ᓄᑖᖅ ᖃᕋᓴᐅᔭᒃᑯᑦ ᐅᖃᓪᓚᒡᕕᒃ ᐃᓅᓯᕐᒥ ᐅᑭᐅᕐᑕᖅᑐᕐᒥ ᓴᖅᑎᑦᑎᕗᖅ

“ᒪᓕᒐᓕᕆᕐᒧᑦ ᐅᖃᓪᓚᒡᕕᐅᔪᒪᙱᑦᑐᒍᑦ, ᑐᓵᔪᒥᓇᕈᒪᑐᐃᓐᓇᖅᑐᒍᑦ”

ᐱᕐᓈ ᓱᑲᑦ (ᓴᐅᒥᐊᓂ), ᓯᒥᐅᓂ ᑭᓴ-ᓂᑯᐸᐃᓐ ᐊᒻᒪ ᒥᔅᑐᓖ ᑯᓘᑎᐃ-ᐃᐊᔅᕗᑦ ᑐᙵᓱᒃᑎᑦᑎᔨᐅᔪᑦ ᓄᑖᒥ ᖃᕋᓴᐅᔭᒃᓴᒃ ᑕᐅᑐᒐᒃᓴᓕᐅᕐᓂᕐᒥᒃ, ᓯᒡᒐᓖᖅᑐᕐᓇᖅ (Smoke break) ᐅᖃᓪᓚᒡᕕᐅᖃᑦᑕᕐᑐᖅ ᐃᓅᓯᕐᒥᒃ ᐃᖃᓗᖕᓂᑦ ᐊᒻᒪᓗ ᐅᑭᐅᕐᑕᖅᑐᕐᒥ ᑕᒪᐃᑎᒍᑦ. (ᐊᔾᔨᙳᐊᖁᑎᒋᔭᐅᔪᖅ)

By ᑕᔅᑎᓐ ᐸᑖ

For an English version of this story, see New podcast shines light on life in the Arctic

ᖃᐅᔨᒪᓇᙱᒻᒪᑦ ᖃᓄᖅ ᐃᓕᑦᑎᔪᓐᓇᕐᓂᕐᒥᒃ ᕿᓚᒥᕈᓗᒃ ᐅᖃᓪᓚᖃᑎᖃᑐᐃᓐᓇᕐᓗᓂ.

ᓇᓃᒃᑲᓗᐊᕐᓗᓂ ᓲᕐᓗ ᑲᑎᖃᑎᒌᖕᓂᒃᑯᑦ, ᓯᒡᒐᓖᖅᑐᒐᓚᒃᑐᓂᒃ, ᐅᕝᕙᓘᓐᓃᑦ ᐃᒪᖃᐅᑎᐅᑉ ᓴᓂᑦᑎᐊᖓᓂ ᐅᖃᓪᓚᑲᑕᖕᓂᒃᑯᑦ, ᐱᑖᖃᖅᑐᖃᐃᓐᓇᐅᔭᕐᒪᑦ ᓄᑖᓂᒃ ᐃᓱᒪᒍᑎᒃᑲᓐᓂᐅᓇᔭᕐᑐᓂᒃ.

ᑕᐃᒪᓕ ᐱᒋᐊᕈᑎᕕᓂᖓ ᐆᒥᖓ ᓯᒡᒐᓖᖅᑐᕐᓇᖅᒧᑦ (Smoke break), ᓄᑖᖅ ᖃᕋᓴᐅᔭᒃᑯᑦ ᐅᖃᓪᓚᕕᒃ ᐃᖃᓗᖕᓂᑦ.

“ᖃᐅᔨᒪᙱᖢᑎᒃ ᑭᓇᑐᐃᓐᓇᕐᒥ, ᓲᕐᓗ ᐃᖅᑲᓇᐃᔭᖃᑎᒋᔭᕐᓂᒃ, ᑕᐃᒪᓕ ᓯᒡᒐᓖᖅᑐᕆᐊᕈᔅᓯ ᐊᑕᐅᑦᑎᒃᑯ ᐅᖃᓪᓚᖃᑎᒌᓕᕋᔭᕋᔅᓯ ᐊᒻᒪ ᖃᐅᔨᒪᕚᓪᓕᓕᕐᓗᒋᑦ,” ᒥᔅᑐ ᓖ ᑯᓘᑎᐃ-ᐃᐊᔅᕗᑦ ᐅᖃᓚᐅᕐᑐᖅ ᑕᒪᑐᒪ ᒥᒃᓵᓄᑦ.

