ᓄᓇᕗᑦ ᑐᙵᕕᒃᑯᑦ ᑭᖑᕙᕆᐊᖅᑎᑦᑎᕗᑦ ᓄᓇᕗᓕᒫᒥᑦ ᐊᖓᔪᖅᑳᒃᓴᒥ ᓂᕈᐊᕐᓂᒃᓴᖓᓂᒃ ᐅᕗᖓ ᕕᕝᕗᐊᕆ 8-ᒧᑦ

ᑭᓯᐊᓂᓕ ᐅᑯᐊ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᓂᕈᐊᖅᑎᑦᑎᓂᐊᕐᓂᖓ ᑲᔪᓯᓂᐊᕐᑐᖅ ᑎᓯᐱᕆ 14-ᒥᑦ

ᓄᓇᕗᑦ ᑐᙵᕕᒃ ᑎᒥᖓ ᑭᖑᕙᕆᐊᖅᑎᑦᑎᕗᑦ ᐊᖓᔪᖅᑳᒧᑦ ᓂᕈᐊᕐᓂᖅ ᐅᕗᖓ ᕕᕝᕗᐊᕆ 8-ᒧᑦ. ᐊᖓᔪᖅᑳᖅ ᐊᓗᑭ ᑰᑦᑎᖅ, ᓴᐅᒥᐊᓃᑦᑐᖅ, ᐊᐃᑉᐸᖓᓂ ᐊᖓᔪᖅᑳᖑᒃᑲᓐᓂᕋᓱᒃᑎᓪᓗᒍ ᐅᓇ ᐋᓐᑐᕉ ᓇᑲᓱᒃ, ᑕᓕᕐᐱᐊᓃᑦᑐᖅ, ᐱᓇᓱᖃᑕᐅᒋᕗᖅ ᐊᖓᔪᖅᑳᖑᓂᕐᒧᑦ. (ᐊᔾᔨᙳᐊᖁᑎᒋᔭᐅᔪᖅ)

By ᔨᒻ ᐱᐊᓪ

For an English version of this story, see NTI postpones Nunavut-wide presidential election until Feb. 8

ᓄᓇᕗᓕᒫᒥᑦ ᐃᓄᖕᓂ ᑭᒡᒐᖅᑐᐃᔩᑦ, ᓄᓇᕗᑦ ᑐᙵᕕᒃ ᑎᒥᖓ ᑭᖑᕙᕆᐊᖅᑎᑦᑎᓂᐊᕐᒪᑕ ᐊᖓᔪᖅᑳᒃᓴᒧᑦ ᓂᕈᐊᕐᓂᐅᓂᐊᕐᑐᒥᑦ ᐅᕗᖓ ᕕᕝᕗᐊᕆ 8-ᒧᑦ, ᑖᒃᑯᐊ ᑲᑐᔾᔨᖃᑎᒌᖑᔪᑦ ᐅᖃᓚᐅᕐᓯᒪᔪᑦ ᑎᓯᐱᕆ 4-ᖑᑎᓪᓗᒍ ᐅᓐᓄᒃᑯᑦ ᑐᓴᒐᒃᓴᓕᐅᕐᓇᒥᑦ.

ᓂᕈᐊᕐᓂᐅᓂᐊᓚᐅᕐᑐᖅ, ᓄᓇᕗᒥᐅᓕᒫᓄᑦ ᓂᕈᐊᕈᓐᓇᕐᓯᓯᒪᔪᓄᑦ, ᐋᖅᑭᒃᑕᐅᒪᐅᕐᓯᒪᒐᓗᐊᕐᒪᓐ ᑎᓯᐱᕆ 14-ᒧᑦ.

ᑭᓯᐊᓂᓕ ᓄᕙᒡᔪᐊᕐᓇᖅ-19-ᒥᑦ ᐋᓐᓂᐊᖅᑖᑲᑕᒃᑐᓄᑦ ᑭᕙᓪᓕᕐᒥ ᐊᒻᒪ ᓴᓂᑭᓗᐊᕐᒥ, ᓄᓇᕗᑦ ᑐᙵᕕᒃᑯᑦ ᑲᑎᒪᔨᖏᑦ ᐱᖁᔨᕗᖔᕈᑎᒃᑯᑦ ᐊᓂᒍᐃᑎᑦᑎᓚᐅᕐᒪᑕ ᓄᕕᐱᕆ 30-ᐅᑎᓪᓗᒍ ᓂᕈᐊᕐᓇᖅ ᑭᖑᕙᕆᐊᖅᑕᐅᔪᒪᓂᖓᓂᒃ.

ᑖᓐᓇ ᐃᓱᒪᓕᐊᕆᔭᐅᔪᖅ ᐊᒻᒪᓗ ᐊᓯᖏᑦ ᐋᖅᑭᒋᐊᕈᑎᒃᓴᑦ ᑲᑐᔾᔨᖃᑎᒌᑦ ᓂᕈᐊᕐᓂᕐᒧᑦ ᒪᓕᒐᖏᓐᓂ ᐊᖏᖅᑕᐅᓚᐅᕐᒪᑕ ᐅᑯᐊ ᑐᙵᕕᒃᑯᑦ ᑕᐃᔭᖓᓂᒃ “ᐊᑐᐃᓐᓇᙱᑦᑐᒧᑦ ᑲᑎᒪᔨᒃᑯᑦ ᑲᑎᒪᓂᖓᓂᒃ” ᑎᓯᐱᕆ 4-ᒥᑦ.

