ᓄᓇᕕᒻᒥ ᐃᓕᓐᓂᐊᕐᕖᑦ ᐋᒐᓯ 31-ᒥᑦ ᒪᑐᐃᕐᑕᐅᒃᑲᓐᓂᕈᒪᔪᑦ

“ᐃᓱᒪᔪᖓ ᓱᕈᓰᑦ ᐃᓕᓐᓂᐊᕆᐊᕈᒪᑦᑎᐊᓕᕐᓂᕐᑐᑦ”

ᑲᑎᕕᒃ ᐃᓕᓴᕐᓂᓕᕆᔨᒃᑯᑦ ᑲᑎᒪᔨᖏᑦᑕ ᐸᓯᖓ ᐃᖏᕐᕋᕗᖅ ᑰᔾᔪᐊᖅᒥᑦ. ᐅᓄᕐᓂᕐᓴᐃᑦ ᐃᓕᓐᓂᐊᕐᕖᑦ ᓄᓇᕕᒻᒥ ᒪᑐᐃᓛᓯᔪᑦ ᐋᒐᓯ 31-ᒥᑦ. (ᐊᔾᔨᓕᐅᕆᔨ ᓴᐃᕋ ᕌᔾᔪᔅ)

By ᓴᐃᕋ ᕌᔾᔪᔅ

For an English version of this story, see Nunavik schools plan for Aug. 31 reopening

ᓄᓇᕕᒻᒥ ᓄᑲᖅᖡᑦ ᐊᒻᒪ ᐊᖓᔪᒃᖡᑦ ᐃᓕᓐᓂᐊᖅᑏ ᐅᑎᓛᓯᔪᑦ ᐃᓕᓐᓂᐊᕐᕕᖕᒧᑦ ᐋᒐᓯ 31-ᖑᓕᕐᐸᑦ, ᑲᑎᕕᒃ ᐃᓕᓴᕐᓂᓕᕆᓂᒃᑯᑦ ᑐᓴᖅᑎᑦᑎᓚᐅᕐᑐᑦ ᐱᓇᓱᐊᕈᓯᐅᓚᐅᕐᑐᒥᑦ.

ᓄᓇᕕᒻᒥ ᐃᓕᓴᕐᓂᓕᕆᓂᒃᑯᑦ ᑲᑎᒪᔨᖏ ᒪᑐᐃᕐᓯᓂᐊᓯᔪᑦ ᐃᓕᓐᓂᐊᕐᕕᖕᓂ ᑕᒪᐃᓐᓂᐸᓗᒃ ᑭᓯᐊᓂ ᐱᖓᓱᑦ ᐃᓕᓐᓂᐊᕐᕖᑦ ᒪᑐᐃᔾᔮᙱᖢᑎᒃ ᓄᓇᕕᒃ ᓄᓇᓕᖏᓐᓂᒃ. ᐃᓕᓐᓂᐊᕐᕖᑦ ᓴᓇᔭᐅᓂᖏᓐᓄᑦ ᐅᑯᓇᓂ ᖁᐊᖅᑕᖅ ᐊᒻᒪ ᑲᖏᖅᓱᔾᔪᐊᖅᒥᑦ ᐊᒻᒪ ᓴᓪᓗᐃᑦ ᐃᑯᓯᒃ ᐃᓕᓐᓂᐊᕐᕕᐊᓗᖓ ᑭᖑᕙᕈᑎᐅᓂᐊᕐᑐᖅ ᑭᓯᐊᓂ ᓯᑎᐱᕆᐅᑉ ᕿᑎᐊᓂ ᒪᑐᐃᓛᖅᖢᑎᒃ.

ᐃᓕᓐᓂᐊᕐᕖᑦ ᒪᑐᐃᒃᑲᓐᓂᕐᓂᐊᓕᕐᑐᑦ ᓯᕗᓪᓕᖅᐹᒥ ᑕᐃᒪᙵᑦ ᑲᑎᕕᒃ ᐃᓕᓴᕐᓂᓕᕆᓂᒃᑯᑦ ᒪᑐᓯᓚᐅᕐᓯᒪᑎᓪᓗᒋᑦ ᐃᓕᓐᓂᐊᕕᖕᓂᒃ ᒫᑦᓯ 24-ᒥᑦ, ᑕᐃᒪᓐᓇᑦᑕᐃᓐᓇ ᑯᐸᐃᒃ ᒪᑐᓯᒪᔭᐅᑎᓪᓗᒍ ᓄᕙᒡᔪᐊᕐᓇᖅ-19 ᐱᔾᔪᑎᒋᔭᐅᓪᓗᓂ.

