ᓄᓇᕗᑦ ᒪᓕᒐᓕᐅᕐᑎᖏᑦ ᑲᑎᕐᖓᕗᑦ ᐋᓐᓂᕐᓯᕆᓂᐊᓗᖃᕈᓐᓃᕐᓗᓂ ᓄᓇᕗᒥᑦ

ᐃᓚᒋᔭᐅᔪᑦ ᓄᓇᕗᒥᑦ ᒪᓕᒐᓕᕆᔨᒃᑯᓐᓄᑦ ᐊᐱᖅᑯᑎᒋᓂᐊᖅᑕᖏᓐᓂᒃ ᑎᑎᕋᕐᓯᒪᔭᖏᓐᓂᒃ ᐊᒻᒪ ᑮᓇᐅᔭᓄᑦ ᐊᑐᖅᑐᒃᓴᕆᓕᕐᒧᑦ ᑎᑎᖃᖁᑎᖏᓐᓂᒃ ᐃᓕᓯᓪᓗᑎᒃ ᑎᓴᒻᒪᕐᒥᓐ, ᒫᑦᓯ 5-ᒥ ᑎᒍᒥᐊᖔᓕᓚᐅᕐᐳᑦ ᑎᑎᕋᖅᑕᖏᓐᓂᒃ ᐅᖃᐅᓯᒃᓴᖏᓐᓂᒃ ᐊᒻᒪ ᑲᒃᑭᐅᑎᒃᓴᓂᒃ.
ᐃᓕᓴᐱ ᓯᐅᑎᐊᐱᒃ, ᒥᓂᔅᑕ ᐃᓄᓕᕆᔨᑯᓐᓄᑦ ᐊᒻᒪ ᐊᕐᓇᓄᑦ ᑲᑎᒪᔨᓄᑦ, ᐱᒋᐊᖅᑎᑦᑎᓚᐅᕐᒪᑦ ᐱᖁᔨᕗᖔᕈᑎᒥᑦ ᐃᒪᓐᓇ “ᐋᓐᓂᕐᓯᕆᓂᐊᓗᖃᕈᓐᓃᕐᓗᓂ ᓄᓇᕗᒥᑦ.”

“ᒪᓕᒐᓕᕆᔨᒃᑯᑦ ᓇᓗᓇᐃᕐᐳᑦ ᐃᑲᔪᖅᑐᐃᓂᖏᓐᓂᒃ ᐱᓕᕆᐊᖑᐃᓐᓇᖅᑐᓂᒃ ᐊᒻᒪ ᖃᓄᐃᓕᐅᕈᑎᒃᓴᓂᒃ ᓴᖅᑭᑎᑦᑎᒃᑲᓐᓂᕐᓂᕐᒧᑦ ᐋᓐᓂᕐᓯᕆᓂᐊᓗᖃᕈᓐᓃᕐᓗᓂ ᓄᓇᕗᒥᑦ”, ᐱᖁᔨᕗᖔᕈᑏᑦ ᐅᖃᕐᓯᒪᔪᑦ.

ᐃᑲᕐᕋᐅ ᐃᓗᐊᓂ, ᑕᒪᕐᒥ ᐊᑐᓂ ᒪᓕᒐᓕᐅᕐᑎᐅᔪᑦ ᐊᒻᒪ ᒥᓂᔅᑕᐅᔪᑦ ᓇᖏᕐᓯᓪᓗᑎᒃ ᐅᖃᓪᓚᓚᐅᕐᑐᑦ ᐱᖁᔨᕗᖔᕈᑎᐅᑉ ᒥᒃᓵᓄᑦ, ᑖᓐᓇᓗ ᐊᓂᒍᖅᑎᑕᐅᓚᐅᕐᖢᓂ ᑕᒪᐃᓐᓄᑦ.

