ᓄᑖᑦ ᑲᐃᓪᓗᐊᕈᑎᑦ ᐃᓯᖅᐳᑦ ᐅᓪᓗᕕᖕᒧᑦ

For English version, see New wheelchairs roll into Ullivik

ᐊᔾᔨᖁᑎᒥᒃ ᓄᓇᕕᖕᒥ ᐋᓐᓂᐊᕕᓕᐊᖅᑐᒥ ᐃᓄᖕᒥ ᐃᑭᒪᔪᒥ ᐃᒡᓗᕈᓯᖓᓄᑦ ᒥᑦᑕᕐᕕᖕᒥ ᐃᑦᑎᕐᕕᖕᓄᑦ ᑲᓕᐅᔪᒥ ᑲᔪᖏᖅᓴᐃᓯᒪᕗᖅ ᑐᓂᓯᓂᐅᔪᒥ ᖃᔅᓯᒐᓚᖕᓂ ᑲᐃᓪᓗᐊᕈᑎᓂᑦ ᐅᓪᓗᕕᒃ ᐋᓐᓂᐊᕕᓕᐊᖅᑐᓄᑦ ᑐᔪᕐᒥᕕᐅᔪᒧᑦ.

ᔮᓐ−ᒌ ᓴᐃᓐᑦ−ᐊᐅᐱᓐ, ᐊᑖᑕᑦᑎᐊᖑᔪᒥ ᑲᖏᖅᓱᐊᓗᔾᔪᐊᕐᒥ, ᖃᓪᓗᓈᑦ ᓄᓇᖓᓐᓄᑦ ᐊᐅᓪᓛᒐᔪᒃᐳᖅ ᑳᓐᓱᒧᑦ ᐃᓅᓕᓴᖅᑕᐅᓂᕐᒧᑦ. ᑕᐃᒪᓐᓇᑎᑐᑦ ᐊᒥᓱᓂ ᓄᓇᕕᖕᒥ ᐋᓐᓂᐊᕕᓕᐊᖅᑐᓄᑦ ᐃᓄᖕᓂ, ᑐᔪᕐᒥᓲᖑᕗᖅ ᐅᓪᓗᕕᖕᒥ, ᑐᔪᕐᒥᑎᑦᑎᕙᒃᑐᒥ ᐊᐅᓪᓛᖅᑐᓂ ᐋᓐᓂᐊᕕᓕᐊᖅᑐᓂ ᐊᒻᒪ ᒪᓕᒃᑎᖏᓐᓂ.

ᓄᖑᓴᖅᑕᐅᓂᕐᒧᑦ ᐅᐸᒋᐊᖃᕐᓂᐅᓚᐅᖅᑐᒥ ᒫᔾᔨᒥ, ᓴᐃᓐᑦ−ᐊᐅᐱᓐ ᐅᑎᓚᐅᖅᐳᖅ ᐅᓪᓗᕕᖕᒧᑦ ᖃᐅᔨᓪᓗᓂᓗ ᑲᐃᓪᓗᐊᕈᑎᓂ ᐊᑐᐃᓐᓇᐅᔪᖃᓚᐅᙱᓐᓂᖓᓂ ᐃᒡᓗᕈᓯᖓᓄᐊᖅᑎᑦᑎᓂᕐᒧᑦ.

ᐱᓱᒍᓐᓇᕐᓇᓂ, ᐊᒻᒪ ᐃᒡᓗᕈᓯᖓᓄᐊᕈᒪᓪᓗᓂ ᑕᖃᐃᖅᓯᕆᐊᖅᑐᕐᓂᕐᒧᑦ, ᓴᐃᓐᑦ−ᐊᐅᐱᓐ ᐃᑭᒪᔪᒪᓚᐅᖅᐳᖅ ᐃᑦᑎᕐᕕᖕᓄᑦ ᑲᓕᐅᔪᒥ.

ᐊᔾᔨᓕᐊᖑᔪᓂ ᑕᐃᔅᓱᒪᓂ ᐅᓪᓘᔪᒥ ᐃᓕᔭᐅᔪᒥ ᐃᓅᖃᑎᒌᖑᔪᓄᑦ ᐃᕐᙳᑕᖓᑕ ᐳᕋᓐᑕ ᓴᐃᓐᑦ−ᐊᐅᐱᓐᒧᑦ ᓂᙵᒃᑎᑦᑎᓂᖃᓚᐅᖅᐳᖅ ᖃᕋᓴᐅᔭᑎᒍᑦ.

