ᐅᕋᐃᓂ ᕕᓕᐅᕋᑎ, ᑕᓕᕐᐱᐊᓂᑦ, ᐊᖓᔪᒃᖠᖅᐹᖑᔪᖅ ᐊᐅᓱᐃᑦᑐᒧ ᐊᖅᑕᐅᓂᑯᓂᒃ ᑕᐃᔅᓱᒪᓂ, ᕿᒥᕐᕈᐊᖅᐳᖅ ᓇᓗᓇᐃᒃᑯᑎᒥ ᖁᑦᑎᒃᑐᒧᑦ ᓅᑕᐅᔪᕕᓂᕐᓄᑦ ᒪᑐᐃᖅᑕᐅᑎᓪᓗᒍ ᓯᑎᐱᕆ 10, 2011-ᒥᑦ ᐊᐅᓱᐃᑦᑐᒥᒃ. ᐊᐅᓱᐃᑦᑐᒥᐅᑕᖅ ᓘᑎ ᐱᔭᒥᓂ ᑖᔅᓱᒥᖓ ᓴᓇᓚᐅᕐᓯᒪᔪᖅ ᖁᓕᓂᒃ ᑕᕿᓂᒃ ᐊᕐᕌᒍ ᒪᕐᕉᒃ ᐃᓗᐊᓂᑦ ᑖᓐᓇ ᓴᓇᙳᐊᒐᒃᓴᖅ ᐅᒥᒃᒪᒃᑕᓕᒥᐅᑕᓪᓗᓂ. (ᐊᔾᔨᙳᐊᖁᑎ)

