ᓄᓇᓕᖕᓂᑦ ᓇᒧᙵᐅᔾᔪᑎᖃᙱᓗᐊᕐᓂᖅ ᓄᓇᕗᒥᐅᑕᒥᑦ ᐊᖑᑎᒥ ᐱᓱᒍᓐᓇᙱᑦᑐᒥᒃ ᕿᒪᒃᑐᐅᒍᑎᐅᕗᖅ
“ᐊᔪᕐᓇᖅᑐᐊᓘᖕᒪᑦ ᐱᔪᓐᓇᙱᔾᔪᑎᖃᖅᑐᒧᑦ ᐃᓄᖕᒧᑦ ᓄᓇᓕᖕᓂᑦ ᐃᓄᑭᑦᑐᒦᑦᑐᒥᑦ”
The Taloyoak health centre is still only offering some services after a fuel spill on the premises last week. (File photo)
For an English version of this story, see Lack of local transport leaves Nunavut man in wheelchair stranded
ᓵᓕᐅᑉ ᐅᐃᖓ, ᑕᐃᕕᑦ ᔭᐃᑯ, ᐱᓱᒍᓐᓇᐃᓪᓕᓯᒪᖕᒪᑦ ᑕᐃᒪᙵᑦ 2015-ᒥᑦ, ᓄᓇᓯᐅᑎᒃᑯᑦ ᐱᕐᕈᓗᐊᕿᓂᑰᓪᓗᓂ ᐊᒻᒪ ᓰᖁᖓᒍᑦ ᓱᕋᒍᔾᔨᓪᓗᓂ. 61-ᓂ ᐅᑭᐅᓕᒃ ᓂᐅᖏᓐᓂᒃ ᐊᑐᕈᓐᓇᐃᓪᓕᓯᒪᔪᖅ ᑕᓕᖏᓐᓂᒡᓗ ᐊᒻᒪ ᐊᒃᓴᓗᐊᓕᖕᒥ ᐃᒃᓯᕙᐅᑕᒥᒃ ᓇᒧᙵᐅᒍᑎᖃᖅᐸᒃᖢᓂ.
ᔭᐃᑯ ᑕᑯᔭᐅᒋᐊᖅᑐᖃᑦᑕᖅᑐᖅ ᐋᓐᓂᐊᕕᒃᒥᑦ ᐊᑦᒪᓐᑕᒥ, ᑭᓯᐊᓂᓕ ᑕᐅᕗᙵᐅᕙᓪᓕᐊᓂᖓ ᐊᒃᓱᕈᕈᑎᐅᕙᒃᑐᖅ ᐃᓚᖏᓐᓄᑦ.
ᓲᖃᐃᒻᒪ ᑖᒃᑯᐊᒃ ᑕᓗᕐᔪᐊᕐᒥᐅᑖᒃ ᐊᐃᑉᐸᕇᒃ ᓄᓇᓯᐅᑎᖃᙱᒻᒪᑎ, ᑕᐃᒪᓕ ᒥᑦᑕᕐᕕᓕᐊᑐᐃᓐᓇᕐᓇᖅ ᑖᒃᑯᓄᖓ ᐊᒃᓱᕈᕈᑎᐅᓕᖃᑦᑕᖅᐳᖅ.
ᑖᒃᓯᑕᖃᙱᒻᒪ ᑕᓗᕐᔪᐊᓂᒃ, ᓄᓇᓖᓪᓗ ᐋᓐᓂᐊᕕᖓ ᓄᓇᓯᐅᑎᖃᙱᖢᓂ ᐅᕝᕙᓘᓐᓃᑦ ᓇᒧᙵᐅᔾᔪᑎᒃᓴᐅᓇᔭᖅᑐᓂᒃ ᐋᓐᓂᐊᕕᒃᑰᖓᔪᓂᒃ.