“ᑲᑎᖃᑎᒌᒋᖕᓂᖃᕆᐊᖃᕋᑦᑕ ᐊᑕᐅᑦᑎᒃᑯ ᑕᐃᒪᓐᓇᓗ ᓂᕆᐅᖕᓂᖃᖅᑎᑦᑎᔪᓐᓇᖅᖢᑕ. ᑕᐃᒪᓐᓇ ᑐᓴᖅᑎᑦᑎᕙᖕᓂ ᓂᕆᐅᒍᑎᐅᓕᖃᑦᑕᕐᒪᑦ ᐃᓱᒪᓪᓗᑎᒃ ᐃᓱᒪᒋᔭᖃᑦᑎᐊᕐᓂᑦᑎᓐᓂᒃ ᐊᖓᔪᖅᑳᖑᓂᒃᑯᑦ,” ᓯᐅᑎᐊᐱᒃ ᐅᖃᖅᑐᖅ.

“ᐅᓇ ᐱᒻᒪᕆᐊᓗᒋᒐᒃᑯ, ᐊᒻᒪᓗ ᐊᓯᓐᓄᑦᑕᐅᖅ ᐱᒻᒪᕆᐅᒋᔭᐅᖁᒋᕙᕋ. ᐃᒪᐃᖁᔨᓕᕋᑦᑕ ᐋᓐᓂᕐᓯᕆᓂᐊᓗᖃᕈᓐᓃᕐᓗᓂ ᓄᓇᕗᒥᑦ.”

ᑲᑎᒪᔨᕐᔪᐊᑦ ᐊᔾᔨᐸᓗᐊᓂᒃ ᐱᖁᔨᕗᖔᕈᑎᖃᓚᐅᕐᓯᒪᔪᑦ 2005-ᒥᑦ ᐅᖃᕐᓯᒪᔪᒥᑦ ᐃᓄᓕᒫᑦ ᐱᔪᓐᓇᐅᑎᖃᕐᓂᖏᓐᓂᒃ ᐋᓐᓂᕐᓱᖅᑕᐅᕙᙱᓪᓗᑎᒃ, ᖁᓄᔪᕐᓂᐊᖅᑕᐅᕙᙱᓪᓗᑎᒃ ᐅᕝᕙᓘᓐᓃᑦ ᐃᓱᒪᒃᑯᑦ ᐋᓐᓂᕐᓱᖅᑕᐅᕙᙱᓪᓗᑎᒃ ᐊᒻᒪ ᐋᓐᓂᕐᓱᐃᕆᔭᐅᕙᙱᓪᓗᑎᒃ.

“ᓄᓇᕗᑦ ᐱᐅᙱᑦᑐᕈᓗᖕᓂᑦ ᖃᓄᐃᓕᐅᕈᑎᖃᕐᓯᒪᖕᒪᑕ, ᑭᓇᑐᐃᓐᓇᐅ ᐱᒃᑯᒋᓇᔭᙱᑕᖏᓐᓂᒃ. ᑕᒪᒃᑯᐊ ᖃᓄᐃᓕᐅᕈᑎᐅᓂᑯ ᖁᐊᕐᓵᕐᓇᖅᑐᐊᓘᖕᒪᑕ. ᐱᒻᒪᕆᐊᓘᕗᑦ ᐅᑯᐊ ᒪᓕᒐᓕᕆᔨᐅᔪᑦ ᑲᑎᒪᔨᖏᓪᓗ ᑕᒪᑐᒥᖓ ᓴᖅᑭᔮᖅᑎᑦᑎᓯᒪᔭᕆᐊᖃᖅᑐᑦ. ᑕᒪᒃᑯᐊ ᐅᖃᐅᓯᕆᔭᕆᐊᒃᓴᖅ ᐊᔪᕐᓇᖅᑐᕈᓘᕙᒃᑑᒐᓗᐊᑦ ᑭᓯᐊᓂᓕ ᑕᐃᒪᓐᓇ ᐊᓯᑦᑎᓐᓂ ᐊᑐᓕᖅᑎᑦᑎᔪᓐᓇᕋᑦᑕ,” ᐅᖃᓚᐅᕐᑐᖅ ᐃᖃᓗᐃᑦ-ᒪᓂᕋᔭᒃᒧᑦ ᒪᓕᒐᓕᐅᕐᑎ ᐋᑕᒻ ᓚᐃᑦᓯᑑᓐ, ᑖᓐᓇᓗ ᐱᖁᔨᕗᖔᕈᑎᒥ ᐊᐃᑉᐱᕐᓯᓚᐅᕐᖢᓂ.

“ᓄᓇᖃᑎᒃᑲ ᑕᒪᒃᑯᓂᖓ ᐅᖃᐅᓯᖃᖃᑦᑕᖁᕙᒃᑲ. ᓂᐱᖃᙱᔾᔪᑎᐅᑐᐃᓐᓇᕆᐊᖃᕈᓐᓃᕐᒪᓐ. ᓄᓇᓕᓕᒫᑦ ᑭᓯᐊᓂ ᐱᓕᕆᔪᐃᓐᓇᐅᒍᑎ ᐊᓯᙳᖅᑎᑦᑎᔪᓐᓇᖅᑐᑦ. ᑕᐃᒪᓕ ᓂᕆᐅᒃᐳᖓ ᐅᓇ ᐱᖁᔨᕗᖔᕈᑎ ᐃᑲᔪᖅᑐᐃᓂᐊᕐᓗᓂ ᐋᓐᓂᕐᓯᕆᓂᐊᓗᖃᕈᓐᓃᕐᓂᕐᒥᑦ ᓄᓇᕗᒥᑦ ᓄᓇᕗᒥᐅᓄᑦ ᑕᐃᒪᐃᑎᑕᐅᓂᐊᕐᐳᖅ, ᐃᓄᐃᑦ ᑲᑐᔾᔨᖃᑎᒌᓄᑦ ᐊᒻᒪᓗ ᒪᐃᔭᓄᑦ ᐊᒻᒪ ᑲᑎᒪᔨᓄᑦ,” ᓚᐃᑦᓯᑑᓐ ᐅᖃᖅᑐᖅ.

ᐅᖃᓪᓚᒋᐊᖃᓕᕐᑎᓪᓗᒍ, ᑕᐃᕕᑦ ᐊᕿᐊᕈᒃ, ᐱᕙᓪᓕᐊᔪᓕᕆᓂᕐᒧᑦ ᐊᒻᒪ ᐃᖏᕐᕋᔾᔪᑎᓕᕆᓂᕐᒧᑦ ᒥᓂᔅᑕ, ᐅᖃᐅᓯᖃᓚᐅᕐᐳᖅ ᐊᕐᓇᓂᒃ ᐱᒻᒪᕆᐅᓂᕋᐃᓪᓗᓂ ᓄᓇᕗᒥᑦ ᐅᔭᕋᒃᓯᐅᕐᕕᖏᓐᓂᒃ, ᐅᖃᖅᖢᓂ “ᐅᓄᕐᓯᕙᓪᓕᐊᓂᖏᓐᓂᒃ.”

“ᑕᐅᑐᓕᕋᑦᑕ ᐊᓯᙳᖅᐸᓪᓕᐊᔪᒥᓐ ᓄᓇᕗᒥᑦ. ᖄᖅᑎᑦᑎᕙᒃᖢᑎᒃ, ᐊᖏᔪᐊᓗᖕᓂ ᓄᓇᓯᐅᑎᓂ ᐊᑐᖅᐸᒃᖢᑎᒃ ᐊᒻᒪᓗ ᐊᖏᓂᖅᐹᖅ ᐊᖅᑯᑕᐅᓪᓗᓂ ᐊᕐᓇᒧ ᐅᕙᓐᓂ ᒥᑭᓐᓂᕐᓴᒧᑦ,” ᐊᕿᐊᕈᒃ ᐅᖃᖅᑐᖅ, ᐃᖅᑲᐅᒪᓪᓗᓂᐅᒃ ᐊᕐᓇᖅ ᑕᑯᓚᐅᕐᑕᖓ ᐅᔭᕋᒃᓯᐅᕐᕕᖕᒥᑦ ᑕᑯᔭᖅᑐᖅᑎᓪᓗᒋᑦ.

ᒪᓕᒐᓕᕆᔨᒃᑯᑦ ᒥᓂᖦᑕᖓ ᔩᓂ ᐃᕼᐊᓗᐊᒃ ᐅᖃᓚᐅᕐᑐᖅ ᐱᓕᕆᕝᕕᖓᑦ ᕿᒥᕐᕈᐊᕐᓂᕋᖅᖢᓂᒋᑦ ᐊᒻᒪ ᐋᖅᑭᒃᓱᐃᕙᓪᓕᐊᓂᕋᖅᖢᓂᒋᑦ ᓄᓇᕗᑦ ᐃᓚᒌᓂᒃ ᐋᓐᓂᕐᓱᐃᕆᕙᒃᑐᓂᒃ ᓄᖅᑲᖅᑎᑦᑎᓂᕐᒧᑦ ᒪᓕᒐᕐᔪᐊᒥᑦ ᓴᐳᔾᔨᓯᓂᕐᒧᑦ ᓄᓇᕗᒥᑦᐅ ᐃᓚᒌᓂᒃ ᐋᓐᓂᕐᓱᐃᕆᓗᐊᖅᐸᒃᑐᓂᒃ.

ᒪᓕᒐᕐᔪᐊᖅ ᐊᓂᒍᖅᑎᑕᐅᓚᐅᕐᓯᒪᔪᖅ 2006-ᒥᑦ ᓄᓇᕗᒥᐅᑕᑦ ᐃᑲᔫᑎᖃᕈᓐᓇᕐᑎᑕᐅᓪᓗᑎᒃ ᐋᓐᓂᕐᓱᐃᕆᓗᐊᖅᐸᒃᑐᓂᒃ ᐊᒻᒪᓗ ᐋᓐᓂᕐᓱᐃᕆᑎᑦᑎᑦᑕᐃᓕᓂᕐᒧᑦ.

ᐃᕼᐊᓗᐊᒃ ᐅᖃᐅᓯᖃᓚᐅᕐᑐᖅ ᐊᓯᖏᑦ ᑲᓇᑕᒥ ᐋᖅᑭᒋᐊᕐᓯᒪᓕᕐᓂᖏᓐᓂᒃ ᐊᔾᔨᖏᓐᓂᒃ ᒪᓕᒐᓂ ᒪᑯᑎᑐᓇᖅ ᐃᖅᑲᓇᐃᔮᒥ ᕿᑲᓚᐅᑲᒍᓐᓇᕐᓂᕐᒥᒃ ᑕᒪᒃᑯᓄᖓ ᐃᓄᖕᓄᒃ ᕿᒫᓇᓱᒃᑐᓄᑦ ᐋᓐᓂᕐᓯᕆᓂᐊᓗᖕᒥ.

“ᐱᓕᕆᕝᕕᒋᔭᕋ ᕿᒥᕐᕈᐊᖅᑐᐃ ᒫᓐᓇ ᒪᓕᒐᕆᔭᑦᑎᓐᓂᒃ ᑕᒪᒃᑯᐊ ᐱᑦᑎᐊᖅᑕᐅᕙᙱᓗᐊᕐᑐᑦ ᐃᑲᔪᖅᑕᐅᔪᓐᓇᕈᓐᓇᕐᓗᑎᒃ ᖃᓄᖅ ᐱᑦᑎᐊᖅᑕᐅᙱᓗᐊᕐᓂᕐᒥ ᕿᒪᐃᔪᓐᓇᕐᒪᖔᖏᓐᓂᒃ ᐃᖅᑲᓇᐃᔮᖏᓐᓂᒃ ᓄᖅᑲᕆᐊᖃᙱᓪᓗᑎᒃ,” ᐅᖃᖅᑐᖅ.

“ᑕᒪᓐᓇᑦᑕᐅᖅ ᐃᒃᐱᒋᑦᑎᐊᕐᒥᒐᒃᑯ. ᐊᒻᒪᓗ ᖃᐅᔨᒪᓪᓗᖓ ᓄᖅᑲᖅᑎᑦᑎᔭᕆᐊᖃᕐᓂᑦᑎᓐᓂᒃ ᐱᑦᑎᐊᖃᑦᑕᙱᓗᐊᕐᓂᐊᓗᖕᒥ ᓄᓇᑦᑎᓐᓂ,” ᐃᕼᐊᓗᐊᒃ ᐅᖃᖅᑐᖅ, ᖁᕕᖏᕐᖢᓂ.

“ᐅᖃᕈᓐᓇᖅᑐᖓ ᐃᓚᒋᔭᐅᔪᓄᑦ ᐃᑲᔪᕐᑕᐅᓗᓂ, ᐊᕐᓇᖅ ᓵᓚᖃᕈᓐᓇᕐᒪᑦ. ᑕᒪᑐᒧᖓ ᐊᑐᕐᓯᒪᖕᒥᒐᒪ,” ᐅᖃᖅᑐᖅ.

ᐸᖕᓂᕐᑑᒧ ᒪᓕᒐᓕᐅᕐᑎ ᒫᒍᕆᑦ ᓇᒐᓱᒃ ᐅᖃᓚᐅᕐᑐᖅ ᓄᓇᕗᒻᒥᐅᑦ ᖃᐅᔨᒪᔭᕆᐊᖃᕐᓂᖏᓐᓂᒃ ᐱᒋᐊᕈᑎᐅᕙᒃᑐᓂᒃ ᐱᑦᑎᐊᖃᑦᑕᙱᓗᐊᕐᓂᕐᒥᒃ.

“ᐃᓚᖏᓐᓂᒃ ᐱᔾᔪᑎᒋᔭᐅᔪᓂᒃ ᖃᐅᔨᒪᑐᐃᓐᓇᕆᐊᖃᖅᑐᒍᑦ ᓄᓇᕗᒥᑦ. ᐊᒻᒪ ᐃᓚᖏᑦ ᑐᑭᓯᓯᒪᙱᖢᑎᒍᑦ. ᖃᓄᐃᓕᐅᕐᓯᒪᓂᒃᑯᑦ ᒪᐅᓇ ᐃᓕᓐᓂᐊᕆᐊᖅᑎᑕᐅᖃᑦᑕᕐᓂᕐᒧᑦ, ᕿᒻᒥᓂᒃ ᑐᖁᕋᐃᓂᕐᒧᑦ … ᐊᒻᒪ ᐊᓯᖏᓐᓄᑦ ᖃᐅᔨᒪᙱᑕᑦᑎᓐᓄᑦ,” ᓇᑲᓱᒃ ᐅᖃᖅᑐᖅ.

“ᖃᓄᐃᓕᐅᕈᑎᐊᓗᐃᑦ ᑕᑯᖃᑦᑕᖅᑕᕗᑦ ᐊᒻᒪ ᓵᙵᔭᑦᑕᕗᑦ ᓄᓇᑦᑎᓐᓂ ᖃᐅᑕᒫᓐ —ᑲᑉᐱᐊᓇᖅᑐᐊᓘᖕᒪᑦ.”

ᒪᓕᒐᓕᐅᕐᑎᐅᔪᑦ ᐆᑐᓇᖅ ᒦᓚ ᐊᑦᔪᑲᒃ ᑲᒥᙳᐊᒃ ᐊᒻᒪ ᐅᓂᒃᑲᐅᓯᖃᓚᐅᕐᒥᔪᖅ ᐱᖃᓐᓇᖏᓐᓂ ᐃᓚᖏᓐᓂᒡᓗ ᓇᐅᖑᔪᓐᓃᖅᑐᓂᒃ ᐱᑦᑎᐊᖏᓐᓂᐊᓗᖕᒧᑦ.

“ᐊᕐᓇᕐᕕᓐᓂ ᐃᓅᔪᓐᓃᑐᖃᓚᐅᕐᑐᖅ ᐃᓄᐊᕐᑕᐅᓪᓗᓂ. ᐊᑖᑕᑦᑎᐊᒃᑯᒻᒪ ᓵᑦᑎᐊᖓᓂ ᐊᒻᒪᓗ ᐊᓈᓇᑦᑎᐊᕋ ᖃᓄᐃᓚᐅᕐᒪᖔᑦ ᖃᐅᔨᒪᙱᑦᑐᖓ,” ᑲᒥᙳᐊᒃ ᐅᖃᓚᐅᕐᑐᖅ ᕿᐊᕈᔪᒃᖢᓂ, ᐃᒡᒐᐃᖅᖢᓂ ᖁᕝᕕᐅᖅᖢᓂ.

“ᑎᓴᒪᓂ ᐸᓂᖃᕋᒪ. ᐊᒻᒪᓗ ᓴᐳᔾᔭᐅᓯᒪᖁᕙᒃᑲ, ᓄᓇᕗᒥᑦ ᐊᒻᒪ ᓄᓇᕐᔪᐊᒥ,” ᐅᖃᖅᑐᖅ.

ᓯᐅᑎᐊᐱᒃ ᐃᓱᒪᔪᖅ ᓄᓇᓖᑦ ᐊᒻᒪ ᐃᓄᐃᑦ ᑲᑐᔾᔨᖃᑎᒌᖏ ᓄᓇᕗᒥᑦ ᐱᑦᑎᐊᖃᑦᑕᙱᓐᓂᐊᓗᖕᒥ ᓄᖅᑲᖅᑎᑦᑎᔪᒪᓂᖏᓐᓂᒃᑕᐅᖅ.

“ᐅᓇ ᐱᓕᕆᓂᖅ ᑲᔪᓯᖁᑐᐃᓐᓇᕈᒥᓇᖅᑐᖅ. ᖃᐅᑕᒫᑐᐃᓐᓇᐅᙱᒻᒪᑦ. ᑲᑎᖃᑎᒌᖕᓂᖅ ᑕᒪᑐᒧᖓ ᐱᒋᐊᕈᑎᐅᖕᒪᑦ,” ᓯᐅᑎᐊᐱᒃ ᐅᖃᖅᑐᖅ.

“ᐊᒃᑐᖅᑕᐅᓯᒪᒐᑦᑕ. ᕿᐊᕙᒃᖢᑕ. ᐊᔾᔨᒌᙱᑦᑐᓂᒃ ᐃᒃᐱᒋᔭᖃᐅᓕᕐᖢᑕ. ᖃᐅᔨᒪᔪᓐᓃᖅᑐᖓ ᖃᔅᓰᕐᖢᖓ ᑕᐃᒪᐃᓯᒪᓂᓐᓂ. ᐊᕐᕌᒎᓕᕐᑐᑦ 30 ᐅᖓᑖᓂ ᐃᓄᐊᕐᑕᐅᓚᐅᕐᓯᒪᑎᓪᓗᒍ ᓄᑲᕋ ᐊᒻᒪᓗ ᖃᓄᐃᒻᒪ ᑕᐃᒪᐃᑕᐅᓯᒪᓂᖓᓂ ᖃᐅᔨᒪᙱᑦᑐᒍᑦ.” ᐅᖃᖅᑐᖅ.

“ᐅᓪᓗᒥ ᓂᐱᒋᔭᐅᒐᑦᑕ. ᓂᐱᒋᔭᐅᓂᐊᖅᖢᑕᓗ ᓯᕗᓂᒃᓴᑦᑎᓐᓂᑦ.”