ᒪᕐᕉᒃ ᕿᑎᕐᒥᐅᓂ ᓄᓇᓖ ᐸᕐᓇᒃᓯᒪᓕᕐᑐᑦ ᑲᓃᑎᐊᓐ ᓄᐊᑦ ᓱᒃᑲᔪᖏᓐᓂ ᑎᑭᕝᕕᐅᖃᑦᑕᔾᔮᔪᓐᓃᕐᓂᖏᓐᓄᑦ

ᐃᖃᓗᒃᑑᑦᑎᐊᕐᒥ ᐊᖓᔪᖅᑳᖑᓂᑯ ᐃᓱᒫᓘᑎᓕᒃ ᓱᒃᑲᔪᓂᒃ ᖃᖓᑕᓲᖃᕈᓐᓃᕐᓂᖅ ᐊᒃᑐᐃᓂᐊᕆᐊᒃᓴᖓᓂᒃ ᐳᓚᕋᖅᑐᓕᕆᓂᕐᒥᒃ, ᐋᓐᓂᐊᕐᕕᓕᐊᕆᐊᓕᖕᓂᒃ ᐊᒻᒪ ᓂᕿᑖᑲᑕᒍᓐᓇᕐᓂᕐᒥᒃ

ᖁᒡᓗᖅᑑᖅ ᒥᑦᑕᕐᕕᒃ ᑲᓃᑎᐊᓐ ᓄᐊᑦ ᓱᒃᑲᔪᖏᓐᓂ ᑎᑭᕝᕕᐅᖃᑦᑕᕈᓐᓃᕐᓂᐊᓯᔪᖅ ᑕᒪᑐᒪ ᐊᕐᕌᒎᑉ ᐃᓗᐊᒍ ᑖᒃᑯᐊ ᒥᑭᓐᓂᕐᓴᓂᒃ ᖃᖓᑕᓲᓂ ᑕᕝᕗᖓ ᐊᒻᒪ ᐃᖃᓗᒃᑑᑦᑎᐊᕐᒧ ᑎᑭᑎᑦᑎᖃᑦᑕᒑᕐᓂᐊᓕᖅᖢᑎᒃ. (ᐊᔾᔨᓕᐅᕆᔨ ᑕᔅᑎᓐ ᐸᑖᕐ)

By ᑕᐃᕕᑦ ᕕᐊᓐ
ᓄᓇᓕᖕᓂ ᑐᓴᒐᒃᓴᓕᐅᕐᑎᐅᓂᕐᒧᑦ ᐱᓕᕆᐊᒃᓴᓄᑦ ᑐᓴᒐᒃᓴᓕᐅᕐᑎ

For an English version of this story, please see 2 Kitikmeot hamlets brace for loss of Canadian North jet service.

ᒪᕐᕉᒃ ᕿᑎᕐᒥᐅᓂᒃ ᓄᓇᓖᒃ ᑲᓃᑎᐊᓐ ᓄᐊᑦ ᓱᒃᑲᔪᓂ ᖃᖓᑕᓲᓂ ᑎᑭᕝᕕᐅᖃᑦᑕᑦᔮᔪᓐᓃᖅᑑᒃ ᓲᖃᐃᒻᒪ ᒥᕝᕕᖏᑦ ᐊᕐᕌᒍᒐᓴᒻᒪᕆᖕᓂ ᓱᓕ ᕿᑯᖅᑕᐅᔾᔮᙱᒻᒪᑕ.

ᑖᒃᑯᐊ ᑲᒻᐸᓂᐅᔪᑦ ᐅᖃᓚᐅᕐᓯᒪᖕᒪᑕ ᐄᐳᕉᓚᐅᕐᓯᒪᔪᒥᒃ ᐊᑐᖃᑦᑕᔾᔮᔪᓐᓃᕐᓂᕋᖅᖢᑎᒃ 737-200 ᖃᖓᑕᓲᓂ ᓲᖃᐃᒻᒪ ᐊᑐᕈᓐᓇᕐᓂᖏᑦ ᐃᓱᓕᓕᕐᒪᑕ ᐊᒻᒪᓗ ᐊᑭᑐᓗᐊᕋᔭᖅᖢᑎᒃ ᐅᖓᕙᖅᑕᐅᓇᓱᒡᓗᑎᒃ. ᑖᒃᑯᐊ ᖃᖓᑕᓲᑦ ᐊᑐᕈᓐᓃᕌᓂᒃᑐᖅ 737-200 ᓱᒃᑲᔪᕐᒥ ᐱᖁᑎᒋᔭᖏᓐᓂᒃ.