“ᒥᑦᑕᕐᕕᓕᐊᕋᓱᒃᖢᓂ ᐊᒃᓱᕈᕐᓇᖅᑐᐊᓗᒃ,” ᓵᓕ ᐅᖃᖅᑐᖅ. “ᑕᐃᒪᙵᑦ ᓄᓇᓕᖕᓂ ᐊᐅᓪᓚᕋᓱᓕᕌᖓᑦᑕ ᓈᒻᒪᙱᓕᐅᕈᑎᐅᖏᓐᓇᖅᑐᖅ. ᐊᒃᓱᕈᕐᓇᖅᑐᐊᓗᒃ.”
ᐊᖏᖃᑎᒌᖕᓂᒃᑯᑐᐃᓐᓇᖅ ᑕᓗᕐᔪᐊᑉ ᐊᖏᕐᕋᕐᓯᒪᔪᓂᒃ ᑲᒪᒋᔭᖃᕐᓂᕐᒧᑦ ᐱᔨᑦᑎᕋᐅᑎᑎᒍᑦ, ᐋᓐᓂᐊᓯᐅᕐᑎ ᐅᕝᕙᓘᓐᓃᑦ ᐃᑲᔪᖅᑎ ᐊᖏᕐᓯᒪᔪᑦ ᔭᐃᑯ ᒥᑦᑕᕐᕕᓕᐊᕈᔾᔭᐅᕙᒡᓗᓂ ᐃᓛᓐᓂᒃᑯᑦ ᒥᑦᑕᕐᕕᒡᒥᓪᓘᓐᓃᑦ ᐊᖏᕐᕋᖓᓄᑦ. ᑭᓯᐊᓂᓕ ᑕᒪᓐᓇ ᑕᐃᒪᓐᓇᐃᓪᓚᕆᒃᓯᒪᙱᒻᒪᑦ, ᓵᓕ ᐅᖃᖅᑐᖅ.
ᔭᐃᑯ ᐅᖃᓚᐅᕐᑐᖅ ᒥᑦᑕᕐᕕᓕᐊᕈᔾᔭᐅᔪᓐᓇᕐᓂᖓᓂᒃ ᑭᓯᐊᓂ ᓄᓇᓯᐅᑎᒃᑯᑦ, ᑕᒪᒃᑯᐊ ᐃᑭᒋᐊᕐᕕᖏᑦ ᐊᑦᑎᖕᓂᕐᓴᐅᖕᒪᑕ ᓄᓇᓯᐅᑎᓂᒃ ᐅᓯᖃᖅᑕᕐᕕᓕᖕᓂᒃ. ᐊᒻᒪᓗ ᑖᓐᓇ ᐃᒃᓯᕙᐅᑕᖓᓂᒃ ᓄᓇᓯᐅᑎᒧᐊᖅᑎᒐᓱᒃᖢᒍ ᑭᓯᐊᓂ ᒪᕐᕉᓗᓂ ᐱᖓᓲᓗᑎᒡᓘᓐᓃᑦ ᐃᑲᔪᕐᓗᑎᒃ, ᐅᖃᕐᒥᔪᖅ.
ᑭᓯᐊᓂᓕ ᔭᐃᑯ ᑭᖑᓪᓕᖅᐹᒥᑦ ᐋᓐᓂᐊᕕᓕᐊᖅᑎᓪᓗᒍ ᐄᐳᕈᓪ ᐱᒋᐊᓕᖅᑎᓪᓗᒍ, ᑖᓐᓇ ᓵᓕ ᐅᐃᒥᓂᒃ ᐱᖃᑎᖃᖅᖢᓂ ᐊᑦᒪᓐᑕᓐᒧᑦ, ᐅᖃᓚᐅᕐᑐᖅ ᑖᒃᑯᐊᒃ ᑭᐅᓗᖃᑎᖃᓚᐅᕐᓂᖏᓐᓂᒃ ᐃᖅᑲᓇᐃᔭᖅᑎᓂᒃ ᐊᖏᕐᕋᖏᓐᓂᒃ ᑲᒪᒋᔭᖃᖅᑐᓂᒃ ᒥᑦᑕᕐᕕᓕᐊᕈᔾᔭᐅᔪᒪᑎᓪᓗᒋᑦ.