ᓄᒃᑎᖅᑕᐅᓂᖅ ᓱᕈᓯᐅᓪᓗᓂ: ᐊᑕᐅᓯᕐᒧᑦ ᐊᖑᑎᒧᑦ ᐊᑐᖅᑕᐅᓂᑯᑦ – ᐃᓚᖓ 3

ᒐᕙᒪᒃᑯᑦ ᓴᒡᓗᑲᑕᖕᓂᖏᑦ, ᓱᓕᙱᑦᑐᓂᒃ ᑐᓴᐅᒪᑎᑦᑎᔪᑦ ᐃᓄᐃᑦ ᒥᒃᓵᓄᑦ

By ᒫᑰᓯ ᐹᑦᓴᐅᖅ

1953-ᒥᑦ ᐊᒻᒪ 1955-ᒥᑦ, ᒐᕙᒪᑐᖃᒃᑯᑦ ᓄᒃᑎᖅᑎᑦᑎᓚᐅᕐᓯᒪᖕᒪᑕ 90 ᐅᖓᑖᓃᑦᑐᓂᒃ ᐃᓄᖕᓂ ᐃᓄᒃᔪᐊᒃᒥᑦ ᐊᒻᒪ ᒥᑦᑎᒪᑕᓕᒃᒥᑦ ᖃᐅᓱᐃᑦᑐᒧᑦ ᐊᒻᒪᓗ ᒍᕆᒡ ᕼᐋᐳᒧᑦ ᐅᕙᓂ Ellesmere Island-ᒥ. 1956-ᓗ 1962-ᓗ ᐊᑯᓐᓂᖓᓂ, ᐃᓚᒌ ᒍᕆᒡ ᕼᐋᐳᒦᑦᑐᑦ ᓄᒃᑎᓚᐅᕐᓯᒪᔪᑦ 40 ᒪᐃᓕᒥ ᐅᖓᓯᖕᓂᓕᖕᒧᑦ ᐊᐅᓱᐃᑦᑐᒧᑦ.ᒫᑰᓯ ᐹᑦᓴᐅᖅ ᐃᓄᒃᔪᐊᒃᒥᐅᑕᖅ, ᒫᓐᓇ ᐅᑭᐅᖃᖅᑐᖅ 77-ᓂ, ᐃᓚᖃᖅᖢᓂ ᐊᑖᑖᖓᓂᒃ, ᐊᓈᓇᖓᓂᒃ, ᓇᔭᖓᓂᒃ ᐊᒻᒪ ᐱᖓᓱᑦ ᓄᑲᖏ, ᓅᑕᐅᓚᐅᕐᓯᒪᖕᒪᑕ ᖃᐅᓱᐃᑦᑐᒧᑦ 1953-ᒥᑦ.ᐅᑯᓇᓂ ᑎᓴᒪᐅᓕᖓᔪᓂ ᐅᓂᒃᑳᓕᐊᓂ ᑐᓂᔭᐅᓂᑯᓂᒃ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ, ᐹᑦᓴᐅᖅ ᐃᖅᑲᐅᒪᕗᖅ ᐊᒃᓱᕈᓚᐅᕐᓯᒪᓂᖏᓐᓂᒃ ᐃᓅᖃᑎᖏᓪᓗ ᖁᑦᑎᒃᑐᒧᑦ ᓅᑕᐅᓵᕐᓯᒪᑎᓪᓗᒋᑦ.ᐹᑎ ᐊᕿᐊᑦᑐᓱᒃ ᐊᖑᑎᐅᓚᐅᕐᓯᒪᕗᖅ ᓯᕗᓕᐅᕐᑎᐅᓪᓗᓂ ᐊᒻᒪ ᐊᖑᓇᓱᒃᑎᐅᓪᓗᓂ, ᐊᒻᒪᓗ ᓴᓇᙳᐊᒐᖅᑎᒻᒪᕆᐅᖃᑕᐅᓪᓗᓂ ᐅᒃᑯᓯᒃᓴᓂᒃ ᐃᓄᒃᔪᐊᒃᒥᑦ, ᐃᓱᒪᒋᔭᐅᑦᑎᐊᖅᖢᓂ ᑭᒃᑯᓕᒫᓄᑦ.ᖃᐅᔨᒪᑦᑎᐊᓚᐅᕐᑐᖅ ᓄᓇᒥᓂᒃ. ᐅᒃᐱᖅᑑᓪᓗᓂ ᐊᒻᒪᓗ ᑐᒃᓯᐊᖅᑎᑦᑎᕙᒃᖢᓂ ᐃᓚᖏᓐᓂᒃ ᓄᓇᕐᐸᒡᕕᒋᕙᒃᑕᖓᓂᒃ.ᐊᕿᐊᑦᑐᓱᒃ ᓯᕗᓕᖏ ᑕᕝᕙᓂ ᓄᓇᕐᐸᒡᕕᖃᓚᐅᕐᓯᒪᔪᑦ ᐊᕐᕌᒍᒐᓴᒻᒪᕆᐊᓗᖕᓂ. ᑖᓐᓇ ᓄᓇ ᐱᖃᖅᑎᑦᑎᔪᓐᓇᓚᐅᕐᒪᑦ ᖃᓄᐃᑦᑐᑐᐃᓐᓇᕐᓂᒃ ᐊᒻᒪ ᐊᔾᔨᒌᙱᑦᑑᑎᓂᒃ ᓂᕆᔭᒃᓴᖃᖅᖢᓂ ᐊᐅᔭᓕᒫᖅ ᐅᖂᓂᕐᓴᐅᑎᓪᓗᒍ.ᐊᕐᕌᒍᑕᒫᓐ ᔪᓚᐃᒥᑦ, ᐊᕿᐊᑐᓱᒃ ᐊᖑᓇᓱᖃᑦᑕᓚᐅᕐᓯᒪᔪ ᓂᕐᓕᕐᓂᒃ ᑕᓯᕐᒦᑦᑐᓂᒃ ᓄᓇᒋᔭᖓᑕ ᖃᓂᒋᔭᖓᓂᒃ. ᐃᖃᓗᒐᓱᒃᐸᒃᖢᓂ ᒪᑦᑎᑦᑕᐅᑎᓄᑦ ᓯᒡᔭᖓᓂ ᐊᒻᒪ ᑕᓯᖏᓐᓂᒃ ᐅᑭᐅᖑᓕᕌᖓᑦ.