ᔪᓕᐊ ᓴᐃᓐᑦ−ᐊᐅᐱᓐ ᐊᒻᒪ ᓄᑲᖓ ᐳᕋᓐᑕ ᐊᑐᓚᐅᖅᐳᑦ ᑕᑯᒃᓴᐅᑎᑦᑎᓂᐅᔪᒥ ᐱᒋᐊᖅᑎᑦᑎᓂᕐᒥ ᑮᓇᐅᔭᓂᒃ ᐱᕈᖅᓴᐃᓂᐅᔪᒥ ᓂᐅᕕᕐᓂᕐᒧᑦ ᑲᐃᓪᓗᐊᕈᑎᓂ ᐃᒡᓗᕐᔪᐊᒧᑦ.

ᑕᖅᑭᓂ ᒪᕐᕉᖕᓂ ᓇᑉᐸᓪᓗᐊᖓᓂᓗ, ᓴᐃᓐᑦ−ᐊᐅᐱᓐ ᐃᕐᙳᑕᖏᑦ ᐱᓕᕆᕙᓪᓕᐊᕗᑦ ᒪᑐᓯᓂᖓᓂ ᑮᓇᐅᔭᓂᒃ ᐱᕈᖅᓴᐃᓂᐅᔪᒥ ᐱᕈᖅᓴᐃᓚᐅᖅᑎᓪᓗᒋᑦ $7,663−ᓂ, ᖄᖏᐅᑎᓪᓗᓂ ᓯᕗᓪᓕᐅᔪᒥ $4,000−ᒥ ᑐᕌᒐᒃᓴᖓᓐᓂ.

ᒪᐃ 31−ᒥ, ᔪᓕᐊ ᓴᐃᓐᑦ−ᐊᐅᐱᓐ ᐊᑐᓚᐅᖅᐳᖅ ᑮᓇᐅᔭᓂ ᓂᐅᕕᕐᓂᕐᒧᑦ 9-ᓂ ᑲᐃᓪᓗᐊᕈᑎᓂᑦ. ᐅᓇ ᓂᐅᕕᕐᓂᐅᔪᖅ ᒪᓕᖕᓂᖃᖅᐳᖅ ᖃᔅᓯᒐᓚᖕᓂ ᐊᓯᖏᓐᓂ ᑲᐃᓪᓗᐊᕈᑎᓂ ᑐᓂᓯᓂᐅᔪᓂ, ᐃᓚᖃᖅᑐᒥ 10−ᓂ ᒪᓐᑐᕆᐋᓪᒥ ᑲᐃᓪᓗᐊᕈᑎᓂ ᓴᓇᔨᐅᔪᓂ Motion Composites−ᑯᓐᓂ.

““ᑲᒪᓇᕐᔪᐊᖅᓯᒪᕗᖅ ᖁᙱᐊᕐᓂᐅᔪᒥ ᐆᒧᖓ ᖃᓄᐃᓐᓂᐅᔪᒥ, ᐊᒻᒪ ᐊᓕᐊᓇᐃᑦᑎᐊᖅᐳᖅ ᑕᑯᓂᕐᒥ ᑭᒃᑯᓕᒫᓂ ᐅᓪᓗᕕᖕᒥ ᐱᕚᓪᓕᕈᑎᖃᕐᓂᖏᓐᓂ, ᓈᒻᒪᒃᑐᓂ ᑲᐃᓪᓗᐊᕈᑎᖃᕐᓂᕐᒥ ᐅᕙᓂ ᐃᒡᓗᕐᔪᐊᒥ ᐃᖅᑲᓇᐃᔭᖅᑎᐅᔪᓄᑦ, ᐋᓐᓂᐊᕕᓕᐊᖅᓯᒪᔪᓄᑦ, ᒪᓕᒃᑎᐅᔪᓄᑦ,” ᔪᓕᐊ ᓴᐃᓐᑦ−ᐊᐅᐱᓐ ᐅᖃᓚᐅᖅᐳᖅ ᐊᐱᖅᓱᖅᑕᐅᓂᐅᔪᒥ.