ᐊᖏᕐᕋᖓᓄᑦ ᐅᑎᖅᑎᓪᓗᒋᑦ ᐄᐳᕈᓪ 9-ᒥᑦ, ᐅᖃᐅᔾᔭᐅᓚᐅᕐᑐᑦ ᓴᓗᒻᒪᕐᓴᐃᔨᒧᑦ ᐊᐃᔭᐅᓂᐊᕐᓂᖏᓐᓂᒃ, ᐊᒻᒪᓗ ᐋᓐᓂᐊᕕᖕᒥᙶᖅᑐᒥ ᓂᐅᕝᕕᐅᕆᐊᖅᑕᐅᙱᑦᑎᐊᖅᖢᑎᒃ.
“ᒫᓐᓇᐅᓕᕐᑐᕐᓕ, ᐊᐅᓪᓚᖃᑦᑕᕈᒪᔪᓐᓃᖅᑐᒍᑦ, ᐱᓕᕆᓐᓇᓗᐊᖅᑐᐊᓘᖕᒪᓐ,” ᓵᓕ ᐅᖃᖅᑐᖅ.
“ᐅᖄᓚᕈᓘᔭᖃᑦᑕᕆᐊᖃᖅᑐᖓ 10-ᒥᓂᑦᑐᐃᓐᓇᖅ ᐃᖏᕐᕋᔾᔪᔭᐅᔪᒪᓂᕐᒥᒃ ᒥᑦᑕᕐᕕᒃᒧᑦ. ᖃᐅᔨᒪᔪᖃᙱᒻᒪᑦ ᑭᓇ ᑕᒪᑐᒥᖓ ᑲᒪᒋᔭᖃᕆᐊᖃᕐᓂᖓᓂᒃ.”
ᓵᓕ ᓈᒻᒪᙱᓕᐅᕈᑎᒥᓂᒃ ᐅᖃᖃᑦᑕᕐᓯᒪᔪᖅ ᐋᓐᓂᐊᕕᒃᒧᑦ ᐊᒻᒪᓗ ᕼᐋᒻᒪᓚᒃᑯᓐᓄᑦ, ᑖᒃᑯᐊᓗ ᕼᐋᒻᒪᓚᒃᑯᑦ ᐊᐅᓚᑦᑎᔨᖓ ᖃᔅᓯᒐᓴᒻᒪᕆᖕᓂ ᑎᑎᕋᕐᓯᒪᓪᓗᓂ ᖃᕋᓴᐅᔭᒃᑯᑦ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓄᑦ ᐄᐳᕈᒥᑦ.
“ᐅᓇ ᖃᓄᐃᒍᑎ ᖃᓄᐃᓕᐅᕈᑎᐅᙱᑦᑎᐊᕐᒥᔪᖅ ᑕᓗᕐᔪᐊᕐᒥ ᐋᓐᓂᐊᕕᒃᑯᓐᓂᒃ ᓄᓇᓕᖕᓂ ᐊᑐᖅᑕᐅᔭᕆᐊᖃᖅᑐᓕᕆᓂᒃᑯᑦ,” ᕼᐋᒻᒪᓚᒃᑯᓐᓄᑦ ᐊᐅᓚᑦᑎᔨ ᒍᕌᓐᑦ ᓯᑳᑦ ᑎᑎᕋᕈᑎᖃᓚᐅᕐᑐᖅ ᖃᔅᓯᒐᓴᒻᒪᕆᖕᓄᑦ ᐋᓐᓂᐊᕕᓕᕆᔨᓄᑦ ᐄᐳᕈᓪ 1-ᒥᑦ ᖃᕋᓴᐅᔭᒃᑯᑦ.
