ᓄᓇᕗᑦ ᑐᙵᕕᒃᑯᑦ ᑐᓂᔭᐅᔪᑦ $13.8 ᒥᓕᐊᓐᓂ ᐃᓄᒃᑐᑦ ᐅᖃᐅᓯᖅ ᓴᖅᑭᑎᒃᑲᓐᓂᕈᑎᒋᓂᐊᖅᑕᖏᓐᓂᒃ
ᓄᓇᕗᑦ ᑐᙵᕕᒃᑯᑦ ᐃᓚᒋᔭᐅᔪᖅ 12-ᓂ ᓄᓇᖃᖅᑳᖅᑐᓂᒃ ᓄᓇᑖᕐᓂᕐᒨᖓᔪᓂᒃ ᑲᑐᔾᔨᖃᑎᒌᓂ ᐃᑲᔫᑎᑖᖃᑕᐅᓂᐊᖅᑐᖅ ᐅᑯᓇᙵᑦ ᓄᓇᖃᖅᑳᖅᑐᑦ ᐅᖃᐅᓯᖏᓐᓂᒃ ᐱᓕᕆᐊᖃᖅᑐᓂᒃ
ᒐᕙᒪᑐᖃᒃᑯᑦ ᐃᑲᔫᑎᒃᓴᓂ ᐱᑎᑦᑎᓂᐊᖅᑐᑦ ᓄᓇᑖᕐᓂᕐᒨᖓᔪᓄᑦ ᑲᑐᔾᔨᖃᑎᒌᓄᑦ ᐃᑲᔪᕋᓱᒃᖢᑎᒃ ᓄᓇᖃᖅᑳᖅᑐᑦ ᐅᖃᐅᓯᖏᓐᓂᒃ. (ᐊᔾᔨᙳᐊᖁᑎᒋᔭᐅᔪᖅ)
For English version, see NTI receives $13.8M in federal money to revitalize Inuktut
ᓄᓇᕗᑦ ᑐᙵᕕᒃᑯᑦ ᑐᒃᓯᕋᐅᑎᓕᐊᕐᓂ ᐱᑲᑕᒍᒪᔪᑦ ᑐᓂᔭᐅᖃᑕᐅᓂᐊᖅᑐᓂᒃ ᐅᕙᙵᑦ $13.8 ᒥᓕᐊᓐᓂ ᒐᕙᒪᑐᖃᒃᑯᓐᓂ ᐃᑲᔫᑎᑖᖏᓐᓂ ᐃᓄᒃᑐᑦ ᐅᖃᐅᓯᖅ ᓴᖅᑭᑎᑕᐅᒃᑲᓐᓂᕈᓐᓇᖁᓪᓗᒍ.
ᐃᑲᔫᑎᒃᓴᖅ “ᖃᓄᐃᓕᐅᕈᑎᒃᓴᖃᕐᑎᑦᑎᔾᔪᑎ ᐊᒻᒪ ᐃᑲᔪᕈᑎᐅᓗᓂ ᐃᓄᖕᓂ ᓴᐳᔾᔨᓇᓱᒃᑎᓪᓗᒋᑦ, ᐅᑎᖅᑎᑦᑎᓇᓱᒃᑎᓪᓗᒋᑦ, ᐊᑐᓕᖅᑎᑦᑎᒃᑲᓐᓂᕐᓗᑎ ᐊᒻᒪ ᐊᑐᐃᓐᓇᕈᓐᓇᖅᑎᑦᑎᔪᓐᓇᕐᓗᑎᒃ ᐃᓄᒃᑐ ᐅᖃᐅᓯᕐᒥ ᒫᓐᓇ ᒐᕙᒪᒃᑯᓐᓄᑦ ᐃᑲᔪᖅᑕᐅᙱᑦᑐᓂᒃ ᐱᓕᕆᐊᑎᒍᑦ,” ᑕᐃᒪᓕ ᑖᒃᑯᐊ ᑲᑐᔾᔨᖃᑎᒌᑦ ᑐᒃᓯᕋᐅᑎᓂ ᐱᔪᒪᔾᔪᑎᖏ ᐅᖃᕐᓯᒪᔪᑦ.