ᑕᕆᐅᖅ ᐃᒪᕐᒥᐅᑕᓂᒃ ᓂᕿᖃᖅᑎᑦᑎᓚᐅᕐᑐᖅ, ᐊᒻᒨᒪᔪᕐᓂᒡᓗ ᐊᒻᒪ sea urchins, ᐊᒻᒪᓗ ᑭᒍᑕᖏᕐᓇᖃᖅᖢᓂ ᐸᐅᕐᖓᖃᖅᖢᓂᓗ ᓄᓇ.

ᓂᐅᕕᖅᑎᒃᑯᑦ ᕼᐊᑦᓴᓐ ᐸᐃ ᑲᒻᐸᓂ ᐅᖓᓯᖕᓂᖃᑐᐃᓐᓇᓚᐅᕐᑐᖅ 5 ᒥᐃᓕᒥ ᐅᐸᒃᓯᒪᔭᖓᑕ ᓂᒋᐊᓂ. ᓄᑲᖓ ᕗᐃᓕᐊ ᐃᖅᑲᓇᐃᔮᖃᓚᐅᕐᑐᖅ ᐳᑭᖅᑕᓕᒃᑯᓐᓂᒃ ᐸᓖᓯᐅᖃᑕᐅᓪᓗᓂ ᐊᒻᒪ ᓄᓇᒥ ᖃᐅᔨᒪᔨᑕᐅᓪᓗᓂ. ᐊᒻᒪᓗ, ᓄᑲᖓᑕ ᐱᓕᐴᓯᐅᑉ ᓄᓕᐊᖓ, ᐋᓂ, ᓄᑲᖃᓚᐅᕐᒥᔪᖅ ᓂᐅᕕᕐᕕᒃᒥᑦ ᐊᖏᕐᕋᖃᖅᑐᒥ.

ᑕᐃᒪᓕ ᑲᒪᓇᓚᐅᙱᓚᖅ ᐃᓚᖏᓐᓂᒃ ᐃᓚᐅᑲᑕᒃᑐᓂᒃ, ᑖᒃᑯᐊᓗ ᐊᖏᕐᕋᖃᒻᒪᕆᒃᖢᑎᒃ ᓂᐅᕕᕐᕕᓕᖕᒥᒃ. ᑕᐃᒪᐃᓐᓂᖓᓄᑦ ᓇᓗᓇᐃᖅᑕᐅᓯᒪᓚᐅᕐᑐᑦ “ᑐᒃᓯᕋᖅᑎᒥᑦ” ᒐᕙᒪᒃᑯᓐᓂ.

ᐊᕿᐊᑐᓱᒃ, ᐊᓯᖏᓪᓗ ᐃᓄᐃᑦ ᐃᓄᒃᔪᐊᑉ ᖃᓂᒋᔮᓃᑦᑐᑦ, ᑐᒃᓯᕋᖃᑦᑕᕆᐊᖃᓚᐅᙱᑦᑐ ᑭᓱᑐᐃᓐᓇᒥ. ᓄᓇ, ᐊᒻᒪᓗ ᓂᐅᕐᕈᑎᐅᔪᓐᓇᖅᑐ, ᐱᔭᕆᐊᖃᖅᑕᖏᓐᓂ ᐃᑲᔫᑎᐅᓚᐅᕐᒪᑕ.

ᓄᓇᖃᓚᐅᕐᑐᑦ ᓯᕗᓕᖏᓐᓂᒃ ᓄᓇᒋᔭᐅᓂᑯᒥ. ᐃᓚᒌᓕᕐᓯᓚᓪᓗᑎᒃ ᐊᒻᒪ ᐅᐸᒃᓯᒪᔭᖏᓐᓃᑦᑐᒪᓪᓗᑎᒃ. ᓯᓚᐅᑉ ᐊᓯᖑᖃᑦᑕᕐᓂᖓ ᐊᒻᒪ ᓂᕐᔪᑏᑦ ᐃᖏᕐᕋᓂᖏ ᐃᓅᓯᑦᑎᓐᓂ ᐊᐅᓚᒍᑎᐅᓚᐅᕐᐳ.