“ᐅᖃᓪᓚᖃᑎᖃᑐᐃᓐᓇᕐᓇᖅᑐᖅ.”

ᑯᓘᑎᐃ-ᐃᐊᔅᕗᑦ ᐃᙱᖅᑎᐅᔪᑦ (rapper), ᐊᒻᒪᓗ ᐱᓕᕆᖃᑎᖃᓕᖅᖢᓂ ᑕᕐᕆᔭᒐᓕᐅᕐᑎᒥᒃ ᓯᒥᐅᓂ ᑭᓴ-ᓂᑯᐸᐃᓐᒥᒃ ᐊᒻᒪ ᐱᕐᓈ ᓱᑲᑦ, ᑖᒃᑯᐊᓕ ᑎᔅᓯᓇᕐᑐᓕᕆᓯᒪᓪᓗᑎᒃ. ᑭᓯᐅᓂᓕ ᐆᒧᖓ ᖃᕋᓴᐅᔭᒃᑯᑦ ᐅᖃᕐᕕᒃᑯᑦ, ᑖᒃᑯᐊ ᐱᖓᓱᑦ ᐃᖕᒥᖕᓂ ᐅᖃᐅᓯᖃᕐᑐᑦ ᒫᓐᓇᓕᓴᐃᑦ ᐃᓅᓱᒃᑐᑦ ᐃᓄᐃᑦ.

ᐊᔾᔨᒌᙱᑦᑑᑎᓂᒃ ᐅᖃᐅᓯᒃᑲᓂᒃ ᐅᖃᐅᓯᖃᖃᑦᑕᕈᒪᔪᑦ — ᐅᓇ ᓱᑲᑦ ᐅᖃᓚᐅᕐᒪᑦ ᐅᓇ ᓯᕗᓪᓕᕐᐹᖅ ᑐᓴᕐᓴᐅᓂᖅ “ᑕᐃᒪᓐᓇᕈᓗᑐᐃᓐᓇᐅᓚᐅᕐᒪᑦ.”

ᓯᕗᓪᓕᕐᐹᖅ ᓯᒡᒐᓖᖅᑐᕐᓇᖅ ᑐᓴᕐᓇᐅᓚᐅᕐᑐᖅ ᔭᓄᐊᕆ 13-ᒥᑦ ᐊᒻᒪᓗ ᐱᒋᐊᓕᓵᕐᓂᖓᓄᑦ ᓴᖅᑭᑎᑦᑎᓂᕐᒥ ᐅᖃᐅᓯᖃᓪᓗᐊᕐᑎᓪᓗᒋᑦ, ᖃᓄᐃᓕᐅᕈᑎᐅᓂᐊᕐᑐᖅ ᐅᖃᓪᓚᖕᓂᖏᓐᓂᒃ ᓇᓗᓇᐃᕐᑕᐅᓚᐅᕐᑐᖅ.

ᓱᑲᑦ, ᑯᓘᑎᐃ-ᐃᐊᔅᕗᑦ ᐊᒻᒪ ᑭᓴ-ᓂᑯᐸᐃᓐ ᑕᒪᕐᒥ ᖃᓪᓗᓈᑦ ᓄᓇᖓᓃᓯᒪᒥᒃ ᐊᒻᒪ ᐊᑐᕐᑕᕕᓂᖏᓐᓂᒃ ᐅᖃᐅᓯᖃᖃᑦᑕᕐᖢᑎᒃ.

“ᐅᓇ ᓲᕐᓗ ᐃᒡᓗᒃᑐ ᓴᕕᑯᑖᖅ ᐱᓚᐅᑎᖃᖅᖢᓂ,” ᐅᖃᖅᑐᖅ ᓱᑲᑦ ᑕᕝᕙᓂ ᑐᓴᕐᓴᐅᑎᓪᓗᒋᑦ.