ᐊᔪᕈᓐᓃᕐᓯᒪᔪᑦ ᐱᓇᓱᒍᒪᔪᖅ ᐱᓕᕆᖃᑎᒌᒃᑐᓪᓘᓐᓃᑦ ᑭᓇᑐᐃᓐᓇᕐᓘᓐᓃᑦ ᓄᓇᕗᒥᑦ ᐊᖏᕈᑎᓂ ᐊᑎᖃᖃᑕᐅᔭᕆᐊᖃᕐᑐᑦ ᐊᒻᒪᓗ ᐃᓄᐃᑦ ᑮᓇᐅᔭᓕᐅᕋᓱᒐᑎ ᑲᑐᔾᔨᖃᑎᒌᑦ ᓄᓇᕗᒦᑦᑐᑦ ᐊᓯᐊᓂᓪᓘᓐᓃᑦ ᓇᓗᓇᐃᕐᓯᔭᕆᐊᓖᑦ ᐅᖃᐅᓯᖅ ᐱᓕᕆᐊᕆᓇᔭᖅᑕᖓᓂ “ᒪᓕᒃᑐᓂᒃ” ᓄᓇᕗᑦ ᑐᙵᕕᒃᑯᑦ ᓯᕗᓪᓕᐅᑎᓯᒪᔭᖏᓐᓂᒃ ᐊᑐᖁᔭᖏᓐᓂ ᐃᑲᔫᑎᓕᕆᓂᒃᑯᑦ.
ᑕᓪᓕᒪᓂᒃ ᓯᕗᓪᓕᐅᑎᔭᕆᐊᓕᖕᓂ ᐋᖅᑭᒃᓯᓯᒪᖕᒪᑕ: ᐃᓄᒃᑐᑦ ᑐᓴᐅᒪᔾᔪᑎᓕᕆᓂᖅ ᐊᒻᒪ ᖃᓄᐃᓕᐅᕈᓯᓕᕆᓂᖅ ᐅᑯᓂᖓ ᑐᓴᒐᒃᓴᓕᐅᖅᑎᒃᑯᑦ ᓈᓚᐅᑎᓕᕆᓂᒃᑯᑦ, ᑕᕐᕆᔭᒐᒃᓴᓕᐅᕐᓂᒃᑯᑦ, ᐸᐃᑉᐹᑎᒍᑦ ᑐᓴᒐᒃᓴᓕᐅᕐᓂᒃᑯᑦ, ᐅᖃᓪᓚᑲᑕᖃᑦᑕᕐᓂᒃᑯᑦ ᐊᒻᒪ ᐅᖃᐅᓯᓕᕆᓂᕐᒥ ᐱᓕᕆᐊᖃᕐᓂᒃᑯᑦ; ᐃᓕᓐᓂᐊᖅᓯᒪᓗᑎᒃ ᓱᕈᓯᓕᕆᓂᕐᒥ, ᐃᓕᓐᓂᐊᓕᓵᖅᑐᓂ-12ᒥ, ᐊᒻᒪ ᐃᓕᓐᓂᐊᒃᑲᓐᓂᕐᕕᒃᓴᒥ, ᐅᖃᐅᓯᓕᕆᓂᕐᒥᒃ ᐱᓕᕆᐊᖃᕈᓐᓇᕐᓂᕐᒥᒃ ᐊᔪᕈᓐᓃᖅᓴᖅᓯᒪᓗᑎᒃ ᐅᕝᕙᓘᓐᓃᑦ ᐃᓕᓐᓂᐊᖅᓯᒪᓪᓚᕆᖕᓂᒃᑯᑦ ᐱᕙᓪᓕᐊᔪᓕᕆᓂᕐᒥ; ᓄᓇᓕᖕᓂ ᐱᓕᕆᐊᓂ ᒪᑯᓂᖓ ᐃᓕᓐᓂᐊᖅᑎᑦᑎᔾᔪᑎᓂᒃ ᐊᒻᒪ ᖁᕕᐊᓲᑎᖃᕐᓂᕐᒧᑦ ᐊᒻᒪᓗ ᐅᖃᐅᓯᕐᓂ ᑎᑎᕋᐅᓯᖃᖃᑦᑕᕐᓯᒪᓗᑎᒃ ᐃᓄᐃᑦ ᐅᖃᐅᓯᖏᓐᓂ ᐊᒻᒪ ᖃᓄᐃᓕᐅᕈᓯᖏᓐᓂ ᐊᑐᕐᓯᒪᔪᓂᒃ
ᐃᑲᔫᑎᒃᓴᖅ ᐊᐅᓚᑕᐅᔪᖅ ᐅᑯᓇᙵᑦ ᑲᓇᑕᒥ ᐃᑦᑕᕐᓂᓴᓕᕆᔨᓄᑦ ᒪᐅᓇ ᓄᓇᖃᖅᑳᖅᑐᑦ ᐅᖃᐅᓯᖏᓐᓄᑦ ᒪᓕᒐᖅᑎᒍᑦ.