ᑭᓯᐊᓂᓕ ᒐᕙᒪᓄᑦ ᐱᓕᕆᔨᓄᑦ ᐃᓅᖃᑎᑦᑎᓐᓂᒡᓗ ᑕᑯᑲᑕᓗᐊᙱᖢᑎᒃ ᐊᒻᒪᓗ ᖃᐅᔨᒪᙱᖢᑎ ᐃᓕᖁᓯᑐᖃᑦᑎᓐᓂᒃ ᐊᒻᒪ ᐱᖁᓯᑐᖃᑦᑎᓐᓂᒃ, ᐊᔪᕐᓴᖅᑐᐊᓘᒋᔭᐅᓪᓗᑕ.

ᐊᒻᒪᓗ ᓄᓇᑦᑎᓐᓂ ᐅᖃᐅᓯᖃᖅᖢᑎᒃ ᐃᒪᓐᓇ “ᑳᒃᑐᐊᓗᐃᑦ ᓯᒡᔭᖏᑦ” ᓄᓇᑦᑎᓐᓄ ᓈᒻᒪᙱᓪᓚᕆᓚᐅᕐᐳᖅ. ᐅᖓᓯᒃᑐᐊᓗᖕᒥ ᐋᑐᕚᒥ, ᐹᑎ ᐊᕿᐊᑐᓱᒃ ᖃᓄᐃᓐᓂᒃᓴᖓ ᐅᖃᐅᓯᐅᓪᓗᓂ.

ᑕᕿᑦ 8 ᑖᓐᓇ ᐃᓚᖏᓪᓗ ᒍᕆᒡ ᕼᐋᐳᒧᑦ ᑎᑭᓚᐅᕐᓯᒪᑎᓪᓗᒋᑦ, ᐊᐅᓱᐃᑦᑐᒥ 40 ᒪᐃᓕᒥ ᐅᖓᓯᖕᓂᓕᒃᒥ, ᐃᓅᔪᓐᓃᓚᐅᕐᓯᒪᔪᖅ, ᓴᐱᓕᕐᓯᒪᓪᓗᓂ ᐊᒻᒪ ᓱᕋᒃᓯᒪᓕᕐᖢᓂ.

ᓇᓗᓇᐃᒃᑯᑎ ᐃᓄᒃᔪᐊᒃᒥᑦ ᐃᓱᒪᒋᔭᖃᕐᓂᕐᒧᑦ ᖁᑦᑎᒃᑐᒧᑦ ᐊᐅᓪᓚᖅᑎᑕᐅᓂᑯᓂᒃ, ᓴᓇᔭᐅᓯᒪᔪᖅ ᓯᐊᓯ ᓯᒪᐃᓗ, ᐋᕿᒃᑕᐅᓚᐅᕐᑐᖅ ᐊᒻᒪ ᒪᑐᐃᕐᑕᐅᓪᓗᓂ ᓯᑎᐱᕆ 11, 2011-ᒥᑦ, ᐃᑭᕝᕕᒋᓚᐅᕐᑕᖓᑦᑕ ᓰ.ᑏ. ᕼᐊᐅᒧᑦ ᖃᓂᒋᔭᖓᓂᒃ ᐊᐅᓪᓚᖅᑎᓪᓗᒋᑦ ᒪᕐᕉᓕᕿᒧᑦ (Cornwallis Island) ᐊᒻᒪ ᐅᒥᒃᒪᒃᑕᓕᒃᒧᑦ (Ellesmere Island). ᒫᑦᓯ 1996-ᒥᑦ, ᔮ ᑯᕆᑎᐊᓐ ᓕᐳᕈᓪ ᒐᕙᒪᖏᑦ ᐋᕿᒃᓯᖃᑎᖃᓚᐅᕐᓯᒪᖕᒪᑕ ᒪᑭᕝᕕᒃ ᑯᐊᐳᕇᓴᓐᑯᓐᓂᑦ ᐋᕿᒃᓯᓂᐊᕐᓗᑎᒃ $10-ᒥᓕᐊᓐ ᑖᓚᒥᑦ ᐃᑲᔫᑎᒃᓴᐅᓂᐊᕐᑐᓂᒃ ᐊᐅᓪᓚᖅᑎᑕᐅᓂᑯᓂᒃ. ᑭᓯᐊᓂᓕ ᒪᒥᐊᕝᕕᐅᓪᓚᕆᓚᐅᙱᑦᑐᑦ ᑭᓯᐊᓂ ᐋᒐᓯ 18, 2010-ᒥᑦ, ᐅᓇ ᔮᓐ ᑕᓐᑲᓐ, ᑕᐃᔅᓱᒪᓂ ᑲᓐᓲᕕᑎᕝᕕᓐᓄᑦ ᒥᓂᔅᑕᐅᑎᓪᓗᒍ ᐃᓄᓕᕆᔨᑐᖃᒃᑯᓐᓄᑦ, ᒪᒥᐊᓚᐅᕐᓯᒪᕗᖅ ᑭᒡᒐᖅᑐᐃᓪᓗᓂ ᒐᕙᒪᑐᖃᒃᑯᓐᓂᒃ. (ᐊᔾᔨᙳᐊᖁᑎ)

