ᒪᕐᕉᒃ ᓄᓇᕕᒃᒥᐅᑖᒃ ᐃᓅᔪᓐᓃᖅᐴᒃ ᓄᕙᒡᔪᐊᕐᓇᖅ-19-ᒧᑦ

ᓄᓇᖃᕐᑐᑦ ᐊᐃᑦᑐᕐᑕᐅᓯᒪᔪᑦ ᐋᓐᓂᐊᕐᓇᖅᑐᒥᒃ ᐋᓐᓂᐊᕕᐊᓗᖕᒦᑦᑐᑦ ᖃᓪᓗᓈᓂ

ᓄᓇᕕᒃᒥ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐅᖃᓚᐅᕐᑐᑦ ᒪᕐᕉᒃ ᓄᓇᕕᒃᒥᐅᑖᒃ ᐋᓐᓂᐊᖃᓕᕐᓯᒪᔫᒃ ᓄᕙᒡᔪᐊᕐᓇᖅ-19-ᒥ ᐃᓅᔪᓐᓃᓚᐅᕐᑑ ᖃᓪᓗᓈᓂ ᐋᓐᓂᐊᕕᐊᓗᖕᒥᓐ. (ᐊᔾᔨᙳᐊᖁᑎᖓ ᓴᐃᕋ ᕌᔾᔪᔅ)

By ᓄᓇᑦᓯᐊᕐᒥ ᐱᕙᓪᓕᐊᔪᑦ

For an English version of this story, see Two Nunavik residents die with COVID-19

ᒪᕐᕉᒃ ᓄᓇᕕᒃᒥᐅᑖᑦ ᐊᐃᑦᑕᖅᑐᐅᓯᒪᔫᒃ ᓄᕙᒡᔪᐊᕐᓇᖅ-19-ᒥ ᐃᓅᔪᓐᓃᕐᐴᒃ, ᐊᕕᒃᑐᕐᓯᒪᓂᒃᑯᑦ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᑲᑎᒪᔨᖏᑦ ᑐᓴᖅᑎᑦᑎᓚᐅᕐᑐᑦ ᕕᕝᕗᐊᕆ 25-ᒥᑦ.

ᑕᒪᕐᒥᒃ ᑖᒃᑯᐊᒃ ᐋᓐᓂᐊᕕᕐᒧᐊᖅᑕᐅᓚᐅᕐᑐᑦ ᖃᓪᓗᓈᓂ ᐊᓯᖏᓐᓄᑦ ᐋᓐᓂᐊᒧᑦ ᐊᒻᒪᓗ ᐊᐃᑦᑐᖅᑕᐅᓪᓗᑎᒃ ᓄᕙᒡᔪᐊᕐᓇᖅ-19-ᒥᑦ ᐋᓐᓂᐊᕕᖕᒦᑎᓪᓗᒋᑦ, ᓄᓇᕕᒃᒥ ᓄᓇᓕᓕᒫᑦ ᐋᓐᓂᐊᖃᕐᓇᙱᑦᑐᓕᕆᔨᖏᑦ ᐊᒻᒪ ᐃᓄᓕᕆᔨᖏ ᑐᓴᒐᒃᓴᒃᑯᑦ ᑐᓴᖅᑎᑦᑎᓚᐅᕐᑐᑦ.

ᐋᓐᓂᐊᕕᒃᒧᑦ ᑲᑎᒪᔩᑦ ᐅᖃᓚᐅᕐᑐᑦ ᓇᓗᓇᐃᕐᓯᔪᓐᓇᙱᓐᓂᕋᖅᖢᑎᒃ ᑖᒃᑯᐊᒃ ᒪᕐᕉᒃ ᓄᓇᕕᒻᒥᐅᑖᒃ ᐃᓅᔪᓐᓃᓚᐅᕆᐊᒃᓴᖏᓐᓂᒃ ᐋᓐᓂᐊᕐᓇᖅᑐᒧᑦ, ᑭᓯᐊᓂᓕ ᑕᒪᕐᒥᒃ ᓄᓇᕕᒃᒥᐅᑖᒃ ᐋᓐᓂᐊᖃᓚᐅᕐᑑᒃ ᐃᓅᔪᓐᓃᖅᑎᓪᓗᒋ, ᑕᐃᒪᓕ ᓇᓗᓇᐃᖅᑕᐅᖃᑕᐅᓯᒪᓂᐊᕐᑐᑦ ᐃᓅᔪᓐᓃᕐᓯᒪᓂᖏᓐᓂᒃ ᓄᕙᒡᔪᐊᕐᓇᖅ-19-ᒧᑦ.

ᐅᑯᐊᒃ ᓯᕗᓪᓕᖅᐹᖑᔫᒃ ᓄᓇᕕᒻᒥᐅᑕᐅᓪᓗᑎᒃ ᓇᓗᓇᐃᖅᑕᐅᓪᓚᕆᒃᖢᑎᒃ ᓄᕙᒡᔪᐊᕐᓇᖅ-19-ᒧᑦ ᐃᓅᔪᓐᓃᕐᓂᖏᓐᓂᒃ.

ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᑲᑎᒪᔨᖏᑦ ᓇᓗᓇᐃᕐᓯᓚᐅᙱᑦᑐᑦ ᑭᒃᑰᖕᒪᖔᑕ ᐅᕝᕙᓘᓐᓃᑦ ᖃᖓ ᐃᓅᔪᓐᓃᓚᐅᕆᐊᒃᓴᖏᓐᓂᒃ. ᑭᓯᐊᓂᓕ ᐱᓕᕆᔨᒻᒪᕆᐅᔪᑦ ᐅᖃᕈᓐᓇᓚᐅᕐᑐᑦ ᑖᒃᑯᐊ ᐊᒃᑐᐃᓯᒪᙱᓐᓂᖏᓐᓂᒃ ᓄᓇᕕᒻᒥᐅᓂᒃ.

“ᐅᑯᐊ NRBHSS ᖃᐅᔨᒪᖁᔨᕗᑦ ᐃᓚᒋᔭᐅᔪᓂᒃ ᐃᓱᒪᒋᔭᖃᑦᑎᐊᕐᓂᖏᓐᓂᒃ, ᓄᓇᓕᖕᓂᒃ ᐊᒻᒪᓗ ᖃᓂᒃᓴᓚᐅᕐᑐᓂᒃ ᑖᒃᑯᓂᖓ ᐃᓅᔪᓐᓃᕐᓂᑯᓂᒃ,” ᑐᓴᒐᒃᓴᓕᐊᖑᔪᖅ ᐅᖃᕐᓯᒪᓚᐅᕐᑐᖅ.

ᑕᐃᒪᙵᓪᓕ ᐋᓐᓂᐊᕕᒡᔪᐊᕐᓇᖅ ᐱᒋᐊᓚᐅᕐᓯᒪᑎᓪᓗᒍ 41-ᓂᒃ ᓄᓇᕕᒻᒥᐅᓂᒃ ᐋᓐᓂᐊᖅᑖᖅᓯᒪᔪᖃᓕᕐᑐᖅ, ᐊᑕᐅᓯᖅ ᓱᓕ ᐋᓐᓂᐊᖃᓪᓚᕆᒃᖢᓂ.

ᓄᓇᕕᒻᒥᐅᑕᖅ ᐊᕐᓇᖅ ᒪᓐᑐᕆᐊᒥ ᑲᒪᒋᔭᐅᔭᕆᐊᓕᖕᓃᑦᑐᕕᓂᖅ ᐊᕐᕌᒍᒐᓴᖕᓂ ᐃᓅᔪᓐᓃᓚᐅᕐᓯᒪᔪᖅ ᐄᐳᕈᓪ 2020-ᒥᒃ ᓇᐃᓴᖅᑕᐅᖃᑕᐅᓯᒪᙱᒃᑲᓗᐊᖅᖢᓂ ᓄᓇᕕᒻᒥ ᖃᓄᐃᑦᑐᕕᓂᕐᓂᒃ.

4,000 ᐅᖓᑎᑦᑎᐊᖓᓂ ᓄᓇᕕᒻᒥᐅᑦ ᑲᐱᔭᐅᓯᒪᓕᕐᑐᑦ ᑖᔅᓱᒥᖓ ᐋᓐᓂᐊᖃᔾᔭᐃᒃᑯᑎᒥᒃ.

ᑭᓇᑐᐃᓐᓇ ᓄᕙᒡᔪᐊᕐᓇᖅ-19-ᒥᒃ ᐃᒃᐱᒋᔭᓕᒃ, ᐃᓚᖃᕐᓗᓂ ᐆᓇᑲᑕᖕᓂᕐᒥᒃ, ᓄᕙᑲᑕᖕᓂᕐᒥ ᐊᔾᔨᒋᙱᑕᖓᓂᒃ, ᐊᓂᕐᓵᑦᑎᐊᑲᑕᙱᓐᓂ, ᓇᐃᒪᔪᓐᓃᕐᓂᖅ, ᑲᒃᑭᓕᑲᑕᖕᓂᖅ ᐅᕝᕙᓘᓐᓃᑦ ᐃᒡᒋᐊᕐᓗᖕᓂᕐᒥᒃ ᐃᒃᐱᒋᔭᖃᕐᑐᑦ ᐅᖄᓚᒋᐊᖃᖅᑐᑦ ᓄᓇᖏᓐᓂ ᐋᓐᓂᐊᕕᖕᓄᑦ ᐅᕗᖓᓘᓐᓃᑦ 1-888-662-7482 ᐃᑲᔪᖅᑕᐅᔪᒪᕝᕕᒃᒧᑦ.

Share This Story

(0) Comments

Join the Conversation

Your email address will not be published. Required fields are marked *

*