2024-ᒧᑦ ᒐᕙᒪᑐᖃᒃᑯᑦ ᐊᐅᓚᑦᑎᔾᔪᑎᒃᓴᑎᒍᑦ ᑐᓂᓯᓂᐊᕐᓂᕋᓚᐅᕐᓯᒪᖕᒪᑕ $225 ᒥᓕᐊᓐᓂ ᐊᕐᕌᒍᓄᑦ ᑕᓪᓕᒪᓄᑦ, ᐃᓚᖃᕐᓗᓂ $45 ᒥᓕᐊᓐᓂ ᑐᓂᔭᐅᖃᑦᑕᕐᓂᐊᖅᑐᓂ ᐃᑲᔪᕈᑎᒃᓴᓂ ᐊᑐᓕᖅᑎᑦᑎᓂᕐᒧᑦ ᒪᓕᒐᖅᒥ.
ᒐᕙᒪᑐᖃᒃᑯᑦ ᐃᑲᔫᑎᒃᓴᖃᖅᑎᑦᑎᔪ ᐅᑯᓄᖓ ᑐᓂᔭᐅᓯᒪᔪᓂᒃ ᓄᓇᖃᖅᑳᖅᑐᓂᒃ ᓄᓇᑕᖅᓯᒪᓂᕐᒧᑦ ᑲᑐᔾᔨᖃᑎᒌᓄ ᑕᐃᒪᓐᓇ ᐊᑐᓕᖅᑎᑦᑎᔪᓐᓇᕐᓂᐊᕐᒪᑕ “ᓇᖕᒥᓂᖅ ᐅᖃᐅᓯᖏᓐᓂᒃ ᐱᓕᕆᐊᒃᓴᓂᒃ,” ᑖᓐᓇ ᐱᓕᕆᐊᒃᓴᓕᕆᓂᕐᒧᑦ ᐅᖃᕐᓯᒪᔪᖅ.
ᑲᑎᖢᑎᒃ 12 ᓄᓇᖃᖅᑳᖅᑐᑦ ᐊᓪᓚᐃᑦ, ᐊᓪᓚᖓᔪᐃᑦ ᐊᒻᒪ ᐃᓄᐃᑦ ᓄᓇᑖᕐᓂᕐᒧᑦ ᑲᑐᔾᔨᖃᑎᒌᑦ ᐃᑲᔫᑎᑖᓚᐅᕐᑐᑦ ᐅᑯᐊ ᐃᓚᒋᔭᐅᓪᓗᑎᒃ ᑎᓴᒪᑦ ᐃᓄᐃᑦ ᑲᑐᔾᔨᖃᑎᒌᖏᑦ: ᓄᓇᕗᑦ ᑐᙵᕕᒃ, ᒪᑭᕝᕕᒃ, ᐃᓄᕕᐊᓗᐃᑦ ᐊᕕᒃᑐᕐᓯᒪᓂᒃᑯ ᑲᑐᔾᔨᖃᑎᒌᖏᑦ ᐊᒻᒪᓗ ᓄᓇᑦᓯᐊᕗᑦ ᒐᕙᒪᖓᑦ.