ᓄᓇ ᑭᓱᖃᖅᑎᑦᑎᔪᖅ

ᑎᑭᑎᓪᓗᑕ ᓄᑖᒧᑦ ᓄᓇᑖᕆᔭᑦᑎᓐᓄᑦ, ᐊᒥᓱᑎᒍᑦ ᑲᒪᓚᐅᕐᓯᒪᕗᒍᑦ ᓯᓚᐅᑉ ᓂᒡᓚᓱᖕᓂᖓᓂᒃ ᐊᒻᒪᓗ ᐊᑦᑎᒃᑐᑦ ᓄᕗᔭᐃᑦ ᐃᖏᕐᕋᔪᑦ ᑕᕝᕙᓂ ᐊᔾᔨᐅᙱᑦᑐᐊᓗᖕᒥ ᓄᓇᒥ.

ᐅᓐᓄᒃᓴᓕᖅᑎᓪᓗᒍ ᓯᕗᓕᖅᐹᖅ ᐊᓄᕆᐊᓗ ᑎᑭᖢᓂ.

ᑕᐃᒪᐃᓕᕌᖓᓪᓕ ᓄᓇᒋᓚᐅᖅᑕᑦᑎᓐᓂ, ᐃᓚᕗᑦ ᐃᖃᓗᒐᓱᒡᕕᖕᒦᓐᓇᔭᓚᐅᕐᑐᑦ, ᐊᒥᓱᒻᒪᕆᐊᓗᐃᑦ ᐃᖃᓗᐃᑦ ᑕᓯᕐᓄᙵᐅᓕᕐᑎᓪᓗᒋ ᑖᒃᑯᓇᓃᓐᓂᐊᕐᖢᑎᒡᓗ ᑭᓯᐊᓂ ᐅᐱᕐᖓᕐᒥᒃᐸᑦ, ᐊᒻᒪᓗ ᑕᓯᕐᓂᙶᕐᓗᑎᒃ ᓯᒡᔭᒦᑲᑕᓕᕐᓗᑎᒃ ᓄᓇᑐᖄᓗᕕᓂᑦᑎᓐᓂ.

ᒪᑦᑎᑦᑕᐅᑎᕗᑦ ᐋᕿᒃᓱᕋᔭᖅᐸᕗᑦ ᐊᒻᒪ ᐅᓪᓗᐃᑦ ᐊᒥᓲᙱᑦᑐᑦ ᐱᕈᔭᕗᑦ ᐃᖃᓗᖕᓂ ᑕᑕᓯᒪᓕᕐᓗᑎᒃ ᐊᒻᒪᓗ ᐅᑭᐅᖅ ᓂᕿᖃᕐᓂᐊᖅᑐᒍ ᓇᓗᓇᕈᓐᓃᕐᓗᓂ.

ᐆᒐᖅᑎᑑᙱᒻᒪᑕ ᐃᖃᓗᐃᑦ, ᐅᕐᓱᖃᖅᖢᑎᒃ ᐊᒻᒪ ᓂᕿᖓ ᒪᒪᖅᖢᓂ, ᐊᒻᒪᓗ ᑎᒥᑦᑎᓐᓄ ᓄᒃᑭᒃᓴᕈᑎᒻᒪᕆᐅᓪᓗᓂ ᐃᓚᑦᑎᓐᓄ ᐊᒻᒪ ᕿᒻᒥᓄᑦ.