ᑭᓯᐊᓂᓕ ᐅᑯᐊ ᐃᖃᓗᒃᑑᑦᑎᐊᖅ ᐊᒻᒪ ᖁᒡᓗᖅᑑᖅ ᒥᑭᓐᓂᕐᓴᓄᑦ ᖃᖓᑕᓲᓄᑦ ATR 42-500 ᐱᔨᑦᑎᕋᖅᑕᐅᓂᐊᕐᑐ ᓲᖃᐃᒻᒪ ᒥᕝᕕᖏᑦ ᕿᑯᖅᑕᐅᓯᒪᙱᒻᒪᑕ ᑕᐃᒪᓐᓇᓗ ᓱᕋᒃᐸᓪᓕᐊᔾᔪᑎᐅᓇᔭᖅᖢᑎᒃ ᓱᒃᑲᔪᓄᑦ.

ᐃᖃᓗᒃᑑᑦᑎᐊᕐᒥ ᕼᐋᒻᒪᓚᒃᑯᓐᓄᑦ ᑎᑎᕋᖅᑎᒋᔭᐅᓂᑯ ᒪᕆᐊ ᓕᒧᓯᓐ ᐅᖃᓚᐅᕐᑐᖅ ᐊᓯᔾᔨᕈᑎᓂᒃ ᐅᔾᔨᕈᓱᓕᕐᓂᕋᓚᐅᕐᑐᖅ ᐊᑕᐅᓯᕐᒥ ᓱᒃᑲᔪᒥᒃ ᐊᑐᕈᓐᓃᕐᓯᒪᓕᕐᓂᖏᓐᓂᒃ ᐊᕐᕌᓂᐅᓚᐅᕐᑐᖅ.

“ᐱᔨᑦᑎᕋᐅᑎᓕᕆᓂᕐᐳᑦ ᑲᑕᒃᐹᓪᓕᕐᑐᖅ,” ᐅᖃᕐᑐᖅ ᓕᒧᓯᓐ, ᑖᓐᓇᓕ ᐊᐅᓚᑦᑎᔨ ᑐᑭᒧᐊᖅᑎᑦᑎᔨᐅᓕᕐᑐᖅ ᓄᓇᕗᒥᑦ ᓄᓇᓕᖕᓄᑦ ᑲᑐᔾᔨᖃᑎᒌᓄᑦ.

“ᐱᖁᑎᖃᕐᕕᕗᑦ ᓂᐅᕕᕐᕕᒃᒥ ᐃᓗᓕᖃᐅᕈᓐᓃᖅᑐᑦ ᓲᖃᐃᒻᒪ ᓂᕿᓂᒃ ᐊᒻᒪ ᐱᖁᑎᓂᒃ ᑎᑭᑦᑐᖃᑲᑕᒍᓐᓃᕐᒪᑦ.”

ᑲᓃᑎᐊᓐ ᓄᐊᑦ ᐅᖃᓚᐅᕐᓯᒪᔫᒐᓗᐊᑦ ᐱᖃᑎᖓ 737-200 ᐊᑐᖅᑕᐅᔾᔮᔪᓐᓃᕐᓂᕋᖅᑕᐅᓪᓗᓂ ᑕᒪᑐᒪᓂ ᐊᕐᕌᒍᒥᒃ, ᑭᓯᐊᓂᓕ ᐅᖃᓪᓚᒃᑎᒋᔭᐅᔪᑦ ᐋᓂ ᑖᒻᓕᓐᓴᓐ ᐅᖃᓚᐅᕐᓯᒪᖕᒪᓐ ᖃᕋᓴᐅᔭᒃᑯᑦ ᑎᑎᕋᖅᖢᓂ ᑖᒃᑯᐊ ᓱᓕ ᑲᒻᐸᓂ ᐃᓱᒪᓕᐅᕆᓚᐅᙱᓐᓂᕋᖅᖢᓂᒋᑦ ᑕᒪᓐᓇ ᖃᑯᒍ ᑕᐃᒪᐃᓐᓂᐊᕆᐊᒃᓴᖓᓂᒃ.