ᐃᒡᓗᐊᓂᓕ ᑖᔅᓱᒪ ᓴᕕᑯᑖᑉ, ᓱᑲᑦ ᐅᖃᖅᖢᓂ ᑭᓇᐅᓪᓚᕆᖕᓂᖓᑕ ᓇᑉᐸᖓᓂᒃ ᐱᑕᖃᙱᓂᕋᖅᖢᓂᐅᒃ. ᐃᒡᓗᐊᒍᓪᓕ, ᐃᓚᒌᓄᑦ ᕿᕐᓂᕐᑕᕆᔭᐅᓂᖓᓄᑦ, “ᐃᓄᐃᑦ ᐅᕙᑦᑎᓐᓂᒃ ᐱᖃᓐᓇᖃᕈᒪᓚᐅᕐᑐᑦ.”

ᑖᒃᑯᐊ ᐱᓕᕆᖃᑎᒌᖑᔪᑦ ᐅᖃᓪᓚᖃᑎᒋᓂᐊᕐᑕᖏᓐᓂᒃ ᐃᓚᐅᑎᑦᑎᖃᑦᑕᓛᕈᒪᔪᑦ. ᓲᕐᓗ ᐱᖃᓐᓇᖏᓐᓂᒃ, ᐃᖃᓗᖕᓂ ᓄᓇᖃᕐᑐᓂᒃ ᐊᔪᙱᔾᔪᑎᓕᖕᓂ ᐃᓚᖏᓐᓄᑦ ᐊᔪᖅᑕᐅᔪᓂᒃ ᐊᒻᒪᓘᓐᓃᑦ ᒪᐃᔭ ᑭᐊᓂ ᐱᐊᓪ.

“ᒪᓕᒐᓕᕆᕐᒧᑦ ᐅᖃᓪᓚᒡᕕᐅᔪᒪᙱᑦᑐᒍᑦ, ᑐᓵᔪᒥᓇᕈᒪᑐᐃᓐᓇᖅᑐᒍᑦ,” ᑯᓘᑎᐃ-ᐃᐊᔅᕗᑦ ᐅᖃᖅᑐᖅ.

ᒫᓐᓇᒧᓪᓕ, ᑐᓵᖃᑦᑕᕐᑐᓄᑦ ᑐᓴᕐᓂᕆᔭᐅᔪᑦ, ᐅᑯᑎᒎᓇᕐᓕ ᑭᓴ-ᓂᑯᐸᐃᓐ, ᐅᖃᖅᖢᓂ ᑐᓵᕙᒃᑐᓂᒃ ᐅᖃᐅᔾᔭᐅᓯᒪᓂᖓᓂᒃ ᓲᕐᓗᓕᒎᖅ ᑖᒃᑯᓂᖓ ᑐᓴᕐᓴᐅᔪᓂᒃ ᐃᓚᐅᑐᐃᓐᓇᕐᑐᑦ.

ᑖᓐᓇ ᑐᓵᒐᒃᓴᖅ ᐅᖃᓪᓚᑲᑕᑐᐃᓐᓇᕐᓂᐅᑎᓪᓗᒍ, ᑕᐃᒪᓕ ᑕᒪᒃᑯᐊ ᐅᖃᓪᓚᖕᓂᑐᐃᓐᓇᐅᔪᑦ ᐱᒻᒪᕆᖕᓂ ᐅᖃᐅᓯᖃᓕᕈᑕᐅᑐᐃᓐᓇᕆᐊᖃᕐᒥᔪᖅ.