ᒫᓐᓇ ᓄᓇᕕᒻᒥ ᓄᕙᒡᔪᐊᕐᓇᖅ-19-ᒥᑦ ᐋᓐᓂᐊᖃᖅᑐᖃᙱᑎᓪᓗᒍ ᑲᑎᕕᒃ ᐃᓕᓴᕐᓂᓕᕆᓂᒃᑯᑦ ᑎᑎᕋᖅᑎᒻᒪᕆᖓ ᕼᐃᐅᕆᐊᑦ ᑭᓕᐅᑕᒃ ᐅᖃᓚᐅᕐᑐᖅ ᑲᑎᒪᔨᒃᑯᑦ ᓱᓕ ᐅᑕᖅᑭᓂᖏᓐᓂᒃ ᖃᓄᐃᓕᐅᕆᐊᖃᕐᓂᕐᒥ ᐃᓕᓐᓂᐊᕕᐅᔪᑦ ᖃᓄᐃᓕᖓᓂᐊᕐᓂᖏᓐᓂᒃ.

“ᓱᓕ ᐅᑕᖅᑭᒐᑦᑕ ᖃᓄᐃᓕᐅᕆᐊᖃᕐᓂᐊᕐᓂᕐᒥ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓂᒃ ᐊᒻᒪᓗ ᐃᓕᓐᓂᐊᕐᓂᓕᕆᓂᕐᒧᑦ ᐱᓕᕆᔨᒻᒪᕆᖕᓂᒃ,” ᑭᓕᐅᑕᒃ ᐅᖃᖅᑐᖅ. “ᖃᐅᔨᒪᔪᒍᑦ ᐃᓕᓐᓂᐊᖅᑎᑦᑎᔩᑦ ᐊᑐᖃᑦᑕᕆᐊᖃᕐᓂᐊᕐᓂᖏᓐᓂᒃ ᐅᓗᕆᐊᓇᔾᔭᐃᒃᑯᑎᓂᒃ, ᓲᕐᓗ ᒪᑯᓂᖓ ᑮᓇᕐᒧᑦ ᒪᑐᐊᕈᑎᓂᒃ. ᑭᓯᐊᓂᓕ ᐅᑕᖅᑭᒐᑦᑕ ᓱᓕ ᓱᕈᓰᑦ ᐊᑐᕆᐊᖃᕐᒪᖔᑕ ᑮᓇᕐᒧᑦ ᒪᑐᐊᕈᑎᓂᒃᑕᐅᕐ.”

ᐋᖅᑭᒃᓱᐃᕙᓪᓕᐊᓂᖅ, ᐃᓕᓐᓂᐊᕐᑐᑦ ᐅᓄᕐᓂᒃᓴᖏᑦ ᐊᒻᒪ ᖃᓄᖅ ᐃᓕᓐᓂᐊᕐᕕᒋᔭᐅᔪᖅ ᐋᖅᑭᒃᓯᒪᓂᐊᕐᒪᖔᑦ ᓱᓕ ᐃᓱᒪᒃᓴᕐᓯᐅᕈᑎᐅᔪᖅ, ᐃᓚᖓᒍᓪᓕ, ᑕᒪᓐᓇ ᒪᓕᓗᐊᕐᓂᐊᕐᑐᖅ ᐃᓕᓐᓂᐊᕆᐊᖅᑐᓂᒃ ᐋᒐᓯᐅᑉ ᓄᙳᐊᓂᒃ. ᐃᓕᓐᓂᐊᕆᐊᒃᑲᓐᓂᖅᓯᒪᔪᑦ ᐊᖏᕐᕋᖏᓐᓂᒃ ᐃᓕᓐᓂᐊᖃᑦᑕᕆᐊᖃᑐᐃᓐᓇᕆᐊᓖᑦ ᒪᓕᒡᓗᑎᒃ ᐱᓕᕆᔾᔪᑎᓂᒃ ᑖᒃᑯᓄᖓ ᐊᑐᐃᓐᓇᐅᔪᓂᒃ.

