓕ ᑲᑎᒪᔨᐅᔪᖅ ᑭᒡᒐᖅᑐᐃᓪᓗᓂ ᐃᖃᓗᖕᓂ.

ᓇᑦᓯᐊᐱᒃ, ᑖᓐᓇᑦᑕᐅᖅ ᐃᖃᓗᖕᓂ ᓄᓇᓕᒃ, ᐃᓅᓱᒃᑐᓂᒃ ᑭᒡᒐᖅᑐᐃᔨᐅᓪᓗᓂ ᐃᓄᐃᑦ ᓄᓇᖓᓂᒃ ᓄᓇᕗᒥᑦ. ᐊᓂᒍᐃᓵᓚᐅᕐᑐᖅ ᐃᓄᐃᑦ ᒥᒃᓵᓄᑦ ᐃᓕᓐᓂᐊᒐᒃᓴᓂᒃ ᓄᓇᕗᑦᒥ ᐅᑭᐅᕐᑕᖅᑐᕐᒥ ᓯᓚᑦᑐᖅᓴᕐᕕᒃᒥ.

ᓯᐅᑎᐊᐱᑦ ᐊᒻᒪ ᓇᑦᓯᐊᐱᒃ ᐃᓚᒋᔭᐅᓕᖅᑑᒃ 14ᓂ ᑲᑎᒪᔨᓄᑦ, ᑖᒃᑯᐊᓗ ᐃᓄᐃᑦ ᓄᓇᖏᓐᓂᙶᖅᓯᒪᓪᓗᑎᒃ ᐊᔾᔨᒌᙱᑦᑐᓂᒃ.

“ᖃᐅᔨᒪᔪᒍᑦ ᑖᒃᑯᐊ ᓄᑖᒃ ᑲᑎᒪᔨᙳᖅᑎᑕᐅᔫᒃ ᐃᑲᔪᕈᓐᓇᕐᓂᐊᕐᓂᖏᓐᓂᒃ ᐅᕙᑦᑎᓐᓂ ᓯᕗᓕᐅᖅᑎᐅᔪᑎᒍᑦ ᐊᒻᒪᓗ ᑐᙵᓱᒃᑎᑉᐸᕗᑦ ᐊᐅᒃᑑᑎᒃᑯᓐᓄᑦ,” ᐸᐅᒃᑑᑎᒃᑯᑦ ᐊᖓᔪᖅᑳᖓ ᔨᐅᕆ ᓵᑉ ᐅᖃᓚᐅᕐᑐᖅ ᑐᓴᒐᒃᓴᑎᒍᑦ.