ᓕᒧᓯᓐ ᐅᖃᓚᐅᕐᑐᖅ ᐱᖃᑎᖓ ᓱᒃᑲᔪᕐᔪᐊᖅ ᐊᑐᕈᓐᓃᖅᐸᑦ ᐊᒃᑐᐃᓂᐊᕐᓂᕋᖅᖢᓂᐅᒃ ᐳᓚᕋᖅᑐᓕᕆᓂᕐᒥᒃ, ᐱᖁᑎᓂᒃ ᐅᓯᔭᐅᕙᒃᑐᓂᒃ ᐊᒻᒪᓗ ᐋᓐᓂᐊᕕᓕᐊᖅᑐᓄᑦ ᐊᑭᓕᐅᑎᓂᒃ.

“ᐃᒃᓯᕙᐅᑕᐃ ᖃᔅᓯᑐᐃᓐᓇᐅᕙᖕᒪᑕ, ᕼᐃᓖ? ᑕᐃᒪᓕ ᑭᖑᕙᕆᐊᕈᑎᐅᖃᑦᑕᕐᓂᐊᕐᑐᖅ ᐊᐅᓪᓚᕐᓂᐊᕐᑐᓄᑦ,” ᐅᖃᕐᑐᖅ.

ᓄᓇᓖᑦ ᓯᕗᓪᓕᐅᔾᔨᔭᕆᐊᖃᕐᒪᑕ ᕿᑯᖅᑕᐅᑎᑦᑎᓂᕐᒥᒃ ᐊᒻᒪᓗ ᑕᒃᖠᒋᐊᖅᑕᐅᓗᓂ ᒥᕝᕕᒃ, ᐅᖃᕐᑐᖅ, ᐊᒻᒪᓗ ᒫᓐᓇ ᐋᔩᖃᑎᖃᕐᑐᑦ ᓄᓇᕗᒥᑦ ᒐᕙᒪᒃᑯᓐᓂᒃ ᐃᑲᔫᑎᒃᓴᓄᑦ.

ᐃᖃᓗᒃᑑᑦᑎᐊᖅ ᐱᕈᕐᐸᓪᓕᐊᖕᒪᑦ ᐊᒻᒪᓗ ᖃᖓᑕᓲᒃᑯᕕᖃᑦᑎᐊᕆᐊᖃᖅᖢᓂ ᐊᒻᒪ ᖃᖓᑕᓲᓂᒃ, ᓕᒧᓯᓐ ᐅᖃᕐᑐᖅ.

ᑲᓃᑎᐊᓐ ᓄᐊᑦ ᓄᓇᑦᓯᐊᕐᒥ ᐱᕙᓪᓕᐊᔪᓂᒃ ᐊᐱᕐᓱᖅᑕᐅᔪᒪᓚᐅᙱᑦᑐᑦ, ᑭᓯᐊᓂᓕ ᑖᒻᓕᓐᓴᓐ ᐅᖃᓚᐅᕐᑐᖅ ᖃᖓᑦᑕᐅᑎᑦ ᐊᒻᒪᓗ ᐱᖁᑎᓄᑦ ᐊᑭᓕᐅᑎᐅᕙᒃᑐᑦ ᑕᒪᐅᖓ ᐊᑭᒃᑐᕆᐊᔾᔮᙱᑦᑐᑦ ᓱᒃᑲᔪᖃᕈᓐᓃᕐᓂᖓᓄᑦ.

ᐅᖃᓚᐅᕐᑐᖅ ᒫᓂ ᖁᓕᓂ ᐃᒃᓯᕙᐅᑕᖃᙱᓐᓂᕐᓴᐅᓇᔭᕐᓂᖓᓂᒃ ᐅᑯᐊ ᖃᖓᑕᓲᑦ ᓱᒃᑲᔪᓂᒡᓕ.