ᐸᕐᓇᒃᓯᒪᓂᐊᕐᓗᑎ, ᓯᕗᓪᓕᖅᐹᑦ ᖃᓪᓗᓈᓂᕐᒥᐅᑕᑦ ᐃᓕᓐᓂᐊᖅᑎᑦᑎᔨᐅᔪᑦ ᖃᖓᑕᓲᒃᑯᑦ ᐊᑐᖅᑐᐊᖅᑕᐅᔪᒥᑦ ᖃᖓᑕᓂᐊᖅᑐᑦ ᓄᓇᕕᒃᒧᑦ ᐋᒐᓯ 1-ᒥᑦ, ᑭᓕᐅᑕᒃ ᐅᖃᖅᑐᖅ. ᐃᓕᓐᓂᐊᖅᑎᑦᑎᔨᐅᔪᑦ 89-ᖑᓪᓗᑎ ᐃᓄᑑᓐᓇᖅᑐᒦᑎᑕᐅᔪᑦ ᒪᓐᑐᕆᐊᒥᑦ ᓯᓂᒃᑕᕐᕕᒃᒥᑦ ᐊᒻᒪ ᖃᐅᔨᓴᖅᑕᐅᑲᑕᖕᓂᐊᖅᖢᑎᒃ ᓄᕙᒡᔪᐊᕐᓇᖅ-19-ᒥ ᐋᓐᓂᐊᖃᙱᒃᑲᓗᐊᕆᐊᒃᓴᖏᓐᓂᒃ ᐅᓪᓗᒐᓴᖕᓂᒃ.

ᖃᐅᔨᓴᖅᑎᑕᐅᔾᔪᑎᖓᒍᑦ ᖃᓄᐃᙱᓐᓂᕋᖅᑕᐅᒃᐸᑕ, ᖃᖓᑕᑎᑕᐅᓕᕐᓂᐊᖅᑐᑦ ᐅᑭᐅᕐᑕᖅᑐᕐᒧᑦ ᐊᒻᒪᓗ ᐅᓪᓗᓂ  14-ᓂ ᐃᓄᑑᓐᓇᖅᑐᒦᓕᕐᒥᓗᑎᒃ ᐊᖏᕐᕋᕆᓂᐊᖅᑕᖏᓐᓂᒃ ᓄᓇᓕᖕᓂᑦ.

“ᐅᑎᖅᑎᑉᐸᓪᓕᐊᓇᓱᒃᑕᕗᑦ ᓲᖃᐃᒻᒪ ᐅᓪᓗᓂ 14-ᓂ ᐃᓄᑑᓐᓇᖅᑐᒦᒋᐊᖃᕐᓂᐊᕐᓂᖏᓐᓂᒃ ᓄᓇᓕᖕᓄᐊᕈᑎ ᖃᐅᔨᓴᖅᑕᐅᔾᔪᑎᖏᑦ ᖃᓄᐃᙱᓐᓂᕋᐃᓯᒪᒐᓗᐊᖅᐸᑕ,” ᐅᖃᖅᑐᖅ. “ᐊᓯᐊᒍᑦ ᐱᕕᖃᙱᓐᓇᑦᑕ ᑕᐃᒪᓕ ᐃᓕᓐᓂᐊᕐᓂᖅ ᑭᖑᕙᕐᓯᒪᔭᕆᐊᖃᕐᓂᐊᕐᑐᑦ ᒪᑐᐃᖅᑕᐅᓂᐊᕐᓂᖏᑦ.”

“ᐃᓱᒫᓘᑎᐅᓗᐊᕐᑐᕐᓕ ᖃᓄᐃᑎᑕᐃᓕᑎᑦᑎᓂᖅ ᑭᓇᑐᐃᓐᓇᕐᒥᑦ-ᑕᐃᒪᓐᓇᓕ ᑐᓴᕐᓯᒪᒐᑦᑕ,” ᐅᖃᖅᑐᖅ. “ᑭᓱᓕᒫᓂᒃ ᐋᖅᑭᒃᓱᐃᓯᒪᓗᑕ ᑕᒪᒃᑯᐊ ᐃᓕᓐᓂᐊᖅᑐᑦ ᖃᓄᐃᖁᓇᒋᑦ ᐃᓕᓐᓂᐊᕐᕕᖕᓂᒃ.”