ᐅᑭᐅᒃᑯᑦ, ᓇᑦᑎᖅᑕᖃᑦᑎᐊᕈᓐᓃᕌᖓᑦ ᐊᒻᒪ ᓂᕿᑕᖃᑦᑎᐊᕈᓐᓃᕐᖢᓂ, ᓄᓇᒧᙵᐅᖃᑦᑕᖅᐳᒍ ᐅᑭᐅᒃᑯᑦ ᐅᐸᖃᑦᑕᖅᑕᑦᑎᓐᓄ ᐊᒻᒪ ᐱᕈᔭᕐᓂ ᐊᐃᒃᖠᖅᖢᑕ ᐅᑎᕈᑎᓪᓗᑎᒍ ᐃᓚᒌᑎᒍᑦ ᓂᕆᓂᐊᕋᑦᑕ ᐊᒻᒪ ᕿᒻᒥᕗᑦ.

ᓄᕗᓰᑦ ᐅᑭᐅᒃᑯ ᓄᓇᒋᕙᓚᐅᕐᑕᕗᑦ, ᓲᖃᐃᒻᒪ ᐊᖏᔪᐊᓘᓪᓗᓂ ᕿᑭᖅᑕᐅᓪᓗᓂ ᑲᓇᖕᓇᕐᐸᓯᐊᓂ ᓄᓇᒥᑦ ᓄᓇᒋᕙᒃᑕᑦᑕ. ᖃᓂᓐᓂᖅᐹᖑᓚᐅᕐᒪᑦ ᑕᕆᐅᕐᒧ, ᑕᒪᓂ ᓇᑦᑎᕐᓇᖅᖢᓂ ᐊᒻᒪ ᐅᒡᔪᖕᓇᖅᖢᓂ.

ᓂᒡᓚᓱᒃ, ᓯᓚᖅᑭᑎᐊᕐᑐᓪᓗ, ᐊᒻᒪ ᓄᕗᔭᖃᙱᑦᑐᑦ ᐅᓪᓗᐃᑦ ᑎᑭᑉᐸᑕ, ᓄᓇᒋᔭᑦᑎᓐᓂ ᖃᓄᐃᓕᐅᕈᓘᔭᓕᖃᑦᑕᓚᐅᕐᑐᑦ, ᐸᕐᓇᒃᐸᓪᓕᐊᓪᓗᑕ ᕿᒻᒥᑦᑎᓐᓂ ᐊᖑᓇᓱᖕᓂᐊᕋᑦᑕ. ᐊᒻᒪᓗ ᓯᕿᓂᖅ ᓴᕿᐊᓂᙱᑎᓪᓗᒍ ᐅᐸᒃᑕᕗᑦ ᑎᑭᑉᐸᒃᖢᑎᒍ ᐊᒻᒪᓗ ᓇᑦᑎᕐᓂ ᐅᑕᕿᑲᑕᓕᖅᖢᑕ.

ᐊᒥᓱᐃᕐᖢᑕ, ᓇᑦᑎᖃᑦᑕᓚᐅᕐᑐᒍ 10-ᓂ 12-ᓄ ᐅᓪᓗᕐᒥ, ᐊᒻᒪ ᐃᓚᖏᓐᓂ ᓇᑦᑎᙱᑦᑎᐊᒻᒪᕆᒃᖢᑕ. ᑕᐃᒪᓐᓇ ᐃᓅᓯᖃᓚᐅᕐᓯᒪᕗᒍ.

ᑕᕆᐅᕐᒥᐅᑕᑦ ᐊᑐᕈᓐᓇᖅᑕᕗᑦ ᖁᐊᕐᓵᕐᓇᓚᐅᕐᓯᒪᙱᑦᑐᑦ ᓄᖑᑉᐸᓪᓕᐊᓂᐊᕆᒃᓴᖏᓐᓂᒃ.