ᖁᒡᓗᖅᑑᕐᒥᓪᓕ, ᒪᐃᔭᐅᑉ ᑐᒡᓕᖓ ᓇᐃᑏᓐ ᒪᒃᒪᓇᒥ ᐅᖃᓚᐅᕐᑐᖅ ᒥᕝᕖᑦ ᕿᑯᓕᖅᑕᐅᔭᕆᐊᖃᕐᓂᖏᑦ ᐅᖃᐅᓯᐅᓯᒪᔪᑦ ᓄᓇᓕᖕᓄᑦ ᑲᑎᒪᔨᓄᑦ ᑭᓯᐊᓂᓕ ᐊᑭᑐᔪᕈᓘᖕᒪᑦ ᐊᒻᒪᓗ ᓯᕗᓪᓕᐅᑎᑕᐅᓯᒪᓇᓂ.

“ᒥᕝᕕᒃ ᕿᑯᖅᑕᐅᓂᐊᕐᐸᑦ ᐊᑭᑐᔪᐊᓘᓇᔭᕐᒪᑦ ᐱᓕᕆᐊᕆᓗᒍ ᐊᒻᒪᓗ ᑲᓇᒋᔭᐅᖃᑦᑕᐃᓐᓇᕆᐊᖃᕋᔭᖅᖢᓂ,” ᐅᖃᓚᐅᕐᑐᖅ ᐊᐱᖅᓱᖅᑕᐅᑎᓪᓗᒍ.

“ᐱᐅᓇᔭᕐᑐᖅ ᑕᐃᒪᓐᓇ ᐱᓯᒪᓗᒍ ᑭᓯᐊᓂᓕ ᑕᒪᑐᒧᖓ ᐅᖃᐅᓯᖃᒃᑲᓐᓂᕆᐊᖃᕋᔭᕋᑦᑕ.”

ᑕᒪᒃᑯᐊ ᓱᒃᑲᔪᐃᑦ ᐊᖏᓂᕐᓴᐅᒐᓗᐊᕐᑎᓪᓗᒋ ᐊᒻᒪᓗ ᐱᖁᑎᓂ ᐅᓯᓂᕐᓴᐅᔪᓐᓇᖅᖢᑎᒃ ᐊᒻᒪᓗ ᓱᒃᑲᓂᕐᓴᐅᓪᓗᑎᒃ turboprop ᖃᖓᑕᓲᓂᒃ, ᓄᓇᓖᑦ ᒥᑭᓐᓂᕐᓴᓂ ᖃᖓᑕᓲᓂᒃ ᓱᖏᐅᑎᓯᒪᓂᕐᓴᐅᓂᕋᖅᑕᖏᑦ ᐊᒻᒪᓗ ᖃᐅᔨᒪᓪᓗᑎᒃ ᑲᓃᑎᐊᓐ ᓄᐊᑦ ᐱᔨᑦᑎᕋᐃᓐᓇᕐᓂᐊᕐᓂᖓᓂᒃ, ᐅᖃᕐᑐᖅ.

“ᑕᒪᐃᑎᒍᓪᓕ, ᓄᓇᓖ ᓱᒃᑲᔪᓂ ᑭᖑᓂᖃᕐᓂᐊᕐᑐᑦ,” ᒪᒃᒪᓇᒥ ᐅᖃᕐᑐᖅ. “ᑭᓯᐊᓂᓕ ᑕᐃᒪᓐᓇᐅᖕᒪᑦ, ᐱᐅᓂᕐᓴᐅᓚᐅᕐᑐᖅ ᓱᒃᑲᔪᖃᖅᖢᓂ.”

ᐊᓯᖏᑦ ᒪᕐᕉᒃ ᖃᖓᑕᓲᒃ, ᓴᒥᑦ ᐃᐅ ᐊᒻᒪ ᐸᕙᓗ ᖃᖓᑕᓲᑦ, ᐱᔨᑦᑎᕋᖃᑦᑕᕐᒥᔪᑦ ᓄᓇᓕᖕᓂ, ᐅᖃᕐᑐᖅ.

Share This Story

(0) Comments