ᓄᓇᕕᒃ ᐃᓕᓐᓂᐊᕐᕕᖏᑦ ᐊᔾᔨᒌᙱᑦᑑᑎᓂᒃ ᐋᖅᑭᒃᓱᕐᓯᒪᔪᑦ, ᐃᒪᓐᓇᐅᕙᒃᖢᑎᒃ, ᐃᓚᖏᑦ ᒪᑐᐃᖅᐸᒃᖢᑎᒃ ᐋᒐᓯᐅᑉ ᕿᑎᐊᓂᒃ. ᐅᓇ ᒪᑐᐃᕐᓂᐊᕐᓂᖏᓐᓄᑦ ᑭᖑᕙᕐᓂᐊᔪᖅ 2021-ᒥ ᐃᓕᓐᓂᐊᕐᓇᒥ ᐊᑯᓂᐅᑎᑦᑎᓂᕐᓴᐅᑐᐃᓐᓇᕆᐊᓕᒃ, ᑭᓯᐊᓂᓕ ᑭᓕᐅᑕᒃ ᐅᖃᖅᑐᖅ ᐃᓕᓐᓂᐊᕐᓂᒃᓴᖅ ᓱᓕ ᐱᓕᕆᐊᖑᓂᕋᖅᖢᓂᐅᒃ.

ᓈᒻᒪᑐᐃᓐᓇᓚᐅᕐᑐᕐᓕ ᑲᑎᕕᒃ ᐃᓕᓴᕐᓂᓕᕆᓂᒃᑯᓐᓄᑦ, ᐃᓕᓐᓂᐊᖅᑎᑦᑎᔨᒃᓴᓂ ᐱᓇᓱᖕᓂᖅ ᐊᔪᕐᓇᓗᐊᓚᐅᙱᑦᑐᖅ, ᑕᐃᒪᐃᓯᒪᒋᓪᓗᓂ ᓯᕗᓂᖏᓐᓂᒃ ᐊᕐᕌᒍᓂᒃ ᐊᓂᒍᖅᑐᓂᒃ. ᑲᑎᒪᔨᒃᑯᑦ ᓱᓕ 12-ᓂ ᐃᓕᓐᓂᐊᖅᑎᑦᑎᔨᑖᕆᐊᖃᖅᑐᑦ, ᑖᒃᑯᐊᓗ ᓄᓇᓕᖕᓃᑦᑐᓄᑦ ᐱᓕᕆᐊᖑᔪᓐᓇᕋᔭᖅᖢᑎᒃ.

ᑭᖑᓪᓕᖅᐹᑦ ᐃᓕᓐᓂᐊᕈᑎᓄᑦ ᖃᐅᔨᓴᕈᑏᑦ 2019/20-ᒥᑦ ᐃᓕᓐᓂᐊᕐᓇᐅᑎᓪᓗᒍ ᐋᖅᑭᒃᓱᖅᑕᐅᓚᐅᕐᑐᑦ ᒪᑯᐊ ᓯᕗᓪᓕᕐᓂᑦ ᑕᕿᓂᒃ ᐊᒻᒪ ᑭᖑᓪᓕᕐᓂ ᑕᕿᓂᒃ ᐃᓕᓐᓂᐊᕐᓯᒪᓂᖏᓐᓄᑦ, ᑕᐃᒪᓐᓇᓗ ᐃᓕᓐᓂᐊᖅᑎᑦᑎᔨᐅᔪᑦ ᐃᓕᓐᓂᐊᖅᑎᓂᒃ ᖁᕝᕙᖅᐹᓪᓕᕋᔭᕆᐊᒃᓴᖏᓐᓂᒃ ᐃᓕᓐᓂᐊᕐᓂᖏᑦᑎᒍᑦ. ᐃᓕᓐᓂᐊᕐᕕᖕᒧᑦ ᑲᑎᒪᔩᑦ ᓱᓕ ᐅᖃᓚᐅᙱᑦᑐᑦ ᖃᔅᓰᑦ ᐳᓴᓐᑎᑎᒍᑦ ᓯᕗᒧᒃᑎᑕᐅᓇᔭᕐᒪᖔᑕ ᑕᒪᑐᒪᓂ ᐊᕐᕌᒍᒥᑦ.