ᐊᐅᔭᒃᑯ, ᐊᒥᓱᑦ ᑕᓰ ᓄᓇᑦᑎᓐᓂ ᓂᕐᓕᖃᖃᑦᑕᓚᐅᕐᓯᒪᔪᑦ ᐃᓵᒃᑐᓂᒃ ᐊᒻᒪ ᐊᖑᓇᓱᒃᐸᒃᖢᑎᒍ. ᐊᑕᐅᓰᕐᖢᑕ, ᐅᒥᐊᕗᑦ ᑐᑯᑑᖅᑐᖅ ᓇᑉᐸᖓ ᑕᑕᓯᒪᓚᐅᕐᓯᒪᔪᖅ ᐊᖑᔭᑦᑎᓐᓂᒃ.

ᑲᓇᖕᓇᖅᐸᓯᐊᓂ ᓯᒡᔭᕗᑦ ᕿᑭᖅᑕᖃᐅᕈᓘᔭᕐᑐᖅ, ᐊᒥᓱᕈᓘᔭᕐᓄᑦ ᐊᔾᔨᒌᙱᑦᑐᓂ ᑎᖕᒥᐊᖃᖅᖢᑎᒃ. ᑖᒃᑯᓇᓂ ᕿᑭᖅᑕᓂᒃ, ᑲᑎᕐᓱᐃᖃᑦᑕᓚᐅᕐᐳᒍ ᐊᒥᓱᒻᒪᕆᐊᓗᖕᓂ ᒪᓐᓂᖕᓂ ᓂᕐᓕᕐᓂᙶᖅᑐᓂᒃ, ᒥᑎᕐᓂᒃ ᐊᒻᒪ ᐊᒥᓱᓂ ᒥᑭᓐᓂᕐᓴᓂ ᒥᑎᕐᓂᒃ.

ᑕᒪᒃᑯᐊ ᖁᕕᐊᓇᒻᒪᕆᓚᐅᕐᑐᑦ ᓂᕆᕙᒃᑕᑦᑕ ᐊᓯᐊᓂᒃ ᓂᕆᑲᑕᓕᕐᖢᑕ, ᒪᑯᐊ ᐊᓯᖏᓐᓂ ᓇᑦᑏᑦ, ᐅᒡᔪᐃᑦ, ᐃᖃᓗᐃᑦ ᐊᒻᒪ ᐆᒐᐃ. ᒪᓐᓃ ᐊᒻᒪ ᑭᒍᑕᖏᕐᓇᐃᑦ, ᐅᕕᓗᐃᑦ ᐊᒻᒪ ᐊᓯᖏ ᑕᕆᐅᑉ ᐊᑖᓃᓲᑦ ᒪᒪᖅᑑᓂᕋᖅᑕᐅᓚᐅᕐᓯᒪᖕᒪᑕ.

ᐊᐅᔭᒃᑯᑦ ᑭᒍᑕᖏᕐᓇᖅᑕᖃᐅᖃᑦᑕᓚᐅᕐᑐᖅ ᐅᔾᔨᕈᓱᑦᑎᐊᕆᐊᖃᖅᐸᒃᖢᑕ ᐱᓱᒡᕕᒋᔭᑦᑎᓐᓂ ᐊᒻᒪᓗ ᓄᓇ ᑐᖑᔪᖅᓯᕙᒃᖢᓂ. ᓄᓇ ᑭᓱᖃᖅᑎᑦᑎᔪᖅ.

ᐱᑕᖃᕈᓐᓃᖅᐸᓪᓕᐊᓂᖏᑦ ᐆᒪᔪᐃᑦ, ᐊᒻᒪᓗ ᐃᓄᒃᔪᐊᒃ ᒥᒃᓵᓂ ᐃᓄᖃᓗᐊᓕᕐᓂᖓ ᐱᔾᔪᑎᐅᓂᕋᖅᑕᐅᓚᐅᕐᓯᒪᔪᖅ ᐊᑐᓕᖅᑎᑦᑎᓂᕐᒥᑦ 1953-ᒥ ᓅᑕᐅᓂᕐᒥ ᖁᑦᑎᒃᑐᕐᒧᑦ.