“ᐱᓪᓚᕆᐅᔪᖅ ᐱᔪᓐᓇᖅᑎᑦᑎᓚᐅᖅᑐᒥ ᐃᓅᓚᐅᖅᐳᑦ ᑐᙵᓇᓚᐅᖅᑐᓂ ᐊᒻᒪ ᑐᓂᓯᓂᖃᑦᑎᐊᖅᑐᓂ ᑮᓇᐅᔭᓂᒃ ᐆᒧᖓ ᐱᔾᔪᑕᐅᔪᒧᑦ ᐊᒻᒪ Motion Composites−ᑯᓐᓂ ᑐᓂᓯᓂᖏᓐᓄᑦ.”

ᐅᖃᐅᓯᐅᓪᓗᓂ ᓴᐃᓐᑦ−ᐊᐅᐱᓐᒧᑦ GoFundMe ᒪᒃᐱᒐᖓᓂ, ᐃᓚᖏᑦ ᐃᓄᐃᑦ ᐃᑲᔪᖅᓱᐃᓚᐅᖅᐳᑦ ᕼᐊᓐᓇᓚᖏᓐᓂ ᑮᓇᐅᔭᓂ, ᐊᒻᒪ ᐊᑕᐅᓯᖅ ᖃᐅᔨᒪᔭᐅᔪᒪᙱᑦᑐᒥ ᑐᓂᓯᓚᐅᖅᐳᖅ $1,000−ᓂ.

ᔮᓐ−ᒌ ᓴᐃᓐᑦ−ᐊᐅᐱᓐ ᐅᖃᓚᐅᖅᐳᖅ ᐅᐱᒍᓱᓚᐅᖅᐳᖅ ᐃᕐᙳᑕᒥᓂ ᐃᓱᒪᓕᐅᕆᓂᖏᓐᓂ ᐱᒋᐊᖅᑎᑦᑎᓂᕐᒥ ᐱᓕᕆᐊᖑᔪᒥ ᐊᒻᒪ ᐊᔭᐅᕆᓯᒪᕗᖅ ᐱᓕᕆᕝᕕᐅᔪᓂ ᐊᓯᔾᔨᖅᑎᑦᑎᓂᖓᓂ ᐅᓪᓗᕕᖕᒥ.

ᓯᕗᓂᐊᓂ ᐅᖃᓪᓚᖕᓂᐅᓚᐅᖅᑐᒥ ᓄᓇᑦᓯᐊᖅ ᑐᓴᒐᒃᓴᓕᕆᔨᒃᑯᓐᓂ, ᔮᓐ−ᒌ ᐅᖃᓚᐅᖅᐳᖅ ᑕᑯᓯᒪᕗᖅ ᐋᓐᓂᐊᕕᓕᐊᖅᑐᓂ ᐃᓄᖕᓂ ᓱᑰᖅᐸᖕᓂᖏᓐᓂ ᐃᖅᑲᓇᐃᔭᖅᑎᐅᔪᓂ ᐱᑕᖃᙱᓗᐊᕐᓂᖓᓂ ᑲᐃᓪᓗᐊᕈᑎᓂᑦ ⎯ ᑕᐃᒪᐃᑦᑐᒥ ᑕᐃᒪᐃᒃᑲᓐᓂᖁᓇᙱᓚᖅ ᓯᕗᓂᒃᓴᐅᔪᒥ

“ᐃᓱᒪᕗᖓ ᓈᒻᒪᑦᑎᐊᖅᑐᓂ ᐊᑐᖅᑐᐊᒐᒃᓴᖃᑦᑎᐊᖅᐳᖅ ᒫᓐᓇᐅᔪᒥ, ᐊᒻᒪ ᐃᓱᒪᕗᖓ ᐃᓄᖕᓂ ᐃᑦᑎᕐᕕᓄᑦ ᑲᓕᒃᑰᖅᑎᑦᑎᔾᔮᕈᓐᓃᖅᐳᑦ,” ᐅᖃᓚᐅᖅᐳᖅ.