“ᐃᓕᓐᓂᐊᕐᓂᖅ ᐱᒻᒪᕆᐊᓘᖕᒪ ᓄᓇᓕᑦᑎᓐᓂᒃ”

ᑲᑎᕕᒃ ᐃᓕᓴᕐᓂᓕᕆᓂᒃᑯᑦ ᑲᑎᒪᔨᖏᑦ ᑲᒥᓯᓇᐃᑦ ᑲᑎᒪᓚᐅᕐᑐᑦ ᐱᓇᓱᐊᕈᓯᐅᓚᐅᕐᑐᒥ ᐊᒻᒪ ᑲᑎᒪᒃᑲᓐᓂᕐᓂᐊᖅᖢᑎᒃ ᑕᒪᑐᒪᓂ ᑕᕿᒥᑦ ᓄᓇᓕᖕᓂ ᐃᓕᓐᓂᐊᖅᑐᓕᕆᔨᒃᑯᑦ ᑲᑎᒪᔨᖏᓐᓂ ᑲᑎᒪᖃᑎᖃᕐᓗᑎᒃ ᐊᒻᒪᓗ ᖃᐅᔨᓇᓱᒡᓗᑎᒃ ᐃᓚᒌᑦ ᐱᔭᕆᐊᖃᖅᑕᖏᓐᓂᒃ ᐊᒻᒪ ᐃᓱᒫᓘᑎᖏᓐᓂᒃ ᑖᒃᑯᐊ ᐃᓕᓐᓂᐊᖅᑎᐅᔪᑦ ᐅᑎᕐᓂᐊᖅᑎᓪᓗᒋ ᓯᕗᓪᓕᖅᐹᒥᑦ ᑕᕿᑦ 6 ᐊᓂᒍᓯᒪᔪᓂᒃ.

“ᐃᓱᒪᔪᖓ ᐊᖓᔪᖅᑳᖑᔪᑦ ᕿᑐᕐᖓᖏᓐᓂᒃ ᐃᓕᓐᓂᐊᕆᐊᖁᔨᓕᕐᑐᑦ,” ᐅᖃᖅᑐᖅ ᕌᐳᑦ ᕗᐊᑦ, ᐃᒃᓯᕙᐅᑕᖅ ᑲᑎᕕᒃ ᐃᓕᓴᕐᓇᓕᕆᓂᒃᑯᑦ ᑲᒥᓯᓇᐅᔪᑦ ᑲᑎᒪᔨᖏᓐᓄᑦ. “ᐃᓱᒪᖕᒥᔪᖓ ᓱᕈᓰ ᐃᓕᓐᓂᐊᕆᐊᕈᒪᓕᖕᓂᖏᓐᓂᒃᑕᐅᖅ. ᐃᓕᓐᓂᐊᕐᓂᖅ ᐱᓪᓚᕆᐊᖃᑕᐅᖕᒪᑦ ᑕᒪᐃᓐᓂ ᓄᓇᓕᒋᔭᑦᑎᓐᓂᒃ.

“ᐃᓱᒪᔪᖓᓕ ᒫᓐᓇ ᐊᔾᔨᒋᓇᔭᙱᓐᓂᖓᓂᒃ ᐋᓐᓂᐊᖅᑖᖅᑐᖃᐅᕐᓂᖅᐸᑦ,” ᐅᖃᒃᑲᓐᓂᖅᑐᖅ. “ᓄᓇᕕᒻᒥ ᓄᕙᒡᔪᐊᕐᓇᖅ-19-ᒥᑦ ᐋᓐᓂᐊᕐᑖᖅᓯᒪᔪᖃᕐᓯᒪᒐᓗᐊᖅᑎᓪᓗᒍ ᓄᓇᕕᒻᒥ, ᓄᓇᖃᑎᑦᑐᓐᓇᕐᓯᒪᕙᕗᑦ.”