ᑕᐃᒪᐃᓕᐅᓕᓚᐅᕐᑐᓪᓕ ᓲᖃᐃᒻᒪ ᓄᓇᕗᓕᒫᖅ ᒪᑐᔭᐅᖁᔭᐅᓂᖓᓄᑦ ᐆᒧᖓ ᓄᓇᕗᒥᑦ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐊᖓᔪᖅᑳᖓᓄᑦ ᓄᕕᐱᕆ 18-ᒥᑦ ᑎᓯᐱᕆ 2-ᒧᑦ, ᑕᐃᒪᐃᓐᓂᖓᓄᓪᓗ ᑖᓐᓇ ᓂᕈᐊᖅᑐᓕᕆᔨᒻᒪᕆᒃ, ᑳᑕᓕᓐ ᓯᒍᑦᓴᓐ, ᓇᓂᓯᔪᓐᓇᑦᑎᐊᓚᐅᙱᒻᒪᓐ ᓂᕈᐊᕐᕕᐅᓂᐊᕐᑐᓂᒃ ᐊᒻᒪ ᐱᓕᕆᔨᐅᓂᐊᕐᑐᓂᒃ.

ᑕᐃᒪᐃᑎᑦᑎᓚᐅᕐᒥᔪᑦ ᐃᓱᒪᓕᐅᕆᓪᓗᑎᒃ ᑭᒃᑯᓕᒫᓂᒃ ᖃᓄᐃᖁᔨᙱᓐᓂᕐᒨᖓᓂᕐᒧᑦ,ᓄᓇᕗᑦ ᑐᙵᕕᒃᑯ ᑎᑎᕋᕐᓯᒪᔭᖓ ᐅᖃᕐᓯᒪᔪᓪᓂ “ᐃᓄᐃᑦ ᓄᓇᖃᖅᑕᑦ ᐊᒃᑐᖅᑕᐅᓯᒪᓕᕐᑐᑦ ᐋᓐᓂᐊᕕᒡᔪᐊᕐᓇᒥ ᐊᒃᓱᐊᓗᒃ ᐃᓱᒫᓘᑎᖃᕐᒪᑕ ᒫᓐᓇ,” ᑖᓐᓇ ᑎᑎᕋᕐᓯᒪᔪᖅ ᐅᖃᕐᓯᒪᓪᓗᓂ.

ᓂᕈᐊᕐᑕᐅᒃᑲᓐᓂᕋᓱᒃᑐᖅ ᐊᓗᑭ ᑰᑦᑎᖅ ᐊᒻᒪ ᓂᕈᐊᕐᑕᐅᓇᓱᖕᒥᔪᖅ ᐋᓐᑐᕉ ᓇᑲᓱᒃ ᓂᕈᐊᒐᒃᓴᑐᐊᖑᔫ ᐊᖓᔪᖅᑳᒃᓴᒧᑦ.

ᑭᓯᐊᓂᓕ, ᓄᓇᕗᑦ ᑐᙵᕕᒃᑯᑦ ᐅᖃᖅᑐᑦ — ᒫᓐᓇᐅᔪᕐᓕ — ᓂᕈᐊᒐᒃᓴᓕᐅᕐᓂᖅ ᒪᑐᐃᕐᑕᐅᒃᑲᓐᓂᔾᔮᙱᓐᓂᕋᖅᖢᒍ.

ᑭᓯᐊᓂᓕ ᑖᒃᑯᐊ ᑲᑐᔾᔨᖃᑎᒌᖑᔪᑦ ᓄᑖᖅ ᓂᕈᐊᕐᓂᕐᒧᑦ ᒪᓕᒐᖏᑦ ᐱᔪᓐᓇᕐᑎᑦᑎᓯᒪᖕᒪᑕ ᒪᑐᐃᕐᑎᑦᑎᒃᑲᓐᓂᕈᓐᓇᕐᓗᑎᒃ “ᐱᔭᕆᐊᖃᕈᑎ,” ᐅᖃᕐᓯᒪᔪᑦ ᑎᑎᖃᓂᒃ.

ᓲᕐᓗ ᐃᒪᓐᓇ, ᐅᖃᖅᐸᑕ ᑕᒪᕐᒥᒃ ᓂᕈᐊᒐᒃᓴᐅᔪᑦ ᓂᕈᐊᒐᒃᓴᐅᔪᒪᔪᓐᓃᕈᑎᒃ ᑭᖑᕙᕆᐊᖅᑕᐅᓂᕐᒧᑦ, ᑕᐃᒪᓕ ᑲᑎᒪᔩᑦ ᒪᑐᐃᕐᓯᒃᑲᓐᓂᕈᓐᓇᖅᑐᑦ ᓂᕈᐊᒐᒃᓴᓕᐅᕐᓂᕐᒥᒃ.

ᐊᒻᒪᓗ, ᑕᒪᕐᒥ ᓂᕈᐊᒐᒃᓴᐅᓂᕐᒧᑦ ᒪᓂᐅᓴᐅᓯᐅᕐᓂᖅ ᓄᖅᑲᖅᑎᑕᐅᓚᐅᕐᖢᑎᒃ ᑎᓯᐱᕆ 4-ᒥᑦ ᐊᒻᒪᓗ ᑲᔪᓯᑎᑕᐅᔾᔮᙱᖢᑎᒃ ᑭᓯᐊᓂ ᔭᓄᐊᕆ 4-ᖑᓕᕐᐸᑦ.

Share This Story

(0) Comments

Join the Conversation

Your email address will not be published. Required fields are marked *

*