“ᐃᖅᑲᓇᐃᔭᖅᑎᐅᔪᑦ ᐅᓪᓗᕕᖕᒥ, ᖁᖓᔮᕐᔪᐊᓕᖅᐳᑦ ᒫᓐᓇᐅᔪᒥ ᑲᙳᓱᒍᓐᓃᕐᒪᑕ ᐅᖃᕐᓂᕐᒧᑦ, ‘ᑲᐃᓪᓗᐊᕈᑎᖃᕈᓐᓃᖅᐳᒍᑦ,’ ᐃᓚᖏᑦ ᐃᓄᐃᑦ ᐱᔭᕆᐊᖃᕐᔪᐊᕐᒪᑕ ᑲᐃᓪᓗᐊᕈᑎᒥᒃ ᑭᓯᐊᓂ ᐱᑕᖃᕈᓐᓃᕐᒪᑦ. ᑕᐃᒫᒃ, ᒫᓐᓇ ᐅᖃᓕᖅᐳᑦ, ‘ᐆ ᐄ, ᐱᖃᖅᐳᒍᑦ.’”

ᔪᓕᐊ ᐅᖃᓚᐅᖅᐳᖅ ᑲᐃᓪᓗᐊᕈᑎᑦ ᓂᐅᕕᓚᐅᖅᑕᖏᓐᓂ ᑎᑭᓛᖅᐳᑦ ᑎᑭᑉᐸᓪᓕᐊᔪᓂ ᖃᔅᓯᐊᕐᔪᖕᓂ ᐱᓇᓱᐊᕈᓯᐅᔪᓂ.

ᒫᓐᓇᐅᔪᒥ, ᑯᔭᓕᕗᖅ ᖃᓄᐃᓐᓂᐅᔪᒥ ᐱᒋᐊᓚᐅᖅᑐᒥ ᐱᐅᙱᖦᖢᓂ ᐱᐅᔪᒥ ᖃᓄᐃᓕᖓᓂᖃᓕᖅᐳᖅ.

“ᐅᓇ ᐊᑐᖅᑕᐅᓂᑯ ᓴᙱᓪᓗᓂ ᐃᖅᑲᐃᔾᔪᑎᐅᕗᖅ ᐋᓐᓂᐊᕕᓕᐊᖅᑐᑦ ᓇᐃᓴᐅᑎᑐᐃᓐᓇᐅᙱᓐᓂᖏᓐᓂ ᐊᒻᒪ ᐃᓅᕗᑦ, ᐊᒻᒪ ᐃᖅᑲᓇᐃᔭᖅᑎᐅᔪᑦ, ᐃᓄᑐᐃᓐᓇᐅᒋᕗᑦ,” ᔪᓕᐊ ᐅᖃᓚᐅᖅᐳᖅ.

“ᐅᓇ ᖃᓄᐃᓐᓂᐅᔪᖅ ᓴᙱᓪᓗᓂ ᐃᖅᑲᐃᔾᔪᑎᐅᕗᖅ ᑕᐃᑲᓃᓪᓗᐊᕐᓂᑦᑎᓐᓂ ᑭᒃᑯᓕᒫᒧᑦ.”

ᓄᓇᑦᓯᐊᖅ ᑐᓴᒐᒃᓴᓕᕆᔨᒃᑯᑦ ᖃᐅᔨᒋᐊᓚᐅᖅᐳᑦ ᓄᓇᕕᖕᒥ ᐊᕕᒃᑐᖅᓯᒪᓂᐅᔪᒥ ᑲᑎᒪᔨᐅᔪᓄᑦ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓄᑦ ᐊᒻᒪ ᐃᓄᓕᕆᔨᒃᑯᓐᓄᑦ ᖃᕋᓴᐅᔭᑎᒍᑦ ᑎᑎᕋᖅᖢᑎᒃ ᒪᐃ 31−ᒥ ᐊᐱᖅᑯᑕᐅᔪᓂ ᓴᐃᓐᑦ−ᐊᐅᐱᓐ ᐃᓚᒌᓄᑦ ᑮᓇᐅᔭᓂ ᐱᕈᖅᓴᐃᓂᐅᔪᒥ.

ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᑲᑎᒪᔨᖏᑦ ᑭᐅᓚᐅᙱᓚᑦ.