ᑲᑎᕕᒃ ᐃᓕᓴᕐᓇᓕᕆᓂᒃᑯᑦ ᑎᑎᕋᖅᐸᓪᓕᐊᓕᓚᐅᕐᑐᑦ ᐸᕐᓇᐅᑎᒃᓴᒥᒃ ᖃᓄᖅ ᐱᓕᕆᐊᖃᕈᓐᓇᕋᔭᕐᓂᖏᓐᓂᒃ ᓄᕙᒡᔪᐊᕐᓇᖅ-19-ᒥ ᐃᓕᓐᓂᐊᕐᕕᖕᒥ ᐋᓐᓂᐊᖃᖅᑐᖃᓕᕐᓂᖅᐸᑦ, ᐃᒪᓐᓇᓗᐊᑕᖅ ᐃᓕᓐᓂᐊᕐᕕᐅᔪᑦ ᒪᑐᓗᒋ ᐅᕝᕙᓘᓃᑦ ᐃᓕᓐᓂᐊᕐᕕᓕᒫᖅ, ᒪᓕᒐᔭᖅᖢᑎᒃ ᐊᐃᑦᑐᖅᑕᐅᔪᕕᓂᕐᒥ ᐊᒻᒪᓗ ᑖᔅᓱᒪ ᖃᓂᒋᑲᑕᒃᓯᒪᔭᖏᓐᓂᒃ.

“ᖃᐅᔨᓴᖃᑦᑕᕐᓂᖅ ᐱᒻᒪᕆᐊᓘᓂᐊᕐᑐᖅ,” ᕗᐊᑦ ᐅᖃᖅᑐᖅ. “ᐅᑯᐊ ᐸᕐᓇᐅᑎᐅᔪᑦ ᐅᓪᓗᒥᒨᖓᖕᒪᑕ, ᑭᓯᐊᓂᓕ ᐊᓯᙳᕈᓐᓇᖅᑐᑦ ᐱᓇᓱᐊᕈᓯᕐᓂ ᐅᓄᙱᑦᑐᓂᒃ. ᐱᒻᒪᕆᐅᕗᖅ ᑕᒪᓐᓇ ᐃᓕᓐᓂᐊᕐᓂᒨᖓᙱᒻᒪᑦ, ᑭᓯᐊᓂᓕ ᓄᓇᓕᓕᒫᓄᑦ.”

ᑕᒪᓐᓇ ᑐᑭᖃᖅᑐᖅ ᐅᑭᐅᕐᑕᖅᑐᕐᒥ ᓄᓇᓖᑦ ᓄᓇᕕᒃᒥᓐ ᐱᓕᕆᐊᒃᓴᖃᕆᕗᑦ. ᑕᒪᕐᒥᑲᓴᒃ ᐊᑕᐅᓯᖅ ᐃᓚᐅᙱᖢᓂ ᓄᓇᓯᐅᑎᒧᑦ ᐃᒥᖅᑕᖅᑕᐅᖃᑦᑕᕐᒪᑕ ᐊᒻᒪ ᑯᕕᖅᑕᖅᑕᐅᕙᒃᖢᑎᒃ—ᐱᒻᒪᕆᐊᓗᐃᑦ ᐃᓕᓐᓂᐊᕐᕕᖕᓂᒃ ᓴᓗᒪᑎᑦᑎᓂᕐᒧᑦ.

“ᐃᑲᔪᖅᑕᐅᔭᕆᐊᖃᕋᑦᑕ ᓄᓇᓕᖕᓂ ᐱᔨᑦᑎᕋᐅᑎᓕᕆᔨᓂᒃ ᑖᒃᑯᐊ ᐃᓕᓐᓂᐊᕐᕖᑦ ᐊᐅᓚᑦᑎᐊᕈᓐᓇᖁᓗᒋ ᐊᐅᓚᑕᐅᒋᐊᖃᕐᓂᖏᑦᑎᒍᑦ,” ᑭᓕᐅᑕᒃ ᐅᖃᖅᑐᖅ.

“ᐃᓚᖏᓐᓂᒡᓗ ᓄᓇᓕᖕᓂᑦ, ᓴᓗᒻᒪᕐᓴᐃᔨᖃᙱᓗᐊᕋᑦᑕ—ᐱᒻᒪᕆᐊᓗᒃ ᐃᖅᑲᓇᐃᔮᖅ. ᐃᓕᓐᓂᐊᕐᕖᑦ ᓴᓗᒪᙱᒃᑯᑎᒃ ᒪᑐᔭᕆᐊᖃᕐᓂᐊᕋᑦᑎᒍᑦ,” ᐅᖃᖅᑐᖅ.