ᑭᓴ-ᓂᑯᐸᐃᓐ ᐅᖃᒃᑲᓐᓂᓚᐅᕐᑐᖅ ᐃᓄᐃᑦ ᐃᓕᖅᑯᓯᖃᕐᓂᖏᓐᓂᒃᑕᐅᖅ ᐱᒻᒪᕆᐊᓗᖕᓂ ᐅᖃᐅᓯᖃᖃᑦᑕᕐᓂᖅ, ᐊᒻᒪᓗ ᐃᒡᓚᐅᑎᒋᓕᐊᓪᓚᒃᐸᒃᖢᓂᔾᔪᒃ. ᑕᐃᒪᓐᓇᐅᑎᓪᓗᒋ ᑐᓴᕐᓴᐅᔪᑦ ᐅᖃᕐᓯᒪᔪᑦ ᑐᓵᕙᒃᑐᑦ ᑕᐃᒪᓐᓇ ᐅᔾᔨᕆᓯᒪᓂᖏᓐᓂᒃ.

“ᐅᓄᕈᓘᔭᕐᑐᐃᑦ ᐃᓄᐃᑦ ᐅᖃᖃᑦᑕᕐᓯᒪᔪᑦ ᖁᕕᐊᒋᔭᖃᕐᓂᕋᖅᖢᑎᒃ ᐱᖓᓱᓂᒃ ᐊᖑᑎᓂᒃ…ᐊᒻᒪᓗ ᖃᐅᔨᒫᓂᒍᓐᓇᙱᓐᓂᑦᑎᓐᓂᒃ,” ᐅᖃᖅᑐᖅ ᐱᕐᓈ ᓱᑲᑦ.

ᑕᐃᒪᙵᓪᓕ ᑐᓴᕐᓴᐅᓐᓇᕐᑐᖅ ᐱᒋᐊᓚᐅᕐᓯᒪᑎᓪᓗᒍᑦ, ᑖᒃᑯᐊ ᐱᖓᓱᒃ ᒫᓂ 1,000 ᖃᓂᒋᔭᖓᓂᒃ ᒪᓕᒃᑕᐅᕙᓕᕐᑐᑦ ᑐᓴᐅᒪᔾᔪᑎᓕᕆᓂᒃᑯᑦ, ᐊᒻᒪᓗ ᑖᒃᑯᐊ ᓇᑉᐸᓪᓗᐊᖏᑦ ᐊᑎᓕᐅᕐᓯᒪᓂᑰᓪᓗᑎᒃ ᓯᕗᓪᓕᖅᐹᖓᓂᒃ ᐅᓪᓗᕐᒥᑦ.

ᑕᒪᓐᓇ ᖃᕋᓴᐅᔭᒃᑯ ᑐᓴᕐᓴᐅᔪᓐᓇᕐᓯᓂᖅ ᐱᓕᕆᐊᖑᕙᓪᓕᐊᓯᒪᓪᓗᓂ ᐊᕐᕌᒍᒥ, ᐱᒋᐊᒻᒪᕆᒍᓐᓇᕐᓯᓯᒪᔪᖅ ᐅᑯᑎᒎᓇᖅ ᓄᓇᕗᒥᑦ ᑕᕐᕆᔭᒐᒃᓴᓕᐅᕐᑎᑦ ᑯᐊᐳᕇᓴᓐᑯᑦ ᓴᖅᑭᑎᔮᒐᒃᓴᓄᑦ ᐃᑲᔫᑎᒃᓴᓂᒃ.

ᑖᒃᑯᐊ ᐱᖓᓱᑦ ᐸᕐᓇᕐᓯᒪᔪᑦ ᑐᓴᕐᓴᐅᑎᑦᑎᖃᑦᑕᕐᓂᐊᕐᓗᑎᒃ ᓄᑖᓂ ᐱᖓᔅᓯᐅᓕᕌᖓ ᐊᒻᒪᓗ ᖃᑯᒍᒃᑲᓐᓂᖅ ᑐᓴᕐᓴᐅᑲᐅᑎᒋᔪᓐᓇᕐᓂᓗᑎᒃ ᓂᐱᓕᐅᕐᐸᓪᓕᐊᔭᖏᑦ.

ᓯᒡᒐᓖᕐᑐᕐᓇᖅ ᓇᓂᔭᒃᓴᐅᔪᖅ ᑐᓴᕐᓴᐅᒐᒃᓴᖃᕐᕕᐅᕙᒃᑐᓂᒃ.

Share This Story

(0) Comments

Join the Conversation

Your email address will not be published. Required fields are marked *

*