ᓄᓇᕗᑦ ᒐᕙᒪᑐᖃᒃᑯᓐᓂ ᑐᓂᔭᐅᕗᑦ $19 ᒥᓕᐊᓐ ᑖᓚᓂ ᓄᕙᒡᔪᐊᕐᓇᖅ-19-ᒧᑦ

ᒐᕙᒪᑐᖃᒃᑯᑦ ᐅᖃᕐᑐᑦ ᓄᓇᕗᒧᑦ ᑐᓂᓯᓂᐊᕐᓂᕋᖅᖢᑎᒃ $19.36 ᒥᓕᐊᓐᓂ ᒫᓐᓇᑲᐅᑎᒋ ᐃᑲᔫᑎᒃᓴᓂᒃ ᓄᓇᕗᑦ ᒐᕙᒪᒃᑯᓐᓄᑦ, ᐃᓄᐃᑦ ᓄᓇᓕᖏᓐᓄᑦ, ᐊᒻᒪᓗ ᐃᓄᐃᑦ ᑲᑐᔾᔨᖃᑎᒌᖏᓐᓄᑦ ᐆᒧᖓ ᓄᕙᒡᔪᐊᕐᓇᖅ-19 ᐋᓐᓂᐊᕕᒡᔪᐊᕐᓇᒧᑦ.

ᑮᓇᐅᔭᐃᑦ ᓂᕿᓄᑦ ᐊᒻᒪ ᐃᑲᔪᕈᑎᒃᓴᓅᖓᓂᐊᕐᑐᖅ, ᓄᓇᓕᖕᓄᑦ ᐱᔨᑦᑎᕋᐅᑎᓄᑦ ᒪᑯᓄᖓ ᐃᒥᖅᑕᕐᓂᕐᒧᑦ, ᓴᐳᓐᓂᐊᕈᑎᓄᑦ ᐊᒻᒪᓗ ᐋᓐᓂᐊᕕᖕᒥᙶᕐᓯᒪᙱᑦᑐᓂᒃ ᓇᖕᒥᓂᖅ ᓴᐳᑎᓯᒪᒍᑎᓄᑦ, ᑕᐃᒪᓐᓇ ᑐᓴᒐᒃᓴᓕᐊᕆᔭᐅᓚᐅᕐᑐᖅ ᐅᑯᓄᖓ ᓄᓇᖃᖅᑳᖅᑐᓕᕆᔨᒃᑯᓐᓂᑦ ᑲᓇᑕᒥ ᐱᖓᔪᐊᓐᓂ, ᓄᕕᐱᕆ 25-ᒥᑦ.

“ᓄᕙᓄᒡᔪᐊᕐᓇᖅ-19 ᑭᕙᓪᓕᕐᒧᐊᕐᐳᖅ ᕿᓚᒥᐊᓗᒃ ᐊᒻᒪᓗ ᐃᑲᔪᕈᑎᒃᓴᑦᑎᓐᓂ ᐊᒻᒪ ᐱᓕᕆᔨᓂᒃ ᐱᓇᓱᒍᑎᒻᒪᕆᐅᓕᕐᖢᓂ.” ᐅᖃᖅᑐᖅ ᓄᓇᕗᑦ ᓯᕗᓕᐅᕐᑎᖓ ᔫ ᓴᕕᑲᑖᖅ, ᑐᓴᒐᒃᓴᑎᒍᑦ ᐊᒻᒪᓗ ᑕᕝᕘᓇ ᖁᔭᓕᓂᕋᖅᖢᓂ ᒐᕙᒪᑐᖃᒃᑯᓐᓂ.

“ᑲᒪᒋᔭᖃᑲᐅᕐᑐᕐᓂᖏᑦ ᑮᓇᐅᔭᑎᒍᑦ ᐆᒧᖓ ᐋᓐᓂᐊᑲᑕᓕᕐᑐᓄᑦ, ᐊᒻᒪᓗ ᐱᓕᕆᖃᐅᕐᑐᕐᓂᖏᓐᓂᒃ ᐃᑲᔫᑎᒃᓴᑎᒍᑦ ᐊᑐᕆᐊᖃᒻᒪᕆᒃᑐᒃᑯᑦ ᖁᔭᒋᒻᒪᕆᒃᐸᕗᑦ,”

ᑐᓴᒐᒃᓴᓕᐊᖑᔪᑦ ᐅᖃᐅᓯᖃᓚᐅᕐᑐᑦ ᖃᔅᓯᒐᓴᖕᓂ ᓄᓇᕗᑦ ᓄᓇᓕᖏᓐᓂᒃ ᐋᓐᓂᐊᖅᑐᖃᑲᑕᓕᕐᓂᖓᓂᒃ, ᐅᑯᓇᓂ ᐊᕐᕕᐊᓂ, ᑎᑭᕋᕐᔪᐊᕐᒥ ᐊᒻᒪ ᑲᖏᖅᖠᓂᕐᒥᒃ. ᓄᕕᐱᕆ 25-ᒥᑦ ᐋᓐᓂᐊᖃᖅᑐᑦ ᓄᓇᕗᒥᑦ 153-ᒧᑦ ᑎᑭᓚᐅᕐᑐᑦ.

ᑮᓇᐅᔭᐃᑦ ᐅᑯᓄᖓ ᑐᓂᔭᐅᓂᐊᕐᑐᑦ ᓄᓇᕗᒥᑦ ᒐᕙᒪᒃᑯᓐᓄᑦ, ᑭᕙᓪᓕᖅ ᐃᓄᐃᑦ ᑲᑐᔾᔨᖃᑎᒌᓄᑦ ᐅᑯᑎᒎᓇᖅ ᓄᓇᕗᑦ ᑐᙵᕕᒃ ᑎᒥᖓᒍᑦ ᐊᒻᒪᓗ ᐊᓯᖏᓐᓄᑦ ᐱᓕᕆᖃᑕᐅᔪᓄᑦ ᐃᑲᔪᕋᓱᒃᖢᑎᒃ ᒫᓐᓇ ᐱᔭᐅᔭᕆᐊᓕᖕᓂ ᐊᒻᒪ ᓴᐳᔾᔨᓯᒪᓂᕐᒧᑦ ᖃᓄᐃᓕᐅᕈᑎᒃᓴᓄᑦ ᐅᓄᕐᓯᓗᐊᖅᑎᑦᑎᑦᑕᐃᓕᓂᕐᒥᒃ ᓄᕙᒡᔪᐊᕐᓇᖅ-19-ᒥᑦ ᐋᓐᓂᐊᖃᕐᑐᓂ ᑕᒫᓂ, ᑖᓐᓇ ᑐᓴᒐᒃᓴᓕᐊᕆᔭᐅᔪᖅ ᐅᖃᕐᓯᒪᓚᐅᕐᑐᖅ.

ᑮᓇᐅᔭᐃᑦ ᐃᑲᔪᕈᑎᐅᓂᐊᕐᒥᔪᑦ ᑐᐊᕕᕐᓇᖅᑐᓕᕆᓂᕐᒧᑦ ᐊᒻᒪ ᐸᕐᓇᒃᓯᒪᓂᕐᒧᑦ ᐸᕐᓇᐅᑎᓄᑦ ᐋᖅᑭᒃᓯᒪᔪᓂᒃ ᓄᓇᕗᒥᑦ.

ᐅᓇ $11.36 ᒥᓕᐊᓐ ᑖᓚ ᓄᓇᕗᒥᑦ ᒐᕙᒪᒃᑯᓐᓄᐊᕐᓂᐊᕐᑐ ᐃᒪᐃᓕᖓᓂᐊᕐᑐᖅ:

• $1.8 ᒥᓕᐊᓐ ᓂᕿᒧᑦ ᐃᑲᔪᕈᑎᒃᓴᓄᑦ ᐃᓄᑑᓐᓇᖅᑐᒦᑦᑕᕆᐊᓕᖕᓂᒃ ᐊᒻᒪᓗ ᐊᓯᖏᓐᓄᑦ ᓂᕿᓄᑦ ᐱᔭᐅᔭᕆᐊᓕᖕᓄᑦ ᐋᓐᓂᐊᕕᒡᔪᐊᕐᓇᕐᑕᖃᖅᑎᓪᓗᒍ.
• $1 ᒥᓕᐊᓐ ᓇᖕᒥᓂᕐᒧᑦ ᓴᐳᑎᓯᒪᒍᑎᓄᑦ ᐊᒻᒪ ᓴᓗᒻᒪᕐᓴᐅᑎᒃᓴᓄᑦ ᐊᒃᑐᖅᑕᐅᓯᒪᔪᓄᑦ ᓄᓇᓕᖕᓄᑦ.
• $6.5 ᒥᓕᐊᓐ ᐃᑲᔪᕈᑎᐅᓂᐊᕐᑐᓂ ᓄᓇᓕᖕᓂ ᐱᔨᑦᑎᕋᐅᑎᓄᑦ ᐊᒃᑐᖅᑕᐅᓯᒪᔪᓂ ᓄᓇᓕᖕᓂ, ᒪᐅᓇ ᓴᐳᔾᔨᓯᒪᓂᕐᒧᑦ, ᐃᒥᖅᑕᕐᓂᕐᒧᑦ ᐊᒻᒪ ᑯᕕᕐᑕᕐᓂᕐᒧᑦ ᐱᔨᑦᑎᕋᐅᑎᓄᑦ, ᓂᖀᑦ ᐊᒡᔭᕐᑐᖅᑕᐅᓂᖏᓐᓄᑦ, ᓴᓗᒻᒪᕐᓴᐅᑎᒃᓴᓄᑦ, ᖃᐅᔨᓴᖅᑕᐅᒍᑎᓄᑦ ᐊᒻᒪ ᐊᓯᖏᓐᓂ ᐋᓐᓂᐊᕕᖕᒥ ᐱᖁᑎᓄᑦ ᐊᒻᒪᓗ ᐋᓐᓂᐊᓯᐅᕐᑎᒃᑲᓐᓂᕐᓄᑦ.
• $1.3 ᒥᓕᐊᓐ ᐊᖏᒡᓕᒋᐊᖅᑎᑦᑎᓂᕐᒧᑦ ᖃᕋᓴᐅᔭᒃᑯᑦ ᐊᑦᑕᑕᕈᓐᓇᐅᑎᓂᒃ ᐃᑲᔫᑎᐅᓂᐊᖅᑐᓄᑦ ᐃᓕᓐᓂᐊᕐᑐᓕᕆᓂᕐᒥᒃ, ᐋᓐᓂᐊᖅᑐᓕᕆᓂᕐᒥᒃ ᐊᒻᒪᓗ ᓄᓇᓖᑦ ᓄᕙᒡᔪᐊᕐᓇᖅ-19-ᒧᑦ ᖃᓄᐃᓕᐅᕈᑎᒃᓴᖏᓐᓄᑦ.
• $513,000 ᐃᑲᔪᕈᑎᒃᓴᐅᓗᑎᒃ ᓱᕈᓯᓕᕆᓂᕐᒧᑦ ᐊᒻᒪ ᐃᓕᓐᓂᐊᓕᓵᕐᑐᓄᑦ ᒪᑐᒧᖓ ᐊᐅᓚᑦᑎᔪᓐᓇᕐᓂᕐᒥᒃ ᓄᕙᒡᔪᐊᕐᓇᖅ-19-ᒧᑦ ᐊᒃᑐᐃᒍᑎᐅᔪᓂᒃ, ᐃᓚᖃᖅᖢᓂ ᐊᔪᕈᓐᓃᕐᓴᐅᑎᒃᓴᓄᑦ ᑖᒃᑯᓄᖓ ᐱᓕᕆᔨᓄᑦ, ᐃᓱᒪᓕᕆᓂᕐᒧᑦ ᐋᓐᓂᐊᖅᑐᓕᕆᓂᕐᒧᑦ ᐃᑲᔫᑎᒃᓴᓂᒃ ᓱᕈᓯᕐᓄᑦ ᐊᒻᒪ ᐃᓐᓇᕐᓄᑦ, ᐊᖏᕐᕋᒥ ᐃᓕᓐᓂᐊᕈᑎᒃᓴᓄᑦ ᐊᒻᒪᓗ ᓂᕿᓄᑦ ᒪᑯᓄᖓ ᐅᓪᓛᕈᒻᒥᑕᕐᓇᐃᑦ ᐅᓪᓗᕈᒻᒥᑕᕐᓇᐃᓪᓗ ᐃᓚᖏᕈᑎᖏᓐᓄᑦ.
• $250,000 ᓂᐅᕕᐅᑎᒃᓴᐅᓂᐊᕐᑐᒥ ᐅᖓᓯᒌᒃᑑᑎᐅᒋᐊᖃᕐᓂᕐᒥ ᖃᐅᔨᒪᕚᓪᓕᕈᑎᒃᓴᓄᑦ ᑭᕙᓪᓕᕐᒥᒃ, ᑖᓐᓇᓕ ᑐᓂᔭᐅᔪᖅ ᐅᕙᙵᑦ ᓄᑖᒥ ᐊᖏᕈᑎᒋᔭᐅᔪᒥ ᓄᓇᕗᒥᑦ ᓯᓚᑦᑐᖅᓴᕐᕕᖕᒥᑦ, ᐅᑯᑎᒎᓇᖅ ᑲᓇᑕᐅᑉ ᐅᑭᐅᕐᑕᖅᑐᖓᓂ ᑮᓇᐅᔭᓕᐅᕋᓱᖕᓂᕐᒧᑦ ᐱᕙᓪᓕᐊᔪᓕᕆᔨᒃᑯᑦ ᐅᑭᐅᕐᑕᖅᑐᕐᒥ ᐃᓐᓇᕐᓂᒃ ᐃᓕᓐᓂᐊᕐᑐᓕᕆᓂᕐᒧᑦ.

ᐊᓯᐊᒍᑦᑕᐅᖅ ᐅᓇ $8 ᒥᓕᐊᓐ ᓄᓇᕗᑦ ᑐᙵᕕᒃ ᑎᒥᖓᓄᐊᕐᓗᓂ ᐱᓕᕆᖃᑎᖃᕐᓂᕐᒧᑦ ᑭᕙᓪᓕᕐᒥ ᐃᓄᐃᑦ ᑲᑐᔾᔨᖃᑎᒌᖏᓐᓂᒃ:

• $6 ᒥᓕᐊᓐ ᓂᕿᒃᓴᓄᑦ, ᐃᒡᓗᖃᖅᑐᓄᑦ ᐃᓕᓐᓂᐊᕐᕕᖕᒥ ᐅᓪᓛᕈᒻᒥᑕᕆᐊᕐᐸᒃᑐᓄᑦ ᐊᒻᒪ ᐅᓪᓗᕈᒻᒥᑕᕈᑎᓄᑦ ᐱᓕᕆᐊᓂᒃ ᐊᑐᖃᑦᑕᓗᐊᕐᓯᒪᔪᓄᑦ, ᐊᒻᒪ ᐊᓯᖏᓐᓂᒃ ᓂᕿᑖᕆᔭᐅᔭᕆᐊᓕᖕᓄᑦ ᐃᓄᖕᓄᑦ ᐊᒻᒪ ᓄᓇᓕᖕᓄᑦ ᓄᓇᓕᖕᓃᑦᑐᓂᒃ ᐋᓐᓂᐊᖃᖅᑐᓂᒃ ᒫᓐᓇ ᓄᕙᒡᔪᐊᕐᓇᖅ-19-ᒥᑦ ᐊᒻᒪᓗ ᓄᓇᓕᖕᓄᑦ ᐃᓕᓐᓂᐊᕕᖏᓐᓂᒃ ᒪᑐᓯᒪᒍᔾᔨᔪᓄᑦ.
• $2 ᒥᓕᐊᓐ ᐃᑲᔫᑎᐅᓂᐊᕐᑐᓂᒃ ᓄᓇᐃᓐᓇᕐᒥ ᐱᓕᕆᐊᒃᓴᓄᑦ ᐊᒻᒪ ᖃᓄᐃᓕᐅᕈᑎᓄᑦ.

“ᓂᕆᔭᒃᓴᐃᑦ ᐊᒻᒪ ᓴᓗᒻᒪᕐᓴᐅᑎᒃᓴᑦ ᐱᔭᐅᔭᕆᐊᖃᒻᒪᕆᖕᒪᑕ. ᐅᓇ ᐃᑲᔫᑎᒃᓴᖅ ᐃᑲᔪᕈᑎᐅᓂᐊᕐᑐᖅ ᓄᓇᕗᒥᑦ ᐃᓄᖕᓂ ᐊᖏᕐᕋᖏᓐᓃᑎᑕᐅᓂᖏᓐᓂᒃ ᐊᒻᒪ ᓇᒧᙵᐊᑲᑕᒋᐊᖃᙱᓐᓂᖏᓐᓄᑦ, ᐅᖃᖅᑐᖅ ᔭᐃᒥᓯ ᐃᑦᑐᓗᒃ, ᐊᖓᔪᖅᑳᖑᑲᐃᓐᓇᖅᑐᖅ ᓄᓇᕗᑦ ᑐᙵᕕᒃ ᑎᒥᖓᓄᑦ.

ᒐᕙᒪᑐᖃᒃᑯᑦ ᐅᖃᓚᐅᕐᑐᑦ ᐱᓕᕆᖃᑎᖃᐃᓐᓇᕐᓂᐊᕐᓂᕋᖅᖢᑎᒃ ᐃᓄᖕᓂ ᐊᒻᒪ ᐊᓯᖏᓐᓂᒃ ᓄᓇᖃᖅᑳᑐᓄᑦ ᐱᓕᕆᖃᑕᐅᔪᓂᒃ ᓇᓗᓇᐃᕐᓯᓇᓱᒡᓗᑎᒃ ᓇᓕᐊᒃ ᑲᑐᔾᔨᖃᑎᒌᖑᔪᑦ ᐃᑲᔪᖅᑕᐅᔭᕆᐊᖃᕐᓂᖏᓐᓂᒃ ᐃᓄᖕᓂ ᓄᓇᖃᖅᑐᓂᒃ ᓄᓇᕗᑦ ᐊᓯᐊᓂ.

ᑖᓐᓇᓕ ᑐᓴᒐᒃᓴᓕᐊᖑᔪᖅ ᐅᖃᕐᓯᒪᓚᐅᕐᑐᖅ ᒐᕙᒪᑐᖃᒃᑯᑦ ᐃᑲᔫᑎᒃᓴᒃᑲᓐᓂ ᑐᓂᓯᔪᓐᓇᕐᓂᕋᖅᖢᑎᒃ ᐱᒃᑲᓐᓂᕆᐊᖃᖅᐸᑕ.

“ᑲᔪᓰᓐᓇᕐᓂᐊᕋᑦᑕ ᓄᓇᕗᒻᒥᐅᓕᒫᑦ ᐃᑲᔪᖅᑕᐅᔪᓐᓇᕐᓗᑎᒃ ᐊᒻᒪᓗ ᐃᑲᔫᑎᖃᖅᑎᑕᐅᔪᓐᓇᕐᓗᑎᒃ ᐋᖅᑭᒍᑎᐅᔪᓐᓇᖅᑐᓂᒃ ᐋᓐᓂᐊᕕᒡᔪᐊᕐᓇᒧᑦ. ᑕᐃᒪᓕ ᓄᓇᕗᒥᐅᑕᓕᒫᑦ ᑲᔪᓯᖁᕙᕗᑦ ᑐᑭᒧᐊᕈᑎᓂᒃ ᒪᓕᑲᑕᐃᓐᓇᕐᓗᑎᒃ ᐊᒻᒪᓗ ᓄᓇᖏᓐᓄᑦ ᐋᓐᓂᐊᖅᑐᓕᕆᔨᒃᑯᓐᓄᑦ ᒪᓕᖁᔭᐅᔪᓂᒃ,” ᐅᖃᖅᑐᖅ ᑖᓐ ᕚᓐᑐ, ᐅᑭᐅᕐᑕᖅᑐᓕᕆᓂᕐᒧᑦ ᒥᓂᔅᑕ ᐅᖃᓚᐅᕐᑐᖅ ᑐᓴᒐᒃᓴᓕᐊᑎᒍᑦ.