ᑭᓯᐊᓂᓕ ᐆᒪᔪᐃᑦ ᓄᙳᑉᐸᓪᓕᐊᓚᐅᙱᑦᑐᑦ ᐃᓄᒋᐊᓗᐊᖅᑑᓕᕐᓗᑎᒡᓘᓐᓃᑦ ᑕᒫᓂ ᐊᑐᖅᑕᐅᔪᓐᓇᖅᑐᑦ ᑕᐅᑐᒃᖢᒋᑦ.

ᓂᒋᕐᒥᐅᑕ ᐆᒪᔪᓂᒃ ᖃᐅᔨᓴᕐᓂᑯᑦ ᑕᒫᓂ ᓯᕗᓂᑦᑎᓐᓂ ᐊᖑᓇᓱᒃᑎᓂᒃ ᖃᐅᔨᓇᓱᑲᑕᖂᔨᓚᐅᕐᓯᒪᙱᑦᑐ.

ᑭᓯᐊᓂᓕ, ᑖᒃᑯᐊ ᒪᓕᖕᓂᕐᓴᐅᓚᐅᕐᓯᒪᖕᒪᑕ ᓱᓕᙱᑦᑐᓂᒃ ᑐᓴᖅᑕᐅᔪᓂᒃ ᐸᓖᓯᒃᑯᓐᓂ, ᐋᓐᓂᐊᓯᐅᕐᑎᓂᒃ, ᐊᔪᕆᕐᓱᐃᔨᓂ ᐊᒻᒪ ᓂᐅᕕᖅᑎᓂᒃ.

ᓱᓕᙱᑦᑐᓂᒃ ᑐᓴᖅᑕᖏᓐᓂ ᐊᒻᒪ ᐱᔾᔪᑎᐅᓚᐅᕐᐳᖅ ᑕᒻᒪᖅᖢᑎᒃ ᒐᕙᒪᒃᑯ ᖃᓄᐃᓕᐅᕈᑎᕕᓂᖓᓂ ᐊᓯᐅᔨᑎᑦᑎᓂᕐᒥ ᓄᓇᑦᑎᓐᓂᒃ ᐊᒻᒪ ᐊᕕᑎᑕᐅᓪᓗᑕ ᐃᓚᒋᓕᕐᓯᒪᔭᑦᑎᓐᓂᒃ.

ᐅᖃᓕᒫᕈᓐᓇᕐᑕᓯ ᐃᓚᖓ 4 ᒫᑰᓯ ᐹᑦᓴᐅᖅ ᐅᓂᒃᑳᖓ ᐱᓇᓱᐊᕈᓯᐅᓂᐊᕐᑐᖅ ᓄᓇᑦᓯᐊᕐᒥ ᐱᕙᓪᓕᐊᔪᓂᒃ.

Share This Story

(6) Comments:

  1. Posted by carl jorgensen on

    i think it’s wonderful that nunatsiaq publishes articles in inuktitut, but would it be possible to also publish an english translation, even just in abbreviated form, for those of us who are interested but can’t read inuktitut? thank you.

    • Posted by bob on

      Welcome to the world of a unilingual person. It’s hard, it’s frustrating.

    • Posted by Inuk Person on

      I believe this was published in English about a month ago. It’s a four-part story about the exile from Northern Quebec and Pond Inlet in the 1950’s and 1960’s.

      • Posted by Patricia Lightfoot on

        You are absolutely right. The English version of the story can be found at https://bit.ly/2Ct17Tp . All four parts of the High Arctic Exiles series can be found on our Features Pages.

  2. Posted by Qujannamiik on

    Qujannamiiraaluk qaniujaaqpait titiralaurapsi. Titirarungnaqpisi Inuktitut qaliujaaqpait? Piuniqsaungmat makkuktunut.

    (Thank you so much for writing in syllabics. Would you be able to write in Inuktitut roman orthography too, because it is easier for Inuktitut-speaking youth?)

    • Posted by Patricia Lightfoot on

      That’s an interesting suggestion. Thank you. We’ll look into it.

Comments are closed.