“ᕿᓂᕋᑦᑕ ᓴᓗᒻᒪᕐᓴᐃᔨᒃᓴᓂᒃ ᐃᓕᓐᓂᐊᕐᕕᖕᓂᒃ ᐊᒻᒪᓗ ᐊᑭᓕᕐᓱᖅᑕᐅᑦᑎᐊᕐᓇᖅᖢᓂ. ᐃᖅᑲᓇᐃᔮᒃᓴᐃᑦ ᐃᓄᖃᓕᕐᓂᐊᖁᔭᕋᓗᐊᕗᑦ ᒪᑐᐃᕐᓯᓚᐅᙱᓐᓂᑦᑎᓂᒃ ᐃᓕᓐᓂᐊᕐᕕᓂᒃ.

ᐃᓕᓐᓂᐊᒃᑲᓐᓂᖅᑐᑦ ᐸᕐᓇᓯᕗᑦ ᖃᓪᓗᓈᓄᑦ ᐅᑎᕐᕕᒃᓴᖏᓐᓄᑦ

ᐃᓕᓐᓂᐊᖅᑎᑦᑎᔨᒃᓴᑦ ᐅᑭᐅᕐᑕᖅᑐᕐᒧᙵᐊᕙᓪᓕᐊᓕᕐᑎᓪᓗᒋᑦ ᐋᒐᓯ 1-ᒥᑦ, ᐃᓕᓐᓂᐊᒃᑲᓐᓂᕆᐊᖅᑐᑦ ᓄᓇᕕᒃᒥᑦ ᖃᓪᓗᓈᓄᑦ ᐊᐅᓪᓚᖅᐸᓪᓕᐊᓕᓚᐅᕐᐳᑦ ᐃᓕᓐᓂᐊᓯᒋᐊᕐᓂᐊᖅᖢᑎᒃ ᒫᓐᑐᕆᐊᑉ ᖃᓂᒋᔮᓃᑦᑐᓂᒃ ᒪᑯᓄᖓ CEGEPS, ᐅᕝᕙᓘᓐᓃᑦ ᓄᓇᓕᖕᓂ ᓯᓚᑦᑐᖅᓴᕐᕕᖕᓄᑦ ᐊᒻᒪᓗ ᔫᓂᕘᓯᑎᓄᑦ.

ᓄᓇᕕᒃ ᓯᕗᓂᑦᓴᕗᑦ ᒪᑐᐃᒃᑲᓐᓂᕐᓂᐊᕐᒥᔪᖅ ᐋᒐᓯᐅᑉ ᓄᙳᐊᓂᒃ, ᐸᕐᓇᒃᓯᒪᓪᓗᑎᒃ ᓇᑉᐸᓪᓗᐊᖓᓄᑦ ᐃᓕᓐᓂᐊᕐᕕᖕᒥ ᐃᓕᓐᓂᐊᕐᓗᑎᒃ ᐊᒻᒪ ᓇᑉᐸᖓᓂ ᖃᕋᓴᐅᔭᒃᑯᑦ ᐃᓕᓐᓂᐊᕐᓗᑎᒃ.

ᕗᐊᑦ ᐅᖃᓚᐅᕐᑐᖅ ᑲᑎᒪᔩᑦ ᓱᓕ ᖃᐅᔨᓴᕆᐊᖃᕐᒪᑕ ᐱᓕᕆᔾᔪᑎᓕᕆᓂᐅᔪᑦ ᐃᓕᓐᓂᐊᖅᑎᓄᑦ ᐱᔭᐅᔭᕆᐊᖃᖅᑐᓂᒃ ᐊᖏᕐᕋᖏᓐᓂᒃ ᐱᓕᕆᔪᓐᓇᖅᑐᓄᑦ, ᑐᕌᒐᖃᕋᓱᒃᖢᑎᒃ ᑯᐸᐃᒃ ᐃᓕᓐᓂᐊᕐᓂᓕᕆᔨᖏᓐᓄᑦ ᐃᑲᔪᖅᑕᐅᓂᐊᕈᒪᓗᑎᒃ.

Share This Story

(0) Comments