“ᓄᓇᖃᖅᑳᖅᑐᑦ ᐅᖃᐅᓯᖏᑦ ᖃᓄᐃᓕᐅᕈᑎᒋᓇᓱᒃᖢᒍ ᐊᒃᓱᕈᕈᑎᐅᓯᒪᖕᒪᑦ,” ᐅᖃᕐᓯᒪᔪᖅ 2024-ᒥ ᐅᓂᒃᑳᓕᐊᕆᓯᒪᔪᑦ ᓇᐃᓴᐃᔨᒃᑯᓐᓂᑦ ᑲᓇᑕᒥ ᑕᐅᑐᒃᖢᒍ 2021-ᒥ ᓇᐃᓴᐃᓯᒪᔾᔪᑎᖏᓐᓂᒃ.
ᐃᓄᒃᑐᑦ, ᐅᑯᓂᖓ ᐅᖃᐅᓯᓕᒃ ᐃᓄᒃᑎᑐᑦ, ᐃᓄᐃᓐᓇᖅᑐᓐ ᐊᒻᒪ ᐊᓯᖏᓐᓂ ᐃᓄᐃᑦ ᐅᖃᐅᓯᖏᓐᓂ, ᐊᑐᕐᓯᒪᔾᔪᑎᐅᖕᒥᒻᒪᑦ, ᒪᑯᐊ ᓄᑲᖅᖠᐅᓂᕐᓴᑦ ᐃᓄᐃᑦ ᐅᖃᐅᓯᑐᖃᕐᒥ ᐊᑐᙱᓐᓂᕐᓴᐅᓕᕐᖢᑎᒃ, ᑕᐃᒪᓐᓇ ᐅᖃᕐᓯᒪᔪᑦ ᓇᐃᓴᐃᔨᒃᑯᑦ ᑲᓇᑕᒥ.
ᐱᐅᓯᕚᓪᓕᖅᑎᑦᑎᓂᖅ ᐃᓄᒃᑐᑦ ᓯᕗᓪᓕᐅᔾᔭᐅᓯᒪᖃᑕᐅᓚᐅᕐᑐᖅ ᓄᓇᕗᑦ ᑐᙵᕕᒃᑯᑦ ᐊᕐᕌᒍᓂ ᑎᓴᒪᓂ ᖃᓄᐃᓕᐅᕈᑎᒋᓂᐊᖅᑕᖏᓐᓂ ᕕᕝᕗᐊᕆᐅᑎᓪᓗᒍ.
“ᐊᑐᐃᓐᓇᖃᖅᑎᑕᐅᓂᖅ ᐅᖃᐅᓯᓕᕆᓂᕐᒧᑦ ᐃᑲᔫᑎᓂ ᐃᑲᔫᑎᒋᓂᐊᖅᑕᕗᑦ ᑕᒪᓐᓇ ᐊᑐᕈᒪᔭᕗᑦ ᐊᑐᕈᓐᓇᖅᑎᓯᓪᓗᒍ,” ᓄᓇᕗᑦ ᑐᙵᕕᒃᑯᑦ ᐊᖓᔪᖅᑳᖓ ᔨᐅᕆᒥ ᑑᕐᖔᓗᒃ ᐅᖃᓚᐅᕐᑐᖅ ᑐᓴᒐᒃᓴᑎᒍᑦ ᓄᑖᓂᒃ ᐃᑲᔫᑎᒃᓴᓂ ᐅᖃᐅᓯᖃᖅᖢᓂ.
ᐱᓇᓱᒍᑎᓕᐅᕈᓐᓇᖅᑐᑦ ᓄᓇᕗᑦ ᑐᙵᕕᒃᑯᑦ ᑐᒃᓯᕋᐅᑎᖏᓐᓂᒃ ᐅᓇ ᐅᓪᓗᖅ ᑎᑭᓐᓇᓱᖕᓂᖓᓂᒃ ᒪᐃ 30.
(0) Comments