“ᐋᓐᓂᐊᕕᒃᒥᑦ ᖃᐅᔨᒪᔪᑦ ᒥᔅᑕ ᔭᐃᑯ ᖃᓄᖅ ᐱᔪᓐᓇᕐᓂᖓᓂᒃ ᐊᒻᒪ ᖃᓄᖅ ᐊᔪᕈᑎᖃᕐᓂᖓᓂᒃ, ᐅᓇ ᐋᓐᓂᕐᓯᒪᓂᖓ ᑕᐅᑐᒃᖢᒍ, ᑭᓯᐊᓂᓕ ᑐᓄᑐᐃᓐᓇᕐᓯᒪᔪᑦ ᑖᔅᓱᒥᖓ.”
ᖃᕋᓴᐅᔭᒃᑯᑦ ᑭᐅᔾᔪᑎᖓᒍᑦ, ᑐᑭᒧᐊᖅᑎᑦᑎᔨ ᐋᓐᓂᐊᖃᖅᑕᐃᓕᓂᕐᒧᑦ ᐱᓕᕆᐊᒃᓴᓄᑦ ᕿᑎᕐᒥᐅᓄᑦ ᐅᖃᓚᐅᕐᑐᖅ ᖃᐅᔨᒪᓂᖓᓂᒃ ᓇᒧᙵᐅᔾᔪᑎᑕᖃᙱᓗᐊᕐᓂᖓᓂᒃ ᐃᓄᖕᓄᑦ ᓇᒧᙵᐅᒍᓐᓇᐃᓪᓕᓯᒪᔪᓄᑦ ᐊᒥᓱᓂᒃ ᓄᓇᕗᑦ ᓄᓇᓕᖏᓐᓂᒃ.
ᑭᓯᐊᓂᓕ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᑐᐊᕕᕐᓇᙱᑦᑐᓕᕆᓂᒃ ᐱᓕᕆᐊᖃᙱᒻᒪᑕᒎᖅ ᓄᓇᓕᖕᓂᑦ ᐃᖏᕐᕋᔾᔪᑎᓕᕆᓂᕐᒧᑦ, ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐱᓕᕆᔨ ᐅᖃᓚᐅᕐᑐᖅ, ᓲᖃᐃᒻᒪ ᓈᐅᑦᑎᐅᒃᑯᒫᖃᙱᓐᓂᖓᓄᑦ ᐱᔨᑦᑎᕋᐅᑎ.
ᑕᓗᕐᔪᐊᕐᒥ ᐊᖏᕐᕋᖏᓐᓂᒃ ᑲᒪᒋᔭᖃᖅᐸᒃᑐᑦ ᐋᓐᓂᐊᓯᐅᖅᑎᑦ ᐊᒻᒪ ᐊᓯᖏᓐᓂ ᐱᓕᕆᔨᐅᔪᑦ ᓇᐅᑦᑎᐅᒃᑯᒫᖃᙱᒻᒪᑕ ᐊᖁᑎᐅᕙᖕᓂᕐᒧᑦ ᓄᓇᓕᖕᓃᑦᑐᓂᒃ.
ᑲᒪᒋᔭᐅᔪᑦ ᓇᖕᒥᓂᖅ ᐃᖏᕐᕋᔾᔪᑎᒃᓴᖏᓐᓂᒃ ᐋᕿᒃᓱᐃᔭᕆᐊᖃᕐᒪᑕ ᐋᓐᓂᐊᕐᕕᓕᐊᕐᓗᑎᒃ ᐅᕝᕙᓘᓐᓃᑦ ᒥᑦᑕᕐᕕᓕᐊᕐᓂᐊᕈᑎᒃ ᐊᐅᓪᓚᕆᐊᖃᕈᑎᒃ ᐋᓐᓂᐊᕕᓕᐊᕐᓗᑎᒃ, ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐅᖃᓚᐅᕐᑐᑦ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ ᖃᕋᓴᐅᔭᒃᑯᑦ.
ᑐᐊᕕᕐᓇᙱᑦᑐᒧᑦ ᐃᖏᕐᕋᔾᔪᑎᖃᖅᑎᑦᑎᓂᖅ ᒥᑦᑕᕐᕕᒃᒧᑦ ᐊᖏᖅᑕᐅᓯᒪᔪᓄᑦ ᐊᐅᓪᓚᕈᑎᒃᓴᓂᒃ ᐋᓐᓂᐊᕐᕕᓕᐊᕐᓂᕐᒧᑦ ᓇᐅᑦᑎᐅᒃᑯᒫᖃᙱᓐᓂᕐᒧᑦ ᐃᑲᔪᕈᑎᒃᓴᑎᒍᑦ (Non-Insured Health Benefits) ᐊᔪᙱᑎᑕᐅᔪᑦ ᓄᓇᕗᒥᑦ ᐃᓄᖕᓂ ᑎᓴᒪᓄ ᓄᓇᓕᖕᓅᖓᑎᑕᐅᑐᐃᓐᓇᕐᒪᑕ: ᓴᓪᓕᖅ, ᑎᑭᕋᕐᔪᐊᖅ, ᐃᒃᐱᐊᕐᔪᒃ ᐊᒻᒪ ᖃᐅᓱᐃᑦᑐᖅ, ᑖᒃᑯᐊ ᒥᑦᑕᕐᕕᖏᓐᓄᖓᐅᓂᖓ ᐊᔾᔨᐅᙱᑎᑕᐅᓂᖓᓄᑦ (6 ᑭᓛᒥᑕ ᐅᖓᑖᓅᖓᓂᖏᓐᓄᑦ).
ᐃᓚᖏᑦᑎᒍᑦ, ᓇᐅᑦᑎᐅᒃᑯᒫᖃᙱᓐᓂᕐᒧᑦ ᐃᑲᔪᕈᑎᒃᓴᑎᒍᑦ ᐅᕝᕙᓘᓐᓃᑦ ᓄᓇᕗᑦ ᒐᕙᒪᒃᑯᑦ ᐋᓐᓂᐊᖅᑐᓄᑦ ᐃᑲᔫᑎᒃᓴᓂᒃ ᐱᓕᕆᐊᖏᑦᑎᒍᑦ ᑐᐊᕕᕐᓇᖅᑐᓂᒃ ᐊᑭᓕᕐᓱᐃᔪᓐᓇᖅᑐᑦ ᑐᐊᕕᕐᓇᖅᑐᓕᕆᓂᒃᑯᑦ ᐋᓐᓂᐊᕕᒃᒥᑦ ᒥᑦᑕᕐᕕᓕᐅᕈᔾᔨᓂᕐᒥᑦ ᑐᐊᕕᕐᓇᖅᑐᒧᑦ, ᑭᓯᐊᓂᓕ ᑕᐃᒪᓐᓇᐅᓯᒪᙱᒻᒪᑦ ᔭᐃᑯ ᐃᓚᒌᓄᑦ.
ᓄᐊ ᐸᐸᑦᓯ ᐅᑯᓇᓂ ᓄᓇᕗᒻᒥ ᐊᔪᕈᑎᖃᖅᑐᑦ ᒪᑭᓐᓇᓱᐊᖅᑏᑦ ᑲᑐᔾᔨᖃᑎᒌᖏᓐᓂ ᐅᖃᓚᐅᕐᑐᖅ ᐃᖏᕐᕋᔾᔪᑎᖃᖅᑎᑦᑎᓂᖅ ᓄᓇᕗᒻᒥᐅᓂᒃ ᐊᔪᕈᑎᓕᖕᓂ ᐱᑕᖃᙱᓗᐊᕐᒪᑦ ᑕᒪᐃᓐᓂ ᓄᓇᕗᓕᒫᒥᑦ, ᐊᒻᒪᓗ ᑕᒪᓐᓇ ᓄᓇᕗᑦ ᒐᕙᒪᒃᑯᓐᓄᑦ ᐱᓕᕆᐊᖑᔭᕆᐊᖃᒻᒪᕆᒃᖢᓂ.
ᐃᖃᓗᓂᑦ, ᐊᖏᕐᕋᖓᓂ, ᐊᖏᓂᖓᓄᑦ ᐃᖏᕐᕋᔾᔪᑎᖃᖅᑎᑕᐅᔪᓐᓇᖅᑐᑦ ᐃᓐᓇᑐᖃᐃᑦ ᐊᒻᒪ ᐊᓯᖏᑦ ᐊᔪᕈᑎᖃᕐᑐᓂᒃ ᓇᒧᙵᐅᑲᑕᒋᐊᒃᓴᒧ.
“ᐊᓯᖏᓐᓂᒡᓕ ᓄᓇᓕᖕᓂ ᐊᔪᕐᓇᖅᑐᐊᓘᖕᒪᑦ—ᑕᒪᐃᓐᓂ ᑕᐃᒪᓐᓇᑦᑕᐃᓐᓇᖅ ᐊᔪᕈᑎᖃᕐᒪᑕ,” ᐸᐸᑦᓯ ᐅᖃᖅᑐᖅ.
“ᑕᒪᒃᑯᐊ ᐱᔭᕆᐊᖃᖅᑐᑦ ᑐᓴᖅᑎᑕᐅᔭᔾᔪᑎᐅᔭᕆᐊᖃᕐᒪᑕ. ᐱᐅᓂᕐᓴᒥ ᐱᓕᕆᔾᔪᓯᖅᑕᖃᕆᐊᖃᖅᑐᖅ ᐊᒻᒪᓗ ᐊᑐᐃᓐᓇᖃᕈᓐᓇᕐᓂᕐᓴᐅᓗᑕ.”
ᓵᓕ ᐅᖃᓚᐅᕐᑐᖅ ᑕᐃᒪᙵᑦ ᓈᒻᒪᙱᓕᐅᕈᑎᒥᓂ ᐅᖃᐅᓯᖃᓚᐅᕐᑎᓪᓗᒍ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓄᑦ, ᐱᓕᕆᔨᐅᔪᑦ ᐊᒃᓱᓪᓘᓐᓃᑦ ᑖᒃᑯᓄᖓ ᓈᒻᒪᖕᓂᕐᓴᒥᑦ ᐱᓇᓱᒃᓯᒪᓕᕐᑐᑦ.
ᐅᖃᐅᔾᔭᐅᓚᐅᕐᑐᖅ ᐋᓐᓂᐊᖃᕐᓇᙱᑦᑐᓕᕆᔨᒃᑯᓂᑦ ᐊᑎᓕᐅᖁᔭᐅᑐᐃᓐᓇᕆᐊᖃᕐᓂᖓᓂᒃ ᓄᓇᕗᑦ ᒐᕙᒪᒃᑯᑦ ᐸᓯᔭᒃᓴᐅᓇᔭᙱᓐᓂᖏᓐᓂᒃ ᖃᓄᐃᑦᑐᖃᑳᓪᓚᖕᓂᕈᒪ ᒥᑦᑕᕐᕕᓕᐊᕈᔾᔭᐅᑎᓪᓗᒍ.
“ᑕᐃᒪᓐᓇ ᐱᔪᓐᓇᖅᑐᖓ ᓲᖃᐃᒻᒪ ᐊᓯᐊᒎᕐᕕᖃᙱᑦᑎᐊᕋᑦᑕ,” ᓵᓕ ᐅᖃᖅᑐᖅ.
“ᑕᒪᑐᒥᖓ ᐅᖃᐅᓯᖃᑲᑕᒃᑐᒍᑦ ᒫᓐᓇ; ᐅᖃᐅᓯᕆᑲᑕᒃᑕᕗᑦ, ᑭᓯᐊᓂᓕ ᑕᐃᒪᓐᓇ ᐅᖃᓪᓚᑲᑕᓪᓗᐊᓚᐅᕐᓯᒪᔪᒍᑦ ᖃᖓᑲᓪᓛᓗᒃ,” ᐅᖃᖅᑐᖅ. “ᐊᔪᕐᓇᖅᑐᐊᓘᖕᒪᑦ ᐊᔪᕈᑎᖃᖅᑐᒥ ᐃᓄᖕᒧ ᓄᓇᓕᖕᓂ ᒥᑭᑦᑐᒦᖢᓂ